«مقصوصة» و«بزديق» و«نطع» وشوية محنة

Quote: شكلك كدا بتعاني من الحالة 107 اليومين ديل .... عارف يا طارق البوست دا محتاج لي ترجمة عشان معانا شفع و حناكيش الله يسالك زول في قاموسو الحاجات دي كلها يكون عمرو كم سنة .... ؟؟؟؟؟؟؟ يديك العافية

انت ولدك نديدي ياخ

Quote: ديل متذكرن من زمن الجهل ياخ انت ولدك نديدي ياخ

Quote: هبوت اليضروهو ليك في صلعتك الشينة دي .... بوستاتك دي مفروض تنزل معاها منوال عشان في بعض الاعضاء حا يضيعوا فيها :) :)

Quote: اين المشلعيب دوا كديس واين برش العنقريب الهبابي ووين مفرش الحنة المدخل جوة الشوال تحية حب لكن ذكرتني حاجة كنت ناسيها صناديق البرنجي ,,,, ياخ دي ذكريات عجيبة

Quote: جوة البرنده .. حبوبه منتكية فى العنقريب مكومه جمبها الفرده بى ريحتها المعتته المحببه .. ترقد جمبها قفة قطن جزء منقوض وجزء فى المترار .. والراديو ماركة ناشونال المجلد بى دمورية قديمة إنقلبت الى اللون الأسود من أثر زيت المسوح اعلى السقف قندولين قنقر معلقات فرق القنا .. وصريرات من قماش الدمورية بها تيراب بصل .. تيراب عجور وريحة البعر تأتى بين الفنية والأخرى وحفيدها يأتيها بعنكوليب تطلب من أن ينقى لها .. لتغول الزمن على أسنانها زيرين مغطيات بى صوانى ألمونيوم ملفوفات بخيش بنى عليه الطحلب وتحول إلى اللون الأخضر .. دجاجة بتلاته سواسيو .. تبحت تحت الزير تارة وتفد ضنب ال ك ل ب تارة لتطعم صغارة الهبوب .. عندما يصتدم بالإبرين يحدث صفير تهرب منه السواسيو بينما ال ك ل ب يرفع أحدى عينية ليكتشف الموقف سخلين حديثات الولادة يضغن فى حنين إلى أمهاتهن يا ود جبرين أحبك يااااااخ

Quote: ما نفقه كثيراً مما تقول ولولا رهطك لفلقناك بي حجر في نص رأسك. ود جبريل كلامي دا غيره سااااكت من هذا الجمال ، يا أخي إنت زول جميل خلاص وختري كمان أو دينجرس بكلام الفرنجة ، لم تعد القرية قرية ولا المدينة مدينة الحكاية جاطت فأصبح الدش والمسلسل التركي في دردر ناس ود السميح في قريتنا الكائنة الناس عرفت مهند وعشيقته والمان سيتي والأتلنتيكو ونجوم الغد والواتساب الغد بعد أن كان أسلافهم يتضاروا من صورة الرجل في هذا الجهاز السحري في زياراتهم للمدينة ، تلك القرية التي كانت تنام ملء جفونها بعد صلاة العشاء مباشرة بحسب التوقيت المحلي لقريتنا وهو في يد عمنا الإحيمر المؤذن فله أن يؤذن أنى شاء فالرجل عنده ساعة مربوطة بسلسل فضي وموضوعة بعناية في جيب الساعة في جلابيته وهي الساعة الوحيدة في القرية حيث أن ساعة الحكيم دقاش يري الكثيرين فيها أنها ماسورة وأنها منظر ساااكت نظراً لأنها تحمل في طياتها ما يعرف تقنياً بالـ power of synergy ودي شنو ولا من شنو ما تسعلني كل ما أعرفه وتعرفه القرية أنه لا يقوم بلف الزمبك وملء الساعة فهي عايرة ساكت وشغاله على كيف كيفها. الدخول في الشبكات هين ولكين التأمل في الخروج ، أها بالراحه داير أمرق من البوست دا وأقول ليك قبل الخروج قفا نبكي ولا أقول ليك أبكي براك فأنت من أجتر هذه الزكريات يا صديق.

Quote: وراكوبة العواسة الفي الزقاق وتحتها الصاج طالعة من تحتو الجدادة وتتنفض منتهي الجمال يا ود جبرين ودمتم سالمين

Quote: طارق بن جبريل دوت نت إنت وأنا وكل من تاوق في هذا البوست وأثنى على ما كتبت أنت أو أكلها في حنانو ومات بي إحاسيسو ركن طلعنا مواسير ساكت فنظرتنا للماضي يستشف منها أن الماضي كان زمناً جميلاً ، نتغزل فيهو عديل كده ونصوره كما يصور العاشق جكسويته ناس تسمع للحلي وشواشاً إذا إنصرفت (وهي بيني وبينك لو ما قاصده ما كان سمعنا حاجه ، طيب ما كان تلبس شرابات أو تربط دلاقين قبل ما تلبس الحلي عشان توقف كشكة ست الودع دي) بعدين أنا يخيل لي لو عاشت في هذا العصر ما كان في زول ساكت سمعا من السماعات العادية والبلوتوث. بإختصار كل الناس الحضروا زمن الشلوخ أو كانوا قاب قوسين أو أدني منه يرون أن الحياة تأخذ منحى نحو الأسوأ وبالتالي يكون الماضي أجمل من الحاضر (نظرة أولى). لكين عيال هذا الزمن ليهم رأي تاني وكلام آخر وبرضو بالأدلة والمنطق التبريري فالواقع الذي نعيشه بيقول غير كده فالحياة أصبحت أكثر سهولة بفضل الإكتشافات وتطور العلم في كافة المجالات وهي بالضرورة في تطور مستمر ، عليه فإن اليوم أفضل من الأمس وأكيد بكره أحلى فكل المؤشرات تقول إن الزمن القادم سيكون أفضل ، والحياة بالتالي أجمل ولو عملنا رسم بياني مبسط لوجدنا أن المؤشر الخاص بالزمن والعلم والتنمية يتجه إلى الأعلى والأفضل ولا يتراجع للأسفل. ربما يكون وضعنا اليوم أسوأ من الأمس لكين لو بحثنا في الأسباب لوجدنا أن الزمن ما ليهو أي دخل في القصة والمشكل (كما يقول ناس المغرب العربي) هي في ما يحدثه الإنسان على نفسه وأهله ووطنه من مصائب وبلاوي وبالتأكيد الحياة المستقبلية لابد أن تكون أفضل لولا تدخل الإنسان الجائر وما يجره من دمار وخراب وده تأكيد لكلام الإمام الشافعي الذي أوجز نعيب زماننا والعيب فينا وما لزماننا عيب سوانا نحن في سوادنا الأعظم ناس حالمين ساااكت ورومانسيين وبالتالي غير واقعيين ، ربما لم نصل بعد مرحلة ان نحش بدقيتنا أو المرحلة الظ########ة كما سماها الرائع أبكر آدم إسماعيل صاحب المدن المستحيلة لكن بعد ثقافتنا عن الواقعية والعقلانية والموضوعية فيها شئ من الوهم والحلم والأسطورة والتحضر والتقدم والتنمية لا تأتي بالأحلام والرومانسية وقصائد الشعر والخطب الرنانة العصماء وإنما بالعلم والعمل الجاد والتخطيط والتعامل مع الواقع بموضوعية وعقلانية. عشان كده تسمع كثيراً القول الممجوج "يا حليل زمان" آسف لهذه الخربشة في غير محلها لكن حكاية يا حليل زمان دي بتخليني أبكي كل ما أشوف مدي القسوة في دق الشلوفة والشلوخ والبطان في بيوت الأعراس.

Quote: ود جبرين ... يدييييييييييييييييييييك العافية ياخي والله بتبالغ ضمة ضمة وأنا بقرا في كلماتك الحلوة دي تذكرت تلك الرائحة الفريدة التي تكاد تجدها في كل بيت من بيوت زمان ياريت لو كنت بعرف ارسم كنت أخرجت كل سطر في اجمل لوحة يديك العافية حبيبنا وزي ما قلت ليك زماااان ..... بي طريقتك يوم بتجنن ليك زول

Quote: الحبيب دكتور طارق والله أخوك من شدة ما دهماء لمن قرب يبقى قوات دهم عديل كده ومن شدة ماني غوغاء لامن ديك الجن وضكر الحمام زاتو غلب فيني ، لكين الموضوع المستفز بجبرك على مجاراته فالنفس جبلت على البحث عن الجمال ولو في حلمة أذن صرصار والشعراء كلهم غير جنني جنني ما عندهم قول اها الجننهم شنو إنت قايلو البنقو ولا الجوع لا دا الجمال يا جميل.

Quote: Ummoayad Moayad · في شرقانية جمب التُكل وفي نصها في كانون عليه جمرات مكومات في نص الكانون ومغطيات بي هبوت غزيييير . وجمب الكانون في فحم في كيس وجمبهم في هبابة سعف وصينية طلس مكفيات فيها كبابي شاي تلمع وبراد نضييف مجلى بسلك لماع ناعم خاتنو فوق الكبابي . في الحوش قاعدين ناس البيت منتظرين ابوهم يجي من صلاة المغرب عشان يسووا الشاي المقنن ,

Quote: ود جبرين ياخي أبقى تعال كل يوم عشان تخضر صحراء هذا المنبر وجيب معاك بنبر ومشلعيب وروابة عجين وطاجن للقيمات طلتك دائما بهية وهي تجذب ناس حلوين في هذا المنبر البقى كله كتاحة إنت رمضان على الأبواب ول شنو ؟

Quote: مطبخ فيه «نملية» فيها تلاتة كوريات «رمضان كريم».. وخمسة صحانة «طلس» وكوز فيه «خمار عجين» وكورية فيها روب.. «طبق كسرة»..

Quote: ود جبرين سلام خربت النضم الطاعم ده بى ديل ياااخ مطبخ شنو يا ود جبريل .. الشى تكل و فى رواية اخرى دونكا و عمرة كسرة مغطية بى صينية نحاس اصفر..