Quote: انت يا كبر يا موالي بتسميهو انهيار عشان تجد ليهو العذر ؟؟ لا دا ما انهار .. دي طبيعة قوات النظام اولاد الحرام الجابوهم عشان يكتلو اهلكم في دارفور وكردفان
الأخت الكريمة..أو الأخ الكريم من يكتب باسم سودان ريبل..حبابك
كتر خيرك على التعليق..
الكبر حاصل دي ما دايرة ليها اتنين تلاتة..لكن الظواهر الإجتماعية متجددة وموجودة بوجود الإنسان اينما كان وكيفما كان..والغرض من اعادة نشر المادة هنا..هو محاولة مناقشة المسكوت عنه في الحرب السودانية..حتى الآن لا توجد نقاشات سيكولوجية او اجتماعية لإدوات الحرب الصغيرة..وهي الجنود..سواءا كانوا جنود يقاتلون مع الحكومات أو ضد الحكومات..وهؤلاء جزء من تركيبة النسيج الإجتماعي السوداني..ولو الناس ما فكرت تناقش الظواهر الملازمة للحرب ..فبتكون ناس بتخاف من مواجهة الحقيقة وذاتها وما حتبني وطن..!
ما تضايق من حكاية (انهيار),.لأنها توصيف علمي نابع من السيكولوجيا..فهذا الشاب المسكين يعاني مثلما تعاني انت كمعارض..لأنك انت ذاتك منها ر نفسيا لدرجة انك بتكتب تحت قناع..يعني الخوف ماليك تب لدرجة انك ما بتقدر تفصح عن ذاتك الإتحت قناع..وهذا من اثر الحروب..والقمع والبطش الذي تمارسه الدولة السودانية تجاه مواطنها..!
النقطة التي تحتاج مواجهة بكل شفافية هي ادوات الحرب الصغيرة هذه..والظاهرة موجودة في الطرفين سواءا كانوا عساكر حكومة او عساكر حركات مسلحة معارضة..دوما هناك فرد عادي بيعاني من هذه الظاهرة..وحينما تضع الحرب اوزارها..مثل هؤلاء يحتاجون جهد كبير لتحويلهم لمواطنيين سلميين اسوياء عشان يندمجوا في النسيج السوداني..فهل تفكر المعارضة في هذا الأمر؟بالطبع لأ..ح تستخدم ضدهم بروباقندا عيال حرام وفاعل تارك..والجهة الأخرى بتقول على افراد الحركات المسلحة سكارى وبتاعين بنقو وشغالين بحبوب الهلوسة..ونفس الأدوات هي التي يطلب منها ان تقتل وتسحل ..وانت لا اظن انك شفت الحرب من قريب..الكائن البشري حينما يستمريء رائحة الدم يتحول الى وحش صعب الترويض..هذه هي الأمور التي نريد ان نلفت نظر الناس لبها..صحيح ناس المعارضة دايما عندهم الحاجات مؤجلة ..أي ظاهرة يقولوا ليك لغاية اسقاط النظام..وبعد داك كل شئ بيهون..من هو المنوط بيهو اسقاط النظام؟..اليس هم افراد افنوا عشرات السنين من عمرهم في الفلوات..يحترفون القتال والبطش؟..في نفس الوكت الحكومة بتقول ليك كل حاجة ح تتصلح بعد حسم التمرد..اها بعد حسم التمرد..لو حصل..مش ياهو نفس النسيج الإجتماعي الباطش ح يرجع يمشي بين الناس..؟..
دائما في الطرفين (عساكر حكومة أو عساكر معارضة) ..هناك العشرات مثل هذا الشاب المسكين..ضحايا..يعانون مشاكلهم الصغيرة التي لن تكون جزء من حسابات نخبة الصوالين..وهناك عشرات الشباب من شاكلة سودان ريبل تسيطر عليهم ثقافة الخوف..ولا يستطيعون الإفصاح عن مكنون ذواتهم الإ في غيبوبة الإسم المستعار..!
الأنبياء لم يخوضوا معاركهم تحت اسماء مستعارة.. كارل ماركس لم يخض معاركه تحت اسم مستعار.. وغيرهم الألوف المؤلفة..من طلاب الحق والعدل..ببساطة لأنهم لم يتعرضوا لإنهيار نفسي يجعلهم يزازوا تحت وهم سلامة الأسم المستعار..فهم يعرفون حدود المسئولية ويتحملون نتائج الدفاع عن قضاياهم ومطالبهم..!!
كبر
08-03-2014, 07:11 AM
عبد الله شم عبد الله شم
تاريخ التسجيل: 05-03-2013
مجموع المشاركات: 2212
ول ابا كبر حبابك وكل سنة وانت طيب الفيديو قديم ونسب وقتها للدعم السريع قام برفعه هنا البشاري ومعاويه عبيد الصائم http://www.sudaneseonline.com/board/470/msg/1401567834.html
08-03-2014, 07:11 AM
Kabar Kabar
تاريخ التسجيل: 11-26-2002
مجموع المشاركات: 18537
من الفيديو..يلاحظ انو الشاب المنهار نفسيا ..بيسن في سكين لامعة..وهويتوعد ان يطعن بيها قائده (برتبة رائد)..والسكين قاعد يسنها في ماسورة البندقية..!!!
يا ترى كم عمر هذا الشاب؟..
الحرب في جنوب كردفان والنيل الأزرق استمرت لمدة اتنين وعشرين سنة لغاية اتفاقية السلام..ثم توقفت لمدة خمسة سنوات..وعادت اشتعلت مرة اخرى..لمدة ثلاثة سنين (حتى الآن).. الحرب في دارفور مشتعلة لمدة عشرة سنوات ..!!
ادوات الحرب الصغيرة ..تجددت..فبعض الجنود (سواءا من الحكومة أو المعارضة) ولد في زمن الحرب..ليكبر ويكون طرف في الحرب..!! نفس الأمر ينطبق على الحرب في دارفور..معظم الشباب نشأ وترعرع في زمن الحرب..سواءا كانوا مقاتلين حكومة أو مقاتلين معارضة..!!
ولأن الحرب واقعة استثنائية فانها تخلق شروطها الخاصة واثاره في التنشأة الإجتماعية للفرد والجماعة معا..!!
اثناء اتفاقية نيفاشا.. كانت هناك برامج لإعادة الدمج..ولم تنجح هذه البرامج..لأن اهتماهها كان ينصب في عملية توفيق السلاح..اكثر من عملية توفيق اوضاع حاملي السلاح..سواءا كان من ناحية ثقافية (ثقافة السلام والمجتمع المدني السلمي) أو من ناحية اجتماعية (برامج اعادة تأهيل اجتماعي) أو سيكولوجية بتقديم برامج تهدف الى خلق التوازن النفسي في المقاتل..هذا الأمر ينطبق على اوضاع ادوات الحرب الصغيرة من الطرفين (سواءا كان جيش حكومي أو جيش معارض)..! اتفاقيات دارفور (على تعثرها) هي الأخرى لا تحتوى على بنود تناقش اوضاع ادوات الحرب الصغيرة..!!
خطاب النخبة السودانية (معارضة أو حكومة) يخلو تماما من مناقشة سيكولوجيا الحرب..وانما يعتمد على التحشيد لضمان الهيمنة على هذه الأدوات واستغلالها لتنفيذ اغراض تهم تلك النخبة..ليس هناك في اي حزب أوفصيل سياسي سوداني ممثل لشئون سيكولوجيا الحرب واثرها على المقاتل السوداني سواءا كان جندي حكومة او جندي معارضة..وهذه الوضعية هي التي تحدث الربكة..لأن المقاتل فقد ، بسبب الحرب طويلة الأمد ، خاصية الكائن المدني السوي..وحينما تضع الحرب اوزارها (لو قدر للحروب السودانية ان تقف)..سيظل هذا الكائن بؤرة مشاكل تتحرك بحركة هذا الكائن اينما كان وكيفما كان..!!
في الدول المتقدمة تعرف هذه الظاهرة وتتعامل معها بكل جدية..وتحاول ان تحد من اثارها..في كندا يلاحظ ان المقاتل الكندي (مثل المشارك في حرب افغانستان) حينما يرجع الى بلده..يمر عبر برامج عديدة لإرجاعه لحالة الكائن المسالم بعد ان توحش بسبب ظاهرة الحرب..ولكن رغما عن ذلك تحدث حالات عنف فردية محدودة..ونحن لا نقول بان يقفز السودان بين ليلة وضحاها ليكون في مصاف الدول المتقدمة..ولكن نتساءل:لماذا نتجاهل سيكولوجيا الحرب؟..
كبر
08-03-2014, 07:27 AM
Kabar Kabar
تاريخ التسجيل: 11-26-2002
مجموع المشاركات: 18537
ول ابا عبد الله شم..حبابك ياصديق كل سنة وانت طيب..
اعادة نشر المادة ليست بغرض احداث سبق صحفي أو اكتشاف جديد..وانما لتكون مدخل لنقاش ظاهرة تعد من المسكوت عنه في السودان..!!
الفيديو ذكرني اشياء كنت انوي الكتابة عنها منذ وقت طويل..ففي الستعينات اذكر مظاهرة من عدة افراد قاموا بقفل كبري النيل الأبيض وتعطيل الحركة لإسماع صوتهم للحكومة السودانية..وكان عماد تلك المظاهرة معاقي القوات المسلحة السودانية وكانوا يطالبون ببعض الحقوق..والتي لا تعدو ان تكون حقوق اقتصادية بسيطة مثل مستحقات تعويض..او تصاديق لأكشاك صغيرة..فكان السؤال: هل يا ترى هناك سياسة من قبل الدولة السودانية لمعالجة مثل هذه الأمور؟ لاحظ اهتمام الدولة على قلته لا يشمل البراامج السيكولوجية..يعني لو الواحد شوطن.زفالدولة بتقول ليهو اقبل جازك..!!
تجربة الحركة الشعبية عندنا في جنوب كردفان..ايام نيفاشا..كانت مثلها ومثل تجربة الحكومة..فلم تهتم كثيرا بظاهرة سيكولوجيا الحرب واثرها المقاتل..و ناس كتيرة من المنطقة كانت بتشكو من سلوك مقاتلي الحركة..وكانت الناس بتستغرب لمن نقول ليهم ياجماعة الناس ديل سنين طويلة في الحرب..ونسوا خاصية المواطنة المدنية..!!
الحرب لو انتهت في السودان ، سواءا عن طريق انتصار عسكري أو صفقة سلام..فبتكون اتفاقات بينية بين النخبة السودانية..ولن تشمل اوضاع ادوات الحرب الصغيرة تلك..!
وسؤالنا: الى متى تتأفف النخبة السودانية من واقع مواطنيها؟..
كتر خيرك على المرور يا صديقي..
كبر
08-03-2014, 10:07 AM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
Quote: وسؤالنا: الى متى تتأفف النخبة السودانية من واقع مواطنيها؟..
عن أي نخبة تتحدث صديقي كبر و من الذي انتخبها؟؟؟؟ حقيقة ما فاهم الموضوع في غاية الاهمية و يحتاج الي بحث و نقاش عميق بالنسبة لي لا أبحث عن شخص مجموعة حزب الخ ..... لأحمله مسئولية الدمار الحاصل و لكنني أبحث عن مجموعة تتحمل مسئولية البناء القادم لك الود و الاحترام و كل عام و انت و الأسرة بخير
08-03-2014, 10:39 AM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
سلامات أستاذ كبر وزواره وكل سنة وانتو طيبين .. قراءة ذكية للفيديو والتقاط مبكر لمشكل لا بد من مواجهته إن عاجلا أم آجلا .. نعم أتفق معك في ضرورة الالتفات لهذا الموضوع .. والعمل على وضع استراتيجية وتكوين أجهزة مختصة .. تسير جنبا مع أي تسوية لمشكلات الحرب .. وتزويد أفرادها بالعلوم والخبرة المتوفرة لدى الدول للعناية بهذا الشأن .
08-03-2014, 10:39 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: ..فهذا الشاب المسكين يعاني مثلما تعاني انت كمعارض..لأنك انت ذاتك منها ر نفسيا لدرجة انك بتكتب تحت قناع..يعني الخوف ماليك تب لدرجة انك ما بتقدر تفصح عن ذاتك الإتحت قناع..وهذا من اثر الحروب..والقمع والبطش الذي تمارسه الدولة السودانية تجاه مواطنها..!
حبيت أنبّهك أن من يكتب بإسم سودان ريبل هو الواطي خضر الطيب. أقذر وأحط من خط حرفا في سودانيز حتى تاريخه, وكان يكتب بالإسم المستعار دا من تحت ويشتم ويسيئ بيه للناس في نفس الوقت البحاول يبدو محترم بإسمه الحقيقي من فوق لغاية ما بغبائه المعهود كشف نفسه وحرق ورقه وإنكشف وبانت سوئه وحقارته فبقت ما فارقه معاه وبقى يمارس السقوط من الفيس بووك وينبح زي الكـــلب العقور في العالم فنعم هو منهار و يعاني وماليه الخوف لكن مش لأنه معارض بل أنه كدا ساقط وواطي خلقة.
08-03-2014, 07:19 PM
Muhib Muhib
تاريخ التسجيل: 11-12-2003
مجموع المشاركات: 4084
الاستاذ كبر .. في محاضره علم النفس الكتابي حكي لنا القسيس هذه القصه .... قسيس كنيسه له خدمه في احدي السجون في احدي مدن شمال امريكا .. في السجن القسيس قبل بدايه الوعظ للمساجين سئل سؤال فيه علم نفس وعمق .. قال لهم ..من منكم سمع هذه المقوله من اب او ام بانه سوف ينتهي بكم المصير في السجن في يوم من الايام .. ارفع يدك لو الاجابه نعم .. ايادي كثيره بين المساجين رفعت ... الاشياء المعشعشه في عقولنا الباطنه اخطر بكثير مما نتصوره ... نبي الله موسي قتل المصري لان امه ادخلت في عقله اشياء ضد المصريين المتضهدين لشعبه .. .. موسي الذي نشاء في نعيم القصر المصري ....
والقسيس وعظ من النص دا ..
for as he thinketh in his heart, so is he
الاشياء التي اصدقها عن نفسي من افواه الاخرين ممكن تاثر علي افعالي ... سوف ينتهي بك المصير في السجن (المقوله ) (اصبحت) حقيقه لكثير من المساجين .. سلبيه الاب والام والحكومه وقائد الجيش والخطاب العام لها تاثر سيكولجي علي الانسان وبالتالي افعاله ...
08-03-2014, 11:31 PM
Kabar Kabar
تاريخ التسجيل: 11-26-2002
مجموع المشاركات: 18537
Quote: عن أي نخبة تتحدث صديقي كبر و من الذي انتخبها؟؟؟؟ حقيقة ما فاهم الموضوع في غاية الاهمية و يحتاج الي بحث و نقاش عميق بالنسبة لي لا أبحث عن شخص مجموعة حزب الخ ..... لأحمله مسئولية الدمار الحاصل و لكنني أبحث عن مجموعة تتحمل مسئولية البناء القادم لك الود و الاحترام و كل عام و انت و الأسرة بخير
صديقي حامد الصاوي..حبابك كل سنة وانت طيب واسرتك الكريمة..اعتذر عن عدم تمكني من حضور ندوة جمعية التراث..وذلك لأسباب خارج عن الإرادة.. وبعد..
كتر خيرك على المرور ..والإشارة الذكية عن من انتخب النخبة السودانية..لو جيت للصاح يا صديقي..لم ينتخب الشعب السوداني النخبة السودانية ولم يفوضها لتتحدث باسمه وترتكب القتل باسمه..في الحقيقة الشعب السوداني دفع عبر نظام الضرائب من دم قلبه وعرق جبينه ليعلم ابنائه..الذين يصيرون النخبة السودانية..ولكن الغالبية العظمي لا تريد ان تهتم بهذا الفضل..وانما تجير الأمور لمصالح ضيقة لا علاقة لها بقضايا الشعب..
في السودان اكثر من اربعين جامعة او مؤسسة تعليم عالي..وهذه يتخرج منها الخريجين والخريجات..لكنهم غرباء عن قضايا مواطنهم..فهؤلاء ايضا جزء من النخبة التي نتحدث عنها..اضافة الى أي قوة تدعي انها تنشد التغيير في السودان سواءا عن طريق الإنقلاب العسكري أو الإنتخابات الحرة النزيهة أو البندقية..فكل هؤلاء جزء من النخبة..ناهيك عن المثقفين والمثقفات ونشطاء المجتمع المدني..كلنا قاعدين نهوم في افاق بعيدة ونرفض ان ننظر تحت اقدامنا..وآن الأوان ان نغير من هذا النهج ونكون واقعيين ولو مرة واحدة..
اتفق معك يا حامد..ان الموضوع مهم..وكل يمكن أن ينظر اليه من زاوية محددة ومجموعة النظرات ممكن تشكل اتفاق حول سلبية الظاهرة..من جانبي يهمنى المدخل الإجتماعي السيكولوجي لظاهرة الحرب..حرب تمتد لأجيال..مؤكد انها تنتج اثار سلبية عديدة ..وعندنا حتى الآن الحرب نحسبها فقط في مستوى القتل وخسائر القتل..وهذه جزئية يسيرة للغاية من مجمل الظاهرة الكبيرة..واعني ظاهرة الحرب..فهناك اثار نحتاج سنوات اكثر من سنوات الحرب لكي نتمكن من محو اثارها ولو جزئيا..!
هذا حلم جميل ومشروع ان تبحث عمن يبنى دون ان تهتم بمن سبب الخراب..ولكنا نبحث عن جذور المشكل فيمن سبب الخراب بمظنة حاجتين: اولا: ان نحدد اصل الإشكال لنتمكن من احداث المعالجة المفيدة.. ثانيا: ان نخلق الشجاعة في انفسنا كسودانيين بان نتحدث عن ظواهرنا بجرئة دون ان نهرب في طريق الأحلام..
كتر خيرك يا صديقي..
كبر
08-03-2014, 11:56 PM
Kabar Kabar
تاريخ التسجيل: 11-26-2002
مجموع المشاركات: 18537
Quote: سلامات أستاذ كبر وزواره وكل سنة وانتو طيبين .. قراءة ذكية للفيديو والتقاط مبكر لمشكل لا بد من مواجهته إن عاجلا أم آجلا .. نعم أتفق معك في ضرورة الالتفات لهذا الموضوع .. والعمل على وضع استراتيجية وتكوين أجهزة مختصة .. تسير جنبا مع أي تسوية لمشكلات الحرب .. وتزويد أفرادها بالعلوم والخبرة المتوفرة لدى الدول للعناية بهذا الشأن .
استاذي وصديقي محمد علي طه الملك..حبابك كل سنة وانت طيب .. كتر خيرك على المرور من هنا..
نظريتنا في التلقي التي نحاول ان نرسخها في هذا المنبر وبقية افاق التواصل السودانية..هي المعاينة لمواد الفيديو بصورة شاملة..وربنا يقدرنا نرسخ هذه النظرية..
طبعا كنت مفكر ادعو صديقاتنا واصدقائنا من طلاب كليات القانون.. ان يتأملوا حالة الإستفزاز الشديد المفاجئ..وهي حالة يعترف بها القانون بانها سبب للجنون المؤقت..او الإنهيار النفسي الذي يجعل الإنسان يتصرف بصورة تخرج عن المألوف..
ثيمات اخرى نود ان نوضحها من مشاهدتنا للفيديو..مثل اساءة استخدام الموبايل (غايتو في وجهة نظري الشخصية الشعب السوداني اكثر شعب على وجه الأرض يسئ استخدام الموبايل).. اضافة للتلقائية ..يعني المادة هي من حياة الناس العادية للغاية..ولا ادري هل هذا الشاب لازال حي ام تمت تصفيته.. الأدهي يا صديقي.. زول بسب في الدين ويتلفظ بلفظ عاجز شديد..وبعد ده كلو الناس من حوله تهتف وتكبر الله..!!..يعني الناس دي كلها منهارة نفسيا..حتى الرائد الغائب هو الآخر يواجه ضغوط نفسية شديدة عشان بيزنس الحرب يستمر..!! هذه هي الأثار الجانبية التي لم نهتم بها حتى الآن..مؤسسات التعالم العالي في السودان..وقد تجاوزت الأربعين مؤسسة..كلها ليست لديها بحوث تتناول الظاهرة.. الخطاب السياسي لا يحمل تصور للظاهرة او معالجتها..
الإسترايتجية مهمة للغاية..ولكن الأهم منها ان نكون شجعانا تجاه انفسنا وواقعنا..
الكرة الآن في ملعب الجميع..واول خطوة هي اعادة اكتشاف الحرب كظاهرة اجتماعية خطيرة..والتعرف على اثارها..ليس فقط حساب ضحايا القتل المباشر وحسابات النصر والهزيمة..وانما نحتاج نظرة كلية شاملة..
كتر خيرك يا صديقي..
كبر
08-04-2014, 00:09 AM
Kabar Kabar
تاريخ التسجيل: 11-26-2002
مجموع المشاركات: 18537
صديقي محمد البشرى..حبابك.. وعليكم السلام يا صديقي..وكل سنة وانت طيب...
كتر خيرك على التنبيه.. الغريبة يا صديقي المجتمعات التي اخترعت ثقافة الأسماء الحركية..اخترعتها في الخمسينات..ودخلت السودان في الستينات ولغاية الآن لسع الناس شغالة بيها.. منذ حكاية دينق ورودا مردة وسارة عيسى..كنت دوما اقول لنفسي :لا يستأمن على الحق من يطلب الحق بطرق ملتوية..!! نعم هي ظاهرة..من ظواهر الحرب التي انتجت ثقافة الخوف..وقوة العين في استسهال العنف اللفظي تحت اسم حركي او مستعار..غض النظر عن سبب اللجوء لإستخدام الإسم الحركي سواءا غراض ذاتي او غرض عام..!!
مشاكل كتيرة حاصلة..والشخصية السودانية مشت مشوار طويل في طريق الإنهيارات النفسية..وربك يهون..
كتر خيرك يا صديقي..
كبر
08-04-2014, 00:30 AM
Kabar Kabar
تاريخ التسجيل: 11-26-2002
مجموع المشاركات: 18537
Quote: سلبيه الاب والام والحكومه وقائد الجيش والخطاب العام لها تاثر سيكولجي علي الانسان وبالتالي افعاله ...
محب..حبابك يا صديق كتر خيرك على المرور من هنا..
نعم اتفق معك في السلبية كعنصر مؤثر في تشكيل جزء كبير من سلوك الفرد..ولكن اضف لها وجود الحرب كظاهرة..فهذا الشاب المسكين في ظروف السلم سلوكه مغاير تماما..
ومثلما قلت لصديقنا محمد علي..المجموعة في الفيديو كلها يظهر عليها اثر الحرب والذي يجعلها تتصرف بطريقة خارجة عن المألوف..لاحظ الناس البتضحك بلامبالة..والناس القاعدة جنب النار وبتسوي في شاي (الفيديو شكل مصور في الصباح الباكر..لأن الناس بتمشي باغة الموية عشان تغسل وشها)..اضافة للناس القاعدة تقول الله اكبر..كلهم يا صديقي يعانون من اثار الحرب مما ينعكس عليهم في شكل اثار سلبية..!!
كثيرا ما اعاود افلام امريكية تتناول ثيمة الحرب الفيتنامية..وسبحان الله نادر منها ما يتعرض لحكاية الإنتصار او الهزيمة..لكن معظمها يتناول احوال ادوات الحرب الصغيرة..وهم الجنود والرتب العسكرية الدنيا..وديل هم من ينفذ اعمال الحرب..انتشار الإنهيارات النفسية..تغير سلوك الأفراد..تعاطي المخدرات..اضافة لجو الحرب (صيف أو خريف أو شتاء)..وامريكا حتى الآن تعاني من جيل العساكر الحاربوا في فيتنام..!!
كتر خيرك يا صديق..
كبر
08-04-2014, 01:04 AM
Kabar Kabar
تاريخ التسجيل: 11-26-2002
مجموع المشاركات: 18537
Quote: للاسف نقلت ماده حقيره جدا - سواء كانت لجندي تبع النظام او تبع التمرد او اي من الحركات التي تناضل في السودان - وكل اناء بما فيه ينضح - وربنا بيسالك عن الالفاظ الموجوده ومساعدتك في نشرها حتى لو نوهت على الطريقه الغربيه البغيضه -اتمنى انك تمسح الفيديو وتتقى الله -يمكن تمر اختك او بت اختك او بت اخوك او امك تشوفوا احترمهم ما دام ما احترمت بنات البورد -الله يهيدك - ان شاء الله المره الجايه ما تجيب لينا فليم خليع
الأخت الكريمة/ الأخ الكريم..رحيق الأمسيات..حبابك
كتر خيرك على المرور و التعليق على هذا الخيط والمادة المنشورة..
هذه هي جزء من بشاعتنا كسودانيين والسودانيات..ولو قعدنا نشتغل بحكاية نمسح ندفن الرؤوس في الرمال ما ح نحل مشكلة..انا عشت في زمن الحرب في السودان وفقدت اجمل تجارب العمر بسبب الحرب..والآن بعدنا اجيال ماشة في نفس الطريق ..لماذا؟..
هذه المفردات وبنفس الطريقة شايعة جدا في تجربة انسان المدينة في السودان..ومعظم الشباب في نفس عمر الشاب ده بتستخدم نفس المفردات..ودايما بتكون لمن الشباب يكونوا براهم ما معاهم امرأة او رجل كبير..دي واحدة.. الثانية..انت الظاهر عليك ما حصل حضرت شكلة سودانية؟..اي سوداني من ناس المدينة ينفعل في شكلة ..اول حاجة بتمرق من لسانو اهو العبارات دي ..وممكن تتقال امام ملأ من الناس سواءا في سوق ولا في جامع..وعمر البشير في حديث الغرباوية ماشي في نفس الإتجاه..والليلة أي سودانيين يدخلوا في شكلة العبارات دي موجودة..فهل نتكلم عنها بوضوح عشان لي قدام الناس ما تستخدمها.. ام ندفن رؤوسنا في الرمال..وتفضل الحال كما هي..؟..
جبت سيرة الله..وحكاية الإثم.. انا برضك اتذكرت الله واستغربت انو الإنهيار النفسي بلغ بالعساكر انها بتكبر الله لزول بيسب في الدين عيانا بيانا وبيسن في سكينو..هذا المنظر جعلني اشك في تدين الفرد السوداني..انوقيم بينة الوعي التناسلي في الذات السودانية اعمق واكبر من قيم التدين..!
الغريبة ..ظاهرة الحرب السودانية بلغت حد من البشاعة وصل لمرحلة الإبادة الجماعية وجرائم الحرب والجرائم ضد الإنسانية وجرائم الإغتصاب الممنهج..ومافي زول ذكر حكاية الله دي..ليه؟..
الحرب ظاهرة اجتماعية بشرية وموجودة في كل المجتمعات البشرية ولها اثارها..ودونك ما يحدث الآن في العراق..وكيف الحرب جعلت البشر هناك تتصرف بجنون ما بعده جنون..خصوصا ناس داعش ديل اوضح افرازات الحرب..وهم شباب مثل الشباب السودان عاشوا في ظل الحرب لسنوات طويلة عشان كده صابهم الإنهيار..!!
السؤال المهم: ماذا نفعل مع افرازات الحرب السلبية؟..هل نستكين لحكاية انو الكلام في الحرب كلام نابي وبيؤذي اذان المستمعين والمستعمات..ام نتكلم بوضوح عشان نمشي لي قدام..! اهو مثلما قلنا ..الأخطر في الأمر ايضا حكاية الإستخدام السلبي لأدوات التكنولوجيا..ممكن ياخي ..شباب في المدينة وبعيد عن الحرب وبتستخدم الموبايل بصورة سيئة (مثال فتاة الواتساب)..وفي نفس الوكت شباب في مناطق العمليات العسكرية وبتستخدم الموبايل بنفس الطريقة السيئة..فكلهم يشتركون في العقلية الواحدة..ليه العقلية دي كانت وصارت.زفهذا ما حتاج للنقاش.. في فيديو فتاة الكبجاب قبل كم سنة ناس قدقدو يضحكوا ..وهسع برضك الشباب في الفيديو يضحكوا و يقولوا ليك الله اكبر..!! الكائن السوداني بشع للغاية..وصل مراحل متقدمة في البشاعة..وهذا ما يحتاج النقاش..!!
كتر خيرك
كبر
08-04-2014, 11:08 PM
Kabar Kabar
تاريخ التسجيل: 11-26-2002
مجموع المشاركات: 18537
هذا امر يتجاهله الشعب السوداني ويغط في احلامه وكوابيسه..!! ولكن..! القوات المسلحة السودانية الفضلت ، جهاز الأمن الوطني ، عمر البشير..وحسن الترابي..هم من يضرب اخماسا في اسداس..لأنه امر يغض مضاجعهم..!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
عبد الله شم
Hamid Elsawi
محمد على طه الملك
محمد البشرى الخضر
Muhib
فيس بوك
تويتر
انستقرام
يوتيوب
بنتيريست