طبعا أنا زول مسكون عديل كدا ومرة مرة عندي هلاويس بتجيني ما عارف دا مرض نفسي ولا حاجة طبيعة عندنا كلنا مع فارق التوقيت والعمر وكدا قاعد في البيت مع المغرب بسمع بمزاج في أغنية مصرية قديمة بتقول
القلب يعشق كل جميل
وياما شفتي يا عيني جمال
واللي صادق في الحب قليل
وأن دام يدوم يوم ولا يومين
جعرت جعره زي يوم ماتت أمي وهاك يا بكا وماخاخيت وكمان معها رجفة كدا دي جديدة طبعا زمان كانت مافي أظنها ظهرت مع تقدم العمر وكدا أنتو عارفين لما الواحد يتقدم بيهو العمر ويكون أعزب فعلا بخاف من موت الكأبة ويموت وحيد زي الجربان والوحدة هي بالجد قاتلة لا مره ثقيله دم ووزن تحرق دمك وتعمل معك مشاكل ولا أولاد كمان تشغل نفسك بيهم وضاع العمر شمار في مرقه المهم بكيت علي روحي قلت يا ود أصلو ما في زول ح يبكي عليك زي ما ح تبكي أنت روحك الجميلة دي بكا ساي كان هو وكمان معهو سرد بطولات ومناقب وذكريات بس عملت روحي روح قطب من الاقطاب الجاهلية روح عظيمة زي تموت وما زول يحرر البكا
لابد من صناعة تاريخ يليق بالروح دي ماروح أبو الزهراء كانت بتاعت بهجة وهجيج كدا وبتحب الجمال والسكر والشيه شية الجمر يا ناس بالله لما تزور القبر حقي ما تنسوا تعمل شوية شية جمر بس تشروا للحمة فوق القبر وكمان بعض من الراح دي حاجاتي اللي بحبها وأصلوا ما تبكوا بعد الفاتحة كدا تقولوا كم نكته علي الطاير وأنتو ماشين تشغلوا في مسجل العربية أغنية قبنلة سماحة الزول في الطول العلا بصوت بصوت طه سليمان بالعدم بصوت أيمان لندن والزيارة حقت قبري تكون كل خميس وأول شهر مع زيارة دائمة في عيد الشكر وراس السنة
ولازم الجكس من العربيه برأ يهتف (أنت في قلوبنا يا ملك الشواكيش ) أحي انا أكون في حالة عذاب أبدي بالجكس الفنان وجميلات المدنية وحسناوات الامريكتين وبعض عواصم أوربا من بنات بلدي دي وصية أبو الزهراء لا صحابي كان مت
لكين أنشاالله لا أموت ولا أفوت أقعد كدا شجرة موية وعمري يكون زي مجاري البحور أنشالله يسمع من خشمك باب السماء يا ولد يا أبو الزهراء
*ما عارف غايتو حالتي بقت كيف جنس هلاويس دا حالاتو معقول شوية
ابو الزوز يا حبيب ياخى اكمل نص دينك و عرس عشان تلقى زول يشهدك لو يوم شقاك عرقى .. اصلو عرقى الزمن ده مغشوش .. شئ صفق نيم و شئ حجارة بطارية .. انت مالك ؟ المانعك العرس شنو ؟ لو سبب مادى مقدور عليهو .. و لو سبب نفسى تاكل نيم .. يا اخى بعد سنة سنتين زاتك بتقطع و ما تلم ليك فى شافع يشيل اسمك .. خلى الهلس و العربدة و استغفر ربك خلى الشية تكون من ايد حبيبتك بدل يكبوها فى قبرك .. و هو البضيع فيك ربع كيلو لحمة منو ؟
11-10-2013, 10:58 AM
محمود بكر محمود بكر
تاريخ التسجيل: 10-25-2005
مجموع المشاركات: 763
ابو الزهراء سلام الله عليك ياخي امسك في كلام التكينة ده قوي وخليك من الهلاويس وابو الكباس مالك المانعك من الزواج شنو المافي شنو بعدين ياخي هو في لحمة عشان يشتتوها في قبر انت مكبر الموضوع ساي عاين حولك تجد بنت الحلال وبالفاتحة مش حلال
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
انور التكينة
فيس بوك
تويتر
انستقرام
يوتيوب
بنتيريست