فى صقيعة الروح قايمه نيمه

دى ودراوة

جات المراكب
مكتّحه بى غبار الموج
مخربشة بى تباريح العنا
فترانه من كُتر الحنين
تتشابا لى ضل الحراز
فرّت مقاديف السنين
وجات المواكب
مشحونة بالخلق العُزاز
مستّفه بى ترانيم الغنا
نشوانه طربانه
مطمورة فى طرف البيوت
بالطيبة مليانه
جات الوفود
متقريفه وعطشانه
وكف البحر ما كان ضنين
جات المواكب
دافره من كل الجهات
من الشرق
جات بالسعيه وبالحلال
بالعروق الدمها
موية دميره
جات تاره من تالا الشمال
وشوش الطيبة
سمحات السمات
جات عابره من نُص الجزيره
مشوارا يا عز العمر
خطواتا يا حر الجمر
مشتوله ارضك يا نضيره
بالحكايات القديمه
صلينا فرضك يا كبيره
بالأهازيج القسيمة
والصباح إسم الشمس
ضحكة عويناتا الوسيمه
جات المراكب يا نديمه
ووليدك المسكين بعيد
وجناك هناك راقد حزين
شايلك حجاب
شاقى الهويد
حاضن الغياب
وسط البلود اليابسه ديمه
كايس ليكى فى تيه السنين
بس خوفو من ريح الهزيمه
يا نديه ويا وفيه
يا الفى صقيعة الروح
مخدره قايمه نيمه
فى يوم حلمت
إنى جوه الجنة
بى انهارا
بى اشجارا
بى ازهارا
بى انوارا
بى الأملاك
شفت فيها المافى زول
بى عيونو شافو
ضُقت فيها طعم رُباك
جدعت حزنى الطال نشافو
ختيت حمالتى علي عيونك
وقفت جنب سدرة محاسنك
فرتقت بُقجة أغنياتى
لبست فرحى عشان اقالدك
اتحزمت وسط الدايرة بى توبى
وقفت اتأمل بهاك
وبديت ادوبى
لقيتك احلى وديمه أجمل
الفرح إسمك براك
الصفا الجواك مكمل
يا صفيه
يا وفيه
يا حفيه
مين فينا بقدر يوصفك
كلمة كلمة
آيه آيه
مين يرسم المعنى الهناك
مين يكتبك
ومعانا عطشانة الدواية
منو البرويها من كوثر سناك

جات المراكب
وقفت تغازل فى الجروف
جات كاسحة
مِشرِّعه ومنسرحه
نزلت عليك شمس النهار
اتحكرت وسط الصفوف
وبقيتى للناس الديار
طعم الأهل معنى الحروف
خيرا كتير فاض وانبهل
جات الخلوق ميات الوف
وصبحت تامه فى لمحه
جات المواكب
ختّت ايدا فى صدر الخدار
وادفقت فرحه
الغنوات الأشعار
الصلوات والأذكار
والأمات
مباهج شالعه بالأنوار
نداوة مرقة عصريه
لافحة الطيبة زى طرحه
وواطاتك منابت العز
الحيران والليحان
والنوبات تهلل
بى هدى الرحمن
الجيران والحبان
الفة وريدة مكتوبه
وجنياتك نحاسن يرز
دلوكه وشتم رويان
صقريه وركوز وبطان
بازمه الشكره لى عيالك
فى جاه الجنا البطران

نريدك والله زى الروح
وين ما نكون
وكيف ما نكون
ريدة صميمه ما بتروح
ريدة على مدى الأزمان

1990
شهر اطناشر