|
|
 ما تبكي عشان أنت سوداني #
|
#
عليك الله ما تبكي عشان أنت سوداني
ما بلد مفروشه بالبكيات
فلان عيان وفلان داك مات
فلان سجنوه فى شيكات
وداك همل عيالو وفات
صبر كم جابه السنوات
ضرائب وكهرباء وحاجات
جمارك. وجوطه اجراءات .
عوائد .. وجوقة ايصالات
وزولك اصلو غلبو ثبات
شرد وهمل وراهو بنـــــات
بلد حاكماها شلليات
ومسئول بس بتاع ناسات
عمارتو البقت ...ناطحات
وعرباتو الهناك سمحـــات
واموالو البقت شيكات
وناس دايشه وبقت اموات
اسر خامها بالميات ؟؟
واسر عايشاها بالركشات
دوام غرقانه سلفيات
صبح شعب البلد طبقــات
ناس ماناس وناس راحات
وناس بالخاص وناس بصات
وناس لاب توب وناس الات
وناس هاجمين وناس باكات
وناس بتعشو حلويات
وناس طوالى بس فتــــات
ورغم تراكم العبرات
وصوتنا البحه فى النبــرات
واهاتنا البقت صيحات
بتسرحو فينا بالفارغــات
وتدفعو انتو مليارات
تحسنو بيها فى الحـــركات
وتشترو بيها فى الســـادات
وراكبين ديمه طيارات
بدل ســــــفريه دولارات
فنادق راقيــه نثريــــات
وفود راحت وفود ماجات
هدوم وجضوم وكنجـــالات
ونقه مع الفضائيات
وشعب اسير صبح يقتــات
على المغصه الابت تنفات
وعاشت بينا بالســنوات
بلد مليانه بالاهات
نفاق وشقاق وارهــــاصات
وخوف استوطن الحارات
ومسئولين ضميرهم مات
يتمو الصفقه كومشنات
ويعملو فيها ناس صلـــوات
حكومه خوف واعدامات
سجون ودموع ودفعيـــات
اقول ليكم بالجد!!!!!
خلاص والله وصلنــا الحــد
متين يد الغبش تتمد؟؟؟؟
وجدران الخـــــــداع ينهد
وبرضوما تبكي عشان أنت سوداني #
|
|
  
|
|
|
|
زهير عثمان حمد
فيس بوك
تويتر
انستقرام
يوتيوب
بنتيريست