لونك هدّ فى الفجه زين نواحى الروح مواسمك خدرت جلد الوكت دست عبيرك فى الأرض تيراب وكل ما الشمس تمرق تجيك اشيل حملى وادق الباب اعاين فى السما والقاك اتاوق ليكى واتلفت اشوفك غيمة تتوهط سباتات السحاب رحيقك بسقى بستان الجروح يروى جيهات اليباب ولامن شذاكى يفوح بهدى اوجاع الغياب
روح عبقك شبيها منو؟ والوردة بتبقى ليكى شنو ؟
يوم بالليل فى طرف الحلم قعدت براى ضهبان اكورك فى مفازات الغنا ومن فرط الأسى الجواى ماسك قشة الدوباى خايف من هدير السيل يشيلنى يفوت وتانى اموت وبين المويه والهدام وش الموجه يبقى دليل لسان الحرقة يبقى لجام والأيام عواتى الخيل
الحدد دروبا منو ؟ والوردة بتبقى ليكى شنو ؟
يا خميله يا شتلة الندى والحنين يا اسم البشاره الساكنه فى جواك جنين يا جميله كيف وصول الطير اليك ؟ كيف دروب الواطا كلها راسمه فى جيهاتا وجهك ورافعه راياتك اشاره علامه لى خصب السنين يا اصيله كيف نشوفك وانتى جاهره كل عين كيف نعاين فى سناكى ونور بهاكى لينا جاهر راجين دخول ميقات علاكى نصلى فرض الريده حاضر شفقانه لحظات انتظارنا و الصبر نلقاهو وين ؟
هو البحمل مرارتو منو ؟ والورده بتبقى ليكى شنو ؟
بلينا ريق الغنيه فى حيضان نشافنا نضمنا سبح المنيه فى قسوة جفافنا اضارينا من خوفنا القديم اتغطينا بى توب الصبر لا فرح بتق حدانا ولا خريف طلانا تانى وجانا شافنا
Quote: كيف نشوفك وانتى جاهره كل عين كيف نعاين فى سناكى ونور بهاكى لينا جاهر راجين دخول ميقات علاكى نصلى فرض الريده حاضر شفقانه لحظات انتظارنا والصبر نلقاهو وين ؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
فيس بوك
تويتر
انستقرام
يوتيوب
بنتيريست