|
|
 Re: مقطع فيديو من برنامج مُنِع من البث في السودان .. (Re: خالد فهمي)
|
فتحت الشوق على وعدك.. طلع باب الوصال قافل
اذا ما كنت ليك مريود ف ليه دايما معاي نافر..؟!
مكتف بحبال الخوف.. وصدك ليا هو الحاضر
فيا وطن المرض.. والجوع.. شنو الراجينا يوم باكر؟
نحبك.. نتكتب اوغاد.. وحالنا تحنن الكافر
تعال احكيلك الفينا اذا ما كنت ماك خابر
شبابك بكرهك جدا.. منو الما حلمو ما يهاجر؟
قدر ما نزرع الاحلام نقاسي المرة ونكابر
بنحصد في الختام ألام.. وينزف جرحك الغاير
تموت في دربك الالم.. يظل موج الدموع دافر
فيا وطن البقاء للخوف.. صبح ورد الحنين ذابل
بس فضلت حلاوة الروح تعظم مجدك الغابر
بانك كنت يوم قيمة.. و حال كاس الوجع داير
بحبك فطرة دون اسباب.. وظلمك لى متواصل
بتسكن في شغاف الروح وديمة علي متحامل
وعارف انو ما بيدك اعيش من غير عشم باكر
و لكن قلت بس اهديك مرارة الواقع الحاصل
بالامس القريب جدا سقط اخر قناع منك
كشف لي قبحك الظاهر
ومعليش يا وطن جدا اذا كلماتي اتعدن..
فاحسن فاصل... ونواصل.............
نعود من فترة الفاصل الي واقع المرار اليوم
جنون متفشي في الخرطوم.. و لكل المدن واصل
وصل سعر الخروف مليون.. وقف شعر الفقير حائر
نجيب من وين..؟
وبعض العلماء اتلموا وحللوا للضحية الدين
اها وبعدين...؟
منو البسند وراك ضهرك اذا انقسم الوطن نصين
نص مغلوب على امرو.. و نص مشلول بدون كرعين
نعيش بالدين.. شراب بالدين.. علاج بالدين
على ضد كل تصاويرنا بتهدأ حرب... تقوم حربين
فيا وطن البقاء للهم.. حنفضل في الوجع لمتين؟
ونحنا على حراق روحنا على قل الفهم عايشين
فكيف اقدر اريدك و بس و كل الجاي منك شين
فما تزعل اذا ما ابنك المكلوم زهج من طعم ها الحنضل
من التعذيب.. من التغييب.. من اشياء ما اظن تذكر
شبابك من قساوة الحال بيسكر... او... بيتسطل
بيعيش في عالم التوهان يشوف لون الدماء اخضر
اظن يا وطني وريتك.. وعارف كلمتي بتوصل
تقد طبلة اضان الليل وكت رفض النهار يوصل
كرهت الذل...
مرقت على شوارع الخوف.. لقيت فيها الاماني شٌتر
فحيح و زحيح افاعي كلاب عيونا حمر
بتكتل في وطن... وتاريهو ربنا وحده البستر
اذا ما متا ورينا... عشان ما ساي نظل نصبر
فيا وطن الحقيقة بقيت مهازل ماشة تتبختر
فيا وطني العزيز جدا اخير تستوعب البحصل
دي اخر فرصة ليك عندي عشان ما قلبي لو قبل
محال تلقاني يوم جنبك.. ولا اظن في حشاي تذكر
فيا وطني العزيز جدا ..
فيا وطني العزيز
احسن تحصل....
شعبك الفضّل
| |
  
|
|
|
|
خالد فهمي
فيس بوك
تويتر
انستقرام
يوتيوب
بنتيريست