|
|
 لكن يا بابا (السودانيين) بحتفلوا بالعيد الوطني!؟
|
وطن ما ليك فيو وطن .. مجرد واطة .. لمة ناس!
(حميد - السما التامني وطشيش)
يصادف غداً الاثنين 23 سبتمبر 2013م اليوم الوطني للمملكة العربية السعودية ..
الشوارع كلها، والعربات اكتست باللون الاخضر .. ورفرفت الرايات بكلمة التوحيد .. عالياً
واستقام السيف تحتها .. او قول استلقى مرتاح البال .. المافي شنو!؟
في الاشارة الاولى فوتت فرصة ان اشتري علم او برنيطة كاو بوي خدراء (اي والله!)، سرحت بعييد في وطن مافي ..
حتى لو كان قرع كوزة ومجوبك .. مافي .. مجرد ذات متشظية .. منتمية ولا منتمية وموزعة بين تلاتة دول مسجلة رسمياً في الامم المتحدة.
المهم يا سيد الامانتي ليك في الاشارة البعدها (غررت) اشتري عدد تلاتة كابات وتلاتة رايات .. على قدر الجماعة .. جماعة واحد .. اتنين .. تلاتاااااااااا
فادي احبطني ليك جداً ..
لكن يا بابا، (السودانيين) بحتفلوا بالعيد الوطني!؟
قد يتبع (حسب النفسيات!)
|
|
  
|
|
|
|
|
|
|
 Re: لكن يا بابا (السودانيين) بحتفلوا بالعيد الوطني!؟ (Re: فتح الرحمن حمودي)
|
جِدة ونص وخمسة!!
- لكن يا بابا، (السودانيين) بحتفلوا باليوم الوطني!؟
- المافي شنو!؟
السودانيين لو المملكة آوتهم لمن جارت عليهم العصبة الباغية. ..
ؤ لو اكرمتهم لمن اذلتهم الطغمة الحاكمة
ؤلو وفرت ليهم حياة كريمة .. ما اتوفرت ليهم في ارضهم
ولو قدمت ليهم فرص اقتصادية ما اتيحت ليهم في مسقط راسهم
ببقى واجب عليهم ان يكونوا ممتنين ..
I Do غايتو
انت بكيفك .. وبظروفك!
لكن الوطن ليس تراب .. الوطن معنى كبيييييير
(سودانيتك) الاخترتها هوية قاطعة دي كلمة كبيرة .. ان شاء الله حظكم معاها ما يكون بتعاسة حظنا!
انا واخواتك جداويين غايتو .. هن مسقط راسهن .. وانا مسقط راسي يؤلمني جداً
او قول حصل انفصال بينن .. بقى مسقط بلا راس .. او راس بلا مسقط!!
| |
|
|
|
|
|
|
|
|
|
Re: لكن يا بابا (السودانيين) بحتفلوا بالعيد الوطني!؟ (Re: فتح الرحمن حمودي)
|
)3(
شايفك في غيمة شفيفة
ترش بيوضة بمطر الليل
في غنوة بتطلع بين رقراق الذكرى رهيفة
تونّس كل اطفال الحلة المورودين عن معنى شليل
وكل ما فجّ عيونهم قبلي
صرّوا الامل
الوطن
العمل
الاسم الحركي لزمنا زين في جوف النيل
لو يرشح نهرك عرق اصدافو
كنا نطمن مركب نوح من حلمو الشافو
وكان سوّرنا الدنيا هديل
شايفك واضح زي النخلة
هدّاية تقيف زي الفا احمر
ومهما بتقسو عليها رياح الآهة
سبيطها تلمو
وتشر الضل لي زولا طاش
اشوفك باكر
في حالة صفو الهي اخدر وباش
بتشاغل كل زميلة وجيهة راي
تريانة وعاجنة العولمة بالقنديل
تقوم من نومها
تضاير يومها
تسن حلقومها
شان ما تجيك وتغني همومها
تخدر فيك الصفق الناشف
وتهش الطير لا ينقد عيشك
يلا يا ساندة..الله يلون غيمات ريشك ...الكهربا رجعت ...*-
شغّلي غنية....تنهر حزن الدنيا...ورشّي الحوش
بتحب ياتو .....كدي ورينا......؟--- *
مصطفى سيد احمد وولا ابو عركي......؟
فيروز الدم.....................................؟
مارسيل الشوق.........؟يا الكلك ذوق.......؟
ولا جراح الطين في وردي الوارد من نيل كوش..........؟
ايوة دة كلو ..... *-
وبرضو بحب غنوات الكاشف......وتسكت فجأة
(وحاجة كاشف )
وتكشف مبسوط عن وعي جميل بي بكرة الاجمل
وباكر اجمل
باكر فارش في اسواق المعنى ضميرك
ودفْ حضورك
ولاّ كانك
يا هدّاي فلّوكة الروح في الريح والعتمة
عارف للحا يكون
لمن يصدق حدس الزمن الفيك
وتسأل ملهوف عن ضيفا جاي
مين بيدق الباب يا هاشم..........................؟*-
افتح سرعة دة يمكن هاشم.
(اسرع لا تكون نسمات الصيف جرحنّو )
ويجيك ترهاقا........تيجاني اشراقة
فاطنة السمحة
قاسم امين الوعي الجمعي
ادريس جمّاع الحاجز كرسي في رئتك
وراجي ....المطرة ....الهمس....الامس الضايع منو
سنوات العمر تجيك معتذرة
فرج فودة.......علي القيوم ........بابلو نيرودا
غارسيا ماركيز ................عنبر جودة
وتجيك الطبقة العاملة عمايل
وما شاقيها
غير ما توازن شرط العدل المايل
ومين من بعدك
يا هبّاب الجمر الحي
يسند اوجاع الروح بي شعبو الراسية
ان مالت
ومين حيسرّح فينا ضفيرة الغنوة الجاية
او حيفلّذي النيل من حظو العاثر
النيل الساكن جنبك
وجنب الصبر الساكن نيلك
وفارد موجو عليك جنحين
النيل معزوم عندك يوماتي
علي خاطر طيب
شاي نديان
نشرة خبر الشوق العاتي
واكل بيجيك ودران
بس اوعى تنوم من بدري
يا سابق الكون بي ركعة حب
دة النيل مشتاق لي قعدة معاك
لي ونسة تكلكل جلد المغرب ورملة حوشك
تتونس ولا هاميك البحصل
والراديو حوارك بي جنبك
بتطوف في الونسة حواري الدنيا محطة محطة
تحكي وتحكي
بشجن مفضوح زي ضو يتراقص في النجمات
تحكي وتحكي
عن بذرة وعيا...نبتت بدري ....في الشيخ بدري
وعن العنوة الما منضبطة
عن مؤتمر الشهد التالت
عن حلف المانجو
ونادي الطل.......منتدى تلوين للفلاحين
جبهة هيئات الحب والثورة
وعن خرطوم بالليل مرتبطة
حرائق الذات في شتاءات الغربة ( عاطف انيس )
----------
الاهداء لرفاق المنافي .. والمشاوير العصية
لبكور علوم (الرفيق بوخارين) في بلد تموت حيتانها من البرد ..
لبدر الدين موسى ونهلة الامين وعاطف انيس همسلف ولكل الرفاق الاستوطنوا بلد الراسمال .. (لعل ماركس قد تململ قليلاً في قبره)
لشرف الاهلية وعلاء شنكل وعاطف حسن وباخ .. وللرفيقة سارة اسحق
في صحة وطن كان .. مجرد حلم .. واصبح ذكرى بعيدة المنال!!
| |
|
|
|
|
|
|
| |
فيس بوك
تويتر
انستقرام
يوتيوب
بنتيريست