صباحك خير ونهارك ضو طيب أيام رقة أنسام ليلك مجرتق بالنجوم ليك المحبة والسلام
صباحك خير ونهارك ضو ريحتك صندل الود الكبير عطَّر ترانيم الكلام محلق وطاير مالى الجو حالق وماشى معبا بالريد الكتير حفيان يقالد فى الدروب فرحان يطايب فى الشدر نشوان يقسم فى الوئام وليك المحبة والسلام
صباحك خير يا شوق طويل يا حب سكن جوه المسام ريحة القهوة فى وش النهار يا نيل نبيل يا قيف مكحل بالخدار يا ليل جميل يا قمرا بتوصى الغمام قول للشمس تفتح شبابيك الوئام تغشى البيوت قبل الزحام وليك المحبة والسلام
صباحك خير ونهارك نور بى كل التفاصيل الأنيقة و كل مواقيت الحبور وكل فجه تقول حديقة والأغانى تبقى سور كل كلمة تكون حقيقة والحروف موكب زهور كاتبه حبك بالتمام وليك المحبة و السلام
صباحك خير يا نشوة فى روح النشيد يا حجوه فى مغرب فرحنا يا نمه فى مسدار مشينا الجاى ليك حتما اكيد يا حلمة سمحه ومفرحه متوهطه عز المنام يا حب شديد عليك المودة والمعزة وليك المحبة والسلام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
ابو جهينة
فيس بوك
تويتر
انستقرام
يوتيوب
بنتيريست