|
|
 كبر يطلب من فيصل العجب التسجيل لمريخ الفاشر ###
|
جاء في الأخبار أن والي شمال كردفان عثمان كبر قعد مع اللاعب الخلوق فيصل العجب ، وإتفق معاه يسجل لي مريخ الفاشر ، وحسب الاخبار المنشورة في صحف امس ، الوالي كبر عرض علي العجب مبلغ 200 مليون ، وده ماالموضوع ، الموضوع حسب الاخبار إنه إدارة مريخ الفاشر إستأذنت إدارة المريخ وفاوضت جمال الوالي ( الذي بارك الصفقة وأيد توقيع اللاعب في الكشوفات ودفع 200 مليون جنية ، مش كده وبس جمال الوالي وعد العجب بتكريم بعد الإعتزال ) إنتهي الخبر.. أظن عايزه شرح . السؤال ليه استأذنت إدارة مريخ الفاشر من إدارة مريخ العاصمة ، واللاعب كما هو معروف وحسب تصريحاته أجبر علي الإعتزال وأخليت خانته بالفعل وأصبح بلانادي يعني ممكن يسجلوهو عادي ، وماننسي إنه سبق أن فاوض (هلال الكاردينال) وإتفق معاه علي كل حاجة ، القروش ومدة العقد وغيرها ، يعني مافي سبب للإستئذان من ناس مريخ الفاشر ، عايزه شرح . في حاجة غريبة قال ليك إدارة مريخ الفاشر فاوضت جمال الوالي الذي بارك الصفقة ، لاحظ في البداية قالوا إستأذنت من إدارة مريخ العاصمة ، وهنا فاضوا جمال ، السؤال الفرق شنو بين جمال وإدارة المريخ إستئذان هنا وهناك مفاوضات ومباركة للصفقة ؟ عايزه شرح . الأغرب إنه جمال الوالي ساهم حسب الاخبار ب200 مليون جنيه لتسجيل العجب لمريخ الفاشر ، ليه؟ عايزه شرح ، يكون الاستئذان والتفاوض والمباركة واللفة دي كلها للاعب ماعنده علاقة بالنادي عشان ال200 مليون ؟ عايزه شرح . آخر الأخبار إنه المبلغ وصل مليار ، وفي أخبار بتقول ناس المريخ الفاشر قالوا بنسجل فيصل العجب لكن القروش مامننا ، يعني نحن بنجيبوا في الكشف ويصبح لاعبنا وبنضحي بخانة ، لكن القروش تدفعوها إنتو؟ نحن منو؟ عايزه شرح. نطلع من هنا ونمشي العرضة شمال ناس الهلال ، لو رجعنا الشريط ، وحاولنا نعرف موضوع العجب ظهر كيف ، بتكون عايزه شرح ، المهم بقي مشكلة وقضية شغلت الراي العام ، لغاية أمس رئيس لجنة التسييير الحاج عطا المنان عنده تصريح في عدد من الصحف قال فيه : ( مجلس الهلال في إنتظار الكاردينال لتسجيل العجب) ، و ( باركنا مبادرة الكاردينال وننتظر خطوته لتسجيل العجب وأسرات) ، وده معناها موافقين علي التسجيل كلجنة ، ولو تابعنا اخبار الايام الفاتت بنلقي أغلب أعضاء اللجنة وعلي رأسهم نائب رئيس اللجنة عبدالله حسن أحمد البشير ، تصريحاتهم لم نناقش موضوع تسجيل العجب في لجنة التسيير ومرات يقولوا لم نفوض الكاردينال لتسجيل العجب فوضناهو لتسجيل أسرات ، عايزه شرح صاح؟ ده كلام الرئيس ، وده كلام نائب الرئيس ، ده غير الحصل في لجنة التسجيلات ، وحكاية إستقالة قاقرين ، أكيد عايزه شرح . الغرابة ذاتها لمانعرف انه الكاردينال في البلد ماف ، حسب الاخبار إنه سافر اثيوبيا عشان يجيب اللاعب اسرات ، وجوده جاء متزامن مع تصريحات الحاج عطا المنان ، مع موضوع تسجيله لمريخ الفاشر ، دايره شرح . طيب لما نجمع الوالي عثمان كبر مع جمال الوالي مع الحاج عطا المنان أو قول لجنة التسيير الهلالية ، بنطلع بحاجة واحدة هي (الحزب الحاكم) . بعد كده ما أظنها عايزه شرح. ولا عايزه؟ ننتظر ونشوف.
|
|
  
|
|
|
|
زهير عثمان حمد
فيس بوك
تويتر
انستقرام
يوتيوب
بنتيريست