عمت الفوضى مدينة طنطا فى بداية الثوره المصريه ... وكل زول ماعندو حديده بقى يكابس فى الحديد الهملان فى الشوارع والمعارض واختفت الكثير من السيارات ذات الماركات الفخمه وحتى ذات الماركات المهببه المهم انو الواحد يقوم من النوم ويتاوق من البلكونه يلقى المحل الكان بيركن فيهو عربيتو بقى خلا ويبدأ الفنجطه والكواريك واحد صاحب معرض سيارات فاتح معرضو فى امان الله لمن جات ساعة الغداء قام قفل معرضو عشان يمشى يتغدى مع المدام لاحظ انو فى بتاع كارو موقف الكارو بتاعو جمب المعرض وخاتى قفة البرسيم للحصان عشان يتغدى ... بتاع الكارو ماشغال بى زول ولاشكلو مريب وكده اخونا دور عربيتو واتحرك ولمن اختفى من مشهد قفة البرسيم العربجى رفع قفة البرسيم وطلع سلبه وربط اكتر عربيه شديده بالسلبه ولى هسى صاحب المعرض بيفتش فى بتاعين الكارو يمكن يلقى زول بشبه السرق العربيه
يتبع
03-20-2014, 03:34 PM
ملهم كردفان ملهم كردفان
تاريخ التسجيل: 02-16-2013
مجموع المشاركات: 4742
اهلا وسهلا يا ابوصمره ..انت من فين من اصوان والا من اسووو داااان؟؟؟ انا من حلايب من اسووودان ... بدأت الحوار مابينى وسائق التاكسى انت رايح فيييين؟؟؟ المحطه ...!!! اللى قمب سوق الإتنين ؟؟؟!!1 ايوه ...!!! تعرف يا ابوصمره انا عندى تكسى موأفو أدام البيت لأنو عطلان وعايز عمره صحيت الصبح لأيت التاكسى مش هناك فتحت بلاغ فى قسم أول آلوووولى هو إحنا هنعمل أيه...!!! امشى شوف الحراميه اك كوبااار يمكن تعرف سكة التكسى بتاعك ... قلتلهم ...طيب تقترحوا عليا اروح فين يعنى ؟؟؟ امشى سوق الإتنين صاحب التاكسى بيحكى ..... قال لى والله يا ابوصمره مشيت لقيت عربيتى بتتأطع حتت وماقدرتش افتح بؤ إييي ...
لو كنت فتحت بؤ إييي ... كنت اكون دلوقتى فى الكازوزه
03-20-2014, 08:46 PM
ملهم كردفان ملهم كردفان
تاريخ التسجيل: 02-16-2013
مجموع المشاركات: 4742
تفاطع شارعى طه الحكيم مع النحاس هو تقاطع مشهور جدا جدا فى طنطا تم انشاء بنك جديد فى زاوبتو المتميزه وكل يوم القى ليك بتاعين الأمن مساهرين للحراسه جمب ماكينة صرف النقود الثوره قامت والفوضى عمت ... واحد صاحبى قال لى جا بتاع كارو بالليل هو واللى معاهو شايلين سنج وشواكيش كسروا الشاشه مالقو قروش زعطو المكنه من جذورها وشالهوا فى الكارو وتوجهو بها الى مكان مجهول لايعلمه إلا الله ... البنك اعلن انو كان فيها خمسين ألف جنيه ... ... الغريبه العربجى ده لو حسب الحكايه كان تمن الماكينه اكتر بكتير من القروش الفيها كان يطلعا سليمه ويفاوض البنك بى مية ألف أو ميه وخمسين ألف ... مافى زول بيقدر يثبت انو هو سرقها بالمره عشان كلهم بيخافو يروحو فى الكازوزه
03-20-2014, 10:08 PM
ملهم كردفان ملهم كردفان
تاريخ التسجيل: 02-16-2013
مجموع المشاركات: 4742
والله ياعمو انت عامل زى بابابا بالزبط بتفهم اللى جوايا واحشنا اوى اوى اوى شكرا ياعمو وربنا يخليك ياعمو ... حسابك كم ياعمو حسابى كده ....!!! طب خد دووول ويبقالك خمسين جنيه ...!!! ..... ياكريم مابتفرق خلاص خليناها الخمسين دى شكراً اوى اوى اوى والله انا من يوم ماسبت المينا والشغل حياتى مقلوبه كلها .... الشاب كان شغال فى المينا بتاع اسكندريه ويكسب يومياً مابين ميه لى ميتين دولار وكانت هناك طفرات اشترى عربيه كيا أتوماتيك وكان يوصلنى بها الى موقف الأمجاد هنا اسمها (التمنايه) فى مره من المرات مشى بيها المينا وكالعاده وقفها جمب الكافتيريا وخش هو وقريبو يتناولو ليهم حاجه امورهم تمام والدنيا كابه فى جيوبهم عمك (الضولر) ويتضاحكو ساى ... وطلعو من الكافتيريا لقو الواطه خلا ... انشقت الأرض وبلعت الكيا ... كريم بلع ريقو وحالتو بقت صعبه اموروجاطت شديد وفرقتنا المعايش مرت الأيام كالخيال أحلام ....واذا هو بيتصل على ياعمو واحشنا كلنا تعال زورنا ياعمو ... على الإيمان ماشفت شاب مهذب زى الود ده من 30 سنه ...
03-22-2014, 00:54 AM
nour tawir nour tawir
تاريخ التسجيل: 08-16-2004
مجموع المشاركات: 17638
طبعا يانور اخوك لما الثوره قامت حطمت ليهو بعض احلامو ... ومن احلامى انى أجيب لى لابتوب اخت فيهو شغل interior designing وبالمره (تور) معاى واقندل وارتاح شويه من المنافسه الشرسه وتعب الركب لقيت لى لابتوب سعرو حلو وحأجيبو بكره والفايده البتجى من وراهو انو اتابع المنبر وانا فى مواقع العمل المختلفه واخت فيهو صور شغلناالبنعملو عشان الزباين يتفرجو عليهو وكمان لأنى ماشى اسكندريه الإسبوع ده وعندى شغل فيها وحاكون بعيد من الديسك توب ده اها لمن حصلت الثوره قعدنا بدون شغل لى مده من الزمن ومواردنا الماديه بقت مابتسمح إلا بى الصرف فى اضيق الحدود جانى خبر انو اللابتوبات فى اسكندريه بى تراب القروش ... قلت ليهم كيف الكلام ده قالوا لى والله فى حراميه كسروا اكبر معرض ومخزن بتاع كمبيوتر فى اسكندريه وعارضين بضاعتهم على عينك ياتاجر واللابتوب البى ألف دولار عارضنو بى خمسمية جنيه شوشو بقى يوسوس لى اركب القطر وامشى جيب ليك واجد ياخ مافوكا حاجه والله اصلو الدنيا مهديه وجايطه والفرصه جاتك لحدت عندك .... ياشوشو انت جادى ..ياخ خلينا نوفر بالحلال ونجيب واجد ياملهم انت عوير حتلم خمسه والا سته ألف من وين ؟؟؟ وكيف ؟؟؟ عشان تجيب ليك بيها لابتوب ..!!! اها بعد ماتجيب لاب توب وتقعد مفلس والله حق الفول يبقى فقى تلتله احسن ليك تلهط الفرصه دى... قلت ليهو اقول ليك حاجه قال لى تقول لى شنو وتقول لى منو ؟؟؟ قلت ليهو اعوذ بالله من الشيطان الرجيم ... لقيتو اختفى من مشهد الحلم الجميل وصبرتا اها بكره اللابتوب ده بى تمن اتنين وسوسة شيطان 500+500 .......... ألف مبروك لى اللابتوب المينى المعفـــن الجديد نور تاور مرحب يابتنا
03-22-2014, 06:47 AM
الفاتح ميرغني الفاتح ميرغني
تاريخ التسجيل: 03-01-2007
مجموع المشاركات: 7488
شكرا حبيبنا ملهم على هذا التوثيق. هي امور متوقعة في ظل الثورات والكوارث الطبيعية وما يرافقها من إنفلات. لكن المحيرني هنا لمن ضرب اليابان زلزال 2011، افراد عصابات الجريمة المنظمة( الياكوزا) شاركوا ،جنبا إلى جنب مع منظمات التطوعية، وقدموا للناس وجبات سريعة ومياه شرب!!
كن بخير.
محبتي
03-25-2014, 02:46 AM
ملهم كردفان ملهم كردفان
تاريخ التسجيل: 02-16-2013
مجموع المشاركات: 4742
Quote: شكرا حبيبنا ملهم على هذا التوثيق. هي امور متوقعة في ظل الثورات والكوارث الطبيعية وما يرافقها من إنفلات. لكن المحيرني هنا لمن ضرب اليابان زلزال 2011، افراد عصابات الجريمة المنظمة( الياكوزا) شاركوا ،جنبا إلى جنب مع منظمات التطوعية، وقدموا للناس وجبات سريعة ومياه شرب!!
كن بخير.
محبتي
ألف مرحب بيك ياتووووحا .. ..... أما هنا ياصديقى فقد حدث مايشيب له الولدان واحد ماشى بالليل بالعربيه بتاعتو وصل لى حته مضلمه لقى فيها حاجز أمنى وقف ... بتاعين الحاجز الأمنى طلعوا ليهو بالمطاوى والسنج وقالوا ليهو قدامك تلاته خيارات لارابع لها ياتدينا العربيه ياناخد بنتك معانا ياناخد زوجتك أو (هناطعكو هنا) الراجل اتجرس والبت بكت
المرا دقت سدرها وقالت لى زوجها خد البنت وروح البيت ونزلت من العربيه ومشت معاهم
ما أعظم الأم فقد خافت على ضياع مستقبل بنتها احترامى
03-25-2014, 10:07 AM
othman mohmmadien othman mohmmadien
تاريخ التسجيل: 12-13-2002
مجموع المشاركات: 4732
Quote: المرا دقت سدرها وقالت لى زوجها خد البنت وروح البيت ونزلت من العربيه ومشت معاهم
ما أعظم الأم فقد خافت على ضياع مستقبل بنتها احترامى
في الحالة دي الناس نست رب العالمين أم ماذا ....؟؟؟ ليست الأم بعظيمة ولا الرجل ... بكريم خلق ... ولا شجاع ... والبنت العذر معها إن كانت صغيرة أما كونهم طلبوها فهذا يعني أنها كبيرة وراشدة وبالتالي عليها نوع ما من العتاب ... الراجل ده والله وأنا واثق تمام الثقة لو قال يا الله حينها ومنحهم السيارة ... لأغدق الله الرحيم عليه بكرم من من عنده لا حد له ولا مد ... والخيارات العظيمة مفتوحة أمامه ... قتالهم لدرجة الموت ... والله سبحانه وتعالى ليس بظالم عبده ... وهي نوع من الشهادة العظمى ... أو التنازل عن السيارة ... أما أن يتنازل عن شرفه بهذه الآلية التي تهدم كيان الأسرة ومستقبلها حيث لا يمكن أن توقره الزوجة كزوج ولا يمكن أن ينظر اليها هو باحترام كزوجة ولا الابنة التي ستحيا عمرها جله وإحساسها بوخز شرف أمها المداس عليه مخافة مكسب دنيوي ... اللهم أرفع الظلم عن الخلق والعباد ....
03-25-2014, 10:39 AM
ملهم كردفان ملهم كردفان
تاريخ التسجيل: 02-16-2013
مجموع المشاركات: 4742
مافى زول بينسى رب العالمين اذا ماكان زول حر وراجل وعينو حمره لكن فى اعتقادى انو الزول ده كان من النوع الحنكوش الإتربى على العز وماشاف دواس ولاعرف جرح سكين ... انا استغربت منو انو مادور عربيتو وحاول الهروب ليه .؟؟؟ هل كان السيف على رقبته ام كان مسلوب الإراده حينها... ........................ عريس سودانى ..من سوء حظه جاء شهر العسل فى عز الإنفلات الأمنى خطفوا منو مرتو بى تاكسى وشلعو الدهب العندها ورموها ليهو فى الشارع الكلام ده حصل فى القاهره ... العريس والعروس دقو خروج فورى من مصر ... لحظتها العريس ماقدر يتحرك من محلو برضو....!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ملهم كردفان
nour tawir
الفاتح ميرغني
othman mohmmadien
فيس بوك
تويتر
انستقرام
يوتيوب
بنتيريست