|
|
 ناس راحت عليهم ...
|
هذا مثل ابتدعه الشعب السوداني العظيم،
ويعني ببساطة ان هنالك ناس في هذه الحياة؛
في موضوع معين لن يتحصلوا عليه مطلقا،
لن يصلوا اليه ابدا،
خلاص راح؛ بباح...
لن يجدوهوا، وان فتشوا في خشم البقرة؛
الغريبة، انهم مصرون، ومتمسكون،
لكن.....
ويين؟ خلاص راحت عليهم .....
|
|
 
|
|
|
|
|
|
|
|
Re: ناس راحت عليهم ... (Re: عبدالمنعم الطيب حسن)
|
ساهبش، من هنا؛ وهناك ...
ناس من الحياة العامة؛
وناس من محيطي، معرفة وكدة؛
وناس من هذه الاسافير؛
وناس منكم؛
كل امنياتي، ان يكون الموضوع خفيف؛
على كل من مرا من هنا،
عضوية،
وقراء؛
..........
وتسلموا ...
| |
|
|
|
|
|
|
|
|
|
Re: ناس راحت عليهم ... (Re: عبدالمنعم الطيب حسن)
|
(1)
السيد الصادق المهدي....
كان الرجل، يحلم ان يكون ملكا على السودان؛
فتامل....
هذا الحلم قبره الشعب العظيم باكرا؛
باكرا جدا؛ بدري بدري، بدري عبدالحميد....
ثم، في فترة ما، طرح الرجل فكرة النظام الرئاسي، كطريق للحكم ؛
وعينه ان يكون رئيسا للسودان؛
بصلاحيات واسعة ....
وبرضو الحكاية ما زبطت معاهو؛
هسع ما زال يحلم، ان يكون على الاقل رئيسا للوزراء؛
من حقه طبعا هذا الحلم ....
ولكن، حسب مقتضيات الحال؛
والرمال؛ تلك التي تحركت كثيفة، تحت الجسر، وفوقه ايضا ...
يبدو الامر مستحيلا؛
يمكننا ان نقول مطمئنين: ان السيد الصادق المهدي؛
خلاص؛
راحت عليهو ....
| |
|
|
|
|
|
|
|
|
|
Re: ناس راحت عليهم ... (Re: عبدالمنعم الطيب حسن)
|
(3)
خالنا محمد ودالنيل؛
رجل فاضل،
في سبعينات عمره المديد يرفل،
مزارع محترف،
وخدام درجة اولى،
من دغش الرحمن، لاعند المغرب يعمل،
لا يكل، ولا يمل؛
وضعو مريح، زي ناس، واحسن من ناس؛
ما ناقصاهو حاجة،
اسرة، وبيت، وعلاقات،
في السنين الاخيرة، فجاة كدة؛
علق في حكاية الاغتراب ....
كل ما يقابل مغترب من الحلة، او الاهل، الا ويفتح موضوع الاغتراب مباشرة،
ويقول عاوز يغترب،
(وبشتغل اي حاجة )
شخصيا تكرر الامر عليَ كرات المرات؛
لولا انني احبه؛
كان شفتلو طريقة ....
الغربة دي ما بتجيب ليها حبيب؛
المهم مرة جاني في البيت عديل؛
وبعد السلام؛ فتح موضوعه الاثير؛
وما ان غادر؛
حتى قال صديقي خلف :
الخال دا لو كان شغال هنا في الحكومة، كان نزل معاش قبل عشر سنين؛
والله دي مبالغة،
دا راحت عليهو من زمان ...
| |
|
|
|
|
|
|
|
|
|
Re: ناس راحت عليهم ... (Re: عمر مصطفى مضوي)
|
| Quote: ياخي كده مابدري شديد خالص ،، |
عمر مصطفى، كل عام انت ومن تحب، في خيرين تلاتة ....
ياخ عليْ بجملة السبعات انت شفت،
كونك التقطت الاشارة ...
ياخ عمك الصادق راحت عليهو من زمان،
والراحت عليهم كتيرين،
ولسع جايين في السكة نمد، السكة الجديدة ......
| |
|
|
|
|
|
|
|
|
|
Re: ناس راحت عليهم ... (Re: عبدالمنعم الطيب حسن)
|
(4)
بابكرمحمد؛
ودا صاحبن لينا في ها الاسافير،
رجل طيب وعلى نياته،
قلبه الابيض؛
ولسانه الخفيف؛
وكيبوردوعلي الهبشة ....
دخل هذه الاسافيرقبل سبع سنوات تقريبا؛
ويتحاوم في المنتديات وقتا طويلا؛ يتناسب مع كونه
عمله شبه خاص؛
وعزابي كمان؛
المهم الرجل يبحث ان يكون رقما في عالم الاسافير؛
والحق فهو مجتهد؛ حتى انه احيانا يغرق المنتديات بكلام خارم بارم؛
من شدة اجتهاده؛ ومحاولاته ليصير رقما ....
لكن ليس كل الامنيات سهلة الادراك؛
فهو يحاول، ويحاول،
وفي اعتقاد كثر انه كمن يحرث في البحر،
ان تصير رقما يُشار اليه، اتفاقا او اختلافا لا يضير، لكن رقما لا يمكن تجاوزه،
المسالة دي تحتاج موهبة، ومزيدا من العرق ....
صاحبنا فايتة عليهو هذه البديهية،
فهوسريع التأثر بابسط الكتاب، وليس لديه فكرة مركزية يدافع عنها،
فهو يقرأ كلاما لشيوعي فهو شيوعي؛ وبكرة كوز،
وبعدو ليبرالي، وعادي ممكن يكون اخضر، وبنفسجي،
وخاتف لونين ....
وليس في لغته التي يكتب بها بصمة،
فلا تعرف ان كان يكتب بالدارجي ولّ الفصيح،
دارجيهو خفيف، وفصيحه لفيف،
غايتو،
مرات مرات الزول دا بحنني، وكثيرا ما قاعد افقع مرارتي،
لكن
في جميع الاحوال .....
راحت عليهو،
.................................
| |
|
|
|
|
|
|
|
|
|
Re: ناس راحت عليهم ... (Re: عبدالمنعم الطيب حسن)
|
(5)
حسن الترابي؛
لاعب اساسي في السياسة السودانية منذ الستينات ....
نشط، ديناميكي، ميكافيللي ومتسرع كثيرا ....
يُمثل البرجوازية الطفيلية في انقى تجلياتها؛
سطع نجمه في اواخر التمانينات؛ بعد ان نفذ انقلابا ناجحا؛ على سلطة السيد
الصادق المهدي المنتخبة ...
ارسل عمر البشير للقصر رئيسا؛ وذهب هو للسجن ليدعو لنظامه الجديد؛
المهم سارت الامور بصعوبة؛ ولكنها لم تتوقف ...
نجح في تقسيم الوطن، ضمن واحدة من اولى اولوياته، وتباكى عليه ضحى الغد؛
وبفضل رعونته؛ اصبح الوطن الان في عضمو على كف عفريت؛
الرجل يخطط بطريقته؛ لازاله الراس الذي ذهب الى القصر بمباركته؛
واستطاب المكوثا ....
تخطيط بعيد المدى؛ ومرن وسلس ليذهب هو الى القصر هذه المرة؛
والاخرين يقرر في شانهم في ما بعد ....
الاخرون وقد ذاقوا حلاوة السلطة؛ وطفقوا يتمرقون؛ وحولهم منتفعون؛
بعضهم يعرف تخطيط الرجل ...
واختلط الامر على الاخوان؛
فقبيل المفاصلة الشهيرة؛ كان جل الوزراء قلوبهم مع علي؛ وسيوفهم مع معاوية ....
كانوا في النهار في دواوين الحكومة وزراء؛ وبالليل في ندوات الترابي؛
ولكن ......
مال السلطان مع القوة؛ مع القصر ....
مال الاخرون؛ مع السلطة والمال؛
وتركوا صاحبهم وحيدا ....
لم يستسلم الرجل؛ وبدا من جديد يعد الحزب والانصار ليوم قادم ....
وما زال الرجل يحلم؛
ومن حقه طبعا ....
ولكن الشعب؛
لن يلدغ من نفس الثعبان مرتين ...
الشعب مقتنع انو الترابي دا؛
خلاص راحت عليهو .....
| |
|
|
|
|
|
|
|
|
|
Re: ناس راحت عليهم ... (Re: عبدالمنعم الطيب حسن)
|
(6)
صلحة يسن؛
سيدة لطيفة من منطقتنا برضك،
اول مرة خطبت 1969؛ ولم يحصل نصيب ...
وكله اقسام؛ والغريبة انها سيدة جميلة جدا؛
ابوي؛ كلو ما يشوفا او تجي سيرتا يقول :
الرجال بي التقدد عيونن ،
المهم تزوجت اخيرا 2009 ...
بعد اربعين سنة من اول خطوبة؛
وطوالي بعد تلاتة اربعة شهور؛ بدات
تسال عن درب الدكاترة؛
وتحاول تكشف الحاصل شنو؟ وليه تاخر الانجاب،
طبعا زوجها ماعندو مشكلة مليان؛
غايتو ساسقت سنوات على الاطباء ...
وما زالت تذهب ؛
وتغير الدكاترة؛
مواصلة رحل البحث عن البيبي؛
طبعا هنالك موانع بيولوجية
؛- فطن لها عثمان شمارات عندما قال لاقرباءها ايام زواجها: ان شاء الله بيت مال -
لا اعتقد ان صلحة ملمة بها؛
والعارفين ما عاوزين يحبطوها؛
ومين عارف؛
امكن ...
لكن في ناس كتيرين واصلين لقناعة
انو صلحة دي؛
راحت عليها ....
| |
|
|
|
|
|
|
|
|
|
Re: ناس راحت عليهم ... (Re: عبدالمنعم الطيب حسن)
|
(7)
سعيد محجوب .....
تخرج من الثانوي من زمان اوي؛
وعمل مع والده -المبسوط حسب ناس البلد-
عمل بالتجارة؛
وتزوج باكرا، وسارت حياته على هذا المنوال
رتيبة؛
المهم بعد ما شاب قال عاوز يقرأ الجامعة؛
نظام ناضجين وكدة .....
تخرج قبل سنوات؛
وطوالي، بدا في الماجستير، وخلصو ....
وشرع في الدكتوراه،
ومازال مواصلا التحضير؛
يحلم بلقب دكتور .....
واستاذ جامعي .....
يلا ياعم؛ هو الحلم بفلوس؛
دعه في خريف عمره، يحلم ....
الحق الرجل يبدو مجتهدا؛
وصاحب عزيمة لا تلين؛
ولكن حكاية الدكتوراه؛
دي اتجهجهت شوية ....
مع الكُبر، والامراض الشديدة ....
اصبحت صعبة المنال؛
وخالنا كلما شعر بتحسن، يتكلم عن الجامعة؛
وهسع الاستاذ الجامعي بياخد كم ؟
غايتو نشتغل لينا كم سنة؛ وننزل معاش .....
وهكذا ....................
الجماعة في وسطه؛
عارفين ... بل متأكدين؛
انو حكاية يا دكتور سعيد دي؛
راحت عليهو
.................
| |
|
|
|
|
|
|
| |
عبدالمنعم الطيب حسن
عمر مصطفى مضوي
فيس بوك
تويتر
انستقرام
يوتيوب
بنتيريست