|
|
 قنصلية السودان بجده - كلاكيت عاشر مرة
|
ساقتني قدماي لقنصلية السودانية بجده بغرض تجديد جواز السفر لي ولأسرتي , صف المراجعين يمتد لآخر الشارع في السابعة والنصف صباح الأمس الأثنين , استفسرت عن الأمر فقالوا أن حملة تصحيح الأوضاع كان وما زال لها تأثيرها على هذا الزحام بالقنصلية , وأن الدوام الرسمي يبدأ في الثامنة صباحا , فأخذت مكاني في الطابور حتى جاء الفرج ودخلت مع الداخلين وبدأت إجراءاتي بسلاسة لا أحسد عليها وأكملتها حين أخبرني الموظف الذي سلمته ايصالات سداد رسوم التجديد وبقية الأوراق أن استلام الجوازات سيكون بعد ساعه تقريبا , فغادرت المكان لأكسر الوقت خارج هذا الزحام بمطالعه الصحف , وقلت في نفسي كلها ساعة وألحق الدوام , وعدت بالفعل بعد ساعه لأنتظر دوري في استلام جوازات السفر , ومضت ساعه أخرى ( عادي جدا ) وكنت متوقعها مع الزحمة الشفتها دي أصلوا الغربة علمتنا الصبر , وأخيرا تم المناداة على اسمي وعندما ذهبت أخبرني الموظف بالكاونتر أن علي مراجعة شباك الزكاة وأشر لي بيده ناحيته ,,,
ذهبت لشباك الزكاة وفي النفس شئ من حتى , موظف تجاوز مقتبل العمر بل اقترب من نهايته , بتقديري تجاوز كونه موظف كاونتر , بعد أن ألقيت عليه التحية وناولته ملفي استقبلني بسؤال جاد جدا :
- سددت الزكاة ؟
- أيوة سددتها
- معاك ايصالات ؟
- لا ما معاي ايصلات
- طيب نعرفك كيف سددتها ؟
- مفروض انها مسجله هنا في كمبيوتركم دا ( قلت هذه العبارة وأنا أضع يدي على شاشة جهاز الحاسوب أمام الموظف ) .
- نحن هنا ما عندنا شبكة .
- دي ما مشكلتي أنا - أنا سددت الزكاة من قبل في الخرطوم - وأنا بنزل اجازاتي للسودان سنويا وهناك بسدد كل ما يلزم - وهسع عاوز أجدد جوازي دا , أنا جيت أجدد جواز سفر ما ممكن عشان أجدد جوازي أجيب معاي ايصالات مضت عليها سنوات , ولأنو أصلا ما متوقع زول يسأل منها .
- طيب سددت كم ؟
- ما متذكر والله لأني سددت في نفس الوقت ضرائب وخدمات ورسوم التاشيرة .
- طيب دخلك كم ؟ مرتبك كم ؟
- انت عاوز تعمل لي اقرار زكوي هنا ؟ كلو في الملفات عندكم في المغتربين ؟ أي اجراء هنا يعتبر اجراء مزدوج طالما ما عندك خلفيه ملفي لديكم .
- يا زول ما تعلي صوتك
- أعلي صوتي زي ما عاوز , انا لي ساعتين عندكم هنا منتظر وعندي دوام - وكان مفروض توضحوا إجراءاتكم من الأول قبل استلامكم للجواز للإجراء - وبعدين يا استاذ انتو في الأول تعاملوا بمنطق , ما قلت ليك دفعت أحلف ليك قسم ولا شنو ؟
أقوليك جيب الجواز دا زاتو ما عاوز أجددوا ولا يحزنون .
- انت ما تكمل بياناتك عشان نكمل ليك الاجراء ؟
- بياناتي كاملة , واذا كانت ما متوفرة عندك في جهازك دا فدي ما مشكلتي , رجع لي ملفي ما عاوز أجدد الجواز , قلت ليك رجع لي جوازي ما عاوز أجدد.
أعاد لي الموظف جواز سفري دون أن يفيد فيه بأي شيء وبالطبع ناس الجوازات لن يقوموا بأي اجراء دون افادة ناس الزكاة .
بقدر ما أسفت لهذا الحوار مع رجل يكبرني سنا , بقدر ما لحقني من ذل من التعامل بهذه الطريقة وغيري كثر ,
أخذت جواز سفري ويممت شطر شباك الاستلام لأتسلم جواز زوجتي , ليسألني الضابط مشكلتك شنو ؟ والواضح أنه سمع حواري مع موظف الزكاة اذ أن صوتي كان عاليا , فأخبرته بما دار على مضض , فأخذ مني الجواز وغاب ثلاث دقائق معدودة ليأتي بالجواز وهو مجدد , طبعا ما فهمت حاجة , تلاته ساعات وأنا داخل القنصلية لاجراء تجديد جواز سفر , دون اعتبار للتأخير عن الدوام أو حتى دون التوضيح لعلاقة بعض الإجراءات وربطها ببعضها البعض .
|
|
  
|
|
|
|
البشير دفع الله
فيس بوك
تويتر
انستقرام
يوتيوب
بنتيريست