|
|
 عونكليب بس
|
(1)
انت
آمال الغلابة
وشهقة الحرف البشابي
للشمس
لما تتلبسني الكتابة
ما نحن بيننا
وبين شعاع الشمس ميثاق
لانو اصلا نحن جد من صحابا
بيها اتجمرنا حين
بيها اتدفينا
في الزمن الشتا
وبيها قابلنا الحقيقة
رغم ارتال العساكر والكآبة
ليك مسدار فيه
وجعة
وفيه لوعة
وفيه احلام زول مسافر
بالطريق الفيه رجعة
يلاك نغني
ونكسر الحالة الرتابة
مني محاسيس الحروف
من الوتر
مني الكلام مليان وصوف
ويتك بيناتنا القصيد
قصة بلد
واحساس وليد
ماليه بالعزة المهابة
شمسا بتمرق من دغش
تربال وقفة
وطورية تعشق لي جريف
طول زمانا ما انهبش
ولبينة صافية مقننة
بي ريحة الولف النقي
لا زيف بيعرف ولا ارتياب
انا وانت والريدة البتشبه
نيلنا في زمن الخريف
احساس مشبع بالغني
وطربا وريف
وخجل عفيف
في عيون بينة تابة دابا
ريدتنا زي فلق الصباح
والجو ربيع
تكسي البطاح
روعة جمال واريج ندي
وكسوة نضارا وارتياح
والقاك
يا زولة لي
جاياني بي قرعةمعاني الانتماء
شايلاها رواب لي زمن
معدوم مطر يابس يباب
مزروعة جواي سنبلات
في كل سنبلة من هواك
سبعات من القمحات سنابل
وكل قمحة
فيك لمحة
وانت سمحة
وبيك بقاوم في العناد جوة السفر
يابنية زي بدرا سفر
انا بيكي بهزم في الصعاب
باكر بجيك
شايل غناوي الرجعة ليك
عشم السنين جوة العيون
قدام عينيك
كم ليك بتفجر غناوي
وكم ليك بتسلسل حجاوي
ونبقى فرحانين سوا
انا
وانت والنيل الجميل
واروع صحاب
وبس
|
|
 
|
|
|
|
|
|
|
|
Re: عونكليب بس (Re: د.محمد حسن)
|
(2)
لما بيننا
تبقى تنصهر المسافة
وتبقى نبضة
ببقى مشتاقك كتير
وابقى ادفر في الزمن
من بدايات المسا
ولما يبقى الليل ضرير
شان اقابل نور صباحين
يا صباحي
وفجاة في عز السهر
لما يتعز المنام
ببقى الكلام
ناعم حرير
والندى
يكسي البكان
والاماني الغارقة في جوف الحلم
تصبح عصافير
بيناتنا موعد
جوة غيمتين شايلة
فال خيرا وفير
ينزل على قلبينا
تهتز القلوب
تنتج حروفا ابتهاج
ويبقى الجمال
منبع عيونك والعبير
انا ليك
كان قد نذرت حروفي
قبال السحر
لي مقلتيك
كان المكان الضفة
والنيل والنخيل
وكان الزمان وقتا عصير
اصلو الكلايكة بترفع الاعمال
في الوقت العصير
والنيل بكون
ياحلوة في اجمل نضارو
والنيل بكون غضا طرير
مركب
تعاند للرياح
ومرت تماشيها الرياح
والساقية يتوقف انينها
ويزيد حنينها عشان
الموية قلت من قودايس المحبة
واتيتمت هادي الجروف
لمن صلرخ في الريح صفير
انا
وانت
والسفر عنيد
اهواك رغم تكاثر الاحن
رغم الموانع البينا
والشوك الكتير
خلينا في النضم السمح
وحكاية الريدة
والقلب البوح
والشوق مدكن في العيون
ومرات
عليك ينتشر الوله
لمنيزي وعليك يطير
وتقولي لي
( نم حذيثك
في اليالي النادية
والقمر المنير
وصف حنينك
والسهاد
كيفنك بكون فرح النجوم لمن تنم
وتقول كلاما جد حرير)
وضحكت يا دي البنية
الساكنة
في ننو العيون
وهمست لي قمرية بتقوقي
في نيمة الحوش الكبير
اهديك غناي
شان صوتك التريان يزين للحروف
ويتلاشى يا القمرية خوف
الكلمة زي الوردة
والوردة تحمل جوة في جواها
مستودع رحيق
والقول رقيق
والاندياح
بينانتنا
غنوة وصوت كمان
واحساس دفيق
وصهيل قوافي
تشابي لي اعلى السماك
شان الروي
وحرفا مجرتق بالضرير
برقا برق
وغمزت ليك في اللحظة دي
بي بركة المطرة البتغسل للحزن
بي بركة الفال البرق البفول للخلوق
خليك بخير
وبس
| |
|
|
|
|
|
|
|
|
 Re: عونكليب بس (Re: د.محمد حسن)
|
(3)
صباح شوقك كما الانسام
يجيك هادي
صباح شوقا كما السيل النزل جارف
صخيب صوتا عنيف هادر
صباحا فيه انفاسك
والوانك
وفيه من السحاب انداك
عشان انت الصباح زاتو
وحكاياتو
وجمال بادي
عشان خلقوك من طين الجروف النية
قبال الخريف سارف
رسمتك في الغمام ايقونة
للزمن البكون عادي
زمن فيه السلام راكز
زمن فيه الظلم خايف
واشوفك انت الوان الخريف
سايق لي ركام نادي
شهقتك
والحروف امشاج
ردتك والقصيدة درار
حمل جوة الرحم روعة
وكان مولودنا
-يا زولة
لما تغيب
تدي القلب لوعة-
مزازيك تطرب الرادي
حمامات للسلام غنت
على نيمة بتغازل النيل
اريجك من عبق الدعاش الجاي من
برقا شلع عبادي
من غادي
خريف كابب
ملان بي خير من الرحمة
وعناصر من اسنا برقا لمع
طربان
سيولة بتغسل الوادي
وانا وانت
كما النخلات
كما الاحلام
عصافير في افق حايمة
كما الامال
بتتحقق عشان الشفع
الشايلين مخايهم
مستفة باليقين والحب
ارسل ليك كم حرفا
ويجيني كتيركمان صادي
معطن بي حرير صوتك
نغم شادي
وبس
| |
|
|
|
|
|
|
| |
د.محمد حسن
عماد قريش
أحمد الشايقي
فيس بوك
تويتر
انستقرام
يوتيوب
بنتيريست