لا أدرى كيف إستطاع هذا الفتى أن يحيل حياتى القاسية فى وسط الصحراء إلى جنات وأنهار وعسل ، هذه هى (السودانوية) الحقيقية حيث وقف العالم بأسره باحثاً متمحصاً آثارها وعلاتها وأسبابها ، وما الذى يورد السودانيين فى مجتمعاتهم هذا المورد الجميل ، وكيف تنداح كل الفوارق والفواصل ليعيش السودانى مع أخيه السودانى فى أريحية (وبساطِ أحمدى) حتى ليحسب من يشاهدهم أنهم يعرفون بعضهم البعض منذ عشرات السنين ، وهم لم يلتقوا إلا قبيل هنيهة فى عالم أزمانهم النقية ويحسبونها كمائة عام أو تزيد ، فيا الله على الشعب السودانى الجميل المتكاتف المترابط المتوحد المتفهم المتأهب لعناق بعضه البعض ، فيأخذون بعضهم بالأحضان فى لقاح لرابطة المحبة والأخوة فى الحِلة أو فى الحارة أو فى الحواشات أو مكان الخنا ، أو حتى المساجد والخلاوى والمسيد والقبب ، والورش والمصانع والصقيع الذى لا يشبه صقيع الآخرين فصقيعنا صى وصقيعنا وادى وصقيعنا خلا ،
يا ود البوش ، إن شاء الله تكون بطلت أكل أم فتفت؟ والله لا أدرى إن كان يأكلها أم لا لكنه فسح لى المجال لأقول فيه ما لم يقله مالك فى الخمر فما بال السودانيين يحبون بعضهم بذاك الجمال البهى ، وكيف وهم ينعم الله عليهم بهذه النعم ، ويختلفون فى الحكومة ، بئست هذى الحكومة ، فشعبنا قوى وشعبنا حصيف وشعبنا حريف وشعبنا يا شعبنا ما خاب يوماً أو إنهزم ، لكنه صبور لكنه خطير لكنه يحدد المصير رغم زعمكم بأن منقو زمبيرى قد انفصل ، فهل دخلتموا يا سادتى فى داخل القلوب ، وهل أمنتم المارد الجبار فى كل القفار ، يكفى هذا الشعب الأبى مدرسة أكتوبر المشرقة فى تاريخ الشعوب والأمم
شايفك يا بوش حايم بى غادى مع ناس ظرفاء فى الفيس والله كلكم ظريف وكلكم حريف وإنت إنت بالذات ود الذين أحبهم
طبعاً أخونا (أساسى) يفكر الآن فى سبب (تكسير الثلج) ويتهمنى بأننى أجيده وأحبُك الخيوط ،
بنفس هذه الأريحية ، كنا على موعد مع الأصول السودانية الطيبة بدعوة كريمة من أخى العزيز عبداللطيف بكرى وقد أذهلنى حقاً بمفاجآت سودانية لا تخطر على قلب بشر ، فانتعشت روحى وعاد لى النبض من جديد ، أحمدك يارب أن صيرتنى سودانى حتى أقتحم البيوت إقتحاما وكلها بيوتى مثل ما فعلت فى بيت الحبيب مصدّق وحرمه حليمة وبحضور نفر كريم من ضمنهم نورين وأحمد الشايقى وأبناء أصحاب الدار التى كانت فى تلكم اللحظة دار بوش ودار عبداللطيف ودار أدروب وأوشيك وأبّكر وخليفة كانت أيضاً دار تماضر وحليمة ومريم وعفاف كانت دار السودان كل السودان من حلفا لى نمولى بالصلاة على النبى ،
عرفت يا بوش إنت ليه ود الذين أحبهم ، لأنك تعرف قيمة السودان ولأنك تعرف قيمة الإنسان وكل سوادنى يفعل هذا ، لله دركم يا سودانيين كل يوم أنا فى دهشة جديدة لأنكم مدهشين
ويا رياض الخير حبيتك لوجه الله عشان فيك ناس عبداللطيف وبوش وحليمة وزيهم كتير ، إذن أنا وأنتمو بخير.
03-19-2014, 06:20 AM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
قاليك واحد حلق دقنو وشنبو ولبس نظارات ولما دخل بيتم قال تصدقوا ما عرفتكم هههههههههههههه . . يا هشام ياخ انا زول طير ساهي ما تسوي لي توم وشمار وكمان عنوان عديل كدا لا حولااااااا لمن انخلعت وقلت بوش دا منو ؟ ولبعدين ائ عولاق سوداني ممكن يعمل اكثر مما عملته فشنو دا حقك ياخ . . والله ما عارف في الحالة الزي دي الواحد اقول شنو ذاتو حقو الواحد اقول كفارة لان الامر لايستحق والله صحي . . هشام ياخ انت رجل تستحق كل جميل
03-19-2014, 06:39 AM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22872
حرم اول مرة اسمع بيها خليها التغني ليك اتا يا مطرطش عولقا بالغبا ياخ نحن زمان خالي بلولة ود شاع الدين لو غنى الجيلاني الواثق بقفل مننا الرادي واقول المصريين ديل بكملو حجاري في الفاضي ساهي هههههههههه
Quote: كدي يا ود البوش خلي التنظيــر الكتير وورينا خليت ام فتفت ..!
هييييييييييييق دي عاد بتتخلا ما نحن تحيلتنا كلها مر ونضوق الحلو في الجنة يارب
Quote: الناس يقولوا المارتديلا والاستبنوزا والجلي بالكستر والشيك ميل بالابل كيك
الناس يقولوا ؟ ههههههههههههه عامل فيها عندك حلاوة سقافة اياهو سمعك دا كلنا سامعين بيهو وصديق الموج ذاتو سامعوا بقول كدا غايتو من الفوق ديل عرفت كبدة الابل . . يا جنا هوووووووووي حرم لقمة بملاح لوبة تخليك واقف تيوة وتعرق وتدشا باااااااااع وتحمد سيدك صباح ومساء قال شنو عولقا بالغبا حيدر الزين المسخوت بالله ساعدنا بالالفاظ
03-19-2014, 07:11 AM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22872
Quote: بنفس هذه الأريحية ، كنا على موعد مع الأصول السودانية الطيبة بدعوة كريمة من أخى العزيز عبداللطيف بكرى وقد أذهلنى حقاً بمفاجآت سودانية لا تخطر على قلب بشر ، فانتعشت روحى وعاد لى النبض من جديد ، أحمدك يارب أن صيرتنى سودانى حتى أقتحم البيوت إقتحاما وكلها بيوتى مثل ما فعلت فى بيت الحبيب مصدّق وحرمه حليمة وبحضور نفر كريم من ضمنهم نورين وأحمد الشايقى وأبناء أصحاب الدار التى كانت فى تلكم اللحظة دار بوش ودار عبداللطيف ودار أدروب وأوشيك وأبّكر وخليفة كانت أيضاً دار تماضر وحليمة ومريم وعفاف كانت دار السودان كل السودان من حلفا لى نمولى بالصلاة على النبى ،
يا بوش ، من كان السبب فى الكلام الفوق ده يستحق كل تقدير وإحترام
فأنت رجل جميل فى الزمن الخطأ
03-19-2014, 06:44 AM
يازولyazoalيازول يازولyazoalيازول
تاريخ التسجيل: 02-05-2002
مجموع المشاركات: 10210
يا زول لو باريت ود الزين دا حرم ادخلك اللنداية واخليك تغني دردق بي يا اللوري دردق بي . . دا شغال بالمثل البقول مات مراسي فرقو قاسي مات فكي خليفتو في هههههههههههههه فشنو خليك في شارع غبيرة العام دا البس جلابتك السمنية ديك ومن عصرا بدري احجز ليك مصطبة وأتَفَن واتلفت هههههههههههههههه
03-19-2014, 07:14 AM
يازولyazoalيازول يازولyazoalيازول
تاريخ التسجيل: 02-05-2002
مجموع المشاركات: 10210
الإخوة هشام وود البوش وحيدر سلام من الله يغشاكم جميعا في ناس كتار ما شفناهم ولا لاقيناهم لكنهم تحكروا في قلوبنا وملأوها مودة مرات الواحد يستغرب السودان دا بناسه الحلوين كأفراد ليه ما قادر يوسع خطواته في الذهاب إلى الغايات الجميلة
03-19-2014, 12:57 PM
يازولyazoalيازول يازولyazoalيازول
تاريخ التسجيل: 02-05-2002
مجموع المشاركات: 10210
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
يازولyazoalيازول
عبدالله ود البوش
HAIDER ALZAIN
جعفر محي الدين
فيس بوك
تويتر
انستقرام
يوتيوب
بنتيريست