القصة بقت بايظة بوظ شديد وباكات شطر البقرة الحلوب التي كانت يرضع منها جربندوني اتجهجهت جهجهة ابراهيم عطا استوبر المريخ الشهير ..والنقاطة الكانت بس عاوزة ليها دقن (بكرت) و جكة جكتين في ميدان الفريق لزوم الدفاع الشعبي...ومعاها حبة تكبير وحبيتن تهليل عند اللزوم... النقاطة دي بقت في خطر جربندي زارته سحابة ولمحة فلاش باكية من انجازاته التاصيلية السريعة والشرتيت الذي تقاطر اليه منذ بدايات اكتشافه الية عمل (كل شي لله) وسرح بخياله الي اياماته الاولي في طريق الترطيبة التي هبطت عليه عندما رشحه (شيخ يس) لتولي ميز معسكر الدفاع الشعبي في المدينة التي كان يقطنها.
05-10-2014, 02:14 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
والله زمان يا شيخ( يس) لعبنا( ون تو) احرف ثنائي في الدوري البرازيلي ما يلعب زيو زيت مجاهدين كف نجرف -بصل مجاهدين لب لب- رغيف مجاهدين- دمورية مجاهدين- باتات مجاهدين- موية مجاهدين....كلو ذهب ما بين جربندي افندي وشيخ (0يس) فيفتي فيفتي.... نص يمشي لجموع للمجاهدين والنص التاني كروبات وفواتير كب فيها جربندي افندي موية تقيلة وكانت اولي الاشارات التي التقطها سريعا وعرف بان الناس الدقانة ديل بجي منهم خيرات وثمرات رطبا جنيا لو دفر معاهم في سكة الدقن دي....وساعد القصة بكم جزاك الله خير ...وكب في شخصيته كوز كوزين مع شوية تهليل وتكبير... واقتني جربندوني احلي دقن فاقت في طولها الان دقن عباس انصار السنة العامل فيها منقطها وابن كثير
05-10-2014, 02:19 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
كانت مرحلة البدايات وامطار الكروبات التي هطلت علي جرنبدي كافية لاشاعة البهجة في بيته الجالوصي ذو الاوضة الواحدة ودخلت البيت هذا ولاول مرة (اربعة غويشات) من الدهب المصقول والموضب عند احرف صائغ في المدينة...وعندما كانت المدينة تسمي تلكم الدقة الدهبية المميزة (دقة الترابي)....حلف وازبد وارغي اخونا جربندي افندي وهدد نفيسة زوجته بانه سيذهب بها الي غياهب الطلاق ان لم تشيع في المدينة بان هذه الدقة اسمها (جيبو حي)...!!!!
05-10-2014, 02:22 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
سريع سريع اصبح جربندي وهو الذي طرد من فصول الدراسة ذات زمان بعيد لكونه طالب فاشل يجلب البنقو الي فصول الحكومة واتهم بعدة تهم عجيبة في التحرش بالاطفال في سنة اولي ومحاولة العبث الشين معهم..ليطرده المدير الاسطوري (ود سرور) شر طردة وتلفظه كل مدارس المدينة الاخري لذات السبب ليتحول الي عاطل كبير يستمد اعاشته من والده ذلك الرجل العصامي الذي كان يعمل تزري فقير ولكنه مكافح اهلكته الاحزان عندما لم يجد ابنه جربندي سوي في طريق الضلال والاجرام
05-10-2014, 02:26 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
وكل يوم والتاني جايبو بتاع (كارو) من فريق النسوان الكعبات وهو ثملا منغشم نغشيمة ليها ضل... ليكافح والده ليلا ونهار ليزوجه من احدي النساء الطيبات التي اصابها الخلع والاندهاش عندما طل جربندي عليها ذات مساء وهو يحمل اربع من غويشات الدهب الما بغبباء عينها لدرجة اتهامها له بانه قد يكون نهب احدي المتاجر الدهبية ليلا...ولكنه عالجها بهتاف جادي مكبرا ومهللا..... دي الدقن ....دي الدقن يا زولة هوووي انا من نصيحة ولاشنو ياوهم.. ومن الليلة....الغريق قدام قداااااااااااام وليبيا فتحت وراجلك لقي ليهو شطر ابن لذينة والقصة واااااااااااااره....ومن الليلة يا وهم تجدعي الثوب ده وشوفي ليك خمار اقفلي وشك العامل زي الكبك ده...وبكرة اشوفك في المعسكر بتاع اخوات سعدية....
05-10-2014, 02:28 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: اي بالله يا كيكي من الزمن التفتقات الفكرية الأولى وخرابيط المشروع الرسالي من شاكلة حلفتي يا نفسي مرورا بـ هي لله
والزوغة المبكرة لشيخ الحلة حتى مرحلة التحلل الأصغر وبإذن الله التحلل الأكبر ولما تجي مرحلة التحلل الأكبر دي تجيب معاك
هلا حمد وحياك الغمام يااخ وتكبير... الله اكبر تهليل.. لا الله الا الله تحليل... حلني يا الخضر نعم مخرجات (وحلوة مخرجات دي).. مخرجات المشروع الحضاري في كل مرحلة من مراحلها عاوزو ملقاط ومنقاش و عبر جربندي سنجتهد ان نلقي لها براااح واسفرة فيني كوز لعبو في الأرض السودانية ماتشات عجيبة وملونا فقر شديد ياااخ
05-10-2014, 02:34 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
سريع سريع عربية الطوب والرملة والابواب الحديدية الفور ويل درايف هطلت علي بيت جربندي...وشوية شويةاتوضب صالون ابن لذينة...ودقن جربندي ماشة في سكة اللبع تمد وتطورت علاقاته الي ضابط المجلس وامير المجاهدين البجي من الخرطوم ودقاني خاشي ودقاني مارق من صالون جربندي الذي تمدد الان واصبح هو رجل المرحلة التي عليها تفريخ محاربين ومحاربات بالذهاب بهم الي العمليات وحبة حبة فضي له الجو بموت شيخ (يس) في الحرب الجهادية واصبح هو الكل في الكل تربيع ليعالج سطوته ويحي ذكره فردة باكه اليمين (يس) بزواج سريع وعاجل لزوجته استخلافا وطمعا في الفيفتيات القبيل كان شيخ (يس) يكابسه فيها
05-10-2014, 02:38 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
يا جربندي ياخي ما ارح معنا الجنوب... هيييع انا زول من جهز غازيا فقد غزا فخلوني يا اخواني في الله في هذه الابتلاءات وخلوني اعد لهم من رجال وقوي ورباط خيل...والله اكبر الله اكبر.. عندما شالته الهاشمية ذات يوم من ايام حضور الزعيم الكبير الي دائرة اختصاص جربندي الجغرافية وشاف بام عينه معنويات المجاهدين فوووووووق والتكبير كان عنانه السماء واختلطت تكبيراته مع تكبيرات الشيخ الكبير الجاي من الخراطيم مع تكبيرات المجاهدين فكر وقرر سريعا جربندي الذي هو الان شيخ جربندي ان لايفوت هذه السانحة التي يمكن ايضا ان يجي منها وفير المال العام والخاص فقرر بانه سيقود جموع المجاهدين وتوريت توريت يا ارض الفداء اقسم جربندي ان يجعلها ارض للعداء كان هذا هو شعار جربندي الذي عصر فيها علي روحه وقدمها الان رخيصة من اجل الدين ظاهريا ولكن باطن الامر رغبة في مزيد من الكروبات والسفسفة ورا المشية القلبو ما كان دايراها دي لكن يسوي شنو ياخي مع الشيخ الكبير الفقررررررررري ده......
05-10-2014, 02:42 PM
نعمات عماد نعمات عماد
تاريخ التسجيل: 03-08-2014
مجموع المشاركات: 11404
كان يوم تحرك جربندي من المدينة هو يوم للوصايات واظهار المغتغت في ثروته التي لملمها من مرحلته الاولي في سكة اللبع..ووصي بالحواشات والدكان الناصية القاعد فيهو عبود ود اختي ده حقي و الطاحونة الفي فريق ورا حقتي والدكان الفي فريق الاندايات تبعي...وانداية بت شلخة برضها حقتي...وابقي عليها عشرة يا ابوي لحدي ما اشوف لي صرفة مع الجهاد ده واجيكم نابل....ووب عليك يا جربندي من ناس كتيبة جاموس وكتيبة زعلان القالو بلقطو من طرف ديل. هكذا ودعته زوجته وهو مكفهرا ميمما وجه شطر الجهاد الذي صار لا مفر منه الان..!!!!
05-10-2014, 02:57 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
عندما وقع المتحرك الذي كان بين صفوفه جربندي مزرقنا بين كمين من الكماين التي نصبتها (كتيبة زعلان) واختلط الحابل بالنابل تحت وابل رصاص الدوشكا والقرنوف والاربجيهات (والبي تو تونتي وهاجة) لم يجد جربندي ادني طريقة من مقاومة (الياااع )والرغبة في الشتات ولكن الامر اصبح له شينا وقاسي وصعيب ..فداااااااك شيخ فلان مضروب دانة مفرطاقهو قطعة صواميل للمجاهدين تاني ما ينفع...!!! وياهووو داااك فلان الفلاني مضروب ومفرطق الراس وكيف له ان يطلع من هذه القبضة الثمينة (حرب الكفار) الرعاديد دون عاهة مستديمة وجرح غائر يمكن ان يساعد في الايام اللاحقة في معركة لملمة الثروة وحور عين الدنيا...!!! فخش تحت اقرب (شجرةلالوب) وادي المجاهدين ضهرو ورشا روحو واحدة طلقة سلاخية زي السم في (الرجل الشمال) وليجري سريعا صوب المعسكر بطريقة (الهرك) الشهيرة او( الشدت) راجعا الي صفوف الجرحي ومدعيا بانه ضرب في مقتل ولولا القرود الاثنين اللائي هبطا من( شجرة لالوب) مقاربة لمكان ضربه بواسطة الكفار وليحملا ه الي مكان الجرحي....!!! وتعالت الصيحات الله اكبر الله اكبر وليصبح ومنذ ذلك التاريخ اسم الشهرة للشيخ جربندي هو (الشيخ الشالتو القرود)..هيييييييييييع ...!!!!
05-10-2014, 03:10 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
وعاد جربندي موشحا بسيرة بطولات زائفة وجد لها من بين المطبلين ثوما وشمار وثلجا كاد هو ان يصدق بل عندما يجد مساحة وزمن وساحة للجاكة يردد بان القرود التي شالته قد قالت له حرم يا شيخ جربندي لوما احنا كقرود سماوية عارفين انو الدنيا لسع محتاجة ليك عشان تعمرها وتحول الارض البور البلقع الي جنة نضيرة كان شلناك يا جربندينا الي الفردوس ونعيم..
05-10-2014, 03:12 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
مشية جربندي تلك كانت هي الاولي والاخيرة فقد قرر بينه وبين نفسه وبعد ماراي من الدماء والقرنوف البفرطق البني ادميين حتت حتت والالغام التي تنبل من حيث يحتسب ولا يحتسب قرر( تاني جهاد نهيييي) ويلقوها عند الغافلين الدقانة مجرمين ديل... وساعتها كانت اليته الي الالتفاف هو تغيير التخصص والرمي قدام والبحث عن مورد (كجمة) تاني بعيدا من مدارات حاربو واقتلو وجهزو غازي قد غزا دي.... فقرر تنويع اللعب والدخول الي عوالم البندر والرمي قدام في الخرطوم محل الطيارة بتقوم والشيخ ابودقن كبيرة بنوم...!!! فاصبح الان بعدما كان دمورية مجاهدين لب لب في الماضي .... اصبح الان الشغل بنية تحتية...طرق وعطات لب لب... شركة اتصالات عاوزة تصديق عشان الناس تقول عبرها (الوو) جربندي جاهز موية ونور لب لب عبر تسهيلات من مكتب الوزير شخشييا صينين عيونهم صغااااااااار عاوزين يحفروا ليهم بير بيرين في البترول جربندي جاهز موية ونور وبقشيش تقيل بكرة الصيني يجيب حفارتو ويدور حفر ..ما ضروري يلقي ليهو بترول او ما يلقي ..ولكن المهم في الامر انو جربندي ياخد حقو كاش ويقلل النقاش
05-10-2014, 03:38 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
وعاد جربندي موشحا بسيرة بطولات زائفة وجد لها من بين المطبلين ثوما وشمار وثلجا كاد هو ان يصدق بل عندما يجد مساحة وزمن وساحة للجاكة يردد بان القرود التي شالته قد قالت له حرم يا شيخ جربندي لوما احنا كقرود سماوية عارفين انو الدنيا لسع محتاجة ليك عشان تعمرها وتحول الارض البور البلقع الي جنة نضيرة كان شلناك يا جربندينا الي الفردوس ونعيم..
مشية جربندي تلك كانت هي الاولي والاخيرة فقد قرر بينه وبين نفسه وبعد ماراي من الدماء والقرنوف البفرطق البني ادميين حتت حتت والالغام التي تنبل من حيث يحتسب ولا يحتسب قرر( تاني جهاد نهيييي) ويلقوها عند الغافلين الدقانة مجرمين ديل... وساعتها كانت اليته الي الالتفاف هو تغيير التخصص والرمي قدام والبحث عن مورد (كجمة) تاني بعيدا من مدارات حاربو واقتلو وجهزو غازي قد غزا دي.... فقرر تنويع اللعب والدخول الي عوالم البندر والرمي قدام في الخرطوم محل الطيارة بتقوم والشيخ ابودقن كبيرة بنوم...!!! فاصبح الان بعدما كان دمورية مجاهدين لب لب في الماضي .... اصبح الان الشغل بنية تحتية...طرق وعطات لب لب... شركة اتصالات عاوزة تصديق عشان الناس تقول عبرها (الوو) جربندي جاهز موية ونور لب لب عبر تسهيلات من مكتب الوزير شخشييا صينين عيونهم صغااااااااار عاوزين يحفروا ليهم بير بيرين في البترول جربندي جاهز موية ونور وبقشيش تقيل بكرة الصيني يجيب حفارتو ويدور حفر ..ما ضروري يلقي ليهو بترول او ما يلقي ..ولكن المهم في الامر انو جربندي ياخد حقو كاش ويقلل النقاش
05-10-2014, 03:47 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
بيت الجالوص الكان في مدينته تحول اليوم الي قصر منيف في حي من احياء الخرطوم الترطيبة وجربندي يحصد ثمار جهاده ووااااااااااااره معاه وره تقيلة... والتلفزيون شغال وصرح المجاهد الشهيد الذي يمشي بيننا جربندي بان الامور كيت كيت وزار الوزير المنطقة الفلانية العلانية وكان في صحبته المجاهد جربندي ....... وكانت زوجته الرابعة احدي بنات الاسر التي كابسها جربندي في سوق السيخ والاسمنت ..مجاهدة زينة وحجابها وارد ايران ولكنها تفتيحة تمارس التجارة ما بين السعودية ودبي ولندن كمان....يا وجععععع وكلا بدولارات جربندي التي هطلت عليه السماء دولارا يورو وفرنكا وين وقروشات وارد شنغهاي
05-10-2014, 03:50 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
واما زوجته نفيسة ام العيال فلاتزال في مكانها القديم في ذلك البيت الذي اهلته واخرجته ضربات خطاوي جربندي الاولي من الجالوص الي مدارات الطوب الاحمر والصالون الوثير تمارس مباصرة معيشة اولادها من الدكان والانداية التي تركها جربندي دون ان يحاسب صاحبتها حساب منكر ونكير كما ا كان في ايامه الاولي تلك وهو حفتانا يحاسب حتي علي شدة اليوم واليوم التالي......وحتي المشك كان له فيه رايا عندما يباع الي غنم مدير المدرسة....!!! جربندي في كل صولاته الجهادية والقروش التي نزلت عليه كالامطار والمقيلة مع الوزير الفلاني والسفر مع الشيخ الفلاني لموتمر نصرة فلسطين في بلاد وين كده ماعارف..وموتمر تطوير وتنمية البنية التحتية في حزام ماخلف الصحاري العربية والاسلامية ووصل جربندي بملحسته حتي ابواب (ابا كبير) شخشيا الذي اعجبه سخاء ومجاهدات جربندي وصار مصدر ثقة ....ومراسيل دولية علي التقيل...
05-11-2014, 03:01 PM
احمد الامين احمد احمد الامين احمد
تاريخ التسجيل: 08-06-2006
مجموع المشاركات: 4782
رجعت بهذا البوست إلى أجواء شبيهة جدا بتلك التى مكنتك من كتابة بوست : كمبو الرى وهو أجود ماكتبته ضمن جملة ماكتبت .
لفت نظرى إسم (أبا كبير ) فيبدو أن أسماء الطفولة تلك التى سمعتها بتلك القرية على تخوم السافنا الغنية بتلك (البادية ) لازالت تعشعش فى ذاكرتك رغم طول الغربة شرقى المالح .
Quote: رجعت بهذا البوست إلى أجواء شبيهة جدا بتلك التى مكنتك من كتابة بوست : كمبو الرى وهو أجود ماكتبته ضمن جملة ماكتبت .
لفت نظرى إسم (أبا كبير ) فيبدو أن أسماء الطفولة تلك التى سمعتها بتلك القرية على تخوم السافنا الغنية بتلك (البادية ) لازالت تعشعش فى ذاكرتك رغم طول الغربة شرقى المالح
هلا احمد وحياك الغمام.. و يا حليل ايام كمبو الري يااخ وتاني مع ناس ايوتا وبيبو ديل مافي لينا مساحة وزمن عشان نجضم الكيبورد او كما كنا في الماضي...
قف.!! الاهزوجة المفضلة عند ايوتا وبيبو هي تيلم تيلم .. تيلم دانجو ضاربين من اجلها (توم اند جيري) وكل خرابيط الفرنجة الكرتونية...(وايوتا قاعد تردد دانجو سقرقر.... زي كم مرة كده في اليوم) -- نعم ابا كبير سليلة ذلك العهد القديم في نواحي دينقا ومن المفردات المشابهة التي اعتقد بانها ملهمة هي مناداة اهل حوش الجد يوسف دودو له بلقب (ابيية) ماعارف المنشاء والاسقاط التاريخي والتسمية دي جااية من ووين (can you help)
يا جربندي بالله تعال امشي لينا البوسنة وشوف لينا حكاية الهرسك دي شنووو..!!! ياجربندي بالله ناس جزر القمر ديل بالله دايرين نعمل معاهم تكامل اسلامي افريقي يا جربندي بالله بكرة من الصباح دغش تمشي لينا امريكا تشوف فلان فرخات ده وتعمل لينا الية عمل اسلامي افروامريكاني يا جربندي بالله شوف معاك الهند دي حكايتها شنو من باكستان وارفع لينا تقرير... يارجربندي بالله شوف ي لينا ناس غزة واريحة ديل حكايتها شنو من ناس رام الله..!! ليصبح الشيخ جرنبدي رسولا للمحبة و مبشرا بالاسلام في ربوع العالم والقصة مشت معاه مشية السنين ما بين سفرة وسفرة كان هناك (عطاء) وكجمة كجمتين في انتظار جربندي الشالتو القرود... وفي سفراته تلك عادت الي حليمته عادته القديمة التي لم يستطع مقاومتها ليلا في السودان ونهار جهارا في سفراته الي كل اركان العالم المختلفة فقد زار جربندي معظم دول العالم وان رايت ليلا في احدي المراقص الملحقة بالفندق رجلا يرتدي بنطلونا من الجينز و(فانلة كت) ويراقص فتاة غراء فرعاء شحمانا هو جسمها وملتقص معها التصاق ماكوكي لصقوي امريكاني فان ذلك الرجل هو شيخنا جربندي يمارس الرقص الرسالي...!!!
05-12-2014, 10:23 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
هذا ماكان في شان الخارج واما داخليا فان جربندي ما بتفارق لياليه نصيته الشهيرة تلك التي الهمته موضوع الانتهاز عبر الدفاع الشعبي في ايامه الاولي في فريق ورا..وكانت كل صباحاته الخرطومية لابد لها ان تبداء بسيجارة من الصنف الذي صار اكثر جودة ومقدرة علي التسطيل يحرص جربندي ان تكون بكرت وسط عطور وارياح نفاذة استطاع جلبها من بلاد برة,,,...!!! جربندي الان مشاريع في الدمازين الطير ياكل فيها سنة ونص ويخلي العيش راقد هبطرش جربندي مشاريع في القضارف وعصارة زيت في النهود جربندي مصنع اثاثات في سنجة جربندي شركة جربندي الاسلامية للاستيراد والتصدير الاسلامي سفريات جربندي الاسلامية الخرطوم –كوستي وبالعكس مجمع جربندي السكني الاسلامي يرحب بكم واشتري شقة واحصل علي لابتوب وسيارة كرسيدا مجانا
05-12-2014, 10:28 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
كل هذه السحابات والاموال والاملاك المنتشرة في ربوع السودان المختلفة والقروش الهبطرش التي رقدت في بنوك بلاد جووه وبره...بكل هذا الارث الكبير والثروة المطر استقبل جربندي افندي نضمي نسوان الجنائية الاثنين( الشمطانات الغلف) هكذا ردد جربندي عندما راي ذلك بدايات الموتمر الذي نضمت فيهو النسوان الاثنين ديل بسيرة قبض الريس....!!! صهيونيات عذبات مقاطيع طاري يهوديات ######يات هي النغمة التي كانت يرددها جربندي افندي وحس بحسه الامني وشوية الثقافة الدولية التي لقطها من مباراته للوزير الفلاني والرسالي علان العلاني بان الموضوع ده كبير خلاص وانو الخواجة ابن اللذينة الارجتيني الصهيوني بتاع النسوان اوكمابو ما داير يجيبها البر....وحيقبض زولنا ده حيقبضوا.... ويصبح كجربندي في راسه ريشة لبع وضرب قروش الميري في امر ضيق ...!!!
05-12-2014, 10:30 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32523
وتتواصل تداعيات جربندي في غضبته الكبري علي الارجتيني الممسوخ سليل الامبريالية العالمية الكوندليز رايسية...الكولن باولوية...!!! وهو يردد معقولة....!!! معقولة ياربي
بكرة(ابا كبير) يشيلو لاهاي وضهرنا كجربندية يكون مكشوف ويجونا ناس اعتقد وافتكر والمال العام والثراء الحرام ومن اين لك ذلك وناس كذلك حيث انو ايضا..ويقلعو مني المال والبنون زينة الحياة الدنيا.... معقولة يا ناس...!!!! لعععع يا زول والف لععععععع..!!! انا جربندي (الشالتو قرود) حرم اقيف ديك احمر وجن احمر وحرم اوكمابو ده الا الاقيهو عريان ميطي والرهيفة تنقد وحرم يفرزونا بالشورتات والمجتمع الدولي يقول ده شورت اوكمابو وده شورت جربندي ونعود ولكن بعد الفاصل
05-12-2014, 11:31 AM
محمد جمعه الخير محمد جمعه الخير
تاريخ التسجيل: 01-16-2013
مجموع المشاركات: 442
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالكريم الامين احمد
حمد عبد الغفار عمر
نعمات عماد
احمد الامين احمد
محمد جمعه الخير
فيس بوك
تويتر
انستقرام
يوتيوب
بنتيريست