|
|
 فى رثاء الاستاذ عوض فضيل
|
بركلنا يعطى وما بخيل
تايهين وخار بينا الدليل
الدمعة من خدى تسيل
متخفى زى قلب النخيل
الله حليلو عوض فصيل
* * *
من ناس قدام فرسان وخيل
شاهرين سيوف ليهن صهيل
اهلك كرام وزنك تقيل
تبكيك خيولهم بالصهيل
وابكيك برايا عوض فضيل
* * *
استاذ وكان علمك سبيل
مسكون وقارلا قال وقيل
والعلم نور فوقك يخيل
مطمور فهم منو بنكيل
ما سكينوا دربو عوض فضيل
* * *
ما الزول ده راس حاشاه زيل
يكرم كرام يرفع ذليل
جازم امورنا حبالو تيل
كيف التراب فوقك نهيل
عارف عظمتو عوض فضيل
* * *
لى كل جميل قلبك يميل
تبكيك ام خدا اثيل
راجياهو حنك من قبيل
اصلو الحنين ما فيك دخيل
توقيع كتابو عوض فضيل
* * *
استاذنا جيلا بعد جيل
اتملى وجهك يا جميل
حزنان براى والليل طويل
حتى الحمام غلبو الهديل
مامات نظيرو عوض فضيل
* * *
ما بين رحاب دوحو الظليل
حزنان وحيد ما فينى حيل
يا حليلو كان شهم وعديل
هز الفراق روحى الكليل
فارقتو شيخى عوض فضيل
* * *
كلماتى ما بتشفى الغليل
لى حزنى ما بتقدر تزيل
وما يجدى قول الناس حليل
قالو لى ما فاقدنو ديل
حزن الجبل فارق ديارو عوض فضيل
* * *
ياراقى يا اب قدرا جليل
تقبض نواصى المستحيل
تمطر سحاباتى وتشيل
لى شايقى فى البركل اصيل
وتبكى القمارى عوض فضيل
* * *
دا الضخم يبدولك نحيل
فى جوهرو بيوزنلو فيل
فى هيئتك غزلان وريل
غنيت معاهو غنى الخليل
رقصن حروفو عوض فضيل
* * *
بابا الكرم منك سليل
فى الدنيا يندرلك مثيل
فتشت وين ما ليك بديل
وفى دوحتك يخلو المقيل
قصرت قولى عوض فضيل
* * *
يمرق نهار ويعقبو ليل
وانا روحى بى فقدك عليل
تهدر مشاعرى الفايضى سيل
انا كل ما اقول يازول قليل
يا قمرة وينو عوض فضيل
عمار محمد ادم 27-3-2013
|
|
  
|
|
|
|
عمار محمد ادم
فيس بوك
تويتر
انستقرام
يوتيوب
بنتيريست