|
Re: مسدار ( ود الباوقة شافنو البنات ) .... (Re: مني عمسيب)
|
يوم حان الدواس واتحددت ساعاتـــو واتلمــوا الخــــلوق وادفقت ساحاتـــو راكبين الخيول شايلين سيوف عزاتو سألين باوقة وين ياخاواني فيهم ياتـو؟ قالــــولنـا العـــــوين والله ياها صفـــاتو شافنو البنات جااااااري وطبــق نعلاتـو
دمتم ... احبتي .
ولي قدام ...
بت عمسيب .
| |
|
|
|
|
|
|
Re: مسدار ( ود الباوقة شافنو البنات ) .... (Re: عوض جاه الرسول)
|
حباب عزام اخوي ...
Quote: العـيـب مـو فيها.. في البوش الكتير الفزع تراهو في ساعتو لِزوله قطعت حبل الأهل وفرشت في سـوق البرنجي وباعتو وتِتْمط بِحي ع النِضال.. سجـم البلد الكِـبْـرت عليهو وِساعتو يا رب العِباد بِتين نِنْحَل ونسمع خبر المُعارضة ونقالِد ناعتو |
عزام انقـــرع وفارق النفوس الطامعــا وأكان قلت النضال نمسحبو عينآ دامعا والبوش ان نضم كل الخلوق ليو سامعا وأكان سله السيوف فرتاق صفوفآ جامعا .
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
حباب فرحنا المهاجر ..
Quote: بت عمبسيب سمح نضمك كيبوردك يا رب ما ينضرا زولاً كل قدرتو الجري وراء الرئيس العرة كيفن وكت الكوع يحمى يدق سدرو ويمرق لي برا حراسو الخوف من سيدو وسيد سيدو ذاتو بجفل من مواء البـــــــــــــــــره |
تسلم يا فرحنا الديمة قولك حالي يا الخاتي الوطن فوق المقام العالي حاشاك ما تخونو هيبة وسمو ومعالي ما زي باوقة داك جااااري وكمان هو السالي
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
حبابك عوض اخوي ...
Quote: باوقيشن ظريف طلاتو دايماً مرحة معتر ليهو دينق ومعاوية لايك القرضة يعلم علم اليقين انو الانقاذ منقرضة وشايت شمال ضفاري لامن مرقا |
يا عوض الكلام في الباوقة زول طبال يعرض في العوج وفي قدوة الدجااااااال غاطيــــن الشمـــش بايـــدو والغــــربال وسايقـــين البلــــد بالزنــــد والترجاااااال
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
Quote: وحاتك يا منى نضميك حلو ومهضوم زي لوزاً منقى بيهو بنقزقز دوم ود الباوقة محظوظ كونك حميته النوم يا ريت تردميه من جنس الكلام كل يوم
|
حباب عصوم اخوي صاحب الفكر والرأي الفـــارس الشجاع لـــي رأيو مـــو ضــاراي الصاقعــــة البشيــــل لعـــدونــــا والبــــاراي في وقت الدواس في الحارة بلقي حداااااااااي
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
كتب بطل المسدرة ....
إتغشينا بي حبك لبسنا عباية يا موية الرهاب الما ملت كباية عجيب يا دنيا أمرك الا نحنا غباية عاشقين الجمال في لمعة الحرباية
كع
تحياتي ... وحبي ... وتقديري ... لكم جميعآ ...
واني اليكم راجعة .
لي قدام ....
بت عمسيب .
| |
|
|
|
|
|
|
Re: مسدار ( ود الباوقة شافنو البنات ) .... (Re: محمد فضل الله المكى)
|
كيف يبرد المسدار والقلب لهيب قلاية من ناس درق سيدو لا هماهم حال البلد ولا مشردين حروب في الخلاء والصي الماشين حفاية عراية سكنوها القصور وجدعولنا السبحة والمصلاية ويا ود الباوقة اعرض وكتر في النقيز وبرطعوا وجلد الثعالب البسوه عباية ومصير القذافي راجيكم في النهاية
وصباحك زين يا وطن
| |
|
|
|
|
|
|
Re: مسدار ( ود الباوقة شافنو البنات ) .... (Re: ود الباوقة)
|
Quote: يوم حان الدواس واتحددت ساعاتـــو واتلمــوا الخــــلوق وادفقت ساحاتـــو راكبين الخيول شايلين سيوف عزاتو سألين باوقة وين ياخاواني فيهم ياتـو؟ قالــــولنـا العـــــوين والله ياها صفـــاتو شافنو البنات جااااااري وطبــق نعلاتـو |
يا بت عمسيب أختي ما عرفت ود الباوقة أخوك ونزالاتو الفارس المهاب من قومة الجهل عينو حمرا ومفتولة عضلاتو يهابو يوت من شافو كان صرّ وشو واتطايرت شراراتو "أسد الخشة الضرية" وقتين الدواس يحمى وتتعالى صيحاتو
شنو ليك يا ود الباوقه صاحبي شكرا أختنا الرائعة بت عمسيب
| |
|
|
|
|
|
|
Re: مسدار ( ود الباوقة شافنو البنات ) .... (Re: فرح الطاهر ابو روضة)
|
Quote: إتغشينا بي حبك لبسنا عباية يا موية الرهاب الما ملت كباية عجيب يا دنيا أمرك الا نحنا غباية عاشقين الجمال في لمعة الحرباية
|
حبــك مـــو بدوم دايــر تلات وربــاع عارفـك من عقب طبال كمان طماااااع لابتسمع نصـــح لاحــاسي بالاوجـــاع يابواقة اختشي وليه للبشير تنصااااااع ؟
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
إتغشينا بي حبك لبسنا عباية يا موية الرهاب الما ملت كباية عجيب يا دنيا أمرك الا نحنا غباية عاشقين الجمال في لمعة الحرباية
......................................................................
الرباعية دي جابت مفعول سريع خلاس
هههههه
| |
|
|
|
|
|
|
Re: مسدار ( ود الباوقة شافنو البنات ) .... (Re: عبدالله ود البوش)
|
ما كنت اتمنى يوما ان ادخل في أئ مهاترات او عداوة مع أئ زميل في هذا المنبر وليس من عادتي التهاتر عبر الكيبورد ولكني اعرف كيف اصفي حسابتي على ارض الواقع مباشرة ان كان ذلك ممكنا ويا ابو الحسين لو كان لك معي عداوة شخصية فأفضل ان نصيفها على الهواء مباشرة وتنقد الرهيفة اصلا ان شا ءالله ما تتلتق
| |
|
|
|
|
|
|
Re: مسدار ( ود الباوقة شافنو البنات ) .... (Re: عبدالله ود البوش)
|
Quote: ما كنت اتمنى يوما ان ادخل في أئ مهاترات او عداوة مع أئ زميل في هذا المنبر وليس من عادتي التهاتر عبر الكيبورد |
و أنت فعلاً كما قلت و أكثر فأنت أحد القلائل في هذا البورد الذين يحظون بإحترام جميع الناس فيا ريت تطول بالك شوية ودم كما أنت و لك كل الود و الإحترام
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
. أخي الحبيب عبدالله ود البوش تحيةً وسلاماً واحتراماً
واللهِ واللهِ لم اشارك في هذا البوست إلا لروح الدعابة التي تقوي أواصر العلاقه بين الإخوة والأخوات التي لمستها فيه فيا أخي هون عليك ، وواللهِ ما حسبت أبو الحسين إلا مداعباً وإذا لمست أنت غير ذلك فلك العتبي حتى ترضى .
لك محبتي
| |
|
|
|
|
|
|
Re: مسدار ( ود الباوقة شافنو البنات ) .... (Re: محمد فضل الله المكى)
|
أخي العزيز محمد فضل الله سلام واحترام
Quote: فيا أخي هون عليك ، وواللهِ ما حسبت أبو الحسين إلا مداعباً |
انا اعرف جيدا واشم نفس الكاتب بين الحروف وان حاول ان يخفيها فأمانة في ذمتك يا محمد فضل الله وأسألك يوم الحق عز وجل هل كلام ابو حسين دا حتى لو خت فيهو مليون وش ضاحك يُفْهم منو روح داعية ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ثم انه متى كان ابو الحسين مداعبا ؟؟؟؟؟؟؟؟؟؟؟؟؟؟؟؟
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
Quote: بت عمسيب الراسية زوق أدب و سماحة فهم وعلم فايتة البنات في الساحة الشنين كضموا وطوالي زادو قباحة تسلمي يا بت الرجال الديمة قولن راحة
|
حباب حاتم الكلس الفي الرجال هو القائــد الفــارس الهمـــام اللي الدواس هو الرائــد بسهـــم السيوف لي باوقــة دائمـــأ صائد وتسلـــــم للوطــــن وتقطــــع جذور الكائد
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
Quote: شن نفرو الأسد وكت البلد خربانة
ماكلين مال النبي وحارسنو بالجبخانة
جالدين العوين لا رحمة لا شفخانة
والجاهل الصغير عيشتوا في زنزانة
وأولاد الأصول بيهم سجون مليانة
يا الباوقة الغشيم قول للبشير دا كفانا
|
عصوم الكلس راكب الفرس ابو غرة خاتيهو المـــلام افكـــارو دائمآ حــــرة في وقت الدواس حاشاهـــو كر وفـــرة للعـــدو والصليح تلاقـــاهو واقف بــرة
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
Quote: يا اسحاق اخوي البـــــاوقة شفـــنا برانـــا واشهـــــدن البنات الكـــانو ديمــــة حدانــا جااااااري من الدواس خايف من الجبخــانا شــــال نعلاتو فووووق صدقني يا مولانـا . |
ما ظنيتو بــــاوقة المن الدواس شــــــــــــــراد رعد الضراع* كشاح السيول ال للشقوق ســـداد اظنك في الصحو شفتي العصا *البتراب ينشـاد هـــاطلة وكالـــحة وعاطلة وبالســـــــموم تنقاد
الضراع + العصا = عينات للمطر
| |
|
|
|
|
|
|
Re: مسدار ( ود الباوقة شافنو البنات ) .... (Re: ود الباوقة)
|
الي احبتي ... حضور ... وقراء .
لكم مني كل التحية والحب والتقدير .. لكل الرائعيين المتداخلين والاروع القراء المتذوقييييين لهذا الدواس .
الوصية في الذمة
نكون كما نحن ...
دواخلنا وطن يسع الجميع .
شعارنا الحب .
مساديرنا تلاقي للارواح .
ودمتم احبتي ..
واني اليكم راجعة .
ولي قدام ..
بت عمسيب .
| |
|
|
|
|
|
|
Re: مسدار ( ود الباوقة شافنو البنات ) .... (Re: Asim Fageary)
|
Quote: يا بت عمسيب أختي ما عرفت ود الباوقة أخوك ونزالاتو الفارس المهاب من قومة الجهل عينو حمرا ومفتولة عضلاتو يهابو يوت من شافو كان صرّ وشو واتطايرت شراراتو "أسد الخشة الضرية" وقتين الدواس يحمى وتتعالى صيحاتو
شنو ليك يا ود الباوقه صاحبي شكرا أختنا الرائعة بت عمسيب[/Q
شكرا شيخ اسحق
بارك الله فيك
| |
|
|
|
|
|
|
Re: مسدار ( ود الباوقة شافنو البنات ) .... (Re: Kabar)
|
صديقي محمد الحسن سليمان..حبابك احتسب ساكت يا اخي..!
و ها ك دي..
اخوي ود الباوقة ، شكلو زول خطير.. اتلموا الخلوق ، قالوا تقرير مصير ود الباوقة ، قال خير، كلو يصير.. اٍلا المزعلني ، و لماني في الحنطير قولة بت عمسيب ، ان شاء الله ، الجندر يطير..!!
منى ..حبابك يااااااااااااااااااخ.. هذا منبر (عبس و تولى).. تقول تفرفش.. يطبوك كربون زي السلامو عليكم..!!
كبر
| |
|
|
|
|
|
|
Re: مسدار ( ود الباوقة شافنو البنات ) .... (Re: Kabar)
|
Quote: و ها ك دي..
اخوي ود الباوقة ، شكلو زول خطير.. اتلموا الخلوق ، قالوا تقرير مصير ود الباوقة ، قال خير، كلو يصير.. اٍلا المزعلني ، و لماني في الحنطير قولة بت عمسيب ، ان شاء الله ، الجندر يطير..!!
|
اخو الاخوان كبر
اردم
اليوم يومك
| |
|
|
|
|
|
|
Re: مسدار ( ود الباوقة شافنو البنات ) .... (Re: Asim Fageary)
|
Quote: بجاه الرسول خلوا المسدير صافـي عامر بالاخــــوة وحبنــا المتعافــــي نحن اولاد وطن ما فينــا زولآ جافي نحضن لي بعض حضن وطنا الدافئ . |
كلامك سمح والله يا بت عمسيب.....فيهو الجمال والحكمة وريحة الطيب...
وأخونا ودالبوش متحفنا بغفشاته ......زولاً حريف وأديب.
بتسوقى الكلام برواقة..... مع روعة التهذيب.
ونرجع للكلام الجد.. للبيت لا بد يكون هناك ترتيب.
مع خالص تقديرى وإحترامى للجميع....وعلى الناس أن تطول نفسه شوية....وأنا موقن بأن أبوحسين لا يقصد شىء غير المزحة يا ودالبوش.....لكم التحية جميعاً...
لا أبوحسين ولا ودالبوش يجوا هنا ثانى.....
| |
|
|
|
|
|
|
Re: مسدار ( ود الباوقة شافنو البنات ) .... (Re: ismeil abbas)
|
بت عمسيب حبابك جبتى الكلام موزون بقرأ وأجيه راجع متل التقول مجنون معجب بالقوافى منظومة جد بفنون فيها جمال أهلنا البى الكرم معطون
ود البوش أخوى الزول بمازح فيكا لا قاصد يحقرك لا الكلام كان ليكا تعال لى فى غبيرا نمشى ناكل ويكا نشرب شاى عصر وندوبى بالمزيكا
ودالباوقة رايق ونَفَسو ديمة طويل يرمى كلام ملولو ويجيبو ليك عديل حبك للبشير واجعنا ليك بالحيل ده الخلى الجماعة يكيلو ليك الكيل
ههههههههههههه
| |
|
|
|
|
|
|
Re: مسدار ( ود الباوقة شافنو البنات ) .... (Re: يازولyazoalيازول)
|
Quote: يا اسحاق اخوي البـــــاوقة شفـــنا برانـــا واشهـــــدن البنات الكـــانو ديمــــة حدانــا جااااااري من الدواس خايف من الجبخــانا شــــال نعلاتو فووووق صدقني يا مولانـا .
|
ركازة المايله ود الباوقة حبيبنا يا هو ضرانا ويا هو حمانا كان قامت "الكعة" تشوفو بجز الرقاب زي جزار في سلخانة فرحانات البنات يزغردن ويغنن ما دام ود الباوقة معانا ما همانا
| |
|
|
|
|
|
|
Re: مسدار ( ود الباوقة شافنو البنات ) .... (Re: مني عمسيب)
|
Quote: يا بت العمس.. العيب حروفو قلال مساككة الرجال جايبالة كشفة حال جربى.. أكتبى... شيتاً يسر البال ما أظن تكسبى من موية فى غربال
|
من زمن الصغر حاشاها بت ابوى عمسيب لا جابت ملام لا شفنا منها العيب ... جدها الكبير كان للضرس عرديب... كدنداكة البلد اليها ما بتسيب...
| |
|
|
|
|
|
|
Re: مسدار ( ود الباوقة شافنو البنات ) .... (Re: Abd Alla Elhabib)
|
Quote: الجري وشيل النعال معهـودة في الكيزان السرقة ، الكضـب ،تلـــيبة الحــــــيشان صـفات العَـــفَنْ ملمـــــومة في الوس خان قـــادر يا كــــريم تطـهــــر الســــودان |
ود الباوقا وين غايب من المسدار
الطوربيد بقى الحين من الحضار
خليه اليجي كان يفهم السمار
ويعلنها توبتو من زمرة الأشرار
| |
|
|
|
|
|
|
Re: مسدار ( ود الباوقة شافنو البنات ) .... (Re: محمد فضل الله المكى)
|
Quote: الباوقة النتر عضة الكداريك ماتو زول شال الكلاش والدوشكة بى جنباتو كان توبك وقع تلقيهو ساترك زاتو لو ما بس ظروف ما تقيفى جم نعلاتو |
صديقى العزيز ود الباوقة بما إنى ما قصرت معاك فى بداية البوست بالمربع السمين أعلاة، فعليك الله رد لى الجميل وكان لاقيت سيدى الرئيس قوليهو:
يا سيدى الرئيس أنا زول بقيت محتار إسمى ود الباوقة الوليدً البار واصلى نشيييط مكتر ليك فى البوبار فى مدحك خشومى كتار بس لاكين بدور اختار يمين محتار سكانى الوليد الماركسى البربار وعضتنى البنية الراسة فيو كركار وحمر لى مداح فى إيدو شايل طار و(شلتنى) (المشعشع) وراسو ماسك نار ودمعة زول مريض ما لاقى سم الفار أحيييييه ..... يا ريس حياتنا دمار فى العنبر تلاقى سرير تلات انفار مدارس مافى....... طلبة كتار ضرايب موت... تقع فى الراس تقول فرار يا ريس بقيت جزار حواليك شلة سالخة جلدنا بى منشار ونحنا صبرنا ركه وطار فتلنا بواقى صبرنا بالمترار والله يا ريسنا ظلمك حار أمشى خلاس عندنا نحنا ألف خيار قوم اسرع وراك جهزنا كوم ازيار
| |
|
|
|
|
|
|
| |