في اجازتي الاخيرة التقيت به في احدى المناسبات وبحكم انه الواحد طول من البلد (سنتين ونص) كنت استغل كل فرصة عشان اتونس مع الناس قبل ان ارجع الى سجني الاختياري الاجباري
شاب جالس جمنبي نضيف وتبدو عليه اثار النعمة بعد السلامات والتراحيب و سالني شغال شنو ووين اخبرته باني مغترب وجاي اجازة وكيف السودان والغربة معاكم واها لقيت السودان كيف ؟؟؟؟ وشيل وخت و وووو.....شراب شاي
سالته شغال وين ؟؟؟؟سكت ما رد علي المهم استمريت في الونسة و ضحك ونكت وقصص من هنا وهناك والبساط بقي شبه احمدي رجعت لي سوالي تاني/انت ما قلت لي شغال وين؟؟؟ عاين لي مبتسما وقال / شغال في الجهاز جهاز شنو يا ولدي جهاز الامن انت شغال في جهاز الامن البعذبوا الناس؟؟؟
ضحك وهز راسه مؤكدا لا ادري للوظيفة ام تعذيب الناس
وبعد اخد ورد سالته الجابرك شنو على الشغلانة دي ؟؟؟؟
قال لي انا ابوي متوفي و خليت الجامعة واخواني واخواتي بيقرأوا لسه وضغار وامي ما عندها شغلانة ثابتة ولا معيل لينا اسوي شنو؟؟؟ اشتغلته في البنيان عامل و ما خليت شغلة ما اشتغلتها لحدي ما لقيت الفرصة دي وهي تعادل اربعة اضعاف دخلي السابق اها عشان اخواني انا اشتغلتها واستمر قائلا الانقاذ حرامية وما في بديل غير الفوضى و ديل هم المتاحين حاليا ودخل معاي في تفاصيل عجيبة وغريبة عن التمرد في الغرب وجبال النوبة والنيل الازرق ....والتخويف من الفوضى القادمة وانه الانقاذ بسوءها الحالي افضل من القادم ولا بد من حمايتها سالته لو حصلت بديل هل ممكن تخلي الشغلانة دي؟؟؟ نظر الي وضحك و قال لي امنيتي اخلص الجامعة و بعدين يحلها رنا افترقنا وفي نفسي شيئ من التعاطف معه
ذكرني هذا الشخص بواحد من جيراننا ضاقت بيهو الحياة واتخرج من الجامعة وقاعد عاطل وخلاص فاض بيهو المهم سافر الى سنار ومنها الى ارتريا للالتحاق بالتجمع الوطني و قعد سنة كاملة كانت اسوأ سنين حياته على كل جاء راجع في زمن كانت الانقاذ بتحتفل بالعائدين وعلى طوووول تديهم وظيفة لما تسألوا الجابرك شنو يقول ليك العطالة عشان كده ممكن نتوقع ما ستة الف ينضموا لجهاز الامن وانما عشرة عشرين طالما انه مافي معارضة حقيقية للانقاذ و الشباب فاض بيهو العطالة ومستعد يبايع الشيطان
06-06-2014, 08:54 PM
مرتضي عبد الجليل مرتضي عبد الجليل
تاريخ التسجيل: 10-04-2010
مجموع المشاركات: 3097
قال لي انا ابوي متوفي و خليت الجامعة واخواني واخواتي بيقرأوا لسه وضغار وامي ما عندها شغلانة ثابتة ولا معيل لينا اسوي شنو؟؟؟ اشتغلته في البنيان عامل و ما خليت شغلة ما اشتغلتها لحدي ما لقيت الفرصة دي وهي تعادل اربعة اضعاف دخلي السابق اها عشان اخواني انا اشتغلتها واستمر قائلا الانقاذ حرامية وما في بديل غير الفوضى و ديل هم المتاحين حاليا
تبرير فطير ولا يدخل عقل! سياسات النظام الحاكم الاقصائية هي التي ادت لعطالة الشباب سياسات تعيين ذوي الولاء واقصاء المؤهليين سياسات النظام الفاسد هي التي جعلت جهاز الامن اكبرمخدم في الدولة البوليسية لانها هي اليد التي تبطش واليد التي تحمي النظام النظام شرد الاف السودانيسن من وظائفهم ودمر اكبر مشروع زراعي حديث الا وهو هو مشروع الجزيرة النظام قام بتدمير معظم المشاريع الحيوية مثل السكة حديد والموانئ البحرية خوفا من الحركة النقابية. كان عايز تبرر ،برر ساي، قشة ماتعتر ليك لكن كمان ماتخم الناس. انه العذر الاقبح من الذنب.
Quote: كان عايز تبرر ،برر ساي، قشة ماتعتر ليك لكن كمان ماتخم الناس. انه العذر الاقبح من الذنب.
حبينا مرتضي براحة شوية يا اخوي انا نقلتها ليك بضبانتها بس للعلم الزول البيسكر وبيطشم وبيسرق عنده الف مبر لفعله و قوله و الزول البيسرق في قوت الشعب ويختلس ويرتشي برضو عنده مبرر شباب اتقفلت الدنيا في وجهه و مات بعضهم في صحراء ليبيا والبعض الاخر بيع كقطع غيار وهو يعبر الى اسرائيل البعض الاخر عالق في لبنان ويعامل بعنصرية والبعض يموت غرقا في ايدي سماسرة ومهربين البشر الشباب طلعوا مظاهرات في سبتمبر ما لقوا تنظيم يتبنى المظاهرة ويدعمها بواكدرهم المنظمة وقعدوا يتفرجوا عليهم وهم يقتلوا لا ابحث لك عن تبرير لهم بس الايدو في الموية ما زي الايدو في النار و ربنا يزيح عنا بلاء الانقاذ
تعرف الناس تتكلم معاهم عن الانقاذ والحرامية يقول ليك اكتر من السمعتوا بس يجوا يقول ليك البديل منو؟؟؟؟
احترامي يا غالي
06-06-2014, 09:09 PM
قصي محمد عبدالله قصي محمد عبدالله
تاريخ التسجيل: 02-28-2014
مجموع المشاركات: 4905
دكتور سلام، و ما هو العيب في وظيفة الامن السري بصورة عامة؟ هناك شعب مختلفة من ذاك الأمن: الإقتصادي، العسكري، المرور، المعلومات، إلخ. و هل ذهاب الإنقاذ و اقتلاعها من جذورها سينتج عنه زوال هذه الوظيفة السرية وعقم أرضه؟ بلاشك سيقود إلى زراعة نوعية جديدة من الأجهزة الأمنية تتواكب و التطورات العالمية من أسلوب و تقنية و مهارات متجددة. حبينا نسلم عليك فقط. تحياتي وتقديري
06-06-2014, 09:45 PM
nour tawir nour tawir
تاريخ التسجيل: 08-16-2004
مجموع المشاركات: 17638
Quote: و ما هو العيب في وظيفة الامن السري بصورة عامة؟
حبيبنا استاذ قصي اخبارك يا غالي
والله في زمن الانقاذ هي جريمة في حد ذاتها ما عيب وبس لما تنظيم واحد يحكم البلد ويتكبر ويتجبر على خلق الله ويجي واحد يشتغل لحمايته فتبقي جريمة لما شباب يموت بسبب راي سياسي دي الجريمة يا استاذنا
Quote: والله في زمن الانقاذ هي جريمة في حد ذاتها ما عيب وبس لما تنظيم واحد يحكم البلد ويتكبر ويتجبر على خلق الله ويجي واحد يشتغل لحمايته فتبقي جريمة لما شباب يموت بسبب راي سياسي دي الجريمة يا استاذنا
نسأل الله أن يحفظ أهل السودان جميعهم، وأن يرد غربة المهاجرين سالمين غانمين، وأن ينعم على الجميع بالخير والسلام والأمن.
Quote: تخريمة يوم الاحد انشاء الله عندك
حبابك في بيش و مليون مرحب بيك في البيت، الاسبوع القادم إن شاء الله فاضي 7/24 ، الهاتف فاتح 24 /365 . تحياتي وتقديري
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdelslam Malik Ali Elhag
قصي محمد عبدالله
nour tawir
فيس بوك
تويتر
انستقرام
يوتيوب
بنتيريست