أتقدت السبلوقة ,,,,,,,,, هشام بركات

Quote: يمة اتقدت السبلوقة والطرقة الـ بقت محروقة والراكوبة قالت شووووو يوم المطرة جات مشروقة وااااا شري البابور عطش للجاز الشافع بشيل عكاز والنفساء بتخوج في الطين اتشوشونا بالانقاذ وااا شري تمر حلتنا اصبح مر واللبن الـ بشد الحيل شرابو بدورلو يمة صبر ومن يوم البلد كوّع الزغرودة قالت كُر واااااا شري الشافع بدور كراس وابوهو مرندلو الوسواس والبت الـ زي النسمة الشاكوش حرق جوفا والشيطان لعب في الراس واااا شري بقينا نعزي بالجوال ونسقف بيتنا بالغربال وضيفنا يبيت جعان يمة والزول السمح بالحيل صبح كضاب ومكشوف حال واااا شري فريق الكورة بس ارجوز ومغلوب كل يوم بالجوز وحاجات بس نشوفا طشاش ونسمع بيها في الرادي زي المنقة والتفاح وقمر الدين معاهو الموز وبرضو وجعنا يمة شديد كلية العيش بقت بالكوز واااا شري ناس بتحلي بي تركين صغارنا النزهة العاب طين وناس من القهر والجوع يجوك ناشفين تقول ميتين شبابنا بكوسوا لي اللقمة نست تحلم عديلة وزين والبلد الكبير يمة بقت مقسومة لي نصين وااااا شري عازة امرقي جري النم ونمرق نحنا جنياتك نشيل شيلتنا ما ننطم نخلي النيل يعود تاني جميل رويان يفيض بنغم تجي القمرة وتضوي الليل ونفرح بالضياء والنور نعيش بسلام ومن غير هم ونغسل من بلدنا العار وكل زولاً يعارضنا قسم نسقيهو من الدم .