|
|
|
 Re: أمثال شعبية ودهاريب وناس عوووك وناس قالو... (Re: رحمه فضل المولى عجك)
|
اخى الجميعابى تحياتى .... عندى ثلاثه امثال تنطبق عليك انت شخصيا . ارجو ان تتقبلها بروح رياضيه :
المثل الاول : الساعدوه فى قبر ابوه جبد محافيره ووقف : هذا لانك فتحت البوست ونحن نساعدك على رفع البوست فتركته لنا وذهبت .
المثل الثانى : تركنى حلوف وكلابه : اى تركتنىا نحن والبوست كانه لايهمك امره لا من بعيد ولا من قريب .
المثل الثالث : كن دا حلوفى اطلقوه : كانك تقول لنا لو هذا البوست امره يهمنى انا فقط فاتركوه
| |
 
|
|
|
|
|
|
|
|
Re: أمثال شعبية ودهاريب وناس عوووك وناس قالو... (Re: رحمه فضل المولى عجك)
|
1. سيد الزاملة أولى بركوبها
2. خادم الفكي مجبورة علي الصلاة
3. الزول بونسو غرضه
4. مدقوقة الراس قمقامة
5. الفوقو بخور بنشم
6. الغني بماله والكريم بأم عياله
7. الخريف الليّن من بشايره بيّن
8. القُحة ولا صمة الخشم
9. الفي ضهرو عويش ما بطفي نار
10. النيّة زاملة سيدها
11. شدرة دي كان بهوزز ولا ساي يا عبلانج يا هبوباي
12. الجري قبل الشوف قدلة
13. السترة والفضيحة متباريات
14. أخوك كان رميتو قوم منّو
.15 البشوفوه نهار ما بضووا ليه نار
16. جاها يتفولح جاب ضقلها يتلولح
17. الصندل في بلده ما فوّاح
18. عبلانج بي رقبتو بربطو من صلبه مالو!
19. الجديد في الكَرُو سَمِح
20. خير الكلام ما قلّ ودلّ!
| |
|
|
|
|
|
|
|
|
|
Re: أمثال شعبية ودهاريب وناس عوووك وناس قالو... (Re: كمال الطيب الجميعابي)
|
Quote: الأخ الكريم رحمه
لم أفهم هذا المثل قرقاجة لمتهم بوطة
أرجو البيان
لك الشكر |
اخى الجميعابى الحمدلله على السلامه .... اما بالنسبه لسؤالك عن هذا المثل اقدر اقول كل مفرداته بقاريه خالصه وكلمة قرقاجه جمع قرقاجى ومعناها صياد والقرقوج هو الخروج للصيد . البوطه هى الرهد او البركه او المنهل ولمتهم بمعنى جمعتهم وهذا المثل يضرب للذين تجمع بينهم مصالح .
| |
|
|
|
|
|
|
|
|
|
Re: أمثال شعبية ودهاريب وناس عوووك وناس قالو... (Re: رحمه فضل المولى عجك)
|
الأخ ول أبا رجب فضل المولي بعد السلام
مثل من صميم البيئة ولكن الكلمات غير معروفة للكثيرين وتحتاج لتشكيل عشان يقروها صاح. خاصة كلمة (لمّتهُم). يكون الكثيرون قرأوا اللام كحرف جر وكلمة متّهم بتشديد التاء بدلاً عن تشديد الميم مما غير المعنى وذهب لكلمة مختلفة خالص عن الكلمة المقصودة.
كلمتي قرقاجة و بوطة لا يعرفهما إلا من هو من البيئة.
قناتي في اليوتيوب
http://www.youtube.com/user/KabbashiSudan
تحياتي
كبـّاشي الصافي
قناتي في اليوتيوب
http://www.youtube.com/user/KabbashiSudan
| |
|
|
|
|
|
|
|
|
Re: أمثال شعبية ودهاريب وناس عوووك وناس قالو... (Re: cantona_1)
|
Quote: مثل من صميم البيئة ولكن الكلمات غير معروفة للكثيرين وتحتاج لتشكيل عشان يقروها صاح. خاصة كلمة (لمّتهُم). يكون الكثيرون قرأوا اللام كحرف جر وكلمة متّهم بتشديد التاء بدلاً عن تشديد الميم مما غير المعنى وذهب لكلمة مختلفة خالص عن الكلمة المقصودة.
كلمتي قرقاجة و بوطة لا يعرفهما إلا من هو من البيئة. |
الاخ كباشى الصافى.... تحياتى ..... انا ممنونك على التصحيح تدخلك كان فى الوقت المناسب اشكرك على ذلك .
| |
|
|
|
|
|
|
|
|
|
Re: أمثال شعبية ودهاريب وناس عوووك وناس قالو... (Re: رحمه فضل المولى عجك)
|
إستمعت لندوة تلفزيونية قديمة للدكتور الفحل أنقلها من الذاكره: المثل الذى دار حوله النقاش هو ( سراره اللعوت تتلاقا فى الموت ) والصحيح ( سراره اللعوت تتلاقا فى الحرق والموت ) . وإضافه الحرق تأكيد . وفى حاله الحرق فى الغابات تلتقى أغصان اللعوت . حتى بدون موت .
اللعوت لا ساق له عباره عن أغصان فى شكل أقرب للدائرى تبدأ من داخل التربه وتتسع الدائره كلما إرتفعت الشجيره . هنالك المثل الذى يقول ( جنيه فى لعوته ) . إشاره للشخص الذى يصعب الإمساك به . فالأرانب والغزلان الصغيره تتجه الى اللعوت حتى تتفادى مطارده الإنسان والسفروك , وهو العصى المعكوفه التى تطلق على عكوله أم تشر أو الأرنب البرى .
أمثالنا السودانيه تغيرت بسبب الأخطاء فعندما نقول " ال###### بيريد خناقو" نقصد في العاده أن ال###### يحب من يضربه أو يهينه ولكن أصل المثل حب الشيء اللذيذ الممتع وإن كان يسبب الضرر فال###### يحب العظام ويحاول إبتلاعها ويخنقه العظم ويناضل كي يخلص نفسه إلا أنه يحاول مرة أخرى بلعه لحبه للعظام. ونقول "سيد الرايحه فتح خشم البقره" ونقصد بأن الإنسان عندما يفقد شيء مهم يبحث بعدم معقوليه ويحاول أن يجده حتى في فم البقره والحقيقه أن معنى المثل إن صاحب البهيمه الضائعه(الرايحه) من المفروض أن يتصرف بمعقوليه و يفتح فم أحد الأبقار لكي يرى أي نوع من العشب أو القش يمضغه البقر. وهنالك الحنطوت والديس والنال ولسان الطير والسعده والتمليكه والموليته وخلافه عندما يكون طريا تأكله الأبقار والضريسه والحسكنيت عندما يكون طريا تأكله البهائم. ويمكن للراعي أن يحدد مكان بهيمته الضائعه بمعقوليه بالنظر لداخل فم أحد البهايم الأخري ليعرف مكان المرعي.
ونخطأ كذلك عندما نحث شخص على الإختشاء عندما نقول "اللي اختشو ماتو" ويخطئ حتى الأخوان المصريون الذين هم مصدر المثل . فعندما شب حريق في القاهره في حمام عام للنساء خرجن بعضهن عاريات للشارع وعندما تعرض لهم بعض المشايخ طالبين منهم أن يختشوا فقالت إحداهن" اللي اختشوا ماتوا" لأن من إختشوا ماتوا حرقا.
ونقول في السودان "الله يشغلك بي قده" و يفهم الأغلبيه بأن القده هي الخشبه التي يعمل بها البناء ولكن المقصود به هو السوط وتقول أغنية السيره "أخوات البنات القده عطشانه وبتدور الرجال البحملوا بطانه"
و نقول "شّدة كرياكو" والحقيقة هي شدة حمار كرياكو لأن كرياكواليوناني كان سكيرا وكان حماره يرجعه للبيت مهما إختلفت الطرق.
و نقول "العين بي حسين" و الحقيقه هي العين بي اليغلب حسين. ود. حسين أحمد حسين كان أول أخصائي في طب العيون وتبعه في نفس المجال الدكتور علي أرباب والدكتور الباقر وآخرين. وشقيق الدكتور حسين كان من أوائل مديري البوليس في السودان . ودكتور حسين إشتهر بأنه مرجع في طب العيون .
نحن نقول قلبى على جناى وقلب جناى على حجر . والصاح قلبى على جناى وقلب جناى علّى ( أنا ) حجر . بتشديد اللام والضمير مستتر .
لله ما أروعك يا د. الأرباب.
| |
|
|
|
|
|
|
|
|
|
|
ناس قالو... (Re: كمال الطيب الجميعابي)
|
هنالك مثل مصرى معروف وهو "دا احنا دافننو سوا" وسأروى قصة هذا المثل من منظور جبهجي سوداني: قالوا في إتنين جبهجية قفلت منهم الحكومة الماسورة وفلسوا تفليسه جد ، فكروا في أنه يقلتوا ###### ويدفنوه وويسو عليه بيان يسموه الشيخ كليب. دفنوا ال###### وسو دعاية وطبعا جو الناس من أصقاع البلاد زى بير القضارف. الجبهجيان لمو القروش من الحيران والزوار وفتحو مطاعم ومقاهي وأجّرو العنقريب بي ألف جنيه والمرتبة براها بي ألف جنيه والمرتبة أم ملاية بألفين جنيه والمخده بي ألفين والناموسية وكافة مستلزمات الحياة اليومية بتسعيره ميسره. المهم القروش كترت عندهم بلحيل ، قام واحد قال للتاني أنه ماشي الحج عشان يتحلل وأوصاه على العقاب وأودعه الذى لاتضيع ودائعه. بس الزول ركب الطياره من هنا ، التاني إشتغل ليك في القروش تحويل لماليزيا وفلل وعرّس لي بتو جاب ليها شيله من دبي وقدل فوق عوجته. الجبهجي جا من الحج وبعدما ضربو باب الحوش جير وعملو الكرامة والذى منه وتفرق المباركين، سأل صاحبه بلهفه "أها أخبار مشروعنا شنو؟". صاحبه رد عليه هي آزوووول مشروع شنو؟ دا مشروع فاشل تعريفه مافيه، ياخي الناس ذاتم بطلوا حكاية الصوفية والتمسح بالقبور دى لأنها بدعة وإنو لازم تشوف ليك شغله غيره وخاصة أنك رجعت من الحج. غضب الجبهحي الحاج غضبا شديدا وقاليه "يازول دا كلام شنو البتقول فيه دا" الجبهجي قاليه "وحات الشيخ كليب الكلام القتو ليك دا كلو صاح" الجبهجي الحاج قاليه "ياراااااجل ، دا احنا دافننو سوا!!!!".
| |
|
|
|
|
|
|
|
|
|
Re: ناس قالو... (Re: كمال الطيب الجميعابي)
|
| Quote: الصابرات روابح وإن رجعن قماح |
ياخ كتير من الامثال السودانية تدعو الي الاحباط وتثبيط الهمة والبخل.
خد عندك:
كان غلبك سدَّها وَسِّع قَـ دَّها
دار ابوك كان خِرْبَت شِيل لك منها شلية
شملة كنيزة تُلاتِيَّ وقــ دَّها رباعي
عايرة وادوها سوط.
ومايدعو للبخل:
الزيت كان ما كَفّي ناس البيت يَحَرَمْ علي الجيران .
وكلامنا زاتو ملكلك ـ الواحد يقول ليك:
ياجنا ماك مِتْقَدِم لي وراء تجدعنا معاك؟
او يقولك : فلان قام قعد
وافعالنا كُتُر:
الشافع يبكي نَدُقُّو عشان يسكت
نغسل ايدنا بالصابونة بعد الاكل وكان الاولي قبلة وبعده.
شكرا علي اتاحتكم لنا هذه الفرصة.
| |
|
|
|
|
|
|
|
|
|
Re: ناس قالو... (Re: عبدالعزيز الفاضلابى)
|
أخوى الفاضلابي جيدا جيت وجيد شفناك وجيد شفنا النفوس السايمه روحا معاك ، أها ياخوى جر عنقريبك بي جاى خلني انحدسك، عندنا :
مقنع البايتات
والبشيل فوق الدبر مابميل
والفنجرى أب جيبين
ودراج الولايا
أخويا المابنقدر سيل الوادى المنحدر
ويالفاضلابي يا أخوى
نحن ناسا بنضارى من شين جارنا.......وفي وقت الهجعة للضيف بتوقد نارنا
ويالفاضلابي ياخوى أنت بالذات أهلك بمرق اكلن قبال ضيوفن يرمو عصيهم
ويالفاضلابي ياخوى أمانا مافينا:
بتصادم المغارة خيولا بجن بالليل......يا ود ليل البحور يا الجدك المانجيل
ونحن من نفر عمروا الارض حيث ما قطنو
وشنقلي طوباية تلقي دهباية (كناية عن الأمل)
وعندنا مهيره بت الشيخ عبود القدلت شامخة قدام الجيش في نشوه وهي تنشد:
الليله إستعدوا وركبوا خيل الكر .... وقدامن عقيدن بالأغر دفر
جنياتن العزاز الليله تتندر .... ويا الباشا الغشيم قول لى جدادك كر
وعندنا:
الخيل عركـــــــــــسن ماقال عدادن كم...فرتاك حافـــــــــــلن ملاي سروجن دم
وعندنا:
إن وقفت بتخفي الشمعة خاتيه الكبه....وإن قدلت كذا البان أبنسيمن هبا
ومن أقوال أبوى الشيخ فرح ود تكتوكا:
كان جابت حلو .... بنقسمو بالمحارة
وان جابت خسام ولطام ....تيران ومابننضارة
الزول كان عزيز....اصلا عزيز فى داره
هيييا آزووووول أمانه السودان دا ما فيه حديس.
أخوك الجميعابي
| |
|
|
|
|
|
|
|
|
|
Re: ناس قالو... (Re: عماد الشبلي)
|
لحَلّفك كَتَلك والشّكَاك عَاداك
سلام أخي كمال الجميعابي والزوار جميعا ...
"السَّمَّاك ماحقربك والعطاك خاواك
والدَّاير مشيك لا بدَّ يستنَّاك
مهيرة المهجقني التصنَّت الكوراك
عارة بي هجارها وشقَّت الكَّاك
وعن الدَّهاريب...
من قومة الدَّهاريب والسِّحاب الشَّاق
كيف دهِن العروس دومة اللِّدينو رقاق
تسلم ليَّا هجَّام طيبة الأخلاق
سريعن طلقة سيدو بلبِّد السَّواق
محبتي
| |
|
|
|
|
|
|
|
|
|
Re: ناس قالو... (Re: عبيد الطيب)
|
اخونا الجميعابي
يازول ردك علي مداخلتي اقنعني تب
وكلامك صحيح مفروض نشوف النُّص المليان من (الكوز)
وعين الرضا عن كل عيب كليلة ,,, دي العين المفروض نعاين بيها.
يارب اصلح حالنا نحن السودانيين.
تشكر يازول ياكلس علي رد اخوك للتفاؤل من جديد .
| |
|
|
|
|
|
|
|
|
|
Re: ناس قالو... (Re: عبدالعزيز الفاضلابى)
|
الأخ الكريم عماد الشبلي
لك التحية
أنا مابعرف كيف بتركب السخله وإنت زول يبدو عليك من كتاباتك إنك فنان.
جمع وجميع أخوان أشقا وجامع أخوهم ود أبوهم جمع جاب الجموعية وجميع جاب الجميعاب وجامع جاب الجوامعه ، الجمعابي مقصود بها الاساءة ، آمل ألا يكون ذلك قصدك.
لك احتراماتي.
الجميعابي
| |
|
|
|
|
|
|
|
|
|
Re: ناس قالو... (Re: كمال الطيب الجميعابي)
|
أخوى الفاضلابي
يازول ماشيل هم تب ، عندنا بحيرة بترول تحت الواطه ، والمرة دى مابندق ني ، كل زول إيجي بي كبايتو ، الناس البغرفو ب(الكيزان) موهن فينا.
شده وبتزول ... نسأل الله أن يرفع عن بلادنا البلاء.
تحياتي من قبل ومن بعد.
الجميعابي
| |
|
|
|
|
|
|
|
|
|
Re: ناس قالو... (Re: كمال الطيب الجميعابي)
|
أها أكان كدى عر
قصة مشهورة في قرية مجاورة لنا أن واحد كضاب خلاس ، سمع أنو في زول من الحلة قدم طلب عشان يمشي للعمره ، أدا الموضوع اسبوعين تلاتة وجا راكب حمارو بدرى ، دق الباب وقال لي مرتو فلان إتصل من مكة وقال هو والناس المعاهو طيبين. المره قالت ليه عمرة شنو آيابا ، فلان ياهو دا قاعد جوه القرعة ماوقعت ليه. لوى لجام حماره وقال لها "أها أكان كدى عر". فجرت مثلا
| |
|
|
|
|
|
|
|
|
|
Re: ناس قالو... (Re: كمال الطيب الجميعابي)
|
Quote: الجوامعه ، الجمعابي مقصود بها الاساءة ، آمل ألا يكون ذلك قصدك.
لك احتراماتي.
الجميعابي |
لا يازول يا كمال الجميعابي
مجرد خطا كيوبورد
لك اعتذاري
الما عندو عجلة كان بوست نشرته هنا برفقة صورة لطفل راكب سخلة
فشلت في ارفاق رابطه هنا
ارجو الرجوع اليه لو سمح وقتك
| |
|
|
|
|
|
|
|
|
|
Re: ناس قالو... (Re: عماد الشبلي)
|
الأخ عماد الشبيلي
حكي لي أحد الأخوان بأنه طُلب من أحد السعوديين أن يمدح السودانين فقال:
قلبن أبيض وبزحو ليك تقعد (يبدو أنه قالها بلهجتم) وتعرف هرجهم (مقارنة بالبنقلاديش)
إعتذارك مقبول .. حصل لينا كبير الشرف بمعرفتك.
لك التحية وكافة التقدير.
أخوك/الجميعابي
| |
|
|
|
|
|
|
|
|
|
Re: ناس قالو... (Re: بدرالدين بابكر مصطفى)
|
الأخ بدر الدين لك الشكر على التعديل مع التحية (وحاشاك سوء الأدب)
لحقن بقر ود فرح
ويقابله
لحقن أمات طه
وود فرح واحد من منطقتنا سافر الى الصعيد ليشترى بقر وأجر واحد عشان يسوق البقر وهو ركب القطر ورجع البلد
الزول نام بالبقر ، فكان كلما سأل عنها يقول (جايه في الطريق) فصار مثلا يقال لحقن بقر ود فرح
| |
|
|
|
|
|
|
|
|
|
Re: ناس قالو... (Re: رحمه فضل المولى عجك)
|
يبخروا فيها وهي تضرط
يهدوا فيها من الانطلاقة بقت تبيت برة
(أمثال الفشاحة)
مثل مصري:
كييف التراب بيشتري معلقة (معلئة)
المعنى إنو أي زول بحاول يجيب عدة شغل للحاجة البريدا
الزول البنسطل بالتراب يشتري شنو غير المعلقة، لا ورق ولا سجاير أحمر
| |
|
|
|
|
|
|
|
| |
كمال الطيب الجميعابي
cantona_1
عبد الله شم
BALLAH EL BAKRY
عبدالعزيز الفاضلابى
عماد الشبلي
عبيد الطيب
أحمد سيداحمد عثمان
بدرالدين بابكر مصطفى
فيس بوك
تويتر
انستقرام
يوتيوب
بنتيريست