|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة الاولى : يما انا جيت الحداشر
العنوان : بيتكم الكاين في الخرتوم
التاريخ : حسع دي 21/6/2012
بعد السلام عليكم , بلاهي كيف حالكم في المدة التي لم تروني فيها ؟! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
مبروك عرس ولدكم الدكتور علي حسين على الحسناء الدكتورة سلمى معليش جات متاخره لكن كالعادة انا جيت الحداشر .
مع إنك يا حاجة قوية الذاكرة لكن إحتمال ما تتذكري الحادث دا؛ كعادتك في نسيان كل غلطاتي و هفواتي الكتيرة.
المهم
لمن كنت في الثانوي في مدرسة الراهبات في مرة جيت تالتة الطيش، الحقيقة إنو تانية الطيش كانت من غير الناطقين بها و الطيش كانت عيانة ! مديرة المدرسة في الوكت داك كانت سامية صبحي إسكندر، تشبه لي حد بعيد مديرات المدارس في الافلام الامريكية .
استاذة سامية مسحت بي الارض: ليه يا آمنة كدا , إنتي بت شاطرة و ذكية و ....
قمت إنفعلت و في النتيجة التانية طلعت الحداشر، لمن رجعت البيت كنت فرحااااااانة و قلت ليك : يما انا جيت الحداشر!!
قلتي لي : سجمي نقلوك فصل الإنجليزي !!!!
وكان فصل الانجليزي في المدرسة بيقبل 10 طلاب بس في الفصل
اسفة إني جيت الحداشر في عرس علي ولدك , علي ولدك دا طلع أخوي شديد والله.
في الختام السلام عليكم
يتبع>>>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة التانية : ما تعامليني كمعجبة
العنوان : عيادة الانيميا المنجلية بمستشفى جعفر بن عوف
التاريخ : حسع دي بتوقيت قوقل (Google) 21/6/2012
بعد السلام عليكم , بلاهي كيف حالكم في المدة التي لم تروني فيها ؟! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يا حاجة ياخي انا شكلي ما كنت بعرفك كويس ف شنو, قمت قوقلتك دي النتيجة الوحيدة الجاتني بالسوداني
اقتباس: دكتورة بخيته ومستشفى جعفر والانيميا المنجلية وابو الظربان واشياء اخرى بسم الله الرحمن الرحيم اعتبر نفسي مباركا طيلة الاربع سنوات الماضية كوني اعمل متطوعا مع الدكتورة بخيتة عطا الله استشارية طب الاطفال واختصاصية الانيميا المنجلية في عيادة الانيميا المنجلية المحولة بمستشفى جعفر بن عوف التخصصي سابقا فاستاذة الاجيال هذة فضلا عن كونها استاذة بالجامعات السودانية فهي المتخصصة الوحيدة في مرض الانيميا المنجلية وصاحبة اول عيادة تخصصية في السودان وهذا ليس غريبا على اطباء السودان الرواد بل الغريب كونها تعمل متطوعة طيلة الخمس عشرة سنة الماضية في العيادة المحولة دون راتب او حافز اواي مقابل مادي او معنوي محتسبة الاجر في مساعدة هؤلاء المرضى من اصحاب الدخل المهدود والجيوب الفارغة والمستشفى يقع في شارع الحوادث حيث المستوصفات والعيادات التي تتمنى تخصص نادر مثل الذي عند الدكتورة بل ان دكتورة بخيته تزور هؤلاء المرضى الذين يربو عددهم عن الخمس مئات حال مرضهم في اماكنهم ولا تبخل على زوارها بحق الفطور والمواصلات واللبن والفحص عندما يزورونها دكتورة بخيته تملك القدرة على تمليك طلابها معلومات اساسية وحتمية وخطيرة باسلوب بسيط وسلس خالي من التعقيدات الاكاديمية التي يختفي خافها اصحاب المعلومات المنقوصة هذة الاستاذة تعامانا كاولادها ولا تناديك او تخاطبك الا بيا ولدي ويا بنتي اليوم اتخذت إدارة المستشفى قرار معيب شكلا وموضوعا بايقاف العيادة وحرمان مئات المرضى من مكان يتلقون فية العلاج والتعليم الطبي والصحي والحب ولاحترام من دكتورة بخيته اليك دكتورة بخيته نحن ملتزمون بالعمل معك في اي زمان ومكان يمكنك من مواصلة هذة العيادة الخيرية التطوعية وننادي بالاتي :تكريم دكتورة بخيته على كافة المستويات ايجاد مركز طبي تعليمي بحثي لمرض الانيميا المنجلية هذا المرض الفتاك القاتل المهمل يتبع لاي من الجامعات او باشراف الوزارة ندين سلوك مستشفى جعفر بن عوف ونطالب باعتذارها لهذة القامة التي لم تفقد شيئا ماديا بل فقدت منبرها في تقديم الخير.
دكتور زهير حسن
ف شنو , رجاءً ما تعامليني كمعجبة وفرصة سعيدة والله في الختام السلام عليكم
يتبع>>>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة التالتة : الحلبية بياعة القضية
العنوان : شارع الجامعة
التاريخ : شهر 8 سنة 1998
بعد السلام عليكم ، بلاهي كيف أنتم في المدة التي لم تروني فيها ؟! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يا حاجة يااخي انا شكلي ما كنت بعرفني كويس!
ما أظن إنك عارفة الحادث دا لكن أهو الحصل حصل في اليوم دا كان لي يادوب إسبوعين في الجامعة، و كان اليوم المشئوم يوم ناس الامن كتلو الطالب (محمد عبدالسلام) اليوما داك الطلبة إعتصمو انا ما فهمت إعتصام يعني شنو!؟! لمن سمعت الكلمة دي إتخيلت إنها زي حركة الناس لمن يقعدو في محل و يبطلو الاكل، شلت هم طبعا؛إنتي عارفة همي في بطني.
المهم
اليوم داك لي شقاوتي إعتصمت مع كم نفر من دفعتنا؛ إعتصمو لانهم من مدني و بعرفو الولد، الايام ديك كان شريط محمد الامين (ود مدني) طالع جديد و البص السياحي زاتو كان طالع جديد ف لمن تركب أي بص بتلقى الشريط مدور، ركبت البص و سمعتو لي اول مرة، وهاك يا بكاء و هبالة في الشارع، البشوفني يقول دافنين صرتي في مدني!
الايام ديك كانت ونسة السناير كلها عن المظاهرات و كيف إنهم بيتلقفو البنبان ويرجعو لناس البوليس تاني، وحكاوي و حكاوي في اليوم داك كنت جاية في الطريق للجامعة، أبوي عاين لي شدييييد و قال لي : قالو في أحداث في الجامعة ، ما أشوفك تطلعي في مظاهرة يا آمنة ! رديت: منو دي ؟ انا؟! أبدا، ما حيحصل، انا ما بعرف لي حركات الاولاد و البنات الماجادين ديل!
مع اني مشيت لابسة كدارة و إسكيرتي كلوش و جاهزه موية و نور.
لمن المظاهرة جات ماره بي باب كليتنا سالت نفس الناس الكانو بيحكو الحكاوي:أهاااا،حنطلع متين؟! تطلعي وين يا برلومة ؟! يلا أجري أركبي العربية ديك!! حتخارجكم للسوق العربي . إرتبكت لكن لمن شفت عدد إتنين شيوعي و تلاتة شيوعيات و وإتنين إتحادي و أنصار سنة طلعو مع الناس ، للتاريخ ديل كانو كل الطلاب المنظمين في كليتنا بالاضافة لي كم كوز و كوزتين.
طلعت
بقينا مااااشين في شارع الجامعة: مقتل طالب مقتل أمة، مقتل طالب مقتتتتتتتل أمة. و الشباب بحمسو في بعض ، زاد حماسم لمن شافو طالبة من إقتصاد إسمها عبير كرار ، و نادوها بي بت الشهيد. انا طبعا كنت تور الله في برسيمو ، ما فاهمه حاجة لمن شافو ناس فض الشغب و البوليس بقو يقولو: ما تتفرقوووووو ،ما تتفرقووووووووووو .
طبعا انا خفت لكن عملت فيها شجاعة و قعدت اكورك: ما تتفرقوووووووووو !
قام واحد من العساكر ضرب رصاص في الهوا قام صادف عمود الكهرباء عمل شطططططططط قلتا ليهم: إتو أولاد حرام ولا شنو بلا ما تتفرقو بلا .... معاكم؛ أساسا إحنا ملمومين في كتل زول و دحين بلحقونا ليو، أجرو يا بنات!
مع أجرو يا بنات دي أنا تاني ما شافوني إلا في السوق العربي اليوم التاني جيت لقيتم مسمييني الحلبية بياعة القضية .
ف شنو شكلي برضو حا أنضم لي جبهة الجهاد الإلكتروني
فرصة سعيدة يا آمنة في الختام السلام عليكم
يتبع>>>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة الرابعة : مذكرات مجنده
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يما إتي شكلك ما عرفتي تربيني كويس, ف شنو, الحيكومة ما قصرت معاي!
أتذكر يوم بديت إجراءت التسجيل للخدمة الوطنية, أولاً الكشف الطبي
بنات دفعتنا أغلبم إتصنفو (ج) يعني غير لئقات صحياً و نصهم إتصنفو بي نضارة وااااااحدة, دي تخش للجنة الطبية تمرق تديها لي أختا !! أبيت أطرح فكرة تكتبو لي ورقة تطلعني (ج)؛ الصراحة خفتكم تدوني درس في الأخلاق و تملوني فقر؛ وانا ما ناقصة بلاوي. ف شنو, إتوكلت و دخلت اللجنة, ياخ المره الدكتورة شمتني من أول نظرة, و قبل ما أتم ليها كضبتي طلعتني (أ) إن شاء الله تكون شحمت و أدوها شريط بعد داك.
بعد إتصنفت طوالي دخلت المعسكر, معسكر ام دوم دفعة نسيبة و لا خولة الكم كدا ما عارفة إتخيل لي كانت نسيبة ال الحداشر، و الله ما قادره أتذكر!
اغلب المجندات كانو كوادر الطبية و تخصصات نادرة زي التربية و الرياضيات, لقيت من دفعتي إتنين رشا و إكرام, لقيتن إتقدمني بي كم يوم. دخلت المعسكر بعد ما(الاب) وصلني إتذكرت اول يوم لي في المدرسة، طلبت من (الاب) يخليني أدخل براي، رفض, ف شرحت ليو إني أساساً جاية متاخرة ولو شافهو معاي حيعذبوني زيادة ! رفض يمشي إلا بعد يتاكد إنهم قبلوني . المهم دخلت, اول مشكلة واجهتها كانت مع إسمي التعلمجية بتول : إسمك منو يا مجندة ؟!!! إسمي : آمنة زوزانا حسين محمد حسن محمد ع...... بتول : هييي, شنو روزانا دي كمان رديت: زوزانا زوزانا يا استاذة دا إسم بولندي معناو .... بتول : هيييي انا ما استاذة !! قامت تفتش في شنطتي : كيس صابون بدرة , علبة شمع بالكركار صابونة فنيك , مشط , مكحلة , كم غيار , كم كتاب و كنت داسه موبايلي في جيب داخلي. أدتني العهدة : (الميري) و هو فستان و بنطلون و خمار من الدمورية، جزمة باتا لونا بيجي , مصحف , كباية بلاستيك. مشيت أشرت لي ابوي من بعيد إنو خلاص قبلوني ،دخلت المعسكر، و كان عبارة عن مدرسة فيها فصول و حوشيين, الفصول كلها كانو مستخدمنها كعنابر عشان النوم، وكان فيها عدد من الحمامات و الأدب خانات. في طريقي للعنبر صادفت عدد من البنات بينططو و هم شايلين شنطم فوق راسم و بيقولو : انا الطيرة الجيت الليلة , انا الطيرة الجيت الليلة !! قمت بقيت ماشة سريع عشان أغير هدومي عشان ما ينقشوني جيت الليلة زي الطيرات ديل !!
قبل ما أصل العنبر شفت واحدات تانيات كانن قاعدات في فترة الراحة سمعتهم بي أضاني دي : الاولة : مبااااالغة لكين؛ نضيفة نضافة!! التانية : أأي مستحمية ياااااخ، ظااااهر، مستحمية! موضوع عدم الحمام و القمل حا أجيك ليو في رسالة قادمة .
عشان يا حاجة ما أطول عليك القصة بي إختصار كدا انا في المعسكر دا إتعلمت الكذب و الصلاة بدون وضوء و السرقة
اي السرقة.
يتبع جداً >>>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: sara fadul)
|
الرسالة الخامسة : العسكرية تصرف
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
نرجع ليك لي موضوع السرقة كانت معانا في المعسكر بت من جامعة السودان سمممممممينة و هبلة جات تشتكي من إنو بنطلونا سرقو ولا إتشرط ما متذكره. للمعلومة، المجندة بيكون عندها ميري وااااحد بس، كنا بعد تمام الساعة 9 بنقعد نغسل و للمعلومة برضو التمام هو: جمع كل الموجودين في المعسكر و عدهم عادة بيكون في تلاته تمام في اليوم، الصباح الساعة 7 قبل التدريب، الساعة 5 و الساعة 9، تمام الساعة 9 دا كان الغرض منو الإستنزاف الجسدي و النفسي عشان المجندات يمشو ينومو بدون تفكير في الوضع المهبب الكانو فيو، التعلمجيات كانو بيتفننو في الإساءة و الإستهزاء بالمجندات، الصراحة مرات الحاجات البيقولوها بتكون مضحكة و للتاريخ انا ما حصل ضحكت في كلامم إلا لمن واحدة من البنات مرة هشت ليها ضبانة من وشها أثناء وضع الإنتباه، وضع الإنتباه دا المفروض المجند ما يتحرك فيو تحت أي ظرف! قامت واحدة من التعلمجيات إسمها وداد قالت ليها: هييييي يا مجندة بتهشي في الضبان ليه!؟ ضبانتنا دي جاتك ولا جيتيها!؟ ضبانتنا قاعده هنا مكرمه معززة ما انتو لو كنتو نضيفات ما كان جاتكم يا مقملات !! يااخي انا ضحكت ضحك لمن وقعت في الواطة، معليش موضوع القمل دا حا اجيك ليو لاحقا المهم كنا بنغسل الميري بعد الساعة 11، يا حاجة إتي عارفاني ما بعرف أغسل الهدوم ف شنو صحباتي في العنبر حنو علي لانو الميري بتاعي كان أتفه ميري في المعسكر، بقو يغسلو لي، بقيت انا أنقل ليهم الموية من هناااااااك و هم يغسلو. اها صحبتي السمينة شرطت بنطلونا وجات تتونس معانا، قلتا ليها: انا زااااتي بنطلوني إتشرط ، ورح نسال واحدة من التعلمجيات. مشينا التعلمجية سامية: دايرين شنو؟ها ها ها، إتصرفو يا مجندات، إتو ما عارفين العسكرية تصرف ؟!
قلتا ليهن: خير، الميري الجديد كتيييير قاعد في كنتينر في نص الحوش و بابو فاتح يلاكم نجازف منو . فتحو لي خشمم و صحبتي السمينة الهبلة أبت تجي معاي ، إتخيل لي رشا دفعتي مشت معاي جازفنا الميري و طلعنا.
بعد كم يوم صحبتي السمينة الهبلة جات قالت لي: ياابو الزوز يااخي دايراك تجازفي لي حاجة.
قلبي أكلني: اها خير ؟
ردت: جازفي لي مصحف لانو مصحفي سرقو .
إتشنجت ليكم فيها: شنوووووو، مصحف ؟! يا بت إتي هبلة ؟ انا بت ناس و ناس محترمين دايراني اسرق ليك مصحف ؟!!!!
بعد داك بي كم يوم كنا في فترة الراحة، دي الفترة البعد صلاة الضهر ، اليوم داك قالو مافي تدريب لانو المعسكر فيو تصليحات في الحمامات المعسكر إتملا رجال، إحتفينا بي جيتم دي زي الحاجة السمحة لانو المعسكر كان فيو نسوان بس، الحرس الرجال بيكونو قاعدين بي السلاح برا المعسكر، مرات مرات بيخش واحد إسمو معاذ على ما أتذكر بيخش يمرق السلاح للتدريبات كان صغيروني و وجيه، بيقومن البنات لمن يجي بيغنن : معاذ شايل السلاح تاح تاح ترااااح. اها فجاءة كدا قامو ضربو صفارة الجمع ، قمنا نتجارى عشان نلبس الميري للجمع ، قامو قالو أجمع و بي هدومكم دي !! يا ساتر يارب قمنا جمعنا في الحوش الأمامي، المعسكر فيو تقريبا 600 مجندة مقسمين لي 6 سرايا، لمن نجمع بنكون في شكل مستطيل و التعلمجيات بيقيفن في نص المستطيل . اليوم داك كل التعلمجيات كانن جوه المستطيل و جنبهم كرتونة صغيرة . بدو ينبزو فينا نبز زايد من العادة : إنتو جيتو من وين ؟ إنتو جيتو من الخلا ؟ جامعات شنو دي الإتخرجتو منها ؟ يا معفنات يا .... تعلمجية سامية إتفضلت و وضحت لينا إنو ناس التصليح لقو المجاري مقفولة لانو البنات رمو في الحمامات حاجات قفلتا، قامو مرقو الحاجات و ختوها في الكرتونة دي !! تعلمجية وداد : انا إسمي وداد جرجرة ، لو دايرين تتجرجرو معاي بتجرجر معاكم للصباح. تعلمجية بتول : لو دايرين جرجرة وداد قاعدة للتخريج ، لكين الليلة مافي إنصراف إل الكرتونة دي تنصرف ! و مافي زول يشيل الكرتونة !!!
اليوم داك كانت شمش الله أرجل ما يكون، و بس قعدت قصاد مخي لمن ساح و كرهت ام حلة السودان !! بعد نص ساعة قمت إتلفت للجماعة الوراي بي صوت خشن إكتسبتو في المعسكر: شباب قالو مافي زول يشيل الكرتونة... واحدين من ورا قعدو يتنطنو : اسكتي يا زوزانا ما ناقصنك نهرتهم : يا شبااااااب ، واحدة فيكم تختبر. تختبر بي لغة الجيش يعني تطلع من الطابور، قامت واحدة إسمها زيتونة من جامعة السودان تربية رياضيات ، إختبرت معاي وجرررري شلنا الكرتونة و طوالي لبرميل الوساااخه كان ورا السرية حقتنا، في الوكت داك التعلمجيات كانو مشغولين بالونسة، يلا مع رجعتنا للطابور بتول شافتنا، قعدت تكورك : شفتك شفتك يا مجندة ، ابقي شجاعة و امرقي !! لمن لقت الكرتونة مافي زادت في الكواريك قامت زيتونة مرقت و مرقت وراها بتول : دا شنو دا ، عملتو شنو؟!!! قلت ليها : جنابك قلتي مافي زول يشيل الكرتونة، لكين ممكن زولين يشيلو الكرتونة . عاينت لي بي إعجاب لي حسع محيرني ! بتول : مبروووووووك العسكرية تصرف يا مجندات ، السرية الرابعة يا (جن جويد ) إنصراااااااااف !! دي كانت سريتنا ، صرفو سريتنا و خلو الباقيين و خلونا انا و زيتونة معاهم بعد نص ساعة صرفو الباقين ، بعد ربع ساعة صرفونا انا و زيتونة .
القرف حيتواصل لحد ما نصل لي قصة القمل
يتبع للأسف >>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة السادسة : قايد كتيبة الكافرون
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
عاااارفاك القصة دي عارفاها تتذكري لمن كنت بعمل ليكم زحمة في الحمام مع أذان المغرب وتقولي لي: يا بت إنسلي لينا، دي مواعيد صلاة المسلمين نظام نخيس عشان انا الله يغفر لي كنت بتاخر و بفطفط في الصلاة اها يا زولة الفشلتي فيو مدة ال 18 سنة القعدتها معاكم قبل المعسكر نجحو فيو ناس الحيكومة!!
يا حاجة أنا بقيت صلاية جنس صلاة، لمن بلا وضوء!
أتذكر من اول يوم دخلت المعسكر، صادف صلاة الضهر، بعد مشيت لبست الميري، جيت لقيت لي عريشة كدا زي الراكوبة، لقيت البنات الكانن بيقطعن فيني قمت كا نوع من الرشاقة جيت سلمت عليهم، اها في نص مطايبتي ليهن ضربو الصفارة! والناس دي قامت جارية، بسم اللهي في شنو؟! كوركن فيني: أجري أجري يا مستجده! لفحت سفنجاتي: سجمنا، أجري وين؟! ورح العريشة، جريت معاهم لحد ما دخلنا العريشة بعد ما إستغفرن و شلنا نفسنا وروني إنو لمن صفارة الصلاة تضرب لازم أي زول يدخل العريشة بغض النظر عن إنو بيصلي ولا كتابي ولا ماعندو دين ولا معزور! يلا لو ما دخلت عريشة ابو سفيان دي طوالي بعاقبوك في تمام 9!!
اها بعد صلاة الضهر كان عندهم التلاوة، بيقرو ما تيسر من القران بي قيادة تعلمجية بنقول ليها الشيخة، كانت بتنطق اسمي بي لهجة الشوايقة بتقول لي : زوزاني اها انا كنت جاية من إجازة طويلة و الفترة بعد صلاة الضهر دي كانت بالنسبة لي فترة القيلولة، يعني كان جا منو داك في بيتنا ما بمرق ليو !! في المعسكر بالجد كنت بعاني من إني كنت بدقس في نص التلاوة لدرجة تانيب الضمير، لمن الشيخة لقتني مرات بدقس قامت عملتني (أمير تلاوة) يعني الزول البيكون مسئول من مجموعة التلاوة، بقوم بدقس برضو، دا كلو هين المصيبة كانت في صلاة الفجر؛ الأذان بيكون الساعة 5 و نص ولا 6 بيقومو يضربو الصفارة الساعة 4، الناس كلها تصحى عشان تنضف المعسكر البنات بيقومن يقشن المعسكر كلو و واحدات بيمشن يجيبن الشاي من الخالات الطباخات في المطبخ، في جرادل حديد، نفس الجرادل المستخدمه في غسل الميري! قامن بنات منظمات ومرتبات من عنبرنا مسكن جردلين و علموهن عشان تاني نجيب فيهن الشاي بس، مع إنو انا شخصيا ما فارق معاي بعد النضافة و شراب الشاي البنات بيلبسن الميري و بنمشي الصلاة وبعد داك بنجمع للتمام الساعة 7 و بعدها بنمرق ميدان (ام دوم) للتدريب اها انا اول 10 أيام إنعصرت مع الجماعة و بقيت أقوم أقش الحوش و أواصل البرنامج معاهم، بعد داك بنيت لي قاعدة شعبية في السرية بتاعتنا قمت أقنعتهم إنو ما من مصلحة السرية إني أشارك في قش الحوش؛ لاني مابعرف أقش، لاكين كمان انا منو يعني ولا إتخرجت من أكسفورد؟!! ف شنو قمت إتفقت معاهم إني أكون مسئولة من نضافة الحمامات في الفترة النهارية، وافقو ، مع العلم إنو الفترة دي هي فترة الراحة و أحيانا البنات بيغسلو فيها و بيكبو موية الصابون في الحمامات، و عشان ضميري ما ياكلني قمت كم مرة نضفت الحمامات جد جد، موية صابون بدرة في الجردل و هووووب شوووووو و إنتهى البيان. اها بقيت بنوووووم زي الترتيب و مافي زول بيسالني، بصحى مع شراب الشاهي و مرات بمشي معاهم صلاة الفجر و مرات لحد ما أقوم بي راحتي الساعة 6 و نص بقوم أصلي الصبح. يوم كنت نااااايمة، جات واحدة من سريتنا من جامعة السودان ما دايرة أقول إسمها، أدوها رتبة (حيكمدار) الحيكمدار كانت عندها مهام تنظيمية في السرية ؛ بتكون مسئولة عن السرية قدام (الحيكمدار العام) بتكون مجندة برضو. المهم، جات حضرة الحيكمدار لقتني أحمد سيدي ناااااااايمة و الجماعة شغالين قش تقيل، سالت البنات النايمة دي منو؟! قالو ليها دي ابو الزوز، مالا عيانة ؟! لا ما عيانة و شرحو ليها الإتفاق، انا عملت ميته و ابيت اقوم عليها قامت تنكش تنكش جات رفعت الغطا من وشي، جناب الحيكمدار عريف أركان حرب: قومي يا زوزانا للنضافة. شخصي السمين: قالو ليك انا بنضف الحمامات الحماااااامات. جناب الحيكمدار عريف أركان حرب: قومي يا مجندة ، دي تعليمات شخصي السمين: يا بت تعليمات شنو إتي صدقتي ؟!! إن شاءالله يوم تخريج السجم دا يدوك رتبة ورجعت إدمدمت بالغطا جناب الحيكمدار عريف أركان حرب: قومي يا زوزانا و بطلي قلة أدب و سفاهة !! أمك ، معليش يا حاجة قصدي خوووووود قمت طواااالي رفعت الغطا و وقفت ليها فوق السرير انا الصراحة كلمة قلة أدب ما حرقتني لكين حرقتني حكاية السفاهة دي!! والله أتذكر لحد حسع كنت لابسه جلابيتي الخدرا ام شرطه بي الجنبه لزوم التهوية و كدا، و شعري منكوش النكشة حقة الصباح ديك اها قمت وقفت ليها فوق السرير و انا فاغرة الفاه: شنو شنو شنو سفاااااااهة!!! يلا مع شنو شنو دي باقي البنات الفي العنبر إتلفتو: لالالا يا ابو الزوز ما بيشبهك الكلام دا صلي على النبي. الصراحة انا الكسر عيني إنو بنات طب الزعيم الأزهري طالبات الحاجة كانن حاضرات و للاسف عارفني بتها ودا سبب أساسي من الاسباب الخلتني أمتنع عن الألفاظ القبيحة بعد المعسكر المهم قلت ليهم: صلو على الحبيب إتو ديل ، انا بس دايرة أشرح للاستاذة دي معنى كلمة سفاهة و قبلت عليها : يا جنابك (الجن الل***) في سري طبعا لانو الكريهات بنات الطب كانو متابعين : يا جنابك السفيه هو من يصرف ماله في أوجه الحرام مثل الخمر و النساء و انا الليلة بوريك سفاهتي!! المهم قامو الاجاويد إتدخلو و انا قصرت الشر، قلت ليهم خلاس بقوم أنضف الحمامات، البت بعد فترة كدا جات إعتذرت لي و إتعافينا. اها نرجع ليك لي تلاوة الضهر، مره كدا قمت أثناء التلاوة نمت لمن شخرت و لكزوني، قمت زعلت زعل شديد خلاص، قمت فتتتت وقفت على حيلي، الجماعة: دا شنو ماشة وين يا أبو الزوز؟!! هرشتهم: هيييي، من أراد منك أن تثكله أمه و يعمل للمعسكر دا ( كما كت ) فليتبعني خلف هذه التعريشة و إلى عنبرنا، انا ماشة انوم . الجماعة قامو إتجهجهو، بقو يتمتمو، والله يااخي إحنا زاتنا نعسانين لكين ... هييييي بي طريقتكم، إتو ناس كبار و خريجين ولا جيتو هنا بي شهادة إكمال إبتدائي؟ ف شنو ، مشيت العنبر، في كم واحدة عاملات فيها شجاعات و واحدات عاملات الطيرة المبارية السيرة ، نمنا جنس نوم، هي بتكون زي ربع ساعة كدا لكين كانت حلوة ، في الربع ساعة دي الخبر كان وصل، يؤسفني أقول إنو بينا كان في جواسيس للتعلمجيات و الإداريات حااجيك ليهم تاني في قصة القمل اها شويتين كدا و نسمع ليك كرووووو باب العنبر فتح، و صوت جووووطة، انا حسب نومتي بقى لي رهاب رهاب، كان القى ليك سميرة الإدارية فوق راسي !! سميرة: دي منو النايمة دي، قوووومي يا مجندة، نايمين في وكت التلااااااااوة، ما بتخجلو !! رفعت ليها راسي من تحت الغطا نااايمة ولمن مريله: أأأ ، منو ، سميرة ، في شنو ؟ سميرة : في شنووووو ؟!!! انا جيتك في حوش بيتكم ، بلا في شنو معاك ، يلااااااا كلكم قدامي على الميدان الأمامي. قمت أتمتم: دقيقة نلبس الميري سميرة: لاااااا بي خلقكم دي ، مااااابتخجلو ، تنومو في وكت التلاااااااوة !! قمت بي نفس جلابيتي الخدرا المشروطة بالجنبه ، كجنتها و سبرتها قمنا كشلو كشلو مشينا الميدان الأمامي ، طوالي إستلمتنا وداد جرجرة ، أول حاجة قالت لينا أقعدو على ركبكم و وشكم للشمش و إيدينكم لي فوووووق . انا مع إيدينكم فوق دي صرخت ليك من جووووة قلبي : أحدا" أحد ، أحدا" أحد ، أأأحدا" أحد . وداد جرجرة : إتي ، أحي انا منك إتي يا قايد كتيبة الكافرون ، إنصراااااف وقعدت تضحك !!!!!
القرف حيتواصل لحد ما نصل لي قصة القمل
يتبع للأسف >>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: أمير عثمان)
|
Quote: وأنا أقول جبتى الفصاحة والفكاكة وخفة الدم دى من وين!! اتاريها ما حقتك ... التحية للحاجة الخالة الوالدة ... |
منو دي؟!
يا مان انا خفة الدم دي بالذااات ورثتها من أبوي حي انا؛ هي قايله النكر دا صعب؟!
خليها تواصل موضوع نكرتها لي دي، وستجدنا كلنا ها هنا ناكرون.
ربنا يجبر خاطرك يا أمير يأخي، بحق جاه النبي.
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة التامنة : تمام الشيطان
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يا حاجة ياأخي انا الله أعلم أرجع أم بنين تاني !!
اليوم داك الشمش صدقت و بطلت كضب و طلعت جدجد لي أول مرة من ما جيت قمت إتحنفشت ليك و طلعت في طريقي لي بيت (سارة فضل)، البت دي ما دايرة تفك ضفيرتي، هناااك بيتم بعد شارعين، و هنا بيتا نفس الشي، لو ما البت الهبلة ام ضحكة نضيفة دي ما أظن كنت أقدر على برد البلد دي اها قمت قطعت ليك نصي بي بنطلون و لبست لي نضارة شمس مع إنو الساعة كانت 6 يما في هذه البلد المغرب بيأذن الساعة 9 و نيف، لابسه النضارة و ماشايفه قدامي و المشكلة زي ما عارفة عندي الحول الداخلي، و مرات لمن أزعل بيبقى خارجي زاتو، ف شنو، لمن البس نضاره بكون شايفة إتنين إتنين. قلتا لي روحي والله يا آمنة ناقصك بس العجلة ام مسجل و وردة جنب الدركسون حقة أولاد البقاره ديك، طواااالي إتذكرت رحلتي لي أهلك في سنجة، سنة 97 لمن كنت منتظره الجامعة تفتح و معاي كل البنات من دفعتي، لانو الحكومة قررت تفتح المعسكرات للاولاد بي دفعة عزة السودان الاولى، و كان الظلم في إنها إتحسبت للاولاد خدمة وطنية و إحنا ضاعت علينا سنة في البيت و في النهاية جينا عملنا الخدمة لمدة سنة . في الفترة ديك مشيت زيارة لي سنجة بلدك و مسقط راسي، من ضمن الرحلة مشيت حلتكم ال لي جووه (أم بنين) ، (أم أجمل بنين و بنات في النيل الازرق) قضيت فيها 3 يوم بس، من أجمل الايام في الرحلة، الحفاوة و الكرم و كمية الخرفان النطيتم في بلدك يا حاجة ممكن تحل مشكلة مصر في اللحوم، و الشاي بي لبن الغنم المقنن لي حسع طعمو ممسخ علي كيف الشاهي، البرنامج كان كالاتي البنات بيصحن قريب للساعة 9 بيكونن الامهات إتولن أمر شاهي الصباح نشرب الشاهي باللبن المقنن في الراكوبة، بعد داك البنات بيقشن الحيشان ، أساسا بيت الاسرة الواحدة بيكون عبارة عن حوش وااااحد و مقسم كل أسرة عندها قطية و راكوبة و (الأدب خانة) عادة بتكون مشتركة، وفي محل بعييييد عن القطاطي، في منطقة مرتفعة و بتكون عبارة عن حفرة محاوطه بي حيطة من ثلاثة اركان و الركن الرابع بيكون الباب، بيكون مغطى بي قطعة من الخيش، الحيط بتكون قصيرة، يعني لو إنت واقف بتكون مكشوف من راسك لحد أكتافك، و لمن تكون ماشي (الادب خانة) بتشيل معاك الإبريق عشان باقي الناس يعرفو إنها محجوزة، كنت بكون شايله الإبريق و قاطعه الحوش، أي زول بيشوفني بيناديني: بت بخيته، ها بت ها ، كيف أصبحت أ الدكتورة ؟ ماشه المستراح ؟ بت بخيته إنعلك طيبة أأالدكتورة ، مارقه علي (بيت الادب) ؟ غايتو حكاية الطب البيورثو دا ماشفتو إلا عند أهلك ديل !! بت بخيته ،طّلق تجي تفطري معانا، اها ماشه على ال..... ، يعني لحد ما تصل تكون طارة ليك في راسك ! بعد القش بيفطرن و كانن كتر خيرن بيدخلن لي الموية جووووة القطية للحمام بالطشط و الكوز، الجردل، بعد داك بيستعملن زيت الكركار للشعر و الجسم بعد إستعمال الدلكة، بعد الفطور بيقعدن يتونس و يشربن الشاهي الاحمر و الجبنه، بعد صلاة الضهر بينومن، في الوكت داك الامهات بيجهزن الغدا، بعدها بيتغدن و العصر الاولاد بيجو قاطعين نصهم و لابسين (نظارات) الشمس و بيمرقو كلهم إلى الجروف ودا على شرف زيارتي ليهم، يعني ما برنامج يومي، رجعنا المغرب من الجروف لنجد شاهي المغرب المقنن جاهز، و تتواصل الونسة والسمر إلى منتصف الليل برعاية الإمهات وباقي أصحاب البيت .
اها يا حاجة انا خلاص قررت تاني أتكلم بالجيم المعطشه ام تلاته نقط (چ) مع قراري دا إتذكرت ليك چنابو رحاب قائد المعسكر، حضرة جنابا جات المعسكر بعد بدايتو بي كم يوم، الايام ديك كنا بنسمع عنها سمع، انا اول يوم شفتها كانو محرسني الماسورة الامامية و وداد جرجرة قالت لي: ماااافي زول يشيل موية من هنا تعليمات يا مجندة!! لانو كانت في مشكلة في الموية في المعسكر، الخيارات كانت بين إنك تستحم او تغسل هدومك ، تتوضى او تشرب و هاكذا. ف شنو، بقيت واقفه جنب الماسورة قامت جات دايرة تفتح الماسورة، انا عرفتها من الوصف؛ لانهم قالو جات بالليل، قلتا ليها: لو سمحتي ممنوووووع، عاينت لي شديييييد وما إتكلمت قامت جات واحدة من الجاسوسات طايرة: زوزانا بطلي هزار دي جنابو رحاب قائد المعسكر . عاينت ليها جوووة عينا: معليش جنابك ما عرفتك لكن دي تعليمات و لو جا عمر البشير ما كان بخليو. إبتسمت لي إبتسامة حامضة كدا، و فتحت الماسورة . بعد داك مرقنا للتدريب في ميدان ام دوم، اليوم داك كانت حر الشتاء شديدة، و كان أول يوم نطلع نتدرب بي سلاح، الحمدلله سريتنا ما كنا شايلين سلاح، لانو بدو التسليح من السرية الاولى لحد الرابعة السلاح قصر، بعد تمينا جري التعلمجية وقفتنا إنتباه، جاتنا جنابو رحاب جابو ليها كرسي و قعدت تفررررج فينا، بعد شوية واحدة من البنات راسا لف و تااااااخ وقعت بالسلاح في الواطة، قامت جنابو رحاب تكورك: دا شنووووو يا مچنده ، ترمي السلاح في الارض، إتو ما عارفين دي چريمة بيعاقب عليها القانون؟!! يلا كلكم أرفعو السلاح فووووووق . قامو السرايا المسلحين رفعو السلاح فوووووق، قلتا لي بنات سريتنا سرررريع أرفعو السلاح فوووق، قعدو يتنطنو إتي يا زوزانا مجنونة؟!! سلاح شنو ؟ لكين موقف الكرتونة أداهم ثقة بليدة كدا في تصرفاتي، قامو رفعو السلاح الخيالي فوووووق. قامت جنابو رحاب قعدت تعاين لينا بي إستغراب، قامت تعلمجية وداد قالت ليها: ديل ديل (الجن جويد) ، قامت إبتسمت نفس الإبتسامة الحامضة، بعد شوية واحدة خسيييييسة من الجاسوسات رفعت السلاح بي يد واحدة و كوركت: اااالله أأأكبر!!! للمعلومة كانو في المعسكر بيعلمونا نهتف هتافات معينة بي دلالات مختلفة، مثلاًً لمن يقولو ليك مبرررروك معناو إتا عملت شي كويس، يعني للفت النظر ممكن تستخدم (الله أكبر) قامت لمن البت هتفت جنابو رحاب: مبررررروك يا مچندة ، إنصرااااااف، قمت قلت لي جماعتي سررررريع أرفعو السلاح بي يد واحدة قامو الدور دا بدون مناقشة كلهم رفعو السلاح الوهمي بي يد واحدة و بي حس وااااحد: الله أأأكبرررررررررررررر . طوالي چنابو رحاب صرفتنا: چن چويد إنصرررررررررراف !! بعد داك بي كم يوم البنات بقو يقولو إنو المعسكر مسكون، المعسكر بالليل بكون فعلاً مخيف يأخي يوم واحدة معانا في العنبر التعلمجيات كانو مسمينها عمود الكهرباء؛ لانها طويييييلة و سمينة، كانت بتنوم في السرير الفوقي مباشرة، البت دي نننننص الليل جات طايرة من فوق ونطت في رقبتي: آمنة آمنة والله شفت لي حاجة زي الراجل جات داخلة، قلتا ليها: عليك الله بي تفتك المنكوشة دي حتى كان جا شوشو شخصياً حيخاف منك !! يا بت نومي ، أبت ترجع سريرا و فضلت خانقاني للصباح. يلا الكلام وصل لحضرة چناب رحاب قامت في تمام الساعة 9 سالتنا: قلتو في چن في المعسكر يا مچندات ؟ كلنا بي حس واحد: أأأأي جنابك چنابو رحاب: خلاص تاني عندكم تمام الساعة 2 صباحاًً إسمو تمام الشيطان و الچن !!! و بقينا نصحى الساعة 2 صباحاً عشان تمام الشيطان، عارفاني يما انا بحب النوم ولو قطعت نومتي بصحى بي صداع، و كان جيتي إتي شخصياً تصحيني كنتي بتسمعي فارغ. بنقوم نصحى و الدنيا برد، انا كنت بس بسكت ساااااكت و بربط بطانتي فوق راسي زي المره الراجلا ميت جديد و كشلو كشلو كشلو للميدان ، بقيف و عيوني مقفولة تقريباً، يقولو صفا بعمل إنتباه يقولو إسترح بعمل إنتباه، يقولو الله أكبر أقول ليهم الله يحرقكم بالجاز و هاكذا، لمن لقيت إني حا أجيب الهوا لجماعتي بقيت بس بسكت، الحاجة الكانت بتغيظني إنو البنات بكونو نعسانات لمن بيغلطو في الحساب تسمع : واحد ، إتنين لحد 67 ، فجاءة تسمع واحدة بتقول 54 !! يقومو يبدو العد من جديد، إستمرينا كم يوم بالحال دا لحد ما عدد كبير من البنات مرضو من السهر و البرد، قامت چنابو رحاب يوم في تمام 9 سالتنا تاني و هي مبتسم نفس ذات الإبتسامة الحامضة: أأأها أخبار الچن شنو ؟! قلتا في سري : الچن ؟! (چنابة الحبشية الماتغسلا موية النيل). كلنا و بلسان وااااحد: إنصرف جنابك ، الجن إنصرررررراااااف !!!
لكن ربنا دا ما عادل؛ بعدها بي كم يوم قامت هي زاااااتا شافت ليها حاجة و قامت تكورك و التعلمجيات جن جاريات ليها، و بقو لافين في المعسكر كلو، بلاهي المرة دي ترجف كلها و عرقااااانة لمن الجيم العطشانة حقتا ديك إتبلت !!
اللهم شماته
حتتواصل لحد ما نصل لي قصة القمل
يتبع للأسف >>>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة التاسعة : حمادة قد السلك ( قصة القمل )
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم، بلاهي كيف أنتم في المدة التي لم تروني فيها ؟!! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يا حاجة (بخ بخ) انا بقيت عندي مفتاح بيت !! ما قادره أستوعب الحكاية دي و مرات كتيرة بمرق و بخلي باب البيت فاتح زي ما كنت بعمل في بيتكم، بيتكم أبو باب فاتح سااااااهي.
أتذكر أخر أيام في المعسكر كانت صعبة جداً لاننا بقينا ما عارفين التخريج حيكون متين و التعلمجيات و چنابو رحاب ما دايرين يقولو لينا الحقيقة و بيماطلو فينا و كل يوم بيطلعو بي حِجة جديدة، في الاول قالو السبب المعطل التخريج إنو السلاح ناقص و لازم يتم عشان نمشي لضرب النار في منطقة (السليت) و الخطوة دي أخر خطوة في المعسكر بعدها التخريج مباشرة، قامو تمو السلاح و ما ودونا نضرب النار!! بعد فترة عرفنا إنهم حيخلونا ننتظر معسكر تاني بدا بعدنا بي 20 يوم عشان نتخرج مع بعض; و بسبب الحكاية دي نحن قعدنا في المعسكر 45 يوم بدل شهر !! الحاجة الزادت الطين بله إنو حصلت مشكلة في الموية في المعسكر و الخيارات بقت يا تستحم يا تغسل الميري ، يا تشرب يا تتوضى و هاكذا، انا اول 10 أيام كنت متغمصه شخصية بت نضيفة و كنت بستحم الصباح قبل الطابور و بالليل قبل ما أنوم ما دايرة أقول ليك زي ما بعمل في البيت عشان ما تفضحيني، المهم ، بعد داك بقت الحركة دي صعبة لانو الدنيا شتاء و المعسكر مخيف بعد تمام 9 دا غير مشكلة الموية، بقيت بستحم مرة واحدة في اليوم شوية شوية بقت يوم أي و يوم بعمل رايحة و هاكذا، حالتي النفسية كانت مابطالة عشان الكضب حرام عدم الحمام ما أثر شديد لكن حركة الكضب بتاعم و الغش هو الزهجني الكويس إنهم كانو ضاغطننا بي التدريب و الوقفه بتاعة التمام ف شنو كنا بنووووم بدون تفكير ، بقيت بلقى حاجة أفرغ فيها طاقتي و غضبي، الجلالات : وهي أغاني و أناشيد بتلازم التدريب و الجكه، قامن التعلمجيات إكتشفن موهبتي و عملوني قايد سرية، بكون ماشيه في بداية الطابور او في نهايتو، السرية بيكون عندها قايدين واحد أمامي و واحد خلفي، القايد بيدي تعليمات: لليميييييييين در، لليساااااار در، صوتي كان عالي و راااااجل كدا أتذكر من الجلالات: ليلى جري التوب ، ليلى ، التوب جميل اللون ، ليلى ، التوب جميل اللون ليلى دا الحماني النوم ، ليلى .
حمادة قد السلك بلغ الملكية ، يقدو بالمسمار إن شاء الله بالزردية ، تماااااام تمام يا تعلمجية . تماااااام تمام يا تعلمجية . عشان تتخيلوها الجلالة دي كانت على وزنة غنية (لا لاااا لا لا يا قروية)
بيتخللها تكبير و تهليل للحماس و كدا . أتذكر من المجندات واحدة من بنات الزعيم الازهري خريجة معامل إسمها عوضية دوكة ، كنا بنقول ليها عوض لانها كانت طوييييييلة و ضعيفة و صوتا قوي زي الاولاد ، كانت في السرية السادسة ، كنت لمن أتعب من الجري في ميدان (ام دوم) و عينها تجي في عيني بقوم أغمز ليها بتقوم تطلع من الطابور و تجري بالطرف و تبدا الجلالات ، بقوم انا زاااتي أطلع نظام منافسة و نقعد نكبر و نهلل و نوحد الجلالات في السريتين ، بيقومن التعلمجيات بيتكيفن و تاني ما بيركزو مع سريتنا ، بقوم انا بقعد أغنننننني لحد ما أطلع كلو كلو من الطابور و ززززووووت أنقشط في طابور الخساير ، الخساير بيكونو واقفين ساكت ما بيجرو ، بيقومو يدسوني في نص الطابور لحد ما أرتاح و سريتي تلف لفة لفتين و تاني أرجع برااااحة ألقى لي فرقة و أنقشط ورقة ، حكاية إنهم عملوني قايد كتيبة دي كانت جايبه لي الهواء لانو القايد بكون في وش المدفع في مرة قررت إني أستحم و ما أغسل الميري قامت تعلمجية سامية قالت لي بلهجة الجنوب : هيييييي يا هيكيمدار يا وزغاااااان بكرة لو جيت وزغان كدا انا بخلي مجندات دا يرموك في الوزاغة !! اليوم داك انا كنت وصلت الحد و قررت أقد سلك ، يعني أهرب من المعسكر يا حاجة . قمت قعدت مع نفسي عشان أدرس الحكاية ، قعدتي دي أخدت نص ساعة بس و بعدها مشيت لي إكرام و رشا كلمتهم إني ماشه بيتنا أستحم و جايه ، قعدو يرجفو ، و يكترو في الأسئلة ، قلت ليهم : لمصلحتكم خلوني أحكي ليكم بعد أجي !! أساسا انا كنت عملت دراسة جدوى قبل كم يوم ، المعسكر كان عبارة عن مدرسة فاضية لصقها مدرسة تانية فيها طالبات و داخلية أستاذات و بينهم باب بيكون مفتوح لحد المغرب مرة انا و رشا مرينا من الباب و مشينا شربنا من الازيار حقة المدرسة مافي زول سالنا ، لكن لمن دخلنا لجوووه و التعلمجية لمحتنا كوركت فينا و رجعتنا ، باب المعسكر محروس بي حرس بي سلاح ، باب المدرسة عندو حارس عجوووووز بيكون نايم طول اليوم جوة المدرسة و الباب فيو ترباس ممكن يتفتح من برا لانو قديم ، المعسكر عندو باب تالت من جهة المطبخ و مافيو حرس لكن خفت أعمل مشكلة للخالات الطبخات ف طلعتو من حساباتي ، اليوم داك طلعت التدريب عادي و لمن رجعنا للفطور و الراحة ، فترة الراحة كانت من الساعة 10 و نص بيكون الفطور و عندهم برنامج (سخافي) بيعملو في العريشة و بعد داك صلاة الضهر و بعدها التلاوة و راحة لحد تمام الساعة 5 ، قمت بعد الفطور لبست الميري ال######ان و فوقو عباية شديتا من إكرام ، لبست جزمة عادية عشان ماالفت الإنتباه ، رشا كانت مراقبه لي الطريق ، ال########ة كانت ماشه معاي لكن غيرت رايها ، قمت طلعت من عنبرنا و لحسن الحظ كان قريب من الباب الفاصل المدرستين ، توووووف إنقشطت في المدرسة و جيت شاقه الطالبات ، قامو إتعرفو علي : هيييي موش دي مجنده في المعسكر ؟! لالالالا أسكتي أسكتي خليها !! فتحت الباب الخارجي و طلعت على الشارع بدون ما أتلفت على حرس التامين جنب باب المعسكر و مشيت عاااادي كاني أستاذة في المدرسة ، مشيت في الاتجاه العكسي للعساكر ، لمن لقيت لفة في الشارع دخلت جوة الحلة و بقيت أجررررري و أجررررررري ، لمن إطمنت إنو مافي زول لحقني طلعت الشارع الرئيسي تاني و طوالي لقيت حافلة في وشي إنقشطت فيها ، إنا لله قعدت أعين للناس بي غباء كدا ، هييي راجل ، هييي مرة جد جد ، هييي شفع !!! عيني وقعت في الراجل القاعد جنبي ، قام بدون مقدمات بقى يحكي لي إنو كان شغال في السعودية و طلع لي ورق كدا !! قلت ليو بالمناسبة انا هاربة من معسكر الخدمة و لي شهر ماشفت أهلي ولا شفت ناس ، دا كلو عشان يسكت يخليني أقدر أفكر و أتحكم في ضربات قلبي ، قام قعد يكورك و يسب في الحكومة : بلاهي دي بلد دي ، لييييييييه يدخلو البنات معسكر دا كلاااام فاضيييييييييي !! و ملا لي وشي تفاف و زهجني زيادة . المشكلة إني ما كنت فاهمة حاانزل وين لكن لمن الحافلة نزلت من الكبري ، الشارع وقع لي ، نزلت من الحافلة و ركبت رقشة و طواااالي البيت ، لمن وصلت الباب الفاتح سااااااهي بقيت أكبر و أهلل من جوووووة قلبي ، لحد ما أخواني جو جارين من جوة البيت ، و قعدو يحضنو فيني ، سبحان الله كنت مشتاقة للحضن دا لكني رفضتو ، قلت ليهم خلوني أستحم و أجيكم !! دخلت الحمام و بكيت بكيت بكيت ، كل المرارة و الإحباط و الذل و الغضب ، و غسلت شعري و إغتسلت غسل الدخول للإسلام . جيت لقيتم جهزو لي الاكل و ضربو لي أبوي ، أديتم الميري ال######ان ، رفضت أكل و طلبت شاي ما قدرت أقعد في كرسي و قعدت في الواطه ، أخواتي و بنات عمتي قعدو يبكو على منظري لانو وزني نزل بصورة ملحوظة و وشي و لوني إتغيرو ، قلت ليهم : هييي انا مافاضية ليكم حسع ، يلا سريع مشطو لي شعري ، في الوكت داك أبوي جا جاري قبل مواعيد شغلو ، مخلوع ، لانو أخواني المشو المعسكر ما قدو سلك لكن جابوهم عيانين ، علي العريس مثلاً ، جابوهو بي حمة لانو السلاح عوقو في رجلو !! شرحت ليو إني جيت و راجعة طوالي ، قمت لبست الميري المغسول و مكوي و ودعتهم و طلعت معاو ، طوال السكة يسال فيني من حكاية قدة السلك دي ، أهاااا و صحباتك القدت معاك منو ؟ أهااااا نشيل لي صحباتك شنو ؟ كيك ؟ كيك ؟!!!! كيك يا حاج ؟ إتا قايلني ماشه رحلة ولا عيد ميلاد ؟ دا في سري طبعاً ، في الاول قررت أشيل ليمون ، لكن قلت لاااا بجيب لينا هوا ساي قلت ليو مافي داعي و شلت زيادة قروش و خلاص ، قال لي : أهااا أرجعك بالبوابة الرئيسية ؟! و كان جادي !! لا يا أبوي ما حينفع لانو لو إكتشفوني حيعملو لي للمعسكر ( كما كت ) ، بس فجة أقول ليك نزلني ، نزلني . قام نزلني في نفس الحته الطلعت منها للحافلة و رجعت بي نفس الدرب ، و لحد ما دخلت المدرسة ، لقيت الباب بين المدرستين مقفول !! لكن لانو ربنا كريم لقيت شباك عنبرنا البيفتح في المدرسة فاتح ، قمت طفرت بيو ، يا حاجة طفرت يعني تلبت ، و لحسن الحظ البنات كانو لسع في الحوش و العنبر فاضي ، قلعت العباية و لبست الجزمة الباته ، و جيت قادله في نص المعسكر بلا طرحة و المشاط يقول يا غربتي و الميري نضييييييف و مكوي ، صحباتي جو طايررررين من هناك و شبو في رقبتي ، آممممممنة حمدلله على سلامتك ، و رشا الهبلة تشيل و تحضن فيني ، قلت ليهم خلااااس ما قبضوني قاده حيقبضوني بي هبالتكن دي ، في تمام 5 تعلمجية سامية تشيل و تعاين لي ، و ما قادره تفهم بعد داك الجاسوسات وصلو المعلومة للتعلمجيات و كلنا لاحظنا إنهم عينو بنات يباروني في المعسكر ، مسكينات بيكونن تعبن جنس تعب من اللف . واحدة من البنات إسمها توسل خريجة علوم الخرطوم بعرفا قبل المعسكر لانها دفعة بت عمتي بقت صحبتي في المعسكر عدلت الجلالة حقة حمادة قد السلك لي : زوزانا قدت سلك بلغت الملكية تقدو بالشباك إن شاءالله بالزنكية زوزانا دقست سميرة و التعلمجية تماااام تمام يا شماشية
ذكرى الصديقات حتتواصل لحد ما نصل لقوس قزح الجميلات
يتبع فربما القادم أجمل >>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
Quote: نسخة سودانيز اون لاين
عليه
أوعد الناس القرو الرسائل في المنتديات التانية إنو ما حيكون في جديد يذكر.
كنت محتاجه زول يسالني ليييييه ما نزلت الرسائل هنا قبل كدا؟!
أريد الله الما نسيب زول، براااااي بسال رقبتي و بجاوب، ما نزلتهن زمان لانو الخالة والدتي
قصة الخالة والدتي دي جاياكم ليها
المهم
الخالة الوالدة من زمان ما بتقرا غير منتديات (الراكوبة )و (سودانيز اون لاين) ف شنو قمت نزلت الرسائل في كل المنتديات الكنت نشيطة فيها الفترة الفاتت، و هججنا هجيج
بلاهي تخشو البوست كدا تلقو يرقص و يغني، الدق دق الدق دق الدق دق والصفقة فووووووق
طيب شِن جده عشان أنزلهن هنا، سؤال جيد و اللهي
إتاكدت في الفترة الأخيرة إنو الحكومة لسع حاظره موقع سودانيز اون لاين من السودان دا السبب الأول
تانياً الزمن دا سبحان الله أولاد الحلال بقو ما مديين أولاد الحرام فرقه للصواطات و القوالات، نسال الله السلامة؛ شكلو واحد/ة ود حلال كلم الوالده عن البوست، قامت دخلت النت قرتو
اها اليوما داك انا ضربت ليهم تلفون، و كنت طولت ما إتكلمت معاهم، بعد ما أدتني موجز ما مختصر عن الجميع، زرتني ليكم زرة كّلب* ، بعدين إستعملت معاي إسلوبها المعتاد بتاع الإستدراج و الإستجواب حتان قالت لي بالحرررررف: لو سمحتي تاني ما تجيبي سيرتي في قصصك المهببه دي، انا لا أمك لا ببقى ليك!!!
خووووود عليه قلت كان كدا الرهيفة التنقد، و قررت أنزل الرسايل بي جاي.
شوفو عشان الكضب حرام و البينافق الله بعدين بطلع زيتو، انا السبب الأساسي الخلاني أتشجع إنو الموقع محجوب في السودان
انا المحيرني خالتي الوالدة دي نكرتني بعد العمر دا يا عملات (عفاف حسن أمين) لمن المذيعة سالتا قالت ليها أهلك دعموك في مسيرتك الفنية ولا لا، ردت إنو والدها وقف معاها، أمها كانت معارضة، قامت المذيعة قالت ليها: مرات بتنكرك؟!!! ردت عفاف بي صوتا المبحوح البغير منو: معقوووولة تنكرني بعد العمر دا؟!!!، و أشارت بي يدها كدا و هزت راسها و تبسمت إلى أن بانت فلجتها.
اها يا خالتي الوالدة قولي نكرتيني هنا، يوم القيامة لمن يندهوني أعملي فيها مشيتي تملي الأزيار.
* كّلب: والله عارفاو الحيّوان دا ما عندو شده ( ّ ) في إسمو لكين عملتها عشان أتحايل و ما تتسحب؛ لانو الباشمهندس بكري منشط لينا خاصية (السيد أركان حرب رقيب لغوي) دا عشان يشفط الكلمات ال أبيحة يا عملات حبايبنا المصريين، شكلي حااتعب تعب شديد مع الرغيف اللغوي دا بالذات في هذه الرسايل.
كطع شك يتبع>>>>
|
الله يفرحك زيما بتفرحيني هنا وهناك .. وهناك بكتاباتك الطاعمة دي
ويخلي ليك أمك يا حجة آمنة
بدعي ليك معاي في المدينة - وانتي ادعي لي أصلا تحية لأهل بيتِك دون فرز .. والوالدة ..
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: مجاهد محمد الهادي)
|
Quote: الله يفرحك زيما بتفرحيني هنا وهناك .. وهناك بكتاباتك الطاعمة دي
ويخلي ليك أمك يا حجة آمنة
بدعي ليك معاي في المدينة - وانتي ادعي لي أصلا تحية لأهل بيتِك دون فرز .. والوالدة .. |
أي عليك الله أدعي لي معاك، سبحان الذي لا ينسانا و إياكم
ربنا يسترنا في غربتنا دي و يرجعنا لي عقاب بلدنا الفضل دا بي عقاب دينا .
كان شفت يا مجاهد مره الخالة الوالدة مشت الحج ، قلت ليها عليك الله يما ما تنسيني بالدعوات، الوكت داك انا كنت لسع ما إتزوجت
و البوره بعيد عنك حارة، المهم
بعد كم يوم ضربت لينا، قالت لي: ماااااشفتي قعدت أدعي لي فلانة و علانة و برتكانة (ديل صحباتي و بنات جيرانا، برضو بعيد عنك كانن بايرات الوكت داك)
قلتا ليها ياااااحقينو الله لسع ما إستجاب فيما يخصني؛ مشيتي ليو هناك عملتي الخط بيزي وقعتي الشبكة بي إسامي البنات الكتار ديل!!!
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
Quote: أي عليك الله أدعي لي معاك، سبحان الذي لا ينسانا و إياكم
ربنا يسترنا في غربتنا دي و يرجعنا لي عقاب بلدنا الفضل دا بي عقاب دينا .
كان شفت يا مجاهد مره الخالة الوالدة مشت الحج ، قلت ليها عليك الله يما ما تنسيني بالدعوات، الوكت داك انا كنت لسع ما إتزوجت
و البوره بعيد عنك حارة، المهم
بعد كم يوم ضربت لينا، قالت لي: ماااااشفتي قعدت أدعي لي فلانة و علانة و برتكانة (ديل صحباتي و بنات جيرانا، برضو بعيد عنك كانن بايرات الوكت داك)
قلتا ليها ياااااحقينو الله لسع ما إستجاب فيما يخصني؛ مشيتي ليو هناك عملتي الخط بيزي وقعتي الشبكة بي إسامي البنات الكتار ديل!!! |
هههههههههههههههههههههههههههههههههههههههههههه
الصباح برضو جيت كل أصحابنا دعيت ليهم وانتي منهم - ربنا يقبل ان شاء الله يا حجة آمنة
الله يفرحك ويسعدك ههههههه
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: Musab Osman Alhassan)
|
Quote: ههههههه والله رجعتيني لأيام المعسكر طبعا أنا قبلك بي سنة يعني آخر دفعة دفاع شعبي.... وحاتك السلك قاديهو تلاته أسابيع لمن دفعتي نسوني....
تسلمي على الونسة الجميلة دي... إن شاالله هي زاااتا يلفحوها منك :)
|
ياخ سمح وكت رجعتك لي أيام الدفاع الشعبي الله لاعادها و ينعل العملها، ما تجي تكب الحنك العندك كلو بدل هههههه و بتاع
ثما إنو
أتحداك كان عيال الفيس بوك الحرامية يسرقو الرسايل دي؛ ديل عيال سيس يا عملات المصريين، بتاعين قصايد و حبكانات و وهمات و الرسايل دي لو الواحد سرقهن ما بتخدم ملفو.
لكن ديل ما مضمونين، ياخ ديل الله لا جاب عقابم .
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة الحيداشر : اللحظة التي أفلس فيها الشيطان
العنوان : بين شارع (المين رود) بالخرتوم و (إجور رود) ب لندن
التاريخ : من شهر 8 سنة 1998 و لحد حسع
بعد السلام عليكم ، بلاهي كيف أنتم في المدة التي لم تروني فيها ؟!! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها. يا حاجة رمضان طويل بسم اللهي قصدي رمضان كريم يا حاجة
الأولمبيات (2012 _ لندن) بدت و انا لي شقاوتي اليوم داك مرقت يوم الإفتتاح؛ انا يطرشني و يعمي جيراني ما كنت عارفة، و سبحان الله من الصباح قمت و حاسة إني ما دايرة أمرق، لكني إتطريت لانو كان اليوم الأخير من كورس (لغة الإشارة الإنجليزية) للصم في ال ( كوو_ليييج ) زي ما بيقولن النسوان هنا، أول أيام جيت، كل ما أتعرف لي على واحدة و تكون دايره تقشر فيني بتقوم تقول لي: أأهااااا ما بديتي ليك قراية؟!! لانو لو دخلتي في موضوع الاولاد تاني بتبقى ليك صعبة . بقوم كنوع من إدارة الحوار بسال: أهااا إنتي بتقري ؟! تقوم تقشر فيني: أأأييي بمشي ال (كوو_ليييج) ، قصدها ال (college) !!!! بكون في اللحظة ديك دايرة أطرش من الضحك: أهااااا بتقري شنو في ال (كووو_ليييج)؟! تقوم تستغرب و ترفع لي حاجبها: هيييي ما ال (لأن_قِيويج) !!!!! قصدها ال (language) في اللقطة دي ما بقدر أكتم الضحكة، يما مشتهيه يوم واحدة من البوباريات ديل تقول لي قاعده تقرا تمريض ولا علم الفلك، بلاهي الواحدة تتشدق ليك بي ال (كووو_ليييييج) لمن تتخيل إنها بتعمل في الدكتوراه !! الحكاية دي حرقتني و قمت إتحنفشت و سجلت لكورس لغة الإشارة الإنجليزية، أول يوم مشيت كنت خااااايفة و في جواي حاسه إنها خطوة بليدة، حسع كان مشيت قريت ال (لأن_قِيويج ) زي باقي النسوان ما كان أحسن لي؟!! جات الأستاذة داخلة، كان ألقاها ليك هي زااااتا في روحا صماء!!!! قربت أقوم أطلع، بقيت المحاضرة كلها قاعده على عصباتي، بعد شويتين قالت لينا أخدو راحة نص ساعة، قامت البت الجنبي سالتني سؤال، نططت ليها عيوني لاني ما فهمتها، قامت قعدت تضحك!! عرقت جنس عرق، قامت قالت لي: أنا أسفة يا عزيزتي لقد تحدثت معك بلغتي الام، (البرتغالية) ، انا دائما أكرر هذه الحركة الغَبِية!!! لاحولااااا، يا حاجة بالجد تنفست الصعداء، الهبلة طلعت من البرازيل !! قمت إفتعلت لي إبتسامة شِفته كدا: لا عليك عزيزتي، انا أيضاً أفعلها أحيانا، و لكن بالعربية ، ها ها ها . قامت دايرة تقشر فيني: هل تعلمين أنا خائفة من أن أصاب بالتشويش لاني درست لغة الإشارة البرتغالية، و عندما تذكر الأستاذة الكلمة أكون قد فكرت في الإشارة بلغتي أولاً . قمت طوااالي قشرت ليها: أوووو هذه نفس مشكلتي، لاني درست لغة الإشارة العربية الموحدة ببلدي !!! بعد كم محاضرة الاستاذة قعدتنا في مجموعات، قامت واحدة من الطالبات إنجليزية سمينة كدا و مبتسمة الوكت كلو، سالتني: عندما تُأشرين الكلمات هل تترجمينها إلى لُغتكِ أولاً ؟! وااااي انا من لُغتكِ، الناس ديل ما شافو ليهم أفارقه غيري ؟!! أها كانو بيتعاملو معاي بي حساسية كدا يعني لمن تجي إشارات زي خمر، نَبيِذ ، كنيسة ، كانو بيتحسسو، وانا بحاول أكون عادية و لسوء حظي لمن يجي دوري في الإشارة ما بتجيني إلا الإشارات المُحرجة دي !! مرة في دوري كان السؤال، أين تذهب للصلاة، والمفروض أنا أأشر الإجابة القدامي في الشاشة و هي الكنيسة، قمت طوااالي أشرتها، الأستاذة قربت تنطق من الحرجة و قامت طوالي كتبت في السبورة مسجد و ورتنا إشارة كلمة مسجد، و مرة تانية جاتني إشارة خمر، أشرتها و معاها حركة طَشمه كدا، قامو ضحكو وتحس بيهم برضو ملاوزين . أها أخر يوم كنت صايمة و مَدروخة زي التقول عاضاني جدادة، اليوم داك يا قول العربي أريتو التمساح كان طقاني وكسر رقبتي، اليوم كلو يسالو فيني، كل ما يجو ماشين فسحة الشاي ولا الفطور، مااالك يا آمنة إنعلك طيبة ؟! لالا يا شباب بس انا صايمة ، أوووو سوري آمنة !!! أها ما مسموح ليكم تشربو شاي ؟! لالا ولأأأ شي ، و يقعدو يندهش فيني !! في النهاية قمت مشيت معاهم الكافتيريا عشان ما يتحسسو، ريحة القهوة عملت لي نفسيات ، قامت واحدة فيهن إنجليزية بيضاء شغالة مدربة شخصية في صالة رياضية سالتني : عفواً يا آمنة، انا أريد أن أسالك عدة أسئلة عن معنى الصيام و لماذا يصوم المسلمين . قمت نططت ليها عيوني بي تحفز كدا ، حركات غير الناطقين بها مع نطيطة العيون : أ أ أ ، أنا لا أدري كيف أوصف لك معنى الصيام الفعلي لنا كمسلمين . قامت إتحسست: أنا أسفة و لم أقصد أن أحشر أنفي ، لكن لدي زبونة مسلمة و أريد أن أفهم ما تمر به لكي أكون أكثر تعاطفاً و تقديراً لشعورها !! الدور دا إنحرجت انا: الحقيقة انا هي التي أسفة يا سيدتي، لان حاجز اللغة سيجعلني عاجزة عن توضيح و شرح الامر، انا جداً أسفة !!! في اللقطة دي قامت البرازيلية إتدخلت؛ كانت بتسمع في كلامنا و بتفتش في النت، قامت فتحت ليها صفحة فيها تعريف للصيام، قمت إتذكرت إنها لمن عرفتني صايمة قالت إنها قبل كم سنة صامت لانها كانت متزوجة مسلم و كان بيعرف فيها بالدين، قامت صامت شهر كامل و نقصت 15 كيلو من وزنها !! قعدت أتمتم: إنها تستطيع أن تخبرك فقد صامت من قبل !! البرازيلية: إن للصيام عِدة جوانب نفسية و أخلاقية منها أن الصائم يجب أن لا يعامل الأخرين بصورة سيئة... هنا انا شبيت ليها في حلقها: نعم نعم ، و الصيام لا يعني التوقف فقط عن الاكل و الشرب ، إنه يعني التوقف عن الكذب و السرقة و كل ما يغضب الله !!! قمت حسيت بي تَفاهة مداخلتي و دنقرت و صريت وشي، قامت الخواجية إتحسست تاني و إعتذرت لي تاني، قمت أنا زاتي إعتذرت تاني و في نفسي عرفت إني زعلانة من نفسي في الاول؛ لاني متاكده إنو المشكلة ما حاجز اللغة بس العَجّزني، الجهل برضو، و الخوف من المسئولية قدام ربنا . في نهاية اليوم طلعت بعد ما الاستاذة وزعت لينا الشهادات و إتوادعنا، مرقت و مشيت محطة البص و بقيت واقفه مع الناس، والشمش واقفه معانا، فوق راسي مباشرةً ، نص ساعة ، البص ماجا ، ساعة ، ما جا !!! بعد شوية واحد قال لينا: هوووي يا طير البص دا قاعد ينبرم بي هنااااك لانو الليلة الإفتتاح و السواقيين بقو بيخرمو بي جوة يا وهم . قامو الناس بقو ماشين لي قدام و انا كالعادة ، الطيرة المبارية السيرة ، نمشي و نفتر ، نمشي و نفتر ، لحد ما وصلنا المحطة البيخرمو منها السواقيين ، أها واقفين كدا ، كان عيني للباصات بتخرم قدام شووووية من المحطة !! جنبي واحد إنجليزي قام سب ، كان القى ليك روحي بسب بالإنجليزي !!! شُششُششُغل المافي شنو ؟! وقام جرى بالحته البيخرم بيها البص، انا قعدت أفكر، قلت هووووي جِنّاً تعرفو أخيّر لي أباري المحطات لحد ما ربنا يسهل، بقيت مااااشة و بص واحد داير يجي مافي ، شقيت شارع (أوكسفورد إستريت) كلوووو ، و الناس دي مبسووووطة و فرحانيين بالشمش و ماشيين عريانين و يتصورو، و انا خلاس أخلاقي وصلت تحت الصفر، أشوف ليك قدامي شباب كدا، شكلهم سُياح ماشيين و ياكلو في الإسكريم و شغالين ليك: أأي لااااف يو ، نووو أأي لاااف يوووو !!! بعد شويتين أشوف ليك واحدة إنجليزية بيضاء مصنقعه ليها بي قزازة موية بااااردة، القزازة البتكون حجم عائلي ديك !!! طواااالي عرفت روحي دخلت مرحلة الهلوسة ، خواجية و تصنقع و تَبّوز بالقزازة كدا ؟! لالا ما ممكن . واصلت في حكاية الهلوسة و الزحف دي لمدة 3 ساعات، لحد ما وصلت (إجور رود) ، ماشه كدا لاقتني واحدة خواجية ما بيضاء شديد، عملت لي في وشي كدا و قالت: أأوذ بالله من الشيتان الرجيم !! قمت إتخطيتا و لمن جمعت رجعت ليها، إتكلمت معاها بالعربي : قلتي شنو ؟! الخواجية: كولت ليك أأوذ بالله من الشيتان الرجيم، مووش إنتو في سودان لمن تشوف شيتان بتكول أأوذ بالله من ... قاطعتها بي إبتسامه هبلة كدا : يا زولة الله يسامحك !! الخواجية بت ال..... عرفتني كيف سودانية أساساً؟! دا كلو من توب الصوماليات الكريه اللابساو دا، غير الهوا و النبذ ما جاب لي شي!! و مشيت خطوتين ، وقفت قام الشيتان يا قول الخواجية قال لي: آمنة إنتي بقيتي هبلة ولا شنو ؟! شنو الله يسامحك دي ؟! دي خياسة جديدة ولا شنو ؟! رديت: لاحولااا، شوشو شخصياً، إتو موش ربطوكم؟! ثم إنو لغتك في الحوار بقت تعبانة كدا ليه؟! شوشو: أرجعي حدديها مع الخواجية بت الهكس باشا دي . قمت رجعت الخطوتين و سالتها: إنتي ليه قلتي لي كدا ؟! قامت كررت نفس الكلام الاول: كولت ليك أأوذ بالله من الشيتان الرجيم ، مووش إنتو في سودان لمن تشوف شيتان بتكول أأوذ بالله من ... قاطعتها: يا زولة الله يسامحك الخواجية: الله يسامهك إتي دي، أويره دي !! يما الخواجية قالت لي أويره دي !! انا إنتهيت عالمياً يما طوالي شوشو لقى فرقة و إنقشط كما الورقة: أويره دي ؟! دا كلام شنو يا آمنة ؟ معقولة البيحصل دا؟ حسع دا لو كان حصل في أبو جنزير كان بيحصل شنو ؟! رديت: منو دي ، يمين بالله دا لو حصل في أبو جنزير كان الكلام الفارغ يكون مدور حتى لحظة كتابة هذه السطور !! شوشو: أيووووة دا الكلااام ، يلا زي البت الفالحة أرجعي خطوتين لي ورا . رديت : الله ينعلك يا الشيطان أساساً دا المرجعنا لي ورا، والله ما أرجع ولا خطوة . و واصلت طريقي و في إبتسامتي و فوق راسي قوس قزح الجميلات المذكور سابقاً بالتحديد الاء هاشم ، الإنسانة دي أكاد أجذِم إنها حتدخل الجنة بي حديث : ((تبسمك في وجه اخيك صدقة)) أول مرة شفتها كنت قاعده في شارع (المين رود) جات ماشه و مبتسمة ، الصراحة إبتسامتها ما كانت أول شي لفتني، طرحتها ، طرحتها راقية رقي عجيب و متناسقة مع باقي اللبسه ، أتذكر كانت طرحة مشجرة و أرضيتها لونها زي الشاي باللبن و فيها وردة باللون البصلي و شايله دفاتر كبيرة كدا ، بعدها بي كم يوم شفتها ماشيه في المظاهرة الطلعت عشان مقتل (محمد عبدالسلام) اليوم القبل اليوم الطلعت فيو انا و جريت جريتي الشهيرة لمن الجماعة فكو الرصاص، المظاهرة جات ماشه في شارع الجامعة و الاء كانت في المقدمة ، ماشه و تهتف: مقتل طالب مقتل أمة ، مقتتتتل طالب مقتتتتل أمة ، و لابسة نفس ذات الطرحة الراقية ، في اللحظة دي انا شفتها طويلة القامة ، عريضة المنكبين ، شلولخة عديييل كدا ، و قررت أصاحبا .
بعد كم يوم شفتها قاعده تحت شجرة اللبخة الوحيدة في كليتنا، قمت قعدت أتحكحك لحد ما وصلت قريب منها، قمت جبنت أتكلم معاها، شويتين كدا قامت عينا وقعت في عيني ، و إبتسمت لي، و طوااالي جات سلمت علي، قالت لي: إنتي زوزانا ، صاااح ؟! الشهرة متاعب يما قمت ما إتعافّنت عليها زي ما عملت مع رنا: أيي زوزانا لكين ما أظن قابلتك قبل كدا، و طرحتك سمممممحة ياخ، ما طرحة مُظاهرات . قعدت تضحك: انا شفتك لمن جيتي مدرسة (فاطمة عبد الرحيم) عشان تزوري صحباتك بتاعين (سيستر إسكول) و قعدو يكركو ليك أبو الزووووز و كنتي لابسة فستانك القصير و عامله ضنبين حصان و قعدتي تقولي ليهم شكرن شكرن يا معجبيين صور ما معانا!!! بالجد كلنا إتكيفنا منك ؟! قام شوشو إنقشط: عامليها كمعجبة يا عويرة . رديت ليو: هيييي البت دي طرحتا سمحة ، دا اولاً و عيونا عسليات يا عوير إتا دا ، قد
من اليوم داك و لحد الأن ، كل ما تحضر الاء يتضائل الشيطان داخلي الاء ما بتعرف تعامل أي مخلوق كعب، ما بتعرف تقطع في الناس و بعد دا ونااااسة !! الاء ما بتعرف تحرج أي مخلوق، أيام الإمتحانات بنات الشلة كانو معينني حارس شخصي لي سيادة ال الاء ، لانها ممكن تكون في الطريق للسنتر عشان تقابل الباقيين عشان نراجع، يقوم يلاقيها 100 زول يسلمو عليها وماتعرف تستائذن منهم!! بقوم انا أحرجا ليك بي إني بستأذن و بمسكا من يدها و كرررررر لحد محل المراجعة . الاء كانت أكثرنا فهم لمواد (الرياضيات البحته) و أكثرنا قدرة على شرحها، ممكن تتطوع تشرح للدفعة كلها مواد البحته و تجيب أكبر درجة و تقد باقي المواد !!! الاء جميلة جوة و برا، من بيت علم و دين برضو، شديدة الإعجاب بوالدها و كنا نشاركها في هذا الإعجاب سراً، تجينا من الصباح: ماشفتو (أبو الهاء) الليلة عمل شنو !! لالا ياااخ بالغ لكين ، حركاتو الحامضة دي ما بيخليها ؟! الاء كانت شديدة الإنتباه للتفاصيل في أي عمل تقوم به؛ عشان كدا تلقاها متورطه في الأشغال المعاطة و بايخة في الأسابيع الثقافية و تخريج الكلية، يمسكوها ليك زينة معرض الرياضيات البحته !!!!! ، الإشراف على مشاريع التخرج في معرض الإحصاء !!!!!! أيام الأسابيع الثقافية تقعد تشرف و تنسق و تزين لحد الساعة 8 ، تصل بيتم الساعة 9 ونص !! (أبو الهاء) يهرشا ليك ، تقوم تقول ليو بكرة بدررررري انا معاك ، بكرة تجيو ليك كوووووشك كوووشك جاره باقي البوسترات و أقلام التلوين الساعة 10 !!! الاء محبوبة الجماهير من العميد لحد (عم جون) حارس الكلية ، الاء ورثت عن والدتها عينيها العسليتان و وجهها الباسم الطيب ، ومن والدها ذكائه و كرم عرب الجزيرة و عادات حيشان قريتهم (السوريبة) ، ألاء كريمة بصورة مُزعجة ، في واحد من أيام الأسابيع الثقافية جونا كمية من الضيوف، قمنا لمينا قروشنا كلها و عزمناهم كلهم ، وكل واحد مننا خلى قروش للمواصلات، نهاية اليوم تجيني الاء تتقاصر و تتطاول، و مبتسمة : آمنة بالمناسبة انا ما عندي قروش مواصلات !!!! قلتا ليها ما تخافي بدفع ليك من هنا و لحد السوق العربي ، و بديك لي مواصلاتكم ، إتلبدنا لحد ما إنقشطنا لينا في حافلة مافيها زول من كليتنا ، وصلتها مواصلاتم و أديتا القروش : شاحده الله يا الاء تركبي كدا و تدفعي ، تتلفتي تلقي الحافلة كلها ناس حلتكم ، و الله إلا تطلعي سلسلك تديو للكمساري : الشباب ديل معاي يا معلم !!! و كانت بتريحني في حاجتين ، لمن نكون ماشين جوة الجامعة و نجي ماريين بي الجماعة الحِبِبين البيكون مُتلصقين و قاعدين في الأرشات و شغاليين : أأي لاف يو ، نوووو أأي لاف يوووو بتكون الاء ماشه قدامنا و كوووشك كوووووشك مُنضفه الأرض بي إسكيرتيها تقوم تحوص ليهم عيونا و تقول ليهم : المحل دا بيشيل نفر وااااااحد !!!! تاااااخ و تمشي و نتحرج نحنا الحاجة التانية ، الاء صوتها جميل ، كنا بنشكل ثنائي رهيب ، لمن كنت أزهج من المراجعة كنت بغمز ليها : يا أخوانا بقترح إنو الاء تغني لينا غنية غنيتين . بيقومو يكوركو : لاااااا ما دااااايرييييين ، قديتونا بي فرمالاتكم دي ، ما د ا ي ر ي ن الاء : يلا يا ابو الزوز لو سمحتي خشي لينا بي رمية (من معزتك إتي لي) لالا يا الاء ياخ خوشي إتي ونقوم نغني من معزتك إتي لي ، لحد (و قولتي لي معااااك سلااااااامة) ، تن ، (ضحكك شررررررح قلب السمااااء ) !!! رنا : ياااااخوانا ، القلب الشريط منو ؟! بعدين كنا لو بنغني و جا زول سلم ، مثلا : نوووور بيييتنا ، تري لم شاااارع بيتنا تري لم ، أهلاااا عبير كيفك ، أقعدي أقعدي ، يووووم جييييتنا ، يا الهليت فرحت قلوبنا !!! و هاكذا ، و لو ما تمينا الغنية بيجينا صداع ، و ما بنختار غير الأغاني البتجيب سرطان في الحنجرة ، ناس ( وصتني وصيتا ) ( يا رزينة ) ( يا بلاد النور ) مرة الواطة حاااارة و الإمتحانات مسخنة ، قعدنا ندندن الاء : خساااارة يا قلبي الحنيييين إنقشطت ليك بي فرحة : هجرونا أحبااااب السنين الاء : من غير سبب إنقشطت بي رشاقة : أي والله من غير سبب الاء : ظلمو الغراااام ، الكان حلو و الكان أمين و إتمطيت بي راحة : يقولو عننا ظاااالمين يا حليلنا الاء : و الله يا حلييييلنا ، حليلنا نحن المخلصين ... إيييييييه منال: إييييييه؟!! دا شنو دا دكان ود البصير دا، و الله (حنان النيل ) تسمعكن إلا ترفع فيكن قضية !!
دايرة أختصر ما قادره يا أم ، بي إختصار كدا انا أكاد أجذّم أني قد أخذت نصف ديني من هذه الاء .
يتبع فربما القادم أجمل >>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة الإتناشر : عندما تجعل من نفسك أضحوكة.. أمام نفسك(البول تحت الحيط).
العنوان : بين بيتنا العامر و الخلا
التاريخ : أمس القريبة دي
بعد السلام عليكم ، بلاهي كيف أنتم في المدة التي لم تروني فيها ؟!! إذا دار مِحور سؤالكم عني، ف أنا أحْمِد سيدي و ما زلتُ في هذه البلدُ الباردِ أهلها.
يما انا جادة، ما تقري الرسالة دي بالذات، لو سمحتي.
أمس إتذكرت عبارة (الأب) الشهيرة: إنتو ما تستااااااهلو، المفروض تعيشو في الخلا!!! وضحكات أخواني الشريرة و غضبات أبي على أثر عملاتنا الشريرة، التي عادة ما تنتهي بعبارته أعلاه. أمس حسيت بي إمتنان عظيم لهذا الخلا، و تقدير للتجارب المريت بيها في الريف. من صباح الرحمن جوني ناس التصليحات، بعد ما خلفو مواعيدم لمدة إسبوع، يما الخواجات ديل طلعو ما عندهم مواعيد برضو، سااااي شايلين حس السودانيين . المهم الجماعة جو يشتغلو في الحمام وانا حارساهم، واحد إنجليزي ابيض والتاني بولندي، واحد فيهم بيقلع المقعد بتاع الحمام و التاني بيصلح الارضية الخشب، اول حاجة زهجتني الراجل بتاع الأرضية بيتكلم معاي بالانجليزي و بالاشارة كاني ما حافهمو!!! دا كلو عشان ما عاملتو ك سيد اللبن و جا لقاني لااااابسة توبي، بعد شرح لي الحاصل مشيت قعدت في التلفزيون، سمعتو بعد شوية ضرب الجرس لي (ماكس) جارنا الفوقنا، ماكس إنجليزي أبيض و عايشه معاو جكستو ، ماكس متعود ينوم النهار كلووو و يقوم يسكر بالليل و يغني في الجيتار!!! الجماعة ضربو ليو الباب و شرحو ليو المشكلة و إنهم حيقطعو الموية من المبنى، انا بقيت قاعده قدام التلفزيون لمن نعست و نمت، بعد شوية صحيت بي إحساس ما مفهوم ، بعد صحصحت إكتشفت إني محتاجة أستعمل الحمام!!!! عصرت علي روحي كدااااا، ما نفع ، قلت أعمل شنوووو ، أمشي لي جارتي السودانية؟! ما حينفع لانو بيتا داير دقيقة مشي و سلم طويل، قمت إتوكلت و شلت لي موية في كباية من براد الشاي لانو الموية قطعوها!!! و شلت معاي مناديل، ربك رب الخير؛ بيتنا أرضي و عندو حديقة عندها باب داخلي و واحد فاتح في الشارع، فتحت الباب الداخلي، البولندي قعد يعاين لي، قمت نططت ليو عيوني و ترااااخ قفلت الباب بي وراي، حاولت أقفل الباب من برا بالمفتاح للضمان عشان لو الشمار كتلو و قرر يباريني، من شدة الزنقه ما قفلتو، بقيت واقفه و أعاين للحديقة، أمشي وين .. أمشي وين، لحسن الحظ الشجر قااااايم و ما هذبناو لينا فترة طويلة، لكن لو قعدت بين الشجر ماكس و بتو ممكن يشوفوني من شباك مطبخم، و جيرانا الباكستان حديقتم كاشفه حديقتنا!!! واقفه و أتلولو كدا، إتلفت لقيت الزقاق البيمرق للشارع و تحت شباك الحمام، بس طواااالي مشيت تحت الشباك و .... الحمدلله الذي عافانا. بعد جيت داخله بالباب، الإنجليزي سالني: هل أنتي بخير ؟! إتخيل لي شررررررر دي بتكون طقشت أضانو. رديت ليو : أححح يسسس!!! أنا إتِدردرتّ يما. حسع لو كنت في البلد كان مشيت أقرب باب، دقيتو
تتذكري لمن كنا راجعين من سنجة بالبص السياحي؟! وانا كنت مزنوقه نفس الزنقه السودا دي ، ربك رب الخير .النار ولعت في البص و قالو الناس تنزل منو، يما إنتي لفحتي نضارتك و جريدتك و جريتي!!! انا قعدت لي زي نص دقيقة على أمل تنقذني الطبيبة و كدا، ولاااا هببتي لي، يما جريتي خليتني، والله صحي الروح دي حلوتن!! إتخطيت صدمتي في حكاية التضحية و فلم (من أجل أبنائي) و الوهمات ديك سريع لانو الزنقة كانت شديدة، لمن نزلت و شفتيني إتهجمتي و قربتي تشرقي، لمن سالتك ليه ما جريتيني ، و أنقذتي جريدتك؟! قلتي لي : يا آمنة يا بتي، إنتي عندك رجليني، لكين جريدتي ما عندها!!! المهم في هذه القصة إنو لمن الباص وقف و بقو يحاولو يصلحو انا مشيت مساااافة بعيد من الانظار و إتدسيت بي ورا الشجر و.... و الحمدلله الذي عافانا. يعني متعوده دايماً علي الخلا دا. إتخيل لي إتدربت برضو في الدويم، في بيت عمتي لمن كنا صغار انا و بنات عمتي، كان عندنا زقاق إسمو زقاق البول، الحمدلله بنات عمتي ما بيقرو النت . المهم الزقاق دا ضييييق و فيو حيطة مشتركة مع جيرانا، بنربط في الزقاق دا خروف العيد، يعني ممكن تلقى فيو كل أنواع المخلفات البشرية و الحيوانية، كنا بنعمل فيو مسابقة أطول بولة، مرة عملنا مسابقة ، انا عملت فيها حنكوشة و أصريت أبول في حته ما فيها بول ، المحل الوحيد الكان جديد ، تحت الشباك حق أوضة البنات ، بعدها إتشاكلنا في النتيجة، مشينا الحوش و الشكلة كبرت: انا بولتي أطووووول ، لاااااا انا بولتي قطعت مسافة أكبررررر!!! عمي قاعد في الشارع مع الرجال قام سمع الشكلة، جانا طاير بالعكاز، انا دي طبقت سفنجتي تحت أباطي و إسكيرتي في خشمي و جرررري علي أوضة البنات و تلبت بالشباك، مباشرة لي البول، وفهمت متاخر ليه ما كانو بيبولو في الفجة ديك.
يما الحمدلله البقيت بت الريف و ما ولدتوني في بحري ولا أزقة أم درمان العريقة.
عموماً البول في الخلا و تحت الحيط دا كان الله قاسمو ليك ، كان في أوروبا بيبقى عليك !!!
يتبع >>>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: munswor almophtah)
|
يا حجة مشتاقين طبعا حضرنا لاجل التحية والمجاملة، بعدين بالمرة قلت أكلمك تتداركي الموقف أنا شلت الرابط بتاع رسايلك بضبانتو ختيتو في الفيس بووك قلنا نسهل على الوالدة عملية العثور عليه، وبعد عملتي دي جاني احساس انو حكاية الفتنة نائمة دي لذيذه جدا، مش نحن صحبان يا فردة؟؟
ومنتظرين طبعا
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: ابراهيم حموده)
|
Quote: يا حجة مشتاقين طبعا حضرنا لاجل التحية والمجاملة، بعدين بالمرة قلت أكلمك تتداركي الموقف أنا شلت الرابط بتاع رسايلك بضبانتو ختيتو في الفيس بووك قلنا نسهل على الوالدة عملية العثور عليه، وبعد عملتي دي جاني احساس انو حكاية الفتنة نائمة دي لذيذه جدا، مش نحن صحبان يا فردة؟؟
ومنتظرين طبعا
|
لا خير يا إبراهيم
واخد لي بالك من خير دي؟!
أصبر بختها ليك في أحد زقاقات الفيس بوك
كجنتو و سبرتو الفيس بوك دا
الله يعلم كجنتو!!
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
الرسالة التلتاشر: اللحظة التي أفلس فيها الاب (العنصرية بي فهم).
العنوان : هنا و هناك
التاريخ : زمن ماشي و زمن جايي و زمن لسع
بعد السلام عليكم ، بلاهي كيف أنتم في المدة التي لم تروني فيها ؟!! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يا الحاجة الكلمك عن الرسايل دي، ماعافية ليو دنيا لا أخره حتى لو كان عمو قوقل رضي الله عنه زي ما إدعيتي في أخر مرة إتكلمنا: كنت بفتش في بحوث الأنيميا المنجلية في قوقل قام جاني رابط الموضوع ضمن النتايج!! لا خلاس، صدقتك كالعادة مارستي هوايتك في الإستجواب و الإستدراج و انا الهبلة خليتك تستعبطيني و بعد تميتي كلامك طلبتي ما أجيب سيرتك في قصصي المهببة دي، إتفاجئت بيك تقولي: هيييي انا لا أمك ولا بعرفك!! نكرتيني يا حاجة؟! بعد العمر دا، للاسف فات الأوان، غايتو للضمان كدا تاني ما بجيب سيرتك لكن حاأحول الرسايل ل (رسائل إلى أبي أرجو أن لا تقراها أمي)
المهم اليوما داك إتذكرت لم تدور نقاشات بخصوص نسب جدودنا للرسول صلى الله عليه وسلم!! و إصرار كل واحد فيكم على إنو الأقرب نسباً للرسول، كعادة قبايل كتير في السودان، وحكمة الله بتلقى أسر كتيره عندهم ورقة تشبه ورق البردي فيها شجرة العائلة و النسب بي قدرة قادر بيصل للرسول! حسب إدعائك نسبكم بيصل للعباس رضي الله عنه، الاب بيدعي إنو نسبو بيصل لسيدنا علي إبن أبي طالب شخصياً! في مرة إحتدم النقاش إلى أن أفلس الاب و وصل الحد: ياخ إحنا جدنا أبو لهب زاتو، عجبكم عجبكم ما عجبكم ..... مرة في زواج واحد من أولاد عمنا و الناس مشو يتقدمو، إتقدم زوج عمتي الكبيرة و كبير الأسرة في الوكت داك، جدي خوجلي رحمة الله عليه بدا كلامو بي الفرمالة بتاعة كل مرة: نحن أشراف و جدنا النبي!! قام واحد من أولاد عمنا الشباب إتشالق: يا جدي الأفضل نتفاخر بالعمل الطيب ما النسب. جدي خوجلي: هيييي يا ولد نحنا بي عملنا واصلين و بي نسبنا واصلين!!
أنا غايتو رايي كان واضح في المسالة دي، ربنا سبحانه و تعالى كان عندو حكمة في موت أبناء الرسول الذكور و أحفادو، عشان جنس الحكحكة حقة السودانيين دي!!
أتذكر لمن كنت ممتحنه الثانوي كان عندي صحبتي في درس العصر، البت دي سبحان الخالق المعبود؛ طووويلة و لونا (شي كولا تي) و عيونا كبيرررررة لونا عسلي حنين كدا و.. وتفاصيل مافي داعي ليها؛ بس الحاجة البتحير في ملامح البت دي إنو ملامحا النوع خاتف لونين؛ يعني مابتقدر تحدد إنها عربية ولا أفريقية؛ أيووا إتذكرت حاجة؛ كانت أنيقة بشكل عجيب؛ عندها لبسه كدا قماشا خيش عجيبة، وكان خطها جميل؛ بتكتب الكلمات مايله في السطر، المهم؛ يوم كدا في أثناء ونسة سالتها سؤال ندمانة عليو لي حسع؛ قلت ليها: إتي يا سلمى قبيلتكم شنو ؟ مع إني الزمن داك مابفرز ليك كلام قبلية و عنصرية و الكلام دا، قالت إنو أمها جعلية و أبوها من بلد في شرق أفريقيا، قمت أنا بي غباء كدا قلت ليها: ياخي معناتو أبوك دا زول كويس خلاس!! لانو السودانين مابيدو بناتم بالساهل !! لاحولاأاا ماتتخيلو إحراجي بعد داك؛ و التعبني زياده إنها ردت علي بي إبتسامة وسيمة و قالت لي : أيوه أيوة أبوي كان كويس.
من اليوما داك كجنت سؤال قبيلتك شنو دا، لمن كنت شغاله في المركز السوداني الألماني لتاكيد الجودة كان معانا في نفس المبني شركة صاحبها أخو مديرتي، كنت بنزل أستخدم مكنة التصوير بلقى الموظفين شغالين ليك: انا جعلي و انت شايقي و دناقلة دناقلة يا رسول الله!! وكلهههههم بيقولو جدهم النبي، مرة نزلت أصور ورق و كنت مستعجله و زهجانة، لقيتم كالعادة شغالين في قصة القبايل دي ويضححححكو و صف مكنة التصوير قطر بس، واحد فيهم إسمو إبراهيم سالني: إتي يا أستاذة آمنة قبيلتك شنو؟! رديت ليو و وشي جاااادي: لا إحنا حلبة ساي ومركبين مكنة أشراف، ما تركزو معاي شديد.
إبراهيم دا من اللطف الناس المرو علي في الشغل، متصوف تبع الطريقة البرهانية، محب للشعر و الغناء، لمن أكون طالعة من محاضرة بنزل من المركز بلقى مكتبهم طوال بابو فاتح و صوت الشعر او الغنى شغال، بقوم أقيف بدون ما أسلم و أسمع و طوالي أقول ليهم إسم الشاعر أو الفنان و أسم القصيدة و الملحن و غنوها متين!! طبعاً مرات بكون تاماها كوز موية، مرة جيت لقيتو مشغل مديح وقفت كدا و ركزت شديد، قال لي: هاااا كان بيتي هنا ما حتعرفي. قلت ليو: (السر عوض) البرهاني، ساكن فرنسا، حسع نازل إجازة في بيتنا. نطط عيونو و قرب يدي اللاب توب شلوت: يا آمنة كرهتينا الغنى و المديح زاتو!!! انا كانت ضربة حظ لانو (السر عوض) متزوج (التاية) بت خالتي ربنا يطراهم كلهم بالخير.
هنا في بلد (الكباب )حلال دي، لاقيت صنوف من أنواع العنصرية، للاسف إكتشفت إني انا زااااتي عندي العنصرية اللاإرادية تجاه الأخرين، أولاً النظره الفوقية للحبش إنهم نص نسوانهم ما كويسات و عادي عندهم التهتك و الإنحلال، بعد جيت هنا حتى عرفت إنو في أثيوبيين و إرتريين، و هم عموماً ناس لطيفين و خدومين و في حالهم بس ظروف بلدهم و الحروب هي الجبرتهم يطلعو و يلجئو للسودان و باقي الدول و يشتغلو في البيوت مع إنو الشغل ماعيب، طبعاً حكاية إنو الشغل ما عيب دي جاياكم ليها. تانياً الصومالين، يلا ديل ما كان عندي عنهم فكرة غير إنهم جيعانين و الحرب طلعت زيتم، عندنا صديقة هنا من ناس كردفان لذيذة خلاص مرة النسوان بيحكن عن معاناتم مع البلد و اللغة في اول أيام ليهم قالت اول شهر ليها لمن جات بيرطانيا كانت ما بتعرف ولا كلمة بالإنجليزي و بردانة و خايفة قامت مرة إتشجعت و طلعت الشارع براها و كانت لابسه عباية زي حقة الصوماليات قامت قاطعه الشارع كدا طقشت ليها واحد أسود بيكون جمايكي قام قال ليها : تباً لك* أيتها الصومالية اللعينة!! * تباً لك و اللعينة دي زي ترجمة تلفزيون السودان للكلمات الماياها.. قالت ليو : تصم العقرب في فرق جع***!! ** و عملت ليو بي يدها كدا(جمعت كل الأصابع في قبضة و لوحت بها) هي ما حرقا إنو قال ليها أيتها اللعينة لكن حرقا إنو شبها بي الصوماليات!!.
** جع*** كلمة عادية في نظري لانها جزء أساسي من جسم البني أدم لكن للضمان أحسن أكتبها كدا عشان معانا عوايل في الرسايل دي.
أها حسب ملاحظتي في الفترة الفاتت دي إنو العنصرية هنا بتجيك من الأجناس التانية ما من البريطانيين زاتم!! يعني البريطانيين البيض نادر ما يتعاملو مع الزول بي عنصرية، ما عشان هم ما عنصريين لكن لانو فهمم للعنصرية أبعد من لوني و لونك وشعري سبيبي و أصفر و شعرك قرقدي؛ العنصرية حقتم على السلوك البيمارسو المجموعات، يعني ضد إرهاب المسلمين و ميل السود للعنف و الخ...
غايتو و الخ... دي سمحة خلاس لمن الزول ما يلقى كلام يتم بيو جملة. المهم مرة كنت زهجااااانة قاعده في البيت قبل ما أشتغل في محل التياب بتاع الهندي، و الشغل ما عيب، نضفت البيت و طلعت الشارع أكب الزبالة في برميل ال######، كنت لابسه جلابية بيت و مالابسه طرحة، جات ماشه جنب سور البيت صومالية طوالي بادرت بالسلام: سلامو عليكم سيستر، رديت عليها باأحسن منها، شويتين كدا جات واحدة إنجليزية سوداء ماشه سرررريع و جارا ولدها من يدو و بتتكلم في الموبايل بي صوت عاااالي و بتنبز نبز عفن من النوع بتاع تباً لك أيها اللعين إبن اللعينة!! قمت انا بعد إتاكدت إنها ما شايفاني قعدت أهز في راسي و إبتسمت إبتسامة حامضة كدا، في اللقطة دي جات إنجليزية بيضاء عجوز كدا، قامت نهرتني: ما تضحكي، شوفيها بتتكلم بي صوت عالي كيف؟!! تاني إبتسمت و هزيت راسي: لالا بالغت و الله و الألفاظ العجيبة دي قدام طفلها!!! إبتسمت: لو شفتي عندي جارتي سو.. كانت دايرة تقول سوداء و لمن كشفت لي لقتني أقرب للسواد قلت ليها: قولي سوداء ما مشكلة و قعدت أضحك أخدت نفس و دورت قطيعة: كان شفتي جارتي السوداء برضو حركاتا كدا لمن تقوم للمشاكل مع حبيبها إلا يفرتقوهم بالبوليس!!! طبعاً الإنجليز البيض و بالذات الكبار في السن القابلوني هنا ديل جنهم ونسة و قطيعة!!!
الحاجة العرفتها في بريطانيا دي لو الواحدة سمراء او يبدو عليها إنو شعرها مجعد او خشن و قامت مشت صالون سيدات خاص بالبيض، طواااالي بيختوها ليها، بيكلموها بالواضح إنو دااااااك صالون الزنوج ، أمشي ليو ، يلا البيسمع الكلام دا بيتخيل إنها عنصرية، لكين لا ، الحقيقة إنو صالون البيض بيكون مجهز للتعامل مع الشعر الناعم فقط، من حيث أدوات و كريمات ، و كذلك صالون السود او الزنوج بيكون مابيستقبل أنواع الشعر البتميل للنعومة الشديدة.
انا من أول أيام سمعت كم قصة عن واحدات مشن صالون بيض او هنود و أحرجوهن، بعد جيت بي شهر لقيت جنبي صالون مكتوب فيو للمحجبات و السيدات فقط، هنا لو مشيت صالون زنوج ممكن الصالون يكون مشترك ، قمت دخلت و انا خايفة يحرجوني، لقيت الصالون بتاع عراقية و شغالة معاها أفقانستانية، الحمدلله عملو لي شعري ، مع إنها تعبت لانو شعري كتير و خشن، لكن ما إتساخفت علي، بعد كم يوم رجعت لقيت واحدة تانية بيضة لكين ما إنجليزية إشتغلت بدل الأفقانية، إتخيل لي عربية لانو إنجليزيها ركيك جداً، سالتهم عن علاج للشعر إسمو (الكيراتين) لمن سالتها كنت لابسه الحجاب، قامت ست المحل العراقية قالت لي أكشفي شعرك عشان توريك لو بينفع معاك، قبل ما اكشف شعري قالت لي، نحن ما بنعمل للشعر الخشن!!!! قلت ليها دقيقة اوريك شعري، قالت لي : لاااا أستطيع أن أجذم أن شعرك مجعد!!! انا برااااحة ضبيت ضنبي و مرقت. لمن حكيت لي صحباتي إستغربو لاني عادة ما بسكت على الحاجات دي. بعد كممممم شهر رجعت ليهم و انا قانصة ليها قمت تاااااني سالتهم، و من ما قالت لي خشن و ما خشن، قلت ليها و نفسي قااااايم: بالمناسبة في بلدي السودان ممكن تلقي ناس أسود أسود أسود مني و شعرم زي الحرير، و ممكن تلقي ناس أبيض منك و شعرم زي السلك . قعدت تعاين لي و فاتحه خشمها، انا طوالي رفعت راسي و طلعت وبعد دا ما إتفشيت
يتبع إلى أن أحكي لك يا أبي حكاية إنو الشغل ما عيب.
يتبع>>>>
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: محمد عبد الماجد الصايم)
|
Quote: ههههههههههههههههههههههههههههه يو ميد ماي طلطاشر داي لي قدام ياخ!!
غايتو الله يسامحكـ أمس مساهر لحدي تلاتة صباحا بضحكـ براي! والمرة تحمّر لي: إت را راجل جنيت؟ بتحضكـ مع منو؟ قلت ليها: مع آمنة بت بخيتة!!
طبعا الباقي لا يحتاج للشرح!! |
أها !! شوفو عينة دا دا البيجيب ليكم المشاكل و الهوا مع ناس ال (she)!! حسع أسامي الروجال في النت كملن؟! ياخ قول ليها (صديق الموج) إتصرف ياخ بالعدم (وائل فاروق) ياخ!!
إيه دا
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
Quote: خليك محضر خير يا وائل
حسع بكري يقوم يسمع كلامك و يلصقو و نملا بعض فقر.
حجة امنة .....
موبالغة حركة النقط دي!! |
أنت عارفة المعلق فوق ده كلو معاد , و زول بيعفصو مافى زاتو ! أخير ليك تحت . حسى بوستيك ده الناس تكتشفو يضايقونا فى قرايتو . بعد ما كنت داير أعمل ليهو دعاية فى البوست الاسرى بتاع النكهات داك غيرت راى قلت بوست زى بتاعك ده ما للعوام :)
أها بالنسبة للنقط دى ملكية فكرية :) . و محددنها باتنين فوق و أتنين تحت . اما ما دون ذلك فممكن على كيفك , كان شامة , كان نقطة ... كان زغت :))))))
وائل ......
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: خالد عبدالوهاب)
|
Quote: هههههههههه ياحاجة آمنة
المشكلة مافي الجع** المشكلة في فرق الجع** هههههههههههه
متابعة واستمتاع |
إتا قايل المشكلة وين؟! المشكلة في الفّرْق دا زاتو لانو لو العقرب قرصت الزول في الجع** بيتجهجه الزول لكين لو قرصتو في فرق الجع** بيتجهجهو الاتنين، أي الزول و العقرب زاتها!! لانو المكان دا مفترق طُرق، ولا شنو؟!
يا مان تابع ساااهي الحبة ما بتجيك.
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: rani)
|
Quote: Quote: عموماً البول في الخلا و تحت الحيط دا كان الله قاسمو ليك ، كان في أوروبا بيبقى عليك !!!
هههههههه وحات الله انت ما نصيحة..
جنو منو
|
لا خلاس
تاني كان حزقتني قصة من هاكذا نوع بكطعا في مصارييني
جنو منو دي ذكرتني (رحاب خليفة ) يا حليلا ياخ
المهم
هموم الغربة دي تاني بموت بيها براي و الفيكم إنعرفت أيها الرهط.
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: سناء الصباغ)
|
سن سن يا ست البنات
كيف أنتم في المدة التي لم أركم فيها ياخ
عليك الله شفتي الرد بعد سنتين دا كيف
قربت أنسى الموضوع اللساسي
بي مناسبة الموضوع اللساسي الكلمة دي انا إتعقدت منها من يوم بوستي الما موفق حق (جرادي في السروال)
لمو لي فيو ناس قيقراوي و ود الصايم خلو ريحتو جراد جراد
المهم
كل سنة و إنتي طيبة بي مناسبة عيد اللم
الهندي اليوما داك قششني ليك الدكان لمن إتكيفت زاتو، جاياك للقصة دي.
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
أمونة ياختي بركة بالشوفة والحمد لله انك بخير.
الرد المتأخر برضو ما كعب اخير من الرد بالسد.
شكرا ليك علي المعايدة وان شاء الله انت زاتك السنة الجاية أم وبعد كم سنة اولادك يجيبوا ليك هدية عيد اللم وعيد الابو انا عارفاك حتستولي علي هديته حتى لو كانت عطر رجالي زي ما نس كدا بيعملوا.
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: محمد البشرى الخضر)
|
Quote: 23-03-13, 01:07 PM بواسطة حجة امنة |
امونة لاحظت حاجة غريبة في بوستاتك وهي انك بترفعي البوست بدون مداخلة يعني مثلا اسمك ظاهر في الصفحة بتاعة العناوين انك اخر متداخل اي الساعة واحدة وسبعة دقايق
لما الواحد يخش جوا يلقى حاجة تانية مثلا في الحالة دي اخر متاخل هو الاخ محمد البشري وهو فعلا تداخل في زمن قبل الحجة
يكون البوست دا مسكون؟
محمد البشرى انت ايضا معني بالسئال باعتبارك خبير اسفيري
وبعدين امونة ممكن تكون بتتبظ ساي و ما جايبة خير
ارجو التوضيح من كل من يأنس في نفسه الكفاءة.
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: سناء الصباغ)
|
المرّة الفاتت تضامننا مع القصيدة الجازفوها عيال الفيسي بوك سبّلوا لينا البوست بي جرادو في صمّة خِشومنا أها المرة دي أنا أعلن وبكل عين قوّية كامل تضامني مع الحجة.. أم حجة آمنة ..والصبر اللي صابراهوا آآآمنت بالله من نقة حجة آمنة ..ياخي معقولة دا كتير قِِرقِر..قِرقِر...ولاّ كمان البوست مؤرشف...
Quote: يكون البوست دا مسكون؟ |
عاد دا سؤال؟؟ الشيطان بنفسوا وشماراتوا سائق البوست
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: أمير محي الدين محمد)
|
Quote: المرّة الفاتت تضامننا مع القصيدة الجازفوها عيال الفيسي بوك سبّلوا لينا البوست بي جرادو في صمّة خِشومنا أها المرة دي أنا أعلن وبكل عين قوّية كامل تضامني مع الحجة.. أم حجة آمنة ..والصبر اللي صابراهوا آآآمنت بالله من نقة حجة آمنة ..ياخي معقولة دا كتير قِِرقِر..قِرقِر...ولاّ كمان البوست مؤرشف... Quote: يكون البوست دا مسكون؟ عاد دا سؤال؟؟ الشيطان بنفسوا وشماراتوا سائق البوست
|
خير يا أمير
تضامنك مع الخالة الوالده ما بناباهو عِلا الفيك إنعرفت
السد السد الرد الرد
هيي بالمناسبة البوستي داك انا ما سبلتو ساكت
أولاً يا بادي جوك جماعتك ناس قيقراوي و ود البشرى و ود الصايم فتلو فتل السواد و قعدو قضو فيو وكت فراغهم، دا ما التعب أعصابي بالعكس ساهمو بشكل مؤثر في حكاية (الصفقة فوووووق) أها الجهجه ليك باكاتي جماعتك ناس الفيس البوك البيعلقو تحت واحدين قالو القصيدة دي زاتها ما سمحة و بتشبه قصيدة الحلزونة!!! وطططططط(دي بالانجليزي طبعاً، ياخ ما قلت ليكم خسارتنا في امبدة) القصيدة يا أمير انا إختزلت فيها معاناتي في الغربة و معرفتي ببعض مفردات بيئتي، يجوني ناس الفيس يعفنوها لي كدا؟!
الله في
عليك الله ما حننتك؟!!
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: سناء الصباغ)
|
Quote: Quote: 23-03-13, 01:07 PM بواسطة حجة امنة
امونة لاحظت حاجة غريبة في بوستاتك وهي انك بترفعي البوست بدون مداخلة يعني مثلا اسمك ظاهر في الصفحة بتاعة العناوين انك اخر متداخل اي الساعة واحدة وسبعة دقايق
لما الواحد يخش جوا يلقى حاجة تانية مثلا في الحالة دي اخر متاخل هو الاخ محمد البشري وهو فعلا تداخل في زمن قبل الحجة
يكون البوست دا مسكون؟
محمد البشرى انت ايضا معني بالسئال باعتبارك خبير اسفيري
وبعدين امونة ممكن تكون بتتبظ ساي و ما جايبة خير
ارجو التوضيح من كل من يأنس في نفسه الكفاءة.
|
منو دي البتتبظ ساي؟! واللهي ما بتعرفيني يا سن سن؛ أختك ولا فخر خبيره في الإسفير دا و بديت الإحتراف بي كورة الشراب سنة 2005 (في عكس الريح)
المهم حسب الفهمتو المشكلة في صندوق الرد و أدوات سودانيز اون لاين لانو الرد بيظهر حسب المداخلة البتكوني ضغطتي تحتها أيقونة الرد يعني حسع ردي ليك دا حيظهر تحت مداخلتك دي مع إنو في كم مداخلة قبلها و بعدها!!
مع تقديري للمجهود المبزول من باشمهندز بكري لكن أدوات الإقتباس و الرد بدائية جداً بالنسبة للمنتديات السودانية التانية.
عِلم ياخ واللهي نحنا ديل خسارتنا في امبده يا عملات (حمور زيادة)
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: محمد البشرى الخضر)
|
Quote: ابداع يا حاجة يديك العافية معليش عندي سؤال إنصرافي كالعادة الجيم المعطشة دي بتلقيها وين في الكيبورد ؟ |
والله كان قلت ليك تستغرب
الجيم العطشانة دي مرة لميت فيها صدفة بحته، قمت شلتها ليك صُره في خيت عملت ليها (كوبي و بيزد ) في ملف ويرد!!!
بقيت كل ما أحتاج ليها أشيلها و أخلي الباقي :-D
المهم ربك رب الخير بعد جيت بلد المهجر ، السيد حماضة، زوجي العزيز تجود علي بعدد واحد (أي باد) قمت يوم كدا كنت بكتب و منفعلة و عرقانة قمت إتشنجت ليك في حرف الجيم الواااااااحد دا كان القى ليك معاو الجيم العطشانة!!! چ عصرت شديد على الجيم قامت جاتني ال چ سبحان الله ، توفيق من رب العالمين بس و شكلها الخالة الوالدة بقت ماشاءالله مركزه معاي في الدعوات.
قلت ليك شايفاك من يوم البوست الغير موفق بتاع (مابين أزمة ود المقبول و الجرادة في السروال) ما شفناك تاني
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
Quote: قلت كمان الهبلة طلعت بتاعة دفاتر كبيرة و قراية، الحمدلله إختصرتها و ما أديتا فرصة تصاحبني،المهم الدفتر طلع واحدة من البنات حنكوشة كدا شالتو ختتو في المصطبه و قعدت فيو عشان ماتوّسِخ إسكيرتيها، قامت فجخت السلك حق الدفتر، قامت رنا قالت ليها: هييي لكين ما طلعتي دينو ؟!! طوالي قمت مسكتها من كتفها: قلتي لي خالتي فاطنة دقنة كيف ؟!! وفي سري : دي زولتي تتتتب . |
طلعتى ظربونه يا حجه برلوم رافع الكلفه مع السناير
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: بدرالدين الطائف)
|
الرسالة الخمستاشر: لو شفتي كيف بنزف نزيف الورد بالشوك إنطعن (كلمات خطاب حسن أحمد غناء الهادي أدم(ود الجبل) )
العنوان : بيتنا الكاين هنا
التاريخ : الليلة إلا كم سنة
بعد السلام عليكم ، بلاهي كيف أنتم في المدة التي لم تروني فيها ؟!! إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يما انا بقيت من العيال السيس
الليلة قمت بنشاط أنضف البيت و أعمل بعض الاشغال الشاقة المؤبدة دي، و مبسوطة من روحي، قررت لمن (عطوة الخزين راجلي)* الشهير ب (حماضة) يرجع من الشغل أتقدم ليو بإعتزار رسمي و شعبي لانو البيت دا قدر ما حاولت ما قدرت اوصلو لدرجة النضافة البيتوقعها سيادته. شغاله بي نشاط و بديت أغسل في الهدوم، لقيت فوق الغسالة قزاز و فريمات صور مكسره قمت أتذكرت انو الاستاذ حماضة كسر لي فريماتي لمن جا يعلقم، أتغظت تاني مع انو الحادث دا ليو شهور، قمت قررت أسحب الاعتزار، اها جيت أدخل الهدوم في الغسالة طرااااااخ طقتني ليك قزازة في جبهتي و الدم دا جا طاير بووووووووووف، بس طوالي قلت : (اللهم إني لا أسألك رد القضاء ولكن أسألك اللطف فيه) جبت لي منديل ورق ضغطت بيو الجرح و جريت مراية الحمام، زحيت المنديل قلت هيييي الجرح صغيررر و بووووووف الدم جا طاير ملا الحوض، طوالي ضربت لناس الاسعاف،ردت علي مرة طبعاً كرهوني حياتي بالاسئلة أسمك ..عنونك ..تاريخ ميلادك.. الخ أثناء ما بتكلم معاها برااااحة رفعت المنديل لقيت الدم وقف، قمت قلت ليها انا أسفة؛ الدم وقف، ما أظن أحتاج أسعاف، انا بس أتهجمت لانو الدم ملى المكان. قالت لي مافي مشكلة هم على أي حال حيجوك و يقررو !!! و أدتني إرشادات من ضمنها إني أقعد حته واحده و ما أتحرك. قلت الشبكني في الخواجات العبطه ديل شنو؟!!! هم بيخافو أكون حاولت أنتحر او يكون زول ضربني و هاكذا قصص المهم أنتظرت 40 دقيقة حتان جو، أثناء ما منتظراهم ضربت لحماضة في الشغل شرحت ليو الحصل عشان لو مشيت المستشفى يعرفني، لمن ناس الإسعاف جوني لقوني خليت أي شي في محلو سالوني الحاصل شنو، سقتهم محل القزاز وريتم الحصل، واحد طلع يجيب حاجات من الاسعاف، زميلو التاني بقى يمسح في الدم من وشي و يفتش باللمبه في الجرحة، قام قال لي السلام عليكم انا جزائري، قلت ليو انا سودانية، قال لي ايوة عرفتك انا اصحابي كتار سودانيين، في الوكت داك زميلو الانجليزي جا قمنا رجعنا نتكلم بالانجليزي، بقو يسالو عن بياناتي و كشفو على الجرح لقو ما بيحتاج أمشي المستشفى، لصقو لي لصقة صغيرونه كدا و بقو مارقين، قمت قلت ليهم: أنا أسفة جداً لانو جبتكم و الموضوع ما بيستاهل و كان ممكن يكون في واحد محتاج ليكم أكتر مني. الانجليزي قعد يضحك و قال لي ما تخافي نحنا كتاااار و لو في زول محتاج حيلقى زملائنا. شكرتهم و طلعو. قلت ياااااحليل زمن كنت في بلدي و بشرب موية النار و الحبة دي ما بتجيني!!! أي يا السادة القراء موية النار الوااااحدة دي أتذكر قبل كم سنة أيام كنت بدرس (لغة الإشارة العربية) كان عندي إمتحان و قمت ساهرت الليل كلو براجع، زي الساعة 10 قلت أخد راحة و أكل لي حاجة، قمت لقيت في الطربيزة قزازة بتاعة بلاستيك حقة بيبسي و شكلها فيها موية، كنت عطشااااانه قمت قلت الموية دي بايته برا بتكون دايرا زيادة من الماسورة ، قمت شلتها و دخلت الحمام و كبيت جزء كبير منها في الحوض و تميت الباقي موية، و طوالي بّقيت لي بقة كبيرة، طوااالي سنوني عملت كرررررررج رفعت أصبعي و قلت : (اللهم إني لا أسألك رد القضاء ولكن أسألك اللطف فيه) تاني قلت آمنة إنتي في الحمام و تقولي أيات، دي شنو السفالة دي قمت طوالي طلعت و شايله القزازة لقيت ولدنا الشغال قال لي دا شنوووو ليه شلتي موية النار؟!!! طوالي كوركت لي نزهة و لينا أخواتي جو جاريين و لمن كلمتهم قامو يجوطو، ضربو لي ابوي أدوني ليو قام جاط ليك فيني: موية النار أسااااساً الجابا البيت شنووووو؟! قلت ليو: بينضفو بيها حيضان الحمام. هاج ليك فيني زيادة: الحمامات عنها ما إتنضفت، دي حمامات شنو دي البينضفوها بي موية النار دي؟! ملا لي سماعة التلفون رعاف و توفاف قلت ليو بي قلبي يا حاج ركز لي مع الموضوع الأساسي حسع، قمت أتنبهت أني ماشربتها مركزة و إني خففتها، لا .. بالمنطق كدا لو كنت شربتها مركزة كان حسع بتفاصح جنس فصاحتي دي؟! اها الاب جاط فيني و أداني إرشادات طبية و قفل الخط قمت عااااادي إتنفضت و مشيت أمتحنت عاااااادي لا جابو لي إسعاف لا حركات العيال السيس الإتعلمتها في البلد دي!! اها نهاية اليوم جيت و لحد الوكت داك أمي لا ضربت لي لا هببتو لي، جيت زعلانة واقفه قِربة لقيتا عااادي تقراء في الكمبيوتر، قلت ليها لييييه ما سالتي مني، قالت لي: لييييه في شنو كدي أحكي لي. حكيت ليها القصة و تميت القصة كوز موية كالعادة. قالت لي : ياااااااا الله شربتي موية النار ؟! لا حول ولا قوة إلا بالله قلت ليها : أي و الله جوووووووت شفطها بس ربك رب الخير الهمني قبل ما أشربا زدتها مو... قاطعتني: يا ااااا الله يعني الليلة ما نضفتو الحمامات؟!!!!!!!
يتبع >>> ولكن بدون وعود
* (عطوة الخزين راجلي) مقتبسة من ام مدام فنجاط ، فنجاط شخصية الضفدع الكرتونية بمجلة صباح السودانية هذه الرسالة إهداء للحبيبات بقروب الواتساب (إلى حمار الوحش .. قبلة) سوسن سنادة.. منى عتباني.. لمياء صالح.. سماح المكي.. إيمان خليفة.. زهراء منصوري.. ريان أنس.. عزة جعفر بت سلمى خالص حبي و وردتين
http://www.youtube.com/watch?v=tQ2dEril4Rkandfeature=youtube_gdata_player
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
لا حول ولا قوة الا بالله،،، الزولة دي مرقت من وين ،، دي شيطانة مصرمة ،،وبعدين تجاوزت عبقرية الحكايين... انا قريت لي النص،تو ذا هاف ،وكت الشغل جه،قلتا الزولة دي بترفدنا.. شكيتها علي الله اكان تقطع عيشنا اها قلت الا اعلق،،،وجائيك،،،امانا ما تعبتي معاي.
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: عبدالعزيز عثمان)
|
Quote: لا حول ولا قوة الا بالله،،، الزولة دي مرقت من وين ،، دي شيطانة مصرمة ،،وبعدين تجاوزت عبقرية الحكايين... انا قريت لي النص،تو ذا هاف ،وكت الشغل جه،قلتا الزولة دي بترفدنا.. شكيتها علي الله اكان تقطع عيشنا اها قلت الا اعلق،،،وجائيك،،،امانا ما تعبتي معاي. |
تعبتو إتو ديل ، اليومين ديل متفرررررغه للفارغة
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: احلام وهبي)
|
Quote: أها !! شوفو عينة دا دا البيجيب ليكم المشاكل و الهوا مع ناس ال (she)!! حسع أسامي الروجال في النت كملن؟! ياخ قول ليها (صديق الموج) إتصرف ياخ بالعدم (وائل فاروق) ياخ!!
إيه دا |
حجه امنه... اول شى : اسلم عليك واتمنى ان لو كان فمى فى يدى لاشبعت النحل كاسات الورود عضعيض ،كما قال ود المكى.. تانى شى: تساهر بيك العقرب - اى العقرب العديله دى - وتقرصك فى اى حته ما علينا.. بلا مييد ماى دى بلا بطيخ.. تالت شى: والله يا حجه امنه وما بيناتنا مدسه مشتهيك زى العكارة فى القطينة ولو ما خايفك تصدقى ولو ما حايف من غيرة ناس كده ولو ما لو دى زاتا بتفتح عمل الشيطان كان قلت ليك احبك عدييييييييييل كده.. رابع شى : رجعتينى سنة الفمية سفر وسفرين قبل الميلاد و ابام عكس الريح وقتها كنا صغيرين نرعى البهم او كما قال قيس ابن الشلولخ .. خامس شى : خسمتك بالذى ركز الارض معبد وسوى حجه امنه عليها مقام سرد ماتسكتى اصلك وذنبك على.. سادس شى : ده كلووووو لا يعادل عشر معشار عشر ما داير ابديه ليك من اعجاب بما تكتبين من لدن الى حمار الوحش قبله الى حد بول الشوارع وانت لاتزالين ( الله يقرفك) ورغم تقادم السنوات تتسمين بتلك الطمسه التى عليها جبلتى و انت بها موصومة نسأل الله ان لايقيك اياها ولا يفكك منها.. سابع شى: بضحك برااااااااااااااااى واردد جهراً الله يقدك يا حجة امنة والمره تعاين لى باشفاق حتى ظننت انها تضمر لى مكر انها سوف تذهب بى الى مشفى نفسى من قومة الديك بكرة.. اخر شى: حجة امنه ادعو لك بمثل مادعت فاطنه بتت خير لابنها : ( انت بالعافيه التخصك فى المصارين تبقالك هدم قرقاب ونعلين.) وهل هنالك مثل العافيه التى تسربل الانسان الى اخمص قدميه؟؟ فمن كان داعياً منكم لابنه فليدعو بمثل هذا او ليصمت،خلف حجة امنه استوا اعتدلوا ساواا بين صفوفكم يرحمكم الله،،، حاشية: جاى راجع كان الله حيانى بعد اكوت لى كم حتة كده عندى فيهم كلام كتيييييييييييييييييير والرهيفة التنقد.. حاشية على الحاشية: بالله تانى ما تجيبى سيرتى مع الاوغاد ديل ود الصائم و وائل فاروغ ديل انا اهلى صعبين سمح؟؟
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: بله محمد الفاضل)
|
Quote: يكطع مصارينك علي مصارين ود الموج زاتو [/QUOTE}
بله الفاضل ..سلام من هنا لاعندك هسه الختا لزومو شنو؟ الله يجازى الكان السبب فى المذاهب الاربعه حجة امنه جبتى لينا النبذ فى صمة خشمنا غلنام انا البداخل مع الشفع لوووووووووووووووووووووول.. حاشية: انت برضو ما تقرن اسمى بالاوغاد هداك الله انا من عيلة محافظة وكدة،،،
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: صديق الموج)
|
هلا بالموج الصادح كيفك والعيال وأمهم والركض أما بهصوص الحجة فياها سيرتا إن نسوي فقد أضحكتني الآن ومن ذي قبل والضحك مستعصي مستعصم وأتم ذلك تعليقكم فوددت حشركم في منابذة المدح بما يشبه ومع الحجة شخشياً وأعلم
وكتر خيرك على رفع المعدنيات
وعذراً مداخلتي كان يجب أن تضع بها وجوه ضاحكة مستبشرة وهكذا
تحياتي، محبتي واحترامي وسلامي للأسرة والأحباب
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: بله محمد الفاضل)
|
Quote: يعني هسع الواحد يضحك كيف والضحك بقى زي المصران تجبدوا وهو لا يزال ملتفاً ببعضه بعضاً يكطع مصارينك علي مصارين ود الموج زاتو
والله شوق يا شقية لشقاواتك جت وللخالة العزيزة ذات نفسا
تحياتي، محبتي واحترامي
|
يا حليلك
ياخ ربنا يفرحك و دايماً تجرجر في مصارين الضحك بحق جاه النبي.
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: صديق الموج)
|
صديق الموج الله يغيظك دا شنو جايب لي كتاب مطالعه عديل في مداخلة، أصلو ما بتتطورو بِسسسسس
لكين أقول ليك
بالجد يا حليل أيام (عكس الريح) و زمن الزمن زين و الشعر مغتي الاضنين
بلاهي تفكر في البوستي كدا و قبل ما تنزلو يكون وصل صفحتين
و الكيبوردات زاتا متطايبه و البوست يشيل مية
حسع دا يحدر لي دا و دا يختها لي ديك، تخاف تهظر ليك مع زول يقوم يملا ليك شاشتك توفاف و رعاف، قرف يقرفك يا بعيد
المهم
ليك وحشة يعلم الله ، تحياتي للجميلات بطرفك
شفت الناس الراقين ، المختسر المفيد، نعلم فيكم لمتين
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: عبدالحفيظ ابوسن)
|
Quote: ياخي ده حكي طاعم لمن بي هناك وصادق صدق وامك ليها حق تنكرك حطب بطلتي شغلتي والله بقرا فيهو من 8 صباحا وانتهيت واحده , فاتح دكاني ابايع زبون وعشره يطشو مني تحية ليك ولحماضة ول [ماما ] و [ بابا ] |
ربنا يجبر خاطرك بحق جاه النبي.
الخالة الوالدة نكرتا شينة النصيحة لي الله، لكن الدنيا دي سدايه و رضاية
حسع ناوية جااادة أغير إسم البوست ل (رسايل إلى أبي أرجو أن لا تقراها أمي)
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
Quote: موضوع عدم الحمام و القمل حا أجيك ليو في رسالة قادمة . |
قالو الما عنده تيله بسوى الحد حيلة القمل ده عارفنو من زمااااااان ما تسلبطيه فى الانقاذ ومعسكرات الدفاع الشعبى ساكت لوووووووووووووووووووووول امنه المقمله زى مشتاقين وكده،،،
| |
|
|
|
|
|
|
Re: رسائل إلى امي أرجو أن لا تقراها(ماقصيدة) (Re: حجة امنة)
|
Quote: يا زول فِجة رهيفة التنقد موش الحكومة حاظره سودانيز اون لاين؟! تاني الحبة دي مااااابتجينا
لكين للضمان إعترف و إنهار عملت شنو :-D |
ههههههههههه الحكومة حاظراه طبعا لكن الحكومة لسة ماحظرت الفيسبوك ولضمان وصول رسائلك دي للخالة الوالدة غايتو ودعما منا لنكيرتك والدتك ولمزيد من النكران نقلنا ليها سودانيز بي هناك هنا دي : https://www.facebook.com/groups/772995506063972/ يااخي كملي رسائلك والله بقينا نتاوق للباقي ما لامين فيه الله يديك ال في مرادك ويحفظ ليك خالتك الوالدة
| |
|
|
|
|
|
|
| |