|
|
 الجلابة الحلوين
|
08:56 AM Aug, 23 2015
سودانيز اون لاين
أبوبكر عباس-الإمارات
مكتبتى فى سودانيزاونلاين
أغنية مصطفى سيد أحمد البقول فيها:
كتبت ليك لا بيني بينك ريدة لا قصة غرام
مكسراني
وخاصة إضافة مصطفى لمقاطع الحجى الشعبي:
يا قمرا أقلبي السنسنة الحمرا
شوفي ليه ما جا
ونحن صغار أهلنا كانوا في حجاهم لينا عن فاطنة السمحة
كانوا بضيفوا ليها مقطع بتقولو فاطنة السمحة في رحلة بحثها عن أبيها الجلابي مُخاطبة قافلة جلابة مرّت من عندها:
آ جلابة هوي
أبوي صفتو ونعتو ما شفتوا؟
- ما شفنا ما شفنا
طوالي بتذكرني بأهلي الجلابة في بداية السبعينات
وبتذكرني بتداعيات يحيى فضل الله وكتاباتو السمحة عن الجلابة الحلوين.
طيب يا أبكر، اللفة الطويلة دي داير تقول بعدها شنو؟
سألتوني؟
بجيكم وقبل أجيكم أخت ليكم تحذير البوست:
أي مداخلة تخلو من الحب للجلابة سوف أحذفها
ممكن نقبل كجينكم للجلابة، لكن لازم يكون كجين بحب.
مفهوم؟
|
|
 
|
|
|
|
|
|
|
|
Re: الجلابة الحلوين (Re: أبوبكر عباس)
|
قبل أبدأ خلوني أكتب ليكم الرزمي أو سيرتي الذاتية الجلابية
- أهل والدي هم ناس الخواض، ما ناس الخواض الشيوخ ناس أسامة بتاعين الشعر
لا لا ديل صحي مسميين على الشيخ الخواض، لكن علاقتم بالدين متعادلة وهم ملوك التجارة بمدينة ود مدني وغرب شندي
- أهل أمي لوالدتها لوالدة والدتها ناس الشيخ مصطفى الأمين، والشيخ دا خال حبوبتي أم أمي لزم وشقيق لوالدتها مدينة بت أبو نخيلة
أي زول بعد دا ممكن يشكك في أصالتي الجلابية؟
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
قصة يحيى فضل الله بتاعت غافلة الجلابة السدرت غربا، وريّحت في قرية غرابية، وأجمل شبانها (شبان الغافلة) بعد شرب ليهو كورة لبن من بت غرابية، قبل تسقيهو اللبن قصت ليها شعرة من راسهو ودخلتها في برمة،
القصة دي حافظها صم بعد قراءة واحدة قبل أكتر من عشرين سنة،
لو السيرة لقدام جات؛ بتمها ليكم
ولو البوست إنقلب معركة؛ الله غالب.
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
مساعدتنا للإنجليز لضرب أم درمان كانت خيار إستراتيجي ممتاز من جدودنا (أعتقد كمان ما كان عندهم خيار تاني).
البارجة المتمة التي دكّت قبة المهدي وأدخلتنا أم درمان فاتحين بعد الهزيمة النكراء التي بُلينا بها في المتة من قبل محمود ود أحمد،
كانت عنوان عهد جديد لينا، والحمد لله الإنجليز لم ينسوا أصحابم
ومن ديك وعييك ما خلينا قرش يقع الواطة لميناها تعريفة تعريفة
تذكروا الفحم الكا بتعبى قدام الدكاكين في مدن مثلث نقد والمدن الأخرى؟
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
| Quote: هدي البوست المقنطر ده لكل الاوغاد اللي حايجو يشدوك |
يا حيدر، إتّا قائل بكري أبوبكر دا إختارني ساكت وبدفع قروشو ساكت؟!
أهم مهمة عندي قبل التثقيف والإستنارة
أنو أخلي "الأوغاد" ديل أوغاد حلوين
أقل حاجة
لو إخترت تكون وغد
خليك وغد حلو
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
| Quote: أهل أمي لوالدتها لوالدة والدتها ناس الشيخ مصطفى الأمين، والشيخ دا خال حبوبتي أم أمي لزم وشقيق لوالدتها مدينة بت أبو نخيلة |
كدي أولا ثبّت لينا خؤولة الشيخ لحبوبتك
Quote: شهدت المتمة في 1889م مولد الشيخ مصطفى الأمين، الذي نشأ بـ (البلو) مقر قبيلة الجعليين،
ويرجع أصله إلى فرع الحمداب من جده المك محمد (مك الجعليين) وينتمي أيضاً لجعليي المسلماب
من جده المك (بشير ود عقيد) آخر مك للجعليين، ترعرع في حوش خاله (عوض الكريم أبو نخيلة)
الذي أصيب في موقعة أبوطليح 1885م، تزوج بنت عمه (ستنا) وأنجب منها (أدريس)، وبعد أن
توفاها تزوج بأختها التومة فأنجب منها بنتين وثلاثة أولاد هم آمنة وعلوية ونصر وعثمان
ومصطفى، ثم تزوج زينب وأنجب منها خمس بنات وولدين هم البشير والأمين فايزة وكوثر
وحليمة وصفية ونجوى |
| |
|
|
|
|
|
|
|
|
|
Re: الجلابة الحلوين (Re: معاوية الزبير)
|
Quote:
يا أخي قبل أيام في واحدة رسلت لي رسالة قالت لي:
إتّا أول زول ينقد الدين وما أكرهو
إتّا من وين يا ولد؟
قلت ليها من مدني الجميلة
مدني يا أجمل خبر |
الله لا جاب الزعل ياخي الناس بتختلف وتتفق والمسالة بتنتهي في ساعتها
ربنا يديم المودة بين الناس
| |
|
|
|
|
|
|
|
|
 Re: الجلابة الحلوين (Re: أبوبكر عباس)
|
ابوبكر الجلابي بجوا يرشوك الجماعة هههههههه
ذكرتني قصص حبوبتي الله يرحمة آمنة بت عثمان العمرابية
طوالي لما كنّا نمشي السودان إجازات بحب اقعد جنبها وأرقد جنبها في السرير
ومعاي دفتري بكتب البتقولوا من قصص وكلمات في العامية السودانية ومرات بسجل كلامها
كانت رحمة الله عليها حنينا وبتريدنا شديد وما بتقول لينا غير اولاد الخير
كانت مسميا ابوي العشاء بالبن ومرات بتقول لي الخير
كانت جميلة رحمة الله عليها مراة طوويلة وبيضاء وجسما جميل فيها عيون سبحان الخالق
ورموشا طويلة والشعر رغم انوا ابيض لكنوا طويل
قالت زمان لما اتزوجها وقفوها في السباته قاسوا شعرها بالعصاية شوفت كيف
والشلوخ والشفة الخطراء جمال نساء البغنوا لي في حقيبة الفن زمان هههههه
اها قصة فاطمة السمحة وفاطمة القصب الأحمر ديل بعرفهم و قصة الغرابية مع الجلابي دا انا بعرفة ومكتوبة في دفتري عندي ههههههه
فالجلابي قالوا ما فتح الا بعد البرمة انكسرت وقال ليك سال الجماعة يا ناس ما شفتوا غافلة جات عابرة بجاي
الغرابية اتكسرت وادشدشت في الجلابي هههههههههه
دا يكون السبب المزعل الغرابة من الجلابة ؟
هل قصة السحر دي حقيقية بمعني ممكن الواحد يتعمل لي سحر؟
غايتوا ربنا يستر أرجاء الرش ههههههههههههههه
| |
|
|
|
|
|
|
|
|
|
Re: الجلابة الحلوين (Re: وضاحة)
|
طبعا يا وضاحة، أهلك العمراب هم الجعليين السمحين ومتعلمين ونحن في هجمتنا المرتدة بعد دخول الخرطوم مع كتشنر، قعدنا العمراب في أم درمان ومسكناهم وزراة الثقافة، وبقية الجعليين الناشفين إنتشرنا نلقط في أبقرشينات، بعد شوية بحكي ليكم كيف سيطرنا على تجارة المدن والقرى وفي سبيل دا قدمنا شهداء كثيرينو الكلام دا مؤثق في أحداث خمسة وخمسين
المهم يا وضاحة، البوست لو دخلتو أسلحة ثقيلة ممكن تعملي ساتر
| |
|
|
|
|
|
|
|
|
|
Re: الجلابة الحلوين (Re: وضاحة)
|
| Quote: الغرابية اتكسرت وادشدشت في الجلابي هههههههههه |
ياحكم .. دي ضربة جزاء 
| Quote: غايتوا ربنا يستر أرجاء الرش |
عملتي كويس لصقتيها في بكرينا
-
ازيك ياوضاحة
| |
|
|
|
|
|
|
|
|
Re: الجلابة الحلوين (Re: حيدر حسن ميرغني)
|
حيدر حسن يا نيبالي هههههههههههههه
مشتاقين
هي لو ما اتكسرت كتبت الجلابي وقفلتوا في البرمة وقالت لي لما اموت ادفنا معاي في قبري الحاقده ههههههههه
عمت الراجل وسكتتوا عشرون عام وخلت بتوا تبكي وتسال القافلة
ديل ناس صعبين خلاص هههههههه
خليك قريب علشان تحميني من الرش والهواء هههههههههههههها
| |
|
|
|
|
|
|
|
|
|
Re: الجلابة الحلوين (Re: قسم الفضيل مضوي محمد)
|
Quote:
يا سيف ناس العوة كلهم أصحابي
بريمة صاحبي
والغالي صاحب بريمة صاحبي
بشاشا صاحب دينا صاحبتي
دينق صاحب معاوية الزبير صاحبي |
عامل حيطه يعنى
تخريمه:
على الطبيعه الجلابه مع بقية المكونات سمنه على عسل,,,الهرجه في الاسافير دي بس
| |
|
|
|
|
|
|
|
|
|
Re: الجلابة الحلوين (Re: اباذر عبد العال)
|
سلام يا بكور .. قلت لي نطام طابور خامس
من عاما اول و كدا.. نزعاتك الشريرة شايفها
مرقت من الخاص للعام، ما نورتنا في الحتة
دي بكري برضو بدفع ليك ولا لا..
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
| Quote: وقبل العودة أرحب بالجميل صديق (الغالي) |
عبثاً تحاول أن تصنع من فسيخ الغالي شربات
مداخلتين في 24 ساعة دي ذاتا كتيرة عليك والله يا الغالي
| |
|
|
|
|
|
|
|
|
|
Re: الجلابة الحلوين (Re: بدرالدين بابكر مصطفى)
|
ول أبا أبوبكر
سلام ..
Quote: يا سيف ناس العوة كلهم أصحابي
بريمة صاحبي
والغالي صاحب بريمة صاحبي
بشاشا صاحب دينا صاحبتي
دينق صاحب معاوية الزبير صاحبي
ما بتجيني عوجة
خلينا نزلق حاجاتنا براحة براحة |
والله يا ول أبا أبوبكر أنت زول ما شاء الله عليك .. وأؤمن علي ما قلت أن الجلابة حلوين .. وأكثر من حلوين .. بالجد حقيقة .. وما ح أطيل فى هذا الجانب.
لكن يا ول أبا أبوبكر، أنا ح أتونس معاكم كما أردتم .. مع أحتفاظي بالرد بأي أسلوب أريد.
ونبدأ معك بالأتى .. أنت ذكرت جدك الشيخ مصطفى الأمين .. ودي فيها أشارة للبوست المفتوح .. ومازال.
أقول لك نحن البقارة من صنع تأريخ ناصع للشماليين ..
أمسك فى أيديك السيد الرئيس عمر البشير .. الرجال الذي وقفوا معه .. ليس من أجل مال السحت .. ولهط حق الناس .. بل وقفوا معه من أجل نداء حماية الوطن السودان من التمزق هم البقاري أهلي .. ونحن نعتبر الرئيس البشير بقاري .. ومعارك "قوز دنقو" خاضوها رجال بقارة، وهى التى جعلت الهواء البارد يتجتاح السودان فى كل أربعائه.
أضف .. أن الأمام المهدي عليه شعابيب الرحمة .. هاجراً إلي غرب السودان وأحتمي بقبائله دون قبائل الشمال والوسط .. وتم تحرير السودان علي يد أبناء الغرب دعماً للأمام ..
جدك الشيخ مصطفي الأمين .. جمع ثروته التى نعرفها نحن البقارة قبلكم أنتم الشماليين من منطقة شركيلا .. ومدينة شركيلا التى بنى فيها الشيخ مصطفى الأمين دكانه من الزنك أكثر من ستين سنة مضت ومازال دكان جدك موجود بهيئته الاولي .. هى أي شركيلا هى .. حاضرة من حواضر البقارة .. تقع فى الجزء الشرقي من جنوب كردفان جنوب خور أب حبل .. جنوب مدينة أم روابة علي مسافة ساعة ونصف الساعة .. أي جنوب خور أبو حبل .. ومدينة شركيلا هى حاضرة قبائل الهبانية من البقارة .. وكذلك فيها عدد كبير من الحوازمة الحلفا .. والجوامعة ..
وشركيلا مدينة رائعة روعة لا تحدها حدود .. فيها طبيعة خلابة ومناظر ساحرة .. وتقع فى منعطف خور أبو حبل .. الذي تفيض مياهه في فتر الخريف فى جوار المدينة علي مسافات شاسعة علي أمتداد البصر .. فتري أشجار المانجو، والكتر والقرض واللعلوب .. كأنها تسبح فى بركة مياه .. وتعم المنطقة كثير من الطيور مثل البجع الذي يأتى بكميات كبيرة وطيور الدباز (الحمام البري) .. وغيرها .. من تلك المنطقة البقارية أنطلقت تجارة شيخ مصطفى فى المحاصيل .. يأخذ محاصيل أهل المنطقة ويسوقها فى مدينة أم روابة .. ثم تطورت تجارية ليفتح دكان فى مدينة أم روابة لكى يوزع محاصيله منها .. وهكذا تطورت تجارته وأرباحه وأمواله.
بجيك راجع للغريق ...
بريمة
| |
|
|
|
|
|
|
|
|
|
Re: الجلابة الحلوين (Re: سيف اليزل الماحي)
|
ابوبكر..
صباحك خير..
كفا الله الشر..
حصل ليك شنو ؟
وبما أنه دى عين وصابتك..
فانا رسلت ليك صّرة بخور تيمان..
ومعاها فحم خليجى..
وبعد ما تتبخر..
تشرب ليك كباية شاى كآربة..
وتتغطى بى فردة الست الوالدة الفوقها البركة..
وتنوم..
و لما تصحى من النوم..
حتلقى الابالسة طاروا..
وطار معاهم البوست..
| |
|
|
|
|
|
|
|
|
|
Re: الجلابة الحلوين (Re: nour tawir)
|
وما دام أختنا وضاحة .. أعطت نفسها الحق تقرق علي الغرابة .. نقول ليها أنت ذاتك بشحمك ودمك غرابية ..
كتب أخى الذي لم أراه .. أحمد محمد الجعلي .. الأتى:
Quote:
Ahmed Mohammed · الأكثر تعليقا
الاخ بريمة سلامات وتحية .. بعد اكتشاف الحمض النووي في تحديد السلالات والاجناس ؛؛ تم تحديد السلالة ( R 1 B ) كبصمة جينية اساسية للعرق الاري الاوربي وكانوا يعرفون بشعوب البحر نسبة لتواجدهم على سواحل شمال افريقيا وولاية برقة الليبية تحديداً مما اطلق عليهم المؤرخين القدماء بشعب الليبو او المشاش .. فبعد الضعوطات والحروب التي تلقوها من السكان الاصليين بدأت هذه القبيلة الارية فى التشتت والنزوح جنوباً تجاه الصحراء مما اصبحت مكون اساسي لبعض القبائل الافريقية .. اذ توجد هذه البصمة في كثير من القبائل في كل من تشاد والنيجر وفي بعض بطون الطوارق ( الرجال الزرق ) والهوسا وبعض قبائل الفولان (الفلاتة ) والـ امبررو اى الواداوبي .. فالناظر لهؤلاء الشعوب من اول وهلة يحسبهم على العرب اكثر من الافارقة .. حيث اللون ذو السمرة الفاتحة المايلة للصفار والانف الجميل المحكم والشفاه الدقيقة والعيون النجلاء والقوام الممشوق لا قصراً ولا طول .. يعني بصراحة والحق يقال اناس جميلين .. والانسان العاقل يعرف انهم ليس بزنوج من اول نظرة ... اتذكر مرة وانا جائي من مدينة الدمازين في طريقي للخرطوم ؛ استوقفتني امرأة جميلة جمال لا يوصف ابدا . بعد ان استحلفتني بكل الاديان والابنياء وغالي ونفيس ان اوصلها في طريقي الى مدني .. المرأة .في شكلها وسحنة لونها وتقاطيع وجهها اقرب الى عرب الخليج مننا نحن عرب السودان ؛؛فظنيت ان سودانيا مغتربا اختطف احدى اميرات ال سعود واتى بها الى السودان وتزوجها .. فاثارني الفضول ان اعرف من اي بلد وجنس هي .. فسألتها من اي عرب انت ؟ ؛؛ فالجمتني الدهشة وكدت افقد عقلي عندما اخبرتني بانها ليست عربية وانما هي من الفلاتة الفوطا .. يا اخي اقسم لك بانها اجمل من ممثلات السينما .. ومن تلك اللحظة وانا مغرم ومتيم وباحث عن الفلاتة الفوطا وعن اصلهم واماكن تواجدهم الى يومنا هذا .. فلا شك ستجد عندي الكثير عن قبائل الفولان تحديدا . |
أها ونزيدكم ..
Quote: لمشاركة الأصلية كتبت بواسطة أبو أحمد (المشاركة 59405)
فى طريقى من نيالا إلى منطقة ود هجام فى جنوب دارفور مررنا بمنطقة تسمى (تُلس) حيث إنفجر إطار الاندكروزر الذى يقلنا أنا و بعض الأصدقاء بالقرب من أحد الوديان الموسمية و التى تتميز بكثافة الأشجار على ضفتيه فقررنا الجلوس تحتها حتى يصلح السائق الإطار و عندما صرنا على حافة الوادى الذى كان عميقآ و نظرنا حولنا شاهدنا مجموعة كبيرة من البنات على درجة من الجمال الطبيعى تبارك الخلاق فيما خلق اقسم بالله أننى لم أشاهد مثله من قبل و لا بعد ولا حتى فى القنوات الفضائية ، القوام الممشوق ، الشعر الأسود الغزير و الناعم و اللون القمحى الخالى من أى شائبة ، العيون الواسعة و الحواجب المقترنة ، بإختصار جمال يفوق الوصف ، لدرجة أن صديقى قال ( الظاهر نحنا موتنا و دخلنا الجنة و ديل حور العين )، بالمناسبة قرية تُلس هى منطقة المزيع إسلام صالح و القبيلة التى تسكنها تسمى فلاته فوطه .
العطبراوى أوعك توصل الكلام ده للحكومة .... |
Quote: Ahmed Mohammed · الأكثر تعليقا
مادام وضاحة جات ناطة انا موجــــــــــود .. واصلا كنت منتظرها .. امثال وضاحة وعاصم هؤلاء ناس مبتوري النسب ولديهم عقدة الاصل والرجوع الى الجزور فلذالك يتخفون تحت مسميات القبائل الاخري مثل عاصم .. اما ناكرة ذاتها وضاحة وهي من الفلاتة الفوطة الذين جلبهم للسودان جمع السكسك وهم في طريقهم من والى الحج ( والله جد ) .. وشوفوا كلامي دا لو ما وضاحة جات نكرت اصلها وانتمت الى فرع اخر من فروع الجعليين .. ودا اذا ما قالت اصلها اري .. لكن يا وضاحة هذه هي الحقيقة وان اصلكم فلاتة فوطة .. وانا اعرف الجعليين اولاد عرمان كلهم الا جدك هذا لم اسمع به ابداً ــــــــــــــــــ بريمة عليك الله الناس الهوان ديل اتركهم ما تعملهم راس وقعر ديل ناس قراضة قبايل ساكت يا اخي.. وزي ما شايف قاعدين في بلاد العرب وبيشتموا في العرب وكل اعتمادهم على لونهم الهجين دا ؛؛ لكن عندما تحمى وتحك كوعها بتكون ليهم الحمرة الاباها المهدي ذاتها .. اما بالنسبة للجماعة الما معربين ديل نصيحة مني ليك .. ما تتكلم مع الحلّوف تملا خشمك صوف . |
Quote:
Quote: • Ahmed Mohammed • الأكثر تعليقا
وضـــــاحـة .. اذ ا صلاح السنهوري الانتى واضعه صورته في بروفايلك دا اخوك او ابن عمك كما بتقولي وتدعي ؛؛ معناها انت من اصل غير عربي نهائي وحديثين عهد بدخولكم للسودان ؛؛ اذهبي وابحثي عن جزورك في غرب افريقيا وريحينا من التفاخر والنفخة الكذابة بتاعتك دي .. انتم مجرد حلفاء للجعليين .. . الساير بريمة ود بلل ارمي قدام ورا مؤمن الناس البشتموا فيك ديل قاعدين ام فكو ساااكت اي واحد بتطاول عليك امزل لي تحت اوريك اصلو وفصلو .. زي ناس وصاحة ديل ما يخموك ساي انتبه .
.• Ahmed Mohammed • الأكثر تعليقا
يا محمد عثمان الحاج .. انا معلوماتي غير مستغاة من النت وملم المام كامل بما قلت ؛؛ ومافيش حد افضل من حد في هذه الدنيا الا بالتقوى .. وكلام ود ضيف دا اعتبره زي شرك ( ام قيقي ) الشركوه للـ .......... قبض في الــ.............. ؛؛ انا مازلت منتظر وضاحة لتؤكد او تنفي سنهوريتها وبعد داك الفي القدر تجيبو المحارة .. السناهير عاشوا معنا وفي حمايتنا منذ مجئ جدهم للسودان والى يومنا هذا وهم حلفاءنا ولم نرى منهم الا كل خير سوى شغلهم كفكي ام بتاري .. لكن ان تاتي واحدة مثل وضاحة مش عارفة اصلها من فصلها وتنتحل صفة عرقية معينة وتتحدث باسم قبيلة كاملة وهي منها براء لتسئ للناس باسمنا حتي تؤلب علينا الناس بالعداء .. فهذا مالم اقبله منها ؛ فان ارادت ان تسئ للناس فالتسئ بصفتها العرقية فقط ولا تحشر الاخرين في ملاسناتها وتفتكر انها في مأمن .. ولمعلوميتك كل السناهير يعرفون ويعون كلامي هذا جيدا وهم عير ناكرين اصلهم ابدا ويعرفون جيدا من هم ومن اين جاءوا فان اردت ان تتاكد من كلامي فاسأل اي واحد من مثقفيهم وسيؤكد لك صحة كلامي بل اكثر .. فعليك الله يا محمد عثمان ما تستشهد لينا بكلام ود ضيف الله الذي قال الناس بطيروا .. وتكون ملكي اكثر من الملك .
• Ahmed Mohammed • الأكثر تعليقا
يا بريمة .. اردم ردمك ساااكت ؛ ووضاحة العاملة فيها من بني عدنان دي خليها التجي تنفي كلامي التحت دا عشان اوريها المكشن بلا بصل وتحرم تاني مرة تتطاول على حد وتعتز بنفسها وتقوله انا احر منك ؛؛ لاني سوف احفر لها عرقها من تحت الارض منذ مجيئ الحاج احمد السنهوري الكبير من غرب افريقيا .. يا بريمة
كثير من العائلات والاسماء اللامعة اليوم باسم الجعليين مجرد احلاف وراكبين اسم القبيلة عري ساكت ؛ وصدقني مافي جعلي اصيل بتطاول على الناس ابدا ؛ ولا بذكروا انهم جعليين عارف ليه ؟؟ لانه بعتبروها منقصة ... انا في انتظار وضاحة بنت القبايل لتجي تنفي او تؤكد وما تعمل رايحة من البوست .
|
ليه وضاحة تستهزأ بنساء الغرب .. وهى نفسها غرباوية !!
بريمة
| |
|
|
|
|
|
|
|
|
|
Re: الجلابة الحلوين (Re: بريمة محمد)
|
صديق الغالي عندو في اليوم مداخلتين فقط؟!!
كدي نلحق نجر في البوست دا شوية قبل ما يدركنا الصباح وتتجدد كوتة (الغالي) ويكون مزاجو اتعكّر بمشاغبات الجلابة ديل ويرشنا.
قبل دا، كدي أدوني ساعة تاني أمشي أتناول لي بيتزا من بيتزا هت، مييل فور تو وبكتّر السلطات، وبجي بشغل لي سي دي وبستمع لفاطمة عمر عبر هيد فون وهي بتغني لعثمان حسين وببدا بأغنية "يا ربيع الدنيا" وبونسكم عبر شاشة بكري دي.
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
Quote: بالمناسبة انت زول كتاااب رغم انف صديقنا الذي بكندا )):
الأمين إبراهيم من نافذة الفيس بوك
القالت منى عمسيب يقفلوها! |
عليك الله يا اللمين كلم "صديقنا الذي بكندا" وخليهو يفك عزلتو ويجي يستمتع بالكتابة الراقية دي
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
الخواجات عموما عندهم سينس ممتاز تجاه جغرافيا الأراضي وبشاركم في ذلك الرعاة الرحل،
أها أصحابنا الأربعة ديل بلفة صغيرة إكتشفو سهول الجزيرة وجدواها مع جغرافيا الأزرق
بسرعة شديدة رسموا الكروكي في راسم وحددوا مضيق سنار مكان للسد وترعة ترسم كرش مع الأزرق ضامة ما أمكن من السهول المنبسطة ومنحدرة شمالاً
قالوا قالوا لعبد الله وسعد قبل الكتلة أطلع فضي المتمة لجيوش ود أحمد قبل تصل
قالوا قال ليهم: أنا لسع جريّة نمر مزعلاني وكانت الإبادة
وقالوا قالوا لود تورشين ننسحب غربا تجاه الأبيض وندفن الآبار خلفنا
قالوا قال ليهم: ود سعد معاهو تلتمية قصاد عشرين ألف ولم يشرد، أجي أنا الخليفة ود تور شين أسيب أم درمان للكفار!!
ونحن لاحقا بنلمم في القروش شكرنا في سرنا المك نمر
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
بعد حكومة صاحبة الجلالة وافقت علي المشروع وكسبت الحرب،
أهلنا كان عندهم حدس خطير تجاه ما سيحدث، أبدا ما سكينا يدونا حواشات وفضلنا ممارسة تجارتنا البنعرفا من زمن القوافل
شكلنا لوبي تجاري خطير في مدن الوسط
سوق مدني دا في الأربعينات حتى السبعينات كلو كان من غرب شندي، والإنفتاح ونجاح المشروع درّ أموال ضخمة ظهرت معها البضائع والإحتياجات الجديدة، وظهر أهم شيء الإحتكار والتمويل وديل أحدثن فرق كبير في شكل التجارة القديمة بتاعت برمة يحيى فضل الله، ثم ظهرت السياسة وأخترنا الإنحياز لنظرة أبو هاشم
أحكي ليكم لمحة شكل التجارة بمدني بالسبعينات:
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
نسيت
يا بريمة، يا أخي، وإتّا بتتونس معانا هنا في البوست دا، عليك الله أفتح ليك نافذة شوف فيها فيديو فاطمة عمر بتغني في يا ربيع الدنيا حفلة أبوظبي عيد الأضحى.
البت الجلابية دي بتنزل الهستامين
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
الجلابي ابوبكر
ما قلت ليك بجوك الجماعة اها فكوك وطلعوني فلاتية هههههههههههها
يعني السماحة عند الفلاتة والجعليين شينين
عندنا السمار كتييير في اهلي بس سمار جلابة وظاااهرين من سحناتن هههههههها
يا جماعة وين عماد حسين
الوحيد البعرف في أصول الجعليين
خلي يجي يورينا أصول العمراب والعالياب والمسلماب والسعداب والنافعاب شنو؟
ديل كلهم اهلي وعندي فيهم لحمة هههههههههها
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
ابكر قصصدك ان البوست دا
معمول بحب !
اذن يلزمك ان تفك التسجيلات وتنتقل بحبوبتك (مدينة بت ابو نخيلة )
من ويتا والشيخ مصطفى الامين
الى سيقا. ست الاسم. واسامة داؤود اسياد النخل الجد جد
الجعليين لقو النخل وين ؟
--------------
بعد كدا ممكن نرجع نقرا البوست .....
** معمول بحب يا ناس المهاجر دعاية عميقة
لدقيق سيقا .،، كدا قوقلوها ..
| |
|
|
|
|
|
|
|
|
|
Re: الجلابة الحلوين (Re: دينا خالد)
|
انتي قاليك يا دينا نحن عارفين سيقا لغاية ما نعرف ليك "معمول بحب"
آخر كلمة في وزن سيقا سمعناها كانت (قبل كم وتلاتين سنة) لللاعب الزهرة خالد سيكا
| |
|
|
|
|
|
|
|
|
|
Re: الجلابة الحلوين (Re: معاوية الزبير)
|
Quote: Abubakr Ahmed Abbas · Elsunny
كنت ناوي أواصل، لكن كوتة بكري اليومية وقفتني وأنا كنت مفتكر نفسي غير!
عموما دا رد كتبتو لقسم الفضيل:
لا لا يا قسم الفضيل، أصلا ما حنزعل زول، والبجينا زعلان بنرضيهو وبنبايعو ودي خطتنا القديمة لي لملمة الدراهم
ما سمعت ناس الغرب بضحكوا علينا بقولم:
عيال جلاب لو لقيتا في الخلا بخلي ليك وليدا
الناس ديل عندنا معاهم قرابة الدم وحب أم درمان
أعجبني · رد · 2 ساعة |
هسي بالله البِدّي قروش للتاني منو عشان يكتب في سودانيز !
| |
|
|
|
|
|
|
|
|
|
Re: الجلابة الحلوين (Re: معاوية الزبير)
|
أم جلبة حبل القيتان
كان لقيتا في الدكان
يقول ليك يعني وازي كان
كان لقيتا وحيدا يديك وليدا
كان لقيتا في الغابة
يقول ليك وين يا يابا
كان لقيتا جنب القاضي
زح منا غاااااادي
أم جلبة -أم شليخ - ما ليهم غير النسنسة.....ليهم حق يصفوا كتشنر بالفاتح. ..... اصلكم بتحبو الفتح هههههههههه. ....
| |
|
|
|
|
|
|
|
|
|
Re: الجلابة الحلوين (Re: بريمة محمد)
|
| Quote: أهل والدي هم ناس الخواض، ما ناس الخواض الشيوخ ناس أسامة بتاعين الشعر |
في دي لقيتك جلابي حريف يا ابوبكر
لعب ضاغط ما في اي فرصة
النشرب قهوتي واجيك راجع ان الله مد في الاجال
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
Quote:
بعدين يا سمعة، البوست دا حنسناكم فيهو وخسمناكم بالرسول، تزرعوا فوقو الكراهية بشويّة محبّة، وما قصرت الأميرة دينا وقبلها الجميلة وضاحة جابن المعمول، والمعمول هو البسكويت المحشي بالتمر، يمين تضربو في نهار رمضان وإتّا فاطر بالدس، عادي بتكمل اليوم وإتّا في كامل لياقتك |
يا أبكر عباس نحن ناس نبق ولالوب وفقوس ودوم وعرديب خلينا من لغاويسكم الفارغة دي بسكويت محشي بالتمر وما أدراك. ...
أما جلابي فاضي شغلة. ..!!!!!!
| |
|
|
|
|
|
|
|
|
|
Re: الجلابة الحلوين (Re: اسماعيل عبد الله محمد)
|
Quote: أم جلبة -أم شليخ - ما ليهم غير النسنسة.....ليهم حق يصفوا كتشنر بالفاتح. ..... اصلكم بتحبو الفتح هههههههههه. ....
|
والقرد دا عندو كم مداخلة في الـ 24 ساعة
والله كونك تكون بني آدم أنا شايفا كتيرة عليك ..
ودا أمر الله وحصل، لكن مفروض تكون مربوط في كراع عنقريب
الله يقرفك ويقرف اليوم العرفنا فيه خلقتك الكريهة دي ..
وبرضو لجوء ماااااااافي
تقعد هنا في الحر دا
| |
|
|
|
|
|
|
|
|
|
Re: الجلابة الحلوين (Re: بدرالدين بابكر مصطفى)
|
.
| Quote: الجعليين لقو النخل وين ؟ |
الجعليين تطير عيشتم، حتى النخل يكاوشو من الجماعة يا دينا!
ويا دينا والنبي لو ما جدنا حاج الماحي دقا طار في الكاسنجر. التمر ده إلا يجيكم من بلاد فاس الما وراها ناس!
لكن مين يقدر يلغي إكتشاف النار؟ ولا أجدعها جعلي ههههههه
.
| |
|
|
|
|
|
|
|
|
|
Re: الجلابة الحلوين (Re: سيف اليزل الماحي)
|
الما بدورك في الضلمة يحدر ليك
زي بريمة دا الواحد منصب نفسو باحث في التاريخ والتراث ..
والامانة من صفات الباحث في التاريخ الاساسية و
بي نقلك دون بحث نفيت عنك صفة الامانة وبينت غرضك
ثم يا بريمة الحسد لزومو شنو ؟
حسد لي درجة يخليك تتعامى عن الحقيقة وتحاول تلويها
وشنو الكره العاميك يخليك ما بتشوف للدرجة دي ؟
ومعروف عن الحاسد انو مسكين وفاشل ووضيع
عشان كده بكره النجاح للاخرين ويحاول بكل الوسائل يرضي نفسيتو المريضة بالطعن في الاخرين وغمط حقهم
والسناهير نسبهم معروف وموثق
( السناهير ينتسبون الى جدهم السنهوري بن حمودة بن علي بن سليمان بن حمودة بن ربيع بن حسب الله بن دياب بن غانم بن حميدان بن صبح بن مسمار بن سرار بن حسن كردم بن ابي الديس بن قضاعة بن عبد الله بن مسروق بن احمد بن ابراهيم جعل )
منقول من كتاب تاريخ العرب واصول في السودان
دا نسب السناهير ولسان حالهم
أولئك آبائي فجئني بمثلهم إذا جمعتنا يا بريمة المجامع
ومجامع ترفعك لدرجة ان تجمعك بهم الا في الاسافير لكن في الواقع مثل العنقاء
| |
|
|
|
|
|
|
|
|
|
Re: الجلابة الحلوين (Re: علي محمد الفكي)
|
Quote: ويا دينا والنبي لو ما جدنا حاج الماحي دقا طار في الكاسنجر. التمر ده إلا يجيكم من بلاد فاس الما وراها ناس!
لكن مين يقدر يلغي إكتشاف النار؟ ولا أجدعها جعلي ههههههه |
ههههههههههه
| |
|
|
|
|
|
|
|
|
|
Re: الجلابة الحلوين (Re: سيف اليزل الماحي)
|
لاحظو الجلابي ابكر جمع كل هامش السودان في سلة واحدة
القرية النوبية الافريقية سورتود بدنقلا .................. مريدي
ما عربي جدو العباس وجلابي من بيت الشيخ
انتو يا عرب اظهرو على حقيقتكم
هو كعربي شايف السودان كدة
اطمئن يا حفيد العباس افارقة السودان برضو شايفين كدة
اقرب الى بعض من حبل الوريد لكن تقول شنو
لكن تقول شنو
فرق تسد
مبروك عليكم
قيامتكم حتقوم يوم يتحدوا اهل السودان مع مهمشي الهامش( عرب السودان)
بولاد قال للنبي د. جون قرنق ديمبيو
ادركت الان فقط الدم اثقل من الدين او كا قال
انتو يا اركزو وانتظرو الجايكم من شعوب السودان
الغالي قال الدشمان في نص الخرطوم
فاهم يا جلابي
المهم
صراحة انت زول وناس وكلامك حلو
مشغول جدا ومع ده متابع كل بوستاتك
ومنتظرك تكمل لينا( الدنيا الاتقلبت بطيزها)
تحاياي
| |
|
|
|
|
|
|
|
|
|
Re: الجلابة الحلوين (Re: علاء الدين صلاح محمد)
|
مرة من المرات ايام الطلب وهداوة البال زرت مع صديقي الكيك قريتهم شبشة وفي جلسة مع جدو النور فقلت لي انا اول مره اجي بحر ابيض وبعد ما صفق لي كم صفقة قال لي دا اسمو بحر كيوات يا ولد وعرفت بعد داك انو كيوات دا جد الحسانية وقال لي الدنيا دي ربنا خلقه عشان الحسانيه وكان في منتهى الجدية . وهو بقول الكلام دا .. فالجماعة غششوني انو عندو محبة صوفية للشيخ برير ود الحسين .. فسالتو انت الشيخ برير حساني فقال لي الشيخ برير كلامو برا هو وسكت شويه وصفق تاني قال لي اي الدنيا دي خلقوها عشان الحسانية لكن الجلابة افلح مننا .. بعرفو محل الحضرة وين ..
وفعلاً فالحين
الفلاحة دي ادتهم الرئاسة وين ما مشو
وخلتن يمسكو السوق في اي مكان لانو عندهم نظر استراتيجي
ومن فلاحتن تماسيح ما بعومو عكس التيار في حد شاف تمساح بسبح عكس التيار
عشان كده رمو طوبة الخليفة ودولة المهدية من بدري
والجلابي ما بحب الخسارة عشان كده كانوا مع كتشنر
وقدروا يوظفوا المعية دي توظيف باقي الى اليوم
الناس يدوب صحت وعاوزة تلقى كومه معاهم ما ممكن صعب
| |
|
|
|
|
|
|
|
|
|
Re: الجلابة الحلوين (Re: علي محمد الفكي)
|
المداخلة دي هدية للأستاذة نور تاور:
"دائماً ما كنت اتساءل: ترى هل كان من الممكن ان اكون انا هو انا بصفتي ممارساً لفنون الدراما، لو لم تكن هناك في كادوقلي في قلب جبال النوبة دار للسينما؟
المقترب من السينما يلاحظ لافتة كبيرة تتحلق حولها اللمبات الملونة التي كانت بالنسبة لنا تشكل نوعا من الإبهار لا يوصف، اللافتة مكتوب عليها باللون الأبيض على خلفية سوداء (سينما كادوقلي لصاحبها عمر الخليفة تأسست العام 1956م).
اي فعل ذلك الذي صنعه (عمر الخليفة) كي نقترب من المدنية، وكي نرى تلك العوالم المبهرة؟، من اين خطرت له هذه الفكرة؟، لا استطيع ان اقول سوى ان هذا الفعل فعل حضاري لا يستهان به، برغم تلك النوايا التجارية والتي هي من الطبيعي ان تكون وراء هذا المشروع.
عمر الخليفة) من اولئك (الجعليين) الذي ادمنوا الترحال والهجرة الى حيث تذهب بهم الأرزاق، انه واحد من اولئك (الجلابة) -كما يقال عنهم- قادته اقداره وأرزاقه الى حيث جبال النوبة، لتلك المنطقة التي تعودت ان تسلب روح اولئك القادمين من الشمال، فلا مفر لهم الا البقاء فيها، فامتزجوا بناسها وصارت لهم اوطانا لا يمكن التخلي عنها"
يحيى فضل الله العوض
قصرت معاك يا نور؟
ــــــــــــــــــــــــــــــ
نعتذر للصديق إسماعيل على الإساءات التي لحقت به، ولو أمكن أطلب من أصحابها حذفها بالبوست وإحدى مداخلات الفيس بوك
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
يا أخي ناس الفيسبوك عندهم مداخلات جميلة ما عدا واحدة، برجع ليهم بالليل،
وقبل دا، أنزل نمّة عبد الرحيم صالح (ف ب) بصوت فاطنة السمحة:
أبوي أخدر طويل ووو جلابة
جملو هِدِّير ووو جلابة
سوطو ورويير ووو جلابة
شكرا يا أخينا علي البخرة
| |
|
|
|
|
|
|
|
|
|
Re: الجلابة الحلوين (Re: بدرالدين بابكر مصطفى)
|
Quote: والقرد دا عندو كم مداخلة في الـ 24 ساعة
والله كونك تكون بني آدم أنا شايفا كتيرة عليك ..
ودا أمر الله وحصل، لكن مفروض تكون مربوط في كراع عنقريب
الله يقرفك ويقرف اليوم العرفنا فيه خلقتك الكريهة دي ..
|
بدر الدين يا متخلف انا أشفق على حالك.
| |
|
|
|
|
|
|
|
|
|
Re: الجلابة الحلوين (Re: اسماعيل عبد الله محمد)
|
غايتو بسياستك في البوست دا ..لقيتك جلابي أصللللي لكن .. :)
........
وضاحة اللاحقة ( آب ) لاحقة بجاوية ..وترمز لفرع أو بطن من القبيلة .
ذكر الرحالة بوركهارت في زيارته في عهد الدولة السنارية أنه وجد سكان منطقة أتبرا يتكلمون البداويت ( لغة البجا ) .
وكذلك ذكر أن الميرفاب بجا .
والرحالة كلوستو أورد أن الكبابيش يتكلمون نفس لغة البشاريين والعبابدة البجاوية .
والرحالة قيرن ذكر أن الشكرية كانوا يتكلمون البجاوية .
وعموما معظم مسميات ولاية نهر النيل بجاوية ..مثل :
أتبرا
والدامر
وشندي ألخ
أما مسألة الأنساب العربية ، فقد كانت موضة في عهد الدولة السنارية الإسلامية .
وكان هناك ناس محترفين الشغلانية دي .
راجعوا كتاب ( عصر البطولة في سنار ) لمؤلفه جاي سبولدنق .
| |
|
|
|
|
|
|
|
|
|
Re: الجلابة الحلوين (Re: سيف اليزل الماحي)
|
سلامات وعوافي
بكور وضيوفو كللللهم بدون فرز بمناسبة جلابة دي عندي ليكم اهداء صغير
قصيدة قديمة للسر عثمان الطيب
القصيدة تاكد ترحال الجلابة الكثير في كل بقاع المعمورة ناهيك عن السودان والجلابة ليست جنس
انما صفة تشترك فيها معظم الاجناس
والاهداء موصول لي ود عمي صديق الغالي واخونا إسماعيل واختنا الشامخة امنة مختار والاميرة وضاحة وسليل جهينة بريمة
Quote: يا جلابة الله ياجلابة الله الله يا جلابة الله
جيدا جيتو قولولي
ماشفتوهو لي زولي
مستنيهو لا حولي
قاعد راجي ضاع عمري
لو بي حالي كان يدري
كان صدالي من بدري
روحو في البلاد توهو
صدو وتاني كوسوهو
يمكن لي تلقوهو
عرجو وامشو لي عبقر
واسالوا ملهمي الاكبر
شقيش زولي قام سافر
يمكن تلقوا مدّسى
بين الروح وسط نفسى
فى مستقبلى وأمسى
يمكن تلقوا في جنة
طنبورا حنين رنا
حس زغريتا في حنة
بين خضرة شدر غابا
فرهيد زهرة جزابة
عانقت الربيع دابا
فى مزمار مع الراعى
بين أنغامو أوجاعى
زادت كب دماعى
فى بيوضه بىن ريما
جنب عربان وسط خيمه
منشر فوقه ضل غيمه
يمكن تلقوا يا أخوانى
فى آهاتى وأحزانى
عايش جوة وجدانى
فى آهاتى فى نمى
ينزل ويجرى بين دمى
فى روعة حنان فنى
في لحظة فراق حارة
في ضحكة عيون سارة
في نسمة صباح مارة
يا جـــــــــــلابه دلـــــــــونى
جيتكم كونوا فى عونى
وين مــــا يبقى دلـــــــــــونى
|
| |
|
|
|
|
|
|
|
|
|
Re: الجلابة الحلوين (Re: وضاحة)
|
بريمة
| Quote: أنا لم أتحدث عن نسب إنسان بسوء بل نقلت أقتباسات .. وهى لأخي أحمد محمد الجعلي .. كانت من طرف الفيس بوك ولم أغير فيها شيئ .. |
شكلو اللغة العربية ضعيفة عندك عشان كده ما استوعبت الكلام المكتوب
انا قلت نقلك للنسب دون بحث وما قلت انك وثقت وهنا في فرق كبير
وانت مقر انك نقلت
لكن الباحث الامين ينقل بعد استوثاق وبحث الا اذا كان له غرض في نفسه
| Quote: ومحدودية عقلك وتعليمك .. |
لو قصدك بالتعليم الشهادات الاكاديمية
انا شخصياً الشهادة بعتبرة ورقة لا تقدم اضافة كبيرة لعلم الشخص
عشان كده لا تعني لي شيئا
اما اذا قصدك بالتعليم العلم فدا طبعا طريق زلق ونسأل الله الوصول وان يرزقنا له
| Quote: ولو أنت عارف أنا واقف فى حلق وضاحة ليه ما كان كتبت ما كتبت .. وضاحة إنسانة عنصرية ونحن موثقين عنصريتها فى هذا المنبر .. وسخريتها من الغرباويات |
يعني مطاردتك لوضاحة ليست من باب الشفافية واظهار الحقيقة ..
ولكن لتصفية حسابات ولغبائن في نفسك وثارات تنطلق من اساس عنصري ..
والغرض مرض شفاك الله ..
| Quote: نجيك للغريق، أنت إنسان عنصري |
يا اخ دي انا لما قريتة ضحكت
واول حاجة خطرت في بالي المثل البقول الجمل ما بشوف عوجة رقبتو
من الاخر كده .. . رمتني بدائها وانسلت
| Quote: نبذونى حتى أسرتى .. والدي وجدتى ووالدتى |
الوالدين نسأل الله ان يمتعهم بالصحة والعافية ان كانوا احياء
وان يتغمدهم برحمته ان كانوا بين يديه
و لهم منا كل الاحترام والتقدير وهم تيجان على الرؤوس
اما ولدهم بريمة ليس له منا الا الجنبة الفيها الحديد حتى ينعدل ويسلك الطريق
| |
|
|
|
|
|
|
|
|
|
Re: الجلابة الحلوين (Re: علي محمد الفكي)
|
| Quote: أقول لك نحن البقارة من صنع تأريخ ناصع للشماليين |
دة من ناحيتك يا بريمة...
| Quote: أن الأمام المهدي عليه شعابيب الرحمة |
من ناحيتنا سامحنا على ال Monday Make
تحياتى ناس البوست
| |
|
|
|
|
|
|
|
|
|
Re: الجلابة الحلوين (Re: علي محمد الفكي)
|
| Quote: ديل كلهم بجا وناكرين .. |
الخدراء امنة مختار
البجا مالهم بنكروهم ؟
لوميهم لي ؟
التداخل اللغوي لا يعني وحدة الاصل
فكل البديرية سكان الشمال يتحدثون الدنقلاوية بحكم المعايشة
ومعروف ان منطقة شندي وبربر وعطبرة والبطانة كان سكانها متداخلين ويتعاملون مع البجا
لذا ليس غريب ان يكون لهم معرفة بلغتهم
واهو الان البجا يتحدثون العربية فهل دا دليل انو اصلهم عربي
ثم انه كان هناك نظام اداري ( شبه دوله نظامية ) يشمل كل المنطقة الممتدة من شندي الى بربر حتى ميناء سواكن
وكانت تقوم عليه بكرة بنت مكابر ود عرمان صاحبة جبل ام علي وهي جدة الجعليين العالياب والعمراب والعبدايماب
ومعروف ان بيت العمودية في البني عامر البلا اصلهم جعليين ال دقلل
اما متلازمة اب للنسب مستخدمة عند كل قبائل شمال ووسط السودان فشنو البمنع انو يكون العكس اي بمعنى انتقلت منها للبجا
ويمكن ان نسمي ما حدث في السودان بالتوائم ما بين القديم الموروث والجديد المكتسب
فكان هذا الوطن والشعب الذي نفخر به
| |
|
|
|
|
|
|
|
|
|
Re: الجلابة الحلوين (Re: علي محمد الفكي)
|
هسع يا علي الفكي، أنا بعد رصيت ليكم نسبي الجلابي هنا، كنت متوقعكم تعمدوني وتحترموا لي ضيوفي حتى لو تعدوا عليكم، لكن الظاهر أنو نحن فرتقنا القبيلة من نزلنا من البارجة المتمة التي دكت قبة سيدي المهدي!
المهم خلونا نرجع للموضوع الأساسي زي ما بقول الصادق إسماعيل:
بعد نزلنا من البارجة، تخلينا تماما عن الإنتماء القديم للقبيلة وأعلنا الإنتماء لقبيلة الجلابة في نسختها الجديدة،
داير أقول زي ما قال لي صديقي هاشم الحسن بتكساس أمريكا في ونسة تلفونية على هامش البوست دا، قال:
أكبر جلابة في السودان هم الدناقلة أهل علاء الدين سرتوت ديل وكلمة دناقلة هي فعلا المرادف لكلمة جلابة، ديل هم الأساتذة، وحاليا قبيلة الزغاوة تحولوا لأكبر جلابة في السودان، لكنهم خربوا القصة بحروبهم الأخيرة دي
يا علاء لو بتذّكر في بداية التسعيات في دنقلا كنا بنطلع نلاقي الZ وY ات في السوق وشفت كمية البضائع الكانوا الزغاوة بجيبوها من ليبيا عن طريق دنقلا، لو الأمر إستمر بنفس ذلك المنوال، لكان الزغاوة لحقوا الدناقلة والجعليين في تكسير فاتورة القبيلة.
بعدين يا علاء، العباس شنو الجدنا؟!
الكلام القالتو آمنة مختار دا أقرب للصحيح، والقصة كانت في زمن من الأزمان موضة، ونحن كعادتنا في حسن الإختيار إخترنا عم الرسول لزم، وإنتو يا "حلابين التيس" مسكتوا لي في حتة ميتة "غلام الله بن عائد"!!
أرجح يا آمنة مختار، أنو نحن كنا قبائل رعوية بكردفان وليس من الشرق، لكن الكلام دا غير مهم، نحن تخلصنا تماما من الإنتماء للقبيلة ودخلنا المدنية باسم "الجلابة" وحاليا هذه السمة ضاعت وأصبحنا سكان مدن مختلطين مع أعراق كثيرة
أنا حاليا موش مشكك في نسبنا للعباس وكدا، أنا مشكك في وجود العباس في الأصل، ما كدا وبس، بعد فيديو النذير أصبحت مشكك في قصة الصحابة وكيف بدا الإسلام، يا أخي مشكك في انو في قائد اسمو خالد بن الوليد؟؟؟
حاليا يا آمنة، نحن نفسيا جاهزين للإندماج وتكوين دولة مواطنة حديثة
المشكلة انو الآخرين غير جاهزين وبعيشوا في مرحلة نحن فتناها، وعلينا انو نساعدم لتخطيها
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
Quote: أنا حاليا موش مشكك في نسبنا للعباس وكدا، أنا مشكك في وجود العباس في الأصل، ما كدا وبس، بعد فيديو النذير أصبحت مشكك في قصة الصحابة وكيف بدا الإسلام، يا أخي مشكك في انو في قائد اسمو خالد بن الوليد؟؟؟
|
بكور
فيديو النزير دا شنو؟؟؟؟
الفترة الفاتت ما كنت متابع .. علييييك الله يا نزلو هنا يا اديني الرابط او اسم البوست
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
ابوبكر..
صباحك خير..
المداخلة دي هدية للأستاذة نور تاور:
..
ما بتقصر يا الجلابى الكلس !
سينما عمر الخليفة دى أصبحت جزء من ثقافة كادقلى..
ولنا فيها حكايات و نوادر..
وواحدة من النوادر دى..
الدعاية للفيلم كان بيقوم بيها واحد فى عجلة..
ويلف بالعجلة فى الاحياء..
ويربط صورة من الدعاية للفيلم ورا العجلة..
وكل ما يجى جنب بيتنا...
يآخد ليه وقفة طوييييلة...
علما أن عدد الصبيان فى بيتنا كان كبير...
وكلهم من رواد السينما الدائمين...
يقيف ورا البيت وينفزر ويكورك..
الفيلم الهندى الجبار..
الفيلم الهندى العظيم..
الفيلم الهندى..
والعيال يتجاروا للست الوالدة..
يا أمى داير قروش السينما...
يا أمى قوام عشان الحق أكوى هدومى..الخ من أمور سلبطة العيال...
فى يوم زهجت الحجة بما أنه قريشاتها كلها رايحة فى السينما..
وتعبت من الولد بتاع الدعاية..
و مما سمعت صوته فى اول الشارع..
شالت ليها مقشاشة أم عصاية ووقفت ورا الباب..
أول ما وقف قدام البيت وبدا يكورك..
الفيلم الهندى الجبار...
طّلعت ليه المقشاشة وهات يا مطاردة فى الحلة..
تانى من اليوم داك ما شفناه..
| |
|
|
|
|
|
|
|
|
|
Re: الجلابة الحلوين (Re: علي محمد الفكي)
|
علي محمد الفكي
Quote: يعني مطاردتك لوضاحة ليست من باب الشفافية واظهار الحقيقة ..
ولكن لتصفية حسابات ولغبائن في نفسك وثارات تنطلق من اساس عنصري ..
والغرض مرض شفاك الله .. |
أها جيت فى المحلة الحلوة .. وكتر خيرك يا زول .. إذا عرفت أننى ووضاحة عندنا مخانقة من زمان .. تعرف أنا لم أكن حاسد لها نعمتها ..
الأمر كالأتى .. وضاحة تعتبر نفسهاا ضد الفساد .. وتعتبر نفسها محاربة للفساد .. ومطالبة بحقوق البسطاء .. الكلام دا واضحة كتبته مرات ومرات .. وجاهرت به هنا فى المنبر.
أنا لا أري سبب للفساد غير عدم وجود شفافية فى المال العام والخاص .. دا موقفى أنا .. وبالتالي تطابقت شروط بحثى مع وضاحة .. زولة محاربة للفساد وجاءها المال ما شاء الله .. ليه ما تقف وضاحة علي مبادئها ؟ .. ليه ما تثبت لينا جميعاً أنها فعلاً تقر الشفافية وعدم دغمسة الحق العام وتكون مثال يحتذي عشان نحن نستطع نحارب به الفساد العام الذي أستشري؟ لماذا لا تقم هى بكشف مصادر أموالها .. غير أنها تأتى وتكوجن لينا الموضوع أن جدي ترك لي ثروة دون بقية الأسرة !!
ما مهم أن ترك لها جدها ثروة أو للأسرة أجمع، .. المهم أن تكون علي قدر منطق طرحها ومواقفها من الفساد .. الأن هى تهرب من كلمة الشفافية .. وهذا هو الذي يحصل مع كل صاحب مال. بضربة معلم تحول لذات المعسكر المضاد لمواقفها .. وسبحان الله مغير الأحوال.
بريمة
| |
|
|
|
|
|
|
|
|
|
Re: الجلابة الحلوين (Re: بريمة محمد)
|
بت أبا نور تاور،
يا الله للزمن الجميل
Quote: الدعاية للفيلم كان بيقوم بيها واحد فى عجلة..
ويلف بالعجلة فى الاحياء..
ويربط صورة من الدعاية للفيلم ورا العجلة..
وكل ما يجى جنب بيتنا...
يآخد ليه وقفة طوييييلة...
علما أن عدد الصبيان فى بيتنا كان كبير...
وكلهم من رواد السينما الدائمين...
يقيف ورا البيت وينفزر ويكورك..
الفيلم الهندى الجبار..
الفيلم الهندى العظيم..
الفيلم الهندى..
والعيال يتجاروا للست الوالدة..
يا أمى داير قروش السينما...
يا أمى قوام عشان الحق أكوى هدومى..الخ من أمور سلبطة العيال...
فى يوم زهجت الحجة بما أنه قريشاتها كلها رايحة فى السينما..
وتعبت من الولد بتاع الدعاية..
و مما سمعت صوته فى اول الشارع..
شالت ليها مقشاشة أم عصاية ووقفت ورا الباب..
أول ما وقف قدام البيت وبدا يكورك..
الفيلم الهندى الجبار...
طّلعت ليه المقشاشة وهات يا مطاردة فى الحلة..
تانى من اليوم داك ما شفناه.. |
نحن كنا فى الصناعية (ب) .. وكل نهاية أسبوع نكون جايين السينما ..
طبعاً بنمروا بجبل بليلة .. وقصة الثعبان الكبير .. البربط الدرب فى الجبل ..
وتعال شوفوا الجري .. حتى نفوتوا الجبل ..
ويتكرر الحال .. ما بين الشغف لفليم الكاوبوي .. وما بين الخوف من ثعبان جبل بليلة.
الله يا بت أبا نور .. الله يعيد لينا تلك الأيام النواضر ..
بريمة
| |
|
|
|
|
|
|
|
|
|
Re: الجلابة الحلوين (Re: بريمة محمد)
|
| Quote: وبمشي أنافس بروف أمين في لايكات الجكس في الفيس بوك |
يعني لسه ماجيت هناك وشغال متاوقة بس .. ياعيب الشوم
علي بالحرام ننصبك شيخ مشايخ اللايكات والقبلات والشيرات زاتو
حرام تضيع مستقبلك هنا مع ناس ود المدير وبريمة وانا كمان
| |
|
|
|
|
|
|
|
|
|
Re: الجلابة الحلوين (Re: سيف اليزل الماحي)
|
ابوبكر عباس
العبيد ود التوير واحد من الدراويش المتصوفة في نواحي المتمة
لا اعلم ان كان حياً او توفاه الله
جاء يوم لي شيخو صالح العبيد بدر وقال ليهو يا شيخ صالح انت شيخنا و كبيرنا
وانا مسافر الخرطوم وجيت طالب منك الاذن .. كان اديتني الاذن مسافر وكان ما اديتني ليهو مسافر
فالجلابة صعب ينقادوا
وانت فاكر ود البيه اختار عمدو زي ناصر المكي واحمدانة وعلي جاد الله من فراغ
لا ابداً لانو عارف الفي ناسو
ثم القبيلة بدت تتفرتق من يوم ما خلت كردفان واتجهت شرق
وكان اخر عهدها بالوحدة ايام العرشكول والترعة الخضراء
وتاني عينك ما تشوف الا النور
يا اخ ديل نمر ومساعد في هجرتهم الميمونة او هروبهم المنصور كل واحد مشى في اتجاه
والناس المعاهم كل 10 كلم في مجموعة بتنفصل وتتخلف عن الركب
وكل المتخلفين عن الركب تحولوا الى جلابة
والحاجة المميزة لهؤلاء الجلابة انهم استطاعوا ان يتعايشوا في المجتمعات التي نزلوا بها
وكسبوا ود واحترام المجتمع
واصبحت الديار الجديده موطنهم الجديد
ــــــــــــ
حذفنا المداخلة شفت كرمنا فايض كيف
ويا ريت يجيب مريسة تامزين مع ضيوفك
| |
|
|
|
|
|
|
|
|
|
Re: الجلابة الحلوين (Re: AMNA MUKHTAR)
|
التعليقين من الصديق رشيد السر عبر نافذة فيسبوك :
Rsheed Elsir · UofK News
الاخ الهدد بتجمع السودانيين ضد الجعليين فوق: اقول ليك كلام بسيط: جوا قبلك الدفتردار والخليفة بجيوشهم وقاتلنا ومتنا واقفين على حيلنا وبدون دخول فى التفاصيل هناك حقيقة واااااااااااااحدة ماثلة امانا وهى : اننا لى اسى قاعدين ...... وفات الخليفة والدفتردار وجيوشهم الى التاريخ ليحجزوا ليهم كم سطر فى كتاب او كتابين بلد موهومة
أعجبني · رد · 11 دقيقة
Rsheed Elsir · UofK News
الجعليين كوشيين فى الاصل واستعربوا فى الفترة السنارية: انسابهم العباسية ظهرت عند الفور والداجو والقمر ونوبا تقلى قبل الجعليين بى كتير وموجودة عنةند الدناقلة وهناك الفونج اعلنوا نسب اموى والمجس خزرج والكثير من القبائل السودانية اعلنت انسساب عربية واوربية... الجعليين من صميم شعب مروى فلكلورهم وشلوخ ملوك مروى وازيائهم وعرضتهم الاقرب حد التطابق مع البجا وقليلا مع اهلنا النوبيين... التقسيم القبلى نتج عن المشايخ والتحالفات ولا يشير لاصول مختلفة ولا يمكن بناء تصورات عن اصول مختلفة للسودانيين
أعجبني · رد · 14 دقيقة
| |
|
|
|
|
|
|
|
|
|
Re: فضيحة : معقولة يا اطباء السودان (Re: عمار عبدالله عبدالرحمن)
|
هسه كدا كويس .يا علاء ؟ أهو الجلابي رفعنا معا في سرجو ..
انت قايل سورتود دي جات على لسانو كدا ساااكت .
أبدا يا حبيب ..
دي مربوطة بالحكاية ؤ راكبه في سياقا ..
انت نسيت سورتود ؤ علاقتها بى لبب ..
لبب وما ادريك ما لبب والمهدية ؤ ود تورشين ؤ محمود ود احمد ..
وقع ليك ؟
الجلابي نضمو مو حلو بس ..
برضو فيهو حقائق تاريخية صحيحة كان ليها أثرا في تشكيل السودان الحديث..
أصلا قدماء السودانيين ما كانو بعرفو تجارة ..
كانو زراع واصحاب صناعات يدوية ورعاة ..
وكانت التجارة عمل سلطاني لأنها كانت تحتاج لقوة تحمي قوافلها..
مش كدا ؤ بس كانت نظرة العامة للعمل التجاري فيها دونية ..
أي والله ..
أرجع تاوق للأبيات الفوق دي ..
التجارة كانت واحدة من اسباب دخول العرب والاغاريق والهنود .. الخ للسودان ..
المعلومة دي لحدت قريب يشهد عليها السوقين العربي والافرنجي ودكان اليماني..
يعني السوادنة من بداياتم ما ناس تجارة ..
حقيقة السودان مدين لهم..
ؤ لو ما هم ما كانت البلد نمت ولا تعلم أهلها التجارة ..
بس الجعليين أو العرب ما كلهم جلابة يا ود عباس ..
جلابة بمفهومها التاريخي الوظيفي..
دا بوست ضريسا الا طلعت جلابي روايعي جميل ..
والله الكعكولة جابت ..
لوما هي كانت مجاعة سنة سته لحّقت جدك عباس أمو وابو ..
إلا عندي ليك سوال :
اوعى تكون الجينة دي هي الخلتك تقالع محمد موسى في قعر حلة اللبن؟
بس ما ظنيت البوست يخرب بشوية معلومات إضافية من عندي..
صحيح شندي بدأت مركز تجاري باعتبراها كانت موقع لتجمع القوافل التجارية ..
لكن زي ما قلتو ليست الموطن الأول للجعليين ..
الجعليين موطنهم الأول كردفان ثم النيل الأبيض ..
يعني برضو ( التنقاريه *) ما فايتاهم ..
انتقالهم لضفاف النيل جاء مؤخرا قبيل سقوط سوبا بقليل..
نقطة أخيرة السودان القديم ما كان فيهو قبلية ..
التطور الاجتماعي كان تجاوز مراحل القبلية الي تنظيم الدولة ( الممالك) ..
وأصبحت الأرض ومنافعها هي المرجعية لتنظيم العلاقات الاجتماعية وليس الدم ..
ذلك بعد أن انتظم المجتمع تحت سلطة وفرت الضوابط اللازمة لحمايته ..
المجتمعات رجعت للقبليات بعد التعريب وبعد وراثة أبناء المستعربين للزعامات .
:
تنقار بالدنقلاوية = غرابي.
التحية واصلاكم .
| |
|
|
|
|
|
|
|
|
|
Re: فضيحة : معقولة يا اطباء السودان (Re: اخلاص عبدالرحمن المشرف)
|
Quote: حقيقة السودان مدين لهم..
ؤ لو ما هم ما كانت البلد نمت ولا تعلم أهلها التجارة .. |
هذه هي مشكلة الجلابي المحورية انه يعتقد ان بسببه اتى الخير الى السودان ولو لاه لن يتم اي شيء مفيد للامة السودانية ولا يتقبل ان يكون غيره في الصدارة .
اذا سمع الجلابي بنجاح اي سوداني وريادته في مجال من المجالات مباشرة يسأل (الزول ده من وين) ولا يكتفي بمعلومة انه سوداني و كفى و عينك ما تشوف الا النور عندما يعرف ان هذا الشخص من محيطه الاجتماعي فتسمع الفصاحة و الافتخار الاجوف وان هذا فلان بن فلان اجداده اصحاب الطين و الفلين و احفاده مشايخة المشايخ كما هوا حادث فوق .
اما ذا قيل له ان هذا السوداني العبقري من كادقلي او الجنينة فتجده يتجاوز المناسبة السعيدة هذه و لا يحتفي بها تلك الحفاوة التي كانت مع قريبه النابه.
ظاهرة الجلابة في السودان هي ما انتج الغبن الاجتماعي و السياسي والثقافي و روادها لا يعيرون انتباهاً لما يحملونه من نفسية مقصية للاخرين من ابناء التراب السوداني.
عندما تنتقدهم و تظهر عيوبهم يصفونك بالحاقد ..
انهم قوم تجار , يتاجرون في كل شيء و يدَعون كل شيء.
| |
|
|
|
|
|
|
|
|
|
Re: فضيحة : معقولة يا اطباء السودان (Re: اخلاص عبدالرحمن المشرف)
|
| Quote: وما بين الخوف من ثعبان جبل بليلة |
بريمة سلام يغشاك ويلقاك عافية
كدي سيب الملاوا والعكات العاملة بهناك واحكي لينا قصة الثقبان دا
زمان كان عندي صاحبي شديد اسمو أنور عبدالله ملان من نواحي جبال النوبة ربنا يطراهو بالخير وأتمنى ان
يكون موفور الصحة والعافية فقد كنا مثل الاخوة لا نفترق ابداً
حكى لي عن ثعبان عندو جوهرة قاعد يطلعا بالليل في الظلام ونورها براق يجذب الحشرات عشان ياكلها
هل القصص دي كانت حقيقة وللا من نسج الخيال
----------------
معليش يا بكور لكن لقيناك فاتح للبوست قلنا نشوف قصص جديدة
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
سلامات يا اسماعيل ..
فيما اعتقد البوست يعيد لمصطلح الجلابة مفهومو وقيمتو التاريخية ويناقشه على هذا الأساس..
وليس على غرار مفهومك هذا :
| Quote: ظاهرة الجلابة في السودان هي ما انتج الغبن الاجتماعي و السياسي والثقافي |
غبن سياسي واجتماعي حتة واااحدة !
معنى كدا انت لسه ما عرفت مسببات الصراع في السودان ..
هذا الذي تقول به مفهوم سياسي تلفيقي مغرض اشيع أخيرا ضمن محددات الصراع على السلطة والثروة ..
وهو مفسد اجتماعيا أكثر من كونه حل ..
لان واقع الصراع على السلطة ومخرجاته لا يسنده مفهومك ..
ببساطة لأن النشاط التجاري لمن عرفوا بالجلابة لم يكن له دور في مقامات تولي السلطة ..
لا محليا ولا في إطار السودان ..
لا قديما ولا حديثا .
| |
|
|
|
|
|
|
|
|
|
Re: الجلابة الحلوين (Re: محمد على طه الملك)
|
طبعا يا أخوانا، في البوست ودعمه من الفيس بوك مداخلات عظيمة أضافت الكثير للبوست ولا يحتاجن للتعقيب ولا الشكر.
عندي ظروف (خير) بتخليني أتوقف شوية عن المتاوقة والكتابة، وإن شاء الله أكون ما قصرت معاكم في جرعات الإستنارة الأديتكم ليها في الفترة الفاتت، وأكون أكلت قروش بكري دي بالحلال.
يا بكري، أنا بديت معاك يوم تلاتاء وماشي يوم تلاتاء، ما عندك عندي حاجة.
سلام
| |
|
|
|
|
|
|
|
|
|
Re: الجلابة الحلوين (Re: أبوبكر عباس)
|
يا بكري ياخ أدي الزول دا أوفرتايم يوم واحد لغاية بكرة عشان يبدأ صيامه بأربعاء الرماد
شكلو ناوي يكفّر عن سيئاته. بالله اخوانا العبرانيين ما يقولوا حاجة
هسي يا بكور دا وكت تمشي فيهو، وصاحبك ود الملك جاء يضع "الحروف" "تحت" نقاطك المشتتة دي
| |
|
|
|
|
|
|
|
|
|
Re: الجلابة الحلوين (Re: معاوية الزبير)
|
كتب اسماعيل عبد الله
| Quote: اما ذا قيل له ان هذا السوداني العبقري من كادقلي او الجنينة فتجده يتجاوز المناسبة السعيدة هذه و لا يحتفي بها تلك الحفاوة التي كانت مع قريبه النابه |
غايتو انو المعروف عن محاربي العنصرية انهم لمان يكتبو اسماء مناطق زي دي بنوعو يا اسماعيل
يعني عندك مثلا سنكات وعندك برضو ارتقو و الكرمك والخير باسط يعنى خليت شنو للزول البحتفي بي بربر و الجيلي.
تانيا يعني يا ابابكر عنك شك في العباس؟؟ بالله ممكن تثبت لينا(جدنا) جعفر الطيار في ولا مافي؟
| |
|
|
|
|
|
|
|
|
|
Re: الجلابة الحلوين (Re: MOHAMMED ELSHEIKH)
|
الأخ هيثم غالي،
سلام ..
Quote: بريمة سلام يغشاك ويلقاك عافية
كدي سيب الملاوا والعكات العاملة بهناك واحكي لينا قصة الثقبان دا
زمان كان عندي صاحبي شديد اسمو أنور عبدالله ملان من نواحي جبال النوبة ربنا يطراهو بالخير وأتمنى ان
يكون موفور الصحة والعافية فقد كنا مثل الاخوة لا نفترق ابداً
حكى لي عن ثعبان عندو جوهرة قاعد يطلعا بالليل في الظلام ونورها براق يجذب الحشرات عشان ياكلها
هل القصص دي كانت حقيقة وللا من نسج الخيال |
القصة يا ها ذاتها .. وكل سكان كادقلي فى ذلك الزمن يعرفونها ..
طيب .. أنا أحكى ليك كيف قتل الثعبان .. وهى أغرب حكاية تسمعها عن ثعبان ..
زول يسكن فى مدينة كادقلي .. أراد أن يأخذ الجوهرة .. ذهب بعد المغيب وقبل خروج الثعبان ..
وعمل أعواد كثيرة .. وكل عود بطول الأنسان .. وثبتها بالقرب من مكان الثعبان يخرج ويضع الجوهرة .. وكل عود ألبسه ملابس ليصير مثل الأنسان.
ثم عمل الشخص .. طينة كبيرة .. وأنتظر بين أعواده ..
خرج الثعبان بالجوهرة ووضعها كالمعتاد .. وصار يذهب ويلتقط الحشرات ..
حمل الرجل قطعة الطين الكبيرة .. ثم ذهب حينما أبتعد الثعبان عن مكان الجوهرة .. ورمى الطينة بقوة فى الجوهرة .. فأطفأ نورها.
ثم ركض الرجل بسرعة البرق .. إلي أسفل الجبل .. ثم جري متجهاً إلي سنتر المدينة ..
حينما أنطفأ نور الجوهرة .. ظهرت الأوتاد للثعبان كأنها أشخاص .. فصار الثعبان يضربها الواحد تلو الأخر .. وحينما قضي عليها كلها .. ركض فى أثر الرجل.
وقيل أن ناس الأحياء المجاورة سمعوا للثعبان صوت كصهيل الحصان ..
جري الثعبان مسافة طويلة خلف الرجل .. لكنه مات ربما من شدة خبطه لرأسه فى الأوتاد ..
عاد الرجل باكراً وأخذ الجوهرة .. وذهب بها ليبلغ الشرطة .. أستلمت الشرطة الجوهرة من الرجل بأعتباره أعتدي علي الثعبان .. ولم يعطونها له إلي يومينا هذا.
ثم قامت الشرطة بعرض الثعبان فى المدينة .. حاجة ضخمة ..
في نهاية المطاف أصاب الرجل الجنون .. ولا أدري إن مات أو حي.
بريمة
| |
|
|
|
|
|
|
|
|
|
Re: الجلابة الحلوين (Re: بريمة محمد)
|
يا بريمه دي من القصص الشعبيه و لقب جديد لك القاص او القصاص الشعبي بريمة
وتدخل بها اجدعها مهرجان وتفوز
يا اخ حبيب نورة يدافر بي يديه ورجليه وانت التفوز !!! ارزاق يا ايها المتسربل ب (سودانيته )
| |
|
|
|
|
|
|
|
|
|
Re: الجلابة الحلوين (Re: اخلاص عبدالرحمن المشرف)
|
بت أبا دكتورة إخلاص،
سلام .. وهاك من القصص الشعبي الكتبناه مع الأخ أيمن نواي فى البوست الأخر ..
كتب أيمن الأتى:
Quote: وال ابا بريمة صباحاتك بويض
عيال كيف طيبين ؟ الله يحفظن.
قالوا فى اولاد ورثوا مال كثير من ابوهم....قبل الدفن...قالوا كدى واحد ينزل مع ابونا فى القبر...اذا اتعذب نتبرع بالقروش... واذا ما اتعذب نقسم القروش بيناتنا...كل واحد ما داير ينزل فى القبر....قالوا كدى نشوف فلان الساكن طرف الحلة فى الكوخ داك...امكن يقبل ...نقسم ليهو نص الثروة اذا قبل...بس يورينا الحاصل شنو....الراجل وافق....حفروا حتة جنب القبر ...واخونا قعد.... اليوم الاول ما ظهر....اليوم التانى ما ظهر... اليوم الثالث قالوا كدى نمشى نشوف الزول دا الحاصل ليهو شنو....مشوا القبر ما موجود....مشو الكوخ...لقوهو راقد...انت ما قلنا ليك تورينا الحاصل شنو...قروشك ياها جاهزة....قروشكم امسكوها عليكم....انا قاعد فى القبر...جو اثنين شايلين شولات فيها اوراق...واحد سال التانى...قال ليهو اسمع انحنا جاين للزول الراقد داك...القاعد معاهو دا شنو...كدى نبدا بالزول القاعد دا اولا...دخل يدوا فى جيب صغير...طلع ليهو ....وريقة كدة ...قال دا كل حسابوا اتناشر جنية....قال لى يا زول الاتناشر جنية ...ورينا جبتها كيف؟ ....وريتهم الحداشر جنية...قال يعنى ماعارف الجنية الواحد دا جبتو من وين؟... ضربنى كف نص جسمى اتشل....قوم من هنا شوف الجنية جبتوا من وين....دا كل عشان جنية واحد....ابوكم شايلين ليهو شولات.... ما اظن يمرق منها.
الحساب بعدين مافيهو عربى جلابى ولا شمالى.... الحساب ولد...ناس قشة ما تعتر ليك....بيعملوا حمد لبد...البيعتر هناك الحطب الكبار...اعملوا حسابكم منو.....اما البيختوا البياض فى الطريق ....نسال الله يكون من نصيبهم بياض اللبن فى الاخرة....ما بياض نجوم فى عز الظهر.
يا ناس البلد اسرقت ....المودر ليهو بفتش فى خشم البقرة....اضرب القراف الجمل يخاف...السؤال دا ازعج ناس كتار ....كل اناء بما فيه ينضح....سؤال اخونا وال ابا بريمة للشفافية فقط....اى محاصصة المال كما قال....اى زول يتوقعوا |
ثم رددت عليه بالأتي:
Quote: ول أبا أيمن،
قالوا فى واحد .. كل ما تلد بقرة زول .. يمشي بالليل يشيل العجل الصغير .. ويعمل ليهو وسم فى بطنه تحت رجله الخلفية .. مكان مخفى تماما من أعين الناس .. لما البهيمة تكبر .. وتلد يجئ شايل حبل يربط صغيرها .. ويسوقها ..
صاحب البهيمة يقول له دي بقرتى .. يقول هو دي بقرتى .. يودوه المحكمة ويحلف أن بقرته فيها وسم .. وهناك يكذبه صاحب البهيمة الحقيقي .. ويقول لو فيها وسمك القلته بخليها ليك .. يشيل البهيمة ذي ما حصل حاجة .. وهو يعلم أنه يحلف كذبا
جمع الشخص الذي يحلف القسم زوراً ثروة ضخمة فى حياته وعاش عيشة الملوك .. مرض وحانت ساعة الفراق .. جمع أبناءه وقال ليهم .. هذا المصحف هو غابة الحرامى .. شيلوا مال الناس وأحلفوا ساكت .. ما بتجيكم أى عوجة .. وقال أنا كل الثروة التى جمعتها من أكل مال الناس والحلف فى المصحف زوراً ..
مات الرجل ..
وجاء أبناءه كالأمراء يحملون جثمان والدهم إلي المقابر .. ووضعوا والدهم فى حافة القبر .. خرج كلـب ضخم ... وكف شال ليك الجثمان وركض به بعيداً ..
ركب أبناء الرجل ونسيبهم حصين ممشوقة القوام .. وطردوا الكـلب .. لما تعبوا لم يلحقوا به .. وحينما يقيفوا عشان يأخذوا نفس .. يضع الكـلب جثة والدهم .. ثم يلهث جواره .. ثم يركبون ويواصلوا المطاردة .. أخيرا قنعوا من خيراً فيها .. وعرفوا أن هذا الشيئ ما كـلب عادي .. وأجمعوا أمرهم أن يقتلون نسيبهم ويكفنوه ويأتوا به إلي الناس .. حتى لا يقولوا عنهم ما جابوا جثة أبيهم ..
حينما عادوا زغردت النساء .. والعرضة عجاجها وقف فوق ..
لم تدم حالة الفرحة طويلا حتى حضر الكـلب ويحمل جثمان والدهم .. وضعه علي مقربة من الناس ثم أختفى !!
ضج الناس .. الزول الجابو الكـلب شنو؟ .. جاء الملك وقال أفتحوا الجثامين .. وجدوا زولهم هو نسيبهم .. ووجدوا الأخر هو والدهم .. فأمر الملك بدفن الجثامين ثم قام بأعدامهم جميعاً ..
------------------------------
أبراء الذمة يودي إلي القسم .. وقول الحق أن مالي هو من حصاد عرق جبينى وهو حلال .. والله علي ما أقول شهيد .. وأي حرامي سوف يؤدي القسم وهو كاذب .. ونحن ما علينا إلا بما شهدنا .. ويكون ألزمناه طائرة فى عنقه.
بريمة |
بريمة
| |
|
|
|
|
|
|
|
|
|
Re: الجلابة الحلوين (Re: بريمة محمد)
|
Quote:
وعموما معظم مسميات ولاية نهر النيل بجاوية ..مثل :
أتبرا
والدامر
وشندي ألخ
|
حيرتونا انتو تقولوا بجاويه ...ناس الشمال يقولوا نوبية
| |
|
|
|
|
|
|
| |
أبوبكر عباس
حيدر حسن ميرغني
معاوية الزبير
وضاحة
قسم الفضيل مضوي محمد
اباذر عبد العال
Al-Masafaa
بدرالدين بابكر مصطفى
بريمة محمد
nour tawir
usama Babiker
دينا خالد
اسماعيل عبد الله محمد
علي محمد الفكي
عبدالله عثمان
علاء الدين صلاح محمد
Hassan Makkawi
متوكل حسن
عمار عبدالله عبدالرحمن
محمد على طه الملك
MOHAMMED ELSHEIKH
فيس بوك
تويتر
انستقرام
يوتيوب
بنتيريست