|
|
|
 Re: اصطياد تمساح ضخم روع المواطنين جنوب الخرطوم (Re: نعمات عماد)
|
تمساح ضخم وعملاق طوله 3 أمتار!!!!!
ومشوا فتحو فيهو بلاغ كمان!!!!
طيب عشارى يقولو عليهو شنو
ويعملو معاهو كيف!!!
لسه محيرانى قصة الثعبان (الأصلة
التى قيل أنها روعت مدينة كريمة!!!
وقرنتية قبل عدة سنوات تم ضربها
بالرصاص فى منطقة الشجرة!!
السودانىين أصبحوا يفتقدون المعرفة والفكرة وطريقة التعامل
مع الحياة البريةوحيوانات تعيش قريباجدا منه وفى بلده,,
تحياتى أختى نعمات,,
| |
 
|
|
|
|
|
|
|
|
Re: اصطياد تمساح ضخم روع المواطنين جنوب الخرطوم (Re: نعمات عماد)
|
Quote: تمساح ضخم وعملاق طوله 3 أمتار!!!!!
ومشوا فتحو فيهو بلاغ كمان!!!!
طيب عشارى يقولو عليهو شنو
ويعملو معاهو كيف!!!
|
لقد افصحت والله وابنت يا ود الطيب لله درك
عليك الله قولهم امشو شوفو فى تمساح تم اصطياده من جزيرة كجوج فى الستينات على ما اذكر بمنطقة حجر العسل
يبلغ طوله اربعة امتار ونصف ومازال هيكله موجود ومرفوع اعلى المنصة الخاصة ببوابة بوليس شندى
ومازالت بياناته واسم الشخص الذى اصطاده مدونه على اليافته التى تحكى عن تلك الحادثة (فلله درهم كيف يصطادون)
| |
|
|
|
|
|
|
|
|
 Re: اصطياد تمساح ضخم روع المواطنين جنوب الخرطوم (Re: على احمد النعيم)
|
قالوا، والله يكفينا شر قلنا وقالوا
في كريمة ظهرت قرنتية محنت الناس محنة شديدة. كمّلت الجروف، وسدرت
لافوق كملت المزروع في الحيضان، وكان في جرايد نخل مهدلات أكلتن، قش
الواطة لحستو، البروس عدمتو نفااخة النار، التقاعدمتها أسم الحبة
الفي بطن المطآمير برضو لحقتو.
الناس حاولوا المستحيل للقبض عليها أو قتلها، كل المحآولآت بآءت
بالفشل... أعيان البلد عقدوا إجتماع طارئ وقرروا إرسال برقية لشـرطة
أتـبـرا
وصلت البرقية وردت عليها شرطة أتبرا بإرسال إثنين شاويشية لكريمة
نُحآف زي المساويك، قُدآم من زمن الأردية والعمم. كل وآحد دآرع في
كتفو بندقية أبوعشرة، كان علقها في كتفو اليمين يميل معاها يمين
وكان علقها في كتفو الشمال يميل معاها شمال. يآالله شايلين روحهم
وقالين البنادق.
وصلوا كريمة مواعيد الفطور. ناس البلد كلهم مرقوا لإستقبالهم
فوق المشرع. ركبوهم فوق الحمير وزفوهم علي المضيفة
حليل المضيفة. ( المضيفة عبارة عن غرفة كبيرة تُبنى في مكان
منعزل غير بعيد عن المنازل، وغالبا يبنيها ناس البلد عن طريق
النفير. وهي مأوى لكل عابر سبيل، يتفقدها ناس البلد في مواعيد
الطعام عسي أن يكون لجأ إليها عابر سبيل).
بعد فاصلوهم وأخدوا خبارهم، الفطور وصل. الجاي بملاح دمعة
بقراصة، والقراصتو مملحة بملاح ورق، والجاي بعمود، وواحد بصحن
كبير مغطي بكبديق، ووأحد كسرتو بايته مملحها بلسان طير. إنكسروا
فوقهم ناس البلد من كل صوب وحدب، بأصناف متعددة من الطعام. الجماعة
أكلوا تمام ومصمصوا أصابعينهم. بعد دآك وصل الشاى. كل وآحد
شرب تِسعي وحقبوا بنادقهم وبقو مندلين علي البحر.
الوقت منتصف النهار والسخآنة تقلي الحبة. النسوان قامن
علي(التكلة) شدّن الحِلل فوق النار. الحِلل يجقجقن، والبلد
صآآآنة. صوت الفنان الكاشف منبعث من راديو قديم حجارته قديمة
يحاول بصعوبة أن يوصل صوت الكاشف للسآمعين وهو يردد (حبيبي آه
وقلبي تآه يوم الزيارة). الصاجات مولعة، والقراريص مردومة في
الطُبآقة. القرية صآآآنة, الدخآخين منبعثة من التكلة ورواكيب
العُوآسة. قطع هذا الصمت صوت حمار بدأ ينهق، أزعج قمريتين في
رأس التمرة، طارن وركّن فوق شُدرة سنط، قوقن لفترة بسيطة وسكتن،
ثمّ عاد الهدؤ يعم المكان، وبدأ صوت المذياع يظهر من جديد ضعيف
متقطع، والنعام آدم يردد (يقولوا لي يا مسكين عليك ظلم الحسن
وحسين، يا دآب قل نوم العين).
الجماعة مصنقرين فوق البحر والقرنتية ما منها خبر
حان موعد الغداء.
نادوهم للمضيفة، وناس البلد يعجبوك، ردموا قرآريص ومِلحآت
تكفي يأجوج ومأجوج. الجماعة دفسوا تمآآآم وشربوا الشاي، تآني
كل واحد شِرِب تسعى، وقاموا علي البحر.
الجو أصبح معتدل نوعا ما. لحظات العصاري جميلة. النيل هادئ
وساكن، لايعكر صفوه إلا مركب حوآتة تعبث بمجاديفها خالقة فوضي
في وسط السكون الممتد يين الضفتين.
الجماعة حاقبين بنادقهم وقاعدين، البيناوِلُن سيجارة
البيناوِلُن سفة، واحد يديهم تمرآت، ترمس، كبكبيق... الخ،
وكت الواطة بقت المِغيرِب نادوهم للشاى. شاي المُغرب طبعا
شئ أساسي في البلد، وبلبن طبيعي. البرآريد والكبابي وقُداحة
اللقيمآت ما تديك الدرب، وكل زول يحلف عليهم لآزم يضوقوا
شاهيهو وزلابيتو وهم طبعا أسكت كِب.
ضربوا تمآآآم وبقو مندلين علي البحر.
بدأت حالة الرباط من جديد تحت ضوء القمر الذي أطل في تلك
الساعة من خلف النخيل جاعلاً جزء من ظلالها ممتد علي الرمال البيضاء،
والجزء الآخر منعكس علي صفحة النهر. القمر متسلل للأمام والظلآل
متراجعة للخلف، والقرنتية لم تظهر بعد. حتي تناقصت الظلآل وإختفت
وأصبح القمر بلونه الفضي منعكس علي صفحة النهر،
حان موعد العشاء.
الجماعة حقبوا بنادقهم وبقوا سادرين. كمية غير عادية من الفطير
باللبن والقرآصة بالسمن والسكر، وقرآصة التمُر كانت في إنتظارهم
ضربوا تمآآآم، وكل وآحد كتحلوا كورية لبن، ورقدوا ناموا
الصباح عيونهم فتّحن فوق براريد الشاي وقُدآحة الزلآبية، لهطو تمآآآم
ما قصروا، وبقوا مندلين علي البحر.
ثلاثة أيام بالتمام والكمال وهم علي هذه الحالة، والقرنتية كأنها
ما وُجدت ولا خُلقت.
يوم في ساعة الغداء، البروش مفروشة وعليها كمية من صواني الأكل
لاتجد كميتها في أجعص دكان عَدة في البلد، والجماعة عرقانين وشغالين
لهط نضيييف.
وآحد من ظرفاء البلد علق قائلاً: والله يا جماعة، الأكل الأكلوهو
الجماعة ديل القرنتية زآآآتا ما أكلتو...
.
.
.
ود المدير...
| |
|
|
|
|
|
|
|
|
 Re: اصطياد تمساح ضخم روع المواطنين جنوب الخرطوم (Re: عبد العزيز محمد عمر)
|
سلامات يا ود المدير,,Quote: وآحد من ظرفاء البلد علق قائلاً: والله يا جماعة، الأكل الأكلوهو
الجماعة ديل القرنتية زآآآتا ما أكلتو... |
وفى رواية أيضا قالو جماعتكم ديل اول ما تظهر القرنتية
بضربو ليها طلقتين فى الهوا والقرنتية ترجع الموية بعد أن عرفوا أن العلف والمطايب ديل بنتهوا بنهاية القرنتية,,,
والطلقتين ديل زاتن كانن للتحية والتقدير من جوز الشوايش للقرنتية نظير خدماتها الجليلة 
تحياتى ,,
| |
|
|
|
|
|
|
|
|
|
Re: اصطياد تمساح ضخم روع المواطنين جنوب الخرطوم (Re: نعمات عماد)
|
هالا هالا تماسيح النيل وقفو ريقان ..
لسه اليوم ما ودع يانعمات ..
ما بخليكم تمشو قبال تسمعو حكايتي كمان ..
حقيقة تمساح تلاتة متر دا لسه بى سن اللبن ..
هاكم دي هوادة ..
(كُركُر) ..
(الكُركُر) بضم الكاف هو فحل النعاج ..
وهو نعت ساخر يمس الناعتين والمنعوت..
قيل أنه بعد وفاة بن عوف ..
زادت التماسيح في جورها وفجورها على خلق الله ..
لا بشر ولا بهم يقدرو يعتبو على البحر..
لجأ الناس لفقرائهم ..
علهم ـ بمعارفهم اللدنية ـ يمنعون عنهم هذا البلاء..
نجح البعض وفشل الكثيرون وفق ما أرخت حكاوى القرية ..
بدأت حكاية ( كركر )عندما خطف التمساح خروف جاره في ليلة عيد الأضحى
فجاءه شاكيا متذمرا من التمساح الذي حرمه وأولاده من خروف العيد..
تحمس الرجل لنصرة جاره ووعده بالانتقام من ذلك التمساح اللعين ..
انصرف الرجل مسرورا لعلمه أن جاره يملك بندقية طالما أرهبهم بفرقعاتها في مناسبات القرية ..
ذهب يراقب ظهور التمساح علي الشاطئ..
وما أن رآه يتمدد فوق الرمل حتى أنطلق مسرعا يبلغ عنه..
أخرج (كركر) بندقيته ( أم روحين ) من كيسها الجلدي السميك ..
وجلس ينفخ ويفتح ويقفل فيها ويسلك ماسورتها ..
وصاحبه يتململ على ضياع الوقت في هذه الأعمال التي لا يراها ضرورية ..
فقد لا يجدون التمساح في مكانه عندما يفرغ من هذه الأعمال ..
أخيرا أكمل (كركر) إجراءاته وحشا ماسورة بندقيته بالبارود ورفعها على كتفه ..
جاء إلى النهر يتهادى يتبعه صاحب الخروف الضحية ..
علي الرمل شاهدا تمساحين يتجاوران بعد أن كان واحدا فقط عندما ذهب صاحب الخروف للإبلاغ عنه.
أنزل (كُركُر) بندقيته من كتفه ووضعها بين يديه ..
ثم ركع ومشى في اتجاه التمساح ..
شاهد احدهما يرفع رأسه ثم يعود لوضعه ساكنا..
جلس وصارا يحبوا بهدوء إلى أن أصبح الهدف في مرمي بندقيته ..
انبطح أرضا راكزا دبشق البندقية على كتفه الأيمن ويده على الزناد..
عندما انطلقت الرصاصة أحدثت دويا هائلا ردد صداها حواف النهر ..
أفزع الدوي الهائل أحد التمساحين ..
فانتفض من مرقده يهم الهرولة في اتجاه النهر..
فإذا برفيقه يقول :
هههه نوم نومك ــ دا بنق كُركُر.
| |
|
|
|
|
|
|
|
|
|
Re: اصطياد تمساح ضخم روع المواطنين جنوب الخرطوم (Re: محمد على طه الملك)
|
هسة التمساح دا كاتلنو ليه؟
اذا هو روع المواطنين في ميدان المولد! اكتلوهو..
تمساح و عائم في النيل!! يعني يعيش وين؟
بعدين شنو قصة حملته المياه من افريقيا دي؟
يعني الخرطوم دي وين؟ في اليابان؟؟
اذا ناس الشرطة قادرين يكتلو كل من يروع المواطنين!
خليهم يمشو يكتلو ناس جهاز الامن!
هو في شيء مروع المواطنين غير جهاز الامن؟
و ديل من أين حملتهم لنا المياه؟ لا ادري!!
ياهو دي،،،
| |
|
|
|
|
|
|
| |
نعمات عماد
أيمن الطيب
محمد أبوالعزائم أبوالريش
نزار عبد الوهاب
محمد المرتضى حامد
صديق الموج
Hani Arabi Mohamed
الهادي ابوبكر
Nasruddin Al Basheer
على احمد النعيم
معاوية المدير
يوسف أبو صالح
Yasir Elsharif
أحمد الشايقي
سيد محمد احمد سيدنا
khaleel
محمد على طه الملك
فيس بوك
تويتر
انستقرام
يوتيوب
بنتيريست