|
|
|
 Re: حفلة شوايقة . نار الله (Re: Osman Musa)
|
تقوللي كيم كردايشيان وجاستنبيبر وما عارف شنو .
هسع يا جماعة في أفن من كدي ؟
فرقة بي الطاقة دي وبي الحماسة دي
وبي الفهم ده وبي الجمال ده لو طافت حول العالم ونقلت بس صورة وأحدة من صورنا دي
للعالم مش كان العالم عرف حاجة .؟؟
| |
  
|
|
|
|
|
|
|
|
Re: حفلة شوايقة . نار الله (Re: saidahmed shami)
|
عزيزنا أسامة
سلامات
ورمضان كريم
يا أسامة الفنانين والفنانات السمحوا الوأطة وصبحوا الشمس ديل
من نواحي القرير .
من الفجات النبل منها سنة 1958 الساحر النعام أدم
ياخ تقول لي سحرة هارلم ؟
تعال شوف شرار الطنامبير وحرق السلوك وجديع الايادي المو خمج .
| |
|
|
|
|
|
|
|
|
|
Re: حفلة شوايقة . نار الله (Re: طارق جبريل)
|
عزيزنا طارق
سلامات
ورمضان كريم
ياخ أنت في عضامك ولا في سلوك الربابة الجابت الزيت ؟
زولك ساط سلوك الخماسي في السباعي وسلوك السباعي في الخماسي .
وأحد من أهلك الشوايقة المجانين قال : ده أسمو ال HOME COLLECTION يعني شغل بيت
يعني قطع اخضر فوق الدمبو .
يا سلام ياخ .
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
عزيزنا سيد أحمد
سلامات
ورمضان كريم عليك وعلي ناس الامارات
أكيد يا سيد أحمد أهلنا الحيين وأهلنا الميتين كانوا حاضرين العرس ده .
أكيد الصفقة دي وقفت المقابر علي فد كراع .
قالوا يا سيد أحمد الارواح الرحلت بتفرح بي فرح العايشين وبتشارك في الفرح وفي الترح .
يعني بيجو وما بينسوا .
وهو نحن متين نسينا الرحلوا ؟؟؟؟؟؟؟؟؟؟
لهم ولنا الرحمة
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
الفيديو بتاعك دا يا عثمان ربما يتسبب في حدوث حالات هجرة معاكسة..
أنا ما عارف الشوايقة ديل يا ودموسى ، أخدوا إذن من الوكالة الدولية للطاقة الذرية للشغل دا ول لا!
لا أظنهم حصلوا على إذن لأني ما شايف اي زول من Department of Safeguards ، ياخ الدهجي ما دهج نصاح
ووالله الواحد مشتهي يحضر ليهو حفل بهذا الأداء الصادق المُسكِر وينضِّف الفات والجاي في غسله واحده..
بالله شوفت الشابات ديل جدعن الآيفونات و سوَّن شنو ؟
شُفت الطلع في راس المزيره في فيديو الشامي ورسَّلو ليهو الورشه فوق!!
هل سمعت الذي بكى طربا في الدقيقة 3:03 من فيديو الشامي؟
وبرضو تقول:
| Quote: كيم كردايشيان وجاستنبيبر |
| |
|
|
|
|
|
|
|
|
|
Re: حفلة شوايقة . نار الله (Re: طارق جبريل)
|
عزيزنا طارق
سلامات
البت بالغت في الرقصه .
البت في الدقيقة 3 لفت التوب المهفهم علي طريقة تمثال الحرية ( نيويورك )
THE STATUE OF LIBERTY وفي الدقيقة الرأبعة فدعت وكسرت شمال بلا عضم ومسكت فرامل في الجو .
ودي كانت اللحظة الصرخ فيها الفنان وصرخ السلك وصرخت الأمة .
عليك الله يا طارق وأرجوك وبليز تجيب لينا عرس ود كجراي .
قالوا اليوم دأك مراكب المجاملة السمحة ما وقفت وما أنو البحر كارب .
...
عليك الله يا طارق شوف البت دي جاملت ود عمها في عرسو قدر شنو .
ده ما رقيص مطلوق ساكت . ده رقيص صادق محبة الله .
وزي ما قال : أيه الدنيا غير ........
| |
|
|
|
|
|
|
|
|
|
Re: حفلة شوايقة . نار الله (Re: Kabar)
|
عزيزنا كبر
سلامات
ورمضان كريم عليك والاهل
نحن سيرة رمال حلتنا بس سيرة ساكت بتخلي شعرة جلدنا م######ة 48 ساعة ياكبر .
تلك البلاد لا تخرج الا الأنبياء كما قال : شيخنا الطيب صالح .
..
عندنا صاحب يا كبر قال : في حياتو شعرة جلدو ######ت مرتين بس يوم .. يوم جرتقو .. يوم لبخو ا المحلب .
ويوم .. يوم دقوليه ال VISA للحج .
بس تاني لا ######ت ولا حت###### بعد ما وصل سعر رطل الشاي لي ده الحد .
ياخ الحياة بدون طنابير صعبة صعبة .
| |
|
|
|
|
|
|
|
|
|
Re: حفلة شوايقة . نار الله (Re: محمد المرتضى حامد)
|
عزيزنا محمد المرتضي
سلامات
ورمضان تصومو وتفطرو وأنت كامل العافية .
يا محمد صاحبك حميد ربنا يرحمو قال : أمنيتو في الدنيا
ياريت التمر ياريت لو يشيل كل تلاتة اشهر .
تخيل يا محمد كنا حنكون وين لو كلامو ده صدق ؟
الظروف صعبة جد .
الحال كعب يا أخوي .
الحال مو حال .
وده سبب الدهجي .
ده سبب التمرد ده سبب العجاجة القامت .
ده رفض علي طريقة توباك وعمك بوب ود مارلي .
البنات الجدعن الأي وعجكنو صباحي عندهن كلام .
دبكان الأرض ده معناتو بلا خم بلا خج بلا سدود .
دايرين شفخانات ومدارس ودايرين EASYLIVING .
والله يا محمد مشتهين السودان لدرجة الدبرسة .
| |
|
|
|
|
|
|
|
|
|
Re: حفلة شوايقة . نار الله (Re: وضاحة)
|
عثمان،
عاين، اليوم كان جمعه والأمه مجتمعه ، أها ، نص مشاهدات الفيديو بتاع الشوايقه كانت مشاهداتي براي..
ياخ لو كان الفيديو HD كان فاز بجائزة النخله والبركاوي والقُنديله الذهبية مش سعفه بس..
يا ودموسى في السودان الحاجات مختوتا غلط، يجيبو أحدث كاميرات يصورو بيها الناس الغلط الذين لم يفتح
الله عليهم بكلمة صدق ويشتموا في الخلق صباح مساء ولحس كوع وتحت جزمتي وأقطع صباعو ..إلخ بينما
هؤلاء المبدعين يصورهم هاو من خلف الخيش بنوكيا موديل جراهام بيل..
غايتو ..
قِسَم..
-
وضاحه.. كل سنه وانت طيبه يا عزيزتنا..
بالله زهير دا كاتبي المفضل للعام 2012 وربما 2014 لو حيينا فما تلاوزي ليهو..
-
يا عثمان : كومبيوتر بكري بالتِشِخِّت عمل مداخلتك لحبيبنا كبر زي السلك الشائك.. ياخ بكري
دا على مرمى صحن زغني منك ، بالله قول ليهو يبطل التشخيت دا لأنو ما صاح وكلمة كـلـب دي
لاتأتي دائما على سبيل الإساءة رغم أن الكلاب مظلومة في الحته دي ..
شوفو هسه شطب ليك كم كـلـب.
-
رسلت اللينك دا شان تتم الرزحي http://www.youtube.com/watch?v=2_DdKPj5TJk
| |
|
|
|
|
|
|
|
|
|
Re: حفلة شوايقة . نار الله (Re: محمد المرتضى حامد)
|
عزيزنا محمد المرتضي
سلامات
ياخ SYSTEM مقص صاحبك بكري ابوبكر ده عجيب .
ختان للحروف علي طريقة قوقل . ياخ ال ك ل ب لا هسع دمو ينقط
عليك الله تشرب الموية وتقوم صوف . تشوف شريط زولك طارق الجابو ده .
البت دي التقول بترقص بي ال G P S
كسرات زي دي ما حصلت في تاريخ الكورة العالمية .
ما يجي زول يقولينا روجي ميلا عمل نفس حركة بت عم العريس دي .
يا محمد تابعت اللينك بتاع الحبش حقك الجبتو .
سبحان الله .
سألت يا محمد أقرب حبشي لي مكان شغلنا عن معاني كلمات الأغنية دي .
قال : كلمات الأغنية بتقول
شيلي عمري كلو بس ردي السلام ولا خليني أسيب الحبشة و أرجع عطبرة . هههههها
| |
|
|
|
|
|
|
|
|
|
Re: حفلة شوايقة . نار الله (Re: وضاحة)
|
Quote: بين العجاجة و شرار صفقة الصبيان ودفقة رقيص الصبيات في الساحة
قامت دنيا من الجمال دنيا من السماحة . |
أستاذ عثمان موسى سلام ورمضان كريم ... يا أخي الفيديو الأول دي حفلة عرس في الصحافة ... غايتو أنا عرفت فيها بعض الشخصيات ...
بس ربة صاح .. الشوايقة ديل ناس مرهفين ورقاصين ...
تحياتي
| |
|
|
|
|
|
|
|
|
|
Re: حفلة شوايقة . نار الله (Re: وضاحة)
|
عزيزتنا وبتنا وضاحة
سلامات
ورمضان كريم
الحمام البنقذ ده كلو حمام سن 19 .
ده حمام من جيل ليدي غاغا بس برضو متمسك بالقديم الاصيل .. والجديد المفيد .
ده جيل في رقيصو متسامح ومتصالح .
جيل زي ما بقولوا ( AMAZING )
وزي ما قال الفنان : يا الصلاح يا الصلاح .. يا الصلاح يا الصلاح
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
Quote: تقوللي كيم كردايشيان وجاستنبيبر وما عارف شنو .
هسع يا جماعة في أفن من كدي ؟
فرقة بي الطاقة دي وبي الحماسة دي
وبي الفهم ده وبي الجمال ده لو طافت حول العالم ونقلت بس صورة وأحدة من صورنا دي
للعالم مش كان العالم عرف حاجة .؟؟ |
الأخ عثمان موسى رمضان كريم تصوم وتفطر على خير
هل سمعت بمهرجاني Noting Hill Gate and Rio De Janeiro الأول في البرازيل بالطبع والثاني في لندن. هذان مهرجانان تعرض فيهما شعوب العالم الغربي والشرقي فنونها وفلكلورها. تاريخ مهرجان لندن في آخر يوم أحد من شهر أغسطس من كل عام. ومهرجان ريو في أول أحد في شهر مارس من كل عام.
قصدي لماذا لا نتحد مع بعضنا شايقية وجنوب كردفان لنعرض فنوننا هنالك. من جنوب كردفان نأتيكم بالكمبلا والنقارة والمردوم وهي بالطبع من فلكلور البقارة في ولاية جنوب دار فور أيضاً.
ويمكن لكل الولايات السودانية المشاركة في المهرجانين وكل ترتيبات الإشتراك يمكننا القيام بها.
الأخ عبد الرحمن المشهور بمامان في الرياض زميل ودفعة وصديق قديم يمكنه المشاركة وله خبرة وضلع كبير في هذه المواضيع.
تحياتي.
كبـّاشي الصـّـافي
| |
|
|
|
|
|
|
|
|
|
Re: حفلة شوايقة . نار الله (Re: cantona_1)
|
| Quote: شيلي عمري كلو بس ردي السلام ولا خليني أسيب الحبشة و أرجع عطبرة |
واجي أسكن حِداكا؟
كانت أرض المَحَنَّه فغدت أرض المِحنه..
-
بالله دا كلو في Sela Bey دي ؟
| |
|
|
|
|
|
|
|
|
|
Re: حفلة شوايقة . نار الله (Re: cantona_1)
|
عزيزنا كباشي
سلامات
ورمضان كريم
شغل جماعة نوتيغ وجماعة ريودي جانيرو يا الكباشي يا أخوي مو طبيعي .
عجاجة الشوايقة يا حاج الكباشي هنا وقفت صريف
لك التحية أخي كباشي
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
عزيزتنا الأخت علوية
سلامات تصلك عبر الفيس بوك
ورمضان كريم عليك .. جماعتنا ديل كيفوك الحالة بس من متابعتك للفيديو
ياخ ديل لو وصلتيهم كان شفتي الكرم الحاتمي الاصيل .
تحياتي
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
يا عثمان ياخ الواحد وكت يسمع الطنبور يبقى زى الدرويش يجى جارى حفيان ..
حفله زى دى الواحد كان حضرها كان روح نعلينو وطش من البيت شوف هنا عبدالله محمد خير ربنا يرحمو وصفها كيف
ترانى حلفت بى الله
وتانى بقول وحات الله
وكت السمحة فى هيباته تتجلى
تشيل خطواتها فى ايقاع
حلات ايديها فى التله
تودى صديرا قداما
تسيبو سبيبا يندلى
تخلى الداره فوق نيرانا تتغلى
شوف الناس ديل برقصو وكانهم يتنافسون ....
ياريت لو كنا هناك ..
| |
|
|
|
|
|
|
|
|
|
Re: حفلة شوايقة . نار الله (Re: منصوري)
|
والله يا منصوري وصفك لمتقنات الرقص لا يتأتى إلا من عليم، ياخ جملة البلازما الوصفية ( تموع البت بلا الفرصة) دي
واحدة من حالات المادة النسوها ناس الكيميا لكنها استدركها علماء تحضير الأرواح في حالات الخروج من الجسد ،
أما تعبير( تتكسر في قواما) فقد جهجه فهمي بعد ثبات لقول الفيتوري ( أتمرغ في شجني ، أتوهج في بدني) واتجه بي
إلى ما يقارب حالة التسامي Sublimation إياها..
..
عارف يا منصوري، كانت في واحده شايقية في الحي ، وكحال معظم الشايقيات ، قمة في الأدب والجمال، طالبة في
الهندسة ومعروفه بالجدية بمثلما اشتهرت به من عبقرية ومرجعية في الرياضيات والفيزياء، كانت تمشي في استقامة
هادئة دون أي احتمال للتلفت حتى لو دايرا تقطع الشارع أو حتى لو انفجرت قنبلة في الرصيف ، كان البعض يلقبها
ب ( قائد الأسطول) ، أها يوم في حفل في الحي قام الخطير صديق أحمد ( القال كان تاجوج بقت بالرتبه مشهوره انت
فوق تاجوج زادوك دبوره) قدم عرضا استثنائيا فيه كثير من شغل تحريك الأشياء من على البعد وحركات ال Telekinesis
غنى ليلتها غناءا من المستوى اليصادر عقول العلماء ووقار الشيوخ والمقاعد، وبعد ثبات وصبر أيوبي قامت زولتك
في انتفاضة مجيدة نسفت جدار برلين وخط ماجينو مع بعض ودخلت الحلقة ، ياخ دي كانت قصة عجيبة ،
في مساحة متر مربع فقط عملت أي شئ ممكن يتعمل في (ناسا) والشركات التي تتعامل معها ، ثم انطلقت كتشالنجر
يمين شمال ارتقاء نحو السماء انخفاض ميالانات بالطول بالعرض أسطولنا يهز الأرض ، وقدمت دروسا في الاستاتيكس
والميكانيكس والكهرباء الساكنة والقاعده في السَهَلة وغرودة عيون ضاع إنسانا ما أنزل الله بها من سلطان،
كانت تحرك الرأس والرقبة مع ثبات اسفل الجسم كما لو أنها مزودة ببلالي ، مع الإبقاء على الكتف ووسط البرازيل
كمحور ارتكاز ، ثم العكس، إستدارة يمين وتلة يدين ومناورة نصف دائرية مع رجوع سريع مفاجئ للخلف ثم الأمام
نحو اليسار ثم تحريك للقدمين في نفس الموضع بطريقة المون ووكر ، ضم تبادلي للأطراف ثم فرد لها وعلاقات سياسية
متذبذبة بين الرأس والصدر والشعبي والوطني وكما قال الأمي ( كل شي يا عزه من بعده ... اضمحل وبعضه خاف من بعضه) ،
أها اشتغلت سيسي في سيسي فأصبح صيوان الحفل كمحيط الحرس الجمهوري مع اللخوان ، أفاعيل يا مولاي مناوئة لكل
قوانين الفيزياء ، أحد رفاق الحي من الأكاديميين السُذَّج سألني: إنت يا مرتضى متأكد دي الخوارزمي زاتا؟
قلت ليهو بالحيل وسألتك بالله ما تشغلني.. دعني أحيا ، دعني أعيش.
يا منصوري الشغل دا ذكرني كلام عبدالله العشوق في الحته البيكورك فيها بادي ويقول وروروووووك :
شوف جريهن كيف باقَصنو
خطوه خطوه المشي نقَّصنو
والردف بالحشا رقَّصنو
يلا ياقُنَّاص روقو صِنُّو
والتلذذ في الارتياح
يا سلام على الميكانيكا والبعد الرابع وأندرياس إنييستا واعذرني للإطالة والإندياح .
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
يا محي الدين يا أخوي
المنطقة دي كلها محتاجة أكتشاف جديد
المكانات دي مسكونة بي سماحة وسحر ما عادي
تابع كلام أبوساندرا .
والنقيف فيه ونفكر .
الأنقاذ قدر ما خجت وقدر ما لكت وعجنت وقدر ما صادرت برضو
الطنابير هي نفس الطنابير .. قوية يا محي الدين حرب الطنابير .. قوية حرابة الصفقة والطمبرة
والمحافظة علي التقاليد والسماحة .
| |
|
|
|
|
|
|
|
|
|
Re: حفلة شوايقة . نار الله (Re: مجاهد محمد الهادي)
|
عزيزنا أبوساندرا
سلامات
ياخ العالم ما جايب لينا ولا خبر .
تابعت برنامج في قناة من القنوات المهتمة بي الفنون في أمريكا الجنوبية .
كلام كتير عن رقصة الصلصة والمجهود وحرق السعرات الحرارية .
هههههههههههها
قول ليهم يا أبوساندرا اليجو يشوفوا الحريق الجد هنا .
| |
|
|
|
|
|
|
|
|
|
Re: حفلة شوايقة . نار الله (Re: MOHAMMED ELSHEIKH)
|
عزيزنا محي الدين شيكاغو
سلامات
يا محي الدين ياخ زي ناس بيونسي وناس نيكي مناج ديل
الواحدة بكون عندها كورجة من المدلكين والمدربين والمنظرين . عندهن جيش من الاطباء و الشغالين والمتابعين
قبل طلوع المسرح وبعدو .
الزول البختار الملابس لحفل تي أي ساعتو بي خمسة ألف دولار والهدوم ما منو هههههههها
وموضوع الاختيار ده بياخد زمن .
تعال شوف بناتنا ديل .
وشوف الطاقة حقت ربنا .
بعد حش البرسيم وبعد حش قش التناقير وبعد حليب النعجات وبعد طلوع النخلة تتبرد بصابونة عادية مع شوية كركار
مع مروادين كحل مع التوب المهفهف الداسنو للأيام .
وتجيك تسوي زي القالوا عمك عبدالله ده .
يا محي الدين ياخ الطاقة دي بتكون من التمر ولا من الموية ولا من الله ؟
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
عزيزنا محمد المرتضي
سلامات
كنت يا محمد والحمد لله من الناس الحاضرين عرس صاحبنا عماد بخيت محمد علي
عماد كان في لندن والعروس في الثورة الحارة 23 .
9 لواري يا محمد جات من القرير للثورة 5 لواري نسوان و4 رجال + لوري خرفان ودقيق
يعني أي زول جا يجامل بي نفسو وبي خروفو وبي طمبورو . تخيل ؟
والشيالين من هناك جو حفيانين ومستعدين .
والله يا محمد الليلة كانت مونديال وصاحبات العروس كانن من الداعمات والمعجبات بفنون صديق أحمد .
بعد ما مشيت لندن ومعاي الشريط يا محمد قابلت الصديق الصحافي المرحوم حسن ساتي وكلمتو عن زوأج عماد .
العروس كانت لسع ما وصلت لندن . أها بعد حسن ساتي مع الجماعة شاف الشريط أتكيف لامن دموعو جرن
و قال لي : يا عثمان الناس المجاملين الجو ديل يكون في منهم القطع النيل عوم لاف جلابيتو في رأسو من الشرق للغرب عشان يلحق اللواري
ويصل الثورة و يشارك . الناس ديل سرهم عجيب .
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
ههههههههههه
زولنا محمد المرتضى، والله زبطتا الموضوع زبطة صاح..
هو شوف بدون أي تحييز.. نحن شفنا رقيص الدنيا دي كلها.. داخل السودان وخارج السودان الشعوب التانية.. مافي مرة بي تجيد الرقيص على الإطلاق زي ( الشايقيات) على الإطلاق.. هو موش رقيص وخلاص.لالالالا..
حاجة معشعشة في الوجدان.. دين... معاملة... مجاملة... فطرة مجبولين عليها... فن... إبداع... يعني موش رقيص والناس تتفرس في تفاصيل جسد البنت بصورة قاتلة لا لا.. الفرييج الفوق لى فوق يعني وبس.. لكن الناس بتنظر للإبداع من حيث هو إبداع والتطريب.. وإجادة الفن
زي جماعتك ديل القلتهم يا محمد المرتضى، وزي ما قال ليك صديقنا عثمان موسى صاحب البوست.. ديلاك عندهم مدلكين وواحد يشيل هدوم الرقص.. وواحد يستلم العداد وواحد يفتح باب السيارة وهكذا.. أما دي حقتنا دي فن بي بلاش بلا قروش (قَالَ لَوْ شِئْتَ لَاتَّخَذْتَ عَلَيْهِ أَجْرًا )
زي ما قال ليك عثمان موسى يا محمد المرتضى، كانت تحش في حوض برسيم.. اتشطفت بس؟ شوية دهن كركار.ز مرواد مروادين بتاعات كحل.. توب خاتاه للمناسبة الزي دي؟ وجات الحفلة حلفة قريبا.. خلبت الألباب بفنها بسحرها
والناس ديل سرهم عجيب زي ما قال عثمان
أما زولتكم دي يا محمد المرتضى.ز الكانت تمشي في الشارع لفتة ما تتلفت من شدة الأدب
لما جات حفلة الطنبور أبدعت فيها.. اقول ليك البت والمرأة عندنا البي تجيد فن الرقيص ، تجيها شـَعـَرَة حتى هي زي زول دق الصوت. ( البطان) ترجف..ترجف.. لو ما أخدت رقصتا دي تمرض؟ تصدق تمرض.. علاج.ز هي قد تكون ما عندها اي اهتمام بماذا قالوا الناس عنها..
هسه زول الصوت ده يندق بدون إرادتو ، حتى لما تتملكو شهوة لذة الدق تلغي الألم بعضهم الذي يجود الحكاية لايشعر بالألم.. دا زول الصوت الأصلي.. العقل يكاد يغيب.. ومصدر الألم الذي يعطي الإشارات الحسية لأعصاب الألم هو العقل.. يغيبزز يكاد يفقد الوعي.. موش زي بطان أولاد الزمن ده! ديل الواحد لو زدتو أكثر من خمسة قشطات يجري.ز أو قد يكون متفق مع واحد من الدارة من جوة يقول ليهو العريس ده لو زادني أكتر من خمسة قشطات تعال شيلني وقول حرم..
..
الرقيص فن ذوبان الجسم كلو مع تناغم وانسجام زي ما ذكر محمد المرتضى زولنا..
شوف هسه الرقاصات ديل البي يجيبوهن في التلفزيون مع إيقاع الدليب.. تلقاها الواحدي تبرطع ساكت وتنقز بي كراعا زي الصفاقين.ز عيب عندنا المرة والله البنت تنقز بي كراعا في الدارة.. تقسيمات جسم.. موهبة.. رقبة زي ما قال حسن الدابي..
عثمان موسى قال الناس ديل سرهم في أكل التمر والله وحاجة من الله والله شنو؟
هسه حتى رقيص حريم البلد العيشات هناك موش زي رقيص حريم الصعيد والانتقلن للمدن والإغتربن مع أهلهن..
| |
|
|
|
|
|
|
|
|
|
Re: حفلة شوايقة . نار الله (Re: منصوري)
|
الطيب صالح يتذكر
عرس إسماعيل ود صبير وبنت عبد الله عباس
بتصرف قليل من جريدة الخرطوم
.................
كان في بلدنا غابة كبيرة من أشجار الطلح
وقد نمت وازدهرت لأن الحكومة كانت تمنع منعا باتا قطع أي شجرة
إلا بإذن خاص في حالات نادرة
من تلك الحالات النادرة
قطع طلحة العريس
فقد كان من طقوسهم في الأعراس
أنهم يمشون إلي الغابة في زفة عظيمة
فيقطعون شجرة طلح ويعودون بها إلي دار العروس
وأذكر وأنا صبي في الأربعينات عرسا كانت له شنة ورنة
من تلك الأعراس التي يؤرخ بها
وتظل أصداؤها تتردد زمنا طويلا
كان العريس إسماعيل ود صبير من أهلنا ناس ( كرمكول)
وكان أخا وحيدا بين عدة أخوات
وكانت العروس بنت المرحوم عبد الله عباس
الذي كان يومئذ من كبار موظفي الجمارك،كان من أوائل خريجي كلية غردون من أهلنا
إضافة إلي أن أم العروس كانت ابنة عبد الحليم ود فضل عمدة العفاض
إنما الذي أعطى العرس بهاءه ورونقه وأصداءه البعيدة فوق ذلك كله
أن أخت العريس ، زينب بت صبير
عملت لأخيها سيره لم يحدث مثلها من قبل ولا من بعد
كانت شابة وضيئة الحسن
متزوجة ولكن لا أطن أن سنها تزيد علي خمسة وعشرين عاما
أذكر لونها العسلي وثغرها البراق ووقفتها النبيلة
وصوتها العجيب الذي تعجز الكلمات عن وصفه
بدت لي تحت ضوء المصابيح
ولا بد أنها ظهرت كذلك لأهل البلد كلهم ، كأنها طيف ملائكي جل علينا من كوكب آخر.
سرنا معها كالمسحورين يحدونا صوتها الأسطوري
من دار العروس في (كرمكول) شاقين البلد من الغرب للشرق حتى وصلنا الغابة عند ( دبة الفقرا)
ظلت تغني كأنها ترتجل حتى قطعنا الطلحة وعدنا بها إلي (كرمكول)
ربما أكثر من ثلاث ساعات،وربما أربع ،وصوتها يزداد عمقا ومدي وجاذبية
والصور والمعاني تصل إلي وجداننا منها مثل رفيف أجنحة القطا
جيد لي ن جيد لي بي زاتو
يا نمر الخلا الفارد سلاحاتو
حين صرت أكبر سنا وأكثر إدراكا ، فهمت أن زينب بت صبير صنعت (فنا) عظيما في تلك الليلة
خلقت أسطورة لأخيها،فإذا هو أجمل وأكرم وأشجع وأغني...
وأدخلت أهل البلد قاطبة في نسيج عالمها الأسطوري ،فإذا بلدنا كما نعرفها وزيادة وإذا نحن جميعا كما نعرف أنفسنا وأثر...كذلك يصنع الفن العظيم إنما الحياة كانت بالفعل حلوة في تلك الأيام..حلوة حلاوة لا يعرف طعمها إلا من ذاقها،فماذا كان عندنا يومئذ ولم يعد عندنا اليوم؟
لم يمهل القدر زينب بت صبير ...بعد أشهر معدودات من تلك الليلة المشهورة اختطفها الموت فجأة دون علية واضحة ،رحمها الله،كانت حقيقة طيفا ألم بالبلد ثم عاد من حيث أتي.
لا توجد اليوم أعراس كالعرس الذي غنت فيه زينب ، في أي من قري شمال السودان فقد فرغت القرى من أهليها الذين تفرغوا أيدي سبأ ..اختفت الغابات علي الضفتين وهاجرت القمارى بشجرها.
النيل الرحيم الودود عادة ، ظل في العهود الأخيرة يطمس المعالم ويمحو الآثار، كأنه يريد أن يقول شيئا ..كأنه ضاق بحبسه بين الضفتين..فمتى تفتح القنوات للنهر و للبشر؟متى تهدأ ثورة النيل؟ ومتى تعود القمارى بشجرها
| |
|
|
|
|
|
|
|
|
|
Re: حفلة شوايقة . نار الله (Re: MOHAMMED ELSHEIKH)
|
عزيزنا محمد الشيخ
سلامات
ورمضان كريم
والله جد صاحبك محمد المرتضي حامد كتابتو تحيرك
وتجرجرك لمكانات أصلك ما شفتها في الدنيا دي .
زولك سواقتو عجيبة . كان كانت بي الدرب التحت القصاد ربوع ديترويت ولا في الوأدي أب سلم
.. ياخ يحيرك .
عليك الله شوف الكتابة دي .
نسيبو قال لي محمد المرتضي من زمن التساب هو قاطع حبلو وعندو جريدة حايطية أسمها ال CENTER .
عليك الله شوف
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
عثمان موسى
وباقي شوايقة البورد
جرحتو صيامنا وبطريقتكم دي ح تفطرو ليكم زول
الفيديو العلقه عثمان موسى باهر
و أبهر مافيه ، أو قول اللفت إنتباهي حاجتين :
الأولى : أن الرقص الشايقي بيتوارث جيلآ بعد جيل
شابات واضح من زيهن إنهن بنات خرطوم ، يتقنن الرقص
وهذا دليل على ان هذا الفن الراقي لن ينتهي
الثانية : وكأن الكيزان مادخلو ديار الشايقية ، مازال الناس هناك
محافظين على سيلقتهم وطبيعتهم بدون أي تعقيدات
والنساء يرقصن بإطمئنان وثقة فيمن حولهن
| |
|
|
|
|
|
|
|
|
|
Re: حفلة شوايقة . نار الله (Re: أبو ساندرا)
|
عزيزنا أبو ساندرا
سلامات
ورمضان كريم عليك وعلي الأسرة الكريمة .
عندنا عمنا يا أبو ساندرا بحكي لينا عن علاقة الرقص بالصحة العامة وبالرفاهية .
..
قال : في أيام حكم الملك السنوسي لليبيا نحن كنا في أول دفعة من المهندسين والعمال نسافر لليبيا
مع المقاول والمعماري المهندس السوداني جابر أبوالعز .
قال : الملك بعد ما شاف المعمار في الخرطوم في نهاية الخمسينات وبداية الستينات قال ماداير الا السودانيين .
قال : جابر أبوالعز وبعض من الشركات السودانية دخلت قبل المصريين والاتراك .
وحقيقة ديك كانت أيام النهضة المعمارية والتعليمية في ليبيا
أها يازول جابو لينا الفنان النعام أدم لزوم الترفيه وكدي .
قال : أول مسرح يتعمل من الترلات في ليبيا أتعمل للنعام .
وأول مايك يتنقر أتنقر للنعام .
قال : الزول ده عندو مقطوعات براو .. بالطمبور
وفي وأحد بس من الشيالين البقدر يعزف بعض من مقطوعاتو بي الطمبور حقو لزوم يدي النعام فرصة يرقص في مقطوعة منهن .
أها يازول النعام ديك الأيامات كان دأبو صبي ولتيت . أها ونزل مصع جاي ومصع جاي وطار وبرك وصاح وحلق في جهات
ما مخبورة وين .
قال جابر أبوالعز كان جايب معانا مهندس أنجليزي من برايتون
قال : بعد الحفل أنا كنت من الناس الجابو صينية العشاء للنعام وكان معاو في الصينية المهندس الانجليزي .
قال : الانجليزي قال لي تقول لي أنتو بتاعين هندسة و CONSTRUCTION ؟
ياخ ده الفن المافي منو .
وعليك الله يا أبوساندرا أرجع تاني للفيديو بتاع طارق . عشان كريستيانو رونالدو زاتو تاني ما يعمل لينا فيها قومة وقعدة .
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
يا محمد المرتضي
ياخ كل مره ادور أشخبت لي كلمتين عن المرحوم محمد عبدالرحمن المطرطش
وعن ونستو عن رقصة بنات كريمة الرقصة الاسمها قطر ال EXPRESS وأقوم أنشغل بالترحم علي روحو .
ويروح مني الكلام .
ربنا يرحمو . الرجل كان مشتاق للقدلة بي هناك . كان مشتهي يدردق .
... ربنا يرحمو .
وكلنا منها وأليها يازول .
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
يا أبوساندرا يا عزيزنا
عمك الحاردلو قال : في بشارات الخريف
قال :
الخبر الاكيد قالوا ... البطانه اترشت
وساريتن تبقبق .. للنهار ما اتفشت
بس يا أبوساندرا يا أخوي الخبر الاكيد أكتر من خبر عمك الحاردلو ده
خبر أكتشاف أهلك الامريكان للفايتمينات العجيبة الفي تمر البركاوي بتاع الجماعة .
الخبر الاكيد يا أبوساندرا الامريكان أكتشفوا أنو مافي شيء وأحد بعمل SUPPORT للقلب خلاف ال MULTIVITAMIN بتاع التمر البركاوي .
حبة وأحدة منو قالوا لو الزول تحت سن ال 60 يرجع لي تحت سن ال 25 وههههههها وهههههها وه .
الفيديو الفوق يا أخوي ما عادي .
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
| Quote: قال : الانجليزي قال لي تقول لي أنتو بتاعين هندسة و CONSTRUCTION ؟ |
الإنجليزي دا يا عثمان مفهومو للهندسة والإنشاءات يحتاج لمراجعة ..
الهندسة دي يا عثمان ما بتشبه إلا الهندسة..
اللهم لاتؤاخذنا بما فهم الإنجليز عن الهندسة..
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
مرحب عزيزنا الفنان كوستاوي
سلامات
ورمضان كريم
نعم يا كوستاوي نجاض وحلاوة وحمار وتكريب وفهم .
ده الجيل الطلع من العصيدة كنافة .
ومن جلد الباعوضة طاقية .
سنة 2014 يا كوستاوي الطمبور حيدخل ند للجيتار أبورقبة .
وما بعيد تلاقي الشيالين مع الفنان صديق في التايم أسكوير يشيلو مع ( شان جون باف دأدي )
الطمبور أصلو ما حيظل مسجون ما بين أسوان في صعيد مصر والخرطوم .
لا لا .
زي ما عمك حمزة قدر يدخل الطمبور لناس أميقو في براري المكسيك
حيجوك برضو ناس ولدك المدهش النصري طالعين بيه رأس الامبير أستيت .
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
Quote: ياخ كل مره ادور أشخبت لي كلمتين عن المرحوم محمد عبدالرحمن المطرطش
وعن ونستو عن رقصة بنات كريمة الرقصة الاسمها قطر ال EXPRESS وأقوم أنشغل بالترحم علي روحو .
ويروح مني الكلام .
ربنا يرحمو . الرجل كان مشتاق للقدلة بي هناك . كان مشتهي يدردق .
... ربنا يرحمو .
وكلنا منها وأليها يازول . |
رحمة الله تغشى حبيبنا محمد،
والله يا عثمان إفتقدته وافتقدت محادثاته الليلية وإيميلاته التي يكتبها
بذات اللهجة الشايقية وكان آخرها يوم رحيله..
كلنا ضيف في هذه الفانية ، فقط نسأله حسن الخاتمة..
لو كان بيننا اليوم..
إنا لله وإنا إليه راجعون..
| |
|
|
|
|
|
|
|
|
|
Re: حفلة شوايقة . نار الله (Re: محمد المرتضى حامد)
|
يا محمد المرتضي
ياخ أنت زول عندك حكم عجيبة .
أتذكرتو كلامك عن عدم حظ السودان
وموت الناس الجميلين قبل ما أي وأحد فيهم يتم مشروعو .
بتذكر يا محمد جيت لصاحبك أستاذ حسن ساتي في بيتو في لندن منطقة رويال أوك عشان أتونس معاو بي
عرس عزيزنا عماد بخيت . والحفلة الكانت بي صديق أحمد . وأهلو الشايقية
فتحت الباب لقيت معاو جماعة منهم المرحوم الفنان أحمد ربشة وكان كلام حسن ساتي كلو عن محاولة القيام بتسجيل
حلقات مع المبدع أحمد ربشة يغني ويحكي فيها عن أصحابو وعن تطور الغناء في السودان الفترة بين 1976 ___ 1980 .
.......
| |
|
|
|
|
|
|
|
|
|
Re: حفلة شوايقة . نار الله (Re: Osman Musa)
|
عثمان موسى :
Quote: الخبر الاكيد يا أبوساندرا الامريكان أكتشفوا أنو مافي شيء وأحد بعمل SUPPORT للقلب خلاف ال MULTIVITAMIN بتاع التمر البركاوي .
حبة وأحدة منو قالوا لو الزول تحت سن ال 60 يرجع لي تحت سن ال 25 وههههههها وهههههها وه .
الفيديو الفوق يا أخوي ما عادي . |
بركاوي وتصير ودأبرك
غايتو عارف واحد من جهة جلاس
قال جده تزوج بعد بلغ الثمانين و ملاء ليهم البيت شفع
أتاري ده كله من البركاوي
عارفك ح تفطرني
ولسع بتحرضني على الشوف
| |
|
|
|
|
|
|
| |
Osman Musa
usama Babiker
طارق جبريل
saidahmed shami
محمد المرتضى حامد
Kabar
عثمان مكي
وضاحة
Mohammed Haroun
cantona_1
منصوري
MOHAMMED ELSHEIKH
مجاهد محمد الهادي
أبو ساندرا
Kostawi
فيس بوك
تويتر
انستقرام
يوتيوب
بنتيريست