|
|
 زمان كنا بنشيل الود / اتكاءة في الزمن الجميل ،،،
|
من الصباح انا معلق في المقطع اعلاه والله حتى في سري ما قادر انفك منو ودا نتيجة لواحد من الاحتمالين يا اما انا كبرت او هروب من الحاضر لانو الاغنية دي بالذات بتذكرني زمن الرادي ابموجة ومسلسل الدهباية وقطار الهم و ما يطلبه المستمعون ونشرة الساعة تمانية الكانت بذيعوا فيها اخبار الوفيات زمان البيت مدروس شفع مسئول منهم زول واحد اسمو يابا ،كساوي واكل طبعا زمان القراية والعلاج مجان اااااااه من زمن كنا بنشيل الود كل الناس بتصبح (بكسر الباء الاولى وتشديد الثانية)على بعض حاجة كلتوم اصبحتوا كويسين اهلا يا حاجة عشة قالوا احمد وديوسف ماشي يزور ود القصير راقد في مشتشفى سنار والله سمعت بس الجماعة قالوا حالتو متاخرة شوية وركبوا ليه درب هو عندو شنو يالحاجة قالوا عندو تايفود و ملاريا ، الله يديه العافية ومن الصبح تحس بالحركة الدؤوبة واحدين ماشين الحواشات و الجناين اوماشين المكتب يصرفوا سلفية الحش والكديب وواحدين مركلسين بس ما بنوموا بصحوا من الفجر وما شايلين اي هم للدنيا بياكلوا وبشربوا ونصت نهار بتجمعوا في اي ديوان وهاك يا هارت وحريق محل ما اتلموا بفطروا وبتغدوا وعلى طول التمرين والله زمن جميل كبرنا وكبرت همومنا واحلامنا لا قادرين نحقق احلامنا ولا قادرين نرجع لايامنا الخوالي انا كل ما اتذكر اول زول سن سنة الاغتراب اقول الله يسامحو ما كنا عايشين و مرتاحين ناكل بموية نكون عندنا ولا ما عندنا حالتنا ماشة بس هسي انفتحت علينا ابواب صعب تملاها والاصعب تتناساها زمان صغار وكبار احلامنا محدودة، الاب كيف يقدر يوفر مونة السنة من العيش وشوية حاجات وكان في مقدورو لانو بزرع العيش وبجيب الويكة واللوبة والقصب للبقرات والغنم ومن الفول بعصر ليه جركانة او اتنين زيت والبصل من الجناين مافي شيء ناقص ونحن الصغار همنا نمشي المدرسة وعلى طول نمشيء نجيب علوق البهائم والتمرين وبالليل نحضر المسلسل في تلفزيون النادي الابيض باسود ونقعد نعيد في احداث المسلسل الناس كانوا بسيطين وطيبين وحلوين تلقاهم متلمين في سماية او طهور او بكاء او عرس يتلموا من الشرق والغرب البعيد والقريب يغنوا ويرقصوا ويسكروا ويتباطنوا من غير اي عقد او حساسية ونمشي السيرة لي قدام ونحضر قطع الرحط ورقيص العروس ولمن يطهروا اي واحد من ندايدنا نمشي نسرق سرج اي ح--مار او نسرق جزمة او مركوب وبعد داك نطلب منهم العادة وهي مقابل مادي رهينة استرجاع المسروقات ولا نلام بل نقابل بفعلتنا هذه بالضحك ليس تشجيعا منهم لنا على السرقة بل احتراما للموروث ودي البساطة الكن عايشنها مغمورين فرح وشوشنا دايما مبسوطة وفي رمضان نتلم حلقات بالقرب من الناس الكبار وبعد يفطروا بدونا فضل الصيام كورة ابري او ليمون او نشاء خميرة وكاننا ملكنا الدنيا وفي العيد نلبس الهدوم الجداد بريحة جاز المكنة بعد الصلاة نحوم الحلة بيت بيت دار زنقة زنقة ونرجع بيوتنا ملانين حلاوة في جيوبنا وبطوننا وغالبا ما ينتهي اليوم باسهال نتيجة اللخبطة من لقيمات الصباح والبلح مع حلاوة سعد . وفجاءة وبدون مقدمات لقينا نفسنا نتخطى تلك المرحلة الحلوة بقول فجاءة لاني لحدت اللحظة ما قادر انفك من مخزون تلك الفترة ومنتظر اي لحظة تفكرني بيها وبعد ما كبرنا حسيت باني ما قادر الا ان اعيش صغيرا ولكن الحياة فرضت علينا المسئولية غصبا عننا وبقت حياتنا روتينية باردة ما فيها اي تجديد زي الروبوت كل يوم مكرر وبقى التفكير المادي البحت هو المسيطر على التفكير تلم في القروش عشان تعمل ليك حاجة لا القروش الميتا بتقعد ولا الحاجة البتفكر فيها نلتها وتاني تبدا من جديد بامل جديد وتلقى العمر انخصم منو الكتير وسط زحمة الحياة وعكننة سياسات الانقاذ امكن تلقى ليك اتكاية في الزمن الجميل لمن يجيك خاطر او تهلوس ليك باغنية زي : زمان كنا بنشيل الود
--------------
و تصوموا وتفطروا على خير
وكل سنة وانتوا طيبين
|
|
 
|
|
|
|
علي دفع الله
كمال سالم
فيس بوك
تويتر
انستقرام
يوتيوب
بنتيريست