|
كمان جابت ليها ديك رومي يا سعاد الفاتح!!
|
البرلمان: هبة عبيد هاجمت البرلمانية سعاد الفاتح السياسة الخارجية، ووصفت العلاقات الخارجية بـ «الوجعة» وقالت: «إذا ما طلعنا الصديد من قلبنا حنموت» وأضافت قائلة: «الخارجية بما فيها من عملها ورجالها ونسائها كوم وعملنا كوم»، لافتة إلى أن الإيبولا الأخيرة هذه حضرت فى مختبرات وتم نشرها في الدول الإفريقية بسبب ضعف العلاقات الخارجية، وأشارت إلى اختلاف مناقشة تقارير الوزارات في البرلمان، وأوضحت أن خطط الوزارات كانت تمر بدون تمحيص «وبمشوا الحاجات»، وأكدت سعاد أن العقوبات المفروضة جاءت بالخير على البلاد لأنها أدت إلى الاعتماد على النفس، وقالت: «مافي زول جعان.. وفي ناس بياكلو الديك الرومي وناس كرعين الجداد وناس أم شعيفة».
الانتباهة
التعليق علي الأنباء
ناس الانقاذ ديل رايحة ليهم اكلة تصريحاتهم كلها اكل بداية من الهوت دوغ الرئاسي مرورا ببيتزا وزير المالية واخيراً ديك رومي سعاد الفاتح البرلمانية عالم فطسة بشكل .. من هنا نقترح تعيين وزير دولة لشئون السفسفة بكل انواعها من اللغف واللهط والأكل واللحس من مهامها وضع استراتيجية سفسفية خمسية مواكبة لولاية الرئيس الجديدة تتضمن عمل وصفات غذائية رئاسية ووزارية وبرلمانية ومحليات وشعبيات الخ الخ وتخصيص برامج تلفزيونية في قنوات الحكومة يقدمها شيف رئاسي وشيف وزاري وشيف برلماني وطباخ محليات وحاجة من سوق الناقة يعلموا فيها الشعب السوداني الفضل داخل حدود السودان المقسوم علي 2 كيف تعد وجبة اليوم ونبدأ بطباخ شعبي صاحب خيال واسع: أكلة قدر ظروفك: المكونات: رغيف معتق ملح وشطة ودقاق طعمية وموية وموية فول وموية جبنة وموية زيت المقادير: اشحد بتاع الدكان 3 كمش ونص موية فول، صبارتين موية جبنة، شوية زيت ملموم من زيت الطعمية مع شوية دقاق طعمية الوصفة: تقطع الرغيف المعتق وتكب فيه المويات المذكورة آنفاً و شوية دقاق الطعمية وتستأذن بتاع البقالة في شوية ملح وشطة وشمار لو في وبالهنا والشفا طبعاً الموية موجودة في الزير مع (كوز) الصلص المربوط بخيط بس ياريت ما يطلع مقدود! ملحوظة المقادير متوقفة علي معرفتك ببتاع البقالة والوجبة دي ممكن تكررها في الفطور والعشا وبعد ده يسألونك الشعب ده ما عاوز ينتفض ليه؟ إذا كان الرئيس ابزرار مزرود كاسر ركبة يبقي الرعية مسيحة مكنة عديل! 25 سنة وتعيرونا بالأكل وكمان جابت ليها ديك رومي عديل يا حاجة سعاد ما ده الخرف بذاته وصفاته، الديك الرومي ده ما عرفناه الا في اعياد الكريسماس عند اخوانا النصاري وبياكلوه بطقوس معينة لا تتوافق مع الشريعة القلتوا حاكمننا بيها حقيقة هذه بلاد تحكمها الديكة
|
|
|
|
|
|