اتحدث اليكم من واقع الناس الجات مجانا للعمل في شركتنا شباب سوداني قام بالتقديم من السودان واعتمدوا اوراقهم بالشركة ورسلوا ليهم الفيز حقتهم وتم خصم 2000 ريال فقط من رواتبهم لزوم التاشيرة وحق مكتب السودان المهم الشباب ديل وصلوا الى فروع الشركة بالسعودية للعمل كسائقين وامناء مستودعات الراتب 2000 ريال مع السكن وتامين طبي وتذاكر طيران ذهاب واياب واجازة مدفوعة الراتب والراتب بعد سنة هنالك زيادة بنسبة 5-12% اها المهم الشباب ديل وصلوا وفاكرين السعودية زي شغلة السودان تبطح ونوم اتفاجأوا بان الشغلانة دوامين وسفر وعصر وما في يمة ارحميني وما مر شهرين الا وكل واحد فيهم عاوز يقدم استقالتوا وفاكرين دخول الحمام زي خروجه ونسوا او اتناسوا انهم و قعوا عقد وشروط جزائية وبدأوا بافتعال المشاكل ويعملوا من الحبة قبة وعطلوا العمل في بعض الفروع وكثرة شكوى المدراء منهم على عكس الجنسيات التانية الامر عاليه ما هو فقط الامر المهم بالنسبة لي وانما الامر المهم وهو في غاية الاهمية بجيكم برواقة ..........
08-10-2014, 05:18 PM
على محمد على بشير على محمد على بشير
تاريخ التسجيل: 08-07-2005
مجموع المشاركات: 8648
Quote: Faisal Mohamed Ahmed الاخ عبد السلام قبل ان تاتي برواقة للمهم او الاهم كما تقول انت تتحدث عن مجموعة يعني ناس كتار فما اظنهم يكونوا كلهم كما تقول عايزين يتبطحوا ويناموا يبدو ان في الامر شئ من الدوافع او الاسباب المنطقية التي جعلت اكثر من واحد يتقدموا باستقلاتهم فما هي تلك الاسباب من وجهة نظرهم هم حتى نقرر مين هضم حق التاني السودانيون والله شركتكم ؟؟؟؟؟؟؟؟؟؟؟؟ظ
اخونا فيصل من الفيس تحية واحترام الاسباب انه الشغل صعب... وما كنا قايلنه كده و الجابوهم سواقين يقولوا ليك الشغل عتالة واحنا جينا سواقين بس...نقوم نقول ليهم خلاص ما تشيلوا ولا تحملوا خليكم مع الدركسون بس بكرة يجيك بي فيلم جديد انه عاوز في كل مشوار يطلع فيه مبلغ مالي تقول ليهو العقد بتاعك ما بقول كده يقوم يعمل مشاكل مع العمال ويحرض ليك السواقين التانيين من الجنسيات الاخرى وهم بيشيلوا ويعتلوا ويسوقوا ويسافروا وما في واحد بيقول بغم والجابوهم امناء مستودعات يقولوا ليك الريحة بتاعت المنظفات بتعمل ليهم حساسية و التحميل والتنزيل المهم تجيهم بي هنا يجوك بي هناك وبحكم انهم سودانيين بتحاول تساعدهم ولكن للاسف توصل دايما لطريق مسدود
للامانة معانا واحد جاي سواق ده يضربوا بيهو المثل في التفاني في الشغل وما بيعمل مشاكل ابدا اها ده عنده مسئولية وعنده اقساط بيت في ام درمان بيرسل يسدد و عنده مصاريف ناس بيتهم ملتزم بيها شهريا اها النوعية التانية تقعد معاهم يشبكك انا في السودان كنت بدخل في الشهر بالميت تلاتة مليون بالقديم..وشغلي كان مريح وانا وانا.... طيب الجابك شنو يقول ليك قلنا نجرب السعودية وهنا المصيبة البتكلم عنها ........
الشركة في الفترة الاخيرة اصبح توجهها الى السودان للسواقين وامناء المستودعات والواحد بيعتبرها فرصة لشبابنا انه يحسن دخله واخص بالذات الناس القاعدة عواطلية غصبا عنها وما لاقيه شغل بمعنى ما لاقيه شغل اها النوعية بتاعت جايين نجرب ديل ومذبذبين لكن بحكم انه الفيزا شبه مجانية جوا السعودية اها ديل خيربوا على اخوانهم القاعدين في السودان فالشركة ممكن تتجه تجيب سواقين وامناء مستودعات من مصر مثلا وبرواتب اقل 1500 ريال ويجيك المصري وهو مستعد يتحمل كل حاجة وحتى الاهانة والمذلة وبعد ده يديك شغل افضل من السوداني الرافع نخرته اكتر من اللازم او تتجه الى بنغلاديش والهند والنيبال ورواتبهم لا تتعدى 1200 ريال وغير حاضر ونعم ما عندهم حاجة فالنصيحة العاوز اقول للناس الجايين البلد دي انه اذا انت ما محتاج للعمل في السعودية وجي تجرب فرجاء ما تجي وتبدأ تتمرد على العمل وتسبب مشاكل للناس هنا... مع طحن الشغل ما في زول فاضي غير للشغل والانتاج فمع النماذج عاليه اكيد ديل خيربوا على اخوانهم المحتاجين لانه بعد الشفته ده اكيد الشركة ستعيد النظر في العمالة السودانية (انت ما مستعد للعصر بتاع السعودية ما تجي تخرب على الناس القاعدة في السودان) وده الكلام البقولوا للشباب المعانا الان بيدوك راتب عاوزين يخلصوا حقهم منك لاخر هللة ده لو انت جيت على شركة محترمة زي الشغالين فيها حاليا طيب لو الواحد فيهم جاء على كفالة فرد ولا مؤسسة اكيد حيدق السعودية او يهرب من العمل
08-11-2014, 06:20 AM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
عبدالسلام سلام وتحية شايفك متحامل شويه علي السودانيين ليهم الحق اتمردو حسب المعلومات القلتها فوق الراتب 200 ريال وفيها سفر ما دام الراتب 2000 ريال وسفر معناها رخصة عامة وحسب سعر السوق السواق السوداني للرخصة العامة 4000 ريال راتب ونثريات سفر لو هو مشتري الفيزا اما لو نفقات الفيزا علي الشركة المستقدمة لا يقل عن 3000 ريال ونثريات سفر بالاضافة للمخصصات الاخري بغض النظر عن راتب الهندي او غيرو وما برفع كرتونه من الواطه العتاله شغل براهو ليهو ناسو السودانيين الذين يحملون رخصة سواقة عامة يعملون في البرحة بالدينا وممكن الواحد في الشهر اصفي ليهو 8000 ريال بالمختصر شركتكم خمت الناس ديل وبعد ما جو هنا اكتشفو الحقيقه سعر السوق يختلف من التعاقد وقعدو ابطبطو والشركات التي تملك الفيز دائما تستغل العمالة الوافده ونوع كلامك البتقول فيهو ياهو نزل سعر الوافد السوداني كلو بي سعرو في السوق ومن حق العماله السودانيه تطالب بسعر السوق بعد معرفة الغش من الشركة المستقدمه والمسألة ليست بتبطح وغيرو والتنازلات الياها الغطست حجرنا تحياتي وتقديري
08-11-2014, 06:32 AM
usama Babiker usama Babiker
تاريخ التسجيل: 01-07-2013
مجموع المشاركات: 2285
Quote: عبدالسلام سلام وتحية شايفك متحامل شويه علي السودانيين ليهم الحق اتمردو حسب المعلومات القلتها فوق الراتب 200 ريال وفيها سفر ما دام الراتب 2000 ريال وسفر معناها رخصة عامة وحسب سعر السوق السواق السوداني للرخصة العامة 4000 ريال راتب ونثريات سفر لو هو مشتري الفيزا اما لو نفقات الفيزا علي الشركة المستقدمة لا يقل عن 3000 ريال ونثريات سفر بالاضافة للمخصصات الاخري بغض النظر عن راتب الهندي او غيرو وما برفع كرتونه من الواطه العتاله شغل براهو ليهو ناسو السودانيين الذين يحملون رخصة سواقة عامة يعملون في البرحة بالدينا وممكن الواحد في الشهر اصفي ليهو 8000 ريال بالمختصر شركتكم خمت الناس ديل وبعد ما جو هنا اكتشفو الحقيقه سعر السوق يختلف من التعاقد وقعدو ابطبطو والشركات التي تملك الفيز دائما تستغل العمالة الوافده ونوع كلامك البتقول فيهو ياهو نزل سعر الوافد السوداني كلو بي سعرو في السوق ومن حق العماله السودانيه تطالب بسعر السوق بعد معرفة الغش من الشركة المستقدمه والمسألة ليست بتبطح وغيرو والتنازلات الياها الغطست حجرنا تحياتي وتقديري
ابصم بالعشرة ... ياخي اذا كان الراعي بياخد 2000 وماكل شارب ساكن .... سواق من المفترض علي اسوأ الفروض ياخد 3000 ريال غير النثريات .... المشكلة ياحبيب في شركتكم مافي السودانيين ...
08-11-2014, 06:39 AM
محمد عوض الله علي محمد عوض الله علي
تاريخ التسجيل: 05-12-2014
مجموع المشاركات: 80
بحكم عملنا في إدارة الموارد البشرية، يمكننا القول أن شروط التعاقد لم تكن واضحة من قبل، هنالك مصروفات سفر تحسب على الكيلومتر ، تتراوح بين 10 - 15 هللة للكيلومتر الواحد، تدفع للسائق بدون أجر إضافي في السفر ، هذه العملية استحدثناها لشحذ همم السائقين وتشجعيهم على السفر والعودة بسرعة دون التسكع والتلكؤ في الاستراحات... النتيجة كانت رغبة كثيرين في التحول إلى مهنة السواقة ...
ثانياً ... العمل في المستودعات يجب أن تتم فيه اشتراطات بعينها، فلو كان العمل في مجال المنظفات، هنالك كمامات يمكن لبسها، ولا بأس من بدل بسيط يجعلهم يقبلون...
ثالثاً.. على هؤلاء الأخوة احترام تعاقداتهم دون خلق بلبلة ، ولا أدري حقيقة شروط العقد، ولكن يبدو أن الشركة اخذت كافة احتياطاتها ، وأن هنالك شروط قاسية، علماً بأن العقد محدد المدة ولا يزال في بداياته..
رابعاً.. يا ريت لو تجلسوا معهم انتو كسودانيين وتقربوا وجهات النظر ، علماً بأن الجميع يرغب في تخفيف شدة الفقر لدينا هنالك ولكن في غير ضرر..
لك الود وانت تفتتح هذا الخيط
الشغيل
08-11-2014, 07:02 AM
طارق ابراهيم ابوالفضل طارق ابراهيم ابوالفضل
تاريخ التسجيل: 01-28-2013
مجموع المشاركات: 461
من المفترض أن تكون المسالة من غير (مجاملة أو تحامل) الفاصل هو العقد ، حيث العقد شريعة المتقاعدين . وكثير من الأخوة يأملون المخارجة من السودان وبأية صورة وحينما يصلون يصطدمون بالواقع ، وهنا يبدأ التملص والتراجع , عليهم أن يتحملوا ظروف العمل حتى نهاية العقد ، ونسأل الله أن يصبرهم على تحمل الشدائد .
Quote: المشكلة ياحبيب في شركتكم مافي السودانيين ...
Quote: اولاد بلدك لشئ في نفسك . لأنو لو الراتب 2000 زي ما قلت ما بتنصح ليك زول يجي .
Quote: كلام اخونا عباس في محله ومافي داعي للزيادة عليهو
2000 ريال كان ممكن لحد سنة 1995، بعد داك السوق بقى ما برحم
ومن هنا نرسل نداء لاصحاب المكاتب في السودان، ارفعوا المرتبات للشباب السودانيين الجايين يعقود
الورطه دائما بتجي للناس من تجار الفيز والشغال مع كفيلو وبقول ليهو بجيب ليك عمالة من السودان رخيصه صاح الناس هناك ضاربها السلك وعدمانه وشغل مافي الواحد لما تقول ليهو 2000 ريال بقولبا بي السوداني وما عارف البلد هنا غاليه ومستوي المعيشه مرتفع قبل فترة الاهل جو من السودان مشينا هايبرد بنده للتسوق عربية التسوق غالبيتها ماكولات اطفال زي نوتلا وجبنه سايله وغيرو باعتبار انو الحاجات دي فارغه في السودان عند الكاشير الحساب طلع 1200 ريال طوالي الجماعه قولبوها بالسوداني طلعت 3 مليون باعتبار دي زيارة من زيارات التسوق في الشهر ختو يديهم في راسهم غير مصدقين واحد قال لي الاولاد ديل وديهم السودان واقع العزابه وحلة ((بني كربو)). نرجع لي الشباب الببلبطو لما اجو هنا الواحد بكتشف وجبة الكبسة بي 15 ريال وعشان تنهضم عايزه ليها ببسي بي ريال ونص ومع السخانه الطاقه في الراس كل ساعه عايز لسهو زجاجة مويه بي ريال يعني ممكن في غدوه تعبانه اصرف بالسوداني اكثر من 40 الف بالقديم هنا الورطه. اتذكر الوالد جاي من السودان معاهو الوالده بي قطر لزيارة اختنا ومنها السعوديه وكان معاهم نسيبنا اول مرة زيارة لدول الخليج الوالد بقدم ليهو في نصيحه من مطار الخرطوم قال ليهو يا فلان بطنك تمبلها مويه امكن الاجراءات في مطار قطر تتاخر حتي نطلع لي الاولاد بره اصلو البد ديك ما فيها مويه لي الله.
تحياتي يا ركس ما كل الناس عندها الإمكانية تطلع وتشتري ديانا ب 70 - 80 ألف ريال ... فيبقى خيار العمل الحر دا محصور لفئة قليلة ..
بالنسبة لمرتب (4000 ) ريال لسائق عمومي ... لا أعتقد أنه موجود بكثرة ... تتراوح المرتبات عموماً بين ( 2000 ريال - 3000 ريال ) وما زاد هو استثناء
ممكن يكون مرتب إجمالي شامل الإضافي ونثريات الطريق ، أما أساسي فلا أظن أن يصل لهذا المبلغ
أذا كان المحاسب يعمل بمرتب أساسي 4000 ريال في حال كون خبرته ما دون الثلاث سنوات .. شركة المنجم استقدمت سائقين وكتبة حسابات وعدادين للنقد والمرتبات ( 2000 ريال - 2500 ريال ).. مع توفير السكن والإعاشة والنقل..
أمر تحديد المرتبات مسألة عرض وطلب .. ومقارنة ...وحسب وضعية الشركة ذات نفسها وميزانيتها ..
الشغيل
08-11-2014, 08:58 AM
Mohammed Abuzaid Mohammed Abuzaid
تاريخ التسجيل: 01-16-2013
مجموع المشاركات: 619
طالما انك ارتضيت من السودان بعقد معين وبشروط مبينة وموضحة وفترة زمنية معروفة ووقعت عليه
كتير من الشباب بيكون عايز يتخارج من السودان نسبة للظرف الحاصل . . . فما يهتم لما يلقى عقد او فيزا انو يراجع بنود العقد ويناقش ويعدل فيها . . . ولما يصل ويبدأ العمل ويفاجأ بأن الرواتب في السوق اعلى من راتبو يبلبط
ولا يعني انك جيت بمهنة معينة انك تشتغل في خلاف مهامك المحددة.
اذا مهنتك ( سائق ) من حقك اذا طُلِب منك شغل تاني انك ترفض او تشتغلو بمقابل.
ناسنا بيخونهم التعبير عن عدم رضاءهم بالواقع بإنفعال زائد عن حده ممكن يودي الواحد في ستين داهية تحريض الاجناس التانية ممكن تجيب اللوم . . . نحن بحسن نيتنا ( وخصوصا عند الانفعال ) ممكن نتكلم, وممكن كلامنا ده يشيلو غيرنا من الجنسيات ويوصلو لاصحاب العمل بصورة مخالفة للواقع.
السفارة والقنصلية بتدخل في مثل هذه المشاكل لتحل وتحسم الامور.
طالما انك ارتضيت من السودان بعقد معين وبشروط مبينة وموضحة وفترة زمنية معروفة ووقعت عليه
كتير من الشباب بيكون عايز يتخارج من السودان نسبة للظرف الحاصل . . . فما يهتم لما يلقى عقد او فيزا انو يراجع بنود العقد ويناقش ويعدل فيها . . . ولما يصل ويبدأ العمل ويفاجأ بأن الرواتب في السوق اعلى من راتبو يبلبط
ولا يعني انك جيت بمهنة معينة انك تشتغل في خلاف مهامك المحددة.
اذا مهنتك ( سائق ) من حقك اذا طُلِب منك شغل تاني انك ترفض او تشتغلو بمقابل.
ناسنا بيخونهم التعبير عن عدم رضاءهم بالواقع بإنفعال زائد عن حده ممكن يودي الواحد في ستين داهية تحريض الاجناس التانية ممكن تجيب اللوم . . . نحن بحسن نيتنا ( وخصوصا عند الانفعال ) ممكن نتكلم, وممكن كلامنا ده يشيلو غيرنا من الجنسيات ويوصلو لاصحاب العمل بصورة مخالفة للواقع.
السفارة والقنصلية بتدخل في مثل هذه المشاكل لتحل وتحسم الامور.
للاسف السفارة والقنصلية عندنا للتحصيل فقط لا غير
تحياتي للجميع
محمد ابو زيد تشكر يا غالي كلامك في محله العقد شريعة المتعاقدين
Quote: من المفترض أن تكون المسالة من غير (مجاملة أو تحامل) الفاصل هو العقد ، حيث العقد شريعة المتقاعدين . وكثير من الأخوة يأملون المخارجة من السودان وبأية صورة وحينما يصلون يصطدمون بالواقع ، وهنا يبدأ التملص والتراجع , عليهم أن يتحملوا ظروف العمل حتى نهاية العقد ، ونسأل الله أن يصبرهم على تحمل الشدائد
تشكر ولياب على اننا متفقين تماما في الراي احترامي يا غالي
Quote: من المفترض أن تكون المسالة مجاملة أو تحامل الفاصل هو العقد ، حيث العقد شريعة المتقاعدين . وكثير من الأخوة يأملون المخارجة من السودان وبأية صورة وحينما يصلون يصطدمون بالواقع ، وهنا يبدأ التملص والتراجع , عليهم أن يتحملوا ظروف العمل حتى نهاية العقد ، ونسأل الله أن يصبرهم على تحمل الشدائد .
هنالك نقاط اوضحها وبجيكم راجع اولا العقد شريعة المتعاقدين وهي كلمة اتقالت للناس الجات دي ثانيا السعودية راتب اقل من 4000 يال مضيعة زمن وغربة تحصيل حاصل,,,,.... بس للناس ظروف
المكاتب في السودان بتاخد قروش من الناس ديل اتعابهم اها بتدفعها الشركة لا انصح شخص بانه يجي براتب 2000 يال ولكن في ناس مستعدة تعبر سيناء وتخش اسرائيل وتتعرض لبيع اعضاءها وفي ناس بيركبوا البحر وفي ناس بتعبر الصحراء عشان تخش ليببيا وتتعرض للموت اها ديل لو لقوا العقد ده انا اشجعهم يجوا احسن من المخاطر التانية بخصوص رواتب السودانيين في الفترة الاخيرة وحسب مشاهدتي ...في ناس والله والله لقيتهم جايين ب الف ريال(1000) وفي واحد خريج جامعي متزوج واب لطفل جاي سواق خاص ب1500 وفي واحد قريبي شغال ب1500 ولديه خمسة اطفال وسواقين تريلات سودانيين مطحونين على الطريق رواتبهم لاتتعدى 2000 ريال وبيدوهم نثريات طريق يكب منها البنزين وياكل منها
التحية لأخونا عبدالسلام. ولكن من منطلق: أنصر أخاك ظالما أو مظلوما (وأكيد إنو أخوانا المذكورين ديل مظلومين ظلم الحسن والحسين) أتفق تماما مع مداخلة الأخ عباس الدسيس:-
Quote: السودانيين الذين يحملون رخصة سواقة عامة يعملون في البرحة بالدينا وممكن الواحد في الشهر اصفي ليهو 8000 ريال بالمختصر شركتكم خمت الناس ديل وبعد ما جو هنا اكتشفو الحقيقه سعر السوق يختلف من التعاقد وقعدو ابطبطو والشركات التي تملك الفيز دائما تستغل العمالة الوافده ونوع كلامك البتقول فيهو ياهو نزل سعر الوافد السوداني كلو بي سعرو في السوق ومن حق العماله السودانيه تطالب بسعر السوق بعد معرفة الغش من الشركة المستقدمه والمسألة ليست بتبطح وغيرو والتنازلات الياها الغطست حجرنا
08-11-2014, 09:40 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
Quote: شباب سوداني قام بالتقديم من السودان واعتمدوا اوراقهم بالشركة ورسلوا ليهم الفيز حقتهم وتم خصم 2000 ريال فقط من رواتبهم لزوم التاشيرة وحق مكتب السودان
يبدو أن الشركة تمارس جشعاً غير مبرر أخلاقيا و نظاميا ، فخصم رسوم التأشيرة و أي رسوم أخرى خاصة بإستقدام العامل مخالف للنظام ..
للفائدة أقرأ المادة ( 40 ) فقرة ( 1 ) من نظام العمل ( السعودي ) و ساعد هؤلاء السائقين في إستعادة ما خصمته منهم الشركة بدون وجه حق فلعلك تؤجر بذلك و في ميزان حسناتك إن شاء الله ..
المادة الأربعون:
1) يتحمل صاحب العمل رسوم استقدام العامل غير السعودي، ورسوم الإقامة ورخصة العمل وتجديدهما وما يترتب على تأخير ذلك من غرامات، ورسوم تغيير المهنة، والخروج والعودة، وتذكرة عودة العامل إلى موطنه بعد انتهاء العلاقة بين الطرفين. 2) يتحمل العامل تكاليف عودته إلى بلده في حالة عدم صلاحيته للعمل أو إذا رغب في العودة دون سبب مشروع. 3) يتحمل صاحب العمل رسوم نقل خدمات العامل الذي يرغب في نقل خدماته إليه. 4) يلزم صاحب العمل بنفقات تجهيز جثمان العامل ونقله إلى الجهة التي أبرم فيها العقد أو استقدم العامل منها، ما لم يدفن بموافقة ذويه داخل المملكة. ويُعفى صاحب العمل في حالة التزام المؤسسة العامة للتأمينات الإجتماعية بذلك.
08-11-2014, 12:34 PM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3403
Quote: شايفك متحامل شويه علي السودانيين >>>>>>>>>>> الكلام دا كتبوا الاخ "الدسيس" ردا على البوست... وهو غير حقيقي وغير منصف تماماً. الناس الذين قبلوا بشروط عقد العمل واجب عليهم يوفوا بما التزموا به وإلا يشربوا الزيت المغلي. أين كانت عقولهم عندما وافقوا على الحضور والعمل حسب الشروط. العقد شريعة المتعاقدين.
نافذة الفيس سليمان يا حبيبنا عشان تكون علي علم بقوانيين العمل السعودي والزملاء اشارو ليها فوق (( فقرة في العقد تنص علي ان هنالك فترة 3 شهور للعامل أو الشركه الحق في انهاء العقد)) ت وضع الفقرة عشان التلاعب والاستغلال للعماله كما ان قانون العمل السعودي متشدد جدا من ناحية الحقوق صاح ممكن قضيتك تاخذ فترة بمكتب العمل في النهاية بتاخذ حقك وفترة القضية تاخذ تصريح من مكتب العمل بتقديم خدمات لجهة اخري غير كفيلك المشكله كلها من السماسرة ومكاتب الاستقدام بالسودان والناس العامله بتخدم كفيلها وهؤلاء مجتمعين بحاولو مص دم الوافد الجديد عن فوائد تافــــهه منو القال الناس بتجي تتبطح العكس شباب خريج شغال هنا في اعمال شاقة ومحلات شاورما وسواقين دينات ظروف السودان خلت الناس تقدم تنازلات الغبن بجي وين لما تكتشف الزول العايز اخدمك وجاب ليك الفيزا قدم تنازلات بالنيابة عنك عشان الفائدة ليهو المشكله احنا لا عندنا سفارة لا وزارة عمل مفروض شروط التعاقد والرواتب وزارة العمل تتدخل فيها زي الدول التانية. قبل فترة شركتنا كانت عندنا فيز فنيين للسودان (( الكترونيات - لحامين -وغيرو)) رسلتها لي جماعه هناك الشركة اتكفلت بجميع المصروفات حتي الفحوصات الطبية والي تذكرة الطيران والتعاقد كان اساسي 2500 ريال غير المخصصات الاخري نفس الفيز طلعت الهند وكان الرواتب 1700 ريال مع انو الفني الهندي من ناحية الكفاءة احسن من السوداني سعر السوق بفرض كده علما ان الفني الاردني سعرو 3000 ريال. العايز اخدم الناس الطريق واضح والعايز من وراء الخدمه القي ليهو فائدة حقو ما اتستر واتحجج بي امور اخري سعر الحارث النيبالي ب700 واسوداني ب2000 ريال تعرف ليه سعر السوق بختلف ما كلهم بني ادميين النيبالي ممكن الم فيهو اي واحد امفتو واشيل العايزو وعلي ذلك قيس مع اعتبار اللغة العربية ودرجة الفهم والاستيعاب
Quote: عبدالسلام سلام وتحية شايفك متحامل شويه علي السودانيين ليهم الحق اتمردو حسب المعلومات القلتها فوق الراتب 200 ريال وفيها سفر ما دام الراتب 2000 ريال وسفر معناها رخصة عامة وحسب سعر السوق السواق السوداني للرخصة العامة 4000 ريال راتب ونثريات سفر لو هو مشتري الفيزا اما لو نفقات الفيزا علي الشركة المستقدمة لا يقل عن 3000 ريال ونثريات سفر بالاضافة للمخصصات الاخري بغض النظر عن راتب الهندي او غيرو وما برفع كرتونه من الواطه العتاله شغل براهو ليهو ناسو السودانيين الذين يحملون رخصة سواقة عامة يعملون في البرحة بالدينا وممكن الواحد في الشهر اصفي ليهو 8000 ريال بالمختصر شركتكم خمت الناس ديل وبعد ما جو هنا اكتشفو الحقيقه سعر السوق يختلف من التعاقد وقعدو ابطبطو والشركات التي تملك الفيز دائما تستغل العمالة الوافده ونوع كلامك البتقول فيهو ياهو نزل سعر الوافد السوداني كلو بي سعرو في السوق ومن حق العماله السودانيه تطالب بسعر السوق بعد معرفة الغش من الشركة المستقدمه والمسألة ليست بتبطح وغيرو والتنازلات الياها الغطست حجرنا تحياتي وتقديري
انت بتقول الناس دي من حقها تطالب بسعر السوق بعد معرفة الغش الغش وينو؟؟ طيب لازمه شنو العقد الوقعوهو في السودان؟؟؟ عشان تجي وتقول السوق وسعره اولا الناس دي جايين بي عقد والراتب مكتوب في العقد والعقد شريعة المتعاقدين وحتى لما اتناقش معاهم ببدأ اقول ليهم خليكم من الكلام الكتير ...هل الراتب مقنع الواحد يقول ليك لا طيب الجابك شنو من السودان ما تخلي الفرصة دي لي غيرك مزنوق حقيقي وعاوز يجي تاني مسألة ال8000 البتقول عليها دي لسواق دينا لازم نوضح حقائق انت كاجنبي لا يحق ليك امتلاك سيارة دينا باسمك ولازم تكون باسم سعودي لدي جيران سواقين دينات وشغالين حر اها الكفيل شهريا لازم يدوهو مبلغ مالي وا تجديد الاقامة ومكتب العمل تدفع وتدفع للكفيل برضو و سكنك على حسابك واعطال الدينا والمخالفات اغلب الناس البعرفهم بطلوا شغل الدينات للمصاريف الزيادة النزل سعر السودانيين ما انا وانما الوضع الضاغط في السودان وكل شاب عاوز اتخارج قابلت اكثر من واحد راتبه لا يتعدى 1500 ريال
Quote: العايز اخدم الناس الطريق واضح والعايز من وراء الخدمه القي ليهو فائدة حقو ما اتستر واتحجج بي امور اخري
اخونا عباس احترامي انا لا ناقة لي ولا جمل في موضوع الفيز البتطلع انا مشرف مبيعات وبحكم اني السوداني الوحيد بفرع الشركة بالمنطقة فكل ما تحصل مشكلة من سوداني من الناس الجابوهم على طول مدير المنطقة بيتصل علي ويرمي المشكلة على كتفي وبنفس الطريقة الشباب ديل اول ما تحصل معاهم مشكلة على طووول بيتصلوا علي قبل مدراءهم المباشرين وبديهم فعلا النصيحة والمفروض يعملوهو وبوضح ليهم كل الحيل و الحلول بشفافية مطلقة لانهم سودانيين وعامل نفسي محاميهم داخل الشركة و مافي خصم او جزاء بعطوا ليهم قبل ما انا اعرف ودائما والحمدلله بمنعه وواقف في صفهم بس الشغلانة لما تصبح كتيرة انت زاتك بتقول انا ومالي ومال الهم والغم فيا اخي ما تظلمني وتفتكر انه عندي مصلحة...والله متصدر لي مشاكلهم و ارجو الثواب من ربنا
Quote: ثالثاً.. على هؤلاء الأخوة احترام تعاقداتهم دون خلق بلبلة ، ولا أدري حقيقة شروط العقد، ولكن يبدو أن الشركة اخذت كافة احتياطاتها ، وأن هنالك شروط قاسية، علماً بأن العقد محدد المدة ولا يزال في بداياته..
رابعاً.. يا ريت لو تجلسوا معهم انتو كسودانيين وتقربوا وجهات النظر ، علماً بأن الجميع يرغب في تخفيف شدة الفقر لدينا هنالك ولكن في غير ضرر..
عبدالعزيز احترامي اخي تعرف في واحدين يجيبوا ليهم بدل سكن 500 ريال وتلقاهو ساكن في سكن الشركة وما سالينه وبعد ده ما عاجبه العجب وكل يوم فيلم جديد لحدي ما مدراء الفروع زهجوا منهم وايميل طالع وايميل نازل شكوى منهم
البوست دا مهم جداً ويمكن يفتح نوافذ عديدة حول واقع سوق العمل بالنسبة للسودانيين بالسعودية، خاصة الذين يتم استقدامهم من السودان، وما هي الفرص المتاحة؟ وما هو الواقع الذي يعيشه السوداني داخل وطنه؟ وهل توجد جهة حكومية لديها اتفاقيات مع السعودية كسائر ما يحدث مع البلدان الأخرى؟ وهل توجد جهة سودانية بالمملكة تقوم بمتابعة مشاكل العمالة السودانية بالتنسيق مع الجهات السعودية ذات العلاقة؟؟ هل مكاتب الاستخدام الخارجي تبالغ في تكاليف الاجراءات؟ هل ظروف كل شخص اقتنع بعرض وظيفي ما بالضرورة ان تخضع لواقع وحسابات سوق العمل؟
لنا عودة ان شاء الله
08-12-2014, 01:40 AM
منتصر عبد الباسط منتصر عبد الباسط
تاريخ التسجيل: 06-24-2011
مجموع المشاركات: 4144
يا أخ عبد السلام مربط الفرس أن المصري أي مبلغ يوفره بعمل له في مصر شي أما السودان الحياة في عالية ومكلفة مما تجعل أي راتب ضعيف للسوداني لا يحل له مشكلة في السودان للأمور المعروفة ...مما يجعل ظروف السودان مع السوداني أينما حل.
Quote: البوست دا مهم جداً ويمكن يفتح نوافذ عديدة حول واقع سوق العمل بالنسبة للسودانيين بالسعودية، خاصة الذين يتم استقدامهم من السودان، وما هي الفرص المتاحة؟ وما هو الواقع الذي يعيشه السوداني داخل وطنه؟ وهل توجد جهة حكومية لديها اتفاقيات مع السعودية كسائر ما يحدث مع البلدان الأخرى؟ وهل توجد جهة سودانية بالمملكة تقوم بمتابعة مشاكل العمالة السودانية بالتنسيق مع الجهات السعودية ذات العلاقة؟؟ هل مكاتب الاستخدام الخارجي تبالغ في تكاليف الاجراءات؟ هل ظروف كل شخص اقتنع بعرض وظيفي ما بالضرورة ان تخضع لواقع وحسابات سوق العمل؟
لنا عودة ان شاء الله[/QUOTE
يا غالي في انتظارك كلام عين العقل ووضعت اصبعك على الجرح
08-12-2014, 01:51 PM
م. سيد احمد قدورة م. سيد احمد قدورة
تاريخ التسجيل: 10-30-2005
مجموع المشاركات: 610
انا اعتقد جازما انو المرتب دا غير مجزى ابدا لكن فى النهايه دا العقد الوقعوهو وبكل بساطه الناس بتضرب الريال فى2500 وتقول دى خمسه مليون وانا هنا بدخل مليون ونص وما عارف ال 2000 ريال دى ممكن تروح فول وتميس وكمونيه ودى مهمة مكتب العمل هنا مفروض يكون عندو سقف مرتب لكل دوله وأى عرض اقل من السقف المفروض ما يسمحو ليهو بالسفر وحتى السفاره مفروض تكون طرف فى الموضوع عشان فى حالة أى خلل انت ترجع ليها
08-12-2014, 06:06 PM
الصادق صديق سلمان الصادق صديق سلمان
تاريخ التسجيل: 07-11-2006
مجموع المشاركات: 4010
اخي عباس انا بختلف معاك تماماً - الشباب في السودان متعودين علي الركلزة والقعاد تحت اصلاب ستات الشاي (إلا من رحم ربي منهم) بطلع مشوار وبطلع ليهو حاجة وبجي بقعد - دي حاجة موجودة في كتير من السودانيين عشان كدا يا عباس الاولاد ديل لازم يطبقوا فيهم القانون عشان الواحد يتغير ويشتغل ويرفع نفسو واكيد لو اجتهدوا رواتبهم حا تزيد وسمعة السوداني حا ترتفع و الناس حا تتجه للسودان من جديد زي ما عملوا في الفئات الطبية تدخل المستشفيات تحصل اولاد زي الورد اطباء يعاملونك بكل احترام واريحية (مستشفى المانع الجبيل مثال) وتحصل طبيبات سودانيات قمة في الأدب والحشمة والعلم لمن قلبك ينشرح
عشان كدا يا عباس لازم الشركة تحاسبهم وتضغطهم بالعقد وبعد انتهاء العقد الله كريم عليهم وعلي الشركة في السعودية دي الزول البشتغل بلقى والله وربي بديهو
Quote: يا أخ عبد السلام مربط الفرس أن المصري أي مبلغ يوفره بعمل له في مصر شي أما السودان الحياة في عالية ومكلفة مما تجعل أي راتب ضعيف للسوداني لا يحل له مشكلة في السودان للأمور المعروفة ...مما يجعل ظروف السودان مع السوداني أينما حل.
حبيبنا منتصر احترامي يا غالي يا اخي الموضوع التزام بالعقد والواحد لما يقولوا ليهو الراتب المبلغ الفلاني فعلى الاقل يستشير ولكن طالما ارتضيت بالمبلغ خلاص على نفسها جنت براقش
1) يتحمل صاحب العمل رسوم استقدام العامل غير السعودي، ورسوم الإقامة ورخصة العمل وتجديدهما وما يترتب على تأخير ذلك من غرامات، ورسوم تغيير المهنة، والخروج والعودة، وتذكرة عودة العامل إلى موطنه بعد انتهاء العلاقة بين الطرفين. 2) يتحمل العامل تكاليف عودته إلى بلده في حالة عدم صلاحيته للعمل أو إذا رغب في العودة دون سبب مشروع. 3) يتحمل صاحب العمل رسوم نقل خدمات العامل الذي يرغب في نقل خدماته إليه. 4) يلزم صاحب العمل بنفقات تجهيز جثمان العامل ونقله إلى الجهة التي أبرم فيها العقد أو استقدم العامل منها، ما لم يدفن بموافقة ذويه داخل المملكة. ويُعفى صاحب العمل في حالة التزام المؤسسة العامة للتأمينات الإجتماعية بذلك.
المستشار عصام دهب والله الواحد سعيد جدا بمرورك الواحد في امس الحاجة لي استشارتك بعد اذنك ممكن اتواصل معك في الخاص عند الحاجة وسؤال لو الواحد من الشباب ديل عاوز يقدم استقالته والعقد مدته سنة اها متى يقدم استقالته؟؟؟؟ هل قبل شهر من انتهاء مدة العقد؟؟؟ وخلال المدة دي لو عاوز يقدم استقالته فهل سيتعرض لغرامة وهل الغرامة قانونية ؟؟؟؟!!! احترامي يا غالي
حبيبنا الصادق الركلزة والقعاد جنب ستات الشاي بالساعات اصبحت ظاهرة ومنتشرة في كل السودان انا من مدني... الصباح في محطة المواصلات في الحي تلقى مجموعة بتاعت شباب قاعدين تقضي مشوارك وتجي راجع تلقا نفس الاشكال قاعدة اولاد ناعمين و موبايلات والشعر مسبسبنه بالكريمات ومفلفل مرات تسال الناس دي ما عندها شغلة يقولوا ليك ده يشتغل شويتين ويقعد يصرف ولما يفلس يرجع يشتغل تاني لزوم مصاريف وهم في انتظار الفرصة الجاياهم جنب ست الشاي
Quote: الأخ عبد السلام لك التحية
اخي عباس انا بختلف معاك تماماً - الشباب في السودان متعودين علي الركلزة والقعاد تحت اصلاب ستات الشاي (إلا من رحم ربي منهم) بطلع مشوار وبطلع ليهو حاجة وبجي بقعد - دي حاجة موجودة في كتير من السودانيين عشان كدا يا عباس الاولاد ديل لازم يطبقوا فيهم القانون عشان الواحد يتغير ويشتغل ويرفع نفسو واكيد لو اجتهدوا رواتبهم حا تزيد وسمعة السوداني حا ترتفع و الناس حا تتجه للسودان من جديد
عشان كدا يا عباس لازم الشركة تحاسبهم وتضغطهم بالعقد وبعد انتهاء العقد الله كريم عليهم وعلي الشركة في السعودية دي الزول البشتغل بلقى والله
Quote: انا اعتقد جازما انو المرتب دا غير مجزى ابدا لكن فى النهايه دا العقد الوقعوهو وبكل بساطه الناس بتضرب الريال فى2500 وتقول دى خمسه مليون وانا هنا بدخل مليون ونص وما عارف ال 2000 ريال دى ممكن تروح فول وتميس وكمونيه ودى مهمة مكتب العمل هنا مفروض يكون عندو سقف مرتب لكل دوله وأى عرض اقل من السقف المفروض ما يسمحو ليهو بالسفر وحتى السفاره مفروض تكون طرف فى الموضوع عشان فى حالة أى خلل انت ترجع ليها
اتفق معك في ضعف الراتب ولكن المؤهل والخبرة عوامل مهمة في زيادة الراتب يعني الراعي عندنا بالخبرة بتاعته راتبه ممكن يصل الى الفين ريال لكن بعض الناس لا يملك خبرة ولا مؤهل اها السعودي يجيب واحد زي ده ويدفع ليهو بالزيادة عشان شنو هل لانه سوداني ...والسوداني غالي؟؟
احترامي يا هندسة
08-13-2014, 03:09 PM
Adil Isaac Adil Isaac
تاريخ التسجيل: 12-02-2003
مجموع المشاركات: 4105
Quote: لشركة في الفترة الاخيرة اصبح توجهها الى السودان للسواقين وامناء المستودعات والواحد بيعتبرها فرصة لشبابنا انه يحسن دخله واخص بالذات الناس القاعدة عواطلية غصبا عنها وما لاقيه شغل بمعنى ما لاقيه شغل اها النوعية بتاعت جايين نجرب ديل ومذبذبين لكن بحكم انه الفيزا شبه مجانية جوا السعودية اها ديل خيربوا على اخوانهم القاعدين في السودان
رغم بؤس الرواتب و شكل الإستعباد الحديث السائد (حسب تقارير منظمة العمل الدولية و العفو الدولية) لابد من تجنب التسيب في العمل و إختلاق المشاكل في بيئة غير حقوقية بل لاتوجد بها قوانين مكتوبة الشئ الصحيح هو الإستقالة من العمل و تحمل الشروط الجزائية
تنطع الشباب سببه التربية البائسة و الدلع المستند علي الأوهام و أمكانية الركلسة في البيت دون عمل و الأكل و الشراب دون عمل أو بحث عن عمل هذه مسألة تربوية في الأساس سببها الأمهات الذين يوفرون المسوغات للكسالي من أبناءهم للجلوس و العيش "ملح" حتي تأتي الوظيفة اللائقة- و طبعاً لن تأتي لذلك الإقتصاد المنزلي السوداني يعنمد علي من يعمل فقط و الباقي جالس كعالة تحت حماية الآباء خاصة الأمهات الذين يكرسون للكسل و الفلسفة الفارغة و التسول علي الأسرة
في مصر و أغلب دول العالم مثل هؤلاء بكونو في الشارع إذا لم يعملوا - و هذه هو الفرق
08-13-2014, 03:45 PM
ولياب ولياب
تاريخ التسجيل: 02-14-2002
مجموع المشاركات: 3785
يا شباب الأوضاع هنا ليست خافية على الداني أو القاصي ، الكل يعلم الوضع الاقتصادي العالمي وناسنا في السودان أعلم بحالة الاغتراب وخاصة الأوضاع في السعودية ، معظم أهل السودان في كل مدينة وقرية وشارع لديهم مغترب ومطلعين على الأوضاع ، وبالرغم من كل ذلك يأتون للسعودية لأرض الواقع كانهم لا يصدقون الناس إلا أن يمروا بالتجربة وبأنفسهم ، وكثير منهم يصطدم أمام الواقع الذي عرفه نظرياً وحينما واجهه عملياً لا يقبله أبداً ، وتلك الفئة هي التي لا تصبر ولا تتحمل ظروف العمل ، وفي الغالب وجد تأشيرة مجانية وقال يلا نجازف ، وحقيقة كما ذكر الأخ عادل إسحق التربية ليهو دور كبير . وكثير من الشباب يضيعون أنفسهم واوقاتهم في أعمال إنصرافية ، الجلوس في الطرقات وحول ستات الشاي ، والتسكع خلف الحفلات وتصبح هذه الشغلات من صباح الله حتى ليله . نعم الظروف صعبة للغاية في السودان وصعبة في السعودبة بأقل درجة ، المهم الازمات في الدنيا تخلق الابداع والاختراعات ونحن نبدع ونخترع في التنكيت والتعليقات .
08-13-2014, 04:28 PM
قسم الفضيل مضوي محمد قسم الفضيل مضوي محمد
تاريخ التسجيل: 01-08-2013
مجموع المشاركات: 2608
مشاركة لي في بوست اخونا عبد المنعم الطيب (في الترحيل كانت لنا ذكريات) انقلها هنا لعلاقتها بهذا البوست ...
Quote: واحد سعودي عنده مركز طباعة وتصوير جاء السودان في سنة 97 تقريبا ومشى مراكز الاوقاف في ابو جنزير بالخرطوم وعمل معاينة لمجموعة من الشباب ، بعد المعاينة اختار ليه حوالي 6 اشخاص اعتقد واتفق معاهم شفاهة على راتب شهري ألف ريال (و) 25% من الإنتاج لكل شخص ، يعني الحشاش يملا شبكتو ، المهم الجماعة وافقوا ومشوا عملوا الاجراءات في السفارة وقطعوا التذاكر ووصلوا مدينة جدة وهم يمنون أنفسهم بالأماني العذبة ، بعد الوصول وراهم الراجل المركز وطبيعة الشغل قال ليهم نكتب العقد حق الشغل ، قالوا ليه ياخ نحن متفقين من السودان على راتب شهري 1000 ريال (و) نسبة مئوية 25% من الإنتاج ، قال ليهم لا ، أنا قلتا [راتب 1000 ريال (أو) نسبة 25%] :) الجماعة دقوا جرس شديد ولكن في النهاية وبعد الاتصال بالمعارف والأهل قالوا ليهم أصبروا شوية وبعدين قرروا الذهاب إلى السودان وشوفوا الشغل كيف وقيموه واكتسبوا خبرات ألخ ... المهم واحد من الجماعة الستة وكان صاحبنا قال لصاحب المركز ياخي أنا الكلام دا ما بيخارج معاي فعليك الله رجعني السودان ، السعودي قال ليه يا زول لو داير ترجع السودان تدفع 5000 ريال حق الفيزا وتذاكر السفر وما عارف ايه ، صاحبنا دا عنده جماعة في مكة مشى عمل عُمرة وركّب صورتو في صورة جواز تشادي وشتات السودان، المشية الياها والفتررة من وصولو للسعودية إلى مغادرته للسودان ما كمل شهر : )
ودي واحدة من عشرات القصص البسمع بيها الواحد في الخليج ...
Quote: تنطع الشباب سببه التربية البائسة و الدلع المستند علي الأوهام و أمكانية الركلسة في البيت دون عمل و الأكل و الشراب دون عمل أو بحث عن عمل هذه مسألة تربوية في الأساس سببها الأمهات الذين يوفرون المسوغات للكسالي من أبناءهم للجلوس و العيش "ملح" حتي تأتي الوظيفة اللائقة- و طبعاً لن تأتي لذلك الإقتصاد المنزلي السوداني يعنمد علي من يعمل فقط و الباقي جالس كعالة تحت حماية الآباء خاصة الأمهات الذين يكرسون للكسل و الفلسفة الفارغة و التسول علي الأسرة
في مصر و أغلب دول العالم مثل هؤلاء بكونو في الشارع إذا لم يعملوا - و هذه هو الفرق
اخونا عادل انت جيت لجذور المشكلة الواحد في الناس دي مقتنع مليون في المية انه اذا رجع السودان فهو ماكل شارب وفي بيت بنوم فيهو لو عارف انه ما بلقى معين فهو مستعد يعصر نفسه ويثبت وجوده الى حين تحسين وضعه دفن الرؤوس في الرمال لا يحل قضية
08-14-2014, 10:10 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
Quote: بعد اذنك ممكن اتواصل معك في الخاص عند الحاجة
مراحب بك أخي عبد السلام و بكل زملائك و بإمكانك أن تراسلني على الخاص في أي وقت ..
Quote: وسؤال لو الواحد من الشباب ديل عاوز يقدم استقالته والعقد مدته سنة اها متى يقدم استقالته؟؟؟؟ هل قبل شهر من انتهاء مدة العقد؟؟؟ وخلال المدة دي لو عاوز يقدم استقالته فهل سيتعرض لغرامة وهل الغرامة قانونية ؟؟؟؟!!!
في البداية في معلومة لازم نعرفها يا عبد السلام إنو كافة العاملين غير السعوديين عقودهم محددة المدة ، و لو كان مافي عقد أو إتفاق على المدة فإن مدة رخصة العمل ( التي دمجها مع الإقامة ) تعتبر هي مدة العقد . وعلى ذلك نصت المادة ( 37 ) من نظام العمل ( يجب أن يكون عقد عمل غير السعودي مكتوباً ومحدد المدة. وإذا خلا العقد من بيان مدته تُعد مدة رخصة العمل هي مدّة العقد ) أما بالنسبة لموعد تقديم الإستقالة فأوضح بأنه طالما كان العقد محدد المدة فهو ينتهي بإنتهاء مدته المحددة و لا حاجة لأن يقوم أي من الطرفين بإخطار الطرف الآخر قبل مدة معينة من إنتهاء العقد بعدم رغبته في التجديد و يتعين على العامل التوقف عن العمل في تاريخ إنتهاء العقد الأمر الذي يؤكد عدم رغبته في التجديد لكنه لا يلزم بالإخطار قبل مدة معينة ما لم يتم الإتفاق على ذلك صراحة في العقد . و طالما أن العقد محدد المدة فإن على العامل أن يكمل العقد حتى إنتهاء مدته المحددة ، و في حالة إستقالة العامل بدون سبب مشروع قبل إنتهاء مدة العقد فليس من غرامة تفرض عليه ( لأن الغرامة حق للدولة ) لكن يمكن لصاحب العمل مقاضاته و مطالبته التعويض . لكن وفقاً للمادة (81 ) من نظام ( قانون ) العمل يمكن للعامل أن يستقيل قبل إنتهاء مدة العقد مع احتفاظه بحقوقه النظامية كلها،في الحالات التالية : 1) إذا لم يقم صاحب العمل بالوفاء بالتزاماته العقدية أو النظامية الجوهرية إزاء العامل. 2) إذا ثبت أن صاحب العمل أو من يمثله قد أدخل عليه الغش وقت التعاقد فيما يتعلق بشروط العمل وظروفه. 3) إذا كلّفه صاحب العمل دون رضاه بعمل يختلف جوهرياً عن العمل المتفق عليه، وخلافاً لما تقرّره المادة الستون من هذا النظام. 4) إذا وقع من صاحب العمل أو من أحد أفراد أسرته، أو من المدير المسئول اعتداء يتسم بالعنف، أو سلوك مخل بالآداب نحو العامل أو أحد أفراد أسرته. 5) إذا اتسمت معاملة صاحب العمل أو المدير المسئول بمظاهر من القسوة والجور أو الإهانة. 6) إذا كان في مقر العمل خطر جسيم يهدّد سلامة العامل أو صحته، بشرط أن يكون صاحب العمل قد علم بوجوده، ولم يتخذ من الإجراءات ما يدل على إزالته. 7) إذا كان صاحب العمل أو من يمثله قد دفع العامل بتصرفاته وعلى الأخص بمعاملته الجائرة أو بمخالفته شروط العقد إلى أن يكون العامل في الظاهر هو الذي أنهى العقد.
Quote: bazer Deshab · International University of Africa السلام عليكم .. انا مازلت مستقر بالسودان .. لكن حسب معلوماتى إنو فى اسباب كتيرة بتخلى الناس تسافر بدون ما تعمل دراسة جدوى : 1- إنو السودانى بيحول الراتب للسودانى .. وما بيسأل إنو المرتب ده فى السعودية بيعمل لى شنو؟ 2- الوضع المعيشى ضاااااااااااغط جدا فى السودان مما يجعل كثير من باحثى السفر والعقودات لا يقرؤا تفاصيل العقد وإنما يبوقع لإكمال الإجراءات 3- مكاتب الإستخدام الخارجى ليها دور فى الترويج للعقودات الغير مجدية واحيانا تقديم وعودات شفهية كاذبة لتحقيق مكاسبهم الشخصية 4- الدولة مفروض يكون ليها دور فى تحديد الحد الأدنى للرواتب للعقودات الخارجية 5- مكاتب الإستخدام ليها دور أساسى فى تقليل الراتب :: مثلاً قبل فترة جات جامعة سعودية لمعاينات محاضرين من حملة الماجستير فى تخصصات معينة .. ناس الوكالة (....) قالو ليهم بالمرتب ده ممكن تشيلو حملة دكتوراة ... وبالفعل شالو دكاترة .. وبالتالى إنخفض سعر الدكتور السودانى بفعل أخيه السودانى
أبو أحمد أبو أحمد · جامعة السودان للعلوم والتكنولوجيا سعادة المستشار/ دهب، تحية طيبة، يا أخوي نحنا ناس عوام، وانت جزاك الله خير، جمعت لينا الاستقالة، وعدم الرغبة في تجديد العقد بعد انتهاء مدته، كلها تحت بند الاستقالة، ولا يستقيم الحال، فصل لينا كل واحدة براها. في حالة الاستقالة بيحدث كذا. وفي حالة عدم الرغبة في تجديد العقد بعد انتهاء مدته بيحصل كذا. شاكر ومقدر. رد · أعجبني · متابعة المنشور · أمس في الساعة 06:25 مساءً
ابواحمد من الفيس سؤالك محول للمستشار دهب لينا اجر المناولة
يفترض ان تكون وزارة العمل هى المسئولة اولا واخيرا عن منع استغلال الموظف والعامل السودانى من قبل سماسرة الفيز وجشع الكفلاء عبر تحديد سقوف للرواتب حسب المهنة والمؤهلات و تكلفة المعيشة فى الدولة ..يعنى بعض الدول الاسيوية تشترط ان لا يقل راتب الخادمة او الشغالة عن سقف معين والا فان السفارة او الوازرة تمنع هذا التعاقد ... وبالتالى بفترض ان لا تسمح وزارة العمل بالسودان بهذا الاستغلال ...لمواطنبها..
دكتور سلام، يا خوي إنت قاصد العاوزين يجو؟ ولا الجو خلاص؟ أتوقع انك تقصد الثانية. المهم ، أول الأشياء نسأل الله أن ييسر لكل شخص تحقيق مراده. إنت عارف البلد دي كفيل ، وشغل (طبيعة وراتب)، ومسئول في الشغل، أي واحدة ممكن تعكر مزاج الواحد وتخليه يطلع من طورو، ويقطع البحر قافلا. أكثر مشاكل السودانيين في الشغل هنا تكون ردة فعل لنرفزة من شخص ما. تحياتي وتقديري
اخونا محمد الحسن احترامي ياغالي الموضوع وما فيهو بزنس ومكاتب الاستقدام شغالة تجارة ومكاسب وبتحاول ان ترضي الطرف الخارجي اكثر من ابناء البلد وبذلك تكسب المستخدم الخارجي حتى يتعامل معها مرة اخرى لانها توفر له عمالة رخيصة
Quote: استاذنا الغالي قصي انا بقصد الناس العاوزه تجي يا ريت تحسبها صاح قبل ما تجي وتتفاجأ بالواقع
الناس الجاية تجرب يا ريت ما يجوا عشان ما يعطوا انطباع سيئ ويضيعوا فرص لي ناس محتاجة بالفعل حتى ولو الراتب متدني
أعتقد أن النية المشتركة بين كل "برلوم" قادم إلى السعودية هو العمرة والحج، لذلك كثير منهم ليس لديهم هم كبير بشأن الراتب، بعضهم ممكن يجي ولوب 1500 ريال، بس عشان يحج ويعمر، وبعضهم يشترط عليه أن ليس لدى الكفيل عمل وعليه أن يدبر نفسه، وأيضا يقبل بالتاشيرة "البدون عمل" وبعضهم يقبل بأن يدفع مبلغا معينا - شهريا أو سنويا - بشرط أن يعمل بطريقته الخاصة بالرغم من القرارت الآخيرة. وبعدهما(العمرة والحج) ما يهمه يجلس أو يطلع نهائي.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdelslam Malik Ali Elhag
على محمد على بشير
عباس الدسيس
usama Babiker
محمد عوض الله علي
أحمد ابن عوف
طارق ابراهيم ابوالفضل
ولياب
Mohammed Abuzaid
طه داوود
إسماعيل وراق
منتصر عبد الباسط
م. سيد احمد قدورة
الصادق صديق سلمان
قسم الفضيل مضوي محمد
Mohammed Alhasan Mohammed
فيس بوك
تويتر
انستقرام
يوتيوب
بنتيريست