هنا وجع لم و لن يحدثكم عنه اليسار السوداني ، اليسار بتاع هنا امدرمان و شنو كده ما عارف...!!!
قال استاذي و صديقي ، وشيخي في معارج الدهشة الفالتة ، سيدنا يحي فضل اله العوض ( عليه السلام اينما كان ، وكيفما كان ):
يا علم الدين هارون ، يا مهمل عادي ، و كم مسكين ، بي طلقة في راسك ، مين ا لكتلوك .. مين؟ جدعوك في خور.. كتلوك.. الخونة... الظلمة... القتلة.. المندسين... وروحك.. فضحت ، كل متسلط.. و أي مرابي .. و تاجر دين.. السفلة ، الإبتذلوا العلم الدين في اسمك يا علم الدين..!! و كتلوك ، جدعووك...و ما دارين..!! انت الحي جوانا ، و هم ميتين..!
كبر
10-22-2014, 10:51 AM
Kabar Kabar
تاريخ التسجيل: 11-26-2002
مجموع المشاركات: 18537
ذكرى الواحد و عشرين اكتوبر ، تعذبني بعذابات خاصة للغاية...! مش نوستالجيا يا صديقي ول ابا فضيلي جماع...و انما واقع...يأكلني كما اكلان الجرب اللعين...! فهو عندي قصة خروجين: خروج اكبر ، و خروج اصغر..
في الخروج الأكبر خرج الشعب السوداني ( الله يطراه بالخير ) في اكتوبر 1964 و اسقط حكم العسكر.. ثم فحطوا بيهو الجماعة واحدين..!!
في الخرج الأصغر... في 21 اكتوبر 1999 .. حطت اقدامي المغبرة تراب كندا..!!..خمسطاشر سنة.. خيبة.. حلم.. فرح.. ردة.. و بقاء..!!
و لأن الشعوب هنا ، بعض منها ، عندو ذاكرة قوية.. فلقد اتصلت علي زميلاتي من زمن الجامعة ( جامعة ريجانا في مقاطعة سكتشوان)..وهن.. صديقاتي الجميلات.. تشومكا الزامبية.. مارا السرلانكية.. و ملينوى الجامكاية.. و اقساها كانت مكالمة تشومكا ( تعجزك تضاريسها الحنونة ، فتعود تلميذ يتعلم مبادئ الجغرافيا و خطوط الكنتور من اول).. بالضبط زي قول اللعين بابكر ود السافل ( شفت عيني في سيقانا يا خلاني ، ما تلوموني يا خلاني ).. هي تسميني ( مجنون)..! هاي مجنون ، هبي انفيرسري مان..! ويتش انفيرسيري..!! شت ، مان ، يو هاف بين هير فور ففتنين ايررز ، دونت تل مي يو فورقت ذات؟.. اها ، ذات ون..ثانكسز..! هاو يور بيبول دونق وز ايبولا؟.. ويل ، ذي آر فاين..نو كيس ريبورتد يت..!! تشومكا ، بضميرها الإنساني الباهر ، تذكر حينما كنت اسألها عن زامبيا و ضحايا الإيدز.. و هي فيها شفافية غريبة تجاه الكائن الأفريقي( سبحان الله ، زيها و زي المرحوم علي مزروعي,,!!).. تعرف ما ينتاب اهل شرق القارة ، شمالها.. جنوبها ، غربها..و هي تحب الزمبابوي اوليفر ميتزوكي (بصراحة هي اول من علمني سماعه ، و اخرين كثر ، و هي اول من علمني الإسلو دانس..!!).. تحب خوليوس نايريري ، جومو كيناتا ، كوامي نيكروما ، باتريس لوممبا...و الأغرب .. هيلي سلاسي عليه السلام ( دي عشان تشومكا)..! كلما اجيب ليها سيرة كينث كاوندا ... بتقوم بتزوغ بي عدلها... لكنها بتضحك و تستغرب لمن اقول ليها فريق المريخ السوداني ، زمااااااااااااااااااان ، كان عندو لاعب اسمو السر كاوندا ( تحية ليك يا السر كاوندوا ياااخ ، بالرغم من اني هلالابي ، لكن في شان تشومكا الواحد قرب يكفر ويبقى مريخابي..!!!!) قلت: كان يو دانس وز مي تو نايت؟..
ضحكت ، عبر التلفون ، و قالت: ويل ، يو هاف تو درايف مور ذان ناين هندرت كليوميترز.. ايام هير ويتنغ فور يو ، وز سنتت كانديلز أند ساكس تونز..!! ( هي تعيش في مدينة ريجانيا ، و انا اعيش في مدينة كالقري ، و المسافة تسعمائة و ستين كليو ميتر..!!)..
كبر
10-22-2014, 11:03 AM
Kabar Kabar
تاريخ التسجيل: 11-26-2002
مجموع المشاركات: 18537
يا علم الدين هرون... كلمات الأستاذ يحي فضل الله العوض.. الألحان ، الأداء ، التنفيذ: العالمي وليد عبد الحميد ( وليد كوش)..!!
هذه هي ذاكرتنا يا جماهير امسودان ، ذاكرة بريئة ، شهديها الفوراوي علم الدين هرون ، مسجلها و موثقها يحي فضل الله العوض ( رغما عن انفو ، شايقي من كادقلي) ، ملحنها و مؤديها...الفنان العالمي .. الشاب وليد عبد الحميد... و هو شاب ينتمى للسودان كله... شرقه .. غربه .. شماله... جنوبه...و يقيم في مقاطعة اونتاريو الكندية... و كلما ادهش العالم ... يسألوهو.. انت من وين يا وليد.. ؟..يقول ليهم انا من السودان ( احبابنا المعجبن بمزيكا مالي ، خصوصا الليجند سيدنا علي فاركا توري... عليه السلام... اخونا وليد من الناس الإشتغلوا مع علي فاركا توري هذا..!!)
كبر
10-22-2014, 11:07 AM
Kabar Kabar
تاريخ التسجيل: 11-26-2002
مجموع المشاركات: 18537
الي صديقي و استاذي محمد المكي ابراهيم...و يا ليته يقرأ قريبي الجميل ، استاذ ي وصديقي يحي فضل الله العوض.. و يا ليته يسمع صديقي العالمي...وليد عبد الحميد..وليد كوش..!!
الي استاذي و صديقي دكتور عشاري احمد محمود خليل.. هكذا يا زميل هي ملامح ذاكرتنا..!!
نلتقي فيها ، انا البقاري الوهم ده ، و صديقي المواطن عمر عشاري ، و شباب يفع في جامعة جوبا.. وصحابي ناس دا اسما جوز جوز.. وبنات ابا ابوك..ابوك الكبيرة.. ابوك الصغيرة.. ميري نون.. و الجميلة لوشيا.. و ريجينا ( باربرا)... و ليزا ( دينكا بور يا دكتور ، يعني نحن و عظيم الذكر دكتور جون..نفس الشعور ، و كدنا ان نقول جعبتين في سروال)..و ابونا الروحي النور الجيلاني..!!
الي صديقي و استاذي يحي فضل الله العوض ، بيت الجاك في عينك انت و اللعين حامد جاجا ، فلازلت ابحث عن وطن ساقط تماما في علم الإنسانية الحنونة ، يصلبني في مدارج الجهوية و القبلية..وطن يقبلني بكل تشوهاتي ، احلامي ، طموحاتي ، من غير أي يضعني في خانة بقاري ، ولا شنو كده ما عارف..!!..و الله يا يحي ، ماك طالبني حليفة ، الحاجة الإسمها امسودان دي بقت عندنا رهاب رهاب..!!
ثم الي صديقي وليد عبد الحميد ، وليد كوش.. شفت يا وليد اهو كلما الواحد يتزنق في محاصصة حضارية ، بيقوم يمرق شغلك ده..يعلم الله يا وليد ، نباهي بيك كل امم العالم ، ثقافات العالم ، و بنقول ليهم يا هو دا السودان القاعدين ننتمي ليهو..!!
كبر
10-22-2014, 11:52 AM
Kabar Kabar
تاريخ التسجيل: 11-26-2002
مجموع المشاركات: 18537
هنا صديقنا اوليفر متازوكي..من زمبابوي... سيدنا علي مزروعي ، زار كثير من الدول الأفريقية...حتى السودان في زمن نميري قام كسر القناني اياها ، فقال المزروعي: يشهد اله ، و ارواح الفراعنة طرا ، ما طشمتة تماسيح النيا و قتها لا يعلم به احد بعد..!!.. ثم زار بقايا مدينة اسمها سواكن ( يا ترى كم سوادني/ة فينا زار سواكن تلك؟)... لم يعجب المزروعي الإ بلدين افريقييين: الجزائر و زيمباوي..!!
تقول صديقتي الزامبية تشومكا سيماسميكو...ضع راحة كفك اليسرى على اعالي خصري ، حتى يلامس صدغك الأيمن راحة خدي الأيسر، فتكون راحتي اليسرى داخل راحتك اليمني.. ثم نتحرك مع الريتم..!!
ياااااااه يا عم اوليفر..!!
كبر
10-22-2014, 12:01 PM
Kabar Kabar
تاريخ التسجيل: 11-26-2002
مجموع المشاركات: 18537
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست