|
|
|
 Re: حكايات حب قديمة جدا (Re: عبدالله ود البوش)
|
حكايات حدثت في زمن لا وسائط فيه غير المرسال الخجول
او قصاصات ورقة تطوى في يد امينة لتسلم للحبيبة تقرأها او تشوف قراية امينة
ودا غير حفلات الرتينة وفيها البنات بقبلن على الحيطة والحب بالسمع بمبدأ الاذن تعشق قبل العين احيانا
غايتو بفضحكم فضيحة يا عجايز
نواصل
| |
 
|
|
|
|
|
|
|
|
Re: حكايات حب قديمة جدا (Re: الامين موسى البشاري)
|
ود البشاري حبابك
لتركبن طبق عن طبق او تدفع البرتيتة او لافضحكم فضحا يا صديقي
اتا من زمن ناس سنة ولا اموت انا ول من ناس ثم ماذا بعد السلم التعليمي الجديد ؟
والحكايات دي معظها في زمن المنديل المطرز وما مريح بالكارينا ما يبارينا
والدبابة والشارلستون نفس اللون وسجمي الجبون وقع هههههههههههههه
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
معليش يا جنيات البندر وبنات البندر
في الحكايات دي اتو ما معانا عشان ما تجوا تعملوا لينا سافوتا
الحكايات دي كلها فوق ضهر ترعة وسيخ لوري ابيض ضميرو
وجنب غوغاية قطن وبين الشلابي والناكوس
وكل ذلك قبل ان تأتي الانقاذ وتسرق حتى احلامنا الجميلة
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
جايين من اب قوتة راكبين لوري في حرا شمشمو تصر العين
اللوري هوستن ب ح مكتوب عليهو الوسيم
انا وبلولة ود علوبة ويحيى ود جون
انا مشيت ابيع الديك اللحمر والجدادة الرقطا والفروجة الغفل هههههههه غفل بضم الغين والفا يعني ما موسمة بفتح كل الحروف جت عليهن
قمنا من دغشا بدري وصدينا نصت نهار في قهبونة تدخل القمرية بطن التكل
بعت الجداد عشان اشتري بهية خدرا لشباك المربعة الجديدة لزوم الحبكان القايمين فيهو سداري
وبلولة ود علوبة مشى اب قوتة اشتري بنطلون لبني شارلستون والجزمة نفس اللون عشان اسكسك في اغنية الجيرك جنني وعاجبني شوالي الجابو لي خالي
ويحيى ود جون مشى اب قوتة اشتري مسامير لي كربيتة بت الضواها ومراية لي بترينة بت السيمت
أها يحيى ود جون متفلفس شوية راكب في الكسكتة
وانا وبلولة ود علوبة راكبين في السيخ واللوري ينقز ونحن ننقز خوفا على لغالغنا من تف السيخ
وراكب جنبنا الخزين ود حسب الرسول
بس قبل ما نصل المشاية المصورة فوق دي الخزين ادق ليك السيخ دق دق دق وقف هنا يا ود شندي وقف قبلك
ففهم ود شندي ان الامر جلل جلجلة جد
ووقف
نتابع
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
Quote: جروح قلبي
عبد الله محمد خير
يوم بابورا قام فرا
وراهو اصبحت في حسرا
من الدبة وانجرا
سريع النهمة فاتا جرا
جروح قلبي الابت تبرا
زولي الشالتو الزهره
وجروح قلبي الابت تبرا
دقائق وتاني قام فرا
وفاتها قشابي بالمـره
العفاض خلاهــو ورا
وهو خاشي قنتي بان شدرا
من منصوركتي قـام وجرا
الكلد مورا امبكول في ضرا
جوارن كورتي جات دافرا
والباسه وأسلي ديك ظاهرا
المقل والريح لقينا ضرا
القرير حيـرنا في الخضرا
تومتي الخاشي وابورا
والزومه منارة الفقرا
على تنقاسي دمعي جرا
وسواقا عصر بها الحجره
مبيتو الليله وين يا ترا
في مروي الوقف غفرا
الفجر قام الأجراس نـقرا
بابورا اتوسطت بحرا
يا ديك كريمه وداك قطرا
واقفين والنهار حرا
في أولى مجهزة القمره
في الكاسنجر دمعي جرا
ودي في ام غربان وصل خبرا
ابحمد الحبيب زارا وعليهو خلايقو تنجارا
تومتي الفراق ما القسمه ترا
انتي اوعك تنسي للعشره
الشريك بربر سريع مرا
وفي عطبره دق صفاره
وركب قطرا طريقو برا
وهيا وسنكات طرق وعره
طويله ممله دي السفرا
وبورسودان حد الرحله
السكون ديم سلبونا برا
وسلام يا ساكن الحاره
تعال اللوصيكي ياجارا
انتي للسر كوني ستارا
مولاي جروحي اطفي نارا
وهي من يوم غابت القمرا
رازق السمكه في بحرا
انتا فوق تومتي الصغير عمرا
وجروح قلب الابت تبرا
زولي الشالتو الزهرا
وجروح قلب الابت تبرا |
على تنقاسي دمعي جرا ...... أخخخخخخخ در
شكيتك على الله يا جلال
.
.
لبعدين في داعي لجدي دي تطير مني القمري
شفت ليك مزارعي برا مرة
.
.
شكرا جاليلو
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
يا زول انا كت ظانك دفعتي...
تاويق جاي هوي..
ها،،ات ماك دفعتي,,,
ات قديم قدمن مخالف,
ولو ما بخاف من داندين قلاع العينين،،،اقول ليك...
ات يا ودالبوش جيت مع نوح في سفينتو...
عجب،،طاقية حمرا،،ورتينة،، وحني علي انا ياتتي...
نحن جيل جد جديد،،معاصر ومواكب...
اذاي الليلة،،ودواي الليلة وحرق بي نار الكماين ديله.
ولبن ابو لي بي..
وياحاجة دقي لينا الكاروشة..
ناس قرااااب,مش ذيك يا دفعة سيدنا نوح..ههه.
| |
|
|
|
|
|
|
|
|
|
Re: حكايات حب قديمة جدا (Re: عبدالعزيز عثمان)
|
دي هدية ليك يا عبدالعزيز عثمان
كدا يا اب ردا ؟
اذاي الليلة،،ودواي الليلة وحرق بي نار الكماين ديله. ههههههههههههه
في سنار انكسر مسمار وصلحو العمال عمال البلد داك احرق الجزلين البابور جاز
| |
|
|
|
|
|
|
|
|
 Re: حكايات حب قديمة جدا (Re: عبدالله ود البوش)
|
سلام جاك يا ود البوش من قبيل بحاول ارد عليك الا البورد التقول شغال ببابور لستر يشتغل ويفصل
كلامك ده بخلي جروح ناس كتار تتفتق بعد ما قالوا برت
عمنا الفاضل حب بت عمو الزهراء وخطبها وادوها ليهو اها قام جاب ليها جزمة بدون ما يسأل من مقاسها
ورسلها ليها البيت ومقلق من حكاية المقاس دي اها قبل ما تنتهي عالم الرياضة كان مرابط قدام دكان برنجي
زولتو جات طالعة العصر ومعاها صاحباتها ولابسة الجزمة الجديدة ومرن بعليهم عمنا ما اتمالك نفسو
وصرخ بصوت عالي " قدرااا ظط " وفى ليلو داك رجعوا ليهو جزمتو وفارقا فراق الطريفي لي جملو
| |
|
|
|
|
|
|
|
|
|
Re: حكايات حب قديمة جدا (Re: سامى عبد المطلب)
|
ههههههههههههههههههههه
شكيت محنك على الله يا سمسم داير تشرقني بضحكة
والله يا سامي اسامي جماعتكم ديل براها حكاية بس اللسم بس يحكي حكاية طويلة عريضة
.
.
سامي مرورك يضيف لبوستاتي نكهة ويديها طراوة وحلاوة وهلم جرا ههههههههه
.
.
ياخي الليلة منبر بكري دا كرهني الدقيق في ابارا
لستر شنو دا الليلة التقول مولعنو بنار هبلا ههههههههههه
والله يا الرايقة سلمى الشيخ سلامة باقي الحكاية كلها كبيتا كبة عيش في مطمورة شووووووووو
وقال كدي منبر بكري ادور ادور ادور زي الشيمة طارت راحت
واسع الله استر على المداخلة دي زي ما قال الراعي الراحن غنو
سيد السعية قاليهو وين ودرت الغنم يا دلاهة ؟
قاليهو كان حمدت الله على ديل ما شوية هههههههه
بالمناسبة يا سلمى الزول المعاي في السيخ الاسمو بلولة ود علوبة معجب بيك ايما اعجاب
وقال والله اجيب بت اكان اسميها سلمى الشيخ سلامة والله زي ما اقوليك
لكن النصيحة والان هو جد ما اظن عندو بت اسما سلمى
المداخلة دي كان سلمت من ود اب تشة بحكي ليك باقي الحكاية يا سلمى
شكرا جزيلا مع تحياتي
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
| Quote: كمل لينا الحكاية بعد دق السيخ للسواق الحصل شنو ؟ |
شكرا الزميلة سلمى الشيخ سلامة مرورك اسعدني
.
.
أها اتا يا الخزين اللوري ما اقيف سمح تلب تتلب خلاص امش امش يا ود شندي بعد اجي الحلة بديك حق المشوار
وتحرك اللوري وكل الركاب انظارهم متجهة على الخزين ماشي ليهو ورا بنات نازلت من الكنار شايلات قروانات موية فوق رؤسهن
وعجاج اللوري غطى ذاك المنظر العجيب ومافي طريقة علا ارجع الخزين ود حسب الرسول ويحكي ما حصل
.
.
درق بي يا اللوري دردق بي
نواصل بعد ارجع الخزين
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
سلام ود البوش
سنة يا انا ، في مرة من المرات اياهم يا ود الوبش كانت عندنا مناسبة وطبعا المناسبات بيئة خصبة للحباكانات ، الجماعة عينهم على واحدة بعينها
لمو واحد لما ليك فيها مطرفة وقال ليها ( سنة يا أنا ) وتعال شوف البت طقت الكواريك ، واهلنا الكبار جو جارين ونحن براحة انسحبنا من الفريق ويا البحر جوك ناس ، والجماعة هينا يفتشوا ، قريب العصر جينا لقينا الدينا مقلوبة
عندنا خالة لمن عرفت انو مشينا البحر قالت شاغلو ساكت احسن من تغرقو لينا
| |
|
|
|
|
|
|
|
|
|
Re: حكايات حب قديمة جدا (Re: حسين ديقول)
|
| Quote: واحد لما ليك فيها مطرفة وقال ليها ( سنة يا أنا ) |
انفرد بيها وقاليها سنة يا انا
وضربت الكواريك
.
.
وسف وقارن ثم تأمل البراءة
.
.
حسين ديقول يا صديق
مرورك الكريم دائما يسعدني
تحياتي وايضا كذلك اشواقي واحترامي الذي تعلم
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
ورجع الخزين ود حسب الرسول
.
.
الحكاية شنو يا الخزين
الحكاية ؟ الحكاية عجيبة
كدي احكيها من اللول والتبادي
لمن كنا راكبين في السيخ يا البلولة ومن بعيد اشوف ليك تلاتة بنات في حيف الكنار
واحدة رفعت الصفيحة للتانية ولمن انقلت بيها صدرا رفس القدامها لمن ترترت بعيد وكفلا دردق الوراها مع قومتا زي المهرة
وجدعت يدها وطلعت الكنار ونزلت ودل دل دل في سيخ اللوري وتلب تلبت وباريتن بالطوالة لمن دخلت بيتم
السلام عليكم
ادوني موية انشرب عطشان
ونفس البت الشفتها ونفس الموية الجابتها من الكنار
كرررر كتحت كوز الموية اكتح وابحلق
يا بت ابوك في ؟
قاعد شن بدوربو
بدور اعرسك
اجي يا اخواني وخجلت وتوارت وطلع اب شنب
ارح علي الديوان يا جنا
أها خير
يا عمي بدور بتك الجابت الموية اسع دي من الكنار
كدي قول بسم الله ورينا اتا منو واهلك من وين
وبعد كداين من كداين قاليهو جيب اهلك
وانا اسع كلمت اهلي ويوم السوق الجاي ماشين معاي
.
.
تلاتة يوم والسيرة سارت بنفس الكنار وعلى نفس اللوري المكتوب عليه الوسيم وسواقو ود شندي
وكانا اسعد زوجين وملو البيت بنينا وبناتا
وكلما امر على هذا الكنار تمر معه هذه الحكاية العجيبة
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
Quote: اموت رُكُن،
ومعاها ضربة سدُر.. |
Quote: حنيِّ علي انا
يا تتي، |
ود البوش سلامات ...
بالله ود المدير و منعم وحسين ديقول ديل قول ليهم أفرزو ...
حسي الجاب اموت ركن و يا تتي و سنه يا أنا ... للهوستن و أب قوته والجداده الرقطا ... شنو ؟؟؟
| Quote: عندنا خالة لمن عرفت انو مشينا البحر قالت شاغلو ساكت احسن من تغرقو لينا |
اها يا ديقول كان عندى صاحبي ما بعرف يعوم ...
لما نمشي البحر يقعد بعيد في القيفه ...
نحاول نحنسو ... بس يجي طرف القيفه انشالله يشطف كرعينو ...
يقول لي اصلو ... انا يا قبه بسمع كلام امي ...
اقول ليهو اها يا ود امك .. امك قالت شنو ؟
يقولي لي بس اجي مارق من البيت ترفع يدينها و توصيني ...
وتقول : السَكَر ولا البحر يا ولدي ...
وقد كان ( بارا ) متحركا بأمه ...
| |
|
|
|
|
|
|
|
|
Re: حكايات حب قديمة جدا (Re: يحي قباني)
|
حبيبنا اللطيف الفنجري يحي قباني
سلام واحترام
كنت متوقع منك حكاية من النوع البدقش زولتو بالعجلة رجفة ووجلا واقوليها ثانيكو بدل سوري
لكن برضو مرورك الخفيف اسعدني جدا
.
.
| Quote: وقد كان ( بارا ) متحركا بأمه |
ههههههههههههههه
البار بامه جنتو مضمونة ومبرشة
.
.
شكرا يا حبيب
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
Quote: ها يا ديقول كان عندى صاحبي ما بعرف يعوم ...
لما نمشي البحر يقعد بعيد في القيفه ...
نحاول نحنسو ... بس يجي طرف القيفه انشالله يشطف كرعينو ...
يقول لي اصلو ... انا يا قبه بسمع كلام امي ...
اقول ليهو اها يا ود امك .. امك قالت شنو ؟
يقولي لي بس اجي مارق من البيت ترفع يدينها و توصيني ...
وتقول : السَكَر ولا البحر يا ولدي ...
وقد كان ( بارا ) متحركا بأمه ... |
نحن يا قباني كانو خايفين علينا
من الغرق خصوصا اننا كنا ضيوف ، كنا مجنصصين وعاملين فيها ولا مدن تفاتيح ، في المناسبة ديك
عندنا خال ألف ليه غنية غايتو كان نزلت ليكم كلماتها هنا بوستكم دا ما برجى الصبح
| |
|
|
|
|
|
|
|
|
|
Re: حكايات حب قديمة جدا (Re: أحمد الشايقي)
|
مولانا أحمد الشايقي شخصيا
الطاعم مرورك دا والله
شكرا لرفع المعنويات بقناية
تحياتي واشتياقي
.
.
وخليك متابع الحكاية الجاية
حكاية حب عبدالفضيل اللطرش والتاية بت اللدر
| |
|
|
|
|
|
|
|
|
|
Re: حكايات حب قديمة جدا (Re: حسين ديقول)
|
| Quote: عندنا خال ألف ليه غنية غايتو كان نزلت ليكم كلماتها هنا بوستكم دا ما برجى الصبح |
أعقل أعقل يا التوم اعقل
.
.
.
بشيلا منك صرة وخيت بعد الاقيك يا حسين
| |
|
|
|
|
|
|
|
|
|
Re: حكايات حب قديمة جدا (Re: محمد مجيدو)
|
سلام حبيبنا ود البوش فاكهة المنبر
عندنا عما لينا كان صعب شديد ومن النوع الصارم مع الحريم
كان عنده مقولة بتضحكني كتير لما يتكلم عن واحد من ابناء جيله
ويكون ذلك الشخص زريته كلها او اغلبها بنات ......يقول لك
الزول ده كان بحب المرة 
| |
|
|
|
|
|
|
|
|
|
Re: حكايات حب قديمة جدا (Re: محمد مجيدو)
|
| Quote: وبمشي معاها الكنيسه مع اهلها . |
يا سلام يا مجيدو
دا ما اياهو تسامح الاديان البتكلموا عنو العلماء اتا طبقتو في سن مبكرة
| Quote: اييييه .. كانت لنا ايام ... |
كانت ايام يا وطني زي الاحلام يا وطني
ودا واحد من اهداف البوست عشان الشباب اعرفوا كيف كان حب اجدادهم القدماء
.
.
شكرا سعادتك مجيدو
مع عاطر التحايا والاحترام
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
حبيبنا ود البوش يا اقدم من بوش سلام عليك ياخي بوستك ده شدة ما قديم لامن عجاجتو كندكتنا عديييييييل ,, ياخ انت من زمن اللوري الكشف والله انت اقدم من فيضان 46 ذاتو ،،
كدي غايتو النشارك معاك بالقصيدة الحلوة دي لعمي المرحوم الشاعر المجيد ( احمد محمد الشيخ الجاغريو ) وقد كتبها عندما سرق منه منديل مطرز مهدى اليه من احدى الحسان في مناسبة في بري المحس فانشد هذه القصيدة الجميلة وهي اكيد من زمن الحب الطاهر ومن زمنك البتحكي عنو ده ...
تحياتي : ياسر العيلفون
منديلي ضاع منـــــــــــــي
كلمات والحان : أحمد محمد الشيخ الجاغريو
منديلي ضاع منــــــــــــــي والشالو ما يتنـــــــــي
مايشيل خلافـــــــــــه
يا أبو فركة ابوي وآلــــــي في حمو اللهيب أصلي
مايشيل خلافـــــــــــه
ياودحسونــــه الحـــــــــــار يا صاحب الــــــدردار
حبر ديري في البـــــــــدار أخلوه من الــــــــــــدار
مايشيل خلافـــــــــــه
ودريا الرابعـــــــــــــــــــــه يا أب فيضاً نابعـــــــا
سل روحه تابعـــــــــــــــــه يشيلوه الأربعــــــــــه
مايشيل خلافـــــــــــه
يارجال أب حــــــــــــــــراز مافيكم إنفــــــــــــراز
هيا اطلعوا البـــــــــــــــراز خلوه يمشــــــــي راز
مايشيل خلافــــــــــه
يالعركيين ســــــــــــــــــوا أبلو وشيلو الــــــــدوا
يشرب من غــــــــــير روا طيرو بيهو في الهــوا
مايشيل خلافــــــــــــه
ود عيسي الفي المسيــــد زروق الماك كسيـــــد
منديلي ما تقلـــــــــــــــيد الشالو شل لي الإيـــد
مايشيل خلافــــــــــــه
حامد أب عصاةً سيـــــف هيا للمنديل أقيـــــــــف
الشاله يصبح ضيــــــــف في الشبر الما نضيــف
مايشيل خلافـــــــــــــه
يارجال أم مرحـــــــــــــي قولو للرخا أفرحــــــي
ماتسهي وتسرحــــــــــي الشاله يمحــــــــــــــي
مايشيل خلافــــــــــــــه
ياالشيخ ود أم مريـــــوم خليه اليعيش مسقـــوم
منديلي مامسيــــــــــــوم يبقي له آخر يـــــــــوم
مايشيل خلافــــــــــــــه
يابرير والنقــــــــــــــــــر الشاله لي ما قـــــــــــر
يضوق سم الدقـــــــــــــر وأبوه يكون عقــــــــــــر
مايشيل خلافـــــــــــــــه
دي هديه جات تهـــــوش فينا وتسوي البــــوش
الشاله راســــــــه يدوش والبومه تحرس الحوش
مايشيل خلافـــــــــــــــه
ياأهل الله بيهو همــــــــو ومن مكه إتلمـــــــــــوا
القشه بيه فمــــــــــــــــه تحرق حشا أمــــــــــــه
مايشيل خلافــــــــــــــــه
صليت علي الرســـــــول عد مافي الكون محصول
الشاله غير إصـــــــــول من البشر مفصـــــــــــول
مايشيل خلافـــــــــــــــه
| |
|
|
|
|
|
|
|
|
|
Re: حكايات حب قديمة جدا (Re: عبدالله ود البوش)
|
تشكر كتييييييييييييير يا حبيببنا ود البوش فعمنا الشاعر المجيد الجاغريو رجل ذو شاعرية فذة ويظهر ذلك في قصائده التي ما زالت يتناولها المطربون حتى يومنا هذا وكمان لما اهلنا يحكو ليك عنو ويقولو ليك القصيده دي الجاغريو قالها هنا في برندتكم دي تقيف مساااافة وتتامل البرنده وتقول (( الايام توالت والجاغريو حليلو يااا سمح الريد عتاني )) ولكل قصيده قصة يعرفها اهلي تماما الله يرحمو كان رجل مثقف وشفيف ..
واصل ومن غير فواصل في كلامك السمح ده يا ود البوش ..
تحياتي : ياسر العيلفون
| |
|
|
|
|
|
|
| |
عبدالله ود البوش
الامين موسى البشاري
معاوية المدير
علي محمد الفكي
عبدالمنعم الطيب حسن
عبدالعزيز عثمان
سامى عبد المطلب
حسين ديقول
يحي قباني
أحمد الشايقي
محمد مجيدو
حمزه بابكر الكوبي
ياسر السر
فيس بوك
تويتر
انستقرام
يوتيوب
بنتيريست