|
|
 مدينه وولده بخيت
|
الحلقه الاولي
كم يوم ماشفت ناس امنه وبتها سهام ياربي مالن لا جن شحدن لا مرقن حامن غشن شربن لهن مويه التقول بيتن بعيد ..هوي ياامنه ياامنه ياولد تعال ناولني جك الالمون داك الندق الحيطه
امي كوراكك دا انا من اخر الشارع سامعو هسي كان الناس في ما كان قالو ليك ايوه
اسكت ياشافع سكت حسك شوف وشس متل الصبره صبره تاكلك وانت زاتك كنت بتتلكع وين في اول الشارع ما رسلتك دكان علي وهو في نص الشارع؟
اي بس سمعت كوراك ولقيت الناس اتلملمت اتلملمت اشوف في شنو
اها ولقيت في شنو؟
لقيت ناس الكبسه
كبسة شنو ياولد
ناس الكبسه الكبسه الكبسووووه
ياولد بلا ياخدك انضم متل الخلق
سمح كدي انزلي من حيطة الناس لاصقه متل ضب المغارب كدي
ياولد ضب المغارب انا ما بتخجل تنضم متل النضم دا يخسي علي قرايتك وادبك وتعليمك يا عديم التربايه
امي قبال تشغلي شريط ابوي وعمتي اخير النتخارج من قدامك بلا تقدي لي عين والا تقعي تكسري كراعك تبقي نقناقه وشمشاره وانا مرسال الخبارات من نسوان الحله
ياولد..اقيف
واي واي يايدي
ضربك الجك؟
ايه
بركه اريتو كان قد عينك المتل عين ابوك الفرد واحده
ههههه غايتو يا امي زمان قبال يعرس فيك كنتي بتقولي قسمه عاد الله ما بدي كل شي دحين العين ماهي مقلله مكانة الراجل
كنت في السابق بقول علا وكت عرف بقي راجل وعرس الله يقد التانيه
سمح سمح نست اوريك الكبسه قالو في قناديل حشيش حايمه في الحله اها فتشو كم بيت بس مالقو شي
اها
مافي اها بس اثناء الكبسه مارقه من الحله شفت الزول الشايل الحشيش رماه في الواطه برااااحه دنقرت رفعت الامانه باقي ياحاجه دي قروش قروش قرووووش
سجمي ياولد وب علي بتقول في شنو انت
اها قمت خفت ناس الكبسه يقبضوني شفت امنه وبتها واقفات فاتحات خشماتن يتخبرن وبس
بس شنو يا ولد
بس رميت لك الثروه في كيس الخدار حقها
ياشافع بتقول في شنو ات
المهم قوماك بسراع قبال المره وبتها الهبله يشيلن حالنا يشل كرعينن
|
|
 
|
|
|
|
|
|
|
|
Re: مدينه وولده بخيت (Re: مها عبدالمنعم)
|
الحلقه التانيه
يا امنه كيف اصبحتي
اهلا مدينه ادخلي لجوه
لالا بسراع مستعجله حلة الملوخيه في النار
الليله جبتي ملوخيه من وين وما مرقتي علي السوق
رسلت بخيت علا يمين اريتو كانم ما مشي جاب لي الخدره مضبلنه متل علي سيد الدكان
ههههه يامره جنيتي بصوتك الماكن دا كان سمعك بتروحي وين من شبكتو
بنشبك في رقبتو دي من يوم شفتو ببرق في عويناتو لبت احمد اخوي ماكلاني كاروشه عليه بلا ياخدو ويريحنا من فولو السجمان الرمدان الكلو سوس وعدسيه ومافيهو طعم الفول
امي امي اموي
ياولد مالك بتنبخ
انتي بخيت وكت معاك مالك مخلياه في الباب
ابا يدخل الولد الملكوع قبيل قال
ايه ايه شفتو رما لي قندول البنقو في قفتي
بدور يعدم بتي امها؟
لالا الولد غبيان وجاهل شن عرفو بالبنقو الا قال طمع يرجعو لسيده يدي قريشات
مالك فاتحه خشمك كدي يا دي موية زرقا ما مديتيه لي
لا لا بس انا خفت الشي يلقو عندي جدعو راجع في دفار العساكر وفرد نفر ما شافني
علا بخيت الله يعوضو ان شاء الله تلاقينا كبسه تانيه بكون عرفت بخيت بدور يسترزق من البنقو
| |
|
|
|
|
|
|
|
|
|
Re: مدينه وولده بخيت (Re: مها عبدالمنعم)
|
الحلقه الثالثه
يازوله ها والله الا تمشي براك بس انا عندي كتابة متلتله بتمها الاستاذ الحقار داك قال لي يا تمها يا تجيب ولي امرك دحين اخير اوجع ايدي ولا تجي تشيلي حالي مع الولاد
عاد كان شاطر كان قالو ليك جيب ولي امرك بس علا من وين تجيب الشطاره النهار كلو حايم والليل نايم
واتي دحين يمه قاعده في البيت ؟ شايله كيسك حايمه النهار كلو بلا البيع ماعندك سعله لامن كتفك اتعوج زاتو
ياولد ات اللداحه دي من وين بتجيبه
سمح سمح هسي دايره شنو اتي
دايره تدردق الانبوبه لعند سيد الكان تختها في الصف
الا سيد الدكان مابمشي يازوله هوي الفحي توبك براك خليني في نصيبة الكتابه دي والا اقول لك انتي كتابتك شينه بتشبه كتابتي دي ما تجي تكتبي لي شويه بس انقلي صاح ما تنقلي غلط كمان باكر يشدونا بسببك
سمح بس انت امرق ودي الانبوبه !
الولد مرق ما كتير وجا يوما هوي امرقي علي السهله النسوان قالو مرقن علي المظاهره
ياولد مظاهرة شنو
الغاز لحق المية جنيه وعليك امان الله المدافرهواقعه الف احمر
ودافرت؟
لالا ادافر شنو الانبوب مافي زول هبشو علا النسوان الله يقطعن اتشكلن لامن جابولن ال التلاته تسعات
اتشكلن في شنو
قالو ستهم مرة علي؟
ايه قالو عزمت النسوات جت عليهن لكرامة بتها زلابيه وشاي وجات النعمه لامتها
والعركه قامت قومي الحقي لايفوتك
سمح يالغبيان انا قلت النسوان مرقن اشن الغاز اب ميه وكت كمان شكله في لوم ماني مارقه تعال كمل كتابتك شاحده الله يشدوك في طابور الصباح ويدوك ليهن عشره سيطان لامن تبول في كرعيك يا مكعوج بدور تمرقني علي الساهله فيشان تخفس لبره .
| |
|
|
|
|
|
|
| |
مها عبدالمنعم
عبدالحفيظ ابوسن
فيس بوك
تويتر
انستقرام
يوتيوب
بنتيريست