|
|
|
 Re: هل سيرقص تانى بعد دى??? (Re: محمد حمزة الحسين)
|
"يا زكريا جوزيف من خلا عادتو قلت سعادتو
لو خليتو شد المريسة والعرقى البشير بخلى رقصتو
إنها رقصة لا نحبها الا في هكذا مواضع
البي يخلي ركعة سلفا كير تقليد نعتزو بيهو وربرجة البشير رقصة شنوووو يهووون الله !!!"
مريسة تانية???
يا ابن الناس, المريسة دى ما ثقافة جنوبية, بل اخذها البعض من يتعاطونها من الشمال. و حتى عادة السكر ليست شائعة فى الجنوب كما يتخيل لبعضكم.
هسى سمعت باسرة جنوبية فى السعودية ظبطت و هى تصنع العرقى? فضائح اللا بتنشرها الصحف السعودية و الخليجية عن جرائم عندها علاقة بالخمور و المخدرات و الدعارة حصل سمعت بجنوبى متورط فيها.
انتو فقط نتخيلو عوجة رقبة زول تانى???
نحن بنتكلم عن البشير الرقاص و جاى تقول مريسة???
لا رقص و لا شراب حرام فى معتقداتنا, اتو بعضكم بخمج فيها لييه و بتطاولوا على الغير لييه?
| |
 
|
|
|
|
|
|
|
|
Re: هل سيرقص تانى بعد دى??? (Re: Zakaria Joseph)
|
محمد حمزة،
للمرة الالف اها انا القدامك ده نشات في اقصي الشمال في دنقلا في مجتمع كان بشد المريسة و"الدكاي" معا، عادي!
في "البيشان" كانو عادي بقدمو المريسة حتي للاطفال، واذكر الي اليوم الاصول الكانت متبعة في تصفية المريسة والادوات المستخدمة ومجري "القرعة" في تناول المريسة!
وبعد ده كلو يظل ذاك المجتمع اطهر انقي اجمل ومترع روحانية علي مستوي الفرد العادي من مجتمع اليوم الرسالي الخالي من المريسة، بفضل طريقة تفكير امثالك من مستلبة الاعراب.
اذن بطل تريقة علي اسلوب حياة الناس، بالذات ان هذا كان حياة اجدادك انفسم في الشمال!
الدكاي عادي كان بتشدا في كل بيت، وافضل وكت لتناولو كان يوم الجمعة قبل الصلاة!
| |
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
العزيز زكريا ....تحاياي
الناس ديل ....الشيطان قام من كرسيهو ....و صفق ليهم
عادي جدا يرقصوا فوق اشلاء الشهداء دون ان ترمش لهم عين
و بعدين ألخص الفكره كلها كالاتي
عرقي دعاره مريسه قتل سرقه فساد كذب مغلف بجامع كبير
| |
|
|
|
|
|
|
|
|
|
Re: هل سيرقص تانى بعد دى??? (Re: الصادق اسماعيل)
|
| Quote: للمرة الالف اها انا القدامك ده نشات في اقصي الشمال في دنقلا في مجتمع كان بشد المريسة و"الدكاي" |
اخونا الزمان كمال ، اخبارك يا راجل
وتحية لصاحب البوست
تقصد الدكاي ، لكن المريسة والتي هي تعادل الدكاي ما في في الشمال / يعني الدكاي من البلح الموجود في البلد
لكن عناصر ومكونات المريسة أو طريقة شدها غير موجودة في الشمال لو قلت شد العرقي ده موجود بكثرة ، ربما تقصد الشربوت وهي من فصيلة الدكاي غير مُسكر لوجود عشب الحرجل الذي يفسد او يقلل من مفعول الكحول ، ودائما بيكون في عيد الضحية للقدرة الفائقة على هضم اللحوم المشبعة بالدهون ، ده طبعا استنتاج كيري ، يعني ما علمي
لكن لو فكرت في إنو كنا بنلقى الترمس والبلح في طبق والمعادلة ما بين السكر وما ضد السكر حتلقى مسألة الشربوت برضو نظرية صحيحة
سلام للأسرة
| |
|
|
|
|
|
|
|
|
|
Re: هل سيرقص تانى بعد دى??? (Re: ترهاقا)
|
اخوي محمد حمزة،خلينا نفرق معاك شوية،وبعد التحية والاحترام..
قريتنا من حواضر الجزيرة، بل وصنفتها جمعية تطوير الريف السوداني كالقرية النموزج،وهي من اكثر قري الجزيرة انتاجا، ومنذ ستينات القرن الماضي عرفت حملة الدكتوراه،واطباء مشهورين وخرجت الجامعات منذ ازمان بعيدة مئات ومئات الفاعلين والازهريين، ثم انه عرف عنها بانها قرية خالية من المشاكل والبغضاء والخلاف الي عهد قريب,
تعرف اخوي محمد،كل من سافر بطريق الاسفلت في الزمان القديم ،يعرف اشهر جو في تلك الفجاج،يربض فوق القرية،ويتغشاه الناس بعد انغضاء عملهم،ويشربون عدلهم من المريسة،حتي اذا عصرت الواطا،دق الشتم،وضرب خالي الباهي قرنه كانه واحد من فرقة انشاد نبي الله داوؤد،وارتفع غناء خالي بخيت وجدي حمد ،هي المريسة الجابوك لي اشرب واقش ايديا،وزغردة يدي بينما كان خالي الباهي قد اطرب حتي الطيور ،وامتلا الجو بالحبور،كان والدي لا يشرب المريسه اذ كان متصوفا،ولكن اغلب اصدقائه وزملائه في الاذكار كانو يشربون،وكانو اجوادا كراما ،طيبين واهل حل وربط، اهل حاره،وعرض،وفضيلة،ولم يعرفوا ابدا ابدا شرا ولا اذي ولا تبطل،ولم يقصر ابدا ايما احد منهم في تربية الابناء وتعليمهم،،وكان الجو،الانداية هو الحاضر مركز حياتهم ،يتغشاهم نائب المامور او م الشرطة بالمركز ياخذ عدلا ومرحا ويمشي،كنت اتساءل لماذا لا ينبسط ابي معهم،وفي اخر ايامهم،يحجون ولا يذهبون الانادي الا للانس.
ما اعجب له،ويقرني علي ذلك الكثيرين،ان الوقت الذي كانت فيه المريسة اولوية في حياتنا،كانت الاخلاق والمكارم في القمة والناس طيبون،وهانحن الان نجلد من يشرب المريسة،وهدمنا اندايتنا ،وكثر الوعاظ،لكن انهزم كل شي جميل في حياة الناس.
اخلص لان المعيار في صلاح الحياة العامة ليس مرهونا بشرب كاس خمر،وانما مجموعة قيم متبعة.
هذا مع ضرورة التسليم،بان امر الله فيها،انها رجس واجب اجتنابه،واستغفر ربي العظيم.
| |
|
|
|
|
|
|
|
|
|
Re: هل سيرقص تانى بعد دى??? (Re: عبدالعزيز عثمان)
|
Quote: ما اعجب له،ويقرني علي ذلك الكثيرين،ان الوقت الذي كانت فيه المريسة اولوية في حياتنا،كانت الاخلاق والمكارم في القمة والناس طيبون،وهانحن الان نجلد من يشرب المريسة،وهدمنا اندايتنا ،وكثر الوعاظ،لكن انهزم كل شي جميل في حياة الناس.
اخلص لان المعيار في صلاح الحياة العامة ليس مرهونا بشرب كاس خمر،وانما مجموعة قيم متبعة.
هذا مع ضرورة التسليم،بان امر الله فيها،انها رجس واجب اجتنابه،واستغفر ربي العظيم. |
الاخ عبد العزيز عثمان
لك التحية ، وإشادة بهذا الفهم العالي ، السودان بحير طالما في ناس بيفكروا ويفتكروا زيك
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
| Quote: اخلص لان المعيار في صلاح الحياة العامة ليس مرهونا بشرب كاس خمر،وانما مجموعة قيم متبعة. |
عبدالعزيز وينك يافردة؟
من ديك اوعيك؟
نعم ياصديقي، والله ثم تالله الواحد عاش طفولة في مجتمع المريسة الدكاي، الدلوكة في ضي القميرة، نواح السواقي، شقشقة العصافير ساعة المغيب، واصوات الابقار مختلطة باصوات الماعز والضان والحمير، مع الخضرة الممتدة علي طول البصر ومنظرالنيل الخالد بالضفتين رقراق مع نسيم يدوخ عند العصير او قبل المغيب!
ياالهي!
اما الحياة الاجتماعية فبيوت الاسرة اشبه بحي صغير متراص ومتلاصق في بعضو الناس بتتشارك في كل شي والوجبات العادية اشبه بي فطور رمضان الجماعي من حيث العدد من فرط الالفة المحبة المحنة البين الناس!
لاذلت اذكر كيف لوكنت طفل مابخلوك تمشي بي كرعيك خالص!
اليوم كلو بتبادلو شيلك في الصفحة!
كنت مهووس بي حب الساقية او صوتا الحنين جدا، واستمتع بي ركوب الساقية او ال"هوليق"!
حياة اشبه بحياة اهل الجنة حقيقة!
يالهي!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
Quote: اما العبوة فكانت بالقرعة!
والمدهش هي قرعة واحدة لكل الحضور تمشي في شكل دائرة، من دون فرز مابين كبير وصغير!
|
أها جليت تاني يا كمال، القرعة دي زاتها كانت قرعة دكاي ، اتفق معاك إنو ما كان في فرق بين صغير وكبير ، وكان دكاي وإلا مريسة مصير تناولهم القرعة نفسها ، بس إنت لا هذا ولا ذاك يعني بالمختصر المفيد معرفتك بالثقافة دي دايرة شوية تمحيص، شوية مزاكرة
تحياتي يا كمال
| |
|
|
|
|
|
|
|
|
|
Re: هل سيرقص تانى بعد دى??? (Re: ترهاقا)
|
| Quote: دي دايرة شوية تمحيص، شوية مزاكرة |
قرقرقر!
ترهاقا،
القرعة اوقدح "الدبكر" كانو اكتر انائين بيستخدمو في كل شئ تقريبا!
لا اذكر استخدام لادوات معدنية الا في نطاق محدود!
اها شفت حماية البيئة كانت طبيعية كيف؟
الاواني معظما من النباتات!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
ما خلاص ياكمال اخوي وقعت واشتتت.
ذاك السودان الاليف الحنين،قرعت قارعته،واصابته اللعنات..احفظ كل تفاصيل الزمان القديم، حين كانت الحياة ضاربة الجذور،والناس اكثر عمقا وسموا،كانو عظاما، في كل شئ،وكانت الحياة اكثر دفئا،واقل بؤسا،اعراسها،واتراحها،هزلها وجدها.
ثم جاء هؤلاء وقرروا اقامة المشروع الحضاري،والدولة الرسالية.
وهاهي امامكم،ونحن نقلب فوق جمر الحنين ،يستعد احدنا ان يقائض كل كسبه،بفسحة من الحياة في الزمان القديم،ملئا بالاشواق،تحرسه ارواح الاسلاف الخيرة،وتمائمهم التي ضيعناها لياكلنا المغول.تحياتي للجميع وللاخ ترهاقا.
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
Quote:
القرعة اوقدح "الدبكر" كانو اكتر انائين بيستخدمو في كل شئ تقريبا!
لا اذكر استخدام لادوات معدنية الا في نطاق محدود!
اها شفت حماية البيئة كانت طبيعية كيف؟
الاواني معظما من النباتات! |
وهكذا كان حالنا يا اخ كمال ، السرطان لم يكن يعرف لنا طريقا ، ولكن عندما ذهبنا للسرطان في عقر داره رحب بنا ايما نرحيب
| |
|
|
|
|
|
|
|
|
|
Re: هل سيرقص تانى بعد دى??? (Re: ترهاقا)
|
المشكلة هنا ليس هي جهل هذا العنصري بالثقافات السودانية فقط، ولكن المشكلة الأساسية هي في تعنصره وفي تنميطه لأهل الجنوب بمثل هذه الطريقة العنصرية ال######ـــــــــــــــــــــــــــــــــــــــــــــــــــــــة.
ده كوز لا أخلاق له، ويدعي في تدين زائفن وحايم في هذاالمنبر يدافع على المجرمين الذين قتلو شباب الثورة الذين لا يحملون أسلحة.
| |
|
|
|
|
|
|
|
|
|
Re: هل سيرقص تانى بعد دى??? (Re: Deng)
|
| Quote: ولكن المشكلة الأساسية هي في تعنصره وفي تنميطه لأهل الجنوب بمثل هذه الطريقة العنصرية |
دينق ياصديق،
انها افة البشوفو روحم، اهلهم، وثقافتم بعيون الغزاة، كالعثيمين، القرضاوي، بن باز، وماشابه!
الطريف ان هؤلاء ورغم انف الكراهية لابناء السوداء، فقط لانهم سود، هم اول من يعترف كيف السوداني خريج مجتمعات المريسة والدكاي، يمتاز علي الاخرين وبالذات الاعراب، بدماثة الاخلاق، وهذا حقيقة بتحتاج لي وقفة!
بقرا اطراء العرب لي شخصية السوداني في حتات الواحد لايتوقع يلاقي فيها عرب!
من ذلك مواقع الاغاني السودانية!
او في الاغاني الاناشيد السودانية علي اليوتوب!
قطعا هذا غريب!
كثير ما اجد عرب يطربون وينتشون للاناشيد والاغاني الوطنية السودانية، بل احدهم قال بالحرف "تمنيت ان اكون سوداني لوماكنت سعودي". النشيد المعني هو اغنية:
سوداني الجوا وجداني بريدو.
خلاصة الامر، هم وياللغرابة ورغم انف الاستعلاء والتافف العنصري يتطلعون الي نموذج شخصية السوداني خريج مجتمعات الانداية، المريسة والدكاي، كمثال يحتذي من حيث دماثة الخلق!
في نفس الوكت ناسنا، مدفوعين بي كراهية الذات، بيدلقو ده كلو ويدو البحر، عشان يقيفو صف، لهثا خلف الموجود في ايادي ذات العرب المتطلعين الي ما بين ايدي ناسنا!
نعم الدويلة الحالية والنظام الحالي اصدق تجسيد لهذا الParadox حقيقة!
جرذان الاسلام السياسي العربي الوافد حاولو مسخ شخصية السوداني باستبدالها بشخصية الاعرابي!
ولكن هاهي مناعة جسد ثقافتنا الطبيعية، تقاوم بشراسة!
نعم من بعد السهر والحمي اللتي نجمت عن المقاومة، ها نحن نتمكن اخيرا من طرد هذه الجرثومة من جسد ثقافتنا، وحتما ستعود العافية لهذا الجسد المنهك!
عندها سنعتز كغيرنا، باصلنا، ثقافتنا، وهويتنا كقوم سود، او ده كلو، كلو، حينتهي!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
| Quote: يا ترهاقا القرعه كانت للمريسه والصفايه مصنوعه من زعف الدوم وتمسك باليد الشمال وتضرب باليد اليمنى من فوق لتتم التصفيه والباقي مشك انت ما سمعته خمسه مسكنها وخمسه ضربنها ودماعها سبقنها كان في بيوت الاعراس تسمع وشوشة المريسه كان لها صوت يصدر من داخل الغرفه المخزنه فيها ليوم العرس وهذا طبعا صوت الزريعه والكنقار ده مفعول التخمير لكن اختلف مع بشاشا في انو ماكانت مبزوله للصغار والكبار انما كان يخص بها الكبا |
العزيز مكاوي فضل مرحب بيك،
يبدو لي اهنا المحس زي الفردة ترهاقا ما كانو بلحليل علي المريسة زينا في دنقلا!
واضح انو ترهاقا مع انو اتربي هناك في "البلد" ماعاصر التجربة دي. بالنسبة لي موضوع كبار وصغار، انا اذكر في بوش من البيشان، قرطعتا مريسة وانا طفل!
ما كنت براي وانما كورجة من اعمار مختلفة.
اما الدكاي تحديدا فكان كما الشربات واحد تماما!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
| Quote: وهكذا كان حالنا يا اخ كمال ، السرطان لم يكن يعرف لنا طريقا ، ولكن عندما ذهبنا للسرطان في عقر داره رحب بنا ايما نرحيب |
ترهاقا يافردة،
سرطان شنو حمانا الله، والناس كانت عادي بتعمر لما فوق ال100 سنة!
جدي عليه الرحمة ناهز ال107 واختو ال110، ومعظم جيلم عاش لمافوق ال100 سنة!
جدي لحدي مارحل من الفانية لم يعاني من امراض الا من شوية امساك!
والعجيب كان مصر لما يجي الخرطوم، يودو الدكتور ويصر يسمع من الدكتور انو عيان، او هو ماعندو التكتح ماشاء امون!
ربما شاف الحاجة الهو محروم منها اي الدكتور كتقليعة او كده!
عشان كده اخوك يبدو شاب لحدي الان، قرقرقر!
في العالم القديم اجدادنا اشتهرو من بين كل شعوب العالم بطول العمر!
المجد لمجتمع المرايس!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
| Quote: يا ترهاقا القرعه كانت للمريسه والصفايه مصنوعه من زعف الدوم وتمسك باليد الشمال وتضرب باليد اليمنى من فوق لتتم التصفيه والباقي مشك انت ما سمعته خمسه مسكنها وخمسه ضربنها ودماعها سبقنها كان في بيوت الاعراس تسمع وشوشة المريسه كان لها صوت يصدر من داخل الغرفه المخزنه فيها ليوم العرس وهذا طبعا صوت الزريعه والكنقار ده مفعول التخمير لكن اختلف مع بشاشا في انو ماكانت مبزوله للصغار والكبار انما كان يخص بها الكبا |
هذه الوصفة تماثل وصفة غرب السودان ما عدا الصفاية تصنع من الدمورية
_____________
يا جوزيف الموضوع طلع من ايدك خلاص عن رقيص ذاك الرقاص و بقي عن المريسة
| |
|
|
|
|
|
|
|
|
|
Re: هل سيرقص تانى بعد دى??? (Re: Mahjob Abdalla)
|
رجاءا، ورجاء خاص، للزملاء والقراء :
يحكو لينا عن المريسة في مجتمعاتم المحلية، من حيث التقاليد المتبعة في الصناعة، والخدمة اي طريقة تقديم المريسة.
اعلم في بعض نواحي السودان المريسة كانت هي الغذاء الاساسي للسكان وشكرا.
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
| Quote: يا بشاشا المريسه كانت حاضره اكثر في الزواجات او البيشان كما يحلو لاهلنا تسميتها وكان العرس تايات واهم عناصر التايه التيس وجر المريسه طبعا بدلعوها بزير المريسه علي ما اعتقد الناس ما كانت فاكره المريسه حرام عشان كده العرس المافيهو تايه كان كأنو ما عرس ناقص |
العزيز مكاوي،
انا نسيت "التايات" لاني ماعندي ليها مخزون في الذاكرة يذكر.
مهم جدا الناس تنتبه كيف شراب المريسة في المناسبات ماكان دافعو السكر كما يتبادر الي الذهن ولكن هذا طقس قديم جدا من طقوس المناسبة، حتي الان ماعندي المعلومة المطلوبة عن طبيعة هذا الطقس، ولكن الشراب بصفة عامة في ثقافتنا وتاريخيا، كان ممارسة روحية!
من هذا اخذ المصطلح المعروف ب"المشروبات الروحية" المتداول في الغرب.
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
شكرا بشاشا و التحية لضيوفك و عاشت مريسة.
الحقيقة هذا الشخص يعانى من مشكلة او عقدة ما مع اى شئ جنوبى و اصبح يتخيل اشياء كثيرة منتشرة حوله و يكبها فى الجنوبى. المريسة دى يشربها بعض كبار السن فى بعض المناسبات و من الصعب ان تجد شابا مخمورا فى المجتمعات الجنوبية التقليدية على الاطلاق. العرقى دى جديد على الجنوبين. فقط تمعنوا فى المظهر العام للجنوبين, متوسط الطول مترين تقريبا, دى ناس بتتطعم بالكحول????
قبل الحرب الاهلية الاخيرة, كنا عندنا ثقافة صحيحة فى الاكل. الوجبة الاساسية الالبان و مصنفاتها و العصيدة و الفواكهة و الاسماك. و من النادر اكل اللحوم. الجنوبيون من اكثر الشعوب المحافظة فى افريقيا. مخدرات و الكحول و الجرائم الاخلاقية كالسرقة و الدعارة كانت دخيلة علينا. صحيح ان الحروب و النزوح ادت الى امتهان بعض امهاتنا مهنة صنع الخمور البلدية من اجل اطعام اطفالهن.
و من اغرب الاشياء ان مصنع البيرة فى جوبا لم تتوقف لحظة فى مد الشمال بحصتها من البيرة الساقطة حتى عندما ساءت الامور بين الجنوب و الشمال.
| |
|
|
|
|
|
|
|
|
|
Re: هل سيرقص تانى بعد دى??? (Re: Zakaria Joseph)
|
| Quote: زكريا جوزيف فتح موضوع الرقيص .... من المداخلة الأولى إتحول الكلام للمريسة. |
محمد ابو الريش تحياتي،
نعم تحول الموضوع للمريسة، لانو في واحد اخونا في الخيط ده، واقع شتيمة وتحقير لي روحو من دون مايعلم، اوهو متخيل روحو بيشتم في واحد تاني اجنبي غريب، اسمو ذكريا يوسف!
واذا بنا نثبت لي اخونا محمد حمزة، كيف المريسة هي بعض ارث اجداده هو، الحضاري، مما يؤكد علاقة الدم البينو او بين شقيقو ذكريا!
هذا هو الدرس والخلاصة هنا!
نعم وكنتيجة مباشرة لفقدان الهوية، اي الوعي بذاتنا الثقافية، هي البتجعل واحد زي ذكريا اجنبي في عيون واحد زي محمد حمزة، وهذه خلاصة وذبدة الحرب الاهلية العبثية المدورة من تصف قرن في بلدنا!
اها انشاء الله وقع ليك موضوع المريسة ده جايي من وين، وبالتالي اخوك ماشي بيهو وين؟
شلوم!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
| Quote: اها انشاء الله وقع ليك موضوع المريسة ده جايي من وين، وبالتالي اخوك ماشي بيهو وين؟ |
بشاشا سلام ....
تعليقي ما كان رد على مداخلاتك تحديداً ..... لكن على تحويل موضوع البوست عموماً.
برضو ما كان إحتجاج على تناول موضوع المريسة كإرث ثقافي واجتماعي، وهو أمر لا ينكره إلاّ أمثال محمد حمزة الذين يطيب لهم أن يصدقوا أن السودان دولة عربية عرقياً. رغم إنو إدعاء العروبة لا يجب أن يبعد من يظن عروبته عن أمر المريسة، فقد عرفها العرب منذ قديم الزمان ..... ولا أظن الخمر التي ذكرت في القرآن كانت تأتي لعرب الجزيرة العربية من ملكال أو الجنينة أو دنقلا.
| |
|
|
|
|
|
|
|
|
|
Re: هل سيرقص تانى بعد دى??? (Re: Zakaria Joseph)
|
Quote: عصام طه · جامعة القران الكريم والعلوم الاسلاميه
محمد حمزة الحسين اول شي انت من وين في السودان كلمه مريسه هل هي كلمه جنوبيه ام عربيه هي لسيت عربيه ولا جنوبيه لكنها كلمه سودانيه مثلها مثل كثير من الكلمات المتداوله في السودان ويحسبها البعض بالعربيه هي نوبيه الاصل ومشتقه من كلمتين مري اسي يعني ماء الزرة ما يعني طلما اسمها نوبي فهي فمنشأها شمال السودان .
رد · · 7 أكتوبر، الساعة 10:03 مساءً
|
التحية للقارئ عصام طه من FB
اها انا لقطا كلامو ده من هنا:
السودان هو مركز دائرة الوجود
ماتعرف ليه المساهمة القيمة دي مشت هناك؟
اذن مريسة من:
ماري نسي باللغة الكوشية لهجة دنقلا!
اها شفتا مصيبتك يا محمد حمزة بقت مصايب كيف؟
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
نرجع لي كلام محمد حمزة علي ضوء ما تم اكتشافه حتي الان بخصوص المريسة والمفردة نوبية دنقلاوية علي التعتر لي محمد حمزة:
| Quote: يا زكريا جوزيف من خلا عادتو قلت سعادتو |
اها يا محمد حمزة، الخلا عادتو هنا منو؟
انتا ولا ذكريا؟
جاوب!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
يا بشاشا اضيف فى الشمالية الى الدكاى والعرقى والمربسة النبيذ كانوا بيدفونه لمدة 7 يوم تاخذ ليك واحد قطاع من النبيذ اقوى من العرقى وهذا كان حاصل فى الشمالية . زمان الامام فى الشمالية يوم الجمعة يجغم ليه كم قطاع ويطلع المنبر فى الخطبة فى صلاة الجمعة .
وعموما يا بشاشا زمان الما كان يشرب فى الشمالية بقولوا عليه ماراجل ؟؟؟؟
| |
|
|
|
|
|
|
|
|
|
Re: هل سيرقص تانى بعد دى??? (Re: احمد حمودى)
|
احمد حمودي تحياتي،
نعم في حاجة بدفنوها 7 يوم لا اذكرا الان. يبدو لي ال"كلموود"! ولكن بذكر "الزرّيعة" كويس جدا!
اللي هو غسل العيش او شرو لحدي ما تظهر الجذور، او بعد داك طحنو بذات الطريقة الكانت ممارسة منذ عصر الاهرامات، المعروف اليوم ب"المحراكة".
وذلك بان تسجي السيدة علي الركبتين وهي ممسكة بقطعة تعرك بيها العيش بي صورة متواصلة علي قطعة اخري مستطيلة الشكل من نوع محدد من الصخور، وهذه "المحراكة" فيما يبدو لي موجودة الي الان في جبال النوبة!
الكثير جدا من جوانب الحياة اليومية العشتها في دنقلا، باستمرار بتلاقيني في بطون الكتب والصور المنحوتة علي جدران المعابد والاهرامات في مصر والسودان!
ياليتني كنت حينها اعلم، ما عرفتا الان!
ياريت!
ياريت!
نعم ياريت حينها في دنقلا كنت اعرف ان تلك الحياة اللتي عشتها وانا طفل، كانت ومضة وبرق خاطف، من عصر الاهرامات!
ياريت!
كتر من تعبتا، قال ليهو لو سمحتا يا ترباس!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
Quote: Taj M Ibrahim · الاهلية الخيرية
ماهي علاقة مملكة مريس النوبية والمريسة؟ كلمة مريسة ايضا تستخدم في تشاد عند أهلنا الوداي سياد الراي |
العزيز تاج محمد ابراهيم سلامات.
المريسة والمفردة معربة من "مرسي" تنطق "ميرسي" باللغة الكوشية لهجة دنقلا.
لاحظ اللغة العربية لاتصلح لكتابة اونطق اللغة الكوشية. الياء الاخيرة في "ميرسي" تنطق A اي Mersay!
الملاحظ المستعلواتي محمد حمزة قام فاكي البيرق!
الزمن ده كلو هو بعير ويشتم اهلنا في الجنوب انطلاقا من تصور مسبق ان الMersay اي المريسة خاصة باهلنا في الجنوب، حصرا!
| |
|
|
|
|
|
|
|
|
|
Re: هل سيرقص تانى بعد دى??? (Re: Bashasha)
|
Zakaria Joseph
كيف حالك. علك طَيِب
خلينا نبدأ مِن أول السطر وفي صفحة جديدة ياخ.. والله أنا عاوِز أفهم.. والله والله والله ما دايِر أكاوي أو أغالِط أو أي فهم سلبي ألْبسني لهُ الأغيار..
ما علينا.. لو بتصدِق كلامي ده أنا دايِر أسألك، إنت كجنوبي:
(1) ليه مُهْتم بِمشاكِل السودان؟ (السودان السِياسي-الخارِطة-الإنْفِصال)
(2) الفِكرة شنو تكون عضْوِيتك في منبر سوداني ناشِطة؟ (سوداني بِمعناها السِياسي)
(3) الأولى بِالنسبة ليك السودان أم دولة جنوب السودان؟
يا Zakaria Joseph أنا ما بكذِب، أنا فعلاً مُحْتار، ولغاية يوم الليلة دي، ومع عدم توصُلي لإجابات للأسئلة أعلاه، رجعت الأمر لِلمُكاواه، ياريت تكون عْندك إجابات واضِحة وقاطِعة ومُحددة، بِدون ما تسوق أسألتي إلى أي منحى آخر.
شُكْرًا
| |
|
|
|
|
|
|
| |
Zakaria Joseph
محمد حمزة الحسين
Bashasha
waleed nayel
الصادق اسماعيل
ترهاقا
عبدالعزيز عثمان
Deng
Mahjob Abdalla
محمد أبوالعزائم أبوالريش
احمد حمودى
عزام حسن فرح
فيس بوك
تويتر
انستقرام
يوتيوب
بنتيريست