كل عام زي اللي فات نفس التفاصيل والحلم .. نفس الاماني الطيبات .. البنايات.. النفايات .. الاشارات .. الغنيوات الكتابات .. الشعارات .. العبارات .. الحكومات .. القيادات .. الحروبات.. اجتماعات .. اتفاقات .. اختلافات. انتخابات .. برلمانات .. واغتيالات .. الهنايات .. وبلدنا اكعب من امس .. السيد الصادق يبيع .. والميرغني المأمور يطيع.. ويااا شعبنا المسكين تضيع.. والرادي للاخبار يذيع.. نفس الملامح والصور .. نفس التمارين والكور .. نفس اللعب نفس الكفر .. ونسجل اللاعبين كتاااار .. وتجيب جرايدنا الشمار .. تعلن وصول لاعب خطير .. يلعب سنة ..شن اللعب .. وفريقنا قبل يرك يطير .... ولسه الصراع مازال طويل ... جرح الوطن ما زال كبير .. ونحن بنراقص في البشير .. وكل عام والناس بخير .. مات جون قرنق يظهر خليل .. يرحل خليل ..حيبين بديل ... ونبيع ضمايرنا في مزاد ونكوس عن الوطنية زاد .. وطريقنا أطول من طويل .. جامعات تخرج بألالوف .. وشبابنا في الطرقات يطوف .. تعبان يفتش عن عمل .. بحلم يغير للظروف .. والماسمع باكر بيشوف .. والعمرو ماضاق اللحم .. كيفن يفكر في الخروف .. ؟ و غنانا راجع لي وراء .. حفلاتنا كلها وراء وراء .. وقيمنا راجعات لوراء. جاري الشحن .. وبناتنا جاريات وراء وراء .. وطاعني دايما بي وراء ... وقاصد محبتي تخسرها . وإنشاء الله ياخ راجل مرة.. وبناتنا كايسات العرس .. كان بالكريمات والحبوب .. وحرامي سراق القلوب .. وروني كيفن بس يتوب .. اذا حال البلد مايل.. وكان كل البلد منهوب .. بنغش في نفسنا نفتخر ..ونكاوي في باقي الشعوب .. ولسه بنكتر في الكلام .. كلم قرايبك بقرش .. واصل حبايبك وانتعش .. عالم جميل .. كل عام وانتم بخير .. ريح بالك .. وارحم حالك .. وبلدنا كان سوداني ون) 1( .. والليلة اصبح تو) 2( وطن ... وممكن يكون اكتر مما تتوقع.. فقط اضغط نجمة .. حرب .. مربع .. ... معك في كل مكان ... آلام ...على مر الزمان .. وين الاهل ..؟ ناسنا الحنان !.. اصبحت كيف ؟ ياجاري كيف ..؟ والام تنادي على الولد فوق للصريف !... هاك ياولد..ودي الدقيق جيب لي من امك رغيف .. بلادي انا بلاد ناسا مواريثهم كتاب الله .. بنغش في نفسنا نفتخر ..ونكاوي في باقي الشعوب ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
امجد الجميعابى
فيس بوك
تويتر
انستقرام
يوتيوب
بنتيريست