|
كجيت خيمتى فى وش السؤال
|
و مشيت عليك ومشيت عليك كجيت خيمتى فى وش السؤال وسكتّ لا حسا نبت فينى ولا فرهدت جوه العيون شتلة صياح وقعدت احسب فى البواقى عدد السنين الجات وفاتت روحت طعم العمير الأصلو راح ودم القصائد فى العروق انشر زى دفق السواقى غيم المنى الحيّن ضروع الشوق شايله سماهو عامتاهو الرياح صبيبو بعيد وما ملحوق نمات هواهو الماخده من ضى البروق ليلات عناهو وضوها المسروق خجلانه من جية الصباح حلمات مناهو الساكنه فى ليل الجراح
مشيت عليك وقبال يحين وقت السؤال سكتت عويناتك وابت جاوبنى بُعدك والمحال مشيت عليك شايل ريدى عيديه اقسم فيهو للسمحين اضاير بيهو شوق الروح اشتت منو للواقفين واضرّع وسط ناسى القبيل راجين مرقة شمسك الضهريه قاعدين تحت ضل الحنين مالين نواحى الحزن الطوّل وفينا مجدّع خايفين من تساويف السنين
مشيت عليك قصدى الوصال فتر القلب وجريت نواحيك ما وصلت ليك تعب الدرب مشيت عليك اتوكلت واتحسبنت ومعاك رجيت جية المطر لبست ليك بردة صباى كتبت فى لوح الفرح إسم الخبر وربطت فى اطراف مناى باقى الأتر تاورنى فرحى الفات زمان ساعة لقيت وشك حداى دفنت فتر الليل مع باقى الجراح الحلوه يا ست السماح
|
|
|
|
|
|