|
|
 السلام عليكم
|
أولا الشكر موصول لإدارة المنتدى على قبولنا عضوا في الحوش الكبير ، بسم الله دقينا الباب ودخلنا لقينا الأنصار نحاسن يسوى بق وقرقعة سيوف عبد الرحمن النجومي وحراب حمدان أبو عنجة والمحنك عثمان دقنه قائد أدروبات ماهم فزى وزي. تقدمنا تحت السيالة لقينا تحتها ناس مزرزرين ليهم متهم مصرى ومشايخ تحت ضل الضحي يخاصمون في حد الردة ، جبهة التغيير ، بيانات من هيئات سرية ، مسامير وعملاء أمن واستخبارات مخبرين ومستخبرين ، حقيقة الإمام البخارى ، هل هو إنشقاق أم انقلاب ، السودان الإنشطارية والتناقضات المتساكنة ، والقوم زرافات ووحدانا لايسألون أخاهم على ماقال برهانا، شي شيوعين وشي أخوان مسلمين وشي أحرار الحكاية جايطة بلحيل وكمان قالو درت موسم دق الدلجة دخل وعندها – حسب خبرتي المتواضعة - فإن البرالمة دائما بروحو في أبو نكله ؛ دحين ، ومن باب إبراء الذمة والشفافية وحفظ حقنا التاريخي وخوفا من المادة 11 من قانون الثراء الحرام (1986) فإني أورد كعضو جديد وزول مشلهت إبراء ذمتي هنا وأشهد ناس المنبر كلهم والله خير الشاهدين:
ورثنا 10 حبال خماسي من الوالد من جهة أبيه في ود المدني (لاعلاقة لها بمدني) وحبلين سباعي في السبعات وحبلين خماسي في صقير خيل يحدها من الصعيد الحسن ود محمد ود بابكر ومن السافل الأمير ود الشيخ واقعة ليه من بت عتمان ومن جهة حبوبتنا حاجة بلتنا رحمها الله أربعة حبال ونصف في القصيرة ممرونة من ورا مرن ود شبيلي. الوالدة رحمة الله عليها لها ستة حبال سباعي في الجزيرة أم بحرين خافسة للشرق وكان لها قطعة أرض صغيرة كرس هداها لها جدنا من جهة الوالد ليس لها قيمة ، كانت مثار تندر العائلة ، حتي أنشأت الحكومة مصفاة بترول قرى على أطرافها الشمالية وارتفع سعر الأرض بشكل جنوني ، قامت الحكومة ضمت نتفة واطاة الوالدة لأراضي المصفاة ، شوف دناوة النفس.
عندنا جبهجية كتار في عائلتنا إلا اني سأكتفي بإثنين هنا : واحد ود عمتنا كان من حراس الزبير لابس دبابير وحاجات تلصف كده ، أول ما مات الزبير ، ختوه ليك في الرف. الآن هو في البلد لا لامي في العسكرية ولا في الطوريه .. قادر الله مو عيزان.
الثاني وللآمانة راجل تفتيحة منذ أن كنا شفع نرعي الغنم في إيد ود سليمان ونجمع النبق في عبنا ... كنا نأكل نصه ونشتت نصه إلا هو : كان يجمع النبق ويدسة وفي حصة الفطور يطلع النبق ويكومه كوميات كوميات ويبيع لينا الكوم بي الشي الفلاني ، وسنواصل..
إحتفالا بقبولنا في عضوية المنتدى عاملين كرامة يوم الخميس القادم في الحوش الكبير والدعوة عامة إلا الجبهجية ما معزومين لامن يرجعوا لينا واطاة الوالدة.
الجميعابي
|
|
 
|
|
|
|
|
|
|
|
Re: السلام عليكم (Re: نعمات عماد)
|
| Quote: ورثنا 10 حبال خماسي من الوالد من جهة أبيه في ود المدني (لاعلاقة لها بمدني) وحبلين سباعي في السبعات وحبلين خماسي في صقير خيل يحدها من الصعيد |
الجميعابي سلام زين وخير
هضربة بجيب حبل الخماسي بري منها
لكن لو فيها حبلاً عشاري كان اختلفنا شويه
بس ما تغرز في المحكمة ويجيك سياف برده
| |
|
|
|
|
|
|
|
|
|
Re: السلام عليكم (Re: نعمات عماد)
|
اهلا وسهلا استاذ الطيب ومنور المنبر ...
يبدو انو عندك لينا الكتير من الحكي والسرد الجميل ...
في انتظارك يا سيد.
ودي لك ،،،،
| |
|
|
|
|
|
|
|
|
|
Re: السلام عليكم (Re: أيمن محمود)
|
الكريمة نعمات عماد حبابك ونشكر ليك التراحيب ، الهضربة سببها أنو أنا مودر حجابي من زمان - تحياتي
ود البرارى أريت حالك زين ، الحبل العشارى ماسمعت بيه ، داير ليه جرة جنزيز
ابراهيم الفاضل لك الود كله نأمل أن نكون عند حسن الظن
أيمن محمود مشوار الميل يبدأ بخطوة شيل فرارك ونقوم بدرى نرجع واطاة الوالدة وبعدين نسوق معانا ود البرارى نرجع الولاية وبعدها نشوف الواطة صبحت والله لا - احتراماتي
| |
|
|
|
|
|
|
|
|
|
Re: السلام عليكم (Re: كمال الطيب الجميعابي)
|
الجميعابي
حبابك وألف مرحب بيك هنا
بصراحة دخلتك دي تخلع لأن الأمر ماهو دخول تقليدي بل دخول فيهو الكثير من الإبداع ويازول أقعد أسرد وأحكي وقص وحجيتك ما بجيتك وخيراً جانا وجا لي سودانيزأونلاين وجاك.
حبابك يا النصيح تيرابك
التوقيع ت. Almulaomar
والتاء أو التي دي مي شلخ دي إختصار زي د. دكتور م. مهندس أ. أستاذ أها تيتنا دي تعني تربال. من جزيرة كجبي
| |
|
|
|
|
|
|
|
|
Re: السلام عليكم (Re: almulaomar)
|
تربالي اسمه الملا عمر عليك الله هسي البخلع منو؟ - لكن يازول اروتيك جاهز وحدك مجرور
أجدع سلوكت جاى ، بليلة عيش الريف والفرفروج
أهلنا خلو ام درمان وقالوا كجبي مرقت ... دا كلام دا يالملا؟
| |
|
|
|
|
|
|
| |
كمال الطيب الجميعابي
نعمات عماد
عادل البراري
ابراهيم الفاضل
أيمن محمود
امجد الجميعابى
فيس بوك
تويتر
انستقرام
يوتيوب
بنتيريست