|
صور المحطات من وداي حلفا الى الخرطوم
|
وادي حلفا السندة النمر من واحد لعشرة محطة أبو حمد سنده الكرو محطة دقــــش سندة أمن سندة كرقس محطة أبو هــشيم محطة ابو ديــس محطة الشــريك سندة الزويرة محطة نــــــــــدي محطة الكــــربة محطة مبيريكــة محطة العبيديــة محطة بـــربــــر محطة دار مــالي سندة كنور سندة خليوة محطة عطبرة محطة الدامر محطة العالياب محطة الزيداب محطة المحمية محطة أم علي محطة كبوشية محطة التراجمة محطة شندي محطة القوز محطة بانقا محطة جبل جاري محطة الرويان محطة الجيلي محطة الكدرو محطة الخرطوم بحري محطة الخرطوم
|
|
|
|
|
|
|
|
Re: صور المحطات من وداي حلفا الى الخرطوم (Re: محمد المسلمي)
|
عمال الدريسة
صديقي الصادق عز الدين
Quote: ديل 37 محطة كلهم في خط واحؤ
يعني لو وقف في كل محطة 20 دقيقة = دي بس 13 ساعة |
فعلا يا الصادق القطر كان بياخد اكتر من 24 ساعة لحلفا وخصوصاً لما يخسر في الصحراء لكن الرحلة دائماً كانت ممتعة
| |
|
|
|
|
|
|
Re: صور المحطات من وداي حلفا الى الخرطوم (Re: حسين ديقول)
|
محطة أم علي محطة كبوشية -------------------- سندة قدو بين جبل ام علي وكبوشية دي حلتنا يا فيسل نسيته ليه؟ ذكرتني طرفة من الاسكلا وحلا واحد حلتو قبل الكوه قالوا ليه حلتكم فطوها في الاغنية عاد لا حول لا قوه حبيبى الليلة فى الكوه
قال ليهم: لا حول لا قوه .. دي حلتنا زاااتا
بوست جميل يا جميل بالمناسبة عرفت ان قدو الان اصبحت محطة كبيرة اخر مرة زرتها سنة 1978م ما بتذكر فيها اي شئ
| |
|
|
|
|
|
|
Re: صور المحطات من وداي حلفا الى الخرطوم (Re: فيصل محمد خليل)
|
Quote: وين محطة الكباشي التي تقع بين محطة الجيلي والكدرو |
اهم شئ فيصل ما نسى سندة كنور وخليوة
اظن يا الصادق وفيصل انه السندات دي مابيقيف فيها اي قطر وإنما المحلي فقط.. السندات وقوف القطر فيها لا يتجاوز التهدينة ما بيصل لعشرة دقايق..المحطات بين 15 ساعة و30 ساعة عدا عطبرة .. وعندك اكسبريس حلفا كان بيجرها من حلفا لعطبرة دون التوقف الا بالمحطة الكبيرة متل ابوحمد.. في المشترك ودا بيكملها اظن لحلفا ويتوقف في المحطات دون السندات.. اما قطر كريمة فدا ماعندو قشة مرة بيقيف في اي حتة ..وكان بياخد اكتر من يوم عشان كدة ناس الورش كان بيقولوا للخملة قطر كريمة..
بوستاتك ديمة عجيبة يا فيصل..ومن اجمل ما يُقرأ هنا و دايما بمر واسرق صورها
| |
|
|
|
|
|
|
Re: صور المحطات من وداي حلفا الى الخرطوم (Re: Haitham El Galal)
|
Quote: اهم شئ فيصل ما نسى سندة كنور وخليوة
اظن يا الصادق وفيصل انه السندات دي مابيقيف فيها اي قطر وإنما المحلي فقط..
|
يا حيدر.. فيصل طالما بدأ من جلفا يبقي اكيد راكب (الاكسبريس) وده ما بقيف في ىاي محطة ، خليك من السند، ده عنده محطات رئيسية زي الجيلي شندي الدامر عطبرة بربر ابو حمد ، وباقي المحطات بيعاملها زيها وزي السندة ما بيقيف فيها يهدن لتبديل التابلت او تكون في مقابلة .. السندة بيهدن فيها قطر كريمة هدينة بسيطة قدر ما تنزل الركاب وبس..
وين الصور يا فيصل
| |
|
|
|
|
|
|
Re: صور المحطات من وداي حلفا الى الخرطوم (Re: جمال المنصوري)
|
صديقي dardiri satti قطر حلفا كان بيتحرك من الخرطوم الساعة سبعة لو اتحرك في مواعيده . قبل ما القطر يتحرك كنا بشتري الزاد طحنية وعسل من دكان محمد موسى الموجود في المحطة. ونحن الحلفاويين لانو اهلنا بيشتغلوا في مرطبات السكة حديد كانوا بيسمحوا لينا نركب القطر من الورشة قبل ما يجي المحطة وبذا نكون حجزنا مكان للجلوس والنوم المريح
| |
|
|
|
|
|
|
Re: صور المحطات من وداي حلفا الى الخرطوم (Re: فيصل محمد خليل)
|
الجميل فيسل هليل ياخ ربنا يطَوِّل عمرك والزمان مايْدُمْركْ ـ علي قول امي عليها رحمة الله. هذا البوست بعث فِيَّا مشاعر متعاكسة حنين الي الزمن الجميل كحنينكم الي عبري وحسرة تقدمنا الي وراء في زمن كادت الشعوب ان تنال الثريا ------------------------------------
Quote: صديقي dardiri satti قطر حلفا كان بيتحرك من الخرطوم الساعة سبعة لو اتحرك في مواعيده . قبل ما القطر يتحرك كنا بنشتري الزاد طحنية وعسل من دكان محمد موسى الموجود في المحطة. ونحن الحلفاويين لانو اهلنا بيشتغلوا في مرطبات السكة حديد كانوا بيسمحوا لينا نركب القطر من الورشة قبل ما يجي المحطة وبذا نكون حجزنا مكان للجلوس والنوم المريح |
المحسوبية دي هي اللي جابتنا وراء الزمن داك لا كان في انقاذ ولا سودانيزاونلاين اها الشماعة كانت منو؟
| |
|
|
|
|
|
|
Re: صور المحطات من وداي حلفا الى الخرطوم (Re: osama fadlalla)
|
ابو حمد
اخونا دكتور مصطفى محمود من ابو حمد وهسي ساكن في ارقي في بريطانيا لكن ابو حمد بالنسبة ليهو احسن واجمل من بريطانيا كلها والله صحي
صديقي الزميل خالد العبيد
Quote: دي حلتنا يا فيسل نسيته ليه؟ ذكرتني طرفة من الاسكلا وحلا واحد حلتو قبل الكوه قالوا ليه حلتكم فطوها في الاغنية عاد لا حول لا قوه حبيبى الليلة فى الكوه
قال ليهم: لا حول لا قوه .. دي حلتنا زاااتا
|
حلوة ياريت لو عندك صور لحيّكم تنزلها هنا مع فائق تقديري
| |
|
|
|
|
|
|
Re: صور المحطات من وداي حلفا الى الخرطوم (Re: فيصل محمد خليل)
|
يا ريت يا أستاذ فيصل لو لسع في دأك الحال السمح . تدفع في الشباك جنيه وأحد من محطة الزيداب للخرطوم للدرجة الرابعة يديك التذكرة بي اللغتين العربية والانجليزية والباقي من الجنيه تعريفة .. ولو كان وكت سفريتك صادفت بعد موسم حصاد القطن ولا الفاصوليا . أهلك يقطعولك تذكرة درجة تانية . حتي سنة 1981 يا أستاذ فيصل كان الجنيه يعادل 3 دولار وربع . تخيل . السودان يا فيصل مصدر السلع النادرة للعالم الليلة يكورك من الجوع .. أدينا ياخ من صورك الحلوة دي خلينا النشاركك ونشارك جدنا الشاعر بن شداد البكاء علي ديك الاطلال الجميلة .
| |
|
|
|
|
|
|
Re: صور المحطات من وداي حلفا الى الخرطوم (Re: Osman Musa)
|
الكرو
هي قرية تقع بين الدتي من الشمال والدهسيرة من الجنوب ويسكنها مواطنين اغلبهم من قبيلة الشايقية واغلبهم من فرع الكرنقاب ثم السوراب والحوشاب والعونية وقليل من البديرية الدهمشية كما ان بها عدد من الدناقلة والمناصير والبشارية والكبابيش والهواوير والحسانية وتتعايش هذه الفئات من القبائل في تجانس سلمي ومحبة وإلفة وتصاهر ... وهي منطقة حضارية قديمة جداً بها أول هرم بني في التاريخ وهو هرم بعانخي وهي اول عاصمة لمملكة كوش وأول مقابر الملوك بها وكذلك تقع بها غابة متحجرة غرب القرية والأثار ويرى البعض ان هذه الغابة ماهي الا احدى الجنتين المذكورتين في القرآن في سورة الكهف والقلم ..
وياتي اسم الكرو اصلا من الكلمة الكوشية والنوبية الاصل وهي القمري (كرو) وتعني هذه التسمية ارض القماري. حيث ان هذه المناطق يرجع اصلها الي مسميات نوبية قديمة حيث الكرو ارض القماري - الدهسيرة المنطقة الغزيرة الاعشاب والنباتات - الزومة هي الارض الزائدة في النيل وهي ما يسمى بالزلومة عند العرب النوبيين (الشايقية) وغيرها كثير من التسميات وكلها نوبية ..
وبالكرو شياخة واحدة وكانت في السابق شياختان في العهود السابقة (التركية السابقة) شياخة الكرو وهي في آل حمود وشياخة الترعة وكانت عند نصر جد الناصراب الحاليين بالكرو بحري وكانت معها الدهسيرة حيث انفصلت الدهسيرة في العصر الحديث وانضمت الترعة الي الكرو واصبحت الكرو بحري الحالية وبالكرو ثلاثون نمرة زراعية بها ما يعادل السبعين ساقية تقريباً وتبدأ من الشكيل إلي شبلول بين الكرو بحري والدهسيرة وبالكرو عدد من المشاهير في الشعر والحياة العامة...
أعلاه مقال للاستاذ/ تاج السر محمد احمد طه
صديقي عزالدين عباس الفحل كبوشية محطة لها طعم خاص لركاب قطار حلفا . وهنا احي ابن كبوشية البار العم كمال عطا امد الله في عمره.هو من كبوشية ولكنه ولد في حلفا يعني عندنا نص فيهو هههههـ
| |
|
|
|
|
|
|
Re: صور المحطات من وداي حلفا الى الخرطوم (Re: فيصل محمد خليل)
|
صهريج محطه مياه العبيديه .ماشاء الله وتبارك الله .
الموقع الجغرافى :- تقع فى ولاية نهر النيل شمال مدينة بربر 18 كيلومتر . يحدها من الغرب النيل ومنطقة الباوقة ومن الشمال مبيريكة ومن الشرق حدود ولاية البحر الاحمر ومن الجنوب منطقة الحفاب .
Quote: انت يا فيصل ما عندك شغل ولا شنو |
صديقي شلنكح (ود الباوقة) شغال بزرع بسكويت في تنجانيقا
صديقي عمر محمد الحسن وثّق للمحطات من كريمة الى الخرطوم
| |
|
|
|
|
|
|
Re: صور المحطات من وداي حلفا الى الخرطوم (Re: عبدالمنعم الطيب حسن)
|
محطة الشريك او الشريق
صديقي الشرامي HAIDER ALZAIN تعرف يا حيدر عندي عمي اسمو صادق محمدحسين شغال في مرطبات السكة حديد اخلاقو في دينو .مرة واحد من الركاب مزهجو كل خمسة دقائق يضرب ليهو جرس جيب شاي جيب شنو ما عارف . مرة ضرب الجرس عمي صادق مشى ليهو قام سال عمي قال ليهو القبلة بي وين ؟ عمي قال ليهو القبلة كمان تبع المرطبات .
شكراً
| |
|
|
|
|
|
|
Re: صور المحطات من وداي حلفا الى الخرطوم (Re: فيصل محمد خليل)
|
قريبنا / فيصل طالما جيت بي عن الكرو والدهسيرا.. اها هاك من اندينا محطة الكاب
شوف اخونا / عصام سرالختم / من منتديات البركل كتب شنو عن محطة الكاب
الاخ عبدالقادر من العادة كانت القطارات تتحرك من كريمة بعد العاشرة صباحا وتصل عند مغيب الشمس الى محطة الكاب لينزل الركاب ويشربوا شاى المغرب ( شاى الكاب ) وهى اكبر محطة بين كريمة وابوحمد وهى تعتبر المحطة الرئيسية بالنسبة لاهلنا المناصير لان المحطات الاخرى التى بين كريمة والكاب كلها محطات خلوية لا يتوقف فيها القطار كثيرا ( كحيلة ومحيسة والدغفلى ) فالكاب هى سوق لاهلنا المناصير حيث يبيعون فيها الشاى والبيض المسلوق والترمس واللقيمات .. والخ صور حديثة لمحطة الكاب وقد دثرت الرمال خطوط السكة حديد هناك وبدأ الزحف الصحراوى يغطى معظم قطاطى العاملين بالمحطة .. وتظهر فى الصور مكاتب الناظر والادارة امامها اليافطة الخشبية ..
| |
|
|
|
|
|
|
Re: صور المحطات من وداي حلفا الى الخرطوم (Re: جمال المنصوري)
|
Quote: صديقي dardiri satti قطر حلفا كان بيتحرك من الخرطوم الساعة سبعة لو اتحرك في مواعيده . قبل ما القطر يتحرك كنا بشتري الزاد طحنية وعسل من دكان محمد موسى الموجود في المحطة. ونحن الحلفاويين لانو اهلنا بيشتغلوا في مرطبات السكة حديد كانوا بيسمحوا لينا نركب القطر من الورشة قبل ما يجي المحطة وبذا نكون حجزنا مكان للجلوس والنوم المريح |
Quote: صديقي dardiri satti قطر حلفا كان بيتحرك من الخرطوم الساعة سبعة لو اتحرك في مواعيده . قبل ما القطر يتحرك كنا بشتري الزاد طحنية وعسل من دكان محمد موسى الموجود في المحطة. ونحن الحلفاويين لانو اهلنا بيشتغلوا في مرطبات السكة حديد كانوا بيسمحوا لينا نركب القطر من الورشة قبل ما يجي المحطة وبذا نكون حجزنا مكان للجلوس والنوم المريح |
عزيزي ،
أنا كنت قايل الحكاية جغرافيا ، لكن إنت عملتها تاريخ!!!!
لأن محطة الخرطوم باعها من لايملك لمن لا يستحق!!
خالص مودتي ؛ وللجميع
تحياتي
| |
|
|
|
|
|
|
Re: صور المحطات من وداي حلفا الى الخرطوم (Re: فيصل محمد خليل)
|
شكرا فيصل ...بوست بريحة الحنين ونحن مشتتين في بلاد المغترب ... حسيت اني في اجازتنا وامي كانت طول السنة توفر من مصروفنا لتشتري وتخزن الهدايا لاهلها بالشريك كنا منذ اليوم الاول بالاجازة يكون غدا السفر عبر القطر ويبدا الاعداد بالمساء حيث الطعمية وسلق البيض والشية وكدا ... الغريبة المحطة بالخرطوم السكة حديد كنا نمشي بالمساء نبيت مع خالنا بمنزله الذي لايسع اسرته لا ادري ما الحكمة في ذلك ...انا واختي كنا مغرمين بالقطر واحاديثه فهو ملتقى العلاقات والصداقات الجميلة حيث نتعارف مع الكثيرون من تجار مصر وطلابها وكانت الرحلة تبدا منذ الصباح وحتى اليوم الثاني صباحا اذا لم يتعطل القطار ...حميمية اللقاءات التي تبدا بالمشاجرات مكاني ومكانك ثم بعد شوية تبدا اقعدي وهاك ضوقي اكلنا وهكذا ...كنت مغرمة بقراصة البلح (اظن ناس الشمال ) وما ازال كلما امسكت بجوافة تذكرت الجيلي وكلما اكلت سلطة اسود تذكرت شندي وكلما شربت كركدي او بسبوسة السمنة تذكرت حادي عطبرة وهو يصيح بالسمنة وكدا ...وما ازال احتفظ برسايل غرامية من علاقات القطار مع الشباب المعجبين وربما لدلالات الزمان
محطة الشريك كانت من اميز محطات الخط الشمالي حيث يعتبر القطار احد الموارد يهب لملاقاته جميع السكان بالشريك وما جاورها يبيعون فيها كل شي طعام وشراب في تسامح لا يعرفه الا اهلي هناك .... احن الى ذلك الزمان وتلك الايام الخالدة الشامخة بطول اهلها ولله درك اثرت شجوني ....وحنيني وملحوظة : في اتجاه الشمال بعد الكربة هناك سندة سبنس قبيل ندي ثم الشريك ومن ثم سندة ارتل (ابو الحسنين )ثم ابوهشيم وسندة مرو وابوديس ودقش والخ اردت الاشارة الى سندة اهلي (ابوي )وهي سندة ارتل وهي جزيرة بالغرب .... شكرا يا استاذ فيصل ....
| |
|
|
|
|
|
|
Re: صور المحطات من وداي حلفا الى الخرطوم (Re: نعمات حمود)
|
Quote: في اتجاه الشمال بعد الكربة هناك سندة سبنس قبيل ندي ثم الشريك ومن ثم سندة ارتل (ابو الحسنين )ثم ابوهشيم وسندة مرو وابوديس ودقش والخ اردت الاشارة الى سندة اهلي (ابوي )وهي سندة ارتل وهي جزيرة بالغرب .... شكرا يا استاذ فيصل .... |
ابو الحسنين مضوى جدنا عم الوالد رحمهم الله اما ارتل فهي مرقد جدنا الفكي ود مدني ولي حكاية ظريفة في حمطة الشريك
كنت وصديقنا مهدي مجذوب احمد المهدي في انتظار قطر بضاعة للمغادرة لعطبرة في التمانينات كانت هناك مجموعة كبيرة من الناس ايضا منتظرة قطر البضاعة دا المهم بمجرد وقوف القطر اتلمينا بالقرب من عربية الكمساري وهي طبعا الوحيدة القابلة لركوبها فجأة طلع لينا كمساري رباطابي مشهور وقال: " شنو يا امة انتو رافعين لكم كورنر هنا ولا شنو"
| |
|
|
|
|
|
|
Re: صور المحطات من وداي حلفا الى الخرطوم (Re: MOHAMMED ELSHEIKH)
|
في قطار الواحدة لمحمود درويش: ((رجل و امرأة يفترقان ينفضان الورد عن قلبيهما ، ينكسران . يخرج الظلّ من الظلّ يصيران ثلاثة : رجلا و امرأة و الوقت ... لا يأتي القطار فيعودان إلى المقهى يقولان كلاما آخرا ، ينسجمان و يحبّان بزوغ الفجر من أوتار جيتار و لا يفترقان ... .. و تلفت أجيل الطرف في ساحات هذا القلب . ناداني زقاق ورفاق يدخلون القبو و النسيان في مدريد . لا أنسى من المرأة إلّا وجهها أو فرحي ... أنساك أنساك و أنساك كثيرا لو تأخّرنا قليلا عن قطار الواحدة . لو جلسنا ساعة في المطعم الصيني ، لو مرّت طيور عائدة . لو قرأنا صحف الليل لكنّا رجلا و امرأة يلتقيان ))..
تحياتي لكم أخي فيصل وضيوفكم ، وذكرياتكم مع القطارات ومباهج السفر الطويل:
((ومتاعب السّفر الطويل إلى خطوط الاستواء والنوم في كل القطارات البطيئه والسريعه والحبّ في الميناء.. والغزل المعدّ لكل أنواع النساء))
... .. .
| |
|
|
|
|
|
|
Re: صور المحطات من وداي حلفا الى الخرطوم (Re: الصادق عبدالله الحسن)
|
يا سلاااااام والله رحلة ولا اروع مشيناها خطي كتبت علي عربات السكه الحديد محطه محطه ولعلها مناسبة ان نحي صديقنا يحي شاعر اغنية مسافره الجاهله وهو يبدع في احد ابياتها حيث يقول مخاطبا المسافره في ذلك الزمن الجميل ... انا برسل ليك كمساري ويجيب ليك كل اخباري بغازلك والقطار ماري علي الميجا وجبل جاري
| |
|
|
|
|
|
|
Re: صور المحطات من وداي حلفا الى الخرطوم (Re: علي الكرار هاشم)
|
Quote: محطة أبو حمد سنده الكرو محطة دقــــش سندة أمن سندة كرقس محطة أبو هــشيم محطة ابو ديــس محطة الشــريك سندة الزويرة محطة نــــــــــدي محطة الكــــربة |
السنْدات دي الرباطاب لما يصلوها ويكونوا جايين من الخرطوم يقولوا ليك "خلاص دخلنا جزء عمّ" خفيفة وسريعة وقريبة لمحطة الختام أبو حمد
توثيق خطير يا فيصل، يديك العافية ياخ
| |
|
|
|
|
|
|
Re: صور المحطات من وداي حلفا الى الخرطوم (Re: خالد العبيد)
|
Quote:
سندة قدو -- بين كبوشية وجبل أم علي -- دي حلّتي وروحي وشرياني -------------------------- الاخ عوض الرجاء مراسلتي هنا [email protected] ثم ثانيا وانت واقف في محطة قدو متجه غرب بتشوف اطول شجرات نيم .. ديل في بيتنا! نحن جيران عمك بله وودالناظر شفت كيف !
تحياتي
17-02-2014, 01:35 AM
خالد العبيد
...
|
*** الأخ الفاضل خالد العبيد ، بتعرف أخر بيت شرق قدو ، تجاه الجبل ، ناس ود الوالد ، أخية علي ود الوالد من كبوشية ، عليه رحمة الله ، ،،،
عزالدين عباس الفحل ابوظبي ...
| |
|
|
|
|
|
|
Re: صور المحطات من وداي حلفا الى الخرطوم (Re: خالد العبيد)
|
مرة اعود بذاكرتي ...لتلك الايام
كنا نحجز للاسف مايسمى قمرة احيانا ..كنت واخواتي نكره هذا لانه يحرمنا من التداخل المباشر مع الركاب ... ما يجول بذاكرتي الان وسبحان الله عندما كان يلتقي قطاران في احدى المحطات من جهتين مختلفتين تجد كل من ركاب القطرين يتصايحون لبعض (وهم يخرجون رؤوسهم للخارج ازيكم يا ناس هناية اهلا وسهلا وكيفكم وما ادراك ما الاخبار ) منظر في ذاكرتي كان الناس يعرفون منذ المساء القادمون والمغادرون ...وكانت الحلة جميعها تخف لمقابلة القطارات يستقبلون ويودعون وحتى ان اهلي بالشريك جميعهم يغلقون متاجرهم ومساكنهم وياتون للمحطة . الكمساري : اي مسئول التذاكر دا قصة براهو ....ياتي اثنين من الكماسرة كل باحد الابواب لعربية القطر الواحدة في زمن واحد ومع كل منهم اتنين من الشرطة ...يحمل بطارية ساطعة الشعاع في زمان كانت القطارات مظلمة .. جدتي كانت اكثر مايخفيها هذا الفعل الكمساري يضرب بيدة العربة (اصحوا يا جماعة )من الغرائب حتى الذين يملكون التذاكر بايديهم يصيبهم الذعر لا ادري لماذا ... عندما كبرت واصبحت اسافر بنفسي لجدتي وديارها الحبيبة وانا شابة شقية وجدت ان بقلوب هؤلاء محبة عامرة وابوية وقمت بصداقة عامرة بيني وبينهم امتدت جسورها الى منزلنا بامدرمان واذكر انني يوما ما وانا بميدان ابوجنزير (قبل ان .....)وجدت ومعي زميلتي اربعة من الرجال يرتدون جلاليب بيضاء وعمم استوقفونا وعندما نظرت اليهم وجدتهم كماسرة ضحكنا وجلسوا معنا نحكي عن كيف يتمر الناس في دفع ثمن التذكرة وحكوا لنا كثير من المشاهد والحكاوي ...وعندما دفعت لهم ثمن العصير رفضوا في سماحة الرجال في ذلك الزمان ولكنني قلت لهم دي ديون بتاعتكم عندي ضحكوا وذهبنا كل باشجانه ....
ولايفوتني انني كنت من اجود الباعة بالاجازة وقد درت علي الكثير من الارباح منذ صغري ... كم كان زمانا جميلا التحية لكل سكان تلك الضفاف ..ولاهلي بالشريك الحبيبة الى نفسي .....ولا ادري ان القطار بنفس ملامحه ام تغييير كما الاشياء جميعها .... ومن القاموس : الصنفور ..والتابلت وجرس الدخول للقطار وجرس الاقلاع ...الخ ومباني المحطات الصلبة التي لم تقتلعها رياح الزمن حتى الان ...يتوسطها مبنى المدير (العنبر )...في شكل ونمط موحد في كل المحطات ... عربانة الدريسة التي تقوم بنظافة السكة حديد بين المحطتات يسوقها بطريقة بدائية رجال كبار في السن انهكتهم هذه الحركات قياما وجلوسا ...يا سلااام ياخ
لكم محبتي يا صاحب البوست ومروره الكرام فقد انعشتم صباح ذاكرتي بالحنين والشوق والشجن
| |
|
|
|
|
|
|
Re: صور المحطات من وداي حلفا الى الخرطوم (Re: نعمات حمود)
|
في ثمانينات القرن الماضي كنا نمتطي اكسبريس حلفا الى الخرطوم بعد اجازة العيد وفي حوالي الساعة 2 صباحا سمعنا ضجيجا شديدا واصوات غير عادية توقف بعدها القطار في منطقة اظنها بين ام على وكبوشية مقاصدا جزيرة الشبيلية حيث علمنا ان عربتنا ومعها ثلاث عربات قد خرجت من المسار. خرج الركاب للخارج حتى يتم حل المشكلة والذي قد يحتاج ليوم كامل!!! وكان على مسافة لاتزيد عن بضع امتار من النيل. طبعا لايوجد اكل ولاشرب ولادكان ولا شىء في المكان النائي. حوالي الساعة 11 ص ونحن جلوس على ضفة النيل شاهدنا حوالي ثلاث مراكب ضخمة في الضفة الأخرى مليئة بالجلاليب والعراريق الناصعة البياض وهو تتجه الينا حيث كان التخمين ان هناك جنازة في طريقها للمقابر بالضفة الشرقية. المفاجاءة!!!! يخرج الرجال والصبيان والشباب يحملون اطنانا من القراريص والرغيف والخبز والافوال واللبن والشاي السادة والأبيض والقهوة. كما ذكرت لكم كان قطار عيد اقسم بالله العظيم ان المراكب كانت تتبادل المواقع وكل الناس قد افطرت وشربت الشاي والقهوة حتى رأينا الشباب يحملون صحون القراصة ولايجدون من لم يشبع! وهذه شهادة للتاريخ مني لاهل الشبيلية الكرام وكنت اود ان ارى في زمانها من يكتب عن تلك الواقعة وهاهو ابن "هليل" بعد اكثر من ربع قرن من الحادثة يتيح لنا الفرصة لتقديم شهادتنا في حق اهل الشبيلية
| |
|
|
|
|
|
|
Re: صور المحطات من وداي حلفا الى الخرطوم (Re: فيصل محمد خليل)
|
قريبي .. فيسل وضيوفك الكرام ..
السلام عليكم ..
يااخ رجعتنا لاكثر من 40 سنة لورا .. واخذنا نجتر الذكريات الجميله في رحاب قطار حلفا ... حيث كنا في كل اجازة صيفيه للمدارس نسافر براً لمصر ثم الاسكندرية لوجود اهل الوالده هناك .. وفي بعض المرات نعرج من حلفا .. لمدينة عبري لزيارة اهل الوالد ( الرحلة باللواري 24 ساعه اضافية ) اها السفر بالقطر دا .. كان متعة .. ما بعدها متعه .... وفي تمام الساعة 645 صباحا بالدقيقه كان الاكسبريس ذو اللون الازرق يتحرك من الخرطوم وهو يجر تلك العربات البيضاء كبياض قلوب اهل السودان .... وكان زوج اختي الله يرحمه مفتش بالسكة حديد .. فكان بظبط لينا الحجوزات .. ومرات نركب درجة النوم ... اها الاكسبريس دا كان حدو عطبره .. ما عارف السبب شنو ؟؟؟ ( الظاهر لياقتو كانت تعبانه ) .. ويبدا قطار البخار .. بتكملة المشوار الصعب الى حلفا وتبداء المعاناة الحقيقه .... طبعاً كان بطي جداً .. وكل شوية يتعطل ويقيف ... وينزل الركاب .. وتبداء الونسات الجانبيه .. ومرات والقطر ماشي الواحد ينزل في الخلاء ويقضي حاجتو ويجري يلحق القطر تاني ... المهم لما نصل حلفا ... يكون الواحد مغبر و######ان وحالتو صعبه خلاث ... الا ان متعة السفرية في التعارف على ناس جدد وتكوين صداقات ربما تستمر سنين طويله.. وبتذكر مره كانت مسافره معانا اسره ولديهم بت جميله.. و حاول كل الشباب الكانو مسافرين معنا التودد اليها دون فائده .... الا ان العبد لله كان خفيف ولفيف .. واستطعت ان اكسب صداقتها دون الاخرين وسافرنا سويا حتى الاسكندريه .... وقضينا اجازه جميله .. ورجعنا سويا ... ومنها تطورت العلاقات الاسريه وحتى يومنا هذا نحن في تواصل .... وهذه ميزة حسنه من مزايه السفر ... الذكريات كثيره وجميله مع القطر ..
تحياتي ,,,
| |
|
|
|
|
|
|
Re: صور المحطات من وداي حلفا الى الخرطوم (Re: محمد مجيدو)
|
منازل عمال السكة حديد بعطبرة
صديقي الذي لم نسال عنه في غيابه عبدالعزيز الفاضلابى
الحمد لله الظهرتا والله كنت في بال قبل كم يوم قتا اكتب ليك في الماسنجر لكن قتا اكسيد ما قاعد تحوم جنب سودانيزونلاين . اما بخصو المحسوبية في اي وزارة شغال فيها حلفاوي طوالي بجيب الحلفاويين بشغلهم معاهو . شكراَ
| |
|
|
|
|
|
|
Re: صور المحطات من وداي حلفا الى الخرطوم (Re: المسافر)
|
Quote: سندة المطمر بين المحمية وام علي |
Quote: ثبت لينا السندة دي بالله لانو مشوار المحطة بعيد ...ههه
في واحد من القطارات دي ما كان بقيف في السندات
المهم الجماعة المستقبلين كانو بجونا بالحمير في محطة المحمية ... يااااااه زمن |
صديقي osama fadlalla
انتو كان بيجوكم بالحمير ولكن نحن ذي ما قال دكتور عوض مصطفى بتاع الاسنان . قال لي في محطة حلفا كل حلفاوي بيجي يستقبل زولو و معاهو بشكير يمسح وش المسافرين عشان يعرف قريبو ههههـ لانو كنا بنجي مغبرين . دكتور عوض مصطفى قال الحلفاوي يمسح وش الزول ويقول دا موش محمد صالح هههههـ
| |
|
|
|
|
|
|
Re: صور المحطات من وداي حلفا الى الخرطوم (Re: فيصل محمد خليل)
|
سندة المطمر
يا سلااام ياااخ رجعتنا لي زمناً سمح بالحيل حيث كنا ندرس بمدرسة الدامر الثانوية ونسكن بالداخلية فكان القطار الوسيلة المحببة لنا بين محطة الدامر وسندة المطمر وعبر هذا البوست احي الزملاء من أبناء الرباطاب والمناصير بالمحطات والسندات التي ذكرتها: شرف الدين اسماعيل من محطة الكاب / أمير الامام ، أمير ادريس ، وجدي ، عبد الله محمد عبد الله ، حزيفة ، عاطف عبد الله ، احمد حمود من محطة الشريك / اشرف وأخيه أمجد من محطة ندي / عمر ابراهيم من ابوهشيم / عبد الله من الكربا .... والمعذرة للذين لم تسعفنا الذاكرة لذكرهم
| |
|
|
|
|
|
|
Re: صور المحطات من وداي حلفا الى الخرطوم (Re: Elamin Medani)
|
سلام الامين .مديني ... احمد حمود اخي بخير وعافية واميزال متجولا بين النيبال ولبنان والامارات حذيفة بشير الخير بالف خير وامير ادريس والامام ...يا سلاام ياخ انت اظن تكون صديقي برضو اكيد ....لانهم كانو شلة احمد اخوي وكنت انا زعيمتهم .....في البحر والقطر هههههه
نواصل الحكي .....
يلا يافيصل نزل لينا صور الشريك ومني المحبة ...
| |
|
|
|
|
|
|
Re: صور المحطات من وداي حلفا الى الخرطوم (Re: مصطفى توفيق)
|
توثيقك ناقص يا فيصل
أهم السند سندة قرية ديم القراي بين محطة كبوشية والتراجمة وهي أول سندة بعد مدينة شندي في إتجاه الشمال
رغم المعاناة لكن للقطار ذكريات جميلة لاتنسي وخاصة لمن عاش جزء من حياته في عطبرة عاصمة الحديد والنار
من أروع المناظر عندما تخرج البلد بكاملها لوداع عروس راحلة لزوجها بالدموع عندما كانت الغربة هي بورتسودان أو الخرطوم
ليت يعود ذلك الزمن الجميل
| |
|
|
|
|
|
|
Re: صور المحطات من وداي حلفا الى الخرطوم (Re: عزالدين عباس الفحل)
|
فيصل والله انت كده (يد مضمومه واصبع لي فوق) ... !!!!
اخرجتنا من عالم تيبست كل مشاعره وخلجاته الي سلسبيل يجري مع قضبان السكة الحديد فيحمل الي ضفاف القضبان كل ماهو طيب وشهي وحبيب وينشر الالفة والسلام والود في نفوس الناس الذين يربط الخط الحديدي بينهم وكانه يقوم مقام القرابة والنسب والدم ...
شوف الاعضاء كيف اجتمعوا في بوستك علي الحب والذكر الحسن .. ولم يلعن واحد منهم سنسفيل ابو الجاب التاني ........
لهفي علي وطن تشتت وتنافر بعد ان خمدت حركة السكة الحديد بين ربوعه ..
نحن ابناؤها .. ابناء عطبرة العاصمة .. نهتز اكثر كلما طرق اذاننا طيف يذكرنا بازيز قطار وبف نفسه وصهيل صافرته وصرير عجلاته عند منحني السكة وصدي ارتجاج سيمافور تتعلق به العيون المتطلعة الي بشري دخوله الي المحطة ..
احييت قلبي يا صديق ومتعت بصري ورطبت مشاعري .. .. واحسنت
عمر علي حسن
| |
|
|
|
|
|
|
|