|
|
 ما كـــــــان خـــــــــيـــــــــــــــــــــــــــــار
|
3 hours ago
ما كان خيار
كان التأكد في الطريق
وكان انبثاق اللقيا في لحظة برق
وكان المسار
حواي كان عشم المنال
همست مسا
بعض النجوم
يازول عنيد
انت المحلم بالوصال
وضحكت في سري
وشعرت بيك اجمل حروف
مسكوبة في عرق الوريد
وكتبت دون ما اعاين للكلام
كيف المنال
وبيناتنا اشواك
بينا الموانع
رغم حالة الاشتياق
وعشت في الحالة السهار
نوم الخزاز
ومجامر الارق الحريق
واحساس مشوب
بالانفعال
حين التقيتك
كان فجاءات الهوى الغمرت
مسام الوجد
احساسا بفوق الحد
يا صاحية جواي
لي تونسي بي زمن قادم سعيد
انا عشت كل المفردات
في حضرتك من يوم لقيتك
بهجة وافراح
وكلام فريد
يا زولة ما تقري القشور
واقريني صاح
خليك معاي
جوة في جوهر كلامنا
وكيف معاك برسم ملامح الخطوة
للفرح الجديد
نحكي الحكاوي
عن جمال المدرسة
عن روعة الروضة
ونضافة الحلة والشفخانة
والناس العزاز
سوق الخضار
مليان نضار
وانا وانت والقول الاكيد
ما بيننا ما بس ريدة للزول
والعيون
البينا حالة
افتتان حد الجنون
البينا احساس
عم الفضا
فاق الظنون
ومعاك بكون
شاعر مجيد
ارسم ملامح سطوتك
بالمفردات الشايلة
من حسنك جمالها واحلا لون
واكتب مشاعري على مشاعرك
احلا كون
وتقولي لي
بالله زيد
يابهجتي
ويابهجة الليل والنخيل
وضفاف تزغرد
كلما حست خريف
عودة قماري الكلمة
والخصب الاكيد
ومعاك اغني
( البهجة في عينيك)
فسر وما
تقصر
ادخل جوة في عمق المسام
اقراني جد
جواي واتعمق شديد
اوتار هواي مشدودة لي خر مدى
كلما نطقت حروفك
مرقت اناشيد الهوى
وصلت وجاتني مع الصدى
وشوش زهور طلة ربيعك
اعب مع الصبح الندى
وقال لي يازول يا مريد
ضاحكت سنك والبرق
ورجيت غيومك والمطر
غنيت مع الريح البتمرق من صعيد
ومصيت على غيوم
السعد
توقيع هوانا
وسمعت صوت من قوس قزح
قال لي
ما تبعد بعيد
وبس
|
|
 
|
|
|
|
د.محمد حسن
ادريس خليفة علم الهدي
فيس بوك
تويتر
انستقرام
يوتيوب
بنتيريست