كتب الكاتب الفاتح جبرا المتوفرة بمعرض الدوحة
|
|
 قاموس المفردات العامية فى كتابات محمد الحسن سالم حميد
|
الاهداء:
الى تلك الروح الطاهرة التى علمتنا الحب
ثم حلقت فى سلام الى عوالم كما تشتهى
(الحبيب حميد)
الى كل الغلابة التعابة المنهكين
(نحن)
الى كل من استعصيت عليه بعض المفردات
الغارقة فى المحلية
(بعضنا)
الى من تبقى من رائحتهم اولئك الذين رحلوا
ليتركوا فراغ مستف بالاسى
(ابوى الشريف محجوب شريف)
تمنياتى له بموفور الصحة والعافية...
|
|
 
|
|
|
|
|
|
|
|
Re: قاموس المفردات العامية فى كتابات محمد الحسن سالم حميد (Re: ماريل)
|
كتب لنا امعانا فى المحبة ومع سبق الحب والتودد:
يا عرق يا اسمى ريحة..
من نزيفو الاسمرنى...
طيب الوردة الجريحة...
خلقو والطيبة ام معانى...
شعب كان جيت للنصيحة
اصلو ما مفروض يعانى.........................
________
وكتب يرثى رفيق دربه (مصطفى سيداحمد)مرثية اظنه حملها شيئا من رثاه لنفسه وفى كثير من جزئياتها تشئ ببصيرة متقدة وشوافة فقد رثاء بها صديقه ونفسه وهو يقول:
فهل يعنى النهاية الموت وينبعزق غناك سدن
ام انو الغيم حينسابق على الارض العزيزة فدن
.........................................................
وايضا يحكى لنا ببصيرته المتقدة خبر رحيل رفيقه ورحيله هو شخصيا اذ يقول:
باغتنا ريح الفجعة ليل
فرنب في جوفنا مرابنات الصبر
شات سعن الجلد
صادنا الذهول ..
زي التكنو قبل دا
ما فارقنا زول بعد الرسول
واللاّ التقول أول قلوب في الدنيا
يغشاها القدر بعدن تضيع منّو الدروب
تنطمبج الساحات حريق
يدغي الطريق المحتمل
كل الفريق سوقر وراك
يا جرحنا الكيف يندمل
| |
|
|
|
|
|
|
|
|
|
Re: قاموس المفردات العامية فى كتابات محمد الحسن سالم حميد (Re: ماريل)
|
وامعانا فى الشوف كتب بلسان حالنا فى فجعتنا عليه وبحثنا بين سرابات غيابه المرير:
يا راحلين عِنْ دُغُش الليل .. ما لاقيتو جناياً زي
تكية نخل الفجر الجاسر .. في المترة عراجين ضي
يا رعّاوة العرب الرُّحّل .. ما لاقاكم في المطراني
في كاويق الجرف الأمحل
بين أسراب الرهو الراحل .. ساند أكتاف الليل الميّلْ
| |
|
|
|
|
|
|
|
|
|
Re: قاموس المفردات العامية فى كتابات محمد الحسن سالم حميد (Re: ماريل)
|
(طعم الدروس)
من اول النصوص الذى تعرف عبرها المستمع الى الشعر وقد كتبها فى المرحلة الثانوية عندما اضطرته الظروف ان يسافر بعيدا عن اهله فى نورى ويذهب للدراسة فى مدينة عطبرة
تغنى بها الفنان الراحل (ياسين عبد العظيم) واختارها بعد ان لمس شاعرية فذة فى الصبى اليافع (حميد) ومن ثم امتد التعاون الفنى بينهما
(النص)
(شن طعم الدروس)
وريني شن طعم الدروس مادام بكانا مشى قطر
وكيف ذاتا ترتاح النفوس تقبل قرايتاً فى سفر
يايمه حان الإمتحان من وقتو بس فاضل شهر
ما اظنى من جور الزمان انجح واجيب ليكم نمر
كيف ذاتى يا نبع الحنان انجح من آلام السهر
عمرك سمعتيلك ######## خاض المعارك وانتصر
*********************
زينوبة كل ما افتح كتاب القاك فى أول سطر
القى الجداول والصحاب القى الجناين والتمر
فى الحصة عقلى أنا قام سدر يمه المدرس لو فكر
كان بلقى قاعد فوق ككر فى الدونكا لسع ما فطر
يسمع كليمة يا عشاي وأغلى الحكم عند الضجر
أنا قلبى كلو عليك جناى وقلب جناى على حجر
والله موش لو كان نهر لو كالنى بي سيطان بقر
مادام عقيل الجن سدر ما اظنو من عندك حضر
**************************
بذاتو ابوى تلقاهو قام فاتح كتابو مع الفجر
يقرأ ويرتل فى كلام ما بفهمو الناس الكُتُر
زينوبة كر من حالى كر قاعد لى فوق نيران جمر
غربة وكمان حالاً فقر عذبنى قبل أصل القبر
الشوق متل شوك الكتر طعن الجسم لمن خدر
والله لو ما منجبر ما كان بفارقك بى شبر
********************
زينوبة دنيا الإغتراب خلتنى زي ورق الشدر
اتحت من عدم الشراب عم الأراضى وانتشر
الغربة اصلو طعيمها مر لكنى بقعد بالجبر
لمن سنين الهم تمر يا ربى الهمنى الصبر
***********************************
بكانا:البكان هو المكان وهو ابدال دراج فى اللهجة العامية ابدال الميم باء
سَدر:غاب او مشى
كَكر:مقعد مصنوع من الخشب عبارة عن رجلان وجلسة خشبية متعارضة عليهما وهو يصنع خصيصا للعواسة
الدونكا:هى المطبخ او التُكُل
كالنى:الكيل هو العطاء وهنا تستخدم بمعنى الضرب الشديد يقال(فلان كال لى فلان اى ضربه ضرب شديد)
الناس الُكُتر:الاخرين
الكِتِر:نوع من الاشجار الشوكية تتميز اشواكه بالقسوة والقوة
| |
|
|
|
|
|
|
|
|
|
Re: قاموس المفردات العامية فى كتابات محمد الحسن سالم حميد (Re: ماريل)
|
وكان حميد يقيم فى مدينة عطبرة فى منزل خالته وعندما سمعت قصيدة (طعم الدروس) حزنت حزنا شديدا وظنت ان ابن اختها غير مرتاح فى الاقامة معها
لامته لوما شديدا وعندما حاول ان يبرر لها صدته بقولها(كلامك دخل البطون خلاص) فكتب قصيدة يستسمح فيها خالته ويطيب خاطرها
يا خالة
(النص)
ما تقولى لى دخل البطون
والفى البطون ما بتمرق
يا خالة شيليها الظنون
والله مابينكن فرق
ما زى بعض لوبي الجروف
والقايمى كلها فد عرق
والكلمة من غير الحروف
قوليها لو كان تتنطق
خالتى المجنح ما بيطير
واللاحقه ايدك بتلحق
وين انتى شفتيلك بعير
معقول محكم وينطلق
يا خالة كيف اصبح غريب
وأنا روحى من روحك خلق
والله أقرب من قريب
والغنوة معوان للخلق
ما شفتى ناسا حالها كيف
قلب الجبل ليهن برق
كم ليلة ما غمدو الطريف
سدت دموعن فى الحلق
يتباكو ما شفتى النحيب
ساعتو البيبدا من القلب
آه وآشريري على الغريب
اليومى دمعو بينسكب
تلقيهو يرفع لليدين
لافوق يلاهى وينضرب
يا الله يرجع لا متين
قلباً معذب ومغترب
طعم الدروس ما لى براى
لى كل مهاجر ومغترب
ضاق الكؤوس المرة ديك
وآه من حناضلاً تنشرب
مش كل ما لاح الصباح
يتماروا ناسك فى الدرب
الجاي وارد واب ملاح
يا بت ترب زولاً تلب
يبقى الغنا السلوى الملاذ
للقلبو فى الساساق غلب
لو صدق المطر الحراز
ما كان من الأشواق تعب
انتى اللسان الماب يقع
فى زلة لا يوم ينزلق
فيض الحنان المن نبع
لا قل لا يوم نتمحق
جاهو الجنوب سابق الشمال
جاهو المشحتف فى الشرق
جاهوالغرب شادى الرحال
شيل يا غمام منو وأسق
يا الله شدة ماك رحيم
أديتنى أُمين تنسبق
لى ضمى بالحضن القديم
الدافى شوق وعشق وعشق
| |
|
|
|
|
|
|
|
|
|
Re: قاموس المفردات العامية فى كتابات محمد الحسن سالم حميد (Re: ماريل)
|
بسم السلام
(النص)
بسم السلام نبدأ
راحة غناوينا
على خاطرو تتمدأ
ساحة حكاوينا
.......
ونتغنى بالاطفال ياهن تقاوينا
من قاموا قامو رجال يات ريح تقاوينا
......
بنغنى من عتال داخل على الميناء
يرفع بدل شوال كفو ويحيينا
ماهو الونش شغال صنعة ايادينا
........
يا دربنا الوصال اصبحنا وامسينا
بى روعة العمال زراع بوادينا
علماء ورجال اعمال وطنية تغنينا
عن محرقة راس مال وجندينا يحمينا
......
خل المراية قبال
بنوت حوارينا
وكل البيكدح شال فى البيت رفع طينة
اصبحنا بالامال والجايى ينسينا
ليل الجراح الطال ظلمة ماسينا
سبناها شلنا الفال شلنا السمح جينا
.....
وبسم السلام نبدأ ونختم حكاوينا
وطول الزمن تندى وتخضر غناوينا
.......
*************************
تقاوينا :التقاوى هى البذور الجيدة اما تقاوينا فى البيت الثانى بمعنى تقوى علينا
قبال: قصاد
البكدح:الكدح هو السعى الدؤوب بمشقة وتعب
الفال:التفاؤل بالاشياء الجميلة
| |
|
|
|
|
|
|
|
|
|
Re: قاموس المفردات العامية فى كتابات محمد الحسن سالم حميد (Re: ماريل)
|
مرق الحلم
(النص)
ايوا بحبك حبا جما
وياما بعزك يا نادوس
وساقات حنك
فيهن منك
ومنى المشق والقادوس
يا ضرا مرق الحلم الواحد
من شرا ريح الزمن السوس
خيل العشق الخابى تناهد
جايى تشوفك وانتى عروس
فاله هدير الناس الصاعد
يطوى هجير الاسف البوص
ضمى عليها حنان الساعد
جمى حشاها الهردو البؤس
خلى غنانا البات منباعض
يغرز يدمى الليهو يدوس
يبعد عنك شر العارض
كلما نقرب يا نادوس
وكل البفهمو فيك يا بلادى
وهادى الدنيا وساس يسوس
البى غادى الشاق الوادى
يبقى تركتر
مو مجروس
يمة كفانا...بلد ########ة
ودود الافة الفيها يلوص
دايرين نحيا....ونربى جنانا
زرعة عينة وماهو بروس
كل بلد ترفع تبانة
ونبنى العالم بيت جالوص
لافى نخيلا تطرشو دانة
لامن لغما تحت ابنوس
وتبقى الدنيا صحيح دنيانا
والبنى آدم دون كابوس
................
وتلك النار
الهاردى حشانا
نار الشوق لى ام بتعوس
ام الناس العلت شأنه
بى عود شمعة
وخيط فانوس
نارنا عشق والله ادانا
قلبا وافى
وصافى نفوس
وياما نفسنا طويل
وخطانا
قدر مسافتك يا نادوس
****************************
ساقات:سواقى اى جمع ساقية
المشق والقادوس:من اجزاء الساقية المشق هو الخناق والقادوس هو الاناء الذى يحمل
الماء من النهر
ضرا:هى مفردة عربية فصيحة تعنى كل ما ساعد على التوارى والستر من شجر او بنيان او غيره
المرق:هو اكبر ركيزة فى سقف الحجرة
الخابى:ايضا مفردة عربية فصيحة وتعنى تحديدا الخب وهو نوع من انواع مشى الخيل حيث تضع خطواتها على الارض بشكل سريع ومتتابع والمعنى المقصود هنا بالتحديد الخابى اى المسرعة
تناهد:يعلو ويهبط صدرها من سرعة انفاسها نتيجة للمشى السريع
فاله:التفاؤل
يطوى:يلف
البوص:عيدان القصب المجوفة
جمى:ايضا كلمة عربية فصيحة تعنى الاستجمام او الراحة وجمى بكسر الجيم والميم تعنى دعيها ترتاح
الهردو: ايضا هى عربية فصيحة تعنى مزقه او شققه ايقال هرد اللحم بمعن بالغ فى انضاجه حتى اهترا وتفسخ
منباعض:ليس مثل بعضه البعض اى بمعنى مختلف عن بعضه
ساس يسوس:يقصد بها السياسة
مجروس:عربة من عربات الجيش
########ة:مقابر
يلوص:يتحرك بلا توقف
زرعة عينة:هى الزراعة التى تتم فى موسم نجاحها ويكون الحصاد وفيرا وبعده نحصل على العلف
بروس:هى الزراعة التى لاتتم فى موسم نجاحها ونجنى منها على الاغلب علف فقط
تبانة:هى كرات الطين التى يتم تجهيزها لبناء بيوت الجالوص
تطرشو:تضربوا
| |
|
|
|
|
|
|
|
|
|
Re: قاموس المفردات العامية فى كتابات محمد الحسن سالم حميد (Re: عثمان دغيس)
|
| Quote: المشق هو الخناق الرجاء مزيد من التوضيح |
التحية لصاحب البوست
هي كلمة نوبية ولسهولة نطقها يمكن كتابتها كما يلي ( موشوق )
المقصود بالموسوق هو ( خشبة بطول نصف متر تقريباً .. توضع كفرامل للحلقة بعد توقف الساقية .. تماماً كما توضع حجر لبعض السيارات بدون فرامل كي لا تتحرك
وهي بالضبط تقطع تواصل الحلقة الكبيرة مع الصغيرة ..
وعند سحبها تدور الساقية دورة كاملة بدون الثيران او الابقار التي تديرها .. تما مثل العربة بدون فرامل اليد عندما تسحب منها ( الدوقار )
المعنى الاخر ( لموشوق) هو ، عندما يتم تصفية ( الدكاي او النبيت او الشربوت ) ما يتبقى في المصفى من باقي التمر ( موشوق ) وهو غذاء جيد للخراف ونعاج ولا يعطونها
للمعزه ( الغنماية ) حتى لا تظهر آثار الكحول في الحليب ..
معليش هي لغة ترابلة .. وتحياتي ليكم ..
معليش كمان التعبير او الوصف بالعربية صعب شوية ..ارجو أن اكون قد اوضحت المعنى
| |
|
|
|
|
|
|
| |
Osama Mohammed
osman righeem
علي عبدالوهاب عثمان
ياسر بيناوي
فيس بوك
تويتر
انستقرام
يوتيوب
بنتيريست