|
|
 الفرجوني
|
يا صمد البحكموا المعني والقافية
مسموح ليك ؤممنونين ولو في مية
كان جر الزمن سووا البعاد والكية
زايد عزك الفايق سهيل ؤثريا
ما اتهمل ودادك يا المحيط السدر
ؤفضلك زاد علي القياس قدر ما قدر
كيك عربك برس درهان.. ؤربك قدر
قلبي يهمو هم وطني اب مسورا عدر
داير ثورة زي سيل البحور تتحدر
تخم الخائنين شيخن تجيبو محدر
تلقي مفض ودي عزتنا نبت ؤشدر
نعيش حرية تاني قلوبنا ما تتكدر
شاحدين الكريم لي غيرو ما اتوسلنا
نرجع عافية نلقا بلدنا اصبح جنة
نَكُنْس المجرمين ندي الأمان لي هلنا
يصبح حر بلدنا وبالجلوس نتهنا
مماقم صغير بعرف بحل الورطة
بشوف سِهَم الحقيقة وبمشي فوقن خرطة
علي الإنقاذ يهل يوما تضوق العرطة
نبقا اعزا ما يحكمونا ناس اب.......
ساءلين منزل الرحمة الاله الصِّح
بروق الخير تكاتح في النواحي تلح
تنشال مننا حكومة المخازي تزح
عصابت المؤتمر تجري وقلوبا تفح
نرجع تاني سودانا ونلاقي الخوة
نشوف اهل المكارم والعفاف والقوة
بلدنا تفوز نشوف نجم السعادات ضوا
نسمع حس جماهير المداين دوّوَا
سائلين الله يا حسن القلوب ينسترن
ؤمن درب النضال فوق الوطن ما يفترن
كان عدنا بنخت فوق القماقمو ببترن
ؤكان ولينا؟ من طبع الليالي بخترن
طبيق السنين في الغربة ما بنهابو
والمر الحجازي مجربنو شرابو
وكت النار تحر والناس يلجوا ويابو
لينا صبرنا مو لخلافنا نحن اصحابو
نمك هادا ياحسن الفكي بشلوطني
بضوق حال المدجن للجزازير متني
الدفرتني في النار ام لهيب ؤرمتني
ذلة وطني بلحيل يا حسن ذلتني
نمك يا حسن بتعبني وامرض قلبي
ؤذل أهلي البزود في عذابي وغلبي
يقول لي نفسي دربك منو ما تنقلبي
بموت فوق عز بعد غبش سبيبي وهلبي
وين المنو يا حسن الغميد فارقني
سيف امياقو باتر ياحسن ضاربني
تغني دباسة اسمع والنغم طاربني
احن بلحيل ؤنية الرجعة ما تقاربني
وين المنو يا حسن الكبد مشوية
ؤمهما بعدن الايام مرادتو قوية
وين القلبي مشتاق لي لهجتو النية
داير اشرب جبنتو... والبلد حرية
|
|
 
|
|
|
|
|
|
|
 Re: الفرجوني (Re: محمد عمر الفكي)
|
Quote: وين القلبي مشتاق لي لهجتو النية
داير اشرب جبنتو... والبلد حرية |
كان حيين بنتلاقى
تحت ضل شجرة الحرية ام همبريباً ضارب
وبكرة باذن الله اجمل وانضر
شكرا محمد عمر الفكي
شكرا الفرجوني ود البلد
| |
|
|
|
|
|
|
|
|
|
Re: الفرجوني (Re: علي محمد الفكي)
|
Quote: يا صمد البحكموا المعني والقافية
مسموح ليك ؤممنونين ولو في مية
كان جر الزمن سووا البعاد والكية
زايد عزك الفايق سهيل ؤثريا |
التحيَّة للشاعر الرائع و الفنان أحمد الفرجوني
والتحيَّات لك أخي محمد عمر الفكي
وسلامي موصول عبركم للجميل علي محمد الفكي
| |
|
|
|
|
|
|
|
|
|
Re: الفرجوني (Re: علي محمد الفكي)
|
هدية خميس وجمعة لعيال الفكي
قبل ثلاثة سنوات أدَّي الأخ حنفي فريضة الحج قال هذه المربوعة وبعد رجوعه أرسل هذه المربوعة للشاعر الرائع الفرجوني
بعد التوبه والحج والتضرُعْ وذلـــَّكْ
معقول تانى قلبك لى الصبابه يدُلَّــك ؟
وكان فتقــّن براعم فى مزارع فُـــلّّك
بتتكــرَّف عبيرهِن ولاّ تـــزْكــّم كُـــلك
ولقد رد عليه صديقه جمعة البري وهو شاعر مُجيد:
بعد الحجة والتوبة البِتحجم غِلَّك
إبليس تاني بِتجوجح بعيد ما بِطُلَّك
الزول القبيل عزفك صبابات كُلَّك
بخاف نظراتو والوهج المواقع ضُلَّك
ويرد عليه صديقه العمدة حمد وهو شاعر:
طِيوفاً في الخيال بعد الهِجوع بِطُلَّك
خايف إودّرِن توبتك ؤ إعيدن ضِلَّك
يا حنفي العزيز طاعم الكلام مابِحِلَّك
في نيران صبابتك اخيرلك أنْجض كُلَّك
ثم يرد شخصي الضعيف ولم أكن شاعرا:
إن طيف سلمي زارك في منامك ؤطَلَّك
عَرْجَن ؤ شاشا بي لَهَجَن دِقاق عَسَّلَّك
العجب كان فَرَّ إيدو ؤبي الحدق عجَّلَّك
بِتنْجَض كيفنا والله الرَّجعة أخير أسْهَلَّك
لكن أنظروا لشاعرية الفرجوني عندما أرسل رده لحنفي:
جميلاً عند وداعك دمعو بتبهلــَّك
صبرك عندو يا اب قلباً رهيف بتهلَّــك
رماك فى نار جهنم ما رتا إتمهَّـَلَّــك
مواعيدو ومواقيت حجَّك إشتبهنلَّك
قول لى قلبى مالّك بمشى زايد غِــلّك؟
ودون خلق الله صبرك ماهو ناوى يّظِلّك
عبير زهر المشاتل زاورك في محلَّك
شفيتْْ بى شوقو واتمنيتو حَرّمَك وحِــلَك
إتنين بنات حُفرة ومن قافية صعبة جدا.....
الفرجوني شاعر مُجيد وما بصَّاقع.....
محبتي
| |
|
|
|
|
|
|
| |
محمد عمر الفكي
علي محمد الفكي
عبيد الطيب
فيس بوك
تويتر
انستقرام
يوتيوب
بنتيريست