|
|
 عندما قمت بطرد الحكم فى التمرين بالسقاى !!! فى الثمانينات من القرن الماضى !!!!
|
عندما طردت الحكم فى الثمانينات من القرن الماضى !!!!.
كانت التمارين عندنا بالسقاى البتلاب خاصه تمرينى الخميس والجمعة مسخنات بصورة ( أحسن من مباراة البارح بين الهلال والمريخ) !!! ، أذكر أننى كنت فى رتبة النقيب شرطة بعد الزواج مباشرة رئيس قسم شرطة العيلفون وأمضواًبان وأحضر مخصوص كل إسبوع أو إسبوعين للسلام على الاسرة ويكون أهم بند تمرين الجمعة ، كانت هناك منافسة قوية بينى وبين صديقى الحميم وما زال الاخ التازى زين العابدين عبدالله حاج البدرى ولكنه خصمى اللدود فى التمارين ولم يحدث أن لعبنا زملاء ، نأتى للتقسيمة فيختار كل واحد منا فريقه ، كان ذلك التمرين حكمة عمى فى الحساب الاستاذ عصام مضوى رغم أنه يصغرنى ، كان الاستاذ عصام حكم رسمى فى رابطة الجيلى ويأتى التمرين بكروته ومرات بلبس التحكيم ، بدأ التمرين وكالعادة بكون مسخن ومحضور من نصف الحله فى الظاهر يقولو نحنا بنشجع الفريق البلعب كويس واللعبة السمحة ، ولكن تحت يتمنوا فوز فريق التازى لمقدرة التازى الرهيبة فى المكاواة والاعلام والسيرة وتجنيد كل أخوانه وأبناء عمومته وهم مجيدين للمديح والغناء والطار فتبدأ السيرة عندما أكون مغلوب من الميدان التى أن يدخلونى البيت مسافة كيلو متر والمديح شغال وأنا كل مره أجييب لى كلمة أو أسك واحد من أخوان التازى الصغار !! وكل كلماتى يتناولها الاخوان فى المناسبات وحتى هذه اللحظة .
نرجع لطرد الحكم ، أنتهى الشوط الاول بالتعادل السلبى ، وفى بداية الشوط الثانى تقدم فريق التازى علينا بهدف وأشتعل التمرين وبدأ التازى فى مراقبتى لأننى كنت فى الباصات ( ولاسيدا) وبرضو متخصص فى الفاولات ولا عمر بخييت الان !! فقام عصام بإنزار التازى بالكرت الاصفر !! ولم أكترث للموضوع كثيراً لأن همى ليس طرد التازى وأنما التعادل والانتصار !!رغم أن سيرتى ما بتلحق سيرة التازى من حيث الاعداد والجماهيرية والمسيرين ، فقام التازى مره أخرى بعمل فاول خطر مع مهاجم لفريقى فلم يتردد عصام مضوى الحكم من طرد التازى بالكرت الاحمر !! فخرج مبسوطاً وقال والله أنا يا بشرى غالبك تدرن وتغلب ما عندى بييك شغله!!!!! المهم أنا لما طردونى إنت مغلوب وسيرتى بعمله بعمله !! وطبعاً أنا أسمع فيهو !! وأعرف أنو سوف ينفذ ما يقول !! فلم أتردد خاصه وأن الصافرة حقتى أن أقول للحكم عصام مضوى يا عصام جييب الصافرة ولو سمحت أطلع بره !! فالشىء الطبيعى كان ممكن يطردنى ويستمر فى اللعب !! ولكن قام بكل أدب وإحترام بتسليمى (الصافرة ) وخرج فقلت للتازى تعال يا التازى راجع وأخترت حكم أخر أعرف أنه أمين وحازم هو الاخ كمال ميرغنى فواصلنا التمرين وأستطعت أن أحقق التعادل فى ذلك التمرين ولم يحقق الاخ التازى سيرته فى ذلك اليوم ولكن حققها فى مرات عديدة سوف أتطرق لبعضها .
طردة الحكم التانى كانت للعم طلب إدريس وهو أيضاً يصغرنى وإبن عمه عصام مضوى كان التمرين يوم الخميس وطلب يحكم التمرين فقط من وسط الميدان وهذه شرطه لا يجرى ويتابع الكرة !! فقبلنا بذلك !! والتمرين مسخن فجأة جاتنى ريحة سيجارة قوية !! تلفت وأدركت أن السيجارة فى الميدان !! فجئت بالقرب من طلب أثناء سير الكرة وتوقفت قريباً منه دون أن يشعر بذلك فإذا به ( غامت السيجارة وكل مره يشيل ليهو نفس بالدس !!) فقلت له وأنا جوارة تماما تدخن يا طلب فى الميدان وأنت الحكم !! ولم أنتظر رده !! فقلت له (جيييب الصافرة وأطلع بره كمل سيجارتك وتانى ما ترجع !!) وقد كان .
من عبارات التمارين والسيرات فى العام 86 كنت بجوازات مطار الخرطوم وكانت عندى جزمة أديداس خضراء وتريينغ أزرق شعار الهلال لما حان موعد التمرين لم أجد الجزمه ولا التريينغ !! لبست من القديم ومشيت التمرين لقيت لييك زوول ( ضييف لابس هدومى !!) سألت قلت ليهم ده منو ؟؟ قال لى شقيقى صالح مبارك ده ( خالد يوسف ) قريب السر مهدى زوج شقيقتى راضية عليه رحمة الله الذى توفى قبل 45 يوم !! جاء البارح من عطبرة وقال عايز يتمرن وأداناهو هدومك وهو بلعب فى الشاطىء عطبرة وجايى يقدّم الكلية الحربية !! وجدت للأسف صديقى التازى يعرف الكثير عن إمكانيات خالد يوسف الكروية المذهله فما أن بدنا فى الاختيار إلا وأختار التازى خالد يوسف وبدأ التمرين وظهرت إمكانيات خالد وأنا شخصياً قعدت أتفرج عليهو وقلت أكييد الزوول ده بعد إسبوع بنسمع بيهو فى الهلال أو المريخ !! غلبنى براهو 4 مقابل هدف !! وعندما أنتهى التمرين وبدأت السيرة وأنا مدخن والتازى يكورك جنبى ويقول لى ( ولا كلمة أربعة زى السم!!) فقلت له يا فاشل غلبتنى إنت ( أنا غلبنى الزوول اللابس هدومى وكدارتى دى والوقت داك إسمو ما بعرفو كويس ) !!!!!.
لم أتحل من هزائم خالد يوسف إلا بعد شهر عندما حضر صديقة وإبن عطبرة ولاعب الامل العطبراوى الفذ ( خالد التلب ) فأصبح يلعب فى فريقى وحقق التوازن المطلوب بل أن خالد التلب أستقر معنا بالسقاى لوقت طويل قبل دخول الكلية الحربية هو وخالد يوسف ( الدفعة 37 ) وخالد التلب لعب مع منتخب السقاى البتلاب فى دورة القرية الكثير من المباريات ومنها مباراة مشهورة مع الكدرو هزمناهم فى عقر دارهم خمسه صفر كلها أحرزها خالد التلب والذى كان وخالد يوسف من أميز لاعبى كرة القدم فى عطبرة والسودان ، فقد حرمتهم الكلية الحربية من النجومية والظهور فى كبرى الاندية ، الاخ خالد نزل من الجيش فى رتبة الرائد والاخ خالد التلب ما زال بالقوات المسلحة فى رتبة العقيد أحييهم وتمنياتى لهم بدوام الصحة وأحى كل الاهل بالسقاى البتلاب وكانت لنا أيام ونريد تعليقاتكم !! بس ما يجينى واحد يقول لى كنت (ديكتاتور !!! ) ولا والله بالعكس الحكميين كانوا يرددوا ( والله نستحق الطرد !!!).
|
|
 
|
|
|
|
|
|
|
|
Re: عندما قمت بطرد الحكم فى التمرين بالسقاى !!! فى الثمانينات من القرن الماضى !!!! (Re: munswor almophtah)
|
شكراً الاخوان منصور عبدالله المفتاح قريبى ، وطه الحاج كروم زميانا بالجيلى الثانوية وإبن الفكى هاشم !! ناس الفكى هاشم ديل كانوا فى السبيعنيات أحرف ناس فى شرق النيل !! والله سنة 1971م ناس الفكى هاشم ديل لعبوا مباراة ودّية مع السقاى السروراب أتذكر من ناس الفكى هاشم فتحى محمد الصادق الذى عملنا سوياً فى مطار الخرطوم وكان كبير ضباط جمارك المطار ، كان فتحى ثيردباك الفكى هاشم رغم قصر قامته إلا أنه كان صخرة دفاع تحطمت عليها كل هجمات السقاى السروراب بقيادة محمد سليمان وشمس الدين حسن سانكية وفى الدفاع المرحوم الاستاذ النصيح القاضى ، ما لفت نظرنا فى تلك المباراة أن لاعبى الفكى هاشم كان رابطيين ( كمون أسود ) على عضل أيدهم بصورة لم أشاهدها قبل أو بعد فى ملاعب كرة القدم !! عندما سألناهم وكان بينهم ( محمود ) قدامنا فى الكباشى المتوسطة وكان مهاجم خطيير !! قال لينا من العيين !! قالوا ناس السقاى بسحروا !!!! .
الاخ منصور تحياتى عبدالوهاب ميرغنى بخير لكن أعتزل الكرة مبكراً نوعا ما !! والتمارين توقف منها منذ بداية التسعينيات !! لعلك تقصد أبوالقاسم العوض صالح وهو الان عضو الاتحاد المحلى لكرة القدم ومراقب المباريات ورئيس لجنة التسجيلات بالاتحاد العام لكرة القدم ، أما التازى فهو التازى زين العابدين عبدالله حاج البدرى ( ود المادح زين العابدين عليه رحمة الله ) والتازى كان مشهور بعزف الايقاع ( البنفز ) مع السر البشير المطرب وااللاعب ومع عمر النورانى المطرب واللاعب أيضاً .
سوف أٌقدم لكم رابط الموضوع فى الفيس بوك لمزيد من التعليقات والاطلاع إن شاء الله .
| |
|
|
|
|
|
|
| |
بشرى مبارك ود السقاى
munswor almophtah
فيس بوك
تويتر
انستقرام
يوتيوب
بنتيريست