|
|
 عمر الفاروق .. غناينا مات .. فهل زماننا فات ؟
|
الايام دي محمود ناقح علي شديد يا عمر ..
احتمال لانه رمضان موسم الغناء في السودان .. اتى بدون محمود ، فخرمت ليه
عني نفسي أخذ امر محمود على محمل الجد .. بتهيج وبنفعل وانا بناقش حاجاته ... وعادة لا اناقش او اتحدث حول محمود او عنه ، إلا مع خاصة .. منهم ابن خالتي وليد قسم الله الشهير ( باويدج ) صديق زمينا في المنبر تبارك شيخ الدين ، وابن الخالة الاخر هيثم اسماعيل ، واستاذي وصديقي واخي الاكبر بدر الدين عمر الحاج موسي ..
اعتبرك منهم .. لذا خصيتك بهذه الرسالة العلنية .. انشد الفضفضة والترويح ..عسى ولعل !!
ابني البكر محمد وليد .. زول حساس جدا وذوق جدا .. اقول لزوجتي العزيزة ، ان السبب في ذلك يرجع لمحمود عبد العزيز ..
اذكر في شهور زواجنا الاولى .. كان ينقصنا الكثير .. لكن اول شي اشتربناه كان استريو كبير ومجموعة شرائط لمحمود عبد العزيز وزهرمان وعقد الجلاد .. استريو كبير وغالي ... اغلى من مرتب شهر .. اشتريناه ولم نلوي على شئ ..
كنا ازواج جديدين لنج .. مليانين رومانسية وتفاؤل – حتى الان نحن كذلك – نتسامر حتى وقت متاخر في الليل.. ودائما ما تكون الخلفية في ليالي سمرنا .. صوت محمود يصدح من استريونا الكبير .. وانا اتغزل واونس حرمي المصون ..
كنا اثنين.. ثالثنا محمود ..
عشان كده اعتقد انه محمد ولدي .. زول حساس وذوق جدا
لانه ود الرُضا .. والتفاؤل .. وصوت محمود
|
|
  
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: وليد محمد المبارك)
|
عندما مات محمود .. اخبرني كثير من اصدقائي .. انهم تذكروني في ذلك اليوم .. فانا معروف بين اصدقائي بحبي الجارف لمحمود ... ومن نعم الله علي .. انني عند موت محمود كنت خارج السودان ...
نعمه كبيره والله يا عمر .. لاني كنت اتبشتنت بشتنه شديده
لحظة وصول خبر محمود حضرته على الهواء مباشرة .. من قناة النيل الازرق .. برنامج صورة وصوت .. اذكر انهم كانوا مستضيفين الاستاذ مصعب الصاوي .. وكان محور الحديث محمود .. وانت تعلم تلك الايام .. كان محمود محور حديث كل القنوات والازاعات والشارع العام كذلك ..
ومن نعم الله على ايضا اني حضرت تلك اللحظة وحدي
انا براي الله ورقبتي ....
وبكيت يا عمر كما لم لبكي من قبل .. الخبر جاء تمنيات او تسعات .. من لحظة ازاعته .. حتى الساعة الثانية ظهر .. فرد بكية يا عمر .. والحمد لله كنت براي
فقدني الاقرباء .. وكان الميت فرد من العائلة .. واول من اتصلت زوجتي العزيزة ( ما قلتو نوبة ) .. مكالمتها لم تستمر اكثر من 10 ثوان ..ثم اغلقت الخط .. احترمت حزني .. وتركتي لوحدي
اتصل اخرون كثر لن احصيهم .. لكن اشكرهم كلهم
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: وليد محمد المبارك)
|
يااا وليييد
عارف يا صاحب البوح والتباكي علي محمود في سودانيز بقا مدعاة للسخرية وبقو الناس بتفتكرنا بنقشر بي سيرة محمود للدرجة الكرهناهم في محمود تخيييل؟؟؟
ععارف يا وليد اول امبارح لما جابو حلقة محمود صلاح سو التلاتة سنوات قاعد مع ناس حبوبتو معاهو محمد ذو الاربعة سنوات ونص.. لمن شافو محمود عبدالعزيز بي صوت وااحد قالوا لي ناس بيتنا بابا لمن يشوفو بيبكي كتيييير...عارف ناس بيتنا لمممن اتخلعو وهم زاااتم بكو...
عارف يا صاحب ارجع لي كتاباتي في سودانيز دي اوووول ما سجلت
كنت بقول هنا انو انا بحب اسمع كللل الفنانين لكن بعرف انو فناني المفضضل هو محمود عبد العزيز
يا وليد لو حكيت ليك كيييف كنت بجازف عشان اتحصصصل علي شريط محمود الماستر اوول ما ثنزل البروشور تحتااار
قصص تستاهل تتوثق في كتاب ..
يا وليد معاك ح افضفض هنا وبنادي رفيق دربنا في حب محمود اساسي فهو اكتتتر زول فينا محتاج لففضفضة
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: ناذر محمد الخليفة)
|
استماعي لي محمود يا عمر ، حيدر وناذر .. مختلف .. واحتمال يكون غير مقبول للاخرين ... يعني لو في زول بسمع معاي محمود بزهج ..
في الاول بستهدف الشريط غنية غنية .. واحتمال كوبليه كوبليه .. اشغل الغنية .. وقبل ما تنتهي .. ارجعها تاني .. ومرات في كوبليه برجعه اكتر من مرة .. يعني مرات غنية معينة بتكون شغالة عندي قريب الخمسين مرة ..
بعد داك بكون حددت الاغاني العاوزها من الشريط في الفترة دي – الامر ده متغير لنفس الشريط – لانه مرات في اغنيات ما بتعجنبي وكت اشتري الشريط .. تعجبني بعد كم يوم او كم اسبوع او كم شهر وادمنها ... اها الاغاني الحددتها دي .. ياها البسمعها بس وبتجاوز ليك الاغاني التانية الى حين
اكتر اغاني سمعتها لي محمود .. بعد ايه حقت وردي .. وجاي تفتش الماضي ترباس ... وحنيني اليك محمد ميرغني ... وطبعا الفات زمان .. ديل انا سحكتهم سحك
كنت بتمنى محمود يغني .. بعد ده كله كمان بتبكي .. وزهرة السوسن
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: وليد محمد المبارك)
|
تعرف يا وليد..
انا عندي بوست كتبتو ومستحو أكتر من عشرة مرات تصدق؟؟
كل مرة بعد مااا أكتبو وأنتهي منو بقوم تاااني امسحو والغيهو ..طبعا انا بكتب لااايف بفتح سودانيز دي وبختار موضوع جديييد وتووشك برص الكلام بدون مراجعة وتنقيح وتفكير..
البوست كان معنون بي كيف تسمع محمود...
اتكلمت فيهو مخاطب للناس اللي ما بيسمعو محمود أو كان عنده راي في طريقة اداء وصوت محمود..
طلعت الحتت اللي انا كنت بستمتع بيها واللي بي سببها حبيت محمود وبديت أشرح للناس الحتة المفروض يركزو فيها ويسمعو محمود في الدقيقة الفلانية في الاغنية الفلانية الطريقة الفلانية وأبدا أشرحا بي مفهوم مستمع عااادي ما بتاع مزيكا ولا يفقه الدو من الري من من ..
كل مرة بمسح وبخاااف انو الناس ما تفهمني قاصد شنو ووين العبقرية البقصدا..وبمممسح ..
ياخ وليد انا حتتتى غلطات محمود اللي كانت ماركة مسجلة في كللل شريط كنت بستمتع بيها وبي الفتيش عليها .. والشريط الما بلقا فيهو غلطة من محمود بقول ده مااا الأصلي..
محمود كان عندو عشق مع اغاني ترباس شدييد جداً وكان يحب جداً أغنية يا نسيم شبال يا فرح ضحاك في عيون أطفال يا كلام الريد في العيون بتقال..
في واحدة من تسجيلات محمود لي شركة البدوي تحديدا شريط يا مدهشة صادف إنو عايزين يسجلوا شريط لي فرقة أولاد البيت ..محمود أصر وأعجججب جداً بي أغنية إسمها شوقك شوقك ما من ذوقك إنت تجافي تسيب معشوقك..الأغنية الشركة قررت تغنيها فرقة أولاد البيت وأصرت على محمود يغني العجب حبيبي..مع إنو كان مفروض يحصل العكس..
حسب ما سمعت إنو دي واحدة من الاغاني اللي محمود كان بيتمنى يغنيها أغنية شوقك دي..أغنية جميييلة للأسف فقدت شريط أولاد البيت وما لميت فيها تاني..كان فيها مقاطع بتقول :
يا الخليتنا وسبت الحلة ..من نار شوقك كيف نتحلّ..
وحتة بتتكلم عن وصف النجوم والكواكب تقريبا بتقول ليك يبارن ..و منك غارن ..لفن دارن.. ضوون فوقك ..شوقك ..شوقك..
واحدة من الأغاني اللي إتبالدو فيها ناس البدوي هي أغنية سيب عنادك..أغنية راااقية للأسف تم بترها وعدم إكمال تسجيلها لأنو مساحة الشريط ما كفت ..
شريط سيب عنادك علامة فارقة في خارطة الغناء السوداني..زيييو زي مرسال وردي ..الشريط ده انا اشتريتو بالضبط 12 مرة .. وللأسف في إجازتي القبل كم اسبوع دي قلبت ليهو الدنيا قلب ما لقيتو وأسسسة يا وليد اماانة عليك تشوفو لي وين وترسلو لي في ناس جايين..
صدق يا وليد انا بحب أسمع محمود من الكاسيت فقط..رسلو لي فلاش فيهو كللل اغاني محمود وشرايطو ما شغلتو ولا سمعتو ..
عمري من الاغاني الراقية..هو الاختار دنيتو..ولقيتك في زمن ضايع..
من اغاني الحفلات الزمان كنت بحب جدددا أسمع يا ليالي الأنس ومعاها كل ما سألت عليك صدوني حراسك..
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
إتفضلي واحدة من الأغنيات الراقية واللي شالت إسم شريط بعتقد إنو ما لقى حظو من الإستماع بي صورة كبيرة زي باقي شرايط محمود..
أحب الأغنية دي جداً وكان فيها إيقاع جديد بالنسبة لي اغاني محمود الخاصة ..
أحب جداً المقطع التاني منها البيقول :
يا ريتو لو زمني العسير بينا المسافات قصرا..
تاني السنين صبحت سنين يا غالية رجعت لي ورا ..
ونشيل غناوينا الزمان ..يا نسمة يا غيمة وضرا..
عليك الله يا وليد لاحظ فيها تحديييدا لي حتة يا نسمة يا غيمة وضرااا والاداء الصوتي الفخييم لي محمود..
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
يا سلام عليك ياخ
عليك الله جيب معاك بفرح بيها بتاعة ود الجبل او الجان الكبير كما كان يحلو للحوت ان يسمه ... ياخ بفرح بيها دي محمود بالغ فيها عديل كده .. صوتو كان مرتاح .. وقادر يصل بيه اي مكان
اساسا محمود بادي اغاني الهادي حامد بصورة مختلفة ... لانو اتدرب عليها كتير واتعلم بيها الغناء
في اغاني لي محمود باديها بطريقة اولاد الحلة .. زي كانه بشيل في جلاله في كديت .. العجب حبيبي غناها كده وسبب الريده برضو
انا ماشي انوم يا صاحب
صباحات الله بخيرها ... بكره نكمل الونسة .. ونفتش محمود عدلة قلبه .. ونتذكر قديمو وجديدو
| |
|
|
|
|
|
|
|
|
 Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
سلامات يا وليد وعمر ورمضانكم كريم
حقيقة ما عارف الحب بيتقاس بشنو؟؟
طبعاً انا شبيت لقيت محمود في عز شبابو وانتاجو .. أول شريط اشتريتو لي محمود وكان طالع جديد "شايل جراح"
بعدها كنت بدخر اي قروش يدوني ليها عشان امشي السوق اجيب شريط .. سواء قديم او تسجيل :حفلة"
أي شريط لي محمود تتخيلو كان عندي .. وفي البداية ما كان عندي مسجل عشان اسمع بيه
كل يوم عامل شكلة مع ناس البيت في الرادي .. بقولو لي بتنزل الحجار بسرعة .. طبعا الوكت داك في البلد "رهيد البردي"
الكهرباء بتشتغل من 7م لي 11م وبس .. حالة كانت صعبة يا عمك ..
بعدها اجتهدت واشتريت مشغل كاست .. واستغليت .. لا حجار لا جن أحمر
من الوكت داك اخواني واصحابي .. العايز يجيب لي معاه هدية .. ما ح يلقى حاجة تعجبني زي شرايط الحوت
آي بسمع فنانين تانيين لكن محمود أساسي ...
بعد استقريت في الخرطوم .. تخيل يا وليد ما بفوت ولا حفلة يا وليد
مستحيل محمود يكون ماسك مايك بغني في حفلة وانا عارف وما أحضر .. مستحيل
اتذكر مرة كنت مخطط احضر حفلة في نادي التنس قبل سنتين .. والله كانت عندي "تايفويت"
مشيت الحفلة والفراشة في يدي .. :)
محمود اسطورة فنية لن تتكرر مهما كان يا وليد .. خامة صوت وأداء وتطريب وحضور وأناقة وكل شي
القبول اللقاه محمود عبدالعزيز ما ح يلقاه فنان تاني .. وما أظن في فنان قبلو عندو جمهور قدرو ..
يوم وفاة محمود يا وليد .. سمعت الخبر في المكتب .. اتصدمت صدمة ما حصلت لي قبل كدا
طوالي اخدت إذن ورجعت البيت .. دخلت غرفتي وقفلت الباب علي .. بيكيت كأنو المات اخوي او ابوي
بكيت بنبرة زول موجوع جد جد .. كعادتي ما ببكي خالص وما بحب زول يشوف دمعتي
ومن عرفت روحي وبقيت زول كبير .. بكيت زي خمسة او ستة مرات .. منهن يوم وفاة ابوي ووفاة محمود
قعدت في الغرفة اليوم كلو ما طلعت ولا شبر .. فتحت النت قريت شوية واظن فتحت بوست في المنبر هنا
لكن دايما بحاول ما اظهر انتمائي وحبي .. حبي لي محمود يمكن بعرفوه الناس القريبين مني اصحابي وناس بيتنا
والناس العاشروني عن قرب .. دايما ما بحب اظهر الولاء والتعصب ..
والله يا وليد لما زول يقول لي كلام سلبي عن محمود .. ما تتخيل الحريقة البتقوم جواي
اتنين ما برضى فيهم .. محمود عبدالعزيز والهلال ..
تخيل بعد دا كلو ما فكرت يوم الاقي محمود ولا اقعد معاه ..
عارف ليه؟
عشان ما عارف لما الاقيه ح اقول ليه شنو ولا شنو ؟ برغم توجدي في الوسط الاعلامي وترابط الوسط الفني بالاعلام
كتير جدا بكون بيني وبين محمود تلاتة امتار او اربعة وبفكر كتير بين اني امشي اسلم عليه واتعرف عليه وفي النهاية ما بمشي
اخونا وحبيبنا الصحافي أحمد الصاوي عارف حبي وتقديري لي فن محمود .. عرض علي كتير نمشي ليه زيارة في البيت
كل مرة بخلق اعذار .. وفي النهاية اعترفت ليه باني ما قادر اقابلو خالص
قام الصاوي مشى ليه زيارة وحكى ليهو عني .. وضرب لي تلفون قال لي في زول عايز يسلم عليك وما وراني الزول منو
الزول سلم علي بروح حلوة وسالني عن احوالي وكانوا بعرفني .. سلام عرفة يا وليد .. الصوت مألوف بالنسبة لي
خشيت في الزول شمال قريب التلاتة دقايق .. في النهاية قلت ليه عليك الله منو قال لي .. أنا اخوك الكبير محمود عبد العزيز
وحكى لي الصاوي عنك وطلبت منو انو يتصل بيك عشان انا كمان بحب الحواتة زي مالا هم بحبوني ...
والله غلبني ارد غلبني اقول اي شي والعرق العرقتو التقول طالع من الحمام .. ما عرفت اقول حرف واحد تاني
قال البيت بيتك وتعال يوم مع الصاوي عسان نتعرف عليك اكتر .. ورجع التلفون لأحمد ..
قال شفت كيف محمود شخصيا طالبك زيارة !
تخيلو الزول دا متواضع كيفن؟؟؟
محمود إنسان ما طبيعي
الغريبة بعد الدعوة دي ما قدرت امشي ليه خالص
ربنا يرحمك يا محمود .. فانت لم تمت
رحلت بجسدك ويبقى فنك للأبد
لكم التحية وليد وعمر لفتح هذا المتنفس العميق
إنها مساحة للبوح والفضفة
ما عارف من وين الشجاعة الخلتني اكتب الكلام دا كلو؟؟
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
عمر ووليد
كيفكم
طبعا أنا ما زول عندي علاقة حب بي محمود زيكم، لكن بحب غناه، وأنا ما من الناس العنيد صبر اسمع شريط كامل، لكن الشرايط ألكنتا بسمعها كلها كانت لي النور الجيلاني، محمود علاقتي بدأت معاهو في سنة 86 وأول مرة سمعتو كان كافتريا القدس جنب تفتيش سوبا ومن الزمن داك بسمعوا بالصدف، لحدي ما مشيت المعارضة في إرتيريا واشتغلت في إذاعة المعارضة ديك الفترة الوحيدة السمعتا فيها أشرطة كاملة، وكانت لي محمود وأبو عركي ومصطفي. سيد احمد، كانت بالنسبة لي إعادة اكتشاف ليهم الثلاثة.
بعد المعارضة والحضور لامريكا، تعرفت على احد الحواتة، أسموا الدحيش، في هارسبيرج في ولاية بنسلفانيا، اها الحواتي دا هو الزرع عندي حب محمود، لأنو كان ينوم بي محمود ويتنفس بي محمود حكى لي زي مليون حكوة عن محمود وعن غناهو وعن حياتو.
المهم حبيت محمود من خلال جمهورو عشان كده دائماً بحب اسمع من الناس البيحبوهو، مهما كتبتوا ما أظن في زول حيزهج من سيرة محمود عبد العزيز، هذا حب لو وزعتمهو على سكان الأرض لتفاهم.
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: الصادق اسماعيل)
|
ياسلام يا وليد علي ذوكم الفني الباذخ والجميل متعكم الله بالصحة وكل الاسرة ورمضان كريم
عرفت الفنان الكبير محمود عبدالعزيز عن طريق صديقي الجميل راشد عبدالمجيد عووضة سنة 1996 /1997
وهو الان مقيم بكندا له الف تحية وتقدير.
كنا في نهايات الاسبوع نتنقل بين ابوظبي ودبي وعجمان والشارقة
واول ما نركب السيارة راشد يطلع شريط وردي والله ابراهيم عوض ويخت ليك شرايط محمود وتبدا الاغنيات
العجب حبيبي....
عقلي انشغل بهواك....
حبك حبك يا جميل ساهر بي والليل طويل.....
ياظبية الباص السريع.....
علي الجمال تغار منا.....
سبب الريدة.....
الله الله من خلي بالك.....
خلي بالك لي إيدي وقت اسالمك لما يازولتي البريدك
أمسح من الزمن العداوة واقول بريدك
تفرح الناس الحزينة والأسف الكان مدينة
تهدمو الريدة الحنينة
إنت وأنا من فوق على قمماً سعيدة
نخلي صوتنا دوام يغني
ياصوتنا غني باللهفة والحب والتمني
لاسهاد في ليل بعاند لا الوجع تاني بعاود
كل ما سالت عليك.....
خلي العيش حرام.....
خلي العيش حرام مادام أرى الموت يحل
مابين الرميش فوق للطريف الكحيل
هز صدرو ميل فدع الخصر النحيل
درّاج المقل شبه المهر الوحيل
النوم مني فرّ وقلبي ناوي الرحيل
من غير المنام طيف الخيال مستحيل
ولا لان إشتياقي وقلبي أصبح وجيل
ولا من جمال يرفع لي قدرك يجل
يشتاق الهلال ينصاع لي قدمك حجل
بنخوض الرماح لوكان تزيد أو تقل
ونخاف من ضميراً أهيف منفتل
ونقابل المدافع بالثبات والعقل
ونخاف سيف عيونو إن لمعت يضرب صقل
يالمنك معار تكحل شويدن الخميل
علمت الغصون مع الغصون كيف تميل
مختارك رعاك في عشو ودمعو الهميل
التختارو لي لاشك جميل ياجميل
سكت الرباب.....
ومع كل هذا الجمال في الصوت والذكاء في اختيار الكلمات كنت مازلت معاندا اخوي راشد عشان يغير الشريط
وفي مرة قال لي ياخي صفي قلبك من كبار الفنانين مع احترامنا ليهم واسمع محمود بقلبك بس
وفتحت قلبي وسمعت بكل احاسيسي كلمات والحان ونغم وصوت محمود وجدت فيه قمة العبقرية
والاحساس الراقي والتفرد والتميز ومنذ ذلك الحين مازلت محبا للفنان الراحل محمود عبدالعزي
نسال الله له الرحمة والمغفرة في هذا الشهر الكريم وان يتغمده الكريم بواسع مغفرته وان يلهم اهله ومحبيه الصبر والسلوان
ارجوكم اخلصوا له في الدعاء فهو الان احوج مايكون اليكم جميعا
الف شكر اخي وليد ومتابعين معاكم هذا البوست
وتحياتي للجميع
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: وليد محمد المبارك)
|
وليد يا صاحب...رمضانك كريم و تصوم و تفطر على خير
والله يا ولي الحق لله...أنا محمود الله يرحمو لم أكن من معجبيه و لا من مستمعيه..(بإستثناء بعض الاغنيات)
بس بحترمو جداً كإنسان نبيل بكل ما سمعته من تواضعه و حبه لعمل الخير
كما و أحترم و أقدر جداً محبيه و معجبيه و فقدهم الجلل
اللهم أرحمه رحمة واسعة ببركة هذا الشهر الكريم
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: زياد جعفر عبدالله)
|
Quote: مرحب بيك في ركن الحواته ... محمود حالة تستحق الدراسة .. حقيقي حالة تستحق
من ناحية فنية
ومن ناحية اجتماعية
مودتي التي تعلم |
اخي وليد ...
تبحثون عن الانصاف في زمن اختلت فيه كل الموازين ...
فحينما تري فوضي اغاني و اغاني ...
فقط تترحم علي اهل الفن و المغني ... في سرك ... فلا احد يسمع و لا احد يفهم ...
فالحال لا يسر يا صديقي ...
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: maia)
|
تعرف يا وليد ..الشي المحييير وغرييب وعجيييب وتعال خلينا نبدا محمود من اخر ايامو وتحديييداً في برنامج أغاني وأغاني اللي الناس بدت تنتقد فيهو محمود..
بالله جيب كل تسجيلات محمود في اغاني وأغاني ..كويس معاك؟ يلا قوم عااااين لي كللل الفنانين أو الشباب اللي بيكونوا قاعدين معاهو في الحلقة ..ولاااحظ لي كمية الإنصات والهجمة والإندهاشة وعدم التجرؤ على التداخل بل وبتحس بيهم مستمتعييين ومتأدبين في حضرة محمود بي صورة مهيييبة ..بالجججد الحاجة دي أدهشتني في أكتر من أغنية ..أكاااد أجزم إنو كللل الناس الكانت في أغاني وأغاني دي لو ركبت معاها عربيتا ح تلاقي إنو جوووة عندو شرايط محمود ..
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
من أغرب الحاجات اللي كانت بتلفت إنتباهي عن محمود هي السياج اللي قدر يفرضو على حياته الشخصية العائلية ..
بالرغم من كللل الزخم الإعلامي اللي لقاهو إلا إنو محمود قدر يضرب نوع من السرية في حياته الشخصية العائلية للدرجة اللي خلّت ناس كتااار تتفاجأ بي إنو محمود عندو ولد كبييير إسمو مصعب في حلقات أغاني وأغاني ..وحتتى التوأم الصغير أوول ظهور ليهو كان تقريباً في حفلة عيد الأضحى القبل كم سنة ..ولسة عندو توأم ما سمعت بيهو الناس..
إمكن الحتة الوحيدة الكانت مسار جدل هي المسرحية سيئة الإخراج اللي لعب فيها أشخاص بعينهم دور باهت في إقحام محمود في علاقة عابرة ترجمت بزواج من الفنانة حنان بلولو ما إستمرت كتيير ودي العلاقة الوحييدة اللي ناس قدرت تتكلم فيها عن علاقة محمود بي زوجاته ودي بالنسبة لي كانت كافية لي إنو توضح كيف إنو محمود إتعامل مع العلاقة دي بنوع من الإستهتار لإقتناعه بي إنها علاقة مجوبكة ..مع العلم إنو محمود متزوج أكتر من مرة ..
الكلام ده ما تدخل في حياة محمود الشخصية بقدر ما هو إعجاب بي محمود في طريقة حفاظه على حاجاته الحقيقية ومشاعره وأحاسيسو الحقيقية بعييداً عن أعين الناس والصحافة ..
برضو الما معروف للناس إنو معظم أغاني محمود الكان بينتقيها في معظمها كانت بتكون أغاني بتلامس إحساس حقيقي لي حب حقيقي عاشو محمود عبد العزيز رحمة الله تغشاه ..
الغريبة يا وليد والمدهش وللأسف لو جينا نتكلم عن معاناة محمود في حياتو بنكتشف إنو محمود كان بيعاني من ذوي القربى أكتر بي كتييير من الكان بيلاقيهو من ناس النظام العام ..
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
محمود وما أدراك ما محمود
دا يما" كنت بقول إني ممكن أكتب مقال عن حبي لمصطفى سيد أحمد وممكن أتكلم الليل كله عن عشقي لعركي أو كيف كاظم الساهر غناي وليه ود الأمين أستاااااذ وعاطف خيري كتاااب و إنه مودريتش لعاااب بس محمود عبد العزيز بينتهي الكلام ..
حب محمود عبد العزيز فطري ,, ولما يجتمعوا على حبه كل الملايين دي بتعرف إنه كان كالغيمة ظلل الناس دي كلها و كالمطرة لما تنزل على كل البلد
أحلى حفلات حضرتها ليه لما كان بيجي الأبيض زيارات وهو فنان كبير ,, بيجي يختفي عندنا وبيغني في مناسبات خاصة كمجاملة وقعدات أصحاب ,,
ما حصل يا وليد غالطت زول قال محمود ما بيعرف يغني أو حاول يوصف محمود بأي وصف آخر حتى لما كان بجيبوه في الكاريكاتير الشهير بتاع ( هناق وحماميزو ) يشهد الله ما كان بيضحكني ولا نقص تقديري ليه أي شيء ..
أجمل أغنيتين غناهم محمود في التلفزيون بالنسبة لي وكل ما أشوفهم ببكي ,, فرايحية في النيل الأزرق مع نادر الله يرحمه و خوف الوجع في حلقة الطيب عبد الماجد والإتنين في النيل الأزرق ,,
رحم الله محمود بقدر ما أسعد وبقدر ما جمع كل السودانيين ديل على حبه ..
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: وليد محمد المبارك)
|
Quote: اخي وليد ...
تبحثون عن الانصاف في زمن اختلت فيه كل الموازين ...
فحينما تري فوضي اغاني و اغاني ...
فقط تترحم علي اهل الفن و المغني ... في سرك ... فلا احد يسمع و لا احد يفهم ...
فالحال لا يسر يا صديقي ... |
الاخ يحيى قباني
كلامك ده كلام مهم شديد خلاص
اعتقد انه ده مسئولية المجتمع المدني .. يعني مفروض منبر زي سودانيز اون لاين .. يتحول بعد كده الى مؤسسة ثقافية .. ويتبنى مشاريع زي دي
لانه اساسا يمتلك راس مال بشري مجتمع في حيز اسفيري واحد ... ودي اس الشغلانة والحاجة الصعبة فيها
يعني لو بكري عمل مبادرة زي دي
ونادا ليها ناس الومسيقى الزملاء في المنبر ( موصلي ، حمزة سليمان ، عوض الله ، والاخرين )
وناس علم الاجتماع وبقية العلوم وشكل ليه قروب سغير يعمل الدراسة دي
وشغلانة زي دي تمويلها بجي من اماكن كتيره اليونسكو ممكن تمول شغل زي ده
وزاتو بكري يكون عمل برك ثرو في شغلانة المنابر دي ونقلها نقلة كبيرة من الاسافير الى الواقع
مودتي
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: وليد محمد المبارك)
|
سلام تاني يا وليد و ربنا يصبر الجميع على فقد محمود
متابعين معاكم البوست ثانية بثانية لانو اي كلام عن سيرة و تاريخ محمود بتجذبنا و تبسطنا رغم الحزن على فراقه
في نقطة عايزكم تتكلمو لينا عنها انت و عمر و بقية المتداخلين
الحتة بتاعة انو محمود بمثل للجمهور بتاعو زي المخلص او المنجي
محمود اتجاوز مرحلة انو يكون مجرد الفنان المفضل لجمهوره
اتجاوزها لانو الحواتة بحبو محمود في نفسه ذااااتو
في تصرفاته في حسه المرهف و إنسانيته الطاغية في تعامله مع اي فرد ناهيك من جمهوه
الناس بتجي حفلات محمود موش عشان تسمعو, بتجي عشان تعبر ليه عن حبها
و اي واحد شايف انو محمود ده حقه هو
محمود حالة فريدة و ظاهرة تستحق الدراسة
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: حسبو عكاشة)
|
أها يا حسبو شوفت كلامك القلتو ده وعايز الناس تتكلم عنو ؟؟؟
كضاااب البيقدر يتكلم عنو .. وعن نفسي بشوف أيييي زول حاول يشرح حالة الحب بين محمود جمهوره فشل تماااماً لأنها حالة ما عندها أييي تفسير كوني وظاهري..
يعني لا هي بي سبب اعماله الخيرية .. لا هي بي سبب صوتو .. لا هي بي سبب تمردو.. لا هي بي سبب البنقو الفاكنو فيهو الناس ده ومستمتعين بي الونسة فيهو .. لا هي بي سبب غناهو لا هي لا هي لا هي..
أها عشان كده ده الشي المجنن الناس التانيين ..
وده الشي المحيير كبار الفنانين وصغارهم..
وعشان كده بقول ليك حقو ما نخلي زول يشرح لينا النقطة دي لأنها نقطة ما عندها أييي شرح ..
بالجد ده قبول من رب العالمين ..ما أيييي شي تاني..
وحكمة ربنا القبول ده كان ماشي في تزايد مهييب وعجييب وصل ذروته في اخر لحظات حياة محمود عبد العزيز رحمة الله تغشاااه..
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
يا وليد ..
تتذكر الفترة دي من عمرنا في حب محمود؟؟
محمود بي الأورغن !!!!
عبد العال إرتبط لينا بي إنو بيكون السبب في إنو يطلع الفنان .. أي فنان بيعزف ليهو عبد العال بيطلع ..فرفور نادر الله يرحمو اولاد البيت و و و.. لكن الزول الوحيد العكس الحتة دي هو محمود عبد العزيز ..
محمود كان سبب في شهرة عبد العال..عن طريق محمود عرفنا عبد العال ..ولولا محمود لما اتعرف عبد العال ..
محمود وعبد العال شكلو ثنائية جميييلة ياما عطّرت سموات الحيشان في الحنن والأوفرنايت والكراسي في حوش ضييق كده والناس مزحووومة وملمووومة عشان تسمع الأسمراني النحييل..
يا سلاااام عليها من أيام..
كدي أسمع وجر شريط الذكريات ..
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
ما كنت بحب محمود دا نهائي .
كان عندنا مجموعة شباب طائش في الحلة بحبوا محمود مخالفة للناس ديل كرهتوو عمى .
حتي قبل ما اسمع صوتوو ..
لدرجة انو انا لمن اركب حافله او بص مشغل شريط محمود بقفل اضناني عديل . وقد انط ليك في السواق يا اخي متغير الشريط دا وخت لينا فنان زي الناس .
بذلك الصباح كانت الدنيا امتحانات في داخلية السنتر .
الدنيا صانه الشباب كلهم مشو يقرا في المكتبة الا انا ، مشيت جبت لي كباية شاي وانا جاي في الحتي البين داخلية كسلا و سليم 1 في كشك كان مشغل أغنية ضل الضحى الرامي ، وريحة البن لمن يفوح في قلايه ، وسبحت جدي ، والصوت يشيلك فوق يحلق بيك ويرجعك تاني ليزكرك انك ها هنا . شربت الكباية ديك في محلته ومشيت جبت كباية تاني وقلت للزول عيد الغنيه دي ولمن جات حتت وصوت عرفه لمن تخمج الدلوكه غانيه الصور محفوره جويه انتابني شعور كدا لا يوصف . وكل ما اسمع الأغنية دي لي هسي بيحصل لي فلاش بلاك الى هناك .
ومن ديك وعيك ما فناني المفضل لكن بحب اسمعوا .
الهم ارحم محمود واغفر له واسكنه فسيح جناتك .
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: وليد محمد المبارك)
|
Quote: في نقطة عايزكم تتكلمو لينا عنها انت و عمر و بقية المتداخلين
الحتة بتاعة انو محمود بمثل للجمهور بتاعو زي المخلص او المنجي
محمود اتجاوز مرحلة انو يكون مجرد الفنان المفضل لجمهوره
اتجاوزها لانو الحواتة بحبو محمود في نفسه ذااااتو |
وليد وعمر رمضان كريم
العزيز حسبو هبش حته فى غاية الاهمية فى تقديري
حب الحواته لمحمود تجاوز مسألة الغنا وسبح هذا العشق فى بحور عشق صوفي بجنونه
هذا العشق لم نجد له مثيل الا فى تجربة بوب مارلي والحديث عنه وعن عشاق بوب يطول
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عصام علي أحمد)
|
رمضان كريم ياوليد وزوار البوست
تعرف ياوليد انا عندي مشكلة حقيقية في التواريخ فمعليش ماعارف سنة كم بالضبط بس المتاكد منو انو محمود كان لسة في بداياتو
في مناسبة زواج في امتداد الدرجة التالتة منتظرين الفنان يجي يطلع المسرح عشان يغني
جاء ولد صغير نحيف طلع المسرح لاني مشغول بالونسة مع الشباب ماسمعت اسمو لامن قدمو
المهم الشاب النحيف والظاهر عليهو الخجل ده بدا الحفل باغنية
مافي داعي كان للحصل مافي داعي
تصدق ياوليد لاشعوريا كده انا والشباب القاعدين معاي من اول كوبليه في الاغنية سكتنا من الونسة ورغم جوطة الحفلات الانت عارفه ديل سمعنا محمود لحدت نهاية الحفلة
اتذكر انو انا قلت للشباب ياخ الزول ده عندو حاجة غير
ومن التاريخ داك استمرت حالة عشق غريبة لي محمود
بس انا عندي حاجة غريبة شوية اللهي انو انا بحب اسمع لي محمود شرايطو الما ماستر يعني شرايط الحفلات بتكون فيها حاجة حميمة كدة مابتتشرح لكن بتتحسا
تصدق ياوليد انا عندي عشرات كان ما مئات الحفلات لي محمود شي حفلات خاصة وشي قعدات وشي حفلات عامة
وعندي اغنية لايمر علي يوم اقل شي بكون سمعتها مرتين تلاتة
مع السلامة مع السلامة
ويعلم الله ياوليد كل يوم بسمعا باحساس وطعم غير
ياوليد في تسجيل للحوت في واحدة من الحفلات الخاصة
بغني فيهو ثم ضاع الامس مني
غني محمود الاغنية دي بي صورة مختلفة خالص خالص خالص
ابدا ماسمعتها بي نفس الصورة لا من قبل ولابعد المرة دي
وانا متاكد انو التسجيل ده نادر جدا جدا جدا
حافتشا وانزلا هنا
يا وليد محمود حالة غريبة مااااااااا اظن تتكرر
في البيت لامن تشغل ليك فنان دايما بتلقي زول بنقنق
ياخي عليك الله غير لينا الزول ده
ياخي كدي دقيقة شغل لينا فلان
ياخ عندي رغبة اسمع علان
الامحمود ياوليد
تلقي نفسك انت واخوك الاكبر منك وخالك الاكبر منكم انت الاتنين واختك الصغيرة كلكم بتسمعو
وكل زول فيهم مقتنع تماما انو محمود ده حقو
ربنا يرحمو يا وليد
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: خالد عبد الله محمود)
|
زمنًا فات وغناينًا مات ..
ظللت وعلى مدار اليومين الماضيين أحاول تجاوز هذا الحزن القادم..
لا .. ليس هناك أدنى إحتمال للتجاوز ولكن .. كنت .. بالاحرى .. كنت .. أحاول ترتيب حزن يليق بهذا الموات العظيم .. حزن يتوهط -كعادته- وبكامل قسوتة الوحشية فى باحة الروح .. يمارسُ إيغاله العنيف فى الخلايا .. يصيبُ الوجدان فى مقاتل كثيرة .. لا تبدأ من حكايات الصبا ولا تنتهى عند هذا الإغتراب الماحق للروح .. أو حتى عند نهاياته العصبية الملتهبة بفعل الملح والتكلس والصدأ .. صدأ الروح .. صدأ المنفى
محمود عبدالعزيز .. ماشي وين آ زول ؟!
الكلام ده بدرى جداً ياخ !!
ثمة أغنيات لم تأت بعد ..
ثمة حكايات عشق لم تنسج فصولها بعد ..
ثمة وطن ليكون ..
وطن, يكون نكون ..
والوطنُ السمحً يكون نكون ..
وتماما وكما اوميء الفيتورى ..
ام لعله ما كان الفيتورى يا وترية الهاجس والحرف؟!..
الفيتورى ؟! ..
ويترايء لى وكأنه راية قافلة تغرق - شيئاً فشيئاً - فى الرمال ..
أو ..
حين يأخذك الصمت منا
فتبدو بعيداً..
كأنك راية قافلة غرقت
في الرمال ..
قالها لعبدالخالق ..
عفوا ..
قالها نحو عبدالخالق إثر مقصلة ..
نحو أجمل حكاية سودانية على الاطلاق ..
ومقاصل الموت –الآن- تاخذ محمود عبدالعزيز بعيداً منا ..
وكأنه راية عشق غرقت فى الرمال ..
أين حِميدْ ؟!!
من ليزيح وجه الموت عن محمود قليلاً..
كى أحاول ترتيب هذا الحزن المضاف !!
ترى!!
من سيطربنى ب "خلى العيش حرام؟!"
عفواً .. من سيطربنى حد الثمالة ب "خلى العيش حرام؟!"
وبذات ذاك الإيقاع, ما يرتكبه محمود فى روح روحى
..
يا الله ياااا الله ..
يا لهذا الحزن الشاااااهق فى الروحِ ..
ومحمود – أعلمً يقيناً- أجمل من غنانى بعضاً من تلك الأغنيات الفارهات ..
تذوقت –على صوته- طعماً جديداً لتلك الأغنيات القديمة فى الروح ..
يااااا هذا الحزنُ كُنْ ..
كُنْ حاضراً فى الروحِ و.. أشتعلْ
وياااا توب الكِرِب ..
فلتعلن الآن مواسم الحداد ..
ف .. زمنًا فات وغناينًا مات ..
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: محمد حيدر المشرف)
|
مرحب الصديق ود المشرف
| Quote: ثمة أغنيات لم تأت بعد .. |
هي هذه يا محمد ...لم اقتنع ابدا طيلة حياة محمود عليه الرحمه ..
انه قد وصل حدود امكانياته ...
في اي اغنيه دائما ما كنت احدث نفسي واقول : جميل ، جميل ..
لكن...
لسع يوجد المزيد ... ما حكيت صوتك وامكانياتك شديد يا حوده
مقتنع بانه يغني من طرف مزاجه وامكانياته
وان حدود امكانياته مؤجلة الى حين في اغنية لم تولد بعد
ثم اتى الموت وسرقني هذا لرجاء والاتنظار والامل
محمود ما غني كل البقدر عليه والفي امكانياته .. هذا ظني
لكن حتى الذي قدمه من طرف امكانياته .. سبق به كل انداده وكثير من الرواد ..
فله الرحمة
ونرجو الصبر والتعويض
وحواء ولادة
مودتي
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: محمد عبد الماجد الصايم)
|
..
لي تقريباً سنة بقرأ ... وما بتداخل
لكن غلبنى
"محمود أقوي من طاقة الشوف بدون مداخلة"
روحو طاغية فى كل مكان .. وصوتو لسه مالي الحتة "
وليد ..
فتشتك يوم وفاتو .. لقيتك لابد
لكن مافى شي كان ببكيني .. قدر كلام "ابو غسان وأم غسان" الكتبوهو على صفحات الفيسبوكـ ...
ـــــــــــــــــ
عمر الفاروق .. اول مرة أتكيف من جميع مداخلاتك فى بوست :)
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: وليد محمد المبارك)
|
Quote: الاخ يحيى قباني
كلامك ده كلام مهم شديد خلاص
اعتقد انه ده مسئولية المجتمع المدني .. يعني مفروض منبر زي سودانيز اون لاين .. يتحول بعد كده الى مؤسسة ثقافية .. ويتبنى مشاريع زي دي
لانه اساسا يمتلك راس مال بشري مجتمع في حيز اسفيري واحد ... ودي اس الشغلانة والحاجة الصعبة فيها
يعني لو بكري عمل مبادرة زي دي
ونادا ليها ناس الومسيقى الزملاء في المنبر (موصلي ، حمزة سليمان، عوض الله ، والاخرين )
وناس علم الاجتماع وبقية العلوم وشكل ليه قروب سغير يعمل الدراسة دي
وشغلانة زي دي تمويلها بجي من اماكن كتيره اليونسكو ممكن تمول شغل زي ده
وزاتو بكري يكون عمل برك ثرو في شغلانة المنابر دي ونقلها نقلة كبيرة من الاسافير الى الواقع |
اخي الفاضل وليد ...
تمنيت لو ان الجهد المبذول في البوست الآخر الخاص بالاستاذ حمزة سليمان و الاستاذ الموصلي ايضا
تمنيت لو بذل المجهود هنا في ما قد يثمر بغدٍ مشرق و اعطاء كل ذي حق حقه ...
صدقني يا وليد ... لو انصرف الجميع في مثل تلك الامور ...
سينسي الناس محمود كما نسوا غيره...
صدقني انا لا انافق ...انا لست من جيل محمود عبد العزيز ... ولكني قرأته في سطوركم و احسسته في حسرتكم عليه ...
فرجائي ... لا تبددوا الطاقات فيما لا ينفع الناس ...
هذا البوست احق بالمجهود ... و انت القائل انها مسئولية ...
فلنتكاتف هنا ...
| |
|
|
|
|
|
|
|
|
|
Re: عمر الفاروق .. غناينا مات .. فهل زماننا فات ؟ (Re: عمر الفاروق)
|
أساسي يا حبوب ..
من أغرب وأعجب الحاجات اللي حصلت لي إني ولأول مرة أحتفي بالموت وبطريقة مختلفة وعجيبة مع من أحب..
والله انا زاتي لمممن مخلوع وما لاقي ليها تفسير ..
في العادة متى ما فقدت من من أحب بتلقاني حاولت وبقدر الإمكان أبعد من أييي شي بيذكرني بيهو وأبدا أنغمس في حاجات ما عندها علاقة بيهو ..
كتير من الأصدقاء والأهل والأحباب فقدناهم والواحد مننا بيحاول قدر المستطاع ينزعهم من ذاكرته من حبو ليهم عشان ما يتوجع لمن يتذكرهم ..
تصدق ومع إنو حبي للراحل نادر خضر ليس بمكانة وحب وتاريخ محمود لكن ما سمعت بالفاجعة وتاني انا ما قدرت أشوف أو أسمع نادر خضر لفترة طويييلة بعد موته .. ولحدددي أسة أييي لقطة بيظهر فيها وش المرحوم نادر يا غييرت القناة يا زحيت منها ..ممكن أسمع على مضض بس بكون حزييين ..
أها الحصل لي مع محمود ربنا يرحمه كان شي عجيييب..
من قبل موت محمود وانا مدااااوم على سماع شاريط محمود وبإستمراااار شرايط حفلات شرايط ماستر أوركسترا وأورغن قديم وجديد ووالله يا وليد عندي شريط كان ما بيطلع من العربية لي مدة 6 شهور بسمع فيهو ..كان تسجيل لي حفلة فيهو حنيني إليك ومع السراب و لقيتك في زمن ضايع و جايي ليه تهمل إيه والدنيا بتعلم ويا عمر وخلاص يا قلبي كان خاصم والبنريدو تايه..
أها لمن اتفجعنا بي خبر موت محمود ربنا يرحمه لقيت روووحي والله وبدووون ما أشعر إني بحتفي بي موت محمود بي طريقة غريبة ..نعم هو إحتفاء ..لأنو لقيت روحي مشيت العربية وقعدت اسممممع في محمووود كدااااا . سمعت شرايطو الفي العربية كلللها يوم وفاته ..واحد ورا التاني ..أبكي وأغني.. افرح وانا بسمع صوته ..وأردد براااي كده والله ياااخ الله يرحمك يا محمووود عبد العزيز .. مشغل السي دي ف يالعربية فيهو أسطوانة خوف الوجع.. المسجل فيهو شريط الحنين .. الفلاش موصل فيهو حفلات وتسجيلات محمود.. كنت بخاف جداً لو زول ركب معاي العربية يقوم يفتكر إنو أووو حركات السودانيين بعد الفنان مات عامل فيها بيسمعو تلقاهو ولااا بيعرف ليهو شي زاتو..عشان كده كنت حريص إنو ما يركب معاي زول في الفترة ديك ..
إكتشفت إنو انا وأساسي حزننا عن محمود كان متناقض..
أساسي ضرب لي مخلوع بيقول لي شااايفك قدرت تتعامل مع موت محمود بي طريقة عادية واتعايشت مع الخبر..
إكتشفت إنو هو لمن سمع الخبر كسر الاسطوانات والشرايط بتاعت الغنا وقرر إنو تاني ما يسمع غنا !!!
قلت ليهو والله يا اساسي انا زاااتي ما عارف الحصل لي شنو .. ولييي انا كنت مختلف من الناس ونهمت صوت محمود أكتر بعد موته بل وفي لحظة بيدفنو فيهو انا كنت بسمع فيهو ..ولو إنو كانت بتنازعني مشاعير دينية وزوجتي بتدعوني إنو حرااام عليك أقفل الشرايط كده بتعذبو في قبرو أكتر خلاااص محمود مات يا عمر و مفروض تموت معاهو أغنياته عشان إنتو مفروض تدعو ليهو بدل تعذبوهو بي تشغيل اغنيات الدين مختلف في تحليلها من تحريمها..
محمود ده يا وليد بعثر الحاجات جواي بي صورة بقيت معاها ما عارف الصاح من الغلط ..
| |
|
|
|
|
|
|
| |
وليد محمد المبارك
حيدر حسن ميرغني
عمر الفاروق
ناذر محمد الخليفة
حسبو عكاشة
حافظ انقابو
الصادق اسماعيل
محمد عبدالرحيم
زياد جعفر عبدالله
يحي قباني
Faris Mohamed
عصام علي أحمد
عبد الله فقير
خالد عبد الله محمود
محمد حيدر المشرف
محمد عبد الماجد الصايم
الملك
اساسي
Elmosley
فيس بوك
تويتر
انستقرام
يوتيوب
بنتيريست