|
|
 ليه كدا يا هاشم صديق؟ كلام ما بشبهك!
|
تلقيت عبر الواتس آب هذه القصيدة:
هضربات قسرية
هاشم صديق
****
تلقي (خرابة)
ما تلقي (الوطني)
تلقي (الوطني)
ما تلقي (خرابة)
تتلفت حاير
تلقي (الشعبي)
جادع إيدو
ويقلّب صُلبو
تقول لي روحك
أريت (الشعبي)
(ده ود التابا)
.................
البلد إتلحست
محل ما تقبّل
تلقي (النقة)
محل ما تعاين
تلقي حرابة
ومسطول في الشارع
يهتف ويصرخ
- فكيتو الصادق
فكو الموية .
فكيتو الصادق
إعتقلو السوق
ماعندو (فرامل)
أو طايوق
جاري عجاجو
تقول كترابة .
أدونا رغيفة
أو تعريفة
أو خلونا
نخش الغابة
نصبح نحنا
(نوير) أو (دينكا)
وانتو تكونو
ديوش جلاّبة
..............
فكيتو الصادق
فكو إيدينا
مما جيتو
لعبتو وجُطو
و (بشبش) (جوكر)
في الكوتشينة
محل ما نقبلّ
نلقي حرامي
محل ما نعاين
نلقي إضينة
حرقتو قَمِحْنَا
شلتو سَمِحْنَا
وجبتو الشينة
إسلامكم كافر
فضايح جُملة
بتملا دفاتر
سويتو بلدنا
مجاعة ومِحنْة .
...............
البلد إتلحست
جنت وبركت
سياسة نخاسة
الثروة انبرشت
دخلت وسكنت
جيب الخاصة
والشعب تعيس
يجري يناهد
ما وصل الميس
ماهية حول
ما فاتت فول
أو (عيش)
في كيس
أحلامنا بهية
نصحا نلاقي
عروس الثورة
هي (بت ابليس)
...............
الدنيا إتماصت
جنت وطشت
(الفن إتلجن)
الوطن إتمحن
لا فن
لا كورة
(فنان الثورة)
صِبِح (ماسورة)
والحرية
قصية عصية
ريحة شية
لا تضوق لا تشوفها
لا تحلف صادق
شفت خروفها
(حوار الوثبة)
شمار في مرقة
وعجين
لي (كِسرة)
ما بعمل طَرقة .
..................
فكيتو الصادق
فكو حصارنا
أدونا إذن
لهتاف
أو مرْقة
كفاية كضب
وغباش ولعب
(الوثبة) وهم
سيفا خشب
(حصانها حمار)
ووعدوها شمار
وغباشها الدرقة .
.................
مليون شاعر
وما مرقت زفة
مليون خُطبة
ولا خاطر رفّ
جوادنا يبرطع
وما شاف اللفة
السُلطة عقيمة
ربع القرن
وما جاتا (الدورة)
الفين (جيفارا)
ولا كبر شارع
لا انفجرت حارة
لا (هبت ثورة)
...............
مليون (لبوة)
رافعات كرعينن
للمال والسُلطة
والليل متمحن
في ((.........))
أُسطي
دعارة شطارة
وعريانة (الضروة)
سبحان الدايم
شعار الدولة
الدين والتقوي
و (لباس) الوالي
ما غطي العورة .
................
البلد اتلحست
طشت وجنت
محصولنا الرسمي
الغُنا و (الرَهَزي)
وفي رمضان .
لو ترفع طوبة
أو تدخل فجأة
حصير راكوبة
تلقي مقنقن
(ود فنان).
.............
محصولنا الرسمي
غُنا رمضان
(قناة كاكومة)
(قناة كركوبة)
(قناة كتلونا)
(قناة مرضون)
غُنا وألحان
بالكوم وأطنان
برامج تهرج
والكل تيمان .
...............
و (قناة برجوبة)
مذيعة السهرة
(حاجة عجّوبة)
وضيف الحلقة
دكتور (راكوبة)
معاهو مُغني
(لؤي ود هوبة).
دراما الشاشة
مسيخة عواره
بعد ما مشينا
وقلنا وصلنا
رجعنا نترتر
وقعدنا بركنا
لا فن
لا بصاره
دراما غبية
لا بتهبش هم
لا بتروي قضية
تورجِق وتشخُر
تقول حنفية .
يا حليل المسرح
والحرية
هموم الأمة
والثورية .
..............
لم أصدق أن ينحدر قلم أديب ماهر وشاعر ساحر إلى هذا الدرك!
فإذا انحدر مستوى الخطاب الثقافي في البلد – شأنه شأن كل أوجه
الحياة بفضل عصابة الإنقاذ، نتوقع أن يكون دور المثقفين وعلى رأسهم
هاشم صديق، الارتقاء به، أي بالخطاب الثقافي، بدلاً عن الانحدار إلى مستواه.
كلام ما بشبهك يا هاشم.
|
|
 
|
|
|
|
|
|
|
 Re: ليه كدا يا هاشم صديق؟ كلام ما بشبهك! (Re: عبدالحفيظ ابوسن)
|
عفوا هاشم صديق
ليس من حقك ان تسخط او تحزن علي حال البلد
ليس من حقك ان تكون مثل البشر
ليس من حقك ان تحس بنبض الشارع
الكل يحلل لنفسه ما شاء من الكلام
و يحرم عليك اختيار كلماتك
الكل يكتب ما يشاء
وانت ليس مسموحا لك الا ان تكتب ما يحبون ...
| |
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: saif basheer)
|
صحيح الدمار والخراب الذان أصابا البلد غير قابلين للإصلاح،
ووصلت حالات اليأس والإحباط بالعديد منا إلى أبعد مدى،
ولكن في رأيي لا يوجد مبرر أياً كان يجعل شاعر في قامة هاشم صديق
أن يكتب بهذا الإسفاف.
يكون هاشم صديق "اتهكّر" ياربي؟
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: saif basheer)
|
| Quote: تلقيت عبر الواتس آب |
سلام سيف
قبل اللوم هذا واقع السودان . وهذا (الواقع الذي يعيش فية مبدعي الوطن ).
بخصوص النقد الفني للقصيدة تأكد مننها لان الاسافير الان تحمل
كثير من الملفق الذي يهدف ......
وهذا ليس دفاعا عن الشاعر لان اسموا هاشم
وبين ناس الشتات مافي ملامة
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: saif basheer)
|
Quote: تلقي (خرابة)
ما تلقي (الوطني)
تلقي (الوطني)
ما تلقي (خرابة) |
Quote: مليون (لبوة)
رافعات كرعينن
للمال والسُلطة
والليل متمحن
في ((.........)) |
كلمات سوقية ركيكه لا تشبة هاشم صديق .
أشك فى أن هذه الكلامات كاتبها هو الشاعر الكبير هاشم صديق.
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: saif basheer)
|
تحية طيبة لسيف وضيوفه ..
قرأت القصيدة وبحسب ذائقتي الشعرية ومعرفتي بطريقة هاشم صديق في الكتابة اجزم أن النص ينتمي لهاشم صديق .. قرأته كما أقرأ هاشم صديق على اية حال ولم يزعجني هذا الحس الأخلاقي المترف الذي ازعج سيف و ود ابسن و بدرالدين .. المسالة خاضعة الى حد بعيد لمفهوم كل زول حول الفن والادب والشعر وارتباط ذلك بالاخلاق المتصورة أحيانا ككائن علوي يخضع له الجميع ..
تحياتي ..
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد حيدر المشرف)
|
الرجاء اخوتي مراجعة الرابط ادناه
http://www.sudaneseonline.com/board/470/msg/1403760748.html
______________________________________________________
تحياتي ود المشرف و انت تحس بما يحسه هاشم صديق ...
انا اكتب الان و في مكالمة تلفونية معه ...
ساعود للتفصيل ...
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: يحي قباني)
|
الفاضل سيف بشير
رمضان كريم
يا سيف مشكلتكم يا رفيق انكم لم تعودوا تعرفوا السودان الذي يعرفه الان هاشم صديق
صدقني هو هذا هو السودان وهذا حاله وهذه هي اللغه التي تلائمه.
وعلي فكره هذه القصيده استلمتها من اكثر قروبات الشباب وهم يثنون عليها بشده!!!
اذن ماذا يرغب فيه هاشم اكثر من ان يعبر عن حالهم؟!
لو الشارع السوداني الان قال انه دي قصيده تعبر عنه اذن القول ما قاله الشارع السوداني.
يا سيف يا صديقي لو شفته انت اصلا شباب الزمن ده بيكتبوا باي لغه تتحير
صدقني لا يعرفون لا العربيه ولا الانجليزيه…..يا زول ديل شباب ضائع بحق ########تهم اكاديميا الانقاذ الله لا كسبها!
ومثل قصيدة هاشم دي يادوب المثقفين منهم هم الذين يفهمونها اما الغالبيه فما عادت تفهم لغتنا البسيطه هذه.
والتحيه لك. ومثلها للقامه هاشم صديق.
ويا صديقه يحي قباني بلغه عني
قول له تراجي مصطفي بتقول لك يبدو خسرت بعض جماهيرك الصفوين
ولكنك كسبت عشرات الغبش.محتفلين بقصيتدك جدا.
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: خالد العبيد)
|
خطاب الحكومة و لغتها ...لابد من مقابلتها بالمثل ...
لا يملك احد الحق في محاكمة هاشم صديق ... او التشكيك في استخدامه لاى مفرده ...
من اصدر 12 ديوان شعر ... يعرف تماما اي المفردات يستخدم و مع من و ( ضد ) من ...
ان كان الاعتراض علي المفردات التي اعتبرها البعض خارجه ...
اذاً حاكموا ايضاً الطيب صالح و مظفر النواب ...
ادمنت الناس ( الأمان ) في الخارج ... و انفصلت من واقع حال السودان و اهله ...
التحية للمبدع هاشم صديق ...
و دمت يا صديقي محباً للوطن ...
اكتب ما شئت ... فانت من يحس بالشارع و نبضه ...
اكتب يا صديقي ... فكثير من الاقلام جفت و صمتت و صامت عن الكتابه ...
حفظك الله من كل شر ...
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: ABUHUSSEIN)
|
| Quote: .الفـرق كبير يا هاشم ياخ ... |
يابو حسين ( الزمن اتغير ) ...
لا مقارنه بين واقع البلد الان و ما كانت عليه في اول الستينات ...
لا اريد الدخول في التفاصيل ... لكن من عاش ذلك الزمن ...
سينزف دماًُ علي ما يراه امامه الان ...
دعوا الرجل يعبر عن حال الملايين ( داخل ) السودان ....
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: يحي قباني)
|
تحية للجميع
وعذرا صاحب البوست
سأكتب بوستا منفصلا
فقد احسست بأن تعليقي العابر كقارئ ومتذوق للشعر ,, حول النقاش من نقد للقصيدة للدفاع عن هاشم صديق ,,
هاشم صديق اخرج قصيدته ومن حق اي شخص ان يقول رأيه فيها ,, اي شخص
والتحية لهاشم صديق الذي لم يخرس صوته والتحية للقدال ول أزهري محمد علي وغيرهم من الذين لم يركع صوتهم خوفا او طمعا
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عبدالحفيظ ابوسن)
|
سلام يا أخ سيف وضيوفك الكرام
مشكلتنا كمستهلكين للمنتج الإبداعي أننا نريد المبدع بكيفية نحددها نحن وحدنا!
ولكن على لكل مقام مقال يا عزيزي!
ورغم انني انتظرت الأخ أبوسن ليثبت أيلولة القصيدة لهاشم ولكنه لم يفعل ذلك
بشكل أكيد. لكن عموماً يمكن القول إن القصيدة حقت هاشم دون مخاطرة كبيرة.
طيب، لكل مقام مقال.
كل شيئ عن وفي السودان السياسي بذئ!
النظام أبذأ ما يكون!
الحكام ومَن حولهم من المتسلقين والاعتذاريين أبذأ ما يكون
الوضع الاقتصادي والاسلامي كله بذئ! يحتكمون لأقسى ما في الاسلام من
عبارات!
فالقصيدة لا يمكن أن تحكي عن حليب ونحن في اليم الرهيب!
قصيدة ممتازة وأميز حاجة مطلعها! وهي طبعاً مأثور شعبي سديد لمن تملكته
الحيرة زينا كدا!
<>
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: mustafa mudathir)
|
Quote: ورغم انني انتظرت الأخ أبوسن ليثبت أيلولة القصيدة لهاشم ولكنه لم يفعل ذلك
بشكل أكيد. لكن عموماً يمكن القول إن القصيدة حقت هاشم دون مخاطرة كبيرة. |
انا من نشر القصيده ...
و هذا ردي في بوست آخر يا مصطفي علي الاخ عثمان محمد صالح الذي اعتقدها ( مدسوسة ) و منسوبة الي هاشم صديق:
Quote: و عليك السلام اخي محمد صالح ...
افترضت يا عزيزي ان القصيده منسوبه الي استاذنا هاشم ...
لان من وجهة نظرك انها الطامة الكبري ان يختم بها مسيرته ؟
تُري لماذا صادرت حقه في السخط و الإحباط من واقع الحال في البلد؟
اليس هاشم صديق بشر ... وفرد من افراد الشعب يعاني و يُحبط و يسخط؟
و افترضت انه يختم مسيرته؟
من قال ذلك؟ ...هاشم صديق ما زال يعطي و يكتب ...
و كتم انفاسه لا يعني و لن يعني نهايته ...
___________________________
نقطة اخيره ...
انت ايضاً بما اتيت به وضعتني في مصاف من ( يغرف ) من النت و يأتي ( جارياً ) بشئ لا يعرف صحته !!!
اجحفت في حكمك علي ... فأنا يا سيدي تأتيني القصائد من الاستاذ هاشم مباشرة و انا من يقوم بنشرها علي موقعه
و موقع الاستاذ هاشم صديق ترعاه مكتبة الاغنية السودانية و نحن من انشأناه حباً و عرفانا بما قدمه و سيقدمه استاذنا هاشم صديق ... |
وهذا هو رابط البوست الاخر
http://www.sudaneseonline.com/board/470/msg/1403760748.html
تحياتي يا جميل ...
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: يحي قباني)
|
و لمن يسأل عن مدي علاقتي بالاستاذ هاشم صديق
فهاشم ....
صديق حميم لي قبل كل شئ ...
و كان لي الشرف بانني من انشأ موقعه http://hashimsiddik.com/portal/
علي النت لتوثيق اعماله العظيمة
اهداني كل اعماله ... و قرأت جميع قصائده ...
و بقدر اعتزازي بأعماله ...
اعتز باهدائه لي جميع دواوينه ...
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عبدالمنعم الطيب حسن)
|
ملحمة رائعة من اجمل ما كتب هاشم في الفترة الاخيرة
و لمن وجدوا الفرصة للتسلل
اقول ابحثوا عن الفرصة في مكان آخر
فكاتب الملحمة كتبها عندما كان السودان وطن واحد
و شعب واحد................
في زمن الكيزان و الفساد و دمار القيم و الاخلاق
ما ممكن يجي واحد يبكي علي كلمة في قصيدة
هذه الكلمة تعبر عن احساس كل الشعب السوداني
و نحن في انتظار زمن التقاء الخرابة و اللو...
لتغور الخرابة
و يغور اللو......
مصطفي عبد الجليل مختار
واحد طفشان من اللو...
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: Mustafa Muckhtar)
|
Quote: تلقي (خرابة)
ما تلقي (الوطني)
تلقي (الوطني)
ما تلقي (خرابة) |
المعني بذيئ و خالي من الابتكار
لو قال
تلقي الوطني تلقي خرابة بمعني ان الوطني و الخراب متلازمان
ما تلقي الوطني تلقي سحابة عدم وجود الوطني متلازمة خير و بركة
او شيئ من هذاالقبيل لاثار اعجابي كقارئ
هو اقدر مني علي الابداع لكنه ركن للمعني القريب البذئ
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: ناصر جامع)
|
قصيدة بائسة جدا وغير محترمة
ولو ده الأدب في بلادي فقد أصبح (قلة أدب)
وأنا مستغرب للأفاضل البدافعو عن القصيدة دي
وبسألهم سؤال:
هل يستطيع هذا الشاعر أن يقول هذه القصيدة في ليلة سياسية؟
أو في قناة تلفزيونية؟ والجواب: أكيد لا
إذن: ياها قصيدة فارغة يقولها الشاعر خفية وتنتشر عبر الأسافير والواتس أب
ولا يستطيع أن يواجه بها الجماهير .. وده أدل دليل أنها منحرفة عن القيم والأخلاق
الأدب الحقيقي يرعى القيم والأخلاق ولا يخرج عنها
والإبداع الأدبي ليس مبررا للخروج عن التقاليد
وإذا لم يحتفظ الأديب بالأخلاقيات والقيم فما الذي يميزه عن الرعاع؟
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد جلال عبدالله)
|
Quote: قصيدة بائسة جدا وغير محترمة
ولو ده الأدب في بلادي فقد أصبح (قلة أدب)
وأنا مستغرب للأفاضل البدافعو عن القصيدة دي
وبسألهم سؤال:
هل يستطيع هذا الشاعر أن يقول هذه القصيدة في ليلة سياسية؟
أو في قناة تلفزيونية؟ والجواب: أكيد لا
إذن: ياها قصيدة فارغة يقولها الشاعر خفية وتنتشر عبر الأسافير والواتس أب
ولا يستطيع أن يواجه بها الجماهير .. وده أدل دليل أنها منحرفة عن القيم والأخلاق
الأدب الحقيقي يرعى القيم والأخلاق ولا يخرج عنها
والإبداع الأدبي ليس مبررا للخروج عن التقاليد
وإذا لم يحتفظ الأديب بالأخلاقيات والقيم فما الذي يميزه عن الرعاع؟ |
قليل ادب انت والله
هو الشاعر يكون كيف شاعر لو ما حس وشعر بمعاناة
افراد مجتمعه وشعبه الذين يعيش بينهم وعبر عن هذه المعاناة
بكلمات بسيطة يفهمها السواد الاعظم من الشعب
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: saif basheer)
|
مليون (لبوة)
رافعات كرعينن
للمال والسُلطة
والليل متمحن
هل هناك شاعر محترم
يصف بنات جنسه
بهذا الوصف القبيح ؟؟...
ان الشاعر هاشم صديق ... ملك للشعب السوداني .. وليس ملك نفسه
وكل كلمه تطلع منه يحاسب عليها ...
ومن حقنا ان ننتقده اذا اخفق .. ونقول له احسنت اذا احسن ...
وكل واحد منا يتزوق الشعر بطريقته الخاصه ....
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد مجيدو)
|
المدعو هيثم غالي
| Quote: قليل ادب انت والله |
أول شي ما حرد على شتيمتك
وأفوض أمري وأتركك لله وأقول: إني صائم
Quote: هو الشاعر يكون كيف شاعر لو ما حس وشعر بمعاناة
افراد مجتمعه وشعبه الذين يعيش بينهم وعبر عن هذه المعاناة
بكلمات بسيطة يفهمها السواد الاعظم من الشعب |
بكلمات بسيطة وليس بكلمات بذيئة وفرق بين الاثنين
غايتو معاناة الشعب دي تعبتوها خالص
العايز يقل أدبو كلو يقول عشان معاناة الشعب
والعايز يسب الدين يقول عشان معاناة الشعب
والعايز يفحش بالقول ويخرج عن النظم والتقاليد يقول معاناة الشعب
شوفوا ليكم حجة تانية الشعب السوداني ما قليل أدب
الداير يبقى قليل أدب يقول أنا قليل أدب وده فهمي في الحياة
ما يرمي أي حاجة في معاناة الشعب .. قال معاناة الشعب قال!!!
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد جلال عبدالله)
|
التحية للجميع ..
وتصوموا وتفطروا بالف صحة وعافية ..
التحية للشاعر الانسان الجميل هاشم الصديق .
بالنسبة للقصيدة هناك قصائد مجردة يعني واضحة الملامح بوضوح الواقع زيها
وزي اي لوحة رسام رسم امرأة عارية بفكرة فطرته الفنانة . كلام الشاعر هو مطبق
في واقع الحياة والمجتمع السوداني فما الحرج عندما يكتب ؟ ورمضان كريم .
ولي قدام ..
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: مني عمسيب)
|
تحياتي وشكري وتقديري لجميع المتداخلين، مع أو ضد.
وقبل تحياتي، ابارك لكم الشهر الكريم وتصوموا وتفطروا على خير.
لو يتذكر القراء رواية الكاتب محسن خالد "تموليلت"؛
هاج البورد وماج اعتراضاً على ما حوته الرواية من ألفاظ نابية.
فوقفت بشدة - ولا أزال - مع حق الكاتب أن يكتب ما يريد من ألفاظ طالما أن تلك الألفاظ
تؤدي الدور المرسوم لها في الرواية، بمعنى أن الكلمة أداة
استخدمها الكاتب في الموقع الذي رآه فيها مناسبة.
لكن، لننظر إلى الصورة الشعرية في مطلع القصيدة:
تلقي (خرابة)
ما تلقي (الوطني)
تلقي (الوطني)
ما تلقي (خرابة)
وعلى الرغم من أنني لست ناقداً أدبيا، بل فقط كتبت ما أحسست به
عند قراءتي للقصيدة ووجدت هاشماً مختلفاً لم استطع التصالح
مع قصيدته.
الفرق، أن هذه قصيدة، وليست رواية. فكاتب الرواية يمكن له
أن يستخدم ما شاء من لغة وألفاظ حسب ما تتطلبه روايته، والامثلة
لا حصر لها هنا، من أمثال كتابات محمد شكري، ماركيز، وحتى
أديبنا الراحل المقيم الطيب صالح.
الصورة كما تفضل بعض المتداخلين تقود مباشرة
وبلا جهد كبير إلى مقولة متداولة في جزئية من خطاب الرجل
السوداني تصف حالة من حالات "المثلية". وبالتأكيد
وضع الاستاذ هاشم الأقواس بين الكلمتين "الوطني" و"الخرابة"
ليقودنا إلى ذلك المعنى.
من الذي "يلقى" الخرابة؟ الشعب السوداني؟
أو من الي "يلقى" الوطني؟
وإذا لقاهم الشعب السوداني، يعمل بيهم شنو؟
فهاشم يمتلك المقدرة على وصف من استولوا على حكم البلد
ودمروها ب"ال########ين" ربما بصور أخرى
القصد:
إذا تجاوزنا بقية الألفاظ النابية داخل القصيدة، فالصورة التي استهل بها
القصيدة صورة قبيحة ولا تليق بأن تكون في مستهل القصيدة، أو في أي مكان آخر.
وانحدار حال البلد كما قلت من قبل لا يبرر لهذه الصورة.
والفكرة مرة أخرى يا سادتي:
كتابتي لهذا البوست منبعها محبة ومعزّة وتقدير لأحد مبدعي بلادي،
هاشم صديق كاتب الملحمة، وحاجة فيك وأضحكي وكلام للحلوة
وغيرها من الأعمال المجيدة الجليلة.
ورمضان كريم مرة أخرى.
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد جلال عبدالله)
|
البذاءات كما تقولون ليست امرا غريبا في ادبنا السوداني
موسم الهجرة للشمال
قصائد شتى منها قصيدة حسين عثمان منصور صاحب الشاطئ الصخري في هجاء طand#65275;ب كلية غردون
و اتهامهم باللواط
جمهرة من قصائد الغناء السوداني قديما و جديدا وأكثرها من عيون الغناء السوداني
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد هاشم ابوزيد)
|
من اكثر معجبين بهاشم صديق ..
اذكر ان له بيت في قصيدة يغنيها محمد الامين ربما هي ( حروف اسمك )
يعبر عن الطهر والنقاء ( اساور في ايدين طفلة بتحفظ في كتاب الدين ) صور غير مسبوقة
كل كلمة لها نقاء وطهر ( أساور ، طفلة ، كتاب الدين )
وعندما قرأت قبل فترة قصيدة ورد فيها :
طيارة
جات بي فوق
يا حاج أنا
اتْضَرّعت
واتبخترت
زي ( جقهّ )
خاشّه السوق
يا حاج أنا
لم أصدق أنها لهاشم صديق ..
وبدأت اخاف من كل جديد يأتي به هذا العملاق ..
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: علي عبدالوهاب عثمان)
|
الي هاشم المحبه والسلام
ولك مثلها يا ود قباني بلغه سلامي واحترامي
والقصيدة نجحت بان حركت اقلام الاتفاق والاختلاف معها
الشاعر لا يستاذن الناس في الكتابة ولا التشكيلي في الرسمه ولا القاص
ولا الروائي .
من قبل كتب محمود درويش ابلغ الشعر واريد محاكمته في قصيدة مديح الظل العالي
ومارسيل خليفة اريد ان يسجنوه في اغنية رايت احدي عشر كوكبا
هاشم يكتب ما يعتقد انه ابداع والقراء رجال ونساء يتذوقون او لا
من قرا لزوم ما لا يلزم ل نجيب سرور يقول ايه .
من يقرا للطيب صالح ومحسن خالد وبركه ساكن وطه جعفر وغيرهم غيرهن في التصوير الجميل للكتابة يقول ايه
من قرا ل محمد شكري الخبز الحافي ماذا يقول
الكتابة تعبر عن غالبية الحس الموجود في الشارع
وهذا هو حسنا الان ؟
ولفظ ماسوره يستخدمه الطبيب والاديب
وخرابه وبيع وسمسره وزيف وتدني لغة الحوار ونشر الفساد وتدهوره بسبب عصابة الاسلام السياسي
قصيدة معبره
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: Sabri Elshareef)
|
تحياتي يحي قباني ،،،
ليس دفاعا عن هاشم صديق فوالله ماأحسست بقزامتي غير أن هممت بالدفاع عنه .
إخضاع أى عمل إبداعي لمعايير أخلاقية متغيرة هو نوع من التكريس لهيمنة أخلاقية أحادية لن تجلب خيرا لا للإبداع ولا لأصحاب المعايير .
هاشم /صديق كتب لمين ؟ لزول الشارع الواطي الجمرة وهاشم عارف أين يرسل عصافيره ولمن ولا يخشى في إبداعه لومة لائم ..
مش القومة بس لهاشم صديق ياخي القومة والقعدة ومعاهن جريه كمان ،،،
بالمناسبة من الذي يهندس قيمنا حالياً ؟ الاجابة على هذا السؤال كفيلة برفع القبعات لهاشم صديق وأخوانه في قبيلة المبدعين .
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عمر مصطفى مضوي)
|
Quote: هل هناك شاعر محترم
يصف بنات جنسه
بهذا الوصف القبيح ؟؟...
ان الشاعر هاشم صديق ... ملك للشعب السوداني .. وليس ملك نفسه
وكل كلمه تطلع منه يحاسب عليها ...
ومن حقنا ان ننتقده اذا اخفق .. ونقول له احسنت اذا احسن ...
وكل واحد منا يتزوق الشعر بطريقته الخاصه .... |
يا محمد مجيدو ...
تخطيت المعني المقصود و سرحت بعيد ...
هاشم صديق لم يصف ( بنات جنسه ) بذلك الوصف ....
هاشم قصد تفشي الدعارة في هذا الزمن المعكر ...
كلمة مليون لا تعني بنات جنسه ...
كلمة مليون تأتي لتعظيم العدد ....
مثل ما تقول ( والله مليون واحد ) ردوا علي البوست ...
اعتقد الجميع وصله ذلك المعني ....
اما احترام هاشم لنفسه ... فانا شهادتي مجروحة فيه ...
ولكن مكانته لم تتزحزح شبراً ....
هو هاشم الجالس يكتب تحت شدرة النيم في بانت ...
و الواطي جمر الانقاذ و معه ملايين الكادحين في السودان ...
لم تغريه بلاد الغرب و لم تستهويه طراوة بلاد النفط ...
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: يحي قباني)
|
Quote: بيد أن ( الأخطر ) على الإطلاق هو ما لم يتطرق له أحد في هذا البوست .....
الأخطر في ظني أن هذه القصيدة قد تكون نقطة تحول لـ ( تفحيش ) الأدب
نحن في السودان نقلد بعضنا حتى في ما لا يجوز التقليد فيه
وهاشم صديق رمز لا ينكره أحد .....
غداً سوف يقتفي أثره جيل كامل من الشعراء يبدأون قصائدهم بالمخزون الشعبي الضخم جداً من أمثالنا البذيئة ..... أو الأمثال السرية كما أسماها الأديب محسن خالد وأنشأ بها بوستاً من عشرات الصفحات |
عاطف يا صديقي ...
يبدوا اننا اعتبرنا ان هاشم قد اتي بما لم يأتي به احد ..!
يا صديقي الامر عكس ذلك تماماً ...
هاشم صديق استخدم قلمه ( كمرآه ) ( مراية عديل كده ) ... ( يعكس ) بها خطاب الانقاذ الذي يزيد ( بذاءة ) يوما بعد يوم ...
هاشم يقول لهم ... هذا الشعب العظيم الذي تكيلون له شتى انواع الضيم و العذاب ان كان مهذباً و يستحي من رد بذاءتكم ...
فها انا هاشم صديق ارد اليكم بضاعتكم ... حتي تعرفوا كم هي موجعة ....
و اعتقد بكل ما قرأناه حتي تاريخه من ردود افعل ...منها المؤيد ومنها من التبس امرهم فيها ...
قد اوصلت الرسالة موجعة لهم ...
اذا اللغة لغة الانقاذ و ليست لغة هاشم ...
الابيات الاولي يا عاطف تستهدف ( الوطني ) ككيان ... ( فعل ) في الناس ما فعل ...
فخاطبه هاشم بلغته ...
انا ساتوقف عن الردود ... حتي لا تقيد صداقتي بهاشم بعض من اعتز بهم هنا ... و اريدهم ان يعبروا عن ما بدواخلهم تماما ...
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: يحي قباني)
|
Quote: ليس من حقك ان تسخط او تحزن علي حال البلد
ليس من حقك ان تكون مثل البشر
ليس من حقك ان تحس بنبض الشارع
الكل يحلل لنفسه ما شاء من الكلام
و يحرم عليك اختيار كلماتك
الكل يكتب ما يشاء
وانت ليس مسموحا لك الا ان تكتب ما يحبون ... |
لماذا كان الشعر شعرا
؟؟؟؟
هاشم صديق شاعر
الكلمة والمفردة تعبير
والتعبير لا ينفصل عن الحال
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: BALLAH EL BAKRY)
|
تحية للجميع وكل عام وانتم بخير
تقريبا اتفّق الجميع على البذاءة في النص و الإختلاف في رفضها أو قبولها
من يحاول التبرير بان هذا تعبير عن حال الشعب فا بالغ معانا كـ شعب
مثل التتي و الخرابة لا يمكن بحال من الحوال أن يعبّر عن حال الشعب و تطلّعاته
الترجمة الحرفية للمثل تحكي عن حال شاذ ينشد ممارسة الشذوذ ويندب حظه
في حين أن الشعب ينشد العدالة و الديمقراطية و استرداد حقوقه و نهاية المعاناة
فهل يستقيم التشبيه أو التعبير
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد البشرى الخضر)
|
كتب محمد المهدي البشرى
| Quote: اتفّق الجميع على البذاءة في النص و الإختلاف في رفضها أو قبولها |
انا كاتب مداخلة ومعي اخرين ، لم نقل ابدا ان القصيدة بذيئة، بل العكس رفعنا لهاشم صديق قبعاتنا ومعاها طواقينا والعمم،
ولم نقف له فحسب، بل جكينا وجرينا عديل كدة-شوف مداخلة عمر مصطفى مضوي- وبالمناسبة يا عمر من ايام المنصورة ؛ لم تخب ظني ابدا كنت دائما اقول:
انك مثقف سري، مثقف غير معلن، بتحت تحت، مثقف وَهُوْ ذاتو ما عارف نفسو مثقف؛ لك التحايا ولذكرى تلك السنين البهجة،
اها يا ود الشرى الجميع دي فيها شوية خمة، ما قدرت افوتا رغم زحمة كاس العالم، والسهر، ورمضانات، والدوامات، وحاجات تانية ...
محمد المهدي بشرى؛ عمر مصطفى مضوي؛ وهاشم صديق لو قُدِرَ له ومرَّ من هنا...
رمضان كريم وكل عام وانتم بالف خير....
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عبدالمنعم الطيب حسن)
|
كتب منعم حسن | Quote: اها يا ود الشرى الجميع دي فيها شوية خمة، ما قدرت افوتا رغم زحمة كاس العالم، والسهر، ورمضانات، والدوامات، وحاجات تانية .. |
يبدو فعلا انه زحمة كاس العالم و السهر و رمضانات و الدوامات والحاجات التانية نجحت في انها تشغل بالك عن القراءة الصحيحة للمكتوب و الأغرب من كدا نجاحها في انك ما تكمّل الإقتباس و تجزأ كلامي وتقتبس ما يفيد معنى حديثك فقط, انا كتبت (تقريبا) في بداية حديثي و هي كافية لتنفي شوية الخمة التي رأيتها ساتركك تعيد قراءة المكتوب و تحديدا كلمة تقريبا وأظنّها ستكفيني عناء شرح العنقريب
لكن مداخلتك فيها جزئية مهمة وهي كونك ما شايف بذاءة في القصيدة - او على حسب ما كتبت القصيدة ليست بذيئة - السؤال هل فعلا لا ترى في التلميح بمثل الوطني و الخرابة و الكلمة التي وردت بين قوسين في مقطع اللبوات الرافعات كرعينن بذاءة أم لأن الكاتب هو هاشم صديق؟
يعني لو قريتها في مداخلة ما لعضو عادي لاهو شاعر لا سياسي هل لن ترى فيها بذاءة أيضا
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد البشرى الخضر)
|
كتب محمد البشرى الخضر
| Quote: انا كتبت (تقريبا) في بداية حديثي |
نعم (تقريبا) شفتها، رغم الزحمات، لكن الجميع البعدا دي جهجهتا شديد وضاعت (تقريبا)، ورسخت الجميع،
عشان كدة ان تجاوزتها في الاقتباس عن قصد، اها عناء شرح العنقريب باق، باعتبار ان العنقريب نفسه، له الف قراءة واخرى،
مرة اخرى انا منعم حسن دا ما شايف اي بذاءة في هذه القصيدة، بل ان قصيدة عميقة جدا، وريحتني في حناني كما يقول الشباب،
والقومة للاستاذ هاشم صديق ، وعممنا اوف، ومعاها طواقينا....
محمد البشرى الخضر*، رمضان كريم ، وكل عام وانت بالف خير.....
....................
* المرة دي براك،
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عبدالمنعم الطيب حسن)
|
الأخوة الأعزاء / يحي سيد الشئ / محمد البشرى الخضر / عبد المنعم حقنا ،،
يامحمد البشرى رمضانك جميل وكنت عايز أدردش معاك في حتة البذاءة .
اعتقد انها جزء مهم من لغتنا ومن ابداعنا العقلي يعني حتى لوسلمنا جدلاً
ببذاءة هاشم صديق ماهاشم حقنا وجزء من ثقافتنا يعني نجبروا يجيب مفردات
من خارج سياقنا اللغوي والحياتي ولا نقول ليهو ياخي حدثنا وحدث الشارع
ده بما يعي وبالمناسبة حتى عادية كلماته مدهشة جدا وإلا ماستحقت كل هذا الجدل الحميم .
والمهم جداً في الأمر من هو المستهدف الشريحة المعنية بالأمر ليسو رجال الدين ولا مدعي القيم ولاتنابلة السلطة ولا المثقفاتية
المخاطب هنا شعب بسيط ودود لا يستحق كل هذا العنت جارت عليه السلطة والدولة والزمن والطبيعة والظروف والمواصلات والمعيشة
والعلاج . وممكن أحسب ليك لبكرة . فحدثه هاشم صديق بمعاناته وشقاءه وهمه .
ياعبد المنعم / اقول ليك حاجة بيني وبينك شكرا جداً اكذب عليك لو قلت ليك أنا مافرحان / في شفافية أكثر من كده ،،
ياجماعة معليش عبد المنعم ده صاحبي من زمن الأرواح جنود مجندة وبينا معزات وونسات ليها عقود .
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عمر مصطفى مضوي)
|
يا منعم تقريبا كتبتها بغرض تجنّب التعميم وعشان أدي فرقة لآراء مثل رأيك لتخرج من قالب الجميع فما ممكن تتجاوزها وتبترها من الإقتباس ثم تحاكم حديثي ليس كما كتبته أنا بل كما (قرأته) أنت, عموما طالما انت قراتها ثم بترتها ليستقيم تعليقك على حديثي فقد كفيتني عناء شرح العنقريب .
تقول يا منعم انك لا ترى بذاءة في القصيدة و بالتالي الحتتين السألتك منهن لا ترى فيهن بذاءة بس ما جاوبت على باقي سؤالي هل لأن الكاتب هو هاشم صديق؟ أم انت لا ترى في مثل هذه الكتابة اي بذاءة على الإطلاق
ورمضان كريم ويعود علينا وعليكم بالصحة و العافية
تحياتي عمر و رمضان كريم علينا وعليك
لو لاحظت في حديثي الأول لم اتحدث عن البذاءة على إطلاقها بل تحديدا في حتة استخدام مثل الوطني و الخرابة و قارنت بدلالة المثل الأصلية و ما ينشده صاحب المقولة وبين ما ينشده شعبنا
البذاءة زاتها خشم بيوت, المثل المعني شذوذ راسو عديل وشعبنا الودود البسيط الذي لا يستحق هذا العنت و الظروف دي ما الحاجة الكايسة وبفتش ليها, ولو لقى فرقة في من جار عليه وتسبب في معاناته أقصى ما عندو ليهم هو المحاكمة العادلة لكن ما ح يكوس ليه خرابة
| Quote: والمهم جداً في الأمر من هو المستهدف الشريحة المعنية بالأمر ليسو رجال الدين ولا مدعي القيم ولاتنابلة السلطة ولا المثقفاتية |
العبارة دي فيها تعسّف يا عمر- بل قيل إرهاب عديل كدا :) , يعني من لم يستسغ النص و رأى ما فيه من بذاءة وأراد ان يعبّر عن رأيه فيها ليفكّر الف مرة وإلاّ ليتحمل تصنيفه من ضمن من وردوا في الإقتباس
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عبدالمنعم الطيب حسن)
|
الشاعر (الحق) هو مراية المجتمع
هو المترجم لنبض الوجدان الإنساني
نحن في عهد السقوط الأخلاقي
نحن في زمن العهر السياسي
بل نحن لسنا بنحن
لكل زمان شاعر
ولكل أوان شعر
في عهد الوتسأب
نعبر بالتكست
ونلطم بالواي فاي
نعيب زماننا والعيب راكبنا
كلام ما محترم؟
في زمن لا يرحم؟
لا والله ده الكلام
وده الواقع بلا غتغتة
ده القالو لينا هاشم
فلعلنا نسمع
وإن سمعنا...
لعلنا نتحرك!
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عبدالمنعم الطيب حسن)
|
Quote:
كتب ما شئت ... فانت من يحس بالشارع و نبضه ...
اكتب يا صديقي ... فكثير من الاقلام جفت و صمتت و صامت عن الكتابه ...
حفظك الله من كل شر ... |
الأخ يحى لك جزيل الشكر وعاطر التحايا
الذين ينتقدون هاشم صديق لم يشاهدوا بيوت الأشباح وما كان فيها من بذاءات وإنتهاك للحرمات!!
ولم يعتقلوا ويعذبوا ويقتلوا وتدفن جثثهم ليلاً أو يلقى بها فى النهر.
الذين ينتقدون لم تصادر وتنهب ممتلكاتهم بواسطة أفراد الأمن .
الذين يرون فيما جادت به قريحة الشعر سوءاُ لم يغتصبوا ولم يروع أطفالهم ولم يهددوا بإغتصاب زوجاتهم وبناتهم!!!
والذين يرون أن هاشم صديق قد تجاوز حدود الأدب لم يختطفوا ويعذبوا ويموتون من جراء التعذيب ثم يلقون فى العراء
أو يخفون ثم يتم الإعلان عنهم بواسطة ذويهم بأنهم خرجوا ولم يعودوا!!!!
ومزيداً من البذاءة أيها الشاعر يا نبض الجماهير.........ورمضان كريم للجميع
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: saif basheer)
|
كتب الأخ أبوخالد في نافذة الفيسبوك ..
Quote:
ههههههههههه محمد حيدر المشرف قلتي لي (المسالة خاضعة الى حد بعيد لمفهوم كل زول حول الفن والادب والشعر وارتباط ذلك بالاخلاق المتصورة أحيانا ككائن علوي يخضع له الجميع .. )
شايفك نزلت المباديء في أقرب لفة, يا زول القصيدة الزول البقراها بتفطرو في رمضان دة.
|
العبارة (الاخلاق المتصورة ككائن علوي) تفيد الاطلاق وتنفي النسبية .. بعبارة أخرى ( تأليه الاخلاق ) مقابل (أنسنة الاخلاق) يا ابوخالد .. والمعنى واضح ..
تحياتي ورمضان كريم
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد حيدر المشرف)
|
سلام يحيى قباني (حقو تصلح اسمك ياخ) وشكراُ
للتوضيح. آسف ربما لخبطت شوية!
لكن أعتقد ع الحفيظ ابوسن كتب شيئاً عن صحة
نسبة القصيدة لهاشم صديق.
أثمن علاقتك بهاشم صديق وياريت تبلغه تحياتي!
وطبعاً أنا كنت يقينياً حاسي بنفَس هاشم!
حقو الناس المعترضين يتذكروا قدر البذاءة الموجودة
في فيديوهات الترابي مثلاً (وفيديو الغرباوية أقلها بذاءة)
يتذكروا بذاءة الترابي في صورته منفردا بصينية بها
أكثر من 8 أصناف طعام!
يتذكروا بذاءات نافع والبشير!
جميع الاخوان المسلمين ومشايعييهم من الانتهازيين
والوصوليين والخدم ال(.........)ين، وكلهم أبذياء.
كله موجود تحت ستار الاسلام!
<>
| Quote: قوم لوط ( مفعولاً به ) ... |
قصدك مفعولاً بهم وليس به! خخخخ
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: mustafa mudathir)
|
Quote:
العبارة دي فيها تعسّف يا عمر- بل قيل إرهاب عديل كدا :) , يعني من لم يستسغ النص و رأى ما فيه من بذاءة وأراد ان يعبّر عن رأيه فيها ليفكّر الف مرة وإلاّ ليتحمل تصنيفه من ضمن من وردوا في الإقتباس |
* ابدأ يا ابو حميد مافي أي تعسف او تصنيف وأنا سميت الجدل حول النص جدل حميم لان النص فعلاً مدهش بغض النظر عن رؤيتك لبذاءته . ولو كان في تعسف أكيد كانت اللغة حاتكون غير .
*حتى المثل الاصلي دلالته واضحة وليس لها علاقة بالشذوذ او ماشابه فهو في أفحش حالاته يعبر عن سوء الحظ ، ودونك سوء الحظ الذي لازم هذا الوطن منذ أن وطئت أرضه اقدام اللئام .
*يعني مفرداتنا وعاميتنا وحتى ( بذاءتنا ) مطلوب أننا نجيب كائن فضائي من خارح حدود همومنا وامالنا ويعبر لينا بيها .
*انا يا ابوحميد نقطتي الوحيد البتكلم عنها هي عدم محاكمة أي نص ابداعي أخلاقيا لان المسالة متغيرة والنص باقي ،
تفتكر يامحمد كل من ذكر في المقتبس اعلاه سيسعد بهذه النص لا أعتقد ولا أنفي أن هناك ذويقة لأرائهم الف تحية واحترام وبينا الونسة دي ،،
ولك ولعبد المنعم الف تحية ،،،
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: mustafa mudathir)
|
Quote:
Quote: Quote: قوم لوط ( مفعولاً به ) ...
قصدك مفعولاً بهم وليس به
! خخخخ |
|
صفة ( مفعولاً به ) الموضوعة قصداً بين القوسين ترجع للمشبه المذكور في الأبيات وهو الحزب الشعبي كما يوضح سياقها المبتسر وبالتالي فإن الضمير المفرد ( هـ ) في ( به ) يرجع لـ ( الحزب ) لأنه مفرد .
وقد وضعت بين القوسين تحديداً لهذا القصد كما حدثتنا أبيات القصيدة
السياق الذي تم ( إبتسار ) الجملة المقتبسة منه يقول
| Quote: وفي الستة أبيات الثانية شبه الحزب الشعبي بمنسوبي قوم لوط ( مفعولاً به ) ...[/QUOTE ]
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عاطف عمر)
|
| Quote: يا ود البشري مضوي دا يا بتكلم عن نكته تانية يا بتاع غلاط ساي في الحالة دي ما تضيع وقتك معاهو |
ياجامع انت فاكر نحن قاعدين نتغالط والله في الحالة دي حقو ابوحنيفة مش يمد رجليه بس يجيب ليهو فردة حمراء وارد شندي ويتغطى عديل كده .
بعدين ياخي هي مانكته هو مثل ماعارف اشرح ليك مثل دي كيف المهم مثل ،،،،
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عاطف عمر)
|
كتبت عن هذا الموضوع في بوست الاخ عبد الحفيظ أبوسن
(تحياتي أخونا أستاذ عبد الحفيظ أبوسن
لست بصدد القول أن القصيدة مرآة تعكس صورة الواقع بكل قبحه وتشوهه وإحباطاته ولكني أقول أن الشاعر لايلعب( دوما ) دور المصلح الإجتماعي الذي يستخدم اللغة المفلترة والمفردة الوعظية والإرشادية !, لا أتجاهل بطبيعة الحال الدور التوعوي والتثويري - للشاعر -المثقف الذي يساهم في صياغة الإيجابي في الوعي الجمعي, ..أعي تماما أن الشاعر بشر من لحم ودم ينفعل بالواقع يؤثرفيه ويتأثر به ,يتأثر بصعود الحركة الجماهيرية وهبوطها وبواقع الموت والدمار والفاشية والحروب والتشريد وضرب عصب القيم الإجتماعية والموروث الإيجابي وبمسرح العبث والواقع اللامعقول الذي نعيشه ! , قصيدة هشام تعتبر عن حالة- وعن قرف وأحباط - عاش الشاعر هذه الحالة والمشاعر وسكبها عبر هذا النص الغاضب والمحتج - فلم يشأ تمزيق القصيدة وإعدام النص وإنما أراد أن يطرحه للمتلقي وهو يدرك أنه مثير للجدل والاختلاف والخلاف والإتفاق وفاتح للشهية النقد ية! فهناك من وضع لهاشم صديق مثال ونموذج معياري للمفردة وبناء القصيدة وروح الشاعر وبصمته المبثوثة من خلال الابيات ! وهذا الضرب من الناس لايرضيه أن يخرج هاشم عن القالب والصورة النمطية المرسومة له في الأذهان أو يفارق نموذجه المعروف ! وهناك طبعا منيحاكمه بمعيار أدبي و نقدي وهناك ضرب قد يقوم بمحاكمة هشام لأنه يصارع الانقاذ والايدلوجية الفاشية ولكنه يغلف هذا بغلاف يتحدث عن الذوق والمفردة الصادمة الخ
** هاشم صديق -كشاعر معرض لصعود وهبوط المشاعر وفوران الإحاسيس ونزولها . فهاشم صديق- اليوم- ليس هو مواطن الستينات الذي يخرج أنيقا ومعطرا وأنيقا ليتظاهر ضد العسكر ويعود غدا لعمله أو مواطن الثمانينات الذي يخنقه البمبان في الشارع و قد يعتقل لايام ولكن يستمتع في كل الاحوال بحق العلاج والتعليم وغالبا حقه في العمل هشام صديق يكتب في عهد المجازر الجماعية والتعذيب والفصل من الخدمة والتشريد والحروب والشباب المشرد في منافي العالم وفي عهد تفتت وحدة الوطن وتمزق نسيجه الإجتماعي وطفح القبح والفساد هاشم يصرخ وفي زمن الرصاص الذي يحصد المتظاهريين العزل بالجملة والمذابح التي تزهق أرواح عشرات الالاف في وطني وفي عصر هيمنة المؤتمر الوطني علي مفاصل الدولة ورقص المؤتمر الشعبي علي إيقاع الحزب الحاكم والتطبيل لحواره المطبوخ والتبرير لمنطقه المشروخ- إذا فلنحاكم ونحكم عليه من خلال السياق والظرف ولننتقده بتثبيت علي الايجابي والإعتراض علي السلبي . وقطعا سيتفيد الشاعر من الرأي والرأي الاخر ! ))
ورد الاخ عبد الحفيظ أبو سن مشكورا
.....Quote: مرحبا كمال عباس
وحبابك
هاشم صديق شاعر تاريخه يشهد له ,, تعرض للظلم علي المستوي الشخصي والفصل والتجاهل الاعلامي
لم يركع ولم ينحني
ظل صامدا
وهو رجل ملهم ,, وقاد احساسنا وحفزنا ,, وارتقي بنا وقرأنا شعره ونحن صغار وطعمه لازال حلوا ونحن كبارا وعمر اطفالنا في عمرنا حين عرفناه
تساهم هذه السلطة يوميا في تضيق خلقنا ,, ودفعنا دفعا لأن نكون نسخا تشبهها سلوكا وفعلا ,, ولكن سلاحنا الوحيد ان لا نكون مثلهم ولا نفكر مثلهم ولا نشبههم
ان الصراع بيننا ليس شخصيا , ,, صراع ضد فكرتهم عن الدولة والسياسة والدين والسلوك
صراعنا وإن ذهب هؤلاء بأسمائهم لن يحل ازمتنا ,, بل الحل في تغيير جذري يمس الدولة نفسها وايدلوجيتها
لن افرغ غضبي بسبهم والنيل منهم كأفراد
سأراكم غضبي لينتج فعلا
انا ضنين ب هاشم صديق كرائد ونموذج للمثقف والشاعر الثوري الواعي
لا انقده ابدا للتقليل منه بل اتضاءل امام انجازاته نحو وطنه
وانقد نصه محبة فيه ,, واعلم علم اليقين ان البعض سيحول نقدنا لهدمه ,,, ولكن لنا من الوعي ما يجعلنا ان لا نكون مثلهم ونعرف ان النقد ليس اساءة
تحيه لك ومحبه
|
http://www.sudaneseonline.com/board/470/msg/1404020303.html
.....................
(عدل بواسطة كمال عباس on 06-30-2014, 01:22 AM)
(عدل بواسطة كمال عباس on 06-30-2014, 01:25 AM)
(عدل بواسطة كمال عباس on 06-30-2014, 01:28 AM)
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: كمال عباس)
|
ناس وضاح الجابر ديل بيضحكوا…..كثير احيانا
كتب الاتي:
Quote: حسب وجهه نظري
ركيكه
لاتمثل نبض الشارع
ولايمكن ان اعتبرها اضافة للشعر الوطنى المهموم باحداث تغيير
للشعراء - زفرات - خاصة
تكون دائما - مدسوسه- بين الاضابير .. او حفظ الفله المقربه
لا ادرى كيف وجدت طريقها للنشر |
عارف يا وضاح احلي حاجه في عالم الانترنت ده انه قصص اجنحة كل المتقندفين
الان الكل يتواصل شعبيا لا يحتاج لجنة نصوص للاجازه ولا ناشر يقبل نشر ديوانك
تكتب و جماهيرك تتلقي مباشرة ولا عزاء للمتحجرين.
كيف وجدت طريقها للنشر؟!
الله يبراك في الوتساب.
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: Tragie Mustafa)
|
القصيدة بدون البذاءة اللي فيها كانت حا تكون أجمل..
ثم أنا بخاطب الحكومة أو غيرها بي أخلاقي أنا مش بي أخلاقها هي...
و هاشم صديق يمتلك الكثير ليعبر به بدون الخرابة و غيرها ....
الكلام دا ما بشبه هاشم صديق بدليل أن الكثيرين شكك في أن كاتبها هاشم صديق ...
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: ABUHUSSEIN)
|
القصيدة عبارة عن وصف صريح ومجرد لحال البلد وشعبها
وصف مجرد من اي سواتر للحال وتصوير للحال بدون مونتاج
ودا واقعنا النحنا رافضنو
لكن لي متين نحنا حا نواجه واقعنا دا بكل قبحه وتشوهاته
هذا ما ابتدره الاستاذ هاشم صديق يجب المواجهة مجردة
والاعتراف بكل القبح الموجود فينا كمجتمع
حتى يتثنى لنا تغييره الى الاحسن
فيجب الاعتراف بالمشكلة اولاً حتى يتثنى لها الحل
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: Haytham Ghaly)
|
Quote: عارف يا وضاح احلي حاجه في عالم الانترنت ده انه قصص اجنحة كل المتقندفين
الان الكل يتواصل شعبيا لا يحتاج لجنة نصوص للاجازه ولا ناشر يقبل نشر ديوانك
تكتب و جماهيرك تتلقي مباشرة ولا عزاء للمتحجرين.
كيف وجدت طريقها للنشر؟!
الله يبراك في الوتساب. |
رمضان كريم يا ام حازم
أهو ده الكلام المجنن ناس كتيرين . فعلا زمان القرصنة ولى وراح.
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: اسماعيل عبد الله محمد)
|
Quote: ناس وضاح الجابر ديل بيضحكوا…..كثير احيانا
نت ده انه قصص اجنحة كل المتقندفين
الان الكل يتواصل شعبيا لا يحتاج لجنة نصوص للاجازه ولا ناشر يقبل نشر ديوانك
تكتب و جماهيرك تتلقي مباشرة ولا عزاء للمتحجرين.
كيف وجدت طريقها للنشر؟!
الله يبراك في الوتساب. |
الظاهر ما فهمتى كلامى
انا ما بحجر عليهو النشر ولا على غيرو .. ولا بدعو لحجر اى شئ
اول حاجه انا قلت رأيي .. انها قصيدة قعدات .. وخاصة بالاخوان .. ليست قصائد للنشر
مممكن تسميها اخوانيات .. بتفكفك فيها الشاعر من كل القيود ... المجتمعية والدينية ووووووو
ده رأيي عن النوعية دى من القصايد
لانو مرت علينا من شعراء كبار لكن ما بنسبوها لانفسهم
اها ده رأيي
قصيده تااااااااافهه
مش عشان الايحاءات الجنسية فقط
تاااافهه ... عشان ما بتضيف اى حاجه للواقع غير التفاااااهه
ولو كان الشاعر فقط بعكس حال المجتمع وبعوس عواسته زى المجتمع
الحا يغير منو
والحا يدعو للتغييييييييير منو
اها مرة اخيرة قصيده تاااااافهه
ولا تصلح للنشر الا .. فى المواقع الجنسية ومواقع الشذوذ
ده رأييي
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: وضاح عبدالرحمن جابر)
|
| Quote: ياجامع انت فاكر نحن قاعدين نتغالط والله في الحالة دي حقو ابوحنيفة مش يمد رجليه بس يجيب ليهو فردة حمراء وارد شندي ويتغطى عديل كده . |
ود مضوي
تحياتي الطيبة
تعبير عجبني جدا
الغريبة العقل الجمعي ده مراات مصاب بعلة الا يعملو ليهو فورمات
رواية موسم الهجرة بديعة جدا جدا عصابة الخرطوم منعتها الرواية وجدت عالميتها في اتقان محليتها
وغيرها من الروايات والشعر برضو
من اراد من هاشم ان يكتب ملحمة اكتوبر فاليعيد وضع اكتوبر
ودي يونيو اسوا تجربة تمر علي الوطن
زادت اي شي للحضيض وفعلت الاعاجيب
سماسرة الاسلام السياسي ونخاسيه
اها مفردات هاشم تفضح فيهم ...
احببت تعليقك جدا شكرا اعتبرو عربون صداقة
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: Sabri Elshareef)
|
Quote: * ابدأ يا ابو حميد مافي أي تعسف او تصنيف وأنا سميت الجدل حول النص جدل حميم لان النص فعلاً مدهش بغض النظر عن رؤيتك لبذاءته . ولو كان في تعسف أكيد كانت اللغة حاتكون غير .
*حتى المثل الاصلي دلالته واضحة وليس لها علاقة بالشذوذ او ماشابه فهو في أفحش حالاته يعبر عن سوء الحظ ، ودونك سوء الحظ الذي لازم هذا الوطن منذ أن وطئت أرضه اقدام اللئام .
*يعني مفرداتنا وعاميتنا وحتى ( بذاءتنا ) مطلوب أننا نجيب كائن فضائي من خارح حدود همومنا وامالنا ويعبر لينا بيها .
*انا يا ابوحميد نقطتي الوحيد البتكلم عنها هي عدم محاكمة أي نص ابداعي أخلاقيا لان المسالة متغيرة والنص باقي ،
تفتكر يامحمد كل من ذكر في المقتبس اعلاه سيسعد بهذه النص لا أعتقد ولا أنفي أن هناك ذويقة لأرائهم الف تحية واحترام وبينا الونسة دي ،، |
يا عمر بالنسبة لدلالة المثل الأصلي كيف ما ليها علاقة بالشذوذ؟ يا رااااااجل قول كلام غير دا
عارف يا عمر مشكلة الموضوع دا و اللغط الأثاره يعود في أغلبه لقصة التبرير دي, أنا شخصيا لا أفرض على أي احد كيف يعبر أو ما ذا يختار من الفاظ ودلالات لكن كمان احتفظ بحقي في القراءة السليمة وحقّي في الإختلاف مع هذا التعبير
لكن محاولات التبرير دي تارة بأن هذا حال البلد وببذاءة النظام تارة أخرى ونفي البذاءة الواضحة في النص وأخيرا نفي الدلالة في المثل المستخدم دي هي الأنا بكتب ضدّها وبعتبرها محاولات خم - معليش للتعبير - من ملكيين أكثر من الملك, يعني هاشم نفسه لو سئل لا أعتقد انه سينفي بذاءة الحتة المثيرة للجدل ولا سيقول أن دلالة المثل لسوء الحظ فقط
قرأت في مكان ما - أعتذر لصاحبه إذ لا أذكر مكان التعليق - تعليق يقول ان النص فرض نفسه ووصل رسالته و الجميع الآن يذكره في حين ينسى نصوص اخرى عظيمة لشاعر نفسه
في رأيي أن هذا التبرير فيه اهانة لهاشم صديق, فليس هو من يسعى للإنتشار و توصيل رسالته بالبذاءة, وحتى هذا الإنتشار ليس مقياسا لأنه سيسقط حتما في أول مقارنة مع رسائل شكلة الواتساب الأخيرة التي تسببت بذاءتها في نشرها على أوسع نطاق, ومن ناحية أخرى أي رسالة هذه التي نجح النص في توصيلها طالما الناس تركوا الموضوع ومسكوا في ما هو المقصود من المثل ومن هن اللبوات وما هي الكلمة البين الأقواس.
هذا التبرير في رأيي هزيمة للنص وضرره على هاشم صديق و رؤيته أقسى من نقد من يرون بذاءة النص ولم يستسيغوها.
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: محمد البشرى الخضر)
|
| Quote: ومن ناحية أخرى أي رسالة هذه التي نجح النص في توصيلها |
ياود البشري كمان إنت ما تبالغ .
شوف كم خرطومية واحد حايشمي يبحث عن المعني الحقيقي للجملة الحاصل فيها الجدل بتاعت (لقيت الخرابه).
وبكده بيكون الشاعر ساهم فى رفع الوعي المعرفي لدى عامة الناس .
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: بدرالدين الطائف)
|
الأخ سيف بشير
السلام عليكم
بعيداً عن موضوع البوست في العام 1985 كان لي زميل في رابطة كلية الاقتصاد يحمل اسمك و هو انسان بمعنى الكلمة و دخلت على بروفايلك و صراحة بين الشك و اليقين هل هو إنت أم شخص آخر فإذا كنت أنت المعنى فلك السلام و الشوق و الاحترام بلا نهاية و إذا كان مجرد تطابق أسماء فلك أيضاً الود و الاحترام.
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: ALWALEED ALSHEIKH)
|
Quote: يا عمر بالنسبة لدلالة المثل الأصلي كيف ما ليها علاقة بالشذوذ؟ يا رااااااجل قول كلام غير دا
عارف يا عمر مشكلة الموضوع دا و اللغط الأثاره يعود في أغلبه لقصة التبرير دي, أنا شخصيا لا أفرض على أي احد كيف يعبر أو ما ذا يختار من الفاظ ودلالات لكن كمان احتفظ بحقي في القراءة السليمة وحقّي في الإختلاف مع هذا التعبير
لكن محاولات التبرير دي تارة بأن هذا حال البلد وببذاءة النظام تارة أخرى ونفي البذاءة الواضحة في النص وأخيرا نفي الدلالة في المثل المستخدم دي هي الأنا بكتب ضدّها وبعتبرها محاولات خم - معليش للتعبير - من ملكيين أكثر من الملك, يعني هاشم نفسه لو سئل لا أعتقد انه سينفي بذاءة الحتة المثيرة للجدل ولا سيقول أن دلالة المثل لسوء الحظ فقط |
يابو حميد مساك الله بالخير ،،
أول حاجة أنا سعيد جداً بالتواصل
ثاني حاجة انا حتى الآن لم اسلم ببذاءة النص ومصر جداً إنو النص حقنا بيشبهتا ومن مفرداتنا ولغتنا العامية الحميمة .
ثالثاً المثل مقولة تتلبس حدث حياتي يومي وكل يقراءها حسب الزواية البشوف منها الحدث . ياخي والله قبل مااكتب المداخلة دي وعلبة السجائر قدامي ومالقيت الولاعة ولم لقيت الولاعة أختفت علبة السجائر ( طبعاً أبشرك في النهاية لقيتم الاثنين ) لكن أتذكرت موضوعنا ده .
رابعاً هاشم صديق مبدع له أدواته ولغته وستايلو يعني لو تلاحظ حتى الآن أنا لم يخالجني الشك في إنو النص تبعه .
وعليه لايمكن وضع مسطرة اخلاقية للمبدع ولا مفردات يجب أن يلتزم بها ولا يخرج عنها ووإلا يكون زول ود بن آدم ساكت ليس بينه وبين الإبداع قرابة .
وزيو وزي مليون شاعر ماليين القنوات الفضائية وبقولوا كلام خارم بارم ونربأ بهاشم صديق أن يكون من ضمن العاديين .
المهم يازول يبقى الود ويبقى النص وشكرا لهاشم صديق أن أتاح لي هذه الفرصة ودمت ،
وياصبري يعجبك انشاء الله وليدك الشايلوا ده .
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: عمر مصطفى مضوي)
|
الأعزاء المتداخلون
استميكم العذر لانشغالي الزائد والذي لم يمكنني
من التواصل معكم بشكل منتظم.
أقدِّدر جميع المساهمات.
وتعليق على عجالة:
سبق وكتبت، حال البلد المايل ما مبرر لنا
للازلاق. أو بمعنى آخر:
إذا الناس كوووولها بقت حرامية، هل دا بيعني
اني ابقى حرامي زيهم؟
نحن نعلم تمام العلم أن كل إناء بما فيه ينضح، ولذلك
انتقادي للقصيدة لا يعني قدحاً في هاشم أو
شكر لعصابة البشير.
ويا وليد؛
يا هو أنا سيف بشير زميلك في الرابطة، وتصدق ما متذكر كنت
سكرتير شنو!
راسلني على ايميلي
[email protected]
وتحياتي
| |
|
|
|
|
|
|
|
|
|
Re: ليه كدا يا هاشم صديق؟ كلام ما بشبهك! (Re: saif basheer)
|
الأخوان أصحاب الآراء التي لم ترى بذاءة في النص و الآخرين الذين برّروا لها ببذاءة الواقعو النظام و نبض الشارع ... إلخ...
كدي أعيدوا لينا قراية القصيدة دي مع القصيدة الأخيرة التي لخّت (المناضلين) (الفالحيييين) في من لخّت ووضعت لينين في نفس الكفّة مع (تيس) الدين
و ادّونا رايكم بالله...
هل لا زال النص رائع وغير بذيئ, هل لازال يعبّر عن الواقع و تطلّعات الشعب, وهل لازالت القبّعات و العمم مرفوعة للشاعر :)
____________________________________
| |
|
|
|
|
|
|
|
| |
saif basheer
عبدالحفيظ ابوسن
يحي قباني
هاشم احمد ادم
بدرالدين الطائف
محمد حيدر المشرف
Tragie Mustafa
نزار عبد الوهاب
وضاح عبدالرحمن جابر
ABUHUSSEIN
خالد العبيد
عبدالمنعم الطيب حسن
Mustafa Muckhtar
محمد جلال عبدالله
MOHAMMED ELSHEIKH
عاطف عمر
محمد مجيدو
مني عمسيب
اسماعيل عبد الله محمد
محمد هاشم ابوزيد
علي عبدالوهاب عثمان
خالد علي محجوب المنسي
BALLAH EL BAKRY
محمد البشرى الخضر
منتصر عبد الباسط
Mohamed Yassin Khalifa
Elmosley
كمال عباس
فيس بوك
تويتر
انستقرام
يوتيوب
بنتيريست