|
|
 يــــــا مـــنـــــــســــــــــي
|
يا منسي زمن
في ضل القيف
تغشاك سكينة المولى
ولامن توصل عندك،
نلقاها خيوط الالفه بتغزل فينا
عليك نسلم وتاني نقيف
ياوطن الناس السمحة
وشايلة سماحة الروح الصافية
بدون تزييف
يا بلدا
اتعودنا نجيه
عز حراية
وتلفح فينا سموم الصيف
نلقاه يرحب بينا
هاشي وباشي وريف ولطيف
يامنسي وجوة فؤاد مكلوم
موجود
مرة اغنيك صولا تعربد بين اوتار
كمنجة حزينة
ومرة ادوزن بيك اوتار العود
كم ناجيتك وصيف الغربة يعاند فيني
وانت بتهمسي بين استار الليل وتنادي
ارجع عود
ولمن يغلب قلبي حنين
واحس الوجعة زفير وانين
ارسل حرفي اليك ممدود
آهة طويلة زي موال الحادي
ينم مسادره بطول الليل
ويلقى الليل ياحليوة مهتك وجد
مقدود
يدفق كل غناوي الرجعة الليلتك
وكم دقيت يا حليوة الباب
وكلما قلبي معاه يدق
احس الباب
قسرا مسدود
وبينا بيكبر لهف الشوق
والغنية الحالمة تبقى منال
وطيفك يبقى يناغم فينى
ويداعب وترا
جواي مشدود
وحلم الرجعة الحانية يصير موال
وابدا ادندن بي حرفين
وبين الكلمة وفاصل الاهة
كم تهتز ظلال وتلال
هضبة نيلنا
وعالي نحيلنا
وحس طمبور بيلون
حسنا
و حالك ليلنا
وانا بتلون بي الوانك
يا مريودة
وشاربة جمالك من ريق نيلنا
وبس
|
|
 
|
|
|
|
د.محمد حسن
فيس بوك
تويتر
انستقرام
يوتيوب
بنتيريست