الطاعِم كلاما والشُوق في سلاما بِت تريان غماما مُترع بي جمالا يا حظي المفِرهِد يوم قالتلي لا لا ضِحكت لي روحا صبِحت أسير دلالا
2/
أوتار لي صباحي وإشراق لي مسايا نادي عبيرا فائح مال بي قليبي جالا شقشق بالمحبة هيج نبضو حالا زادت في عِنادا وكست الوش بشالا
3/
يا أهل الغرام عِرفت دروب مدارا في أحلك ظنوني بغشاني اخضرارا كم أشبعتا طيفا بي سُكر ارتحالا وكم قيدت قلبي في أوراق ظِلالا بلل جوفي طيبا وأشجى لنظري خالا يا أهل الغرام كيف أسلك درب فالا شان أمشيها شاعر مشروق بي كمالا تديني المحبة وأديها الفي بالا
09-05-2013, 10:07 AM
بله محمد الفاضل بله محمد الفاضل
تاريخ التسجيل: 11-27-2007
مجموع المشاركات: 8617
يا قـــلبي يا مــــــــــبـدول ما تبقى ديمة عَـــــــــــجولْ خليهـو عِشق الحِـــــــــــلوة وما تجيب عليّ القــــــــــولْ ما تشقـى بــالأشــــــــــواق والـــــــــريد فصول و فصـولْ كم عِشتَ في التــــــــــوهان جربتَ جــــــــــدب و هُطولْ أديتـــــــــــا ضـــي عينيك ما لقيت لِروحا دخــــــــــولْ خَـــــــشيتْ في غُربة و غُربة قَربتَ كُل مجهــــــــــــــولْ مِن شِلتَ ريـــــــــق ريحـانا مسّيتْ ظلام مجــــــــــــدولْ أتبعثـــرتْ أوتـــــــــــارك و غِشاك نحيب موصـــــــولْ عاينتَ بــــر أُمــــــــــبارِح كَيف المسار مغــــــــــــزولْ نـوار و روح مُـتطامــــــــنة أفراح و كيف معـــــــــــدولْ زي نسمــــــــــة الأزهـــار بتجيب ربيع مغســــــــــولْ ما تبقــى في البين بيـــــــــن والبيـــن مَصير مقتـــــــــولْ يا شُــــــــــــرفة الإشـــراق عــــــــــــــاينتَ بيك وبقولْ قــــــــــول الضِهِب بالصِــح في نــــــــــــــور ورِد مأهولْ ما فِـــــــــــتنة الشّـــــواف و الشاف حُروف مســــــطولْ ما مِــــــــــــن نبيذ الــــدّن أو مِن ورق مفتــــــــــــــولْ عِشقِك نجـــوم الــــــــــروح في ليل طويل ممــــــــــــطولْ بس المعــــــــــــــاك دار بي و الريد ختامه وصـــــــــــولْ كيف ألـــــــقى درب الضـي إن كان مــداك مفصــــــــــولْ لما العِشِق مــــــــــــــال بي جاني الحُـــزن مبـــــــــهولْ 2/7/2009م
09-07-2013, 12:10 PM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8887
يا الشُفتني.. وغطيتْ أريج ريدك، مشيت . . شرد الغزال أيام وراك والوجد تِطواف الهلاك ضيعتني..
الروح مشحتفة في الدروب ضميت شجون الليل وجيب شدّيت صباح الناي كِتاب غنيت سطور ريدك أسف والصبرِ إتدفق ضفاف عذبتني..
ضاقت وراك كُل الرؤى وشيّعت أخر شوق بدا في شوك مِخاصِر للورود
يا عِطر في غُناي الزمان مَعناكَ في نَفس الكمان مبثوث كما كيف الحروف ترنيمة في صخب الدفوف نوارة في قلب المكان ضاريتا من شغب الكلام مرّت على الكون زي غمام هشّت مدارات التمام والحال صِبح فوق المقام
لو شُفتني.. بي طرفِ فتر في القلب دقاتو وانتظمت سماك وأنا منتظِر في أخر الشوق الضرير نظرات حنان شاخ العشم حتحت صفق شدرو انهزام
والما بِدورك كيف بتسأل ليه جفاك..!!
وما شُفتني..!! 29/7/2010م
09-08-2013, 07:30 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14420
إتغلغلتي بجوا القلب النازف غمه ووجعه مدفق وجاطت فيه خريطة الكون وفي أحضانه الحزن أتخبأ وعتم أفق الوتر الحاس الفيهو تقاطيع مقطع من تعريشة الحب الأولى ومن ترويقة الجسد المسدل ولامي عليهو براقع الغربة الما بتغطي وحبة فكرة وزادو لبكرة إنك فيهو كامنة وآمنة وكم متطآمنة وكم منشرة وغابت عنو ملامح الظّلمة وبيك متدفئ وعنه مقفل باب أمبارح وفاتح منك منو وليكي وفيكي وفيهو عليهو آمال بكرة وفاكر إنك يوم حاولتي تمرقي تدخلي شان ما تسقي شدرة الألفة النبتت فينا قمتي براك في ليل مأسوي وفتي عشان تتأملي فيها خارج حد الترف الأوصد قلبي وقلبك في بوتقة الشكل الأوحد وروحي وروحك في معترك الفرد المدمج قلتي تتاوقى لقيتي الدرب إنسد وباقي الحزن الكان مندسي متاكي متاوق وإنتي بداخل القلب الناقز نط وقفل باب الأوبة وجاطت بين عينيك السمحة ملامح الدنيا وأنا منتظرك فارد باب الوعد المدرج في آفاق الحلم الأوسع النائمة وتطمع حلم ومقطع وبين أحزانها مدون مطلع فيهو ملامحك وفيهو مرام القلب المفرغ من أحلامه وراجي هطولك شان يتمطق طعم الإلفة وزادي وزادك قلة حيلة وحبة فكرة إنو نضاير جيتي وجيتك من عين المدفع ولما خلاص الوعد يقرب وتبرز لينا خطوط الآلفة الكم إنشرت من ما عرفنا ولاحت بينا بوادر العرفة ووقفت بينا حواجز الكبت الما منظورة وفيها خطورة وكل الحاصل بعد الواصل ما اتلاقينا ورانا شقاق الوجع الأكبر فارد صدرو وقاصد يفرق بينا وكيف نتلاقى وجوا الوتر الحاس يجيني مَقطَعَ وفيهو نشاز قسمتنا العوراء وما تتضايقي من شذرات الشر السائد بعرف كيف تتباصر جيتك وداخل الفاق أحزانا مدائن الضنك الما معدودة بشبك شبك الشبك الشابك وفيهو مشبك ود عيني ومابي يفارق باقي الجتة وفيني مشربك ناضم حبلو وفاتل جوا مسام القلب مسارو -وأبت الحيلة الأولى تعدي- قلت أجرب درباً تاني تكيت التكية الما مغفورة وفيها ألوان الصورة اتخطت حد الشوف واتدمدمت عشان اتضارى وفي عيني وباقي الشوف الفيها مطشش وزي قربت ولاح المسلك جاني الهاتف: - أوعى تقرب من مرسانا وحاول إنك تبقى مشرق وأبعد دمك ونضمك وبين أحضان السابل عربد وأنسى مزار الورد الفتق ضايرناهو وفتش في أحضان السابل عيشتك وأبقى مودر درب الأوبة - كيف يا أفق الحيلة وباقي عليك بالعشرة وجاي الندم -- الحيرة مدفقة مني وفيني وليكي علي أكون متلبس طرح الأفق الأشتر وساكن نضمي زمان ما كان مني لقيتو مدفق فوق الشارع وهسا عرفت الدرب الأخضر وجاني غشاني الفارد صدرو وحكر نضمو وبيهو مرقت عليكم شايل بسم الكون الساطي هسا تعالوا وفي عيني الجوز السادرة طشاش ختو قياس الكلمة وأوزنو باقي قصيدتي الحية من باب النفس السابق وكلمة في كلمة - ألمح أضاير كلمة اتغطت من تعريشة القص السائد جاتني ملخبطة بي تأويل أركزي كلمة وفكي رباط العبث الفيكي وامسكي حرف النون الساكن وأرجعي تاني علي اتدسي- وكم كمبلت وزي زغردت وزي جاني كمان إحساس متأخر قال شباك الروح اتشربك ومن أسلاك السك اتفكفك وأبراج القدرة الكفت صدت وقلنا بنرضى أنا والإلفة وروح الوعد المدمج بس كيف نتلاقح وكيف الوتر الحاس يكون احساس وبعض مساس للأفق المطلق ونرجع تاني نعيد المطلع وختو شروطكم وأفتحوا دربي البت تسرسب تدخل تمرق تمرق تدخل عليكم الله أفتحوا دربي -وفاقد المنطق ما بتمنطق وكيف الحال لو عاد من تاني وفرتق كل ضفائر الأمل المسدل والله يكون في العون يوم جانا الشين وقالوا انسدت حيطة الأمل الباقية مظلة وباقي العمر إنسل وسلم وأرأفو مرة وأنسوا الزلة وقد تتكرر وقد تتكرر
9/5/2004م
09-08-2013, 07:38 AM
بله محمد الفاضل بله محمد الفاضل
تاريخ التسجيل: 11-27-2007
مجموع المشاركات: 8617
يا قلبي اتشقلب وأبقى ملاوِع نطط وفنجط في الراكوبة ووسط السهلة وضل الحيطة وأقلب هوبة
وأبقى حريف مشهور بالخفة وأوعى تقول: يا ربي التوبة
وما تتأخر في شقلبتك يصحى ضميرك ويرجع عقلك تضحك فيك الناس وتشوتك وتبقى متنقز زي الكورة
أبقى قُمرتي وغامِر بالإحساس والكلمة وأدي النفس الزايطة وجايطة وحالا ملخبط وفيها مدفن كمين مقلب غربة وكربة وعمر اتبدد حبة أملاً يشرد يرجع يمسح ظلم الوجع الأكبر ويكتل قرف السكة الفائتة
وأوعى تجامل وتبقى مقنطر في خط ستة وأفهم للتكتيك العالي وشوت ضفاري وما تقوم جاري بتجري وتجري وتبقى مهستر وتبقى مدستر وفاقد الذاكرة وناسي المرسى ونومك زي كابوس متضاري بين الذاكرة ونبض الفكرة ويا حليل بكرة!!
وحاجة عجيبة تعرف الشوف بيدخل خوف وتمرُق منك أحرف عاهة عقيمة وحاسب أوعى تجيلك عاهة عاهة تجهجه غفلة نومك وتنعِش إرث القيم الفيك مِندسة ومن ما قمت تغتي عليها تحاسب نفسك وترعى حقوق الجار الجنبك وتبني فصول العُشرة البينكم وتحفظ رأس مال بنوت الحلة و.... و.... و.... وتحفظ كل القيم الما بتنهز وما بتنعد وفيها محنة وحسن مظنة وشكل الطيبة ومعنى الإلفة
بنوت الروضة الكانن يغرفن من ماعون الطيبة الأسمر وما فاهمات للدنيا حقيقة براءة وطيبة وضحكة بتكتل هم الدنيا لبسن لبس الثانوي العالي وقالن يواعدن وما يندسن وأوعى الجكس يكون إتدلع وقام يتعزز وبقى يتأخر وأرفع كفة وأرفع كُلفة وعادي زبادي وموعد وتاني وصارن فتة
- ووين يا درفة ودنكل سفة وتف السفة وما تِتأسف للمنحرفة وحالا يمحِن وعمِر كأسك وشعلل رأسك وزيد في مقاسك وعيش في محفة
وما زي كنت وكُنا وكُنت وكان الحِس الفينا يقطِر مبدأ وينفح منقة ويسكر مُدة بعرقي الطيبة الفينا امتد متوِج إلفه
ووين الليلة الكان بيناتنا ووين الطيبة الكانت فينا ووين العزة الكانت تقدح تضوي مدائن الغُربة الشينة {برغم جمالا وذوق عُمرانا وكترة مالا ونِعمة فالا ورغم الناس الحلوة الفيها ويوت بتجيها} وفيها الزول مشهور بإسمو ووشِو الأغبش صِدق وطيبة وكان زي هالة وكان زي معلم وكان زي معجم وكان اسطورة
يوم الليلة البلد اتباعت دق الجرس الما بِتأخر جاتا دقون ما بتعرِف ربك قالوا: نصيغ إسلامكم وقالوا: نعيد العهد الأول وقالوا: نوفر ليكم كل مرادكم وقالوا وقالوا وباعوا كلام للبلد النامت وفِترت من ثوراتا القامت وما بتتسيد وتجي منصورة
إتغشوا الشفع وقاموا يكوركو وراهم: دم الشهداء كمِسك الجنة ودم الشهداء بيكون اتبل عنبر وحنة وعنبر وحنة وحنة وجنة وجن وجن وقام إتعسكر ماتوا شبابا وماتوا شيابا وماتوا درفن وماتت بينا الروح الطيبة وظلت عازة الصارت عنزة وبقرة حلوب فياضة مذلة تنادي: هلم ويلا ويلا ويلا تعالوا وما تتِأخر يا فارِسنا وأبقى النار التضوي تدافِع عن أعراضنا وعن إسلامنا وعن تاريخنا وعن البلد الليها بِندي دِمانا نموت في شانا وما نِتأسف وتجري دموعنا وتحفِر مجرى وتردم فجوة
حتى العازة الكُنا عليها نتاكِي نقول في شانا نموت من ذلة وما نِهتم صارت كذبة كبيرة مظلة إفك ومذلة تسرق تنهب تزهِق روحك شان الفلة
ومافي موانع ومافي محنة كل المُمكِن أو ما مُمكِن يصبح مُمكِن (شان ناس الحِلة يشوفوا عليها العِز والجاه وكم أطيان وصف عربات) وناساً تدخل ناساً تمرق دقون وخمور دجل وكجور بخور وعطور وهلس وملص وقلة أدباً ما بتنقص وأوعى تحاول داخِل رأسك ترسم صورة
- دار الحزب ودار اللجنة ولجنة ولجنة وكمين لجنة ما نكون في اللجنة ونختا الصف (يا ربي بنلحق صف اللجنة!!) الصف الصف الفيهو الأبلة وأستاذ الحِلة وكمين شافع وأشعث أغبش فوق أكتافو وفوق وأردافو بتظهر رقعة (ما مِن دروشة بس من فاقة) وأيدو تجر عود طورية وعرقوا مخرط فصد خدو ودفق سرف فوق الأرض الزانية الدون ما تفرز تدي وتمنح لي وش الله وبرضوا كمان ما زولنا الأغبش أشتر خدر وفرهد أرض البلد البكر الباقية (زي ما ظن) ويوم ما بيحصد مات بالحسرة جابت ولداً ما اتعرفبو لونو غريب وشكلو مريب وما معروف جابتو من وين إتقصى الحلة ناساً قالت: يمكن زار حلتنا العسكر والناس في غفلة وبابا متاكى ونوما مظلة وناساً قالت: شفناها تنادي تقول للغاشي تقول للماشي تعال وإصطف في صف الصفق الأخضر وصِبحت زانية وبرضك بين الناس تتبختر وما تهتم (يا ربي بنلحق صف الصفق الأخضر!!)
دقون الدولة الما بتميز بين الصالح وبين الطالح تنصب فينا الولد البسرق من الجامع شبشب عمك حاج عبد الله يبيع نِعلاتو عشان يتعشى ويشرب سِنة ويبقى محصل وصف العازة الأول (ناس الحلة يشوفو عليه العز والجاه وكم أطيان وصف عربات) وأضيف من عِندك أي مقاطع يمكن توصف حال الجزمة الرمة
وإن كان دُرنا نتاوق لي دِقن الدولة ورأس الصولة وسبب الوجع الفينا مصوقر وما بينقل وقلنا: ندرس وندرُس شيم الضلل بت البلد الزينة ونصب فينا الولد السابق السقط حجر البلد الفيها الغُلب إتاكى وحل بنلقى مناقب ما بتتوصف أصلاً من ما تب وشب وطل ما بشبه شفع دارنا وداركم (يوم ما كان بنقابل شُفع) المن عينيهم تكرف ريحة الطيبة وتلمس هيبة أجدادنا ووِش السمحة حديقة دارنا تب ما فيهو نداوة الشفع شابي مشالِق يخطِف وينهب يجري ويرجع يقلع ويلبع ويضحك من ساديتو على ضعف الشفع من أندادو وغفلة جارو ودقسة أُمو تب ما فيهو نداوة الشفع ووكتين شب وفارق مسرح بلدو (التحمد الله وتشكر فضلو) ومن عينيه الشر يتناقز وقال يتسيد بالزندية وكُتر الحيلة غرق خير البلد الضائع بين إيديهو وأيد العسكر وآل عبد الله وبعض الصفوة وبعض الساسة وأهل مذلة وكشر عن أنيابو وطل وقال بي دجلو كمان: بسم الله و............. .............. .............. يا قلبي اتشقلب وأبقى ملاوع وما تتأخر في شقلبتك ....................................... ...................................... .......................................
6/2003م
09-08-2013, 07:40 AM
بله محمد الفاضل بله محمد الفاضل
تاريخ التسجيل: 11-27-2007
مجموع المشاركات: 8617
السكات الخطر على بال الريح وأبت تكنس مزامير النواح المثبتة في حلوق الغيم
والبنات البشابن شان يدخل نجيض الضوء يمرق خريف يقيف على طرف البحر يفتح جداول الإندلاق شووووووووووووووووووو
وابت المسادير تلتقط صورة الهتاف الصاري وشو ويرج شان المسامات المِدفِقة في العدم كلام متروس مواراة ومستريح في ضل نشيد مخروم بالعنا وبالجهجهة
وأنت... من يوم خِلقت يا النسل الشريف محجوب عن خاطر الإنكسار مُخضر طريقك بي كتوف الروح الشايلة تبروقة البلد وأصلاً مُحال يبراك ضُر وأنت الغمام... أنت السحاب... أنت المطر... عمق الوتر، والدندنة...
2/6/2006م
09-08-2013, 07:50 AM
بله محمد الفاضل بله محمد الفاضل
تاريخ التسجيل: 11-27-2007
مجموع المشاركات: 8617
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بله محمد الفاضل
ibrahim fadlalla
مجدي عبدالرحيم فضل
معاوية المدير
ابو جهينة
فيس بوك
تويتر
انستقرام
يوتيوب
بنتيريست