|
|
 الحال من بعضو !! .. خالد عزالدين
|
كنت اسابق الوقت لانتهي من كل المشغوليات والمسؤوليات يوم الجمعة
حتي اتفرغ لمشاهدة مباراة المنتخب امام جنوب افريقيا ..
ذهبت مبكرا للسوق المركزي .. حاولت ان ادخل بالعربة الي داخل السوق
فشلت في ذلك بسبب الزحام من ناحية وبسبب الاوساخ التي تغلق جزء
كبير من ناحية وبسبب المياه الراكضة من ناحية وبسبب وبسبب من ناحية وناحية !!
أوقفت العربة علي الطريق الرئيسي وسط كمية من الحافلات التي تغلق
الطريق ولا تهتم من قريب او بعيد بقواعد المرور ..
دخلت راجلا للشارع الرئيسي في السوق المركزي وهو السوق المخصص لبيع الخضروات !!
اضطرت بعد خطوات قليلة للعودة للعربة لاخذ مناديل حتي اغلق انفي من رائحة الاوساخ ..
ذهبت مسرعا متخطيا اكوام الاوساخ والباعة الذين يفرشون علي الارض ومجتهدا في
تجنب الكثير من المناظر المؤذية حتي لا اعود قبل ان اشتري (الخضار)
ودخلت للسوق الذي اصبح له بابا يذكرنا بقصص المدن القديمة !!
وجدت ايضا وللاسف الشديد كمية من الناس يفترشون الارض ويسدون الطريق
مع صراع عنيف علي الممر الصغير بين اصحاب ( الدرداقات) والمارة ! ·
تجاهلت كل شئ واشتريت الخضار لان الوقت لا يسمح بالذهاب لمكان اخر
تحس فيه بالانسانية واحترام البني ادم للخضار الذي يأكله ..!!
عدت فوجدت العربة محاصرة بعدد من العربات ولم استطع الخروج
الا بعد حوالي ساعة !
ذهبت لمحطة بنزين فوجدت العمال يشربون في الشاي .. اتفضل .. شكرا ..
انتظرنا شوية !! حاضر !مائة الف بالقديم كنت ادفعها في البنزين اسبوعيا
دفعتها ولم يصل مؤشر البنزين للنصف !
توجهت من هناك لاشتري رغيف .. زحمة شديدة ؟؟ في شنو يا اخوانا ؟؟
الكهرباء كانت قاطعة والعيش طلع متاخر !
صفي وصفك انت اول انا اول وبعد شوية (الشكلة دورت) سبت الرغيف
ومشيت لي ست كسرة ..
اشتريت بهدوء لكن الكسرة غالية غلاء تقول مستوردة ضحكت وقلت وين
الزول القال علمنا اكل البيرقر والمارتديلا ده !
وانا راجع البيت عشان استعد للذهاب لامدرمان واكسب الزمن عشان بالليل
ما تكون في مشاوير .. العربية وقعت في حفرة !! والله ما عندي ذنب .. حفرة
في نص الظلط .. الله اكبر ..
نزلت لقيت ليك اللستك القدام كلو جوه الحفرة .. البلد منتهية لكن اولاد الحلال
موجودين ! طلعنا العربية .. مشيت البنشر .. بصلح في اللستك الاذان اذن ..
مشيت الجامع .. الجامع ماشاء الله مليان .. صلينا بره .. نار الله المؤقدة .. الله يثبت الاجر !
تلاتة اربعة مشاوير ورحلة معاناة كبيرة .. قلت امشي امدرمان .. طلع في
عزاء في الكلاكله ! مشينا الكلاكة .. قصة طويلة ..
جيت راجع اكتشف انو في عقد بتاع واحد صاحبنا قرأ معانا (الاسلامية )
وتاخر عن الزواج لاسباب اقتصادية !!! مشيت الحاج يوسف .. كوبري كوبر فاتح ؟؟
كوبري كوبر مقفول !! كوبري كوبر فاتح كوبري كوبر مقفول !!القصة دي لمتين ؟
مشيت بالمك نمر ! اليوم جمعة الطريق سالك والبلد لسه فيها حاجات تفرح برضو..!
تلاتة اربعة مشاوير .. عذااااب شديد .. وصلت امدرمان .. قعدت اقرا في الجرايد ..
سرقة في عز النهار .. قتيل في ظروف غامضة في السوق المحلي ..
البرلمان يطالب محاصرة الغلاء .. ارتفاع في اسعار اللحوم .. لحوم الحمير
في الاسواق الطرفيه .. الثورية .. التمرد .. مريم الصادق في السجن ..
الصادق المهدي بره السودان .. الترابي وين .. الميرغني .. غندور !!!
نمت .. صحيت بعد شوية عشان الكهرباء قطعت .. الموية برضو قطعت
مع الكهرباء !
اتذكرت زيارتي لجنوب افريقيا مع الهلال .. كيب تاون الجميلة .. الجبال
والخضرة والمحيط وتمازج الحضارات والدقة في كل شئ !! معقولة نغلب
الناس ديل ؟؟؟؟؟؟؟ قلت برضو .. كرة القدم اسمها المجنونة ولا علاقة
لها بالاقتصاد الي هذه الدرجة والدليل البرازيل فهي بطلة العالم وليست
الدولة الاولي في الاقتصاد وعندما تنازلت عن عرشها تنازلت لالمانيا
وليس لامريكا .. الصين القوي الاقتصادية الكبيرة صغيرة امام الكبار في كرة القدم ..
سنهزم جنوب افريقيا اليوم .. فنحن من اسسنا الاتحاد الافريقي ..
ضحكت وقلت ان اتحاد جنوب افريقيا ايضا مؤسس !
هل يمكن ان نفوز علي جنوب افريقيا وسط هذه الظروف ؟ هل يمكن ان تكون
كرة القدم لوحدها مشرقة وسط هذا الظلام .. قلت ممكن .. وكل شئ في الحياة ممكن !!
ولكنني لم اتمكن بسبب الارهاق والبنزين والعربية من دخول المباراة ..
جلست وشاهدتها في تلفزيون من الصعب ان تفرق فيه بين علي جعفر وبله جابر
الا بذكريات الاخطاء القديمة !! نقل ارضي في تلفزيون بدون (اريل)
عرفت بعد فترة ان بشه كان لاعب ! قلت القصة دي من المذيع
ولا من التلفزيون ولا من بشه !!
في الشوط الثاني عرفت ان الفارق الاقتصادي قد ظهر في اللياقة فاصبح
فريق الجنوب الافريقي متفوقا علي السودان الشمالي تفوقا لا يمكن السكوت عليه !
صرخت في وجه التلفزيون فانقطع الارسال وعندما عاد اعتقدت ان المباراة انتهت
وهذه لقطات معادة ..
نفس طريقة المرور من المدافعين ونفس السرحان ونفس الاهداف .. مع الهدف الثالث
ايقنت بان القصة اكبر من كده بكثير وان الحال من بعضو !!!!!!!!!!!!
|
|
 
|
|
|
|
Abdulrahman Eldaw
hassan bashir
فيس بوك
تويتر
انستقرام
يوتيوب
بنتيريست