نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 الببت كلو ينبح الغاز الغاز
|
ام العيال صحتني دوغشا بدري .. قمت مخلوع فلم يكن ما عادتها ذلك
ياربي المات منو ؟
انت الغاز دة ما مليت الاسطوانة التانية
انا اخو الغاز !!
دبرست وانا بين اليقظة والمنام
مالو .. قطع ؟
سؤال غبي طبعا
لا لكن بقطع ..
خشيت المطبخ .. وشاي اللبن في البوتجاز . وشكل الشعلة باين انو يلفظ في انفاسو الاخير
وحرستو ليكم حرسة جرقاس ولا برمش
عليك امان الله وقت الشاي فار قربت اخد لي عرضة لكن خفت ان ااكد خفة العقل المتهم بها .. ودليل خفة عقلي راي المدام
هسة الوقت كلو خاشي النت وتقرا وتكتب ليك كم سنة .. عملت شنو
ياراجل ما تبطل خفة العقل دي وشوف معايش اولادك وين
|
|
 
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
اخدت لي حصة مجانية صباحية وتقريع
عندك تلاتة اسطوانات وانت عارف غاز مافي ما تعمل حسابك ليه ؟
ياخ الاسطوانة مليتها بي 80 ج يمرقن من صرف العدو .. وجازفتهن زاتن
لو تدين
هي لكن يا المبروكة ديلك زاتن اتدينتهن
المهم دايرين غاز
ونظرت لي نظرة قاضي لمتهم ثبت اتهامة وصار مدانا
اها
صباح العميا علي الكحل طبيت اسطوانتي الفاضية في راسي ودقشت السوق
الليلة يا مسخر الحديد لي داؤود تسخر لي غاز
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
اها
لفيت السوق دة بكراع جرقاس وزي الزارقين لي ملحة
كل محلات الغاز مقفلة .. الليلة يا الله تحلني حلة بت السعودية .. اكان تردوها بحكيها ليكم
اها
قعدت في دكاني اول دكان فتح .. جيراني كلهم لقوني فاتح وشارب جبنتي و... مستمخ
هههه ها زول الليلة مطرود
ويتضاحكون لا ينتابهم شك في اني عامل عملة
النفتح سودانيز نشوف خبارات سودانيز .. مش هي موقع المستضعفين . اها ما لقيت غير بوست معاوية وكلو صور .. قلت ناس سودانيز ديل شغالين بقضايا اهم ! اهم من المشاكل الصغيرة زي حقت الغاز .. مشغولين بتأكيد الهوية السودانية وقضايا الانسانية ونقد السياسات الخارجية وقضايا التراث
اها
النفرق شوية اشوف لي بوست خفيف .. بوستاتي مافيشات لحقن الزينين .. طفشن البعلهن ما عادن
خشيت في بوست قباني
| |
|
|
|
|
|
|
|
|
 Re: الببت كلو ينبح الغاز الغاز (Re: عبدالحفيظ ابوسن)
|
| Quote: صباح العميا علي الكحل طبيت اسطوانتي الفاضية في راسي ودقشت السوق |
| Quote: لفيت السوق دة بكراع جرقاس وزي الزارقين لي ملحة |
Quote: هههه ها زول الليلة مطرود
ويتضاحكون لا ينتابهم شك في اني عامل عملة |
ههههههههههه يا اب سن ياخي ربنا يسعدك ويبسط زي ما بسطتنا الصباحية دي ويسهل ليك محل غاز بي لواريهو وطفاياتو حدادي مدادي ملك حر
دي ذكرتني نكتة للخال الظريف حافظ دردور.. قال واحد من عربنا ديل ماشي الخرطوم بي لوري الطماطم والجماعة قالو ليهو ياخي جيب معاك حقنة تطعيم السعر للكلب دا والراجل نسى يجيبا... وهم راجعين في السكة واحد قال ليهو اها ان شاء الله اتذكرت جبت الحقنة قال ليهو انا اخو الكلب!!
| |
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
عبدالحفيظ ابوسن
تحية طيبة
عايز انبه للكمة "ينبح" في العنوان فهي في غير محلها ومسيئة
حتى وإن اعتاد العوام استخدامها في استهجان شخص ما
الكــلاب فقط هي التي تنبح
اتمنى أن تستخدم كلمة أخرى
مع الإعتذار
كمال
| |
|
|
|
|
|
|
|
|
|
Re: الببت كلو ينبح الغاز الغاز (Re: Frankly)
|
السلام عليم أخى أبوسن....يا سلام عليك بوست صباحى بنكهة القهوة......
نادر أركز يا حوار..أضحكتنى والله...
Quote: دي ذكرتني نكتة للخال الظريف حافظ دردور.. قال واحد من عربنا ديل ماشي الخرطوم بي لوري الطماطم والجماعة قالو ليهو ياخي جيب معاك حقنة تطعيم السعر للكلب دا والراجل نسى يجيبا... وهم راجعين في السكة واحد قال ليهو اها ان شاء الله اتذكرت جبت الحقنة قال ليهو انا اخو الكلب!!
|
فرانكلى يا لطيف كيفك وصحتك..يا أخى مشيها ودى ماشة عندنا كلنا بتنبح مالك أى زول بقوله ومافيها شىء......
تقديرى وإحترامى للجميع...
| |
|
|
|
|
|
|
|
|
|
Re: الببت كلو ينبح الغاز الغاز (Re: ismeil abbas)
|
تحياتي يا إسماعيل عباس حكيم المنبر والمنابر المجاورة
أنا بالجد ما بقول الكلمة دي
وأنا مع أن الوعي والتعليم يجب أن يفلتر الكلمات الغير صحيحة والغير لائقة
يعني مثلاً لما تلقى زول متعلم ويقول ليك شدرة وديش وشمش دي بتزعل الواحد شديد
غايتو أنا دخلت هنا للتنبيه متوسم الخير في الناس
لكن ما دام الناس ما عايزة تغيير نفسها
فنشوف الباب من وين ونطلع بهدوء
تحياتي
كمال
| |
|
|
|
|
|
|
|
|
|
Re: الببت كلو ينبح الغاز الغاز (Re: Frankly)
|
مرحبا نادر
ياريت يوت مبسوط
وحات الرسول الضيقها الهسة انا فيها الا اهاتي بالغاز .. لو قالو لي نديك مليار ولا انبوبة غاز اقول .. شوف سقف احلامنا بقت لحدي وين
مرحبا كمال
شاكر لك نصحك وحسن ظنك
فقط يختلف الوصف في ظني وفقا للقصد .. وكثيرا ما اقرا هنا هيع الاسد النتر .. والاسد حيوان والعرب تسمي احيانا الاسد بالكلب (جرقاس تحسبا لو بكري شخبتها ) . ولا تغيب عنك ابيات الشاعر في المدح انت كالكلب في الوفاء . وهو شاعر مجيد وقديم
اها
النبيح لفظة سودانية قحة انفصلت من الكلب وصارت تعبيرا لوحدها عن كثرة القول والملاهاة ولا يأخذها المستمع كأنك تسئ له . وبل لا تخص العوام وحدهم الا بإفتراض ان كل السودانين عوام فهي لا تعدو كونها لفظة دارجة فقط
تعرف كان في جامعة الخرطوم طالبات البيطرة بفرحن لامن تلد بقرة ويسمو المولود بإسمها
شاكر ليك تداخلك
الردين مع بعض لسؤ النت ف قلت اهو فرصة
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
ود ابو سن
امس كنت بتكلم مع قريبتنا قالت لي من تلاتة يوم
وانحنا بنفتش للغاز
الليلة بس لقيناهو
قلت ليه لقيتو كيف
قالت لي جارنا واحد بتاع امن طلع لينا انبوبة
طيب جابه من وين
قالت والله ما عارفة
ياهو الليلة شربنا الشاي
فتأمل
نصيحة
لو عندك بتاع امن بطلع ليك انبوبة ولع
والباقيين اكلوا ما اكلوا ما مشكلة
وده الحاصل وبقى تفكير انسان وطن
| |
|
|
|
|
|
|
|
|
|
Re: الببت كلو ينبح الغاز الغاز (Re: فرح الطاهر ابو روضة)
|
مرحبا اسماعيل
عمنا محمود تاجر مراكيب النمر بي كوستي .. ومركوب النمر الان بي مليون وميتين ج وواحد بي اتنين مليون نص
المهم جاهو زبون وما متصور انو المركوب بحصل سعر زي دة . ف لامن سمع السعر استغرب جدا .. ف حاول عمنا محمود انو يشرح ليهو الفرق بين الاسعار والنوعية ودة نمر نون
الزول قال ليهو
توريني انا .. انا ود المراكيب
ورد ليهو عم محمود
صحي والله ود مراكيب
مرحبا ابوروضة
لاوحاتك تب ما بعرف فيهم زول الا اشوف واحد ماشي بالشارع .. يقولو دة بتاع امن فاعرف انو بتاع امن
وبؤسا ل غاز يجعلني ابحث عنه مستندا علي معرفتي للسلطة
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
وبدأت رحلتي بالبحث عن الغاز
الشمش فقعت كدة وبقيت اساسق ..
لا ما فتح لسة . بجي غالبا 9 اديني رقمك ولو جا بضرب ليك .. واحد معرفة تبرع بالخدمة دي وجار بتاع الغاز وقت شاف مساسقتي كترت .. لومكم علي اديتو الرقم وما خليت مساسقتي
ربك رب الخير فتح
غاز مافي
ها زول كيف مافي
وتبرع لي احدهم جالسا يؤانس بتاع الغاز والاتنين بعرفهم معرفة وثيقة
يا زول غاز مافي . الا تمشي قادرة وتشتري اسطوانة جديدة ومليانة
الكترابة يعني قريب لي نص مليون
لكن معقولاااا!!
اي والله متوفر عندهم
ياخ نحن بنجازف حق ملية الانبوبة تقول لي جديدة
لكن اها اشتريها بي قدر دة وبعدين
بعدين شنو .. بعد تفضا تبيع الفاضي بي 400
لكن لي الا قادرة
ديل الوحيدين العندهم
قادر الله !!؟
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
الحل مستفز طبعا .. يعني كل مرة اشتري انبوبة جديدة دة لو عندي قروش .. وليه هو في ازمة غاز طاحنة كدة ويصدقوا لشركة جديدة وانابيب زيادة . مش كان افضل يدوها للشركات الاصلا عندها انابيب مطروحة في السوق
المهم
تفاعلت مع المقترح تقديرا لصاحبة فنجرة مني كدة
وهنا اقترح صاحب المحل اقتراحا وجيها
ياخ انا مواقد كهربا جاية واضرب لي بعد 12 موقد صيني مصنع لي تركيا وجاء السودان !!
اها تمنو كم
بكون في حدود المية وحاجة !!
وتفاعلت خيرا معه شرحو
يعني كلها حلول لا تتوافق مع الميزانية
يقولو ليك تيس تقول احلبو
نجرب الفحم .. الشوال كان بي 90 ج مابطال واتحمل الكلام .. وقد يكون مافي كانون زاتو .. اشوف لدايات تلاتة تحسبا واعمل للمدام تجارب وتدريب لكيفية استعمال اللدايات
اها يا اللخو شوال الفحم طلح بي كم
بي 190 ج
الكتراااااباااااا
انا اخو الفحم
برضو الجماعة جو بي هنا
وتتواصل الرحلة
| |
|
|
|
|
|
|
|
|
|
Re: الببت كلو ينبح الغاز الغاز (Re: فرح الطاهر ابو روضة)
|
حبيبنا ودابوسن حبابك
ربنا يجمع ليك بالغاز واريحك من المساسقة
تعرف انا الغاز قطع عندي قبل كم يوم
وكنت برة الولاية قلت ليهم عليكم بالفحم
ام الوليدات شغالة لي صور من وليع الفحم
لمن الحلة تجهز وتقولي عليك الله ماتريحنا
من البهدلة دي عاجبك حالنا دا قلت ليها انتو
ماشفتو حاجة ساي زمان حبوباتنا يفزعن
ويجيبن الحطب ويولعن ويمشن يجيبن
الموية ويحلبن واي حاجة بعملنها غايتو
القيتنها انتن مافي زول لقاها خفت غايتو
تقولي حريقة فيك انت وحبوباتك ههههههه
تسلم ياحبيب
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
واكتشفت العالم السري لتجارة الغاز
امشي لي فلان داك عندو غاز
لكن فلان دة عربجي
آي عربجي لكن عندو
اها نظامو كيف دة
انت امشي ليهو وشوفو
وغازو وين
لا ما عندو انابيب بس انت كلمو .. وهو بجيبو ليك وبشيل الفاضي
كيف يعني
الغاز بجيبوهو في المحلية وبتوزع مباشر
اها
تراهو الغاز بتوزع في المحلية . مواعيدو ما معروفة .. يمكن يجي يوم ويغيب اسبوع
تجي الصباح وتخت انبوبتك وتحرسها .. ما معروف تقعد كم ساعة ولا الغاز يجي ولا ما يجي .. وممكن تكون قاعد وينتهي وما تلقا
كيف ما عارف
طيب فلان دة بشتغل كيف يعني لا بقيف في صف ولا بخت انبوبة ويحرسها
بطل لماضة
بطلت لماضة ومشيت لي كم فلان وكلهم ما عندهم علاقة بالغاز
وللاسف الغاز الليلة ما قالوا امكن السبت وتحت تحت قالو بكرة
مواصل
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
أب سن
كيفك يا طيب
أمسك دا عودنا في بوستك
Quote: واطن مصري يموت من الفرح بسب "أسطوانة غاز" !
تسببت الفرحة العارمة التي انتابت عاملاً شاباً - بعد نجاحه في الحصول على اسطوانة غاز بمستودع بمصر القديمة في القاهرة، بعد انتظار دام 3 ساعات - في وفاته، متأثراً بإصابته بهبوط حاد بالدورة الدموية.
بدأت تفاصيل الواقعة بتلقي قسم شرطة مصر القديمة بلاغاً من الأهالي بوفاة "ياسر إبراهيم" 25 سنة عامل مقيم بمنطقة البساتين في القاهرة داخل مستودع لتوزيع اسطوانات الغاز.
وبانتقال رجال المباحث إلى محل الواقعة تبين أن المتوفى توجه إلى المستودع لشراء اسطوانة غاز من المستودع حتى يحصل عليها بثمنها الأصلي، وذلك بسبب استغلال التجار لأزمة الغاز ورفع سعر الاسطوانة إلى 50 جنيهاً.
وعقب انتظاره 3 ساعات متواصلة تمكن من الحصول على اسطوانة الغاز إلا أنه من شدة الفرحة التي انتابته أصيب بهبوط حاد بالدورة الدموية وفارق الحياة في حينها. وحاول الأهالي إسعافه إلا أنه كان قد فارق الحياة. |
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
اها
واحد بتاع ركشة بعرفو شاف ملاهاني بالغاز .. قال لي في بتاع غاز ببيع سوق اسود وفي حي بعيد شوية ..
عرفتو كيف
امبارح ودين مشوار هناك وشفتو قال الاسطوانة ب 70( وسعرها الاصلي 30)
جدا ما عندي مانع يستغلني ويمص دمي . خلاس جيب لي واحدة
لكن امكن امشي ألقي انتهي
بديك عشرة ج
لا .. اديني 5 لو ما لقيتها ولو لقيتها 10
اتفقنا
ودفعت 5 ج !!!!!
بالله معقول همي كلو يبقا اسطوانة .. مخي بقا غاز بس
حالة محبطة وتعطل العقل وتنحط به
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
اكتشاف النار!
درسونا ليهو في الابتدائي كحقبة هامة في تاريخ البشرية . ويعتبر تحول جذري غير حتي تكوين العقل البشري .فإكتشاف النار غير طريقة طعامنا ونوعيته مما ساهم في تغير شكل اسناننا . وجعلنا نسكن المناطق البارد ..
والنار ما ياها الغاز دة
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
Quote: صدقا لي كلامك يا الطيب صليت الصبح حاضر
وشلت الفاتحة ربنا يسخر لي ود حلال القي لي انبوبة غاز
بالله دة كلام دة |
بالله دا بقى سقف الدعاء وكمان مع صلاة الصبح!
غايتو قلّيتو خير السماء لمّن عقدتوها
ياخ وين الخير والنماء والذرية الصالحة واللهم انصر المسلمين على أعدائهم؟
يعني يا أبوسن لو عايز ليك بوكس 78 إلا تمشي الحج وتدعو من هناك
| |
|
|
|
|
|
|
|
|
|
Re: الببت كلو ينبح الغاز الغاز (Re: معاوية الزبير)
|
عليك الله شوف ضعة احلامنا
عندي عربية ما مرخسة وانا ما عندي رخصة .. بالميت كدة داير لي 3 مليون الا حتي ارخص عربيتي وارخس ! نفسي
اها بمرق اودي الشفع المدارس . ما بعاين قدامي بعاين لي مدي 5 كيلومتر . واتصرف وفقا لذلك زوغانات من ناس المرور .. وبكون متوتر وافش غبني في عيالي
ما تتكلم معاي مش شايفني سايق
والسكر يرتفع والضغط معاهو
وشغال وجعلنا من بينهم سدا
واغشيناهم فهم لا يبصرون
ولامن اصل اتنفس الصعداء
واحس بالانتصار
عليك الله يا معاوية شوف سقف انتصاراتنا قدر شنو
حجة واحدة دي الا موتر ومستعمل كمان
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
مرقت اليوم بدري حسب نصايح الخبراء .. مشيت المحلية رغم زيفة البرد .. تعرف يا ولد كدة بتكون اول زول .. ما اظن في البرد في وزل يجي بدري كدة .. وماسك الدعاء مزدوجا .. اكون اول زول والغاز يجي الليلة
علبك امان الله لقيت نفسي الطيش .. ما شاء الله تبارك الله . الرجال الجد جو دوغشن بدري .. مرصصين انابيبم وقاعدين غادي منهن .. الانبوبة الفيها طوبة والمربوط فيها خيت ولا حبل ولا دولقان .. ايييييييك
اللهم اجعل انابيب الغاز 500 انبوبة
امين
انك مجيب سميع الدعوات
اها عاد كيف احبس الغاز ولا امشي القط رزقي ..
قالو في شفع تديهو خمسة جنية ويحبس ليك
لكن تكون بتعرفو يمكن يزوغ
اللهم لا تمحنا ولا تبلينا
الله يقطع الغاز ويقطع سنينو
ما قالو البترور دق الدلجة وبقا راقد هبطرش اشمعنا الغاز .. الله لا غز فيهو بركة
اها نسيت
محاولاتي لكسب ود المدام فشل بدرجة جيد . فلم ينفع فيها تنظيري
يا سلااااااام الملاح الليلة اطعم ومختلف زمن ما اكلت ملاح زي دة
نجض علي نار هادئة فلم تتكسر مكوناته الاساسية من بروتينات وهرمونات! ومواد جيرية ! ومحسنات لفظية !
نظرت نحوي مدامي ! بكل لطف وحنية وقالت لي
ها العوير دة .. شوف ليك فارة داقسة ما عندها بوتجاز خمسة عيون بي فرن
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
مرحبا اخي كمال
خفف الوطء قليلا يا اخي
شاكرا لك حسن ظنك بداءة في توسمك الخير في شخصي
ما حدث اني اخذت قولك بالجدية اللازمة كرأي في استعمال لفظ دون استباق حكم .. ورددت عليه بما اعتقده بكل ود واحترام .
كما يقول اهل الثقافة اللغة وسيط وحامل للافكار وهي وهذا الاهم وسيلة اتصال . ولا تحاكم اللغة محاكمة اخلاقية إلاء بمقدار ما تش إليه من معني . فلن اكون قادرا علي التواصل مع احدهم وانا اتحدث له بلغة لا يعرفها . بل حتي بفصيح لغته ان كان لا يجيدها . لذا يوجد مصطلح في العربية اسمه وحشي اللغة وتعني كلمان عربية هجرها الناس
بل و يضيف بعضهم قول
خطأ معروف خير من صحيح متروك
يقصد اللغة
اما مبحث هل الدارجية بديلا او هل يجب ان نكتب الادب بدارجيتنا فهو مبحثا دسما يمكن ان نفترع بوستا له
مع التذكير ان البروفسر عبدالله الطيب قام بتفسير القرآن بالدارجية وقال الشمش والشدرة
فأنت مرحب بك وانا احب من ينصحني ويعظني ومستعد للتراجع متي ما تبين لي صواب غيري
ولك الاحترام
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
صباح الخير يا حبيب
تعرف لما غادرت الشارقة سنة 99 كان الغاز بالمواسير
يعني بدل تفتح حنفية الموية تفتح حنفية الغاز، تطبخ وتقفل
بس تعمل حسابك من الجِلبة (أها جِلبة دي كانت شتيمة زمان، ما عارف مرجعيتها شنو)
المهم الله يرحم الشيخ ود تكتوك وقد قصُرت تنبؤاته عن الغاز
قال آخر الزمن السفر بالبيوت والكلام بالخيوط، ولو أضاف:
والغاز بالمواسير، ما كان ود اب سن بتحبس في السوق
في انتظار أنبوبة حبلى بي ابننا الغاااز .. ابننا الحب
الجمعة دي جرب السمك المسكوف (الطريقة العراقية) أي الشوي على الحطب
لو شعرت في شوية استفزاز في المداخلة دي عديها بالله خصماً على دفتر الخوة
| |
|
|
|
|
|
|
|
|
|
Re: الببت كلو ينبح الغاز الغاز (Re: معاوية الزبير)
|
استفزاز الحبان ليهو مكان يا صاحب
قالوا مصر القريبة دي بالمواسير وزمااااان حسب حكاوي الطلبة .. وهسة واحد مصري مات لحصوله علي انبوبة غاز. شفت كيف الناس ديل اذا دخلوا قرية عدموها طفاي النار وعدموها الكبريتة . بالمناسبة الكبريتة بي ألف جنية وزمان نص العلبة يدوك معاها كبريتة
غايتو جلبة دي ما بعرف ليها معني فاحش لكن علبة معليش وبرضو ليه ما عارف
نحن اي ضمير مستتر تقديره هو بنوديهو لدلالة مش ولابد
يسعدني حضورك دوما
الفطور معزوم عرس
والغدا برضو معزوم عرس
و
حليل السمك يا صاحب الناس دي التقول بتقبضو عوم
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
ود أبو سن سلام
والله دي مأساة حقيقية رحلة البحث عن أنبوبة غاز
والمشكلة في الزمن المهدر وإنتظار الصفوف الطويلة
وقيام الدغش دون فائدة والرجوع بخفي حنين ( ولو رجعت بيهم تكون محظوظ )
نسأل أن يسهل الأمور
| |
|
|
|
|
|
|
|
|
|
Re: الببت كلو ينبح الغاز الغاز (Re: سفيان عثمان قرضيه)
|
مرحبا سفيان
صدقت والله كمية زمن مهدرة
ف عشان المواطن يبدع في اي مجال . بحتاج لي حافز حسب هرم ماسلو .. تحتاج لي حافز يرفعك من سفح الهرم لي فوق شوية لتلبية الحاجيات الروحية حقتك .. والاهم يتوفر ليك الزمن والمزاج شان تفكر . لكن اذا كان مخك كلو داير غاز .. ولا بتفتش ليك رغيف .. من تصبح همك كيف توفر الاساسيات فقطع شك بترجع لي حاجيات الانسان البدائي وكذلك اخلاقك .. فلكي ترتقي انسانيتك يجب ان ترتقي حياتك المادية مع التأكيد ان المادية لاتعني المعني البلدي اي النقود
فحين تواجه بقضايا حياتية بسيطة مع صعوبة تحقيقها تتدني الاخلاق والممارسة . فتسعي لتحقيق تلك الحاجيات كيفما توفر لك
فالشاهد ان فقيرا يستغل فقير .. ويسرقه ويخدعه .. فأولئك الاثرياء لا سبيل للتعامل معهم فأمورهم مقضية في محلهم
لذا كان اخطر الفئات علي الثورات هم البروتاريا الرثة . فلا وعي ثوري لها ولا ادوات عمل ويسهل اغراءها فهي مغرمة بالنتائج الانية
صوت لينا وبنديك انبوبة غاز
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
Quote: واحس بالانتصار
عليك الله يا معاوية شوف سقف انتصاراتنا قدر شنو
حجة واحدة دي الا موتر ومستعمل كمان |
يا حفيظ ... انحنا هليناهو من هين .,..
زمان صاحبنا لقي علبة البيرة بانية تلج و رجع لي سيد البار زعلان
قام عشام ما يزعله ... اداهو فتيلين كونياك و قال ليهو فكهم جوه العلبه ... تسيح ليك التلج سريع و تشرب بيرتك مكسورة كمان ....
شوف السودان ده مشاكله كانت بسيطة كيف !!!
| |
|
|
|
|
|
|
|
|
|
Re: الببت كلو ينبح الغاز الغاز (Re: يحي قباني)
|
قباني يا صاحب
زماااااان قال الغناي
مشاكلي بسيطة بي الريدة بتحل
وقال مصطفي سند لاحقا
كأنما الامكان
اصبحت مستحيل هذا الزمان
ف شنو
المعاناة صارت سمة سائدة .. تعاني في ابسط الخدمات .. تعاني تطلع بطاقة وتعاني تدخل كهربا ولا موية لي بيتك . وتعاني تقري اولادك ولا تلبسم ولا تعالجم
وتعاني كدة حتي تعجز المعاناة عن معاناتك
وتعجز حتي تتمني ان يأخذك الله للضفة الاخري للكون !!
وبعد داك
تشوف معاناتك وسطوة يد السلطة عليك وتسمع بالاشتري الشارع وباع الاستاد وضرب المليارات وتتملي غضب وغيظ
بقرا الايام دي في جريدة المستقلة عمود لي عجايب الشمبلي .. اهدار مريع وبدون اختشا لي مليارات حتي وصلوا للزكاة
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
قالوا جا
ناس يقولو ليك شوية وناس كتير
الصف خليتو مافي داعي للمجازفات وضياع الجنيهات والزمن
مشيت لي بتاع غاز
قال لي مافي
طيب ما اديت هسة واحد
ديل مسجلين اسماؤهم وخاتين انابيبهم من كم يوم
اها نسجل
لو سجلت الا يجي غاز جديد
يعني جا
لا جواب
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
| Quote: قام عشام ما يزعله ... اداهو فتيلين كونياك و قال ليهو فكهم جوه العلبه ... تسيح ليك التلج سريع و تشرب بيرتك مكسورة كمان |
هههه، بالغت يا قباني. طيب هسه في الحالة دي البيرة بتكون بقت حرام بعد الخلطة دي؟!
| |
|
|
|
|
|
|
|
|
|
Re: الببت كلو ينبح الغاز الغاز (Re: معاوية الزبير)
|
اها ي قباني ومعاوية
قالوا واحد تاب . وحلف ما يقعد في بنبر انداية . اها بعد فترة زولنا حن .. وندماهو كانوا سبب في ذلك . قعدوا يزنوا ليها ..
الحل كيف والزول حلف وداير فتوي .. فأفتوا ليهو مادام حلفت ما تقعد في بنبر جر سرج حمارك وصنقر فيهو ..
وتاني حلف
ما يخش انداية
وتكررت الجرسة وجات الفتوي
نبقد برة في الشدرة المقابلة الانداية
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
الغاز جا السبت قالوا
وقالوا قلع ودفسيبة
وحتي الآن لازلت اشتري الفحم
ازمة غاز طاحنة
ومستغلين جدد
اثرياء الكوارث
والولاية مشغولة بتتبع فضائح الوالي في صحيفة المستقلة
والوالي مشغولة بتصفية خلافاته بحثا عن مصدر المعلومات الموثقة لفساده
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
ود اب سن سلام عليكم
نفس الشي اتصلت الوليه وانا خارج البيت
انو الغاز قطع والانبوبه التانيه برضو فاضيه
رجعت مسرعا وحملت ا لانبوبتين لدكان عمنا هاشم
قالي ماتتعب روحك اتجه فورا للمستودعات
فعلا ذهبت وخلال اربع دقائق وبسعر 30 جنيه للانبوبه
كنت عائدا للبيت بانبوبتين مليانات
وسبب الانقطاع انو ناس المصنع بيقومو
بصفة دورية بتنظيف مواسير التعبئة وخلال اربعه وعشرين
ساعه يعود المصنع للتعبئة من جديد
فعلا تاني يوم عمك هاشم راصي انابيبو وببيع وكان شي
لم يحدث
هلع ا لواطصاب مازال هو ا لمسيطر علي عقول البشر
انتشر خبر الغاز خلال عشرين دقيقه في موبايلات الخلق
طبعا انا بتكلم عن ولاية الخرطوم
| |
|
|
|
|
|
|
|
|
|
Re: الببت كلو ينبح الغاز الغاز (Re: عمر عثمان عبد الوهاب)
|
احد مواطني بنغازي بعانق اسطوانة غاز جلبها بعد جهد و العائلة تقوم بتهنئته
showinfo=0" frameborder="0" allowfullscreen>
يا حفيظ الكلام ده في ليبيا الكان الغاز فيها والبنزين أرخص من الموية!
إلهاء الناس بالمعايش أسلوب تنتهجه الأنظمة الشمولية لشغل الرأي العام... فلننتبه!
| |
|
|
|
|
|
|
|
|
|
Re: الببت كلو ينبح الغاز الغاز (Re: Mohamed Yassin Khalifa)
|
مرحبا عمر
وحبابك
وتلك ام الطوام ( جمع قرف لي طامة ) انو السودان دة هو الخرطوم !! الخرطوم محل الكاميرات للاعلام الاجنبي والمحلي ومحل السفارات البنقلو الشمارات !!
قريت في هذا المكان بوست الاخ ناصر عن الغاز وامرا محليا من معتمدية الخرطوم
محاربة تهريب الغاز للاقاليم
اقرا وادي ربك العجب
والله انا شايل الانبوبة الفاضية الناس المارة والجالسة والراكبة غنيهم وفقيرهم يسألوني دون سابق معرفة فلا يربطنا الا الغاز وتحلنا انبوبة
اها الغاز جا؟
شكلي دخلت الازمة متأخر
وعرفت يا ريت ما عرفت
مافي غاز في كوستي خالص
بتجي انابيب معدودات في مبني المحلية تحت حماية الامن ! وتوزع للناس بالدور .. والاولوية للقوات النظامية
وعادي الشكل والمنابذة
والانبوبة حصلت مية جنية
وقادرة الكانت بي 450 اشتراها زول صحبي امس ب 520 ج !!؟؟
لانها مليانة
اها الناس كلها ما عندها المية جنية ولو عندها محتاج تعرف الببيع منو
سوق اسود
رحم الله السوق الاسود الكان ابيض زمان !
من تاريخ هذا البوست وحتي الان عجزت وعجز معارفي عن توفير انبوبة غاز لي
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
سلط يا محمد عثمان نسأل الله التخفيف !!
اها عاد كيف ما شغلتنا وعينك ليهو تركب فيهو
لازم سندوتشات شفع المدارس الصباح .. والشاي وتسخين موية غسيل البزة .. الغاز ضروري جدا لمن له اطفال
لو شفع مافي مافي مشكلة يولعو الفحم والزمن راقد
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
امس
صديقي وحيد سيد يعقوب صاحب بقالة السمندل شارع الدويم .. المساء وانا في انتظار نتيجة فحص الملاريا مشيت قعدت معاهو
زهجان
مالك
ياخ الغاز نجضني .. عندي 8 اسطوانات فضن .. جبت حقت البيت وحقت بيت محمد مختاري جارو فضن .. لافي كوستي كلها من الضهر لي بعد المغرب .. وصفو لي طرمبة شارع الابيض مشيت لقيت ميات الانابيب مرصوصة .. والتاس واقفة
جيت راجع اشتريت فحم ولبني باظ
وحيد يبيع اللبن المسخن في بقالته
وكمية كبيرة .. علي بال ما النار تولع اللبن اتقطع
| |
|
|
|
|
|
|
|
|
|
Re: الببت كلو ينبح الغاز الغاز (Re: عبدالحفيظ ابوسن)
|
اخونا في السوق رمضان عثمان
جاني يشكي من الصباح
صليت الصبح وركبت ركشة ورفعت انبوبتي .. قلت اكون اول زول .. جيت لقيت الناس فارشين فرشة ونايمين في الصف
اها وعملت شنو
دورت ركشتي وجيت راجع
دي دايرة ليها زول عاطل
ليه تدوا ناس الاولوية وبقية الناس بايتة في الصف ؟
التقدير شنو يعني
هل هم افضل من غيرهم
وهل ناس الاولوية منظرهم مش بستفز الناس .. الناس تنوم ودة يجي من بيتو ويشيل انبوبتو ويمشي والا يمكن ما اتبوبتو زاتو !!!!
| |
|
|
|
|
|
|
| |
عبدالحفيظ ابوسن
نادر النور آدم
Frankly
ismeil abbas
فرح الطاهر ابو روضة
سليمان القرشي
يوسف الطيب احمد إدريس
معاوية الزبير
سفيان عثمان قرضيه
يحي قباني
Mohamed Yassin Khalifa
فيس بوك
تويتر
انستقرام
يوتيوب
بنتيريست