|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
جلست معها في رملة الشيطة في الجريف ...
كان الجميع يلهو و يلعب ...
منهم يسبح ... و منهم من يركض ...
وكنا انا و هي ...
نرسم علي القيفة ... نرسم قلوباً ... عليها اسهم ...كثيرة ...
كانت تداعبني ... و تكتب اسمي علي راس السهم ...
ثم تكتب اسماء لعدة فتيات ... في الطرف الآخر من السهم ...
و تبدأ باللعب ... و تغمس بنانها بين تلك الاسماء .. قائله ...
يا ايدي ... شيليني .. ختيني ...
لا ادري اين هي الآن ...
و لا اذكر ما هي تلك الاسماء التي كتبتها علي طرف السهم ...
و لكني اعرف تماما ان القلب المرسوم ...
في مخيلتي الآن ... يشبه خارطة السودان ( الكاملة ) ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
اما تلك ...
فهي حكاية غير كل الحكايات ...
كانت حلتنا حلة رجالية ...
لا تري فيها بنات ... الا وقت الذهاب الي المدرسة ...
و كن حينما يخرجن ... يخرجن سوياً ... و كنت اضحك وانا اراهن مسرعات ...
لا ادري ان كانت السرعة ستخفيهن عن اعين المارة ... و لكنه الخجل ..
الي ان اتي ( جيرانا الجداد ) ... و اتت معهم ست الحسان ...
لا انسي تلك العصرية ... ونحن في ميدان الكورة ... اتتنا علي دراجة ...
و هي ترتدي بنطلون جينز !!!!
في حلتنا امرأه ؟؟؟؟
دارت بدراجتها في رحلة استكشافيه للحلة ...
و ذهبت ... وذهب معها 22 قلبا زائدا الاحتياطي !!!
التقيت بها بعد سنين ... و كنا في حفل في الملازمين ..
و كانت كما هي ... جمال و بهاء ...
كنت وقتها اكتب ( مجتهدا ً ) في جريدة الأيام بعد الانتفاضة ...
كتبت موضوعاً عن ايام عمر محمد الطيب و جهاز الامن ...
احدث رواجاً لا بأس به ...
لمحتها بين الجميلات ... وكانت كانها القمر و سط النجوم ...
لم اعرف ان كانت ما زالت تتذكرني ...
لم تنظر الي ... وانا فشلت في ان لا انظر اليها ...
و عند النهاية ... والكل خروج ... قصدت ان اكون قريباً منها ...
لا ادري لماذا ... ربما لكي اشتم من عبيرها ؟
و اذا بكف يدٍ ... حار و حائل ... يمسك بيدي ...
و همست لي في أذني ... قائلة ...
قرأت موضوعك ... ممكن اشوفك لو بتقدر ؟
لم اراها ... حاولت ... ولكني لم اراها ...
احاول الآن ان استرجع ذاكرتي لاشتم ذلك العبير ...
فلا يملأ انفي الا عبق الدعاش ... بعد مطيرة عصرية ...
في حوش جدي فيك يا امدرمان ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
أمدر ... خاصرة وطن جدير بأن يكون,
في صحفة باكرة من تصاريف السودان على
طريق المدينية, كنا نحن أهل الريف المجاور,
نتطلع إلى أمدر, بإعتبارها قبلة الحضارة ومرتع
الصبا السوداني, ربما لم نكن هناك تحديدا, لكنا
كجل أهل السودان, رموا بخيامهم على تخوم
غرة السودان , أمدرمان, فإنعصر السودان العريض
إلى حيث فوهة الحياة القومية الحديثة, فكان التاريخ
حاضرا, وكانت الجغرافيا بسطا مثيب, وكأن كل القوم
أسرة واحدة , وكأن كل السودان هو أمدرمان. فهي أيام
تغزرت على ظلالها معاني الوصل الطبيعي بين أهل
السودان.
أمدرمان هي رحم السودان, وهي ثديه اللابن العصور
ويا ود أرو ... حقي ما تودرو,
يحي ... واصل حكيك الجميل
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: HAYDER GASIM)
|
Quote: أمدرمان هي رحم السودان, وهي ثديه اللابن العصور
ويا ود أرو ... حقي ما تودرو,
يحي ... واصل حكيك الجميل |
حيدر يا جميل ...
يعطي كل سوداني نفسه الحق ان ينسبها الي منطقة من مناطق السودان ...
فهذا من الجزيره ... وذاك من الغريبه ... وهؤلاء من سنكات ...
و حينما نقول نحن من امدرمان ...
يقولون امدرمان و ( اذاعتها ) فعلت ... و سوت ... و حرمت
امدرمان ... و شعرائها قفلوا الطريق علي ... و علي ...
و انا اقول ... كما قال البديع ابن حي العرب عبدالله محمد زين ...
أنـا أم درمـَــان لِسـَـــان حالـــك أريتــــك تدري بي حـَـــالي أنـا الــقــــدرت أحــــــــوالــــك و حبــــك بـــــدري أوحالي أقـــــــوم بـــي أعــــظـم الأدوار و أكــــون الساحة للثـــوار وأبــقى البقعة للأحــــــــرار و أمثــــــل عــــزة الســودان
سنواصل يا صديقي ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
كشف حالي اسماعيل حسن ...
لما خلي وردي يقول ...
وحياة صمتِك إنتِ و حاة الشامة الشامة الفوق خدِّك نايمة دليل و علامة تزيد حُسنِك بهجة .. تزيدُه وسامة وحياة أجمل ريد في الكون يا حمامة...
شامه في خديدها ...
كنت اخفيها من كل الناس ...
شامة ...سبحان الخالق في من خلق ...
وضعت في مكان ... لو خيروها لما اختارته بهذه الدقة ...
كنت اتحدث عن كل شئ ... و انكر الشامة ...
و كأنها خلقت لي وحدي ...
لو ابتسمت ... تضحك الشامة ...
لو ( عصّبت ) ... وما اجمل العصبية فيها ...
تضحك ( عليها ) الشامة ...
اذا غضبت ... فتنتها الشامة و حدثتني و افشت الخبر ...
كنت اذا اردت التجوال في دواخلها ... تسللت من تلك الشامة ...
و كأنها طاقه يسرها لي المولي لمعرفة اسرارها ...
راحت السنين ... و معها راحت الذكريات ...
تري هل هي في الخد الشمال ؟؟ ... ام اليمين ... ؟
الم اقل لكم ان الذاكرة تعاندني ؟
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
مريت علي بيتهم ...
انا و اخوها ماشين ندوة .. وليلة شعرية
جاتني طايره ... اخوها كان في الحمام لسه ...
و قالت لي ياخ انت حتفهم متين ...
انت ما عارف انو انا ( بريدك ) ...
قلت ليها و انتي عارفه ريدتي ليك
زي أختي و اكتر ...
قالت لي ( وهي زي زعلانه ) ... قلبك مشغول بي فلانه ... انا عارفه !!
قلت ليها ... فلانه؟ ياخ دي اكتر من أختي !!!
ضحكت و قالت لي و هو انت اصلو عندك كم اخت؟
و قلبك ده يعني مشغول بي شنو و مشغول بي منو ؟
خلاص حب البلد ما خلي فيك فرقه تحبنا بيها ...؟
جننتونا انت و أخوي ...
قلت ليها كدي خليكي من الكلام ده ...
تتذكري و انحنا سُغار ...
كنا انا وانتي و اخوك نسُك ابو الحداد من حفره لي حفره ... ومعانا بكرة خيت
سارقنها من مكنة الخياطة حقة امك ...
نشرك ليهو بالخيت ... وزي العوير يمسك في الخيت و يجي مارق !!!
ضحكت ... و سرحت بعيد ...
قلتليها ... طيب فلانه .. التهمتيني بي ريدتها ... تتذكري انا وهي و اخوانها الاتنين
كنا ندخل بالسرقه لي بيت ناس فلان ... كان عندهم شدر حنة كتير في حوشهم الورا ...
كنا نمسك الكدندار و نربط كرعينوا بالدوباره هو يطير و انحنا طايرين بي وراهو .. ؟
ضحكت و قالت لي اي والله متذكره... ياخ دي ايام رهيبة...
قلت ليها طيب ... الحفرتين الفي دقني ديل متذكراهم؟
قالت لي ... اييييك ياخ ... ما تذكرني ... وشك كان كلو دم ... لما اتكسر بيك سلم الخشب
وانت طالع راس البيت تجيب الكوره الشاتها اخوها !!!!
قلت ليها طيب ... عليك الله كان انتي كان هي ...
انتو عارفين كل الكلام ...
اها لو حبيتكم ... احكي ليكم شنو ؟
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
Quote: Ahmed Elhaj الاخ الاستاذ يحي سلامات ياخ بي بساطة كدة ليك طلب اخوي ياخي بي كتابتك الطاعمة دي ماتكرب لينا بوست عن الاستاذ الباشمهندس صاحب الصوت الرخيم الانيس هاشم ميرغني ياريت تمتع قرائك من سكان اقصي خلف المدرجات او الصامتون. اتخيل لي بوستك بتاع امدرمان دة خلاني متأكد من انك اصح زول للمهمة المقدسة دي. ارقد عافية ياحبيب,,, * اعذر اخوك لو في اي obtrusion رد · · منذ 11 ساعة |
اخونا أحمد الحاج ...
وهل يجوز ان اكتب انا عن هاشم ميرغني رحمه الله ...
و العزيز نادر الفضلي بيننا ؟؟؟
لك الوعد يا عزيزي ان استكتب ود الفضلي ...
فهو يعرف الكثير ... ويحمل الكثير من الدرر ...
وانا لن اقصر بيما اعرفه و بما املكه من اعمال ايضاً ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
نزول الامطار له طقوسه في بيتنا في امدر ....
و له مشاكله الكثيرة ... فالارض حجرية ...
و لا تشرب ارضه موية المطر كبقية المناطق ...
التصريف بدائي جداً ...
فيكون الاعتماد علي ( الغرف و الكشح ) وخلافه ...
البيوت حتي ما بُني بالطوب ... فسقوفه ( عقِد ) ...
مراين خشب و طوب و طين ...
احتمال التسريب وارد مع كل مطره ...
لذلك اعمال الترميم لازمة قبل موسم الخريف ...
علي التوازى ... حينما كنا صغاراً ... و عندما تهطل الامطار ...
نكون محصورين داخل البرندات تحسبا لاي مشاكل من هدد .. اوالوقوع داخل بلاعة ...او انهيار ابار و خلافه ...
و يحلو السمر لو كانت المطره من الامطار العنيفة و التي تستمر لساعات و ساعات ...
كانت الوالدة رحمها الله تنشط كثيرا في ذلك الوقت ...
فتراها بدأت في عجن اللقيمات ... وكت العصرية ...
و شدت كفتيرات الشاي ...
كفتيرة للشاي الساده ...
كفتيرة مخصصة لشاي اللبن الخالص ...
ما نلبث ان نبدأ في شرب الشاي مع اللقيمات الحاره ... عسلا كان معها او سكرا لا يهم ...
حتي تبدا الحاجة انار الله قبرها ... في السؤال ...
قائلة يا اولاد ... انا حأجهز عصيدة دخن لي جدكم و للحاج ابوي للعشا ...
اعمل ليكم ولا دايرين شئ تاني ؟ ...
رغم علمها التام اننا من عشاق عصيدة الدخن ... ولكن ديموقراطيتها المعهودة ...
لابد من اعطاءنا الخيار ... رغم ان البديل واحد ... وهو الشعيرية باللبن !!!
كان جدي ووالدي من عشاق اكل عصيدة الدخن... و مديدة التمر ... مع السمن البلدى ...
الآن اتانا زمن الكولسترول ... و الكالوريز .... وووو
قسما برب العزة ... كنا ناكل كورة العصيدة ... مع اللبن و العسل ...
و ترتفع درجة حرارة الجسم .. حتي تكاد تري بوخ حولك ...
لو حسبت كمية السعرات في تلك الكورة ... لوصلت لموسوعة غينيز للأرقام العالمية ....
آآآآه يا امدرمان... أشواق كتيره الدموع شهـــوده و للمنام العيـــون زهـــــــــوده
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
اسماء البنات كانت محدودة زمان ...
الان علي كل لون و كل شكل ... و في اعتقادي زادت جمالاً و تنوعاً ...
ولكن كمان قلة العدد كان له مميزاته ...
زمننا و انحنا شباب ... كنا اذا رأينا بنية جميلة ...
ارتبط اسمها بالجمال ...
و بالتبعية ... لو قيل لك ان هناك ناس فلان بنات خالاتهم جو من مدني او من بحري او خلافه ...
لو عرفت ان اسم واحده منهن فلانه ...
تجزم تماما انها آية من الجمال ... لأرتباط اسمها بتلك الجميلة في حلتكم ...
لو رجعتوا لهذه النظرية ... تجدونها حقيقة ...
انا شخصيا ارتبط اسم ( بدور ) عندى بالجمال ... و لم تصادفنى ( بدور ) واحده اقل جمالاً من البدرِ ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
و نحن في سن الشباب
كنا نفرح ببيوت ( البكيات )... رغم حزن الجميع !!!
فهي الفرصه الوحيدة التي تفتح لنا ابواباً في استراق النظر الي الحسناوات ...
كنا نتنافس في المرسال الي حوش ( النسوان ) لتوصيل صينية قهوة ... او جلب صواني الغداء ...
اما لو كانت لك حبيبة ... و كانت من ملازمي العزاء ... فهي ليلة القدر ...
هي تقصد ان تخرج من باب خلفي علي الزقاق ... لتراك للحظة لا تفوت الدقيقة ...
تلك اللحظة كانت تساوي الدنيا و ما فيها ...
و انت تتحين الفرص لدخول الحوش ( الممنوع ) ... و تري صديقاتها يتغامزن ...
و انت تلبس ثوب الجدية ... و قلبك يرتعد ... و تبحث عنها بحذر ...
راحت الايام ... و راحت اسماء معها ...
و بقي محفور في الذاكرة بعض نظرات ... وبعض لمسات ... و نصف ابتساماتٍ خجوله ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: Osman Musa)
|
Quote: ياخ مالك ؟ يعني الا بس الوأحد يطير ويدق الدلجة ؟
.. ربنا يرحمك يا هاشم ويرحمنا |
عثمان ياخوي ...
باقي لي كبرنا ... و الجرسة حصلت من كتر البعاد ...
كنت قايل روحي احترفت الهجره و التشرد ...
لكن البلد العجيب داك فيهو شي ما عندو اسم و لا بعرف هو شنو بس بيقعد يزن ليك في راسك كده ...
و يقعد يذكرنا جنس الكلام العجيب القالوهوا اعمامنا و اجدادنا ...
و الله زي ما قلت الله يرحمهم .. ويرحمنا معاهم ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
Quote: عمر ادريس · الأكثر تعليقا · Philadelphia, Pennsylvania مين يصدق يا أستاذ يحى أن ماتحكيه بهذا الطعم الامدرمانى اللطيف أصبح ذكريات ؟ هزانى كلامك والله ونحن شرفنا البقعة من الريف وبعد قليل - فى البرهة - لفظتنا البقعة إلى أطرافها ولحسن الحظ اصبنا شيئا ما من ثمر شجرها وبناتها واصبحنا معكم فى الوجد بها ومنها وإليها أنداد . واصل يا أخى دا حديث جميل وأنيق |
عمر ادريس يا جميل ...
زى ماقال صديقي حيدر قاسم ...
وكأن كل السودان هو أمدرمان. فهي أيام
تغزرت على ظلالها معاني الوصل الطبيعي بين أهل
السودان.
أمدرمان هي رحم السودان, وهي ثديه اللابن العصور
فيا صديقي فلنتمسك بما تبقي من ذكريات ... قبل ان ينتهي بنا الزمان ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: أمير محمد ادريس)
|
ياعمدة بوست متعة - قعّدت الكلام ومتعت الجماهير...
ربنا يعجله خفيف على العمدة الكبير:)
Quote: انا شخصيا ارتبط اسم ( بدور ) عندى بالجمال ... و لم تصادفنى ( بدور ) واحده اقل جمالاً من البدرِ |
احد اصدقائي في الابتدائية كان اسمه جمال وهو شيطان مصور لا توجد في وجهه و لا راسه حتة لا توجد بها علامة ضربة
او حرقة او عاهة . سنونه كانت دائمة غائبة عيونه دائمة الاحمرار ... اتانا استاذ جديد ولسبب ما نده اسم جمال فصاحبا قام على حيله
الاستاذ طلب منه الجلوس ونده مرة اخرى فقام صاحبنا مرة اخرى فاتاه الاستاذ وبدأ يتفحصه ويحرك في وجهه ذات اليمين والشمال
وسأله مرة اخرى انت اسمك جمال؟ فاجابه صديقي بزهو وبصوت عالي نــــعم !! الاستاذ قال ليهو اها دا بمقياسنا نحن البشر ولا مقياس
مخلوقات تانية:)
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: Nasr)
|
يا الله يا يحي بوست متعة رائع حد الروعة
كتير بسال بابا عن الزمن الجميل وبشوف معاملتوا لى امى فى البيت وحبوا المدفق من عيونوا الرسم عليها الزمن الخطوط رغم كبر حجمها وجمالها مرات بضحك عليهم واخجل و اقول ليه يا بابا شنو ما خلاص كفاكم كملتوا الحب كلوا معقول لسة
بقوم يحكى لي كيف اتزوجوا وعاشوا قصة حب جميلة زمن جامعة الخرطوم كانت جامعة و كافترياء البركس وكيف كانوا حافظين جدول بعض وكل واحد بحاول لو من بعيد يسرق نظرة ريد ولحظة جمال وبحكى كيف الناس كانت نقية وقلوبها صادقة ونظيفة وما بحملوا فيها اى نوع من السوء والخيانة
بحسدن مرات والله يا يحي وبزعل على جيلنا والتغير الحصل في الدنيا ياريت لو كنا من الجيل الزمنوا كان جميل
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: وضاحة)
|
Quote: زمان كان في ود قبانية مذيع كنت بحسبه أحسن مذيع في هنا أم درمان وإشتغل معانا ود قبانية "عصام" كان من أظرف خلق الله ومرة في أمريكا لميت في ود قبانية غناي خلاص وهسع طلع لينا ود قبانية كتاب كتابة طاعمة
لله دركم وواصل وخلي قلبك دافئ زي ما هو لكن تخن جلدك البراني شوية عشان ما تقرف وتفز مننا سريع (عندنا خبراء عكننة بمزاج) |
Nasr يا جميل ...
المذيع الزمان ده يا عمنا عبدالكريم قباني او اخوه المرحوم احمد قباني ...
تحياتي ليك و علي كلماتك الجميله ...
و التحيه لكل آل قباني في اصقاع الأرض ...
اما خبراء العكننه .. فالله يديهم العافيه ...
انا عشت زمن جميل في سودان اجمل ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
Quote: بقوم يحكى لي كيف اتزوجوا وعاشوا قصة حب جميلة زمن جامعة الخرطوم كانت جامعة و كافترياء البركس وكيف كانوا حافظين جدول بعض وكل واحد بحاول لو من بعيد يسرق نظرة ريد ولحظة جمال وبحكى كيف الناس كانت نقية وقلوبها صادقة ونظيفة وما بحملوا فيها اى نوع من السوء والخيانة
بحسدن مرات والله يا يحي وبزعل على جيلنا والتغير الحصل في الدنيا ياريت لو كنا من الجيل الزمنوا كان جميل |
وضاحه يا بتنا ...
زمنكم زمن ملامحه معكره ...
من كتر الظلم و القمع ... القبح صار هو الأعم ...
الناس جميله ... و لكن الظلم شوه معالم الجمال ...
الله يحفظ ليك والديك ... ويديم المحبه بيناتهم ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
وردي قاعد قدام بشير و هو بيعزف مقطوعة يا تري
قال ليهو يا بشير دي غنيه جاهزه ... رأيك شنو نغنيها ...
كدي نخت عليها الكلمات دي ...
يا تري ... حجبوك من عيني ليه
يا تري .. حسدوك في حبي ليه ...
مش قدر حبك ولا ايه ...
بشير عباس قال ليهو لا انا دايرها مقطوعه موسيقيه و بس ...
يقوم احمد المصطفي و كابلي كمان يدندنو بيها ...
عمالقه ... جميعهم ...
مزيكا تسلب القلوب ... وكلمات تتحدث بلسان الملايين ...
الف رحمه ونور تنزل علي الزمن الجميل ...
و ( برضو ) ... ياتري حجبوك من عيني ليه ؟؟؟
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
ولما تزعل أبقى باسم
حتى في زعلك معايا
وكأنه يتحدث بلساني ...
رحمك الله يا عميري .. _________________________________________
يا قمر أنا ما بطولك اديني من نورك وميض شان أنوِّر وأبقى طولك يا قمر ليلك غـــُـــنايا وليلك أكتر من حكاية دي فرحة بتطول المدينة دعوة لي همس الصبايا ولما تزعل أبقى باسم حتى في زعلك معايا شان البلد ... كل البلد تفرح تقول القمرة جاية ناوية تحضر لي مثولك وأصلو ما فيها البطولك أديني من نورك وميض شان أنوِّر وأبقى طولك يا قمر
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
لسع دُقاقْ و ما استوى حُرّاسُة مِرتينُن عوى
في اغنية الموز روي ...
سألني احدهم عن ما المقصود بمرتينن عوي ...
( المرتينه ) هب البندقيه ال Martini زى البندقيه ابو عشره ...
صناعة بريطانية سويسريه ...
فمرتينن عوي ... يعني صوته من الطلقات زي العواء ... يعوي عوي ...
و يا ويله البيقرب من الموز اللسع دقاق و ما استوي ...
اما الزناتي و هلال ... لما قال زينة الزناتي مع هلال ....
هم الزناتي خليفه و ابوزيد الهلالي ( السيره الهلالية ) ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
Quote: واجتمعنا ... من امدرمان و الخرطوم ... والعيلفون ... وود مدني ... وكوستي ...من الأبيض ... والفاشر و كتم ... ونيالا ... والكوه ...وربك ... وكسلا ... و الغريبه ...و دنقلا ... وطيبه الشيخ عبدالباقي ... و سنار ... و شندي ( فوق ) ...
|
يا سلام عليك يا يحيى؛ تحيا انت وتحية لك.. تعرف ما تتحدث عنه في هذا البوست هو (الوطن). وهو في صحيحه امتداد للأسرة. فبينما كنا نضحك علي بعضنا في الكورة وفي اللعب وخلافه يظل الأحساس هو أحساس أسري (وطني) صادق لا مراء فيه. هذا ما عشته انت و(أنا) وآخرين في جامعة الخرطوم. وقد عشنا نحن أبناء الريف تنوعا ربما أكبر وأوسع في داخليات المدارس الثانوية الكبري مثل خورطقت وحنتوب والفاشر الثانوية. ذلك سودان ذلك الزمان الذي تكاد تنعدم فيه النظرة العنصرية الجهوية الضيقة والتي صارت (بفعل فاعل أثيم) جرثومة للتهميش وازدراء الآخر مما قاد للنزاع المسلح والبلاوي. وكيف كان الناس يحتفون بالتفوق والمقدرات القيادية دون الألتفات لعرق او لون. حتي الكيزان كانت كل قياداتهم آنذاك من ما يعرف الآن بالهامش: جار النبي؛ يحي بولاد؛ تجاني ع/القادر؛ بناني ..
رمت بي الصدفة المجردة أن أسكن في البركس في عامي الأول في جامعة الخرطوم في داخلية (مكتب النشر) في عنبر قوامه حوالي عشرة جلهم من (ودمدني) ألا أنا. لم أشعر بالغربة بينهم بل صار مولانا محي الدين وودسلمان وودالعمدة ومامون واحمد فضل وعادل سليمان (الذي ذكرته انت في بوست سابق) ومصطفي حسين أصدقاء اشتاق اليهم علي الدوام. زرت ودمدني معهم وانا طالب ودخلت بيوت بعضهم لترحب بي الأمات والأخوات والعمات وكأنني ابنهن. وزرتها وانا رجل مع زوجتي والتي احبت المكان والناس. هكذا السودان والذي يوشك أن يضيع منا .. تبكي عليه يا يحي بمعونة قلم رشيق وأسلوب سهل ممتنع؛ ولكننا (نجعر) عديل كدا لذات الوطن. فكل شئ يمكن نسيانه الاّ الوطن!! أكتب فنحن نقرأ ونشاركك الأحساس شفت كيف يا صديقي! قيل أن الشيخ البرعي، عليه رحمة الله، كان في الطائرة في طريقه للحج أهتزت الطائرة بفعل زوابع جوية قوية فاضطرب المكان بالصراخ والحوقلات من الركاب فوقفت امرأة وصاحت: "يا الشيخ البرعي وأبوك تلحقونا وتفزعونا..) ولم تكن تدر أن الشيخ يجلس ورائها بمقعد فقال لها: (أقعدي يا المبروكة وقولي الحي الدائم الشيخ ممكون معاكي سوّا! (والعهدة علي الراوي)
فالشاهد في الموضوع يا يحي يا خوي أنو نحنا ممكونين بحب الوطن معاك سوّا سوّا!! بس قول يا حي يا دائم!!
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: BALLAH EL BAKRY)
|
Quote: يا سلام عليك يا يحيى؛ تحيا انت وتحية لك.. تعرف ما تتحدث عنه في هذا البوست هو (الوطن). وهو في صحيحه امتداد للأسرة. فبينما كنا نضحك علي بعضنا في الكورة وفي اللعب وخلافه يظل الأحساس هو أحساس أسري (وطني) صادق لا مراء فيه. هذا ما عشته انت و(أنا) وآخرين في جامعة الخرطوم. وقد عشنا نحن أبناء الريف تنوعا ربما أكبر وأوسع في داخليات المدارس الثانوية الكبري مثل خورطقت وحنتوب والفاشر الثانوية. ذلك سودان ذلك الزمان الذي تكاد تنعدم فيه النظرة العنصرية الجهوية الضيقة والتي صارت (بفعل فاعل أثيم) جرثومة للتهميش وازدراء الآخر مما قاد للنزاع المسلح والبلاوي. وكيف كان الناس يحتفون بالتفوق والمقدرات القيادية دون الألتفات لعرق او لون. حتي الكيزان كانت كل قياداتهم آنذاك من ما يعرف الآن بالهامش: جار النبي؛ يحي بولاد؛ تجاني ع/القادر؛ بناني ..
رمت بي الصدفة المجردة أن أسكن في البركس في عامي الأول في جامعة الخرطوم في داخلية (مكتب النشر) في عنبر قوامه حوالي عشرة جلهم من (ودمدني) ألا أنا. لم أشعر بالغربة بينهم بل صار مولانا محي الدين وودسلمان وودالعمدة ومامون واحمد فضل وعادل سليمان (الذي ذكرته انت في بوست سابق) ومصطفي حسين أصدقاء اشتاق اليهم علي الدوام. زرت ودمدني معهم وانا طالب ودخلت بيوت بعضهم لترحب بي الأمات والأخوات والعمات وكأنني ابنهن. وزرتها وانا رجل مع زوجتي والتي احبت المكان والناس. هكذا السودان والذي يوشك أن يضيع منا .. تبكي عليه يا يحي بمعونة قلم رشيق وأسلوب سهل ممتنع؛ ولكننا (نجعر) عديل كدا لذات الوطن. فكل شئ يمكن نسيانه الاّ الوطن!! أكتب فنحن نقرأ ونشاركك الأحساس شفت كيف يا صديقي! |
بله يا بله ...
اقول ليك شنو ولا اعيد ليك شنو بس ...
الله يرحم عادل سليمان رحمه واسعه ...
رأيت في بوست آخر احد الاخوة يتحدث عن كناب ثورة شعب وانه رآه آخر مره في مكتبة الفجر للعم محمد سيد أحمد في مدني ...
ضحكت كثيراً ... و حزنت أكثر وانا اتذكر تلك الايام في مدني واول مره ازور فيها المكتبه ... وقابلت العم محمد سيد أحمد ...
وادركت وقتها ان مثل ذلك الرجل لا يأتي من صلبه الا مثل مامون سيداحمد ...
الله يرحم تلك الايام يا بله ...
لا اعلم هل سيكتب لنا ان نجتمع في سودان نقي و معافي كالذي عشناه !!!
لا ادري ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
تحية الأخ يحي قبانى طلب خاص لو تكرمت أرجو نقل البوست للربع القادم وإن عز الطلب أرجو التكرم برابط حفظ أغنية رمضان حسن الأخيرة التى زينت بها البوست دنيا الغرام ما احلاها ...
جادت علي بي لقاها ...
محبويتي يوم لقاها ...
شافها الفؤاد حيّاها ... *** دخلت البوست فى الساعات الأخيرة عدة مرات لأسمع الأغنية دى تحديدا وقد سمعتها قبل سنوات بصوت الجقر على العود . وما أروع غنا رمضان حسن . تحية وتقدير .
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: احمد الامين احمد)
|
Quote: تحية الأخ يحي قبانى طلب خاص لو تكرمت أرجو نقل البوست للربع القادم وإن عز الطلب أرجو التكرم برابط حفظ أغنية رمضان حسن الأخيرة التى زينت بها البوست دنيا الغرام ما احلاها ...
جادت علي بي لقاها ...
محبويتي يوم لقاها ...
شافها الفؤاد حيّاها ... *** دخلت البوست فى الساعات الأخيرة عدة مرات لأسمع الأغنية دى تحديدا وقد سمعتها قبل سنوات بصوت الجقر على العود . وما أروع غنا رمضان حسن . تحية وتقدير . |
الجميل أحمد الأمين ...
قدمت طلب ( نقل ) لهذا البوست ...
نأمل من أخونا بكري مراعاة ظروف العاشقين ... :)
رمضان حسن يا استاذنا فعلاً سبق عصره ...
خليك قريب ... في كم ( دُرّه) كده جايين في الطريق ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
يا سلام يا يحيى
عادل سليمان وما ادراكما عادل سليمان
قابلته فى العام 93 فى كسلا وكان قد استقر هناك وذهبت انا الى فرز عطاء كان شركته مشاركة فيها و قضينا بعد الانتهاء من العمل وقتا جميلا وكان عادل سليمان هو نفسه الشخص الجميل اللطيف الحبوب صاحب القفشات النادرة و الروح الخفيفة.
هيجت فينا الشجون يا يحيى
بالمناسبة رأيت ردك فى بوست هانى روجيه ولم استطع الرد لآن الكمبيوتر كان بدون كى بورد عربى. اليوم البوست اختفى ..لم اجده ..تمت ارشفته
ارجو ايصال التحية و السلام الحار لهانى ووالديه
لك المودة والتحية وكل سنة وانت طيب
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: معاوية المدير)
|
Quote: يا سلام يا يحيى
عادل سليمان وما ادراكما عادل سليمان
قابلته فى العام 93 فى كسلا وكان قد استقر هناك وذهبت انا الى فرز عطاء كان شركته مشاركة فيها و قضينا بعد الانتهاء من العمل وقتا جميلا وكان عادل سليمان هو نفسه الشخص الجميل اللطيف الحبوب صاحب القفشات النادرة و الروح الخفيفة.
هيجت فينا الشجون يا يحيى
|
الله يرحم عادل رحمه واسعه ...
هي ايام لا تنسي يا هشام ...
عشناها طولاً و عرضاً ...
لا اعلم ان كانت ستعود للوطن عافيته التي عرفناها ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
Quote: أحي يا الصقط، عصرك المطر المتجمد وخلآك تطلّع هذا الدعاش الجميل الذي أصبتنا برزازه حتي وشوشنا من خلآلة العبير فأنتشينا بهذا الحكي الطاعم. قبل دخولي هنا إفترعت بوست تقريباً في نفس الموضوع!!!، يا أخي الصقط دا كعب خلآس. والله مشتاقين، لكم وللعازة معاً.. |
ود المدير يا جرسه ...
والله اكضب عليك ... العصره اصلها ما خلتنا ...
بس ننسي احيانا ... و احيانا تجيك اشياء تهيج الذكري ...
بالله يا معاويه ... بردا جنس الاحنا فوقوا ده ... ما يستاهل حلة عصيدة دخن كاملة الدسم كده ...
و تكون تحت البطانية الخشنة ديك الزى حقة قطارات السكة حديد زمان ...
ما تمرق راسك من تحتها الا بعد تشم صحن العصيده وصل تربيزة الحديد المطفجة الجنب سريرك ...
تضرب العصيده ... باللبن و العسل .. و جسمك يولع نار بالله زى الساونا ...
تقول لي فريزنج رين !!!
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
الاخ يحي قباني ان شاء اللة كويسين مع البرد العجيب. واديك قدرما عايز في الدنيا دي.. واديك قدر جمال البوست بتاعك ده.. واديك قدر ما ادانا من جرعة ازالت عنا ما استعصى على وصفات الاطباء من احباط سكن جوانا.. والله نسينا الفرح ..وغلبنا الطرب شكراً ليك يا جميل على هذا الجمال استغرب من الذين دسوا في ديننا الحنيف حرمة الغناء .. الله لا كسبهم لا في الدنيا ولا في الاخرة لك تقديري واحترامي
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
أيوة لقيتها أخيرا يا يحي! ينعم صباحك خير ويسعد مساك النور! وشكرا لأرجاعي لهذا المكان وعبير ام درمان وأريجها الذي يفوح من جنباته
وشكرا يا يحى مرة أخري علي استراحة أخري لطيفة ظريفة، أنيقة وريفة تمور بالأدب والفن وذكريات أم درمان كرش الفيل و (بروتوتايب) الوطن كلو. لكن بطريقتك دي أمانة ما حتورط معاك ناس كتااار! من جماهير المشوكشين! كدي شوف: "النوم يضرّو ضرور" دي حلوة كيفن! تمعن فيها: طرفي السهير يا سمير النوم يضرّو ضرور وعذابي لو سرّاك طبعا أكون مسرور واحد اخونا (فضّل عدم ذكر اسمه) ماخد ليه شاكوش قبل تلاتين سنة! قال لي كلما يهبش محلتو الكرضمة موجودة زي ما هِي والوجع في بكانو - ليوم الليلة! شفت كيف .... باين عليك داير تضحك علينا بنياتنا ووليداتنا يا يحيى يا خوي! اكتب يا صديقي فانت كاتب ونص وخمسة! والله العظيم!!
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: BALLAH EL BAKRY)
|
Quote: باين عليك داير تضحك علينا بنياتنا ووليداتنا يا يحيى يا خوي! اكتب يا صديقي فانت كاتب ونص وخمسة! والله العظيم!! |
بله يا صديق الزمن الجميل ...
اولا يسعد مساك النور ...
تعرف واحد من اقرب الناس لي هنا قال لي انت حسي لو اولادك قرو الكلام ده !!
قلت ليهو ... يا ريتهم يقروهو و يعملو نصو ...!!
نور من جمالك بان لا نور شموس لا بدور فقت المعاك فى الجيل فقت المعاك فى الدور يا الفى علاك بعيد وسماك سابع دور
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
Quote: Abdelwhab Altom · الأكثر تعليقا · Omdurman Al-ahlia University الله يرجعنا الى امدر ونعوده انشاء الله وربنا يرفع عننا البلاء الجاسم فى صدر الشعب المسكين سنين عشان العوده تكون كامله يا رب وكل اول ليهو اخرامدر فى قلوبنا ونتمنا العوده رد · أعجبني · متابعة المنشور · 10 يناير، الساعة 07:03 مساءً |
آمين يا ود التوم ...
اذكر في نهاية تمانينات القرن الماضي ...
كنا شغالين في الرياض يا عبدالوهاب ...
واحد حبيبنا عمل استقدام لي نسيبه و نسيبته ...
عمنا جا و راسو والف سيف ما يقعد ...
قال بس اجي ازوركم و ارجع ...
قلت ليهو يا عم تجاني ... الرياض دى ما سمحه ...
اتذكر كنا قاعدين في كراسي قصيره كده ... وايده ممكن تحصل الواطه ...
قال لي وهو بيكشح في الواطه ...
" كباية شاي قدام بيت محمد اخوي في ابروف بي رياضكم دي كلها ... "
الله يرحمو ربنا اكرمو وتوفي وسط اخوانه في ام در ... ودفن جنب احبابو ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
Quote: و عطف الريم ... لمن لا يعلم ... و يريد ان يتألم معنا ...هي نظرة الريم الي صغيرها ...سالت اهل الباديه ... فقالو لي ... حينما يذهب الريم الي المرعي ...تاخذ صغارها معها ... و تخفيها في اكوام من القش بعيده عن مرعاها ...ولكنها علي مرمي النظر ... لخوفها من هجوم وحشي ... فالريم تقدر علي الهرب وصغارها لا والريم وهي ترعي ... لا تنظر الي مكان صغارها خوفاً من تحديد مكانها فترمقه بنظره ( جانبيه ) من عيونها ... للإطمئنان وهذا هو عطف الريم !!
|
الله عليك يا يحي يا فنان يا أديب! من أين لك معارف أهل البوادي هذه أن لم تكن سودانيا أصيلا مفطوما بحب البلد ومعبوكا بعقد جلادها! وطالما القصة جرّت لوليداتنا فدعني اشرح لهم قليلا: الريم هي نوع من الغزلان ويأتي ذكرها كثيرا في اشعار الحب والغزل الشعبي حيث توصف بها المحبوبة لتطابق الصفات الجمالية بصفة عامة. وقد يأتي ذكرها بأسماء كثيرة منها (الديفة) و(المهرة أوالمهيرة) و(العنز) و (ود الأدرع) و (البكيرة) و(الجَفَل) و(البرروبة )!. من صفاتها هي التحنان والحماية لصغارها. انظر قول أحد شعراء الدوبيت واشارته لحماية هذه الريم لصغيرها والتي أشار لها ب (ود الأدرع) قال: ود الأدرع المن داب حقب قرقابو أمّو مدرجاه ومن الكبار تجّابو نزلتبو العتيق في الهجعة تتكابو نظرك في الوحوش فرضَة وقليل تيرابو
فنزلوها الماء في هجعة الليل وهي تمشي خلسة هو نوع من الحماية لصغارها والتي تخشي عليها من هجوم وحشي مفاجئ كما ذكرت. أما في وصف المحبوبة بالمهرة فقد قال الآخر واصفا أياها ب(المهرة): مهرة دنقلا الفي العرضة ماخدة الزينة مما قال سلام أنا والمعاي ضلينا
وقد أورد عبيد الطيب (ود المقدم) في بوست له عن وصف المحبوبة ب (الديفة) قول أحدهم: ديفة الروبزن دخلن كويع الخُشة أجمل خلقة من صُل الدبيب الوشّة! وسنكتفي بهذا والذي ما أردت التطرق اليه لولا أعجابي باشارتك البدوية ل(الريم) وفعلها في حماية صغارها؛ فمعذرة أن لم يكن في مسار البوست الرئيس.. ودمت يا صديقي.
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: BALLAH EL BAKRY)
|
Quote: الريم هي نوع من الغزلان ويأتي ذكرها كثيرا في اشعار الحب والغزل الشعبي حيث توصف بها المحبوبة لتطابق الصفات الجمالية بصفة عامة. وقد يأتي ذكرها بأسماء كثيرة منها (الديفة) و(المهرة أوالمهيرة) و(العنز) و (ود الأدرع) و (البكيرة) و(الجَفَل) و(البرروبة )!. من صفاتها هي التحنان والحماية لصغارها. انظر قول أحد شعراء الدوبيت واشارته لحماية هذه الريم لصغيرها والتي أشار لها ب (ود الأدرع) قال: ود الأدرع المن داب حقب قرقابو أمّو مدرجاه ومن الكبار تجّابو نزلتبو العتيق في الهجعة تتكابو نظرك في الوحوش فرضَة وقليل تيرابو |
بله البكري يا صديقي ...
امتعتني بكلماتك ...
ارجوك ان تواصل ...
نحتاج للجمال في هذا الزمن الشين ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: munswor almophtah)
|
Quote: قبانى الجمال الفطرى غير المصنوع ياخ هذا جهد جبار أن تجمع الدرر تحت سقف واحد مع تيمك المكتمل المتجانس ياخ بحثت عن أغنيه ظبية الثغر الحبيبه شاعرها الطيب العباسى وغناها فنان توفى فى حادث حركه علها عندكم ياخ ولك السلام ياخ |
التحية لمنصور المفتاح ...
تسلم يا جميل علي حلو كلماتك ...
اليوم بمشيئة المولي ناتيك بظًبيّة الثغر الاديبه ...
موجوده في الحفظ و الصون ...
هي و ماجارته في اللحن ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
لحدي ما تجي مقبل لمنصور ب(ظبية الثغر) أنا داير آخد سندة مع رائعة العم عبيد عبدالرحمن ومع هاشم ميرغني سلطان العاشقين! ومعذرة للتكرار صفوة جمالك صافى الماء على البلور ينعم صباحك خير ويسعد مساك النور
نور من جمالك بان لا نور شموس لا بدور فقت المعاك فى الجيل فقت المعاك فى الدور يا الفى علاك بعيد وسماك سابع دور ذقت الهلاك يا ملاك فى هواك هلاكى بدور
يا فرحة المحزون يا نفثة المصدور مرآك يزيل الهم ويمحى الأسى الفى صدور أسمح لى أتلو سناك والدور يفاخر الدور ويفوح نشيدى الفيك زى نفحة الريفدور
أنا فى شقاى ولهان يا الفى النعيم مغمور فرشى القتاد يا جميل ثم اكتسائى جمور يرضينى ما يرضيك والناس أمورها أمور ومحال أسيبو هواك اذا السماء تمور
بين القلوب ميزان صفا وزنها المعبور قلباً يميله الحب وقلباً يميل مجبور انسان عشق انسان وانسانه ما مخبور شخص الوفاء المفقود ولفقده مانى صبور
طرفى السهير يا سمير للنوم يضره ضرور وعذابى لو سرك طبعا أكون مسرور أوعد جفونى غميض والطيف يزورنى مرور أفرح وأقول يا ليل وأشرح وأحاكى سرور
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
Quote: Mohamedadam Kjoul يا سلاااااااااااااااااااااااااام يا قباني بوست متعه وحكي مرتب وسرد جميل عيشتنا في عالم تاني وااااااااااااااااااااااااااااااااااااااااااااااااااصل ياهندسه رد · أعجبني · متابعة المنشور · 18 يناير، الساعة 04:53 صباحاً |
نموت كمد يابوحميد يعني ...
ما لازم نمرق الجوانا ...
البلد سرقوها ... لكن الجوانا ما قدروا عليهو ....
تسلم يا حبيب ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
يحى يا ود قلبا كما قال المرحوم على المك : امدرمان حيث تعلمنا كيف يكون العيش صبابة ياخى مالك داير تخرب علينا كبرنا هداك الله انت ما سمعت كلام ود ام درمان محمد سعيد العباسى ذلك الفحل اذ يقول: و قد سلا القلب عن سلمى و جارتها و ربما كنت أدعوه فيعصيني يا بنت عشرين و الايام مقبلة ماذا تريدين من موعود خمسين قد كان لي فيك قبل هذا اليوم هوى اطيعه و حديث ذو افانين نعم كان لنا فى مراسحها قبل اليوم هوى و حديث ذو افانين الله يسامحك يا شفيف،،،
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: صديق الموج)
|
Quote: يحى يا ود قلبا كما قال المرحوم على المك : امدرمان حيث تعلمنا كيف يكون العيش صبابة ياخى مالك داير تخرب علينا كبرنا هداك الله انت ما سمعت كلام ود ام درمان محمد سعيد العباسى ذلك الفحل اذ يقول: و قد سلا القلب عن سلمى و جارتها و ربما كنت أدعوه فيعصيني يا بنت عشرين و الايام مقبلة ماذا تريدين من موعود خمسين قد كان لي فيك قبل هذا اليوم هوى اطيعه و حديث ذو افانين نعم كان لنا فى مراسحها قبل اليوم هوى و حديث ذو افانين الله يسامحك يا شفيف،،، |
موج يا فنان ...
الكبر يا صديق عباره عن ( رقم ) ليس إلا ...
الكلام الاحساس ...
ما تحبس نبضك يا حبيب و اطلق لي دواخلك حريتها ...
آخرها ما اكتر من كوم التراب اياه !!!
تعرف يا صديق كان انا ما سمعت الغنا السمح ده كل يوم و الله اتخنق ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
كم غريب هو الانسان ...
تسعده أشياء ... و تحزنه أشياء ...
ليس غرابه في ذلك ...
و لكن الغريب ان الأشياء ( نفسها ) ...
تسعده تارة ... و تحزنه تارة ...
اتينا الي هذه البلاد بعد غربه وجيزه في بلاد العم سعود ...
لم نعرف معني العواصف الثلجيه .. ولكن كنا نتشوق لوصول اولها ...
و كم فرحنا بأننا وسط اكوام الثلوج ... بل تجد لنا صورا كثيرا و نحن فرحين بذلك الاعجاز الرباني ...
وللحق كم هو جميل منظر الثلوج وهي تكسي الأشجار و اقبية المنازل ...
مر بنا الزمان ... و طالت المسافات من وادي المحنه ...
حيث نشأنا .. و عرفنا معني الحريه ...
هي نفس الحريه التي ابعدتنا من ضيم الحاكم ...
رجعت نفس الحريه التي اسعدتنا حينما انطلقنا نضرب في الأرض وراء الرزق و العيش الكريم
رجعت ( تهبشنا ) في دواخلنا حينما تحاصرنا اكوام الثلج ... و يحاصرنا برد الطبيعه و برد ( الإنسان ) ...
لماذا نحن هنا ؟
و هل سننتهي هنا ؟
جلست حبيساً اليوم بعد الغاء كل مواعيدي التي اجبرتني عليها عاصفة ثلجية اتت علي كل شئ ...
و لجأت الي صومعتي في اقصي ركن في منزلي حيث ثروتي من الكتب ... ومن الأغاني ...
ووجدتني ابحث عن اغنية لطالما عشقتها ... و لطالما حكت عن حالي ...
قلنا راح مع الايام عدى من ايدينا راح اصلو يا العصفور دا حالك من ما سويت ليك جناح يعنى كان صارحت مالك نحن ما بينا الصراح كان ضميرنا ارتاح وحاتك و بقي لومنا عليك سماح **************** كيف نلوم عصفور حنين مرة بيقاسى الرياح و مرة تلقاهو بيغنى فوق فريعو مع الصباح و مرة فى وادي المحنة و مرة فى ابعد بطاح طاوي حريتو في جناحو وعمرو ما ملٌ الرَوَاح *************** اطرا يا عصفور حبابيبك و انت فوق حلتنا راحل جايبك الصيف من ديارك شايلك الشوق للسواحل فرح ايامنا الحزينة وبالسلامة تاني واصل كان نسيت موسمنا ديّا فى المواسم الجاية حاول
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
هيامي بيك يا فاتن مصدره الإنصاف انصفت حسنك حب وانصفت حبي عفاف ذوبت روحي معاني دقيقة في الاوصاف هوّمت نفسي خيال في معبدك طوّاف سكبت روحي على كاس المحبة سُلاف هل بعد هذا أكون لسهام نواك أهداف
عبدالرحمن الريح كتب و ابدع ... لكن المجنون كما رثاه البديع عثمان خالد وقال : دي عملتها كيف يا شقيق القلب.. مش وعدنا إنك ترثيني! مش كان الأوقع يا مجنون.. إنو يعزوكا وتنعيني
ذلك المجنون حينما اسمعه في انصاف ... يصيب جسمي خَدَر ... ولا اقوي علي الكلام ... ولا اري نفسي الا في جلسة علي رمله بارده علي شاطى النيل ... جالس بين الاحبه ... ندندن و نتسامر ... نعد النجوم ... و لا نحسب لها عددا ...
| |
|
|
|
|
|
|
Re: أشوف حبيبتي .. و أنظر خدودها ... عساها ترحم ... تكون ودوده ... (Re: يحي قباني)
|
لا أكتب الشعر ...
و لكني احب التأمل فيه ...
كثيراً ما اتوقف عند ابيات و مقاطع ...
و لكن ما كتبه الحسين الحسن في حبيبة قلبي او حبية عمري ...
يدهشك فيه انه يلامس اشياء و اشياء فينا ...
الغريب فيه ... انه حتي ( فَضْح ما بينهما ) ... احتفي به الحسين الحسن في حبيبة عمري ...
حبيبة عُمري ... من الاغنيات التي تلازمني اينما حليت ...
تستوقفني كثيراً هذه الكلمات بالتحديد
فَفِي ذاتِ يومٍ رَقيق النسيمِ كثيرِ الغيومِ ... قصير العُمر ذكرتُ مكاناً عَزيزاً عليّ أنتِ بِه و أنا و الأُخر ذكرتُ حديثكِ ذاك الخجولَ و صوتُكِ ينسابُ منه الخَفَــر حبيبة قلبــــي ... تقولين ماذا ...تقولين ويحي ... وهل كُنتُ أفهمُ ...حَرفاً يمُر ...
| |
|
|
|
|
|
|
|