|
وا حزني على وطني ... هذا يحدث جهارا نهارا والجميع يتفرج ...
|
Quote:
Sohair Saeed فى حياتى الطويلة العريضة الانا عشتها وكل المواقف البايخة والبشعة والحقيرة وال########ة المرت بى وكل التصورات السيئة الانا ختيتها او اتخيلت انه البوليس السودانى منحط من خلال مواقفى مع البوليس والقصص البسمعها عن انحطاطهم ما اتوقعت انهم ممكن يكونوا للدرجة دى الساعة 7 الا تلت انا ماشة على صالة كزام عشان احضر افطار كوادر حزب الامة فى الشارع البدخل على حدايق الملازمين فى نقطة بتاعة شرطة ماشة فى الشارع دا وبتكلم بالتلفون اربعة بواليس واقفين ومعاهم واحد لابس مدنى اها اللابس مدنى دا نادانى يا بت يا بت ما اتلفت جا على وقال لى امشي سرعة قلت ليهو لييه السبب شنو بدون مقدمات قال لى قلت ليكى امشي سرعة عشان ما اطلع ميتينك قلت ليهو انت مالك فى شنو قال لى ما تقلى ادبك واسمعى الكلام _ما اقل ادبي _ وقفت قلت ليهو ياخى اتكلم كويس وانت الماتقل ادبك انا ماشة فى شارعى وما سالتك تخيلو بس انه اول كلمة طلعت من خشمه قال لى شنو انتى _شر...ة_ لا حولا انا لمن ماقدرت اتكلم رجعت على البواليس قلت ليهم سامعين الزول دا قدامكم قال لى شنو انا خلونى انتوا ما احترمكم ولا احترم الكاكى اللابسنه دا انا اتوقعتهم ح يزعلوا وحيشاكلوا ويقولوا ليهو كلامك دا غلط تخيلوا واحد من البواليس قال لى شنو يا زولة انتى كلام دا فيكى صاح امشي واقفة تتشك000ى مالك اتصدمت قلت ليهو انا دايرة امشي افتح بلاغ الزول دا اساء لى قدامك تانى اتخيلوا عمل شنو مسكنى من طرحتى خنقني بيها ولوا لى يدى وضربني فى وشي وانا براي وحلف يسوقنى يفتح لى بلاغات انا ماعرفت اقول شنو اتصدمت والله اتصدمت صدمة ما حصلت لى قبل كده كونك تسمع ما ذى وكت تشوف وجاريني من يدى وحالف يدخلنى النقطة وفى ناس واقفين وبتفرجوا الا زول واحد بقي يحنس ويترجى فى البواليس يخلونى امشي وبعد جرجرة واصرارهم انه امشي القسم الراجل اقنعهم يخلونى فكانى وسمعنى كل الالفاظ الممكن تتقال قال دا كلو عشان رفعت حجر فى وش الود النبذنى والكان لابس ملكى وصلت الصالة وانا ماشايفة قدامى ببكي ماقدرت ادخل جوه قعدت فى غرفة العدة وفجاة يجى داخل بوليس يابت بتبكى مالك قلت ليهو مافى حاجة قال لى لا فى قلت ليهو مافى جابك شنو قلت ليهو معزومة الفطور دا واتصلت طوالى على شباب حزب الامة القدمة لى الدعوة قبل اتصل البوليس دا نادا بوليس تانى قال ليهو سوقا وديها القسم فى اللحظة دى جوا اولاد حزب الامة وحلوا المشكلة بعد نص ساعة طلعت قدام القاعة مع صديق بس القى ليك تلاته بواليس واقفين قالوا لازم امشي معاهم القسم صحبي هو ذاته محامى حاول يتكلم معاهم قبضوا ودوا القسم انا رجعت الصالة هم ضربوا للدورية وجات واصروا الا امش معاهم النقطة لشنو مافى زول عارف السبب حاولت احل الموضوع براحة واطلع بهدؤ من غير ما تحصل مشكلة لقيتهم واقفين فى كل الابواب الناس المعى اجتهدوا وختوا مليون فكرة عشان اطلع وبرضو فشلنا غيرت الطرحة والتسريحة ولبست بدلة واحد من الشباب ونطيت ذى الحرامية او العاملة عملة بالسور برضو البوليش لحقنا المهم فى الاخر وبعد جرجرة وتعب واجتهادات كل الشباب الموجودين طلعت بعربية واحد منهم جد اجتهدوا وتعبوا وشكرا ليهم كلهم لو ماهم كنت ح اكون حاليا فى القسم وكانت حتكون احلك ليلة فى حياتى عشان البدقك فى الشارع وقدام الناس لمن يدخلك جوه وفى مكانه اكيد حيعمل فيك حاجات اسؤا بالنسبة لى مافى حاجة اسؤا من دى ممكن تحصل لى الزلة الاهانة الضرب الاستفزاز قلة الادب كلو بدون سبب فى مليون واحدة بتحصل ليها حاجات زى دا بس ممكن تكون خافت او ماقدرت تتكلم نحن جد محتاجين تغيير ولمن تحصل الحاجة دى اول حاجة نبدا بتفكيك هيكلة الامن والشرطة والبوليس عشان ديل مابشر ديل انقاذيين ديل اسؤا من السوء الموضوع ما بنتهى هنا ومافى سكوت وحقى بخلصه
|
|
|
|
|
|
|
|
|
Re: وا حزني على وطني ... هذا يحدث جهارا نهارا والجميع يتفرج ... (Re: محمد المسلمي)
|
سلام شباب
و الله شيء مؤسف و كل يوم نشوف بلاوي، البوليس لمن تدخل معاه في شبكة في السودان بحول المسألة شخصية و بستعرض عضلاته، و معاه بقية زملائه بوصلوا المسالة الحد، لكن لو جيت متضرر و زوول سرق منك حاجة يتكاسلوا حتى البحث الجنائي يخلوك تمولوا من جيبك و يدفعوك حتى حق التكسي، لكن الفارغة الزي دي بفرغوا ليها مليون زوول
لكن هل الحل الشكوى كما قال اخونا المسلمي لا اعتقد، لانه دي مسألة بقت جزء من ثقافة بتاعة ترويع، بعدين تشكيهم لزولهم، لو كان في قضاء عادل كان البوليس ذاته دوره اختلف، لكن اهو طايحين في الناس ضرب و نهب، و طالما حامي البلد حراميها فابشر بطول سلامة يا اجرام و احتقار
مشكلة السودان اسه صارت مشكلة حكم شاملة ما بنفع معاها تجزئة تشكي بوليس و تضيع زمنك، تغيير نظام الحكم لنظام يحترم الانسان هو الهدف و اقل منه مكياج لوجه الانقاذ الكالح
عليهم لعنة الله جميعا
| |
|
|
|
|
|
|
Re: وا حزني على وطني ... هذا يحدث جهارا نهارا والجميع يتفرج ... (Re: محمد المسلمي)
|
Quote: تخيلو بس انه اول كلمة طلعت من خشمه قال لى شنو انتى _شر...ة_ |
كيف المواطن يأتمن على شرطي فاقد تربوي زي ده يتفوه بكلام زي ده دون أن يرمش له جفن؟ وهل المسؤولين في الشرطة غايبة عنهم الجرائم دي ؟
الأخوة بورداب الخرطوم ، عليكم بتولي أمر هذه المخالفات ونقلها إلى من هو قادر على ردع هكذا صعاليك ماذا بعد ضياع القيم؟
| |
|
|
|
|
|
|
Re: وا حزني على وطني ... هذا يحدث جهارا نهارا والجميع يتفرج ... (Re: usama Babiker)
|
يا أسامة يا حبيبنا الموضوع دا عادي وقاعد يحصل يومياً والشرطة مليانة بمثل هؤلاء العساكر ال########ين الشرطي أصلاً عندنا ما بمشي الشرطة عشان ينفذ قانون ولا يحمي زول ولا يكافح جريمة بمشي عشان ياكل عيش أولاً ، وتانياً عشان يحمي نفسو، وتالتاً عشان يحاول يكمل النقص الجواهو وجرائم الابتزاز البقوم بيها أفراد من الشرطة أكثر من الجرائم الموجودة في المجتمع الشرطي لو وقع في يد القانون زملاءه بمرقوهو ودي الخطورة هنا لأنو زملاءه نفسهم بخافوا يوم يقعوا في إيد غيرهم لأنهم ما نضيفين ياخي الوضع معقد أكتر مما تتصور
تحياتي مثنى وثلاث ورباع
| |
|
|
|
|
|
|
|