|
|
|
 Re: أنا راسم في قلبي صورة الباسم (Re: عبدالحفيظ ابوسن)
|
/الحداد ليس في ما نرتديه بل في ما نراه . إنّه يكمن في نظرتنا
للأشياء . بإمكان عيون قلبنا أن تكون في حداد... ولا أحد يدري بذلك”
الأحلام التي تبقى أحلاما لا تؤلمنا، نحن لا نحزن على شيء تمنيناه ولم يحدث، الألم العميق هو على ما حدث مرة واحدة وما كنا ندري انه لن يتكرر”
احلام مستغانمي
الاسود يليق بك
| |
 
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
هذا بوستا عن الحب
يمتلكني الآن
يــــــا قلب
يا قلب أنا كنت قايلك تبت من تعب السفر
ومن مخاواة القماري ومن شراب موية المطر
تاريك كامن ليا بشيتا كتر
تاريك لابد ليا بشيتا كتر
ما زمان أنا وإنت لفينا المواني
بالقطارات والمطارات والسفن
ودقينا أجراس الجديد
وعدنا ترتيب المعاني
الليلة راجع لي تبقبق
بتنتل الآهة وترقرق
زي تقول يا داب عرفت الاندهاش
يا قليب مالك عليا
ما إنت عارف نقطة الضعف القديمة
وزيي ضايق الإرتعاش
يا قليب ياما سرحنا
مرة جينا وألف رحنا
ومرة شاي عصرية في طرف الغمامة
ومرة دوبيت للمحنة
ومرة منديل مسقي حنة
ومرة حاجاتا أجن
وإنحناءات للحمامة
جاي تسألني الدبارة
يا قليب ما فيش دبارة
لا المراكب قادرة تكسح في النزيف
ولا نحن شايفين الفنارة
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
الحب ده امرو عجيب
عجيب جد جد
زي حالاتنا
عرسنا وجبنا البت والولد
ووصلنا مرحلة الاستقرار البقولوهو
عرس عشان تستقر
وتقوم تعرس وتستقر
وهو نحن بعد ده دايرين شنو ? ماعندنا غير اولادنا ,,, نربيهم كويس ونعلمهم كويس ونبقيهم ناس
تشتري ليهم الهدوم وسروالك انقد ولا خصاك ,,, ما مستقر نان
دقنك تحلقها يوم وتفطها كم يوم ,, وتمرق بأي حاجة
آي ما ماك مستقر ,, وماعندك شغلة في النسوان ,, والنسوان ديل مرتك زاتا فهي جزء من كل رغم خصوصيتها العاديه
اها
فجعة كدة
بق.....
تبق
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
وام عيالك زاتا تساهم في تثبيت فهم الاستقرار داخلك
يا راجل ما بتخجل ! بتك بقت فتاة وانت لسة مباري لي حركات الجهلا السوغار ديل
مع التذكير
نفس البت البقت فتاة دي , بتكم الاتنين
ولكنها ما بتقبل نفس التعليق منك انت زاتو ,, وجنها وجن زول يقول ليها بتك بقت فتاة
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
ولأنك زول مستقر
وعيالك هم الاهم
فأم عيالك تقشر قشرة طيري ,, وتتبخبخ بالريحة ,, وتمرق حفلة عرس الجيران ,, وانت يا المستقر تحرس العيال ,, ولازمن تكون صاحي لامن تجي راجعة
نان كيف تنوم ومرتك برة البيت
انت زول ما مستقر ولا شنو ?
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
يضوعُ بنفسجُ الرؤيا وتخضرُّ النجيمات
بكلّ أناقة الدنيا ،
تمدّك بالظلالِ الزرقِ بالنغمِ الذى يهتزّ فى الريح
بدندنة الأراجيح
بساعاتٍ يظلّ الشعر يلهث فى مراكِضها ويطويها
ويسكب روحَه فيها
ويحلب قلبَه المطعونَ فوق دروبِها العطشى ليرويها
***
وأهتف أيها المنثال كالأمطارِ أين زمان تلقانا
بساح الجمرِ نحرق فى سبيلك سوسنات العمر
نصرع ، ثم تأبان
لعلك يا عذاب الليل كننت تزورنا كرهاً
وترحل قبل أن تأتى
ونحن نمزّق الأعصاب ، نسمع دمدمات الوحى
خلف ستائر الصمتِ
ونرقب ساحة الميلاد ، برق خلاصنا
المرصود بين الآه والآه
تفرع أيها المنقاد وجهك فى دروب الأمس
كان الآمر الناهى
أنا المحروم من دنياك لما غامت الرؤيا
ولفّتنى المتاهاتُ
سقيت الناس من قلبى ، حصاد العمر ،
ذوب عروقى الولهى .. باكواب من النورِ
أقبل كل من ألقى على الطرقات ،
من فرحى وألثم أعين الدورِ
ده كلام سند
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
وانت في غمرة استقرارك وعادية كون إنك كائن بيتي ,,تتماهي طربا لأغنية تدغدغ الاحساس وتنطرب حد الرقص بهبالة وشفتنة قدام ذات بنتك البقت فتاة ليك ,, ولي امها لسة هي بت متين
تراها نارك ما ماتت وجذوة الشوق القديم متقدة داخلك
ويا ابو الشيخ مطاردة العريب النجعو
ما بتبقالي زي القدموني ورجعو
تراهو تحت رمادك في نار مولعة وملهلبة وجمرا تهبو الريح
نفس الريح الزمان
وتظمأ ذاتك
ياعصيرا من رحيق الدهشة الاولي
والحب طاقة الوجود
ووقود الاستمرار بسعادة
ولكن كنت محاصرا بإستقرارك ,, كأنما الاستقرار يعني موت الدواخل
قال من قال
السكون موت
وكل حركة معاها بركة
وقلبك ينتفض كعصفور بلله القطر
علا مسجون وقيدك فيك
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
ود أب سن سلااام
بوست رائع وغريييييييق
"بريدك من ولد نامَن نقرني الشيب
وبشوف.....يا خزنة بشير أبو جيب
الضايق الحاضر ما بحمل جرورة الغيب
والضايق الحُمُر كتل أم تنيق لي عيب"
الجرورة هي الدين ، والحُمر واحدة حمرة وهي غزال جميلة بلحيل
وأم تنيق ايضا غزال ولكنها لم تكن بجمال الحمرة او الحمارية.....!
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
سـ تتعلمين كيف تتخلين كل مرة عن شيء منك ..
كيف تتركين كل مرة أحداً .. أو مبدأ .. أو حلماً .. !
نحن نأتي الحياة كـ من ينقل أثاثه و أشياءه ..
محملين بـ المباديء .. مثقلين بـ الأحلام ..
محوطين بـ الأهل و الأصدقاء ..
ثم كلما تقدم بنا السفر ..
فقدنا شيئاً .. و تركنا خلفنا أحداً ..
لـ يبقى لنا في النهاية ما نعتقده الأهم .. !
و الذي أصبح كذلك .. لـ أنه تسلق سلم الأهميات ..
بعدما فقدنا ما كان منه أهم .. !!
احلام
الاسود
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
الكلام ده ما بيطلع الا مع الاجواء الماطره ، كوستي كيف مع الخريف
قاليوه واقف هنا مالك
قال انا ما سرقت بس جيت اعاين
ان كتر عليك الحنين اضرب الهم بالفرح او بمضرب البنغ علي الكور المدوره
عسي ولعل
قالوا ضرب الحبيب احلي من الزبيب
زي ده
لك الود الذي تعلم يا حبيب.
| |
|
|
|
|
|
|
|
|
Re: أنا راسم في قلبي صورة الباسم (Re: ياسر منصور عثمان)
|
حباب العبيد
وحباب حضورك الباذخ ومرابيعك الاصيلة
ريدة الجهل دي تب ما بتروح ,, وتتاورك كل ما قلبك رف , ويؤرقك سؤال
ماذا لو كان ولو ?
البنوت البتدفعن زي العراجين ووجوهن يضون زي الرتاين ما بنسن الزول طعم العشق الاولاني ,, ويفضل معاك لامن تشيب زي زولك ده
قدر ما تقول جرحك بري تلاقيهو ينغز فيك لامن ينوسر
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
الحب ده امرو عجيب
عجيب جد جد
زي حالاتنا
عرسنا وجبنا البت والولد
ووصلنا مرحلة الاستقرار البقولوهو
عرس عشان تستقر
وتقوم تعرس وتستقر
وهو نحن بعد ده دايرين شنو ? ماعندنا غير اولادنا ,,, نربيهم كويس ونعلمهم كويس ونبقيهم ناس
تشتري ليهم الهدوم وسروالك انقد ولا خصاك ,,, ما مستقر نان
دقنك تحلقها يوم وتفطها كم يوم ,, وتمرق بأي حاجة
آي ما ماك مستقر ,, وماعندك شغلة في النسوان ,, والنسوان ديل مرتك زاتا فهي جزء من كل رغم خصوصيتها العاديه
اها
فجعة كدة
بق.....
تبق
------------------------------------------------------
كلام جميل
ربنا يسعد أيامك
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
يا صاحب البوست ... يا ابن كوستي الحبيبة مدفن (سرتي) ومهد طفولتي
هاك القصيدة كاملة فهي فريدة في أسلوبها عما عرف عن الشاعر سيد عبد العزيز
ربما كتبها مجاراة للونية زنقار الغنائية لهم الإنحناءة ولزمان ال tolerance and Sudanese broadmindedness
اكتب النص هناكلمات سيد عبد العزيز لحن وغناء زنقار كتبت في عام 1936
أنا راسم ....
في قلبي صورة الباسم
أهو ده ....
****
أنا قاسم في عمري ليك أقاسم
أيام لقاك ياباسم
سويتها تاني مواسم ... أعِّيدا
****
أنا هائم ... بيك يالفِريّد ونايم
تتنى إن جيت قايم
في المشية راسي وعايم
كدا .... وكدا
****
هل عالم ... إني بيك متآلم
ياخالي قلبك سالم
وحالي طرفك حالم
في غريدا
****
ياظالم ... إن فت مابتكالم
وإن عدت مابتسالم
بالله سيب دي مظالم ... تأيدا
****
أنا زاعم ... في الكون مثيلك عادم
لذيذ لهيجك طاعم
رشيق قوامك ناعم
غصن الندى
****
يالحاتم ... بالبسمة تضوي العاتم
ثناكا برق القاتم
وفاكا دارة خاتم
قدر ...كدا
| |
|
|
|
|
|
|
|
|
|
Re: أنا راسم في قلبي صورة الباسم (Re: ست البنات)
|
اللهم أرحم فقيدة المنبر
نادية عثمان
وأغفر لها وتجاوز
لا أعرفها ولا اتابع الاعلام السوداني الحكومي والزاحف والمتسلق منذ سنوات
ولكن فقدها كان حدثا مؤثرا بدءا من بيتي وحزن زوجتي ولم تعرفها إلا اعلاميا وتحدثت عنها حديثا طيبا محبا
وهاهم اعضاء المنتدي تكتسي كتابتهم غلالة من الحزن والحب
اعتذر عن الردود الآن وأعد بالمواصلة وذلك مواساة لهم وتذكيرا لذاتي انني سأرحل يوما عنكم ,فلأصن لساني عن عرض الآخرين وعن اساءتهم وما الحياة إلا ذكري
فليذكرني الناس إني تجاوزت عمن يسئ لي و يتعرض
اللهم ارحم
نادية عثمان مختار
ونقها من الخطايا كما ينقي الثوب الابيض من الدنس , وألهم ابنتها الصبر والسلوان وعوضها خيرا عن فقدها
ولا حولا ولا قوة إلا بالله
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
ياااا مجيدو
يا دفعة
وقال الغناي
والطير يرقص مذبوحا من الألم
وللحب ألم عذب وكاروشا داخل ثنايا القلب ,, وقلق وإنتظار
واجمل قصص الغرام تلك التي لم تصل غاياتها الجسدية والروحية
فلو تزوج قيسا وليلي لأصبحا ضمن من تزوجوا وولدوا ثم ماتوا , ولن يتذكر احد غير جيرانهم ان الزوج قيس مجنونا بزوجته ليلي ,, كما لن يتذكر احدا غير جيرتي ان الزوج عبدالحفيظ يحب زوجته وهم بها متيما معنا بحبها ( هاك التكلة دي
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
حبابك ياسر
يا دفعة
جنك بطنك ياخ
البطنة تنيم اتقاد العاطفة والجوع يرق الشعور ويجعلك كالنسيم
مرة واحد اخويا لنا , العيال حموهو النوم
واي انا من فلانه
واموت انا في علانه
ضربو العشا وجلدوا النوم
ولع النور وصحاهم ليك
قوموا تنومو السهر حميتونا النوم
قومو دايرين تحبو وتنومو
والله ما تنوم
وحبسهم ليك
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
مرحبا راشد
وحبابك
واعجز عن شكرك لإيرادك النص كاملا لتلك الاغنية الجميلة لحنا وكلماتا
اول مرة سمعتها بصوت البلال والموصلي وكابلي ضمن شريط به مجموعة من الاغاني , وانا صغيرا يافعا ,, وكبرت وكبرت احزانا وبحثت عن ذلك الاداء الجماعي بعد سطوة النت ولم اجده
زنقار كنت اسمعه من اسطوانات الوالد رحمه الله ومن جهاز اسمه البك اب اظنه , وحاولت سماعها بصوت زنقار ولكن رداءة التسجيل بالاذاعة في حقيبة الفن لم يكن واضحا
حقيقي اشكرك جدا
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
من حرم قلبه عن الحب فقد حرم خيرا كثيرا , فالحب ينظف شرايين القلب من تكلسات الغضب وترسبات معركة الحياة , وينضف الشوف , الشوف العديل فتنظر الحياة وترغب في الاستزاده منها , وتعيش يومك سعيد وتتمني ان تصحو غدا لتعب من رحيقها
وتنضف الاضان وتجعلك تستمتع حد السرحان في كلمات سمعتها سابقا ولم تبلغ سوي طبلة اذنك ولم يؤذن لها بالولوج داخل تلافيف الذاكرة ومداعبة الاحلام
فالحب يا ولدي
حاجه سمحه خلاس
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
مرحبا عبدالله
حبابك يا صاحب
لعل المطر هو آله خصوبتنا وشبقنا ,, تقد البذرة فيه الواطة الصلبة خارجة لتمنحنا الحياة ,, وترتوي الارض فتروينا وتروي ماشيتنا فتتكاثر ,, وولادة الخريف ناجحة وولادة الصيف باطلة ومابتنجح
وينتظر الشباب الخريف ليغرسوا زرعهم ويتزوجون بثمنه حبيباتهم
صدقت شعراء الحقيبة والمسادير تتحدث عن الخريف بعشق فنحن قوم رعاة زراع ,, نرجي المسور ,, فالمسور استقرار ,, البوادي قشها بقوم وبنصد من نجعتنا لي طرف الحلة
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
قلبي المن اشوفو للبنات هواي
اها عاد لكن ما جنس كمان ,, الحب في حالتنا ,, حالة الناس المستقرين ,, بعتر لينا زي الضقل وبوردلب تجي واقع علي خشيمك ,, يا تفيت شلوفتك وكسرت سنونك ,, ولا نطيت لا غادي ووقعت كسرت ليك مخروقة ولا بلية
المعني بقع فينا بب , وحق العجايز ليهو ركايز , والعجايز دي استلافا من المدام ,, فهي لاتمل بتحسيسك بي كبرك وكبر عيالك بين قوسين كبرك و عيالك والكاف كاف التملك الذكوري وهي للنقد والسخرية !
اها انت يا العشا بي لبن تكتشف فجعة كده انك ما كبير
ووووووب علي مرتك ووووووبين عليك
من اكتشاف انك لم تزل مرغوبا ولم تبر تجارتك في سوق العوين
ولا قول
سوق الفتوات
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
اها الحب البتلب عليك ده بعد استقرارك بكون ظاااااااهر
وفيهو ريحة بتنشم ,, عطر نفاذ
فتكتشف انك مهمل ساي وتاكيلين بيك الباب , وانك بتساسق يوماتي لامن توقد روحك الوثابة انطفأ ,, تساسق مابين الشغل والبيت , ومابين النقطة ألف وباء تكمن كل حياتك الخاصة والتي صارت عامة بفعل الاستقرار , تساسق مابين اللحمة والخضار ,, والتوم والشمار , وناس الموية والكهربا وانبوبة الغاز ,, والماسورة والحنفية ,, واقلام الرصاص والجلادات والكراسات ,, وبيوت البكا وعقود الزواج ,, تلهث جيئة وذهابا ,, يفرح الناس وتتعب بفرحهم ,, عرس ود عمك ,, عرس قريبك ,,, قريب مرتك ,, تساسق مابين توب للعرس وهدوم للعيال شان العرس ,, ومشاركة العريس
وتنسي نفسك
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
الزواج السوداني مؤسسة تقليدية عصية علي رياح التغيير , رغم عصرية وثقافة منتسيبها
العلاقة الزوجية في جوهرها تخضع لذات القيم القديمة , ولأن نظرة المجتمع نحو المرأة كثقافة شعبية لم تتغير , فتظل نظرة المرأة نحو ذاتها مقللة لنفسها وإن رفعت شعارات التمرد وتملكتها ثقافة الحرية والمساواة , فهي تمارس إذلال نفسها إنسانيا دون أن تحس بذلك قصاد علاقتها بالرجل
وكما أقول دوما
عزوبية سعيدة أفضل من زواج تعيس
فالزواج ليس هو هدف حياة المرأة الأوحد رغما عن أهميته لإرواء مشاعر العاطفة والأمومة وسيادة المنزل
وعلي الضد تماما تتاح للرجل فرصته الكاملة في ممارسة ما يعد
الراجل محللات ليهو اربعة
ولا يجد الناس في انفسهم حرجا ان يقولوا للمتزوج
عقبالك
وذلك حين يبارك زواج احدهم
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
أها المرة من تقبض راجلها بتقصقص جناحينو ,, وموصينها
اعملي حسابك
ووصية معاها قصص , قصة فلانة الما عارفه راجلها معرس فيها ووالد إلا بعد مات ,, ولا ما عارفاهو إلا لقت ورشته في جيبو حقت مرة تانية ,, ولا بتاع التاكسي الود الخضار المفروض يمشي للبيت التاني
قصص ,, قصص ,,, وحكاوي
وده غير العرس صاحبتها الروح ما بتروح ,, ولا هي مشت للولاده ولقتو وووووو
كل القصص المرعبة دي تمائم للبنت المليئة بالحياة والاشراق وتداعبها احلام الزواج الرومانسي
تدخل بيت الزوجية وهي خائفة من فرنبة الراجل
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
بعد داك المرأة ذات نفسها محاصرة بثقافة انثوية !
والله راجل قليل ادب ساي , ما شا الله مرتو مالو ,, والله حلات الدنيا عليها ,, مجيهه ,, الدخان كالحنه ما فارقن كرعينهو ,, تشوفا تقول عروس ,, لكن الرجال ديل ما عندهم عشرة
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
وأكان زيدنا الكلام المكرور في اننا لا نعبر عن عواطفنا بشكل واضح وصريح ,,, والراجل البحب مرتو هو راجل مقهور ,, والمرة خاته سرجا من فوق لي ضهرو , بتخلي الراجل يدافع عن سرجو لينف التهمة !
واكان جبتها ما بورقها
والتناقض ما بين رغبتنا وثقافة المجتمع بتقوم الحرب !
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
من الفيس
حباب آمال حسين
اهلان بيك يا خية
هههه آي ينوبنا ثواب ,,في فتيل الريحة البقا بالشي الفلان ده ,, النسوان يرشن في الريحة التقول برشن في موية وتلقا جيب الراجل يسوي واي واي لا لا لا
ههههه
احلام الواقع ما بتعني موت المشاعر العاطفية بل الامتلاء بالعاطفة يجلب السعادة , وقتل روح الرجل العاطفية وأد لروحه , فيتحول لشخصيه نمطية مملة غير مبدعة
ياخي اكتبي ساي
ده بوست عن
الحب
عن
اعادة التوازن لمؤسسة الزواج
وضد
التعددية التي تخصم من الاستقرار الاسري
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
Quote: وانت في غمرة استقرارك وعادية كون إنك كائن بيتي ,,تتماهي طربا لأغنية
تدغدغ الاحساس وتنطرب حد الرقص بهبالة وشفتنة قدام ذات بنتك البقت فتاة ليك ,, ولي امها لسة هي بت متين
تراها نارك ما ماتت وجذوة الشوق القديم متقدة داخلك
ويا ابو الشيخ مطاردة العريب النجعو
ما بتبقالي زي القدموني ورجعو |
صدقوني وفي احدي الايام وذات أصيل ٍ والوقت خريف والوديان مخضرة والجداول جارية
والطيور تغرد وعلي امتداد البصر تري الارض اكتست بحلتها السندسية ......
ارهفت السمع الي الفتاة (ام شوايل ) ومعها صديقتها
تشدوان بهذه الاغنية ومن غنا الجراري ... بصوتٍ جميلٍ حزينٍ كأنّهما قمريتان علي غصنٍ
( ياودعي الكشكشتو
والهدّاي عطشتو
الصيد بايت فتشتو
ومتلك ما دقشتو ...
ما دقشتو اي لم ارَ مثله
واكاد اجزم أنّني سمعتُ دقَّات قلبي وخفقانه يكشكشان مع ودعهما
من جمال صوتهما وحسن سجعهما وهنا تذكرت القصة التي تحكي...
ان احد ولاة المدينة المنورة ،علي قمرها وصاحبها افضل الصلاة والتسليم ، مرِّ بطريقٍ من طرقِ المدينة فاذا جارية تطحن برحاها وتقول:-
وهويته من قبل قطع تمائمي متمايساً مثل القضيب النّاعمِ
وكأنِّ نور البدر سُنّة وجهه ينمي ويصعد في ذؤابة هاشمِ
فدقَّ عليها الباب فخرجت إليه فقال :- ويلك احرّة انت أمْ مملوكة؟ فقالت:- بل مملوكة قال :- فمَنْ هَوَيْت؟
فبكت ثمّ قالت: بحق الله عليك إلاّ انصرفت عنّي. قال: لا أريم ُ أو تعلميني. فقالت:
وانا التي لعب الغرام بقلبها فبكت لحُبِّ محمد بن القاسم
فسار الوالي الرّقيق الي المسجد فبعث الي مولاها فاشتراها منه
وبعث الي محمد بن القاسم بن جعفر بن أبي طالب
وقال هؤلاء فِتَن الرجال....كم مات بهنَ من كريم وعطب عليهنّ من سليم.
ولأني صديق الشاب الشاعر المبدع علي ود ابراهيم ودياب
الذي هام بحب هذه الفتاة وحرم من زواجها غنيت لهما باحدي اغانياته الحزينة قائلا:-
الليل بوبا والجو صقّع
الناس نامو والنجم المدمّس فقّع
حليل زولَنْ مركرك وفي مشي بتفدّع
حليل فاطمة ام كزم قول ليها عاشقك ودّع
واردفت ايضا مجارات إبن عمه المبدع ايضا حسن دياب :
اجمل من صباح العيد
وحلات الدنيا كان شفت العَلامتُو فِصيد
حقّو الناس تريد ناسَنْ بعرفو الرّيد
وزي زولَنْ صغيروني وبشابه الصيد
ثم اكملت ضلع المثلث برائعة اخري ا لحسن دياب :
ديفة الروبزَنْ دخلن كويع الخشّه
اجمل خلقي من صُّلْ الدبيب الوشّه
يا ام نهدَنْ متوقِر لا انكسر لا انفشّه
لي البارح طريتك ودمعي ساساق بشّه
وكانت مداهمتي لهنَ مفاجئة وعلي غرة من امرهنَّ لأنّ اشجار الوادي كانت وارفة وكثيفة
فتوقفن عن الشدوِ وصحن بي قائلات : اللّفندي ماختلتنا وفضحت امرنا ....
ثم تركتهن وعرجت علي مطيتي وذهبت الي شأني وانا اردّد مع الشاعر الاديب الاستاذ ابراهيم الدلال
كَبَّنْ لي الرشايم فوق عقابات صيفو
ونوار سَمْرُو صرَّاهو الدعاش في طِريفُو
الناس الكبار حضروا الزمان بي عريفُو
ماقالولنا لا قاهُنْ جدي بي شنيفو
سلاااااااااام ود أب سن وصباح دعاش النُّوَّار لك وللمتداخلين
| |
|
|
|
|
|
|
|
|
|
Re: أنا راسم في قلبي صورة الباسم (Re: عبيد الطيب)
|
حباب العبيد ود الطيب
ولحديثك عطر
ولسردك طعم الدهشة
ولتداخلك يكسبني سعادة ثم استمتاع فكأني اسمع غناء الصبايا بصوتهن الطفولي وعلي ابواب المراهقة , غناءا رائقا عذبا ,, تحس فيه بعذرية القلب ونقاء العاطفة وتوقدها
ولأهلي بكردفان كما لأهلي بأرض الشايقية غناءا تحس او هكذا احسه انا بتحنانهم ,, وتنسرب كلماتهم كما الضياء داخلي ,, او كرقراق ماء منساب او كصوت امي تحكيني
لغة شفيفة طيعة المعاني
اسعدتني هذا الصباح بحميمة الحكي
شوكران يا صاحب
يا ليتك تعلم
لقد اضفت نكهة لقهوة صباحي السوداء
وغيرت مزاجي
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
أب سن صباحك عافية
أحد الأصدقاء من القضارف يقول ما معناه: يفقد الزواج معناه بعد أسبوع واحد فقط، فتصبح حياتك بعد ذلك واجب ومسئولية وإرهاق
ويقول: والله المرا بعد تجيك وتقفل الباب، شايلالها فتيل صغير كدي
لامن تديهو خجة كدي
والله تقول دايرة تديك حقنة
تحياتي مثنى وثلاث ورباع
| |
|
|
|
|
|
|
|
|
|
Re: أنا راسم في قلبي صورة الباسم (Re: عبدالحفيظ ابوسن)
|
لحن الحياة منك
ماتقول نسيت الناس وصرنا ناسينك
محبوبي الجميل
زخات المطر الصباحيه بللت فرشي وأنا أتمدد كتائه في صحرا وحدي , يمتد الحوش إلي ما لانهائيه هكذا أراه , تكاسلت في قيامي وأنا أموت شوقا لمداعابتك ومكايداتي
كنت أتكاسل في ذات الظروف لأحسك وأنت توقيظينى غاضبه : جنك نوم هسه المطره دي ما صحتك
لم أكن أنوم بقربك إلا لأحسب أنفاسك وأتأمل وجهك الغارق في السكينه ,
في هذا الصباح الماطر كنت أفتقدك , أفتقد طعم شاي الصباح ونحن جلوس في فناء حوشنا نرتشف بعضنا
في هذا الصباح الماطر وأنا مبلول كفرخ طائر ماتت أمه أفتقدك
| |
|
|
|
|
|
|
| |
عبدالحفيظ ابوسن
زهير عثمان حمد
عبيد الطيب
محمد هاشم ابوزيد
محمد مجيدو
ياسر منصور عثمان
أمير محمد ادريس
محمد يوسف طه
راشد سيد أحمد الشيخ
ست البنات
بدرالدين بابكر مصطفى
فيس بوك
تويتر
انستقرام
يوتيوب
بنتيريست