|
|
 عالم يحرم قتل الضفادع ووزير يحلل اكلها هسه كيف ناكلن حيات؟؟ غايتو يا ناس الانقاذ حيرتوا القعونج!!
|
هذه فتوى الشيخ عبد الحى يوسف فى قتل الضفادع:
فقد صح عن رسول الله صلى عليه وسلم النهي عن قتل الضفادع حيث روى أحمد وأبو داود
والنسائي من حديث عبد الرحمن بن عثمان القرشي أن طبيباً سأل النبي[ ] صلى الله عليه
وسلم عن قتل الضفدع، فنهاه عن قتلها.
وروى البيقهي عن عبد الله بن عمرو بن العاص موقوفاً: "لا تقتلوا الضفادع فإن نقيقها تسبيح"،
قال البيهقي: إسناده صحيح، قال الحافظ: إسناده صحيحاً قال الصنعاني: "والحديث دليل على
تحريم قتل الضفادع".
المصدر: http://ar.islamway.net/fatwa/32419/%D9%87%D9%84-%D9%8A%D8%AC%D9%88%D8%B2-%D9%82%D8%AA%D9%84-%D8%A7%D9%84%D8%B6%D9%81%D8%AF%D8%B9http://ar.islamway.net/fatwa/32419/%D9%87%D9%84-%D9%8A%D8%AC...B6%D9%81%D8%AF%D8%B9
اها نحن نقبل وييييييين عقبال موسم الصراصير يا مواطنين !!!
|
|
  
|
|
|
|
|
|
|
|
Re: عالم يحرم قتل الضفادع ووزير يحلل اكلها هسه كيف ناكلن حيات؟؟ غايتو يا ناس الانقاذ حيرتوا القعو (Re: سيف النصر محي الدين)
|
Quote:
يا موج مامون حميدة ثعلب كبير .
لو واجهو بالحديث ده احتمال كبير يقول ليهم اكلوها حية . |
سلام يا الموج ليكم إنت وسيف النصر
تعرف يا سيف في رابط جدلي بين مأمون حميدة ككوز وبين الضفدع كحيوان بر مائي وبين الثعلب الذي قيل عنه ممكن يبيض وممكن يلد أو كما ذكر أحد أصحاب القفشات عن الترابي كثعلب
أها الرابط العجيب بين الثعلب والضفدع والترابي يشمل مامون حميدة
فهذا المامون ممكن يطلع الحديث من الإسرائيليات أو ممكن يقول الضفدع المذكور في الحديث يختلف عن ضفادعنا
وممكن يقول ضفادعنا من المعارضة التي قيل انها تصلي صلاة الإستسقاء سراً لتغرق الخرطوم
(آخر الأخبار أنه تم ضبط إحدى خلايا الشيوعيين السودانيين تصلي صلاة الإستستقاء سراً في إحدى البيوت ذات التأمين العالي جداً)
يا سيف ياخي الصلاة دي صلوها في المناطق البتفتش للمطر خلوا التخريب البتمارسوا فيهو دا
| |
|
|
|
|
|
|
|
|
|
Re: عالم يحرم قتل الضفادع ووزير يحلل اكلها هسه كيف ناكلن حيات؟؟ غايتو يا ناس الانقاذ حيرتوا القعو (Re: صديق الموج)
|
Quote: سلام يا الموج ليكم إنت وسيف النصر
تعرف يا سيف في رابط جدلي بين مأمون حميدة ككوز وبين الضفدع كحيوان
بر مائي وبين الثعلب الذي قيل عنه ممكن يبيض وممكن يلد أو كما ذكر أحد
أصحاب القفشات عن الترابي كثعلب |
عاصم فقيرى كيف حالك
يازول زمان بقولو ليك فلان ده راح ليه الدرب فى الموية لكن مامون ده ممكن
تقول عليه لقى الدرب فى الطين ولقى خلاصنا فى فراخ المستنقعات ده هسه
هو مادام وزير صحه بالتنسيق مع ناس البئية مش مفروض يردم كل المستنقعات
عشان القعونج ما يتوالد؟ يجى يقول لا ربوهو وناس المطاعم تانى زول بشترى ليه
كيلو لحمه مافى اصلهم عايرين وجاء عمك مامون ده اداهم سوط قشه ماتعتر ليكم
وبعد يومين تسمع زول يقول ليك مطعم هشك بشك داك فيه جنس حلاة دين ام
رقيقة قعونج؟؟الله يستر،،،
| |
|
|
|
|
|
|
|
|
|
Re: عالم يحرم قتل الضفادع ووزير يحلل اكلها هسه كيف ناكلن حيات؟؟ غايتو يا ناس الانقاذ حيرتوا القعو (Re: ALWALEED ALSHEIKH)
|
عزيزي الموج... سلامات
تعرف أول مرة أكلتا فيها لحم قعونجات كان في بداية التمانينات في حدائق المقرن في عرض لقوات الصاعقة الأكلو قدامنا الحمام والجداد والثعابين والأرانب والضفاضع. وفي الحقيقة كانت تجربة قوية ملهمة للذات، والواحد من يومها مابعرف حاجة إسمها (القرف) من الأكل، يعني البيلقاهو بيدوسو. المهم الجماعة ناموا في العرض بالتعابين لروحهم براهم لأنو أكلها حلو لامن تكون نية وإضاربوا فيها، والحمام الني زفر والجداد أظرط منه... أما الضفاضع في قريبة في طعمها للتعابين بس بشرط سلخها وتفريغ العفشة من بطنها أول ما تقتلها. وطريقة قتلها بسيطة. فكل ما تحتاج ليهو إنك تضربها في الهوا بالجزمة أو البوت من الجنبة وطوالي بتلقاها طلعت لسانها وده معناهو إنها ماتت. أها تمسك بطنها بسنك وتشد الجلد الحـ يطلع معاك طوالي وبيكون طلوعه أسهل من طلوع جلد الثعبان. وأهم حاجة فيها الوركين، وخاصة لامن تكون الضفضعة مبغبغة وسمينة.. والكل بيبدأ بيهم.
أها بعدها مرة ونحنا قاعدين في حوشنا الكبير في بري الدرايسة والدنيا خريف والنور قاطع والبيت كله متلمي تحت فنيار حبوبتي في صينية العشا الكل الفيها سمكة ماكنة جبناها من أوماك... وأول ما عاوزين ننزل فيها نسمع ليك ضفضعة بدت تنقنق غاق، غاق، غاق. أنا من شلاقتي نهرتها وقلتا ليها جر قبل ما أجي آكلك. ناس البيت وقفوا كلهم وطبعاً فيهم الما سمى ربه بعد. دكتور أخمد ود خالتي قال لي تاكلها كيف؟ قلتا ليهو يمين الله آكلها ليكم وكمان نية. وطبعاً دخلنا في تحدي وإنتشرنا كلنا للقبض على تلك الضفضعة المزعجة. وأنا في الوكت داك بقيت حريف حتى في قبيض الضفاضع والجراد، والحكاية ما أخدت مني غير دقيقة تمت بعدها السيطرة على تلك الضفضعة البريئة.
وتحت ضو الفنيار، والكل متلمي، وبعد ما اللسان جا مارق، مسكتا بطنها وشقيتها بسني وجريت الجلد المرق ذي قشرة الموز. طبعاً أنا نسيت أقول ليكم إنو الجلد لازم يمرق أول ما تموت الضفضعة لأنه لو ما إتسلخت مباشرة فالجلد بيفرز مادة حامضه ذي الحنضل في اللحمة وبيصعب سلخه. وأنا بعد ما سلختها، والكل مشدوه، مسكتا الورك ونزلتا عليو وأنا بشوف في أهلي بيضاروا وينسحبوا من المنظر الفظيع والقاسي عليهم ده. ويمين الله أول ما رميت عضمة الورك الأول ما لقيت لي زولاً فضل في الصينية المافي زول هبش حتة من سمكتها المتوهطة في نصها تلمع في نور الفانوس المشتعل. وبعد ما إتسوكتا بالعضام قبلتا على أختنا السمكة، وناديت الجماعة الجرو كلهم والفيهم ناس لغاية يوم الليلة ما قعدوا معاي في طعام. خالتي دار النعيم الله يرحمها ويحسن إليها إستغربت من مواصلتي أكل السمكة من غير ما أغسل يدي، وقالت لي على الأقل قوم غسل يدك!
وطبعاً عندنا في نيويورك بتنوعها الكثيف كل ما لز وطاب من القعونجات والضبوب مطبوخة ولا مسلوقة في شوربة... ودي دعوة للدكتور مأمون حميدة إنو يجي يتعشى معانا بضب ولا قعونجة مبهرة ومقدمة في مطعم سياني ولا قيتنامي أصلي... والدعوة موصلة لكم بالهنا والشفا مقدماً. وتتصور إني دايماً بأكد على الطباخ إنو يجهز لينا الأكلة دي بعيد من لحم أو دهن الخنازير أو الكلاب. ياخي القعونجات دي أكلها أحلى من الأرانب وكتر خير دكتورنا مأمون حميدة الشرح لينا قيمتها الغذائية. ووعد مني، في حالة رفع الحظر التجاري، بالعمل على إستيراد القعونجات الطينية الدسمة من السودان لأمريكا لتحفيز الإقتصاد السوداني، وأكيد حتكون لينا مصدر هام لجلب دولارات الأمريكان... بس الله يستر جماعتنا ما يسرقوا الفكرة دي ذي ما سرقوا البلد بحالها!
مع خالص ودي وتقديري...
| |
|
|
|
|
|
|
| |
صديق الموج
سيف النصر محي الدين
Asim Fageary
ALWALEED ALSHEIKH
Mohamed Yassin Khalifa
فيس بوك
تويتر
انستقرام
يوتيوب
بنتيريست